Juõn Wõt Ial Ñan Mour Indio

“Ña ial, im mol, im mour: ejelok armij ej itok ñõn Jema, elañe jab kin Iõ.”​—JON 14:6.

1, 2. Jesus ear keidi ial in mour indio ñan ta, im ta melelen parable eo an?

ILO KATAK eo an ebuñbuñ ion Tol eo, Jesus ear keidi ial in mour indio ñan juõn ial juõn armij ej deloñ ikijen juõn kejam. Jesus ear kalikar bwe ial in mour in ear jab juõn ial ebidodo, ke ear ba: “Komin dreloñ iloan kejem erãniñ; bwe erbõkbõk kejem, im edrilep ial eo ej tellok ñõn mij, im elõñ ro rej dreloñ ie. Bwe erãniñ kejem, im eairik ial eo ej tellok ñõn mour [indio], im eiet ro rej loe.”​—Matu 7:13, 14.

² Kwoj lo ke aorõkin wanjoñok in? Ejjab kalikar ke bwe ewõr juõn wõt ial, ak wãwen, ej tellok ñan mour indio im ej aikwij wõr ad kejbãrok kij jen ad jebwãbwe jen ial in mour in? Inem, ta eo ej make wõt ial eo ñan mour indio?

Jerbal eo an Jesus Christ

3, 4. (a) Ewi wãwen an Bible eo kwalok aorõkin jerbal eo an Jesus ilo lomor eo ad? (b) Ñããt eo moktata Anij ear kalikar bwe armij emaroñ kar bõk mour indio?

³ Alikar, elap an aorõk jerbal eo an Jesus kin men in, einwõt an kar ri jilek Peter ba: “Ejelok bar juõn ãt iomin lõñ, im letok ñõn armij bwe jen mour ilo E.” (Jerbal 4:12) Ilo ejja wãwen lok wõt, ri jilek Paul ear ba: “Men in joij an Anij, mour in drio ilo Kraist Jisõs ar Iroij.” (Dri Rom 6:23) Jesus ear make kalikar bwe e wõt eo ear ial eo ñan mour indio, kinke ear ba: “Ña ial, im mol im mour.”​—Jon 14:6.

⁴ Inem eaorõk bwe jen bõk jerbal eo an Jesus ñan letok mour indio. Kin men in, jej aikwij lukkun etale jerbal eo an. Kwoj jelã ke ñããt eo, elikin an Adam jerawiwi, Jehovah ear kalikar bwe armij ro remaroñ bõk mour indio? Kar elikin wõt an Adam buñ jen tõmak. Kiõ jen etale ewi wãwen kar kanan kin menin letok in Jesus Christ einwõt Ri Lomor eo an armij ilo ien eo moktata.

Inen Kallimur Eo

5. Ewi wãwen ad maroñ kile serpent eo ear kabo Eve?

⁵ Jehovah Anij ear kalikar ilo nan in kõkkar eo kin Ri Lomor eo emwij kallimur kake. Ear kõmman men in ke ear ekajete “serpent eo” me ear kennan ibben Eve im kabo e ñan jab bokake Anij ilo an mõñã leen eo emwij kamoiki. (Jenesis 3:1-5) Emol, serpent eo ear jab lukkun juõn serpent. Ear juõn jitõb ekajur im Bible eo ear naetan “serpent eo edritto, kar naetan Devil im Setan.” (Reveles̃õn 12:9) Satan ear kajerbal men in mour in ettã ñan kabo Eve. Inem, ilo an ekajete Satan, Anij ear ba ñan e: “I naj likit kijirãt ikõtam im kõra eo, im ikõtan ineõm im inen: e naj kokkure bõrõm, a kwo naj kokkure jimwin neen.”​—Jenesis 3:15.

6, 7. (a) Wõn kõrã eo ear keotak “ine” eo? (b) Wõn Inen kallimur eo, im ta eo ej kõtõbrake?

⁶ Wõn “kõra” in Satan ej kijirãte? Einwõt an kar Reveles̃õn jebta 12 kalikar wõn “serpent edritto,” ej kõmman eindein kin kõra in me Satan ej kijirãte. Lale bwe ilo 1 eon ej ba bwe ear “naballin kin al, im jutak ion aliñ eo, im ion bõran belin joñoul im ruo iju.” Kõra in ej jutak kin enjel ro retiljek im rej dolul eo an Anij ilañ, im “nejin eman” eo ej jutak kin Ailiñ eo an Anij, im ej koba Jesus Christ eo ej iroij einwõt Kiiñ.​—Revelation 12:1-5, The Jerusalem Bible.

