Mour Elikin Mij​—Ta Eo Bible Eo Ej Ba?

“Bwe brij kwe, im ñõn brij kwo naj jeblak.”​—JENESIS 3:19.

1, 2. (a) Ta lemnak ko reoktak jen don ewõr kin Mour Elikin Mij? (b) Ta eo jej aikwij etale ñan jelã ta eo Bible ej katakin kin aan?

“LEMNAK eo kin eñtan indio ejjab errã ibben tõmak eo bwe Anij ej yokwe men in kõmanmõn ko. . . . Ñan tõmak bwe renaj kaeñtan aan eo indio kin bwid ko ear kõmmani iumin jet wõt yiõ ko, ej idaptõk ibben lemnak in kõmmanwa,” Ri Hindu ri meletlet Nikhilananda ear watwate.

² Einwõt Nikhilananda, elõñ armij rainin rej abõnõnõ kin katak in kin eñtan indio. Kin ejja un eo wõt, ro jet ej bin air melele kin jet tõmak ko einwõt ñan kõtõbar Nirvana im air burukuk ibben nature (lal in kõmanmõn). Meñe ibwiljin ro rej ba bwe tõmak ko air rej bedbed ion Bible, eoktak lemnak ko air ikijen ta in aan im ta eo ej walok ñan e ñe ej mij. Ak ta eo Bible ej lukkun katakin kin aan? Ñan jelã, jej aikwij etale melele ko kin nan ko ilo kajin Hebrew im Greek me rej ukõte “aan” ilo Bible.

Aan Ekkar ñan Bible eo

3. (a) Ta nan eo rej ukõte “aan” ilo Jeje ko ilo kajin Hebrew, im ta melelen nan eo? (b) Ewi wãwen Genesis 2:7 (NW) ej kamol bwe nan eo “aan” emaroñ melelen aolepen juõn armij?

³ Nan in Hebrew eo rej ukõte “aan” ej neʹphesh, im ej walok 754 alen ko ilo Jeje ko ilo kajin Hebrew. Ta melelen neʹphesh? Ekkar ñan The Dictionary of Bible and Religion, “ekkã an jitõñlok ñan aolepen men eo ej mour, aolepen armij eo.” Kamelele eo ilo Bible kin aan ej jurake men in ilo Jenesis 2:7: “Im Jeova Anij e ar kõmõn im nawãwen armij jen bõñõlñõl in ene; im E ar ukwi ilo bodin menono in mour; im armij eo [ear erom juõn aan].” Lale bwe emaan eo mokta ear “erom” juõn aan. Melelen, Adam ear jab wõr juõn aan; ear juõn aan​—einwõt ñe juõn armij eo ej erom juõn doctor ej doctor eo. Inem, nan in “aan,” ej kwalok kin aolepen armij eo.

4. Ta nan eo rej ukõte “aan” ilo Jeje ko in Christian ilo kajin Greek, im ta melelen nan eo?

⁴ Nan eo rej ukõte “aan” (psy·kheʹ) ej walok elõñlok jen jibuki alen ko ilo Jeje ko in Christian ilo kajin Greek. Einwõt neʹphesh nan in ej jitõñlok ñan aolepen armij eo. Ñan wanjoñok, lemnak kin ennan kein tok: “E abõnõnõ aõ.” (John 12:27, New World Translation) “Aan otemjej rar jino mijak.” (Acts 2:43, NW) “[Aan] otemjej ren kiblie ñõn ro routiej jen ir.” (Dri Rom 13:1) “Kainemõn aan ro reburomõj.” (1 Thessalonians 5:14, NW) “Emwij lomoren eiet, drualitõk [aan ro], kin dren.” (1 Piter 3:20) Alikar, psy·kheʹ, einwõt neʹphesh, ej jitõñlok ñan aolepen armij eo. Ekkar ñan ri meletlet eo Nigel Turner, nan in ej “jitõñlok ñan armij eo make, enbwinin kanniek eo kar ukwi rûaḥ [jitõb] an Anij ilo e. . . . Kalikar eo ej ñan aolepen armij eo.”

