Jen Katak Im Jelã Kin Wãwen Ko An Jehovah
“Kwon kwalok ñõn iõ ial ko Am, bwe in jela kake Kwe.”—EXODUS 33:13.
1, 2. (a) Etke Moses ear mõn juõn Ri Egypt ke ear lo an kajorrãn juõn Ri Hebrew? (b) Ñan jerbal ilo jimwe ilo jerbal eo an Jehovah, ta eo Moses ear aikwij katak kake?
MOSES ear rittolok ilo mweo imõn Pharaoh im kar katakin e kin aolep katak ko an ri utiej ro an Egypt. Bõtab, Moses ear kile bwe ear jab juõn ri Egypt. Ro jemen im jinen rar Ri Hebrew. Ilo yiõ eo kein ka 40 an iroij, ear etal bwe en etale ro nejin Israel. Ke ear lo an juõn Ri Egypt mõn juõn ian Ri Hebrew ro, Moses ear mõn Ri Egypt eo. Ear kãlet in jutak ibben armij ro an Jehovah im lemnak bwe Anij ear kajerbale ñan kanemkwoj Ri Israel ro mõttan. (Jerbal 7:21-25; Dri Hibru 11:24, 25) Ke men in ear walok im alikar, ri utiej im iroij ro ilo Egypt rar watõk Moses einwõt juõn ri jumae, im ear aikwij ko jen ir ñan kejbãrok mour eo an. (Exodus 2:11-15) Elañe Anij ear kõnan kajerbal Moses, ear aikwij kalaplok an jelã kin wãwen ko an Jehovah. Moses enaj kar mõnõnõ ke in katak kin wãwen kein?—Sam 25:9.
2 40 yiõ ko tokelik, Moses ear mour einwõt juõn eo ear ko im juõn shepherd. Jen an abõnõnõ im lõkatip kinke Ri Hebrew ro mõttan rar jab kamolol e kin ta eo ear kõmmane ñan jibañ ir, Moses ear kõttãik e ñan ta eo Anij ear kõtlok. Meñe elõñ yiõ ko rar motlok im ejelok nan in nebar im kamolol ñan e, Moses ear kõtlok bwe Jehovah en katakin e. Ear jab kautiej e make, ak iumin kajur eo an jitõb kwojarjar eo an Anij, ear je tokelik: “Armij eo, Moses, e kanuij inemõn, jen armij otemjej rej ber ion mejen lõl.” (Bwinbwin 12:3) Jehovah ear kajerbal Moses ilo wãwen ko ejejuair. Elañe jej bukõt inemõn, Jehovah enaj kajerammõn kij.—Zephaniah 2:3, NW.
Kar Bõk juõn Jerbal
3, 4. (a) Ta jerbal eo Jehovah ear lelok ñan Moses? (b) Ta jibañ eo Moses ear bõke?
3 Juõn ran juõn enjel ear konono ñan Moses iturin Tol Horeb ilo Sinai Peninsula. Moses ear bõk juõn nan in jiroñ: “Emol I ar lo iñtan an ro droõ rej ber i Ijipt, im I ar roñjake air lamij kin ro rej kejerbal ir; bwe I jela buromõj ko air im emwij aõ wõnlõltok bwe In lomor ir jen pein ro dri Ijipt, im bwe In ãñinlok ir jen eneo ñõn juõn ene emõn im e rãbõkbõk, ñõn juõn ene e bwijliplip kin milk im hõnni.” (Exodus 3:2, 7, 8) Kin men in, Anij ear kãlet Moses bwe en jerbal ñan e, ak ear aikwij jerbal ekkar ñan wãwen eo an Jehovah.
4 Enjel eo an Jehovah ear wõnmanlok im ba: “Inem kwon itok, im I naj jilkinlok yuk ñõn ibben Pero, bwe kwon ãñinlok ro droõ, ro nejin Israel jen iloan Ijipt. Im Moses e ar ba ñõn Anij, Wõn ña, bwe in ilok ñõn iben Pero, im bwe in ãñinlok ro nejin Israel jen Ijipt?” Moses ear jenliklik. Ear lemnak bwe ear jab maroñ in kõmmane jerbal eo, im ilo mol, ear jab maroñ kõmmane elañe ear atartar ion kajur eo an make. Bõtab, Jehovah ear kallimure Moses: “I naj bed ibõm.” (Exodus 3:10-12) Jehovah ear kamaroñ Moses ñan kõmmane men in bwilõñ ko me renaj jerbal einwõt kein kamol bwe Anij ear jilkinlok e. Aaron, eo jein Moses, en kar etal ibben einwõt ri konono eo an. Jehovah enaj kar katakin ir kin ta eo renaj kar ba im kõmmane. (Exodus 4:1-17) Moses enaj kar kajejjet ke kitien jerbal eo an ilo tiljek?