⁷ Inem, wõn in “inen,” ak nejin kõra eo Jenesis 3:15 ej konono kake, eo enaj kokkure Satan ilo “[bõran],” im mane ñan mij? e ej eo me Anij ear jilkintok jen lañ bwe en lotak ilo wãwen eo ekabwilõñlõñ ikijen juõn kõrã ejañin belele, aet, emaan eo Jesus. (Matu 1:18-23; Jon 6:38) Jebta 12 in Reveles̃õn ej kalikar bwe einwõt juõn Iroij ilañ im emwij an jerkakbiji, Jesus Christ, enaj kar bõk eddo eo ñan anjo ion Satan im einwõt an Reveles̃õn 12:10 ba, enaj kajutak “ailiñ eo [ad] Anij, im kajur an Kraist eo An.”

8. (a) Ta men eo ekãl ikijen karõk eo an moktata Anij ear letoke? (b) Wõn ro rej mõttan kien eo ekãl an Anij?

⁸ Inem Ailiñ in ilo pein Jesus Christ ej juõn men ekãl Anij ear letok kin karõk eo an ilo jinoin ñan armij ro bwe ren lañliñ kin mour indio ion lal. Elikin jumae eo an Satan, ilo mõkaj Jehovah ear kajerbal Ailiñ in ekãl ñan kajimwe aolep men ko renana rar walok. Ke ear bed ion lal Jesus ear kalikar bwe ejamin make lok ian ilo kien in. (Luk 22:28-30) Enaj kar kãlet armij ro jet, im renaj kar kobalok ibben ilañ ñan bõk kunair ilo jerbal in iroij, im erom mõttan eo kein karuo in inen kõrã eo. (Dri Galetia 3:16, 29) Ilo Bible eo oran iroij rein ibben Jesus​—emwij bõk ir aolep jen armij ro rejerawiwi ion lal​—ej 144,000.​—Reveles̃õn 14:1-3.

9. (a) Etke Jesus ear aikwij weaktok einwõt juõn armij ion lal? (b) Ewi wãwen an Jesus kar kajimwe jerbal ko an Devil?

⁹ Bõtab, mokta jen an kar Ailiñ in maroñ jino an iroij, ear aorõk bwe mõttan eo eaorõktata in ine eo, Jesus Christ, en walok ion lal. Etke? Kinke Jehovah Anij ear kãlete bwe E eo enaj kar “kokkure jerbal ko an devil.” (1 Jon 3:8) Juõn ian jerbal ko an Satan kar an kabo Adam ñan jerawiwi, im men in ear bõktok jerawiwi im mij ion armij otemjej nejin Adam. (Dri Rom 5:12) Jesus ear kajimwe jerbal in an Devil eo ilo an lelok mour eo An einwõt juõn binmour. Inem ear lelok juõn bedbed ñan kanemkwoj armij jen jerawiwi im mij im ear kabellok ial eo ñan mour indio.​—Matu 20:28; Dri Rom 3:24; Dri Epesõs 1:7.

Ta Eo Binmour Eo Ej Kõtõbrake

10. Ewi wãwen an Jesus im Adam kar eierlok wõt juõn?

¹⁰ Kinke mour eo an Jesus kar ukõttok jen lañ ñan loan lojen juõn kõrã, ear lotak einwõt juõn armij ewãppen, jab etton kin jerawiwi eo an Adam. Ear maroñ mour indio ion lal. Eindein, Adam kar kõmanmõne einwõt juõn armij ewãppen ibben maroñ eo ñan mour indio ion lal. Ri jilek Paul ear kememej kin wãwen eo kar kõmanmõn lõmarein ruo ilo ejja wãwen eo wõt ke ear je: “‘Adam eo mokta e ar armij emour.’ Adam eo elik [Jesus Christ] E jitõb in kemour. Armij eo mokta e jen lõl, dri lõl Armij eo ken ka ruo E jen lõñ.”​—1 Dri Korint 15:45, 47.

11. (a) Ewi wãwen an Adam im Jesus kar jelet armij ro? (b) En ewi wãwen lemnak eo ad kin katok eo an Jesus?