5. Menin mour ko rej aan ko ke? Kamelele.

⁵ Ekaitoktoklimo, ilo Bible nan eo “aan” ejjab jerbal ñan armij eo wõt ak bareinwõt ñan menin mour ko. Ñan wanjoñok, ilo kamelele kin kõmanmõn eo kin menin mour ko ilo lojet, Jenesis 1:20 ej ba bwe Anij ear kakien: “En lõñ an dren ko kemour [aan ko remour].” Im ilo ran in kõmanmõn eo tok juõn, Anij ear ba: “Lõl en kemour [aan ko remour] kaju wãweir, kiru ko rawie, im men ko rej tõbõlbõl, im kiru in ene kaju wãweir.”​—Jenesis 1:24; keidi Bwinbwin 31:28.

6. Ta eo jemaroñ ba ikijen wãwen an Bible eo kajerbal nan eo “aan”?

⁶ Kin men in, nan eo “aan” ke rej kajerbale ilo Bible ej jitõñlok ñan juõn armij ak menin mour ak ñan mour eo juõn armij ak menin mour ej lañliñ kake. (Lale box eo ilañ.) Kamelele eo ilo Bible kin aan ej lamwan, ejjab oktak, im ejjab obrak kin lemnak im men in kajitõbtõb ko rekabwokbwok an armij. Kin an eindein, kajitõk eo eaorõk me jej aikwij kajitõk ej, Ekkar ñan Bible eo, ta eo ej walok ñan aan eo ñe ej mij?

Ro Remij Rejajelokjen

7, 8. (a) Ta eo Jeje ko rej kalikar ikijen wãwen ro remij? (b) Kwalok jet wanjoñok ko jen Bible eo me rej kalikar bwe emaroñ mij aan.

⁷ Rej kalikar kin wãwen ro remij ilo Ecclesiastes 9:5, 10 (NW), ijo jej read: “Ro remij ejelok air jelã . . . Ejelok jabdewõt men rej jibadõke, ejelok karõk, ejelok jelãlokjen ak meletlet, ilo lũp eo.” (Moffatt) Kin men in, mij ej melelen jab bed. Ri jeje psalm ear je bwe ñe juõn armij ej mij, “ej jeblak ñõn lõl eo an; ilo ran eo lemnok ko an rejokolok.” (Sam 146:4) Ro remij re jajelokjen, rejjab jerbal.

⁸ Ke ear ekajete Adam, Anij ear ba: “Bwe brij kwe, im ñõn brij kwo naj jeblak.” (Jenesis 3:19) Mokta jen an Anij eik e jen bũñalñal im lelok mour ñan e, ear ejelok Adam. Ke ear mij, ear jeblak ñan ejja wãwen in wõt. Kaje eo an kar mij​—jab leaklok e ñan bar juõn lal. Inem, ta eo ear walok ñan aan? Ke ilo Bible nan eo “aan” ekkã an melelen armij eo make, ñe jej ba bwe Adam ear mij, jej ba bwe aan eo etan Adam ear mij. Men in emaroñ oktak ñan juõn armij eo ej tõmak bwe aan eban mij. Bõtab, Bible eo ej ba: “Aan eo ej jerawiwi​—e in enaj mij.” (Ezekiel 18:4, NW) Leviticus 21:1 (NW) ej konono kin “juõn aan emij” (juõn “ubõn emij,” The Jerusalem Bible). Im kar jiroñ Ri Nazirite ro ñan jab kebak “jabdewõt aan emij” (“juõn enbwin emij,” Lamsa).​—Bwinbwin 6:6, NW.

9. Ta melelen an Bible eo ba kin Rachel bwe “e ar weaklok an”?

⁹ Ak, ta kin nan ko ilo Jenesis 35:18 ikijen mij eo an Rachel, eo ear walok ke ear kemoure ladik eo nejin kein karuo? Ijo jej konono: “Ke e ar weaklok an, (bwe e mij), e ar naetan Benoni: a jemen e ar naetan Benjamin.” Eon in ej ba ke bwe ear wõr juõn armij iloa eo ear ilok jen e ke ear mij? Jab. Kememej, nan eo “aan” emaroñ bareinwõt melelen mour eo an armij eo. Inem ilo ien in “aan” Rachel ear melelen “mour” eo an. Eñin unin ukok in Bible ko jet rej ukõte nan kein “e ar weaklok an” einwõt “mour eo an ear mejkunlok” (Knox), “ear jolok kitwõn” (JB), im “mour eo an ear ilok jen e” (Bible in Basic English). Ejelok jabdewõt men ej kalikar bwe juõn mõttan Rachel ettino ear mour wõt ke ear mij.

