Binmour Eo An Christ Ial In Lomor Eo An Anij

“Bwe kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.”​—JON 3:16.

1, 2. Kwalok abañ eo ear jelet armij otemjej.

BAJ LEMNAK mõk kwoj eñtan kin juõn nañinmij im kwonaj mij elañe kwojjab mwijmwij. Naj ewi am lemnak elañe joñan an lap wõnãn mwijmwij eo ej ellã jen am maroñ kõllã? Meñe ro uan family eo kab ro jeram rar kakobaik money ko air ta elañe rar jab maroñ kõllã Ñan jelmae kain abañ rot in ekauwatata kin mour emaroñ juõn men ekabwokbwok!

² Men in ej juõn wanjoñok kin men eo ear walok ñan armij ro otemjej. Jemed im jined moktata, Adam im Eve, rar wãppen. (Duteronomi 32:4) Kejatdikdik ñan mour indio kar bed ibbeir im ñan kajejjet kitien karõk eo Anij: “Komin timon im orlok, im kobrõk lõl, im kajur jen e.” (Jenesis 1:28) Bõtab, Adam im Eve rar jumae Ri Kõmanmõn eo air. (Jenesis 3:1-6) Air jab bokake ear bõktok jerawiwi jab ñan Adam im Eve wõt ak bareinwõt ñan ri nejiir. Ri tiljek eo Job ear ba tokelik: “Wõn e maroñ in bõktok juõn men erreo jen eo etton? Ejelok juõn.”​—Job 14:4.

3. Ewi wãwen mij ear jededlok ñan armij otemjej?

³ Jerawiwi ej einwõt juõn nañinmij ej kabobo kij kajjojo, bwe Bible ej ba bwe armij “otemjej r’ar jerawiwi.” Men in ej jelet mour eo ad im ekauwatata. Emol, “wõnan jerawiwi, mij.” (Dri Rom 3:23; 6:23) Ejelok juõn iad jemaroñ ko jen men in. Armij otemjej rej jerawiwi, inem, armij otemjej rej mij. Einwõt ro jibwin Adam, jar lotak ilo jerata rot in. (Sam Ko 51:5) “Einwõt kin juõn armij,” Paul ear je, “jerawiwi ej dreloñ ilo lõl, im mij kin jerawiwi; im ein drein mij e ar itok ion armij otemjej, bwe ir otemjej r’ar jerawiwi.” (Dri Rom 5:12) Ak men in ejjab melelen bwe ejelok kejatdikdik kin lomor ibbed.

Jolok Jerawiwi im Mij

4. Etke armij ro make rejjab maroñ jolok nañinmij im mij?

⁴ Ta eo ej aikwiji ñan jolok jerawiwi im mij? Alikar, juõn men elaplok jen men eo jabdewõt armij emaroñ letok. Ri jeje psalm ear liãjlol: “Ejelok lap in wõnãn mour an armij. Joñan kõllã wõnãn kin mour eo an armij eban karioje jen lũp eo, bwe en mour ñan in dio.” (Sam Ko 49:8, 9, Today’s English Version) Emol, jemaroñ kaetoklok mour eo ad bar jejjo wõt yiõ ko ikijen ad mõñã mõñã ko reõnkipdeir im kejbãrok ejmour eo ad, ak ejelok juõn iad jemaroñ jolok jerawiwi eo jar jolete. Ejelok juõn iad jemaroñ oktaklok wãwen rittolok im kejmour enbwinid ñan wãppen ilo wãwen eo Anij ear kõmanmõne. Paul ear jab kalaplap ke ear je bwe kin an Adam jerawiwi, armij otemjej rar “kõtaik [ir] ñõn jekron”​—ak einwõt The Jerusalem Bible ear ukõte, rar “jab maroñ kajejjet kitien karõk eo an [Anij].” (Dri Rom 8:20) Mõnõnõ, bwe, Ri Kõmanmõn eo ear jab ilok jen kij. Ear karõk ñan jolok jerawiwi im mij ñan indio. Ewi wãwen?