¹¹ Erro rej eierlok wõt juõn​—maan rein ruo rar make wõt ian armij ro rewãppen rar etetal ion lal​—Bible eo ear kalikare ke ear ba bwe Jesus ear “binmour ñõn armij otemjej.” (1 Timote 2:6) Jesus ear einlok wõt wõn? Alikar, ñan Adam ke ear juõn emaan eo ear wãppen wõt! Jerawiwi eo an Adam eo kein kajuõn ear jemlok ilo an liakelok armij ro otemjej ñan mij. Men in katok eo an “Adam eo elik” ear letok juõn bedbed ñan kanemkwoj kij jen jerawiwi im mij, bwe jen mour ñan indio. Elap an aorõk katok eo an Jesus! Ri jilek Peter ear kalikar: “[ear] jab binmour ñõn kom kin men in ijurwewe ko, kin silver im gold.” Jen men in, Peter ear kamelele: “A kin bõtõktõk e aurõk, einwõt an lam ejelok notan im ekwojarjar, aet eo an Kraist.”​—1 Piter 1:18, 19.

12. Ewi wãwen an Bible eo kar kalikar kilen kajimwe wãwen liakelok eo ad ñan mij?

¹² Bible eo ej kalikar ilo wãwen eo eaibujuij bwe enaj kajimwe wãwen liakelok armij ro otemjej ñan mij ke ear ba: “Inem, einwõt kin juõn buñ [an Adam], ekajet ej itok ñõn armij otemjelok ñõn liakelok; bareinwõt kin juõn kõmõn im wãnik [aolepen mour eo an Jesus ilo tiljek, ñan an mij], men in joij e ar itok ñõn armij otemjelok ñõn kowãnik in mour. Bwe einwõt kin kiblia an juõn armij [Adam], elõñ rej dri jerawiwi, bareinwõt kin kiblie an juõn [Jesus] elõñ re naj dru wãnik.”​—Dri Rom 5:18, 19.

Juõn Kejatdikdik Eaibujuij

13. Etke elõñ rej bõk eñjake kin mour indio?

¹³ Men in letok in an Anij en kar kamõnõnõik kij! Kwojjab mõnõnõ ke bwe kar letok juõn Ri Lomor? Ke rar kajitõk, “Kejatdikdik eo ñan mour indio ej kaitoklimoõm ke?” ilo juõn ekkatak ilo juõn newspaper elap kar kõmmane ilo juõn imõn kwelok elap ilo America, rar bwilõñ ke 67.4 percent in armij ro rar uak im ba, “Jaab.” Etke rar jab kõnan mour indio? Kinke mour ion lal ej obrak kin abañ ko. Juõn armij ear ba: “Ijjab mõnõnõ in lo iõ ñe 200 aõ yiõ.”

14. Etke mour ñan indio enaj ien eo emõntata?

¹⁴ Ak, Bible eo ejjab konono kin mour indio ilo juõn lal armij ro rej eñtan ie kin nañinmij, rittolok, im jerata ko eierlok wõt. Jaab, kinke einwõt Iroij in Ailiñ eo an Anij, Jesus enaj kajimwe aolep abañ ko Satan ear kõmmane. Ekkar ñan Bible eo, Ailiñ eo an Anij enaj “kajeebeplok aolep” kien ko rej jibede lal in. (Daniel 2:44, New World Translation) Ilo ien eo, ñan uake jar eo Jesus ear katakin ri kalor ro an kake, naj “kõmõnmõn ankil” an Anij “einwõt i lõñ, bareinwõt ion lõl.” (Matthew 6:9, 10, Today’s English Version) Ilo lal eo ekãl an Anij, elikin an karreoik lal jen nana otemjej, tokjen binmour eo an Jesus enaj jerbal ñan maat joñan. Aet, aolep ro ej tellokiir renaj bõk mour wãppen!

15, 16. Ta wãwen ko renaj walok ilo lal eo ekãl an Anij?

¹⁵ Ñan armij ro rej mour ilo lal eo ekãl an Anij, ennan in Bible in enaj jerbal: “Kõniekin e naj emõnlok jen kõniekin niñniñ; ej jeblak ñõn ran ko ke e ar inono.” (Job 33:25) Bar juõn kallimur in Bible eo enaj jejjet kitien bar juõn alen: “Inem mejen ro re bilo re naj bellok, im naj bõk binjen lojilñin ro re roñjamõn. Inem armij e kirro e naj kãki einwõt juõn hart, im lo an dri ban konono e naj al; bwe ilo jikin awia river ko re naj walok, im wea ko i ene jemaroñ.”​—Aiseia 35:5, 6.

¹⁶ Baj lemnak: Jekdon joñan dettad, 80, 800, ak rittolok, enbwinid enaj ejmour wõt. Enaj einwõt an Bible eo kallimur kake: “Inem dri jokwe ie e jamin ba, I nañinmij: naj jolok bwir an ro dri jokwe iloan.” Ilo ien eo kallimur in enaj jejjet kitien: “[Anij] enaj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.”​—Aiseia 33:24; Reveles̃õn 21:3, 4.