10. Ilo wãwen et eo aan eo an ladik eo nejin kõrã eo ejako belen ear ‘bar dreloñtok’ ilo e?

¹⁰ Ej eindein lok wõt ibben jerkakbiji eo an ladik eo nejin kõrã eo ejako belen, emwij jeje ilo 1 Kiñ Ro jebta 17. Ilo eon 22, jej konono bwe ke Elijah ear jar kin ladik eo, “Jeova e ar eoroñ ainiken Ilaija; im an ladrik eo e ar bar dreloñtok, im ej mour.” Bar juõn alen, nan in “aan” ej melelen “mour.” Kin men in, New American Standard Bible ej konono: “Mour eo an ajiri eo ear jeblak ñan e, im ear mour.” Aet, kar mour eo an, im jab juõn annañ, me ear jeblak ñan ladik eo. Men in ej errã ibben men eo Elijah ear ba ñan jinen ladik eo: “Lo, nejõm [aolepen armij eo] ej mour.”​—1 Kiñ Ro 17:23.

Ta kin Jitõb eo?

11. Etke nan eo “jitõb” ear jab maroñ jitõñlok ñan juõn mõttan me ejenolok jen enbwinin armij eo me ej mour manlok elikin mij?

¹¹ Bible ej ba bwe ñe juõn armij ej mij, “[jitõb eo] an ej ilok, ej jeblak ñan lõl eo an.” (Sam 146:4) Ej melelen ke bwe juõn jitõb me ejako enbwinin kanniek ej lukkun ilok im mour wõt elikin mij eo an armij eo? Men in ejjab maroñ eindein, bwe ri jeje psalm ej ba tokelik: “Ilo ran eo lemnok ko an rejokolok,” (“aolep lemnak ko an rej jemlok,” The New English Bible). Inem, ta in jitõb eo, im ewi wãwen ej ‘ilok’ jen armij eo ilo ien eo ej mij?

12. Ta melelen nan ko ilo Hebrew im Greek rar ukõte “jitõb” ilo Bible?

¹² Ilo Bible eo nan ko rej ukõti “jitõb” (Hebrew, ruʹach; Greek, pneuʹma) ej melelen “menono.” Kin men in, jen an ba “[jitõb eo] ej ilok,” ukok eo an R. A. Knox ej kajerbale nan ko “menono eo ej ilok jen enbwinin.” (Psalm 145:4) Ak nan eo “jitõb” ej melelen elaplok jen an menono wõt. Ñan wanjoñok, ilo kamelele kin jorrãn eo kin mour an armij im menin mour ko ilo Ibwijleplep eo ibelakin lal, Jenesis 7:22 ej ba: “Aolepeir menono [ak, jitõb; Hebrew ruʹach] in jitõb õn mour ej ber i bodir, ian men otemjej rej ber ion ene, rar mij.” Inem “jitõb” emaroñ jitõñlok ñan kajur in mour me ej jerbal ilo aolep men ko rej mour, armij im menin mour jimor, im ej wõnmanlok in mour ilo an menono.

13. Ewi wãwen jitõb eo ej jeblak ñan Anij ñe armij eo ej mij?

¹³ Inem, ta melelen ñe Ekklisiastis 12:7 ej ba bwe ñe juõn armij ej mij, “[jitõb] en jeblak ñõn Anij, eo E ar lelok e”? Ej melelen ke bwe jitõb eo ej lukkun kelok ilo mejatoto ñan jikin eo Anij ej bed ie? Ejjab eindein melelen. Ke jitõb ej kajur in mour eo, ej “jeblak ñõn Anij” ilo wãwen eo me jabdewõt kejatdikdik kin mour tokelik ñan armij eo ej kiõ bed ilo pein Anij. Anij wõt emaroñ kajeblak jitõb, ak kajur in mour eo, im kõmman bwe armij eo en bar mour. (Sam 104:30) Ak ej karõk eo an Anij ke ñan an kõmman eindein?