5. Ewi wãwen Kien eo kar lelok ñan Israel kalikar aorõkin ekajet jimwe?

⁵ Jehovah ej “yokwe wãnik im ekajet” jimwe. (Sam Ko 33:5) Kien eo ear lelok ñan Israel ear kwalok joñan wõt juõn ilo aorõkin im etale im ekajet jimwe. Ñan wanjoñok, ilo kien kein, jej konono bwe ‘kwo naj nawõnan mour kin mour.’ Melelen men in bwe, elañe juõn ri Israel ear urõt juõn armij, ear aikwij lelok mour eo an ilo mij kin armij eo ear urõte. (Exodus 21:23; Bwinbwin 35:21) Ilo wãwen in kein paun in ekajet jimwe enaj balan.​—Keidi Exodus 21:30.

6. (a) Ilo wãwen et eo rar naetan Adam einwõt ri uror? (b) Kain mour rot Adam ear luji, im kain katok rot eo kar aikwiji bwe ekajet eo en jimwe im jokkin wõt juõn?

⁶ Ke Adam ear jerawiwi, ear erom juõn ri uror. Ilo wãwen et? Ilo wãwen eo ear lelok jerawiwi​—im mij—ñan jibwin otemjej. Eñin unin kin an Adam jab bokake, enbwinid ej jorrãnlok, im emmakitlok ñan lũp eo lũpen armij ilo ien in kiõ. (Sam Ko 90:10) Jerawiwi eo an Adam ear wõr juõn tokjen elaplok an nana. Kememej wõt, men eo Adam ear luji kin e im ro nejin kar jab baj juõn mour wõt ej 70 ak 80 yiõ aetokin. Ear luji mour wãppen​—emol, mour indio​. Inem elañe jej aikwij ‘nawõnan mour kin mour,’ kain mour rot ej aikwiji ñan kajejjet ekajet jimwe ilo men in? Ilo mol, enaj kar aikwij wõr mour wãppen​—juõn mour, einwõt an Adam, ear maroñ keutak ajiri ro rewãppen. Elañe ear lelok e einwõt juõn men in katok, mour in armij ewãppen enaj jab kajejjet kein paun in ekajet jimwe wõt ak bareinwõt enaj kar jolok jerawiwi im mij.

Jolok Wõnãn Jerawiwi

7. Kwalok melele eo kin nan in “binmour.”

⁷ Bible eo ej naetan wõnãn jeorlok kij jen jerawiwi einwõt juõn “binmour.” (Sam Ko 49:7) Ilo kajin English nan in emaroñ jitõñlok ñan wõnãn eo juõn ri kwot ej kajitõk kake ñan wiaik armij eo ear kwote. Emol, binmour eo Jehovah ear lelok ejjab ñan wiaik juõn armij emwij kwote. Melele eo ñan nawõnãn ej juõn wõt. Emol, nan in kajin ilo Hebrew “binmour” ej melelen “ñan kalibubu.” Ñan nawõnãn jerawiwi, joñan binmour eo ej aikwij kalibubu im kon men eo ear kalibubuik e.​—mour eo ewãppen an Adam.

8. (a) Kamelele kin melelen bar wiaik armij. (b) Ewi wãwen kien bar wiaik armij ej jerbal ñan kij einwõt ri jerawiwi ro?

⁸ Men in ej ekkar ñan nan in kaiñi eo ilo Kien eo Anij ear lelok ñan Moses​—kien eo ñan bar wiaik armij. Elañe juõn armij ear jeramel im wiakake e ñan juõn ruwamaejet, juõn ian nukin eo ejeramel emaroñ kar bar wiaik [ak, binmour] e ilo an kõllã ejja joñan wõt wõnãn juõn ri kamakoko. (Livitikõs 25:47-49) Bible ej ba bwe einwõt armij ro rejjab wãppen jej “kõrijer ñõn jerawiwi.” (Dri Rom 6:6; 7:14, 25) Ta eo ej aikwij ñan bar wiaik kij? Einwõt emwij ad loe, ej aikwij wõr juõn mour wãppen ñan nawõnãn mour wãppen eo emwij luji​—jab ellã lok, jab diklok jen wõnãn.