17. Ta tõbrak ko jenaj kõtmene kaki kin armij ro ilo lal eo ekãl an Anij?

¹⁷ Ilo lal eo ekãl, jenaj kajerbal kamelij eo ad emõn ilo wãwen eo ri Kõmanmõn eo ad ear kõnan bwe jen kajerbale ke ear kõmanmõne bwe en bõk katak ko ilo ejelok joñan. Alikar, baj kalmenlokjen kin men ko rekabwilõñlõñ jemaroñ kõtõbraki! Armij ro rejjab wãppen rar ejaak men otemjej rej kabol kij jen bũdej​—cellular phone, microphone, watch, peijr, computer, balun ko, aet, jabdewõt men kwoj konono kake. Ejelok juõn iair rar ejaake jen men ko rar bõktok jen iju ko jet retolok ilañ. Kin mour indio imad, maroñ eo ñan lo tõbrak ñan kõmman jerbal in kõmanmõn ilo Paradise eo ej itok ion lal enaj walok ilo ejelok joñan.!​—Aiseia 65:21-25.

18. Etke jejamin mõk ñan mour ilo lal eo ekãl an Anij?

¹⁸ Im jej jamin mõk im jab mõnõnõ kin mour. Ñan tõre in kiõ jej kõnan wõt mõñã, meñe emwij ad mõñã elõñ thousand alen. Einwõt juõn armij ewãppen, enaj laplok ad mõnõnõ kin men ko rej jebar ilo Paradise eo ion lal. (Aiseia 25:6) Im jenaj mõnõnõ ñan indio ñe jej kejbãrok men in mour ko ion lal im aluij tulokan al eaibujuij elõñ alen, tol ko, river ko im komlal ko. Emol, mour ejamin juõn men jej mõk im jab mõnõnõ kake ilo lal eo ekãl an Anij!​—Sam 145:16.

Kõtõbrak Men in Aikwij Ko an Anij

19. Etke jemaroñ tõmak bwe ewõr men ko jej aikwij kõmmani ñan bõk men in letok in an Anij kin mour?

¹⁹ Kwoj kõtmene ke bwe kwonaj bõk men in letok in elap an Anij ñan mour indio ilo Paradise eo im kwojjab aikwij jerbal kin e? Ejjab juõn lemnak in kõmmanwa ke bwe Anij enaj kar aikwij juõn men jen kij? Aet ewõr. Anij ejjab baj jotok wõt men in letok eo ñan kij. Ej kwalok e ñan kij, ak jej aikwij bõke. Aet, ej aikwij wõr ad kate kij ñan bõke. Kwomaroñ kwalok ejja kajitõk eo wõt iroij eo elikao ear kajitõkin Jesus kake: “Ewi men eo emõn I naj kõmõne, bwe en aõ mour in drio?” Ak kwomaroñ kwalok kajitõk in ilo wãwen eo ri lale kalbuj eo ej juõn ri Pilippai ear kajitõkin ri jilek Paul kake: “ta eo in kõmõnmõne bwe in mour?”​—Matu 19:16; Jerbal 16:30.

20. Ta men in aikwij eo elap jej aikwiji ñan bõk mour indio?

²⁰ Ilo boñin eo mokta jen an kar mij, Jesus ear kwalok juõn men in aikwij eaorõk ke ear ba ilo jar eo ñan Jemen ilañ: “Men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Ejjab juõn men in aikwij ñan kõmmanwa ke bwe jen bõk jelãlokjen kin Jehovah, e eo ear letok mour indio ñan kij, im jelãlokjen eo kin eo ear mij kin kij, Jesus Christ? Ak, elõñlok men ko jej aikwiji ijellokin ad baj bõk wõt jelãlokjen in.

21. Ewi wãwen ad kwalok bwe jej jerbale tõmak?

²¹ Bible eo ej bareinwõt ba: “Eo ej liki Nejin, mour in drio an.” Inem ear kobatok nan kein: “Eo e jab liki Nejin e jamin lo mour; a illu an Anij ej ber ion.” (Jon 3:36) Kwomaroñ kwalok tõmak eo am ilo Nejin ilo am ukõt mour eo am im mour ekkar ñan ankil an Anij. Kwoj aikwij karmijeteik jabdewõt ial eo enana kwar lore mokta im kõmman men eo Anij ej buñburuen kake. Kwoj aikwij kõmman men eo ri jilek Peter ear kaiñi: “Komin ukwelok ibemi, im bar oktõk, bwe en jeorlok jerawiwi ko ami, im bwe en walok ien aimlolo ko jen iman mejen Iroij.”​—Jerbal 3:19.