“E Naj Bar Jerkak”

14. Ta eo Jesus ear ba im kõmmane ñan kainemõn limaro jein im jatin Lazarus elikin ear mij Lazarus?

¹⁴ Ilo bukwon eo edik in Bethany, tarrin ruo mile ko tu-rear in Jerusalem, Mary im Martha rar liãjlol kin mij eo ejelok kõtmene kake an jeiir im jatiir, Lazarus. Jesus ear bõk eñjake in buromõj eo air, bwe ear yokwe Lazarus im limaro jein im jatin. Ewi wãwen Jesus ear maroñ kainemõn limaro rein ruo? Jab ilo an jiroñ ir juõn bwebwenato ekabwokbwok, ak ilo an jiroñ ir mol eo. Ilo lamwan Jesus ear ba: “Jeõm im jãtõm man e naj bar jerkak.” Jesus ear etal ñan roñ in lũp eo, im ear kajerkakbijik Lazarus​—im kajeblak mour ñan juõn emaan eo ear mij iumin emen ran ko!​—Jon 11:18-23, 38-44.

15. Ta kar uak eo an Martha ñan ta eo Jesus ear ba im kõmmane?

¹⁵ Martha ear bwilõñ ke kin nan ko an Jesus bwe Lazarus enaj “jerkak”? Alikar jab, bwe ear uak: “I jela e naj bar jerkak ilo jerkakbiji eo ilo ran eliktata.” Ear tõmak kadede ilo kallimur eo kin juõn jerkakbiji. Inem Jesus ear jiroñ e: “Ña jerkakbiji eo im mour eo: eo ej liki Iõ, meñe e mij, e naj bar mour.” (Jon 11:23-25) Men in kabwilõñlõñ eo kin kajerkakbiji eo an Lazarus ear jerbal ñan kakajurlok tõmak eo an im ñan kaddeklok tõmak ilo ro jet. (Jon 11:45) Ak ta melelen nan eo “jerkakbiji”?

16. Ta melelen nan eo “jerkakbiji”?

¹⁶ Nan eo “jerkakbiji” rej ukõte jen nan in Greek eo a·naʹsta·sis, eo ej melelen “bar jutak.” Ri Hebrew ri ukok ro kin kajin Greek rar ukõte nan eo a·naʹsta·sis ñan juõn nan ej melelen “kajeblak mour ñan eo emij” (Hebrew, techi·yathʹ ham·me·thimʹ).a Kin men in, jerkakbiji ej kitibuj air kajerkak armij eo jen juõn wãwen ejelok mour ie ilo mij​—im kajeblak im bar ijjino wãwen mour ilo juõn armij.

17. (a) Etke jerkakbiji eo an kajjojo armij ejjab juõn abañ ñan Jehovah Anij im Jesus Christ? (b) Ta kallimur eo Jesus ear kõmmane ikijen ro ilo lũp ko?

¹⁷ Kin an ejelok joñan ñan meletlet eo an im ememej eo an ewãppen, ebidodo an Jehovah Anij maroñ kajerkakbiji juõn armij. Ñan kememej wãwen mour an ro remij​—kadkad ko kadkadiir, bwebwenato in mour ko air, im tibdikdik ko kin mour ko air​—ejjab juõn abañ ñan e. (Job 12:13; keidi Aiseia 40:26.) Bareinwõt, einwõt experience eo an Lazarus ej kalikar, Jesus Christ ej mõnõnõ im ewõr an maroñ ñan kajerkakbiji ro remij. (Keidi Luk 7:11-17; 8:40-56) Ilo mol, Jesus Christ ear ba: “Bwe auõ ej itok, ilo eo ro otemjej rej ber ilo lũp ko, re naj roñ ainiken [Jesus], im naj drioijtok.” (Jon 5:28, 29) Aet, Jesus Christ ear kallimur bwe ro otemjej Jehovah ej kememej naj jerkakbiji. Alikar, bwe ekkar ñan Bible eo, aan ej mij, im mejelan mij ej jerkakbiji eo. Ak elõñ billion armij rar mour im mij. Wõn ro ibwiljiir Anij ej kememej, im rej kõttar jerkakbiji eo?