9. Ewi wãwen an kar Jehovah letok men in letok eo ñan kalibubuik jerawiwi?

⁹ Emol, jej lotak ilo jab wãppen. Ejelok juõn iad jej joñan wõt juõn ibben Adam; ejelok juõn iad jemaroñ nawõnãn binmour eo ñan kajejjet ekajet jimwe. Einwõt emwij an kamelele ilo jinoin katak in, ej einwõt ad bõk juõn nañinmij ekauwatata ñan mour eo ad im ej jabwe money ibbed ñan kõllã wõnãn mwijmwij. Ilo kain wãwen rot in, jejjab mõnõnõ ke elañe jabdewõt armij enaj kar jibañ kij ñan kabwe wõnãn eo? Eñin men eo Jehovah ear kõmmane! Ear letok juõn men ñan wiaik kij jen jerawiwi, ñan indio. Aet, ej mõnõnõ in letok ñan kij men eo jejjab make maroñ wiaiki. Ewi wãwen? “Men in joij an Anij,” Paul ear je, “mour in drio ilo Kraist Jisõs ar Iroij.” (Dri Rom 6:23) John ear kalikar Jesus einwõt “Lam an Anij, Eo ej bõklok an lõl jerawiwi.” (Jon 1:29) Jen lale ekijkan Jehovah ear kajerbal Nejin eo ejitenburu ñan nawõnãn binmour eo.

“Juõn Binmour Ejejjet”

10. Ewi wãwen nan in kanan ko ikijen juõn “ine” jitõñlok ñan Joseph im Mary?

¹⁰ Elikin wõt jumae eo ilo Eden, Jehovah ear kejelã kin karõk eo an ñan letok juõn “ine,” ak nejin, eo enaj binmouri armij jen jerawiwi. (Jenesis 3:15) Ikijen elõñ kamelele ko rekwojarjar, Jehovah ear kalikar lajrak in family eo ine eo enaj kar walok jen e. Tokelik, kamelele ko rar jitõñlok ñan Joseph im Mary, leo im lio rebojak in mare im rej jokwe ilo Palestine. Ilo juõn ettõnak, an kar jiroñ Joseph bwe Mary ear bõroru ikijen jitõb kwojarjar eo. Enjel eo ear ba: “E naj keutak nejin man, im kwo naj likit etan Jisõs, bwe E naj lomoren ro dron jen jerawiwi ko air.”​—Matu 1:20, 21.

11. (a) Ewi wãwen Jehovah ear karõk bwe Nejin en lotak einwõt juõn armij ewãppen? (b) Etke Jesus ear maroñ in lelok juõn “binmour ejejjet”?

¹¹ Bõroru in ear jab baj juõn bõroru wõt, kinke Jesus ear mour ilañ mokta jen an kar itok ion lal. (Jabõn Kennan Ko 8:22-31; Dri Kolosse 1:15) Kajur eo an Jehovah ear ukõt mour eo an ñan lojen Mary, bwe Nejin Anij ejitenburu en lotak einwõt juõn armij. (Jon 1:1-3, 14; Dri Pilippai 2:6, 7) Jehovah ear tel wãwen kein ñan kejbãrok Jesus jen jerawiwi eo an Adam. Kin men in Jesus ear lotak ilo wãppen. Ilo wãwen in, ear wõr men eo Adam ear luji​—mour in armij ewãppen. Kiõ, juõn armij ear maroñ kõllã kin wõnãn jerawiwi! Im men in Jesus ear kõmmane ilo Nisan 14, 33 C.E. Ilo ran in eaorõktata, Jesus ear kõtlok bwe ri jumae ro ren mõne ñan mij, im ilo wãwen in ear letok “juõn binmour [ejejjet, NW].”​—1 Timote 2:6.