22. Ta makitkit ko rekoba ilo ad lor jenkwon neen Jesus?

²² Jen jab meloklok bwe jerbale tõmak ilo Jesus wõt emaroñ kõmman bwe jen bõk mour indio. (Jon 6:40; 14:6) Jej kwalok ad tõmak ilo Jesus ilo ad ‘lor jenkwon ne ko neen.’ (1 Piter 2:21) Men in emaroñ koba ta? Eokwe, ilo an jar ñan Anij, Jesus ear ba: “Lo! Emwij Aõ itok . . . bwe In kõmõnmõn ankil Am, O Anij.” (Dri Hibru 10:7) Eaorõk bwe jen kajeoñe Jesus im kõmanmõn ankil an Anij im wujleplok mour eo ad ñan Jehovah. Ñe emwij men in kwoj aikwij kalikar wujleplok eo am ilo am baptais ilo den; Jesus ear baptais bareinwõt. (Luk 3:21, 22) Bõk buñten ne ko neen elap an emõn. Ri jilek Paul ear kwalok bwe “yokwe an Kraist e relel ilo [buruõd].” (2 Dri Korint 5:14, 15) Ilo wãwen et eo? Eokwe, yokwe ear kamakit Jesus ñan letok mour kin kij. Men in en kar jab kamakit kij ke bwe jen jerbale tõmak ilo e? Aet, en kar kamakit kij ñan lor joñok in yokwe eo an ilo an lelok mour eo an kin ro jet. Christ ear mour ñan kõmanmõn ankil an Anij; jej aikwij kõmman eindein, jab mour ñan kõnan ko ad make.

23. (a) Ro rej bõk mour indio rej aikwij kobaik ir ñan ta? (b) Ta eo ro rej bed ilo congregation in Christian eo rej aikwiji?

²³ Eñin jemlokin nan eo. Bible eo ej ba bwe ke 3,000 armij rar baptais ilo Pentecost 33 C.E., rar “koba na ibeir.” Kobalok ñan ta? “[Rar] ber im bin ilo katak im komao iben dron an ro dri jilik, im ilo ruji bred,” Luk ear kamelele. (Jerbal 2:41, 42) Aet, rar kwelok ibben don ñan katak Bible im komao im ilo wãwen in rar kobaik don, ak erom mõttan, congregation in Christian eo. Ri Christian ro mokta rar keini air kwelok ibben don ñan bõk katak ko ilo jitõb. (Dri Hibru 10:25) Ri Kennan ro an Jehovah rej kõmman men in bareinwõt, im rekõnan rejañ yuk ñan kobalok ibbeir ilo kwelok kein.

24. Ta in “mour eo emol,” im ewi wãwen im ñããt eo jenaj loe?

²⁴ Elõñ million armij ro rej etetal ilo ial eo eaidik ej tellok ñan mour. Jej aikwij kate kij ñan bedwõt ilo ial in! (Matu 7:13, 14) Paul ear kalikar men in ilo nan in rejañ eo an: “Kwon tõrinae tõrinae emõn eo an tõmak; im drebij mour in drio, eo emwij kir yuk ñõn e.” Jej aikwij bed ilo tarinae in ñan “ bõk mour eo emol.” (1 Timote 6:12, 19) Mour eo ejjab mour in kiõ eo eobrak kin eñtan im metak rej walok jen jerawiwi eo an Adam. Ak, ej mour eo ilo lal eo ekãl an Anij, eo enaj walok ñe katok in binmour eo an Christ enaj jerbal ñan ro otemjej rej yokwe Jehovah Anij im Nejin elikin an jukjuk im bed in jako. Kij aolep jej aikwij kãlet mour​—”mour eo emol”​—mour indio ilo lal eo ekãl im aibujuij an Anij.

Ewi Wãwen Am Naj Kar Uak?

◻ Wõn serpent eo, kõrã eo, im ine eo ilo Jenesis 3:15?

◻ Ewi wãwen an Jesus kar einlok wõt Adam, im binmour eo ear bõktok ta?

◻ Ta eo kwomaroñ kijoror kake kin lal eo ekãl an Anij im enaj kamõnõnõik yuk?

◻ Ta men in aikwij ko jej aikwij tõbari ñan mour indio ilo lal eo ekãl an Anij?

[Pija eo ilo peij 10]

Nan jodikdik im ritto ro, Jesus ej make wõt ial eo ñan mour indio

[Pija eo ilo peij 11]

Ekkar ñan ien eo an Anij, ritto ro renaj jeblak ñan ien inono