Ewi Wãwen Mij eo an Jesus Emaroñ Lomoren Yuk
ENAÑIN 2,000 yiõ ko remotlok, ilo ien kwojkwoj in Kijone eo an ri Jew ro ilo 33 C.E., juõn armij ejelok ruõn ear mij bwe ro jet ren mour. Kar wõn eo? Jesus ri Nazareth eo. Im wõn ro remaroñ bõk tokjen jen mij eo an? Armij otemjej. Juõn eon ebuñbuñ ilo Bible eo ej kamelele kin menin katok in ej lomoren armij: “Bwe kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.”—Jon 3:16.
Meñe elõñ armij rejelã kin eon in, eiet wõt rejelã kin ta melelen. Rej kajitõk: ‘Etke jej aikwiji menin katok eo an Christ? Ewi wãwen mij eo an juõn armij emaroñ lomoren armij ro jen mij indio?’ Bible eo ej kwalok uak ko ralikar im juburu ñan kajitõk kein.
Wãwen eo Mij ear Iroij Ion Armij Otemjej
Jet armij rej tõmak bwe Anij ear kõmanman ir bwe ren mour jidik wõt ien ion lal, jelmae abañ ko, lo mõnõnõ jidik, im mij im etal ñan bar juõn jikin emõnlok. Ekkar ñan lemnak rot in, mij ej mõttan karõk eo an Anij ñan armij ro. Bõtab, Bible eo ej kwalok bar juõn un, unin an armij ro mij. Ej ba: “Kin men in, einwõt kin juõn armij, jerawiwi ej dreloñ ilo lõl, im mij kin jerawiwi; im ein drein mij e ar itok ion armij otemjej, bwe ir otemjej r’ar jerawiwi.” (Dri Rom 5:12) Eon in ej kwalok bwe unin an armij ro mij ej kin jerawiwi. Bõtab, kar wõn “juõn armij” me ear kõmman bwe armij otemjej ren jolet jerawiwi?
The World Book Encyclopedia (Book in Bwebwenato ko Ibelakin Lal) ej kamelele bwe enañin aolep scientist ro rej tõmak bwe aolep armij rar itok jen juõn wõt armij, im Bible eo ej kwalok ilo alikar wõn in—‘juõn emaan.’ Ilo Jenesis 1:27, jej read: “Im Anij e ar kõmõnmõn armij ilo wãwen wõt E, ilo wãwen Anij e ar kõmõnmõn e; man im kõra E ar kõmõnmõn ir.” Inem, Bible eo ej kwalok bwe armij ro ruo moktata Anij ear kõmanman ir ñan nebar im kaibujuij Anij Bõtata.
Bwebwenato eo ilo book in Jenesis ej kwalok kamelele ko jet kin mour an armij elikin Jehovah Anij ear kõmanman armij eo moktata. Ej juõn men ekaitoktoklimo, bwe ilo aolepen bwebwenato eo, Anij ear ba bwe mij ej itok wõt jen an armij jab bokake. (Jenesis 2:16, 17) Ear kõnan bwe armij ren mour ilo juõn jikin eaibujuij ion lal, ilo mõnõnõ im ejmour ñan indio. Ear jab kõnan bwe ren eñtan kin abañ ko kin bwijwõlã im tokelik mij. Inem, ewi wãwen, mij ear iroij ion armij otemjej?
Ilo Jenesis chapter 3 bwebwenato eo ej kwalok kin wãwen armij ro ruo moktata rar beek ñan jab bokake Ri Letok Mour eo air, Jehovah Anij. Inem, Anij ear kajejjet nan in ekajet eo an me ear kwalok ñan ir ilo ien eo lok iman. Ear ba ñan emaan eo: “Bwe brij kwe, im ñõn brij kwo naj jeblak.” (Jenesis 3:19) Emol bwe ekkar ñan nan eo an Anij, armij ro ruo rekiblia rar mij tokelik.
Bõtab, jorrãn eo, ear jab jelet wõt armij ro ruo moktata. Rar kokkure kejatdikdik eo an ro nejiir kin mour indio im lañliñ ilo air jab bokake. Jehovah ear kakobaik armij ro rejañin lotak ilo karõk eo an ke ear jiroñ Adam im Eve: “Komin timon im orlok, im kobrõk lõl, im kajur jen e; im komin iroij ion iik in lojit, im ion bao in mejatoto, im ion men otemjej rej mour im makõtkit ion lõl.” (Jenesis 1:28) Ilo ran ko tokelik, armij ro renaj kar kobrak lal im lo mõnõnõ ñan indio. Ak jimmair Adam—eo me Bible ej naetan “juõn armij”—ear wia kake ir einwõt ri kamakoko ñan jerawiwi, im ilo jemlokin, mij. Ri jilek Paul, eo ear bar itok jen armij eo moktata, ear je: “Ña ij kõniek wõt, emwij wiakake iõ iomin jerawiwi.”—Dri Rom 7:14.