Tokjen Mour in Armij Ewãppen

12. (a) Kwalok oktak eo ikõtan mij eo an Jesus im mij eo an Adam. (b) Ewi wãwen Jesus ear erom “Jemen in drio” ñan armij ro rekiblie?

¹² Ewõr oktak ikõtan mij eo an Jesus im mij eo an Adam​—juõn oktak ej kalikar tokjen binmour eo. Adam ear aikwij mij, bwe ear beek ñan jab bokake Ri Kõmanmõn eo. (Jenesis 2:16, 17) Ak, ear jab tellokin bwe Jesus en mij, kinke “e ar jab kõmõn nana.” (1 Piter 2:22) Inem ñe Jesus ear mij, ekar wõr juõn men elukkun lap tokjen ear jab bed ibben Adam ri jerawiwi eo ñe ear mij​—mour in armij ewãppen. Inem, mij eo an Jesus ear wõr tokjen einwõt men in jortak. Ke ear wanliñlok ñan lañ einwõt juõn jitõb, ear lelok ñan Jehovah tokjen men in jortak in. (Dri Hibru 9:24) Ilo an kõmman men in, Jesus ear wiaik armij ro rejerawiwi im erom Jemeir ekãl, im bõk jikin Adam. (1 Dri Korint 15:45) Eñin unin, kar naetan Jesus “Jemen ien in drio.” (Aiseia 9:6) Baj lemnak kin ta melelen men in ñan kij! Adam, juõn jemen ejerawiwi, ear kajededlok mij ñan ro nejiir. Jesus, Jemen ewãppen, ej kajerbal tokjen katok eo an ñan lelok mour indio ñan armij ro rekiblie.

13. (a) Kamelele kin ewi wãwen Jesus ear jolok muri eo an Adam (b) Etke mij eo an Jesus ejjab kalibubuik jerawiwi eo an jemed im jined moktata?

¹³ Bõtab, ewi wãwen mij eo an juõn wõt armij emaroñ jeorlok jerawiwi eo an elõñ armij? (Matu 20:28) Ilo juõn katak jejjo yiõ ko remotlok, jaar wanjoñok kin binmour eo ilo wãwen in: “Baj lemnak kin juõn jikin jerbal elap im elõñ buki ri jerbal rej jerbal ijo. Juõn manager ilo jikin jerbal eo ej bankrupt im kokkure business eo; jikin jerbal eo ej kiilek business eo. Elõñ buki ri jerbal ro kiõ ejelok air jerbal im rejjab maroñ kõllã muri ko air. Ro beleir, ro nejiir, im aet, ro rar lelok muri ko aolep rej eñtan kin an juõn wõt armij kõmman nana! Inem ej itok juõn ri mweie eo ej kõllãik muri eo an business eo im bar kabellok jikin jerbal eo. Ilo an jeorlok juõn wõt muri, elõñ ri jerbal ro, family ko, im ro rar lelok muri rar rõlok jen jorrãn. Ak manager eo jinoin emaroñ ke bõk tokjen jen oktak in emõn im kãl? Jaab, ej bed ilo kalbuj im ej jako jen jerbal eo an ñan indio! Ilo ejja wãwen dein, jeorlok muri eo an Adam ear bõktok tokjen ko ñan elõñ million ro nejin​—ak jab ñan Adam.”

14, 15. Etke jemaroñ naetan Adam im Eve einwõt ri jerawiwi ro rejelã, im ewi oktak eo ikõtan wãwen eo air im wãwen eo ad?

¹⁴ Men in ej juõn ekajet ejimwe. Kememej, bwe Adam im Eve rar jerawiwi ilo jelã. Rar kãlet in jab bokake Anij. Keidi men in, jej lotak ilo jerawiwi. Jekdon ewi joñan ad kate wõt kij, jejjab maroñ bõpraek kij jen jerawiwi. (1 Jon 1:8) Jet ien jemaroñ lemnak einwõt Paul, eo ear je: “Bwe nana ej ber iba, ña I kõnan kõmõn emõn. Bwe ij lõñliñ ilo kien Anij ekar ñõn armij eo iloan. A ij lo bwe juõn kien ilo raõ, ej tõrinaek kien aõ lolãtãt, im kajibokweik iõ ñõn kien jerawiwi eo ej ber ilo raõ. O ña armij iñtan!”​—Dri Rom 7:21-24.

