Ewõr ke Ibbam juõn Aan eo Eban Mij?

Jej kanniek im bõtõktõk wõt ke? Ak ewõr ke men ko jet ijellokin men ko kar ejaake enbwinid kaki? Jej mour kiõ ke im ilju jejako? Ak ebar wõr ke juõn men jejjab maroñ loe ibbed me ej wõnmanlok wõt im mour elikin mij?

MEÑE kabuñ ko ibelakin lal rar ejaake elõñ melele ko rebwok kin tõmak eo kin mour elikin mij, enañin aolepeir rej errã kin juõn wõt melele: Ewõr juõn men iloan armij eban mij im ej mour manlok elikin mij. Elõñ armij rej tõmak bwe “menin” ej aan. Ta eo kwoj tõmak kake? Ilo enbwinid ej kanniek im aan jimor ke? Ta in aan? Ewõr ke ibben armij juõn aan eo eban mij? Aet emol bwe elukkun aorõk ñan jelã mol eo kin kij make!

“Im Armij Eo Ej Mour”

“Aan” eo ej mõttan in armij ke im ej jenolok im mour manlok elikin mij? Ekkar ñan book eo Holman Illustrated Bible Dictionary (Bible Dictionary eo an Holman), “aan eo ekkã air keidi bwe ej juõn wõt ibben armij.” Ñan wanjoñok, Jenesis 2:7 ej ba: “Jeova Anij e ar kõmõn im nawãwen armij jen bõñõlñõl in ene; im E ar ukwi ilo bodin menono in mour; im armij eo ej mour” ak erom juõn aan. Maan eo moktata, Adam, ear aan eo.

Ewõr eon ko jet me rej jurake lemnak eo bwe nan in “aan” emaroñ melelen armij eo. Ñan wanjoñok, Bible eo ej ba bwe aan eo ej kõmman jerbal. (Livitikõs 23:​30) Ej kennan kake aan bwe ejelã mõk, abõnõnõ, buromõj, mijak, im mõjno. (Dri Ekajet Ro 16:16; Job 19:2; Sam 119:28; Jerbal 2:43; 1 Dri Tessalonika 5:​14) An kwalok bwe aan ej armij eo, ilo Dri Rom 13:1 ej ba: ‘Armij [ak aan] otemjej ren kiblie ñõn ro routiej jen ir.’ Im ilo 1 Piter 3:​20, jej konono: ‘Ilo ran ko an Noa, . . . emwij lomoren eiet, drualitõk armij [ak aan], kin dren.’ Ejelok ilo eon kein rej kwalok bwe aan ej baj juõn men bajjek ejenolok im ej mour manlok wõt elikin an juõn mij.

Ak ta kin menin mour im menin eddek ko? Rej ke aan? Lale wãwen an Bible eo kamelele kin kõmanman in menin mour ko. “En lõñ an dren ko kemour men in mour ko [ak aan],” Anij ear kaiñi. Ilo ran in kõmanman eo tok juõn, Anij ear ba: “Lõl en kemour men in mour [ak aan] kaju wãweir, kiru ko rawie, im men ko rej tõbõlbõl, im kiru in ene kaju wãweir: im ej einwõt.” (Jenesis 1:​20, 24) Inem, aolep menin kõmanman ko​​—armij ak menin mour​​—rej aolep aan. Ilo Bible, ejjab ba bwe menin eddek ko rej aan.

Kar kajerbal nan in “aan” ilo bar juõn wãwen. Ilo Job 33:​22, jej konono: “An ej kebaklok roñ eo, im mour eo an ej kebaklok ro dri kokkure.” Ijin, nan in “an” im “mour” rej einlok wõt juõn, aan ej kalaplok melelen nan in mour. Inem, “aan” emaroñ bar jitõñlok ñan mour eo ewõr ibben menin kõmanman eo einwõt juõn aan eo emour ak armij. Kin men in, jeje ko ilo Bible ej konono kin ri kijirãt ro an Moses, ro im rar kõnan bõk an mour einwõt “armij otemjej rar kõnan bõk [an ]mour [ak aan].” (Exodus 4:​19) Im kin Jesus Christ, Bible eo ej ba: “Nejin armij e ar itok . . . im lelok An mour [ak aan] bwe En binmour ñõn ro relõñ.”​​—Matu 20:⁠28.

