Jab Ebwer Kin Inebata

“KOMIN jab inebata buruemi kin ilju; bwe ilju e naj inebata kin men ko an. Nana ilo ran ej bwe ñõn ran eo.” (Matu 6:34) Nan in kakabilek in me Jesus Christ ear letoke ej mol an keie ñan kij aolep im jej mour ilo jukjuk im bed in rainin eboub im eobrak kin men in kainebata ko.

Ak, ilo mol, jemaroñ ke jab inebata kin abañ ko, bebe ko, im eddo ko jej jelmaiki? Elõñ million armij rej eñjake air buromõj, rekõnan ebwer, im einwõt rej inek eddo ko relap. Eñin unin tranquilizer im sedative (uno ko ñan kainemõn enbwinid) ko ej juõn multimillion-dollar business.

Ijo Kwoj Aikwij Likit Line Eo Ie

Jej aikwij kõmman karõk im kebojak kin eddo ko, katak ko, bebe ko, im abañ ko ad​—meñe rej men in kakaiuriur kake ak jab. Bible ej rejañ kij ñan “jijõt mokta, im bebe kin wõnan” mokta jen ad jino juõn jibadbad elap. (Luk 14:28-30) Men in ej kitibuj ad lale jokãlet ko rej bellok, etale tokjen ko remaroñ walok, im lemnak kin wõnãn eo ikijen ien, joñan eo jej aikwij kate, im kin money eo jej aikwij kajerbale.

Meñe juõn ej aikwij etale kin ta eo emaroñ walok, ejjab juõn men ebidodo ñan kajeoñ in lemnak kin aolep men ko renaj walok. Ñan wanjoñok, ilo lemnak kin kejbãrok family eo am jen jorrãn kwomaroñ etale ta eo kom maroñ kõmmane elañe ej bwil mweo imwemi. Kwomaroñ wia im kõlaak smoke detector ko im fire extinguisher (kein ikkun kijeek) ko. Kwomaroñ karõk im kamelmel kin ial in ko jen jikin ko reoktak jen don ilo mweo. Ak ñããt eo karõk ko rekõmmanwa im keie rej oktak im inebata ko rele jen joñan im rejjab men in aikwij? Inebata rot kein rej ijjino ñe kwoj jino lemnak ilo ejelok jemlokin kin elõñ wãwen ko remaroñ walok. Lemnak ko am remaroñ kabõnõnõik yuk, im kõmman am eñjake bwe bõlen kwar likjap in lemnak kin juõn men ak ejjab bwe men ko kwar kõmmani ñan kejbãrok family eo am. Lemnak kein rekaeñtanan joñan air eddo remaroñ kõmman bwe kwon jab maroñ kiki.

Moses Ke Ear Bed Iman Pharaoh

Jehovah Anij ear lelok ñan ri kanan eo an Moses juõn jerbal ebin. Mokta, Moses ear aikwij walok iman Ri Israel ro im kamol ñan ir bwe Jehovah ear jitõñ e ñan tellok ir jen Egypt. Jeltokin, Moses ear aikwij walok iman Pharaoh im kajitõk bwe en kõtlok Ri Israel ro. Eliktata, Moses ear aikwij tel juõn jar elõñ million orair ilujen ene jemaden eo ñan iloan juõn ene armij ro relej rej jokwe ie. (Exodus 3:1-10) Aolep men kein rar maroñ men in kamijak, ak Moses ear kõtlok ke bwe eddo in en kobrak lemnak eo an kin inebata ko?

Alikar, Moses ear inebata kin elõñ abañ ko. Ear kajitõk ibben Jehovah: “Ñe I naj ilok ñõn iben ro nejin Israel, im naj ba ñõn ir, Anij an ro jimami E ar jilkinwoj iõ ñõn kom; im re naj ba ñõn iõ, Ãt õt etan? ta eo I naj ba ñõn ir?” Jehovah ear lelok uak eo ñan e. (Exodus 3:13, 14) Moses ear bareinwõt lemnak kin ta eo emaroñ walok elañe Pharaoh ear makoko in tõmak e. Bar juõn alen, Jehovah ear lelok uak eo ñan ri kanan eo. Abañ eo eliktata​—Moses ear kamol bwe “I jab melak.” Ewi wãwen remaroñ kamadmõde abañ in? Jehovah ear jitõñ Aaron bwe en ri konono eo an Moses.​—Exodus 4:1-5, 10-16.