¹⁵  Ak, kin binmour eo, ewõr kejatdikdik ibbed! Einwõt an kar Anij kallimur kake, Jesus ej ine eo me, “dri ailiñ otemjej i lõl re naj [bõk] jerammõn” jen e. (Jenesis 22:18; Dri Rom 8:20) Katok eo an Jesus ej kabellok kejam eo ñan elõñ jibadbad ko remõn ñan ro rej jerbale tõmak eo air ilo e. Jen lale jet iair.

Bõk Tokjen Jen Binmour eo an Christ

16. Meñe jej ri jerawiwi, ta tokjen ko jemaroñ lañliñ kake kin wõt binmour eo an Jesus?

¹⁶ Ri jeje Bible eo James ear kile bwe “jej otemjej tibñil.” (Jemes 3:2) Kin binmour eo an Christ, elap ad mõnõnõ bwe ewõr ial in jeorlok bwid. John ear je: “Elañe jabrewõt armij ej jerawiwi, juõn ar Dri Jojomar iben Jemer, Jisõs Kraist Dru Wãnik: Im E ken mirik kin jerawiwi ko ar, im jab kin ar wõt, a bareinwõt kin aolepen lõl.” (1 Jon 2:1, 2) Emol, jejjab kõnan watõk bwe jerawiwi ej juõn men bajjek. (Jud 4; keidi 1 Dri Korint 9:27.) Bõtab, elañe jej kõmman bwid, jemaroñ lutõklok buruõd ñan Jehovah, im liki bwe e “kõnan jeorlok.” (Sam Ko 86:5; 130:3, 4; Aiseia 1:18; 55:7; Jerbal 3:19) Inem binmour eo ej kamaroñ kij ñan karejar ñan Anij kin juõn bõklikit erreo im kamaroñ kij ñan kebak e ilo jar ilo etan Jesus Christ.​—Jon 14:13, 14; Dri Hibru 9:14.

17. Kin binmour eo, ta jerammõn ko imad jemaroñ mõnõnõ kaki?

¹⁷ Binmour eo an Christ ej kabellok ial eo ñan kajejjet kitien karõk eo an Anij​—bwe armij ro ri kiblie ren mour indio ilo Paradise ion lal. (Sam Ko 37:29) Paul ear je: “Bwe ñe jabrewõt oran kallimur an Anij, ilo E [Jesus] aet eo.” (2 Dri Korint 1:20) Mol, mij ear “iroij [einwõt king, New World Translation].” (Dri Rom 5:17) Binmour eo ej letok juõn bedbed ñan Anij bwe en jolok “dri kijirãt [in] eliktata.” (1 Dri Korint 15:26; Reveles̃õn 21:4) Binmour eo an Jesus emaroñ lelok tokjen ñan ro remij. “Auõ ej itok,” Jesus ear ba, “[im] ro otemjej rej ber ilo lũp ko, re naj roñ ainiken [Jesus], im naj driojtok.”​—Jon 5:28, 29; 1 Dri Korint 15:20-22.

18. Ta jerata eo jerawiwi ear bõktok ñan armij ro, ewi wãwen men in enaj oktak ilo lal eo ekãl an Anij?

¹⁸ Baj lemnak kin joñan an naj lemõnõnõ ñe jej mour einwõt ilo jinoin​—ejelok eñtan ñan kaburomõj kij einwõt ran kein! Jerawiwi ear kokkure jokkad wõt juõn jab ibben Anij wõt ak bareinwõt ibben lolãtãt eo ad, buruõd, im enbwinid. Bõtab, Bible eo ej kallimur bwe ilo lal eo ekãl an Anij, “dri jokwe ie e jamin ba, I nañinmij.” Aet, nañinmij ilo kanniek im eñjake rejamin bar kaeñtan armij. Etke? Aiseia ej uak: “[E]naj jolok bwir an ro dri jokwe iloan.”​—Aiseia 33:24.