Kin an jerawiwi, Adam ear lukkun kokkure menin kõmanman eo an Anij ekanuij in emõn—armij ro. Ro nejin Adam rar neje, im tokelik rar bar keotak ajiri ro jibwin Adam, im wõnmanlok. Armij ro ilo ebeben ko tokelik rar rittolok im neje, im tokelik rar mij. Ta unin rar mij? Kinke rar itok jen Adam. Bible eo ej ba: “Elõñ armij rar mij kin wõt jerawiwi eo an armij in.” (Rome 5:15) Nañinmij, rittolok, juõn kõnan ibbed ñan kõmmane men ko rejjab jimwe, im mij, men kein aolep rej wõnãn jerawiwi an Adam ear bõktok ion family eo an make. Kij aolep jej mõttan family in.
Ilo letter eo an ñan Ri Christian ro ilo Rome, ri jilek Paul ear jeje kin jab wãppen eo an armij, im ear kobaike emake einwõt juõn iair, im kin tarinae eo nae tokjen ko jen jerawiwi. Ear ba: “O ña armij iñtan! Wõn e naj kõtlok iõ jen enbwinin mij in?” Emõn ke kajitõk in? Wõn eo ear maroñ lomoren Paul—im ro jet me rar kõnan anemkwoj—jen jerawiwi im mij? Paul ear make kwalok uak eo: “Ij kamolol Anij kin Jisõs Kraist ar Iroij!” (Dri Rom 7: 14-25) Aet, Ri Kõmanman eo ad emwij an karõk wãwen eo ñan lomoren kij ikijen Nejin, Jesus Christ.
Jerbal an Jesus ilo Karõk an Anij Ñan Lomoren Armij
Jesus ear kamelele kin karõk eo an ñan lomoren armij jen air jerawiwi im mij. Ear ba: “Nejin armij e ar . . . lelok An mour bwe En binmour ñõn ro relõñ.” (Matu 20:28) Ewi wãwen mour eo an Jesus ej jerbal einwõt juõn binmour? Ewi wãwen jej bõk tokjen jen mij eo an?
Bible eo ej kameleleik Jesus einwõt eo “ejelok jerawiwi iben” im “emõkelok ian jen ro dri jerawiwi.” Ilo aolepen mour eo an, Jesus ear wãppen ilo an bokake kien eo an Anij. (Dri Hibru 4:15; 7:26) Kin men in, mij eo an Jesus, ear jab walok kinke ear jolet jerawiwi kin jab bokake einwõt mour eo an Adam. (Ezekiel 18:4) Jen men in, Jesus ear mij kinke ear kõnan kõmanman ankil an Jemen ñan lomoren armij jen jerawiwi im mij. Einwõt ej ba ilõñ, Jesus ear mõnõnõ ñan “lelok An mour bwe En binmour.” Ear emmakit ilo yokwe eo me ejelok armij enañin kar kwalok mokta im jeban keidi, Jesus ear “erjoñ mij ñõn armij otemjej.”—Dri Hibru 2:9.
Mour eo me Jesus ear karmijete ear joñan wõt juõn ibben mour eo Adam ear luji ke ear jerawiwi. Kar ta tokjen mij eo an Jesus? Jehovah ear bõk mour eo ear katok kake einwõt juõn “binmour ñõn armij otemjej.” (1 Timote 2:6) Ilo juõn wãwen, Anij ear kajerbal tokjen mour eo an Jesus ñan bar wiaik, ak lomoren, armij otemjej jen jerawiwi im mij.
Elõñ alen Bible eo ej kwalok kin yokwe elap jen Ri kõmanman eo an armij. Paul ear kakememej Ri Christian ro bwe “emwij wiaik [ir] kin juõn wõnan.” (1 Dri Korint 6:20; 7:23) Peter ear je bwe Anij ear kajerbal, jab gold ak silver, ak bõtõktõkin Nejin ñan lomoren Ri Christian ro jen mij. (1 Piter 1:18, 19) Ibben katok in binmour eo an Christ, Jehovah ear karõk juõn wãwen ñan lomoren armij jen ial eo ej tellok ñan mij indio.