5. Etke lemnak eo an Israel ear melejoñe Moses?
5 Ilo jinoin Ri Israel maan ro rar tõmak Moses im Aaron. (Exodus 4:29-31) Bõtab, ejjabto tokelik, “ro dri jibõñ ian ro nejin Israel” rar naruõn Moses im eo jein kin air kõmman bwe ren “meo” iman mejen Pero im ri karejar ro an. (Exodus 5:19-21; 6:9) Ke Ri Israel ro rar diojlok jen Egypt, rar lelñoñ ke rar lo an chariot ko an Egypt lukwarkware ir. Kinke Lomalo Ekilmir ear bed imair im chariot ko ilikiir, Ri Israel ro rar lemnak bwe rar jab maroñ ko jen ir, inem rar naruõn Moses. En kar ewi wãwen lemnak eo am? Meñe ear ejelok wan Ri Israel ro wan ejerakrõk ilojet, ilo tel eo an Jehovah Moses ear rejañ armij ro bwe ren limi em nuknuk ko air im illok. Inem Anij ear iun liklok den ko den in Lomalo Ekilmir, im lomalo ear erom ene eo emõrã bwe Ri Israel ro ren deloñ ilujen ñan ijo turãjet.—Exodus 14:1-22.
Juõn Aitwerõk Elaplok Jen Anemkwoj Eo Air
6. Ta eo Jehovah ear kalikar ke ear jino kajerbal Moses?
6 Ke Moses ear jino jerbal eo an, Jehovah ear kalikar kin joñan aorõkin ãt eo ekwojarjar. Kautiej ãt eo im Eo ej bõk ãt in elap an aorõk. Ke ear kajitõk kin ãt eo etan, Jehovah ear jiroñ Moses: “I naj erom ta eo I kõnan erom.” Bareinwõt, Moses ear aikwij jiroñ ro nejin Israel: “Jeova, Anij an ro jimami, Anij an Ebream, Anij an Aisak, im Anij an Jekob E ar jilkinwoj iõ ñõn kom.” Jehovah ear kobaiklok nan kein: “Eñin eta ñõn in drio, im eñin Aõ men in kememej ñõn ebeben otemjej.” (Exodus 3:13-15) Etan Jehovah ej ejja ãt eo wõt Anij ej buñbuñ kake im armij ro an rej jelã kake ibelakin lal.—Aiseia 12:4, 5; 43:10-12.
7. Ta eo Anij ear rejañ Moses bwe en kõmmane meñe Pharaoh ear utiej buru?
7 Ke rar jutak iman mejen Pharaoh, Moses im Aaron rar kwalok ennan eo air ilo etan Jehovah. Ak ilo an utiej buruen Pharaoh ear ba: “Wõn Jeova, bwe in eoroñ ainiken im kõtlok dri Israel. I jaje Jeova, im bareinwõt I jamin kõtlok Israel.” (Exodus 5:1, 2) Pharaoh ear bin buruen im riap, ak Jehovah ear rejañ Moses bwe en kwalok ñan e ennan ko elõñ alen. (Exodus 7:14-16, 20-23; 8:1, 2, 20) Moses ear lo bwe Pharaoh ear kũtõtõiki. Enaj wõr ke juõn tokjen emõn ilo an kebake bar juõn alen? Israel ear kijoror in bõk anemkwoj. Pharaoh ear bin wõt ilo bebe eo an ñan jab kõtlok ir. Ta eo kwonaj kar kõmmane?
8. Ta tokjen eo ear walok jen wãwen an kar Jehovah emmakit kin abañ eo ikijen Pharaoh, im ewi wãwen men kein remaroñ jelet kij?