Binmour Eo​—Juõn Wãwen Yokwe

19. Ewi wãwen jej aikwij uak ñan binmour eo an Christ?

¹⁹ Yokwe ear kamakit Jehovah ñan jilkintok Nejin jitenburu eo an. (Dri Rom 5:8; 1 Jon 4:9) Im, yokwe ear kamakit Jesus bwe “en erjoñ mij ñõn armij otemjej.” (Dri Hibru 2:9; Jon 15:13) Kin juõn un emõn, Paul ear je: “Bwe yokwe an Kraist e relel ilo buruem; . . . Juõn e ar mij kin otemjej, inem ro otemjej r’ar mij. Im E ar mij kin otemjej bwe ro rej mour ren jab bar mour ñõn ir mõke, a ñõn Eo e ar mij im jerkakbiji kin ir.” (2 Dri Korint 5:14, 15) Elañe jej kamolol kin ta eo Jesus ear kõmmane ñan kij, jenaj uak ilo jimwe. Inem, binmour eo ej kanemkwoj kij jen mij! Alikar jejjab kõnan kwalok ilo kõmman ko ad bwe jej watõk katok eo an Jesus einwõt juõn tokjen bajjek.​—Dri Hibru 10:29.

20. Ta jet ian wãwen ko jemaroñ bokake “nan” eo an Jesus?

²⁰ Ewi wãwen jemaroñ kwalok kamolol jen buruõd kin binmour eo? Mokta wõt jen an kar bed ilo kamakoko, Jesus ear ba: “Elañe armij ej yokwe iõ, e naj kejbãrok Aõ in nan.” (Jon 14:23) “Nan” eo an Jesus ear koba kien eo an bwe jen kijejeto wõt im bõk kunad ñan kajejjet kitien nan in kaiñi in: “Komin ilok, im kõmõn dri ailiñ ko otemjej, bwe ren dri kalora, im baptais ir.” (Matu 28:19) Bokake Jesus ej melelen bareinwõt bwe jen kwalok yokwe ñan ro jeid im jatid ilo tõmak.​—Jon 13:34, 35.

21. Etke jej aikwij bed ilo kwojkwoj in Kememej mij eo an Jesus ilo April 1?

²¹ Juõn ian wãwen ko jemaroñ kwalok ad kamolol kin binmour eo ej ikijen ad bed ilo kwelok in Kememeje mij eo an Christ, eo enaj walok ilo April 1 ilo yiõ in.a Men in bareinwõt ej mõttan “nan” eo an Jesus, kinke ke ear jinoe kwojkwoj in, Jesus ear kaiñi ri kalor ro an: “Komin kõmõn men in ilo ememej Iõ.” (Luke 22:19) Ilo ad bed ilo kwelok in eaorõktata im lukkun lolorjake aolep men Christ ear kaiñi kij kake, jenaj kamol tõmak eo ad ebin bwe binmour eo an Jesus ej ialin Anij ñan lomoren armij. Emol, “mour ilo ejelok bar juõn.”​—Jerbal 4:12.

[Kamelele eo itulal]

Kwomaroñ Kememej Ke?

◻ Etke armij ro make rejjab maroñ kajeorlok ir jen jerawiwi?

◻ Ilo wãwen et eo Jesus ear juõn “binmour ejejjet”?

◻ Ewi wãwen Jesus ej kajerbal maroñ in mour wãppen eo an ilo wãwen eo ewõr tokjen ie?

◻ Ta jerammõn ko rej itok ñan armij kin binmour eo an Christ?

[Pija eo ilo peij 21]

Juõn armij wãppen wõt​—joñan wõt Adam​—ear maroñ kajejjet ekajet eo ilo jimwe im wãnik

[Pija eo ilo peij 22]

Kin an kar Jesus wõr mour indio, ear lap tokjen katok in mij eo an