18. Wõn ro renaj jerkakbiji?

¹⁸ Ro rar jibadõk juõn ial ewãnik einwõt ri karejar ro an Jehovah naj kajerkakbiji ir. Ak, elõñ million armij ro jet rar mij ilo air jab kwalok elañe renaj kar bokake kien ko rewañik an Anij ak jab. Bõlen rar jajelokjen kin men in aikwij ko an Jehovah ak ear jab bwe ien ñan kõmman oktak ko rar aikwij kõmmani. Rein bareinwõt Anij ej kememej ir im kin men in renaj jerkakbiji, bwe Bible ej kallimur: “Bwe ro remõn im ro renana re naj jerkakbiji.”​—Jerbal 24:15.

19. (a) Vision et eo ri jilek John ear bõke ikijen jerkakbiji eo? (b) Ta eo rej joloke “ilo lomalo in kijeek,” im ta melelen nan kein?

¹⁹ Ri jilek John ear wõr juõn vision ekairujruj kin ro rar jerkakbiji im rar jutak iman throne eo an Anij. Ilo an kamelele kake, ear je: “Im lometo e ar lelok ro remij ro ilo e, im Mij im Hedis r’ar lelok ro remij ro ilo ir, im ar ekajet ir, kaju iair, ekar ñõn jerbal ko air. Im ar jolok Mij im Hedis na ilo lomalo in kijeek. Eñin mij ken ka ruo, lomalo in kijeek.” (Reveles̃õn 20:12-14) Lemnak kin ta melelen men in! Aolep ro remij ro Anij ej kememej ir naj dioj jen Hades, ak Sheol, lũp eo lũpon armij. (Sam 16:10; Jerbal 2:31) Inem “Mij im Hedis” naj joloki ilo “lomalo in kijeek,” eo ej annañelok jeebeplok indio. Lũp eo lũpon armij naj jako.

Juõn Kejatdikdik Ejej Uan!

20. Elõñ million ro remij kiõ renaj jerkakbiji ñan kain wãwen rot ibelakiir?

²⁰ Ñe million ro naj kajerkakbijik ir, rejamin jerkakbiji ñan mour ilo juõn lal ewan. (Aiseia 45:18) Renaj ruj tok ñan wãwen ko raibujuij im renaj lo bwe ededelok jikin air jokwe, nuknuk ko air, im elõñ mõñã ko kar keboj ñan ir. (Sam 67:6; 72:16; Aiseia 65:21, 22) Wõn ro renaj keboj men kein? Alikar, armij ro renaj mour ilo lal eo ekãl mokta jen jerkakbiji eo ñan mour ilal enaj ijjino. Ak wõn ro?

21, 22. Kejatdikdik et eo ejej uan ej bed iman ro rej mour ilo “ran ko eliktata”?

²¹ Jejjet in kitien kanan ko ilo Bible ej kwalok bwe jej bed ilo “ran ko eliktata” an jukjuk bed in.b (2 Timote 3:1) Ejjabto jen kiõ, Jehovah Anij enaj bõk kunan ilo makitkit ko an armij im kokkure nana jen lal in. (Sam 37:10, 11; Jabõn Kennan Ko 2:21, 22) Ilo ien en, ta eo enaj walok ñan ro rej karejar ñan Anij ilo tiljek?