8 Moses ear bar kwalok juõn ennan, im ba: “Ein drein Jeova, Anij an ro dri Hibru Ej ba, Kwon kõtlok armij ro droõ, bwe ren korijer ñõn iõ.” Bareinwõt Anij ear ba: “Im kiõ I naj kar erlokwe peiõ im mõn yuk im ro drom kin nañinmij elap im nana, im kwo naj kar joko jen lõl in. A kin men in I ar kejbãrok yuk, bwe In kwalok ñõn yuk kajur eo Aõ, im bwe ren kwalok eta ilujen aolepen lõl.” (Exodus 9:13-16) Kinke ear beek in ekajete Pharaoh kin an bin buruen, Jehovah ear karõk ñan an kwalok kajur eo an ilo juõn wãwen ej lelok nan in kakkõl ñan ailiñ ko otemjej kin ta eo enaj kõmmane ñan jabdewõt eo ej jumae e. Men in enaj kitibuj Satan Devil, eo me Jesus ear naetan tokelik “iroij in lõl.” (Jon 14:30; Dri Rom 9:17-24) Einwõt emwij kanan kake, kar kwalok etan Jehovah ibelakin lal. Meanwõd eo an ear ear kejbãrok Ri Israel ro im juõn jar elap ro in armij rar kobalok ibbeir ñan kabuñ ñan e. (Exodus 9:20, 21; 12:37, 38) Jen ien eo mantak, kwalok nan kin etan Jehovah ear wõr tokjen ñan elõñ million armij ro me rar bõk kabuñ eo emol.
Jerbal Ibben juõn Jar in Armij Ebõt
9. Ewi wãwen an kar armij ro an Moses jab kautiej Jehovah?
9 Ri Hebrew ro rar jelã kin etan Anij. Moses ear kajerbal ãt in ke ear konono ñan ir, ak rar jab aolep ien kautiej e. Ejjabto elikin an kar Jehovah kõtlok Ri Israel ro jen Egypt, ta eo ear walok ke rar jab lo aebõj eo emõn ñan idak ilo mõkaj? Rar konono nae Moses. Im tokelik rar abõnõnõ kin mõñã eo. Moses ear kakkõl ir bwe rar jab konono nae e im Aaron wõt ak bareinwõt nae Jehovah. (Exodus 15:22-24; 16:2-12) Iturin Tol Sinai, Jehovah ear lelok Kien eo ñan Ri Israel ro, im ear kobaiki men in kabwilõñlõñ ko. Bõtab, ilo kiblia armij ro rar jeke juõn kon in cow gold ñan kabuñ ñan e im ba bwe rar kõmman juõn “kwojkwoj ñõn Jeova.”—Exodus 32:1-9.
10. Etke Christian overseer ro rainin rej aikwij itoklimo kin kajitõk eo an Moses ilo Exodus 33:13?
10 Ewi wãwen an kar Moses jerbal ibben juõn jar in armij ro me Jehovah ear watõk ir einwõt armij ro rekijñeñe kenwair ak bõt? Moses ear kajitõk ibben Jehovah: “Inem, ij kajitõk ibõm, elañe I ar lo joij iman mejõm, Kwon kwalok ñõn iõ ial ko Am, bwe in jela kake Kwe, bwe in lo joij iman mejõm.” (Exodus 33:13) Ñe rej lale aikwij ko an Ri Kennan ro an Jehovah ilo ran kein, Christian overseer ro rej shepherde juõn bwij elaplok an ettã buru jen ailiñ in Israel. Ak, rej jar ilo wãwen in lok wõt: “Kwon kwalok ñõn iõ ial ko Am, O Jeova, kwon katakin iõ kin ial ko Am.” (Sam 25:4) Jelãlokjen eo kin wãwen ko an Jehovah ej kamaroñ overseer ro ñan kamadmõdi abañ ko ilo jimwe ekkar ñan Nan in Anij im ekkar ñan kadkadin.