Kamelele in nan in “aan” ilo Bible eo elukkun alikar im jejjet. Nan in emaroñ jitõñlok ñan juõn armij ak juõn menin mour ak ñan mour eo ewõr ibben menin kõmõnmõn eo einwõt juõn aan eo emour. Einwõt jenaj lale, melele in ej errã ibben ta eo Bible ej ba kin ta eo ej walok ñan aan eo ilo ien mij.

‘Aan Eo Ej Jerawiwi Enaj Mij’

Bible eo ej ba: “Armij [ak aan] eo wõt ej jerawiwi​​—enaj mij.” (Ezekiel 18:⁠4) Ri kanan Elijah ear eñtan “im e ar kajitõk kin e mõke [ak aan] bwe en mij.” (1 Kiñ Ro 19:⁠4) Eindein, Jemes 5:20 ej ba bwe “eo ej koukwelok juõn dri jerawiwi jen an jebwãbwe jen ial, e naj lomoren an jen mij.” Aet, aan eo ej mij; ejjab juõn men ej mour manlok wõt im ejamin mij. Kinke armij eo ej aan eo ñe rej ba bwe juõn armij emij ej melelen bwe aan emij.

Ak ta kin eon ko me rej walok ilo Bible eo im rej kwalok bwe aan eo ej weaklok im bar deloñtok? Ikijen ta eo ear walok ñan Rachel ke ear kalotak kin ladik eo nejin, Bible eo ej ba: “Ke e ar weaklok an, (bwe e mij), e ar naetan Benoni: a jemen e ar naetan Benjamin.” (Jenesis 35:​18) Im kin jerkakbiji eo an ladik eo nejin kõrã eo ejako belen, ilo 1 Kiñ Ro 17:22 ej ba: “Jeova e ar eoroñ ainiken Ilaija [ilo jar]; im an ladrik eo e ar bar dreloñtok, im ej mour.” Eon kein rej kwalok ke bwe aan ej mõttan armij eo im jejjab loe im emaroñ dioj ak deloñ ilo juõn enbwin?

Eokwe, kememej bwe melele eo juõn kin nan in “aan” ej “mour.” Kin men in, aan eo an Rachel me ear weaklok jene ej melelen bwe mour eo an emij. Ilo mol, ilo Bible ko jet rej ukõt nan kein “e ar weaklok an” einwõt “mour eo an ej mõjnolok” (Knox) im “ear jolok kõtwõn” (Jerusalem Bible). Ejja eindein lok wõt ibben ladik eo nejin kõrã eo ejako belen, bwe mour ear bar jeblak ñane.​​—1 Kiñ Ro 17:⁠23.

Ejaakin Armij Eo

Ilo alikar, Bible eo ej kwalok kin wãwen ejaakin armij eo. Bwe ejelok aan ibben; aan eo ej armij eo. Kin wãwen kar ejaake armij eo, jabdewõt kejatdikdik kin mour ilju im jeklaj ñan ro remij ej bedbed ion jerkakbiji eo. Bible eo ej kallimur: “Komin jab bwilõñ kin men in; bwe auõ ej itok, ilo eo ro otemjej rej ber ilo lũp ko, re naj roñ ainiken [Jesus], im naj drioijtok; ro r’ar kõmõn emõn, ñõn jerkakbiji in mour: im ro r’ar kõmõnmõn nana, ñõn jerkakbiji in ekajet.” (Jon 5:​28, 29) Kallimur in emol kin jerkakbiji​​—jab katak eo kin aan eo eban mij​​—ej bedbed eo emol kin kejatdikdik eo ñan ro remij.

Elukkun aorõk ñan bõk jelãlokjen eo ejejjet kin ta in jerkakbiji im ta melelen ñan armij! Bareinwõt men eo aorõktata ej jelãlokjen kin Anij im Christ, bwe ilo jar Jesus ear ba: “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:⁠3) Ri Kennan ro an Jehovah ilo bukwon eo am renaj mõnõnõ in jibañ yuk ñan katak Bible bwe kwon maroñ kalaplok jelãlokjen eo am kin Anij, Nejin, im kallimur ko An. Kimij karuwaineneik yuk ñan kebak Ri Kennan ro ak jeje ñan eo ear jeje magazine in.

[Pija ko ilo peij 4]

Aolepeir rej aan ko

[Etan eo ej kõmman]

Goat: CNPC​​—Centro Nacional de Pesquisa de Caprinos (Sobral, CE, Brasil)