Kwon Ekkõl Im Niknik!

“Inem komin ekil, bwe kom jaje ran eo ak auõ eo.”​—MATU 25:13.

1. Ri jilek John ear reimanlok ñan ta eo?

ILO bwebwenato eo eliktata ilo Bible eo, Jesus ear kallimur: “Ij iwij mõkõj.” John ri jilek eo an ear uak: “Amen: Kwon itok, Iroij Jisõs.” Ri jilek eo ear jab bere bwe enaj kar itok Jesus. John ear bed ibwiljin ri jilek ro jet me rar kajitõk ibben Jesus: “Ñããt men kein renaj walok, im ta naj kakõllan bed eo am [Greek, pa·rou·siʹa] im jemlokin jukjuk im bed in?” Aet, John ear reimanlok ilo liki ñan bed eo an Jesus ilo ran ko renaj itok.​—Reveles̃õn 22:20; Matthew 24:3, New World Translation.

2. Ikijen bed eo an Jesus, ta wãwen eo ej bed ilo kabuñ ko?

² Liki rot in ejeja ilo ran kein. Elõñ kabuñ ko rej katakin kin “itok” eo an Jesus, ak eiet ian ro uair rej kõtmene kake. Im rej mour ekkar ñan wãwen tõmak eo air bwe ejamin itok Jesus. Book eo The Parousia in the New Testament ej kwalok: “Kejatdikdik eo kin Parousia jidik wõt an jelet mour, lemnak im jerbal eo an kabuñ eo. . . . Eñjake in ekaiuriur eo me kabuñ eo en kar kõmmane jerbal in koukwelok armij im keañ kin gospel eo, ej mõjnolok elañe jab jako.” Ak jab ñan aolep!

3. (a) Ewi eñjake eo an Christian ro remol kin pa·rou·siʹa eo? (b) Ta men eo jenaj etale kiõ?

³ Ri kalor ro remol an Jesus ilo kijerjer rej kõttar jemlokin jukjuk im bed in. Ilo ad kõmman men in ilo tiljek, jej aikwij bõk juõn lemnak ejimwe kin ta eo ej koba ilo bed eo an Jesus im jerbal ilo ekkar.’ Men in enaj kamaroñ kij ñan ‘kijenmij ñõn jemlokin im bõk lomor.’ (Matu 24:13) Ke ear kwalok kanan eo jemaroñ loe ilo Matu jebta 24 im 25, Jesus ear letok kakabilek eo emeletlet jemaroñ jerbale, ñan tokjen eo ad indio. Ilo jebta 25 ewõr parable ko bõlen kwoj jelã kaki, ekoba eo kin virgin ro joñoul (virgin ro remeletlet im ro rebwebwe) im parable eo kin talent ko. (Matu 25:1-30) Ewi wãwen ad maroñ bõk tokjen jen wanjoñok kein?

Kwon Ekkõl, Einwõt kar Virgin ro Lalem!

4. Ta point eo elap kin parable eo kin virgin ro?

⁴ Bõlen kwo kõnan bar konono parable eo kin virgin ro, me jemaroñ loe ilo Matu 25:1-13. Wãwen eo ibelakin kar juõn ran in mare an juõn Ri Jew eo leo ej etal ñan mweo imõn jemen lio ri belele eo ñan karwan lio ñan mweo imõn (ak ñan mweo imõn jemen leo). Juõn jepkalan rot in emaroñ koba ri kajañjañ im ri al ro, im ien an tõkeãklok emaroñ jab alikar. Ilo parable eo, joñoul virgin ro rar kõttar ilo boñ kin tõkeãktok eo an leo. Lalem iair rar bwebwe im ear jab bwe oil rar bõktok im kin men in rar aikwij etal im bar wia. Lalem ro jet ilo meletlet rar bõktok oil ilo nien oil ko jet bwe ren kar maroñ bar eteñ lamp ko air elañe ear to air aikwij kõttar. Rein lalem wõt rar bed im bojak ke leo ri belele eo ear tõkeãktok. Kin men in, ir wõt rar maroñ deloñ ilo kwojkwoj eo. Ke virgin ro lalem rebwebwe rar jeblak, rar rumij ñan air maroñ deloñ.

5. Ta eon ko rej kalikarlok melele ilo kõkkar eo kin parable eo kin virgin ro?

⁵ Elõñ wãwen ko kin parable in jemaroñ melele kaki einwõt nan in kõkkar. Ñan wanjoñok, Jeje ko rej konono kin Jesus einwõt juõn leo ri belele. (Jon 3:28-30) Jesus ear keidi e make ñan leo nejin juõn king ñan eo ear keboj juõn kwojkwoj in belele. (Matu 22:1-14) Im Bible eo ear keidi Christ ñan juõn leo belen. (Dri Epesõs 5:23) Ekaitoktoklimo, bwe ilo jikin ko jet rar kwalok kin Christian ri kabit ro einwõt “lio belen” Christ, ak ilo parable eo ejjab konono kin juõn lio ri belele. (Jon 3:29; Reveles̃õn 19:7; 21:2, 9) Ak, ej konono kin joñoul virgin ro, im ilo jikin ko jet ri kabit ro rej keidi ir ñan juõn virgin kar karõke einwõt belen Christ.​—2 Dri Korint 11:2.a

6. Jesus ear lelok nan in rejañ et eo ke ear kajemlok parable eo an kin virgin ro?

⁶ Ijellokin kamelele rot kein im jabdewõt wãwen jerbale ilo kõkkar, ewõr nan in kakabilek ko remõn jemaroñ katak jen parable in. Ñan wanjoñok, lale bwe Jesus ear kajemlok parable in kin nan ko: “Inem komin ekil, bwe kom jaje ran eo ak auõ eo.” Inem parable in ej kwalok kin aikwij eo bwe kij kajjojo jej aikwij ekkõl, ñan bojak kin jemlokin jukjuk im bed in enana eo ej ebaktok. Jemlok eo emol ej itok, meñe jejjab maroñ kalikar ran eo enaj itok. Kin men in, lale kin lemnak ko kumi ko ruo an virgin ro rar kwaloki.