Ta Eo Jehovah Ekõnan jen Armij Ro An
11. Ta nan in kakabilek ko Jehovah ear lelok ñan Moses, im etke jej itoklimo kaki?
11 Men eo Jehovah ear aikwiji jen armij ro an ear alikar ke rar konono kaki iturin Tol Sinai. Tokelik Moses ear bõk ruo dekã me emwij jeje Kien Ko Joñoul iloair. Ke ear wanlaltak jen tol eo, ear lo Ri Israel ro rej kabuñ ñan kon in cow eo im ilo an illu ear jolallok dekã ko ruo, im kabedakilkili. Jehovah ear bar je Kien ko Joñoul ion dekã ko Moses ear jeki. (Exodus 32:19; 34:1) Kien kein rejañin oktak jen ien eo mokta rar bõki. Moses ear aikwij emmakit ekkar ñan kien kein. Bareinwõt Anij ear lukkun kalikar ñan Moses kin kain Anij rot E, im ewi wãwen an kar Moses aikwij emmakit einwõt juõn ian ro rej jutak kin etan Jehovah. Ri Christian ro rejjab bed iumin Kien Moses, ak ennan eo Jehovah ear jiroñ Moses ej kitibuj elõñ kien ko relap rejañin kar oktak im rej jerbal wõt ñan aolep ro rej kabuñ ñan Jehovah. (Dri Rom 6:14; 13:8-10) Jen etale jet ian kien kein.
12. Ewi wãwen aikwij eo ñan kabuñ ñan Jehovah wõt en kar jelet Israel?
12 Kabuñ ñan Jehovah wõt. Ailiñ eo an Israel ear bed ke Jehovah ear kwalok bwe ren kabuñ ñan e wõt. (Exodus 20:2-5) Ri Israel ro rar lo elõñ men in kamol ko bwe Jehovah ej Anij eo emol. (Duteronomi 4:33-35) Jehovah ear kalikar bwe jekdon ta eo ailiñ ko jet rar kõmmane, ejamin kõtlok jabdewõt wãwen kabuñ ñan ekjap ak anij naj ibwiljin armij ro an. Tiljek eo air ñan e ear jab juõn wãwen bajjek rar kõmmane ilo mour ko air. Ir aolep rar aikwij yokwe Jehovah kin aolepen burueir, aolepen air, im aolepen air kajur. (Duteronomi 6:5, 6) Men in enaj kitibuj air konono, mwiliir—emol, ilo wãwen ko otemjej in air mour. (Livitikõs 20:27; 24:15, 16; 26:1) Jesus Christ ear kalikar bareinwõt bwe Jehovah ear kõnan bwe jen kabuñ ñan e wõt.—Mark 12:28-30; Luk 4:8.
13. Etke Israel ear aikwij kabuñ ñan Anij wõt, im ta eo en kar kamakit kij ñan bokake e? (Ekklisiastis 12:13)
13 Bokake kien ko otemjej an Jehovah. Ri Israel ro rar aikwij bõk juõn nan in kakememej bwe ke rar deloñ ilo juõn bujen ibben Jehovah, rar kallimur ñan bokake e kin aolepen burueir. Rar mõnõnõ kin anemkwoj eo air make, ak ikijen men ko me Jehovah ear kaiñi ir kaki, rar aikwij bokake im jab likjap jen e ñan jidik. Ilo air kõmman eindein enaj kamol yokwe eo air ñan Anij im naj wõr tokjen ñan ir im ro nejiir kinke aolep kien ko an Jehovah rej emõn ñan mour eo air.—Exodus 19:5-8; Duteronomi 5:27-33; 11:22, 23.
14. Ewi wãwen an kar Anij kalikar ñan Israel kin aorõkin air likit mokta men ko ilo jitõb?
14 Kwon likit men ko ilo jitõb mokta. Ailiñ in Israel en kar jab kõtlok bwe aikwij ko air ilo kanniek en kamad ir jen air kabwe aikwij ko air ilo jitõb. Ri Israel ro ren kar jab bukõt men ko ilo kanniek wõt. Ilo kajjojo week Jehovah ear karõk juõn ien einwõt ekwojarjar bwe ren kajerbale ñan kabuñ ñan Anij eo emol. (Exodus 35:1-3; Bwinbwin 15:32-36) Ilo kajjojo yiõ, ear karõk ien ko jet bwe en wõr kwelok ko relap im kwojarjar. (Livitikõs 23:4-44) Ien kein renaj kar ien ko remõn ñan kakememej ir kin jerbal ko relap an Jehovah, ñan kememej kin wãwen ko an, im ñan kwalok air kamolol ñan e kin aolep men ko an remõn. Ke armij ro rar kamol air tiljek ñan Jehovah, renaj kar kalaplok mijak eo ekwojarjar im yokwe im naj kar bõk jibañ ñan etetal ilo ial ko an. (Duteronomi 10:12, 13) Kien ko remõn emwij kakobaiki ilo kien ko relaplok ri karejar ro an Jehovah ran kein rej bõk tokjen jeni.—Dri Hibru 10:24, 25.