Ilo an bojak kin uak ko ñan kajitõk ko an im ilo an tõmak Anij, Moses ear wõnmanlok im kõmman ekkar ñan ta eo Anij ear kakien ñan an kõmmane. Jen an kaeñtan e make kin lemnak ko rekamijak kin ta eo emaroñ walok ñe ej wõnmae Pharaoh, Moses ear “ein drein [an] kõmõne.” (Exodus 7:6) Elañe ear kõtlok bwe inebata ko ren anjo ion, men kein remaroñ naj kar kamõjnoik tõmak im beran eo ear aikwiji ñan kajejjet jerbal eo an.

Wãwen eo ejokkin wõt juõn Moses ear kajejjet jerbal eo an ej juõn wanjoñok kin ta eo ri jilek Paul ej naetan “lemnak in kõmmanwa.” (2 Timothy 1:7, New World Translation; Taitõs 2:2-6) Elañe Moses ear jab jerbale lemnak in kõmmanwa, enaj kar bidodo an ebwer kin joñan lapin jerbal eo an im emaroñ kar jab bõke.

Debdebij Lemnak ko Am

Ewi wãwen kwoj emmakit ñe kwoj iion melejoñ ak abañ ko kin tõmak eo am ilo mour eo am jen ran ñan ran? Kwoj wiwijet ke im lemnak wõt kin abañ ko im aitwerõk ko rej bed iman? Ak kwoj watõk ir ilo juõn wãwen ejokkin wõt juõn? Einwõt jet rej ba, ‘Jab kijone bridge eo mae ien kwoj kebake.’ Emaroñ jab wõr aikwij ñan kijone bridge eo! Inem etke kwoj kõtlok bwe juõn men me emaroñ jab walok en kaeñtan yuk? Bible ej ba: “Men in erro ilo buruen armij ej kokmwil e.” (Jabõn Kennan Ko 12:25) Tokjen eo ekkã an walok ej bwe armij eo enaj aibedbed in kõmman juõn bebe mae ien ej kõptata.

Elaplok an aorõk ej jorrãn eo ilo jitõb me emaroñ walok ñe ej le jen joñan am inebata. Jesus Christ ear kwalok bwe mon an mweiuk ko im “lemnok ko kin lõl in” remaroñ kautameik kamolol eo kin “nan in ailiñ eo.” (Matu 13:19, 22) Einwõt kãliklik ko remaroñ bõprae ine ko jen air eddeklok im kalle, eindein inebata ko ñe ele jen joñan remaroñ kautameik kij jen ad kõmman wõnmanlok ko ilo jitõb im kalle ñan nebar eo an Anij. Inebata ko rej kokkure im jej make kaeñtan kij kaki rar bõprae jet jen air wujleplok air mour ñan Jehovah. Rej inebata, ‘Ta elañe ijjab kajejjet wujleplok eo aõ?’

Ri jilek Paul ear jiroñ kij bwe ilo tarinae eo ad ilo jitõb, jej kate kij ñan “kajebokwe lemnok ko otemjej ñõn bokake Kraist.” (2 Dri Korint 10:5) Ri kijirãt eo ad, Satan Devil eo, ej mõnõnõ in kajerbal inebata ko ad ñan kabwer kij im ñan kamõjnoik kij ilo kanniek, eñjake, im ilo jitõb. Ej tijemlok in kajerbal bere ko ñan aujidi ro rejjab ekkõl. Eñin unin Paul ear bareinwõt kakkõl Christian ro ñan jab “najikin devil eo.” (Dri Epesõs 4:27) Einwõt “anij in lõl in,” Satan ear lo tõbrak in “kabilo lemnok an ro re jab tõmak.” (2 Dri Korint 4:4) Jen jab kõtlok bwe en kajur ion lemnak ko ad!