²² Jehovah ejamin kokkure ro rewãnik ibben ro renana. (Sam 145:20) Ejañin kar kõmman juõn men einwõt in, im ejamin kõmmane ñe enaj karreoik aolep nana jen lal in. (Keidi Jenesis 18:22, 23, 26.) Ilo mol, book eo eliktata ilo Bible ej konono kin juõn “jar elap, eo ejelok armij ej maroñ in bwinir, jen ailiñ otemjej, im ian bwij otemjej, im driloabjen otemjej, im konono otemjej,” rar itok jen “iñtan eo elap.” (Reveles̃õn 7:9-14) Aet, juõn jar elap naj deor jen eñtan eo elap ilo e jukjuk im bed in kiõ enana enaj jemlok, im renaj deloñ ilo lal eo ekãl an Anij. Ijo, armij ro rekiblie naj bõk tokjen jen men in letok eo ekabwilõñlõñ an Anij ñan kanemkwoj armij jen jerawiwi im mij. (Reveles̃õn 22:1, 2) Kin men in, “jar eo elap” ejjab aikwij mij. Ej juõn kejatdikdik ejej uan!

Mour Ilo Ejelok Mij

23, 24. Ta eo kwoj aikwij kõmmane elañe kwo kõnan lañliñ kin mour ilo ejelok mij ilo Paradise ion lal?

²³ Jemaroñ ke liki kejatdikdik in ekabwilõñlõñ? Emol aet! Jesus Christ make ear kalikar bwe enaj wõr juõn ien ñe armij renaj mour im rejjab aikwij mij. Mokta lok jidik jen an kajerkakbijik jeran Lazarus, Jesus ear ba ñan Martha: “Im jabrewõt eo ej mour im liki Iõ, e jamin mij in drio.”​—Jon 11:26.

²⁴ Kwo kõnan ke mour indio ilo Paradise ion lal? Kwo kõnan ke bar lo ro jitenburu ibbam? “Lõl e jokolok im mõm ko an: a eo ej kõmõnmõn ankil an Anij ej berwõt in drio,” ri jilek John ej ba. (1 Jon 2:17) Kiõ ej ien ñan katak kin ta eo ej ankil an Anij im ñan beek ilo buruõm ñan mour ekkar ñane. Inem kwe, ibben elõñ million ro jet rej kõmanmõn ankil an Anij kadede, kom naj maroñ mour indio ilo Paradise ion lal.

[Kamelele ko itulal]

Kwoj Kememej Ke?

◻ Ta melelen nan ko jinoin rar ukõte “aan”?

◻ Ta eo ej walok ñan aan ñe ej mij?

◻ Ekkar ñan Bible eo, ta eo mejelan mij?

◻ Kejatdikdik et eo ejej uan ej bed iman ro retiljek rainin?

[Bo̦o̦k eo ilo peij 27]

“Aan” einwõt Mour an juõn Men in Kõmanmõn

Jet ien, nan eo “aan” ej jitõñlok ñan mour eo juõn armij ak menin mour ej lañliñ kake. Men in ejjab ukõt melele eo ilo Bible kin aan einwõt juõn armij ak menin mour. Ñan wanjoñok: Jej ba bwe juõn armij ej mour, melelen bwe ej juõn armij emour. Jemaroñ bareinwõt ba bwe ewõr an mour. Ilo ejja wãwen eo wõt, juõn armij emour ej juõn aan. Ak, ñe emour, jemaroñ ba bwe ewõr “aan.”

Ñan wanjoñok, Anij ear jiroñ Moses: “Aolep armij ro rej kabuk aam remij.” Alikar, ri kijirãt ro an Moses rar kõnan bõk an mour. (Exodus 4:19, NW; keidi Joshua 9:24; Jabõn Kennan Ko 12:10.) Jesus ear kajerbal nan eo ilo juõn wãwen einlok wõt ke ear ba: “Nejin armij ear itok . . . ñan lelok aan bwe en binmour ñan ro relõñ.” (Matthew 20:28, NW; keidi 10:28.) Ilo kajjojo ien, nan eo “aan” ej melelen “mour an juõn men in kõmanmõn.”

[Pija ko ilo peij 27]

Aolepeir rej aan ko

[Etan eo ej kõmman]

Hummingbird: U.S. Fish and Wildlife Service, Washington, D.C./Dean Biggins

[Pija eo ilo peij 29]

Jesus ear kalikar bwe mejelan mij ej jerkakbiji eo

[Pija eo ilo peij 30]

“Im jabrewõt eo ej mour im liki Iõ, e jamin mij in drio.”​—Jon 11:26