Kamolol kin Kadkad ko Kadkadin Jehovah
15. (a) Etke kamolol kin kadkadin Jehovah ear wõr tokjen ñan Moses? (b) Ta kajitõk ko remaroñ jibañ kij ñan lukkun lemnak kin kadkad ko kajjojo kadkadin Jehovah?
15 Kamolol kin kadkad ko kadkadin Jehovah ear bareinwõt jibañ Moses ñan tel armij ro. Exodus 34:5-7 ej ba bwe Anij ear ellã iman mejen Moses im ba: “Jeova, Jeova, juõn Anij ej tiriamokake, im E joij, e rumij an illu, im elap an tiriamokake im mol; Ej kejbãrok an tiriamo ñõn tausan ko, Ej jeorlok bwir im jerawiwi jen ro eor rueir: im E jamin kowãnik ro dri nana, a Ej jibel nana an ro jemeir ion ro nejir, im ion ro nejin nejir, ñõn ebeben eo ken ka jilu im ken kemen.” Kwon bõk ien ñan kalmenlokjen kin nan kein. Kajitõk ibbam make: ‘Kadkad kein kajjojo ta meleleir? Ewi wãwen Jehovah ear kwaloki? Ewi wãwen Christian overseer ro rej aikwij kwalok kadkad in? Ewi wãwen kadkad eo emaroñ jelet ta eo kij kajjojo jej kõmmane?’ Jen etale jet ian wanjoñok ko.
16. Ewi wãwen ad maroñ kamũlallok kamolol eo ad kin tiriamokake eo an Anij, im etke eaorõk bwe jen kõmman men in?
16 Jehovah ej “juõn Anij in tiriamokake im E joij.” Elañe ewõr ibbam book eo Insight on the Scriptures (Lolokjen ilo Jeje ko jen Bible), etke kwojjab konono kin ta eo ej ba iumin katak eo “Mercy” (ak Tiriamokake)? Ak etale im kalaplok am melele kin katak in ilo am kajerbal book eo Watch Tower Publications Index ak computer program eo Watchtower Library (CD-ROM).a Kajerbal bareinwõt juõn concordance ak lajrak in nan ko raorõk ñan bukõt eon ko rej jitõñlok ñan tiriamo. Kwonaj lo bwe ijellokin an kadiklok kaje eo jet ien, tiriamo eo an Jehovah ej kobaik joij im eñjake kin eo ej bõk kaje. Ej kamakit Anij ñan kõtlok armij ro an jen eñtan. Ñan kamol men in, Anij ear kabwe aikwij ko an Ri Israel ro ilo kanniek im jitõb ke rar itoitak ilo Enen Kallimur eo. (Duteronomi 1:30-33; 8:4) Jehovah ilo tiriamo ear jolok bwir ko air ke rar jerawiwi. Ear tiriamokake armij ro an ilo ien etto. Ri karejar ro an ran kein rej aikwij kalaplok air kwalok joij im tiriamokake don!—Matu 9:13; 18:21-35.
17. Ewi wãwen melele eo ad kin joij eo an Jehovah emaroñ kowõnmanlok kabuñ eo emol?
17 Tiriamokake eo an Jehovah ej koba ibben joij. Ewi wãwen am naj kamelele kin ta melelen ‘joij’? Keidi ibben jeje ko ilo Bible me rej konono kin Jehovah einwõt ejoij. Bible eo ej kwalok bwe joij eo an Jehovah ej koba yokwe eo an kin armij ro rejerata ibwiljin armij ro an. (Exodus 22:26, 27) Ilo jabdewõt ailiñ, ro reruwamaejet im ro jet rej jimor jerata. Ke ear katakin armij ro an bwe ren jab kalijeklok im ren kwalok joij ñan armij rein, Jehovah ear kakememej ir bwe rar ruwamaejet ro bareinwõt ilo ene eo—ilo Egypt. (Duteronomi 24:17-22) Ta kin kij einwõt armij ro an Jehovah rainin? Joij eo ad ej kaburukuk kij im karel armij ro jet ñan kabuñ ñan Jehovah.—Jerbal 10:34, 35; Reveles̃õn 7:9, 10.