Ewõr Jibañ

Ñe ej jelmae abañ ko juõn ajiri emaroñ kebak jemen ej yokwe im bõk tel im kainemõn. Eindein lok wõt, jemaroñ kebak Jemed ilañ, Jehovah, kin abañ ko ad. Ilo mol, Jehovah ej kir kij ñan jolok inek im inebata ko ad ion. (Sam 55:22) Einwõt juõn ajiri eo ejjab bar inebata kin abañ ko an elikin ej bõk kainemõn jen jemen, jej aikwij jab jolok wõt inek ko ad ion Jehovah ak bareinwõt doori ibben.​—Jemes 1:6.

Ewi wãwen jej jolok inek ko ad ion Jehovah? Dri Pilippai 4:6, 7 ej uak: “Komin jab inebata kin jabrewõt; a ilo men otemjej kin jar im akwelap kab kamolol, kajitõk ko ami ren walok ñõn Anij. Im ainemõn jen Anij, eo ej elã jen jela otemjej, e naj kejbãrok buruemi im lemnok ko ami ilo Kraist Jisõs.” Aet, ñan uak jar im akwelap ko ad, Jehovah emaroñ letok ñan kij ainemõn me ej kejbãrok lemnak ko ad jen an abõnõnõ kin inebata ejelok tokjeir.​—Jeremiah 17:7, 8, NW; Matu 6:25-34.

Ak, ñan jerbal ekkar ñan jar ko ad, jej aikwij jab kamake lok iad ilo enbwin ak ilo lemnak. (Jabõn Kennan Ko 18:1) Jen men in, jej aikwij etale nan in kakabilek ko im nan in tel ko ilo Bible me rej jelet abañ eo ad, im ilo wãwen in jej kwalok ad jab liki jelãlokjen eo ad make. (Jabõn Kennan Ko 3:5, 6) Ro redik im ritto jimor remaroñ kajerbal Bible eo im book ko an Watch Tower Society eo ñan bõk kamelele ko kin kõmman bebe ko im ñan jerbale abañ ko ad. Bareinwõt, ilo congregation in Christian, jej jerammõn bwe ewõr elder ro remeletlet im ewõr air iminene im Christian ro jet re ritto me ien otemjej rej mõnõnõ in konono ibbed. (Jabõn Kennan Ko 11:14; 15:22) Ro rejjab koba ilo abañ ko ad im ewõr lemnak eo an Anij kin abañ eo ekkã air maroñ jibañ kij ñan etale abañ ko ilo bar juõn wãwen. Im meñe rejjab kõmman bebe ko ñan kij, remaroñ juõn unjen kõketak im jurak elap.

“Kõttar Anij”

Ejelok juõn emaroñ karmijete mol in bwe elõñ inebata ko jej jelmaiki ñe jej jerbale abañ ko ad jen ran ñan ran ilo ad jab kobaik tok inebata ko jej baj lemnak kaki. Elañe inebata ko ikijen men ko remaroñ walok rej kõmman ad abõnõnõ, inem jen oktak ñan Jehovah ilo jar im akwelap. Reilok ñan Nan im dolul eo an ñan bõk tel, jelãlokjen, im lemnak in kõmmanwa. Jenaj lo bwe ilo jabdewõt wãwen ko jej bed ie, ewõr jibañ ko rej bellok ñan kij ñan jerbale abañ eo.

Ilo an eñjake an eddodo buruen im abõnõnõ, ri jeje psalm ear al: “Etke jolõllok yuk, O aõ, im etke kwoj abnõnõ ilo ña? Kwon kejatrikrik yuk ilo Anij, bwe juõn ien I naj nebar E; Eo ej mour an turin meja im aõ Anij.” (Sam 42:11) En eindein ad eñjake.

Aet, karõk ilo kõmmanwa men ko jemaroñ kõtmene kaki, im door men ko jet jejjab maroñ kõtmene kaki ilo pein Jehovah. “Komin likit ami inebata otemjej na iben, bwe Ej ierki kom.”​—1 Piter 5:7.

[Pija eo ilo peij 20]

Einwõt David, kwoj jolok ke aolep eddo ko im inebata ko am ion Jehovah?