Kwonaj Bõk Tokjen Ke Jen Binmour Eo An Christ?
Ñan kamelele kin ewi joñan kajurin tokjen ko jen binmour eo an Christ, ri jilek John ear je: “Im E [Jesus Christ] ken mirik kin jerawiwi ko ar, im jab kin ar wõt, a bareinwõt kin aolepen lõl.” (1 Jon 2:2) Aet, binmour eo an Christ ebellok ñan armij otemjej. Melelen men in ke bwe aolep armij ro otemjej renaj make bõk tokjen jen katok in binmour eo an Jesus meñe ejjab tellokiir? Jaab. Jemaroñ kememej kin bwebwenato eo ilo katak eo lok. Ri lomor ro rar lelallok juõn kein bõkliñtak armij ñan lomoren emaan ro me rar jab maroñ ko jen roñ eo, ak kajjojo ian emaan rein rar aikwij deloñ ilo kein bõkliñtak armij eo. Ilo ejja wãwen in wõt, ro rej kõnan bõk tokjen jen binmour eo an Christ reban baj kõttar wõt mae ien eo Anij ej bõktok jerammõn. Rej aikwij bõk eddo eo im jerbal ilo ekkar.
Kain jerbal rot Anij ej kalikar bwe jen kõmmane? John 3:36 ej jiroñ kij: “Eo ej liki Nejin, mour in drio an: im eo e jab liki Nejin e jamin lo mour: a illu an Anij ej ber ion.” Anij ej kalikar bwe jenaj aikwij tõmak ilo katok eo an Christ. Bareinwõt ebar wõr menin aikwij ko. “Im ilo men in je jela bwe jej jela E [Jesus], elañe jej kejbãrok kien ko An.” (1 Jon 2:3) Inem, ej alikar bwe wãwen eo ñan bõk lomor jen jerawiwi im mij ej bwe jen tõmak ilo binmour an Christ im bokake kien ko an.
Juõn wãwen eaorõk ñan kwalok ad tõmak ilo binmour eo an Jesus ej ikijen ad kwalok kamolol kin mij eo an ilo ad kememeje, einwõt ear kakien ilo Bible eo. Mokta jen an kar mij, Jesus ear kajutak juõn ien kejota ilo kõkkar ibben ri kalor ro an retiljek, im ear jiroñ ir: “Komin kõmõn men in ilo ememej Iõ.” (Luk 22:19) Ri Kennan ro an Jehovah rej kaorõk kõtan eo air ibben Nejin Anij, im rej bokake kien in. Ilo yiõ in, Kwojkwoj in kememej mij eo an Jesus Christ ear walok ilo Saturday, March 22, elikin wõt tulokin al. Kimij kirtok kwe ñan itok im bed ilo kwelok in ejej uan im bokake kien eo an Jesus. Ri Kennan ro an Jehovah ilo bukwon eo am remaroñ kwalok awa im jikin eo kwelok in enaj walok ie. Ilo kwojkwoj in kememej in kwonaj kalaplok am jelã kin ta eo kwoj aikwij kõmmane ñan bõk tokjen jen binmour eo an Christ, inem emaroñ kanemkwoj yuk jen tokjen ko rekauwatata jen jerawiwi eo an Adam.
Jet wõt armij ro rainin rej melele im kwalok kamolol kin katok in elukkun aorõk an Ri Kõmanman eo air im eo Nejin ñan lomor ir jen jorrãn. Ro rej beek ñan jerbale air tõmak ilo binmour rej lo juõn mõnõnõ ejej uan. Ri jilek Peter ear jeje kin Ri Christian ro mõttan: “Kin ami liki E [Jesus Christ] komij lõñliñ ilo lõñliñ elap jen maroñ in ba im eobrõk kin aibujuij: Im komij bõk tokjen ami tõmak, lomoren ami.” (1 Piter 1:8, 9) Ilo am kaddeklok yokwe im tõmak ilo katok in binmour eo an Jesus, kwomaroñ kobrak mour eo am kin lañliñ kiõ im reimanlok ñan am bõk lomor jen jerawiwi im mij.
[Pija eo ilo peij 6]
Jesus ear lelok mour eo an ñan nawõnãn jerawiwi eo an Adam
[Pija eo ilo peij 7]
Ilo yiõ in, Kwojkwoj in kememej mij eo an Jesus Christ ear walok ilo Saturday, March 22, elikin wõt tulokin al