18. Ta eo jej katak kake jen men ko Jehovah ear katakin Israel bwe ren kejbãrok ir jeni ke rar emmakit ilo wãwen ko an armij ro jen ailiñ ko jet?
18 Bõtab, joij im eñjake eo an Israel kin armij ro jen ailiñ ko jet, en kar jab bõk jikin yokwe eo air ñan Jehovah im kien ko an kin mour erreo. Kin men in, rar katakin Ri Israel ro bwe ren jab bõk mantin ailiñ ko ibelakiir, jab kamineneik ir kin mantin kabuñ ko air im wãwen mour etton. (Exodus 34:11-16; Duteronomi 7:1-4) Men in ej jerbale ñan kij rainin. Jej einwõt juõn jar in armij ekwojarjar, einwõt adwõj Anij, Jehovah, ej kwojarjar.—1 Piter 1:15, 16.
19. Ewi wãwen melele eo kin lemnak eo an Jehovah kin kõmman bwid emaroñ kejbãrok armij ro an?
19 Ñan jibañ Moses bwe en lukkun melele kin wãwen ko An, Jehovah ear kalikar bwe meñe ej jõjõik jerawiwi, ej rumij an illu. Ej kõtlok ien bwe armij ro ren katak kin kien ko an im bokaki. Ñe ewõr ukwelok, Jehovah ej jeorlok bwid, ak ejjab kabõjrak tokjen kaje eo ej waloktok jen bwid ko relap rar kõmmane. Ear kakkõl Moses bwe tokjen bwid ko renaj jelet armij ro ilo ebeben ko tokelik, ilo wãwen eo emõn ak nana, ekkar ñan ta eo Ri Israel ro rar kõmmane. Kamolol ko air kin wãwen ko an Jehovah emaroñ kejbãrok armij ro an Anij jen air naruõn Anij kin wãwen ko rar kõmmani ñan ir make ak jen air ba bwe erumij.
20. Ta eo emaroñ jibañ kij ñan emmakit ilo ekkar ibben ri tõmak ro mõttad im armij ro jej jelmae ilo jerbal in kwalok nan? (Sam 86:11)
20 Elañe kwokõnan kalaplok jelãlokjen eo am kin Jehovah im wãwen ko an, wõnmanlok im etale katak ko im kalmenlokjen ñe kwoj konono Bible. Etale ilo tibdikin kin aolep wãwen ko rekabwilõñlõñ kadkadin Jehovah. Lemnak im jar kin ewi wãwen am maroñ kajeoñe Anij im ukõt mour eo am ñan eyu ekkar ñan karõk eo an. Men in enaj jibañ yuk ñan kejbãrok yuk jen am lorak ilo aujid ko, ñan jerbal ilo jimwe ibben ri tõmak ro mõttad, im jibañ ro jet ñan jelã im yokwe Anij eo ad eutiejtata.
[Kamelele ko itulal]
a Ri Kennan ro an Jehovah rar je men kein aolep.
Ta Eo Kwar Katak Kake?
• Etke ettã buru ear aorõk ibben Moses, im etke ej juõn men eaorõk ñan kij?
• Ta tokjen eo emõn ear walok jen an Moses jelmaik Pharaoh elõñ alen kin nan eo an Jehovah?
• Ta jet ian kien ko remõn Moses ear katak kaki im rej jerbal ñan kij bareinwõt?
• Ewi wãwen ad maroñ kalaplok melele eo ad kin kadkad ko kadkadin Jehovah?
[Pija eo ilo peij 7]
Ilo meletlet Moses ear bõklok nan eo an Jehovah ñan Pharaoh
[Pija eo ilo peij 9]
Jehovah ear kwalok kien ko an ñan Moses
[Pija eo ilo peij 10, 11]
Kalmenlokjen kin kadkad ko kadkadin Jehovah