7. Ilo wãwen et eo virgin ro lalem ilo parable eo rar kamol air bwebwe?

⁷ Jesus ear ba: “Lailim iair re bwebwe.” Kar kin air jab tõmak ke bwe leo ri belele enaj kar itok? Rar etal in bukõt ke men in kamõnõnõ ko? Ak kar mone ir ke? Uak eo ej jab. Jesus ear ba bwe rein lalem rar “ilok bwe ren wõnmae leo belele.” Rar jelã bwe enaj itok, im rar kõnan bõk kunair, im bareinwõt bed ilo “kwojkwoj in belele” eo. Ak, rar bojak ke? Rar kõttar e jidik, mae “lukwõn boñ,” ak rar jab bojak kin tõkeãktok eo an ilo jabdewõt ien​—meñe mõkajlok ak rumijlok jen ien eo rar kõtmene kake.

8. Ewi wãwen virgin ro lalem ilo parable eo rar kamol air meletlet?

⁸ Ro jet lalem​—ro Jesus ear ba remeletlet​—rar bareinwõt ilok kin lamp ko rej urur, im kõttar itok eo an leo. Ir bareinwõt rar aikwij kõttar, ak rar “meletlet.” Nan in Greek eo rej ukõte “meletlet” emaroñ melelen “ewõr an lemnak, ejelã kõmmanwa, ej meletlet ilo juõn wãwen ekeie.” Rein lalem rar kamol air meletlet ilo air bõktok nien oil ko jet ñan bar teñi lamp ko air elañe ear juõn men in aikwij. Ilo mol, joñan air kõnan bojak ñe enaj itok leo rar jab kõnan ajeji oil ko air. Ekkõl rot in rar jab bwid, einwõt ej alikar ilo air kar bed im lukkun bojak ke leo ear tõkeãktok. Im “ro rej rerelok rej dreloñ iben ñõn kwojkwoj in belele: im ekil aur.”

9, 10. Ta point eo elap ilo parable eo kin virgin ro, im ta kajitõk ko jej aikwij kajitõkin kij make?

⁹ Jesus ear jab lelok juõn katak kin mwil ko rejejjet ilo juõn kwojkwoj in belele, im ear jab lelok nan in kakabilek ikijen ajeji men ko am ibben ro jet. Point eo an kar: “Komin ekil, bwe kom jaje ran eo ak auõ eo.” Kajitõkin kwe make, ‘Emol aõ ekkõl wõt ke ikijen bed eo an Jesus?’ Jej tõmak bwe Jesus ej kiõ iroij ilo lañ, ak ewi joñan ad tõmak kin mol in bwe ‘re naj lo Nejin armij ej itok ilo kõro ko i lõñ, kin kajur im aibujuij elap’? (Matu 24:30) Ke ear “lukwõn boñ,” emol an kar ebaklok ñan tõkeãktok eo an leo jen ke virgin ro rar ilok in wõnmaik e. Eindein lok wõt, tõkeãktok eo an Nejin armij ñan kokkure jukjuk im bed in enana ej laplok an ebak jen ke jaar jino reimanlok ñan itok eo an. (Dri Rom 13:11-14) Jaar kejbãrok ad ekkõl wõt ke, im en laplok ñe ien eo ej ebaktok?

¹⁰ Ñan bokake kien eo “komin ekil” ej aikwiji ad ekkõl ien otemjej. Lalem virgin ro rar kõtlok bwe en maat oil ko air im rar etal in bar wia. Juõn Christian rainin emaroñ eindein lok an mad bwe en jab lukkun bojak kin tõkeãktok eo an Jesus eo ej ebak. Ear walok ñan jet Christian ro ilo ebeben eo kein kajuõn. Emaroñ walok ñan jet rainin. Inem jej aikwij kajitõkin kij make, ‘Ej walok ñan iõ ke?’​—1 Dri Tessalonika 5:6-8; Dri Hibru 2:1; 3:12; 12:3; Reveles̃õn 16:15.

Kwon Niknik ñe Jemlokin ej Ebaktok

11. Jeltokin, parable et eo Jesus ear kwaloke, im ear einlok wõt ta?

¹¹ Ilo parable eo juõn, Jesus ear kõmman elaplok jen an rejañ ri kalor ro an bwe ren ekkõl wõt. Elikin an jiroñ ir kin virgin ro remeletlet im bwebwe, ear kwalok kin parable eo kin talent ko. (Read Matu 25:14-30.) Ilo elõñ wãwen ko ej einlok wõt parable eo mokta kin minas ko, eo Jesus ear kwaloke kinke elõñ rar “lemnok bwe ailiñ in Anij e naj mõkõj an walok.”​—Luk 19:11-27.

12. Ta point eo elap kin parable eo kin talent ko?

¹² Ilo parable eo kin talent ko, Jesus ear konono kin juõn emaan, mokta jen ear ilok ñan bar juõn ailiñ, ear ãñiñintok jilu ri karejar ro an. Ñan juõn ear lelok lalem talent ko, ñan bar juõn ear lelok ruo, im ñan eo eliktata ear lelok juõn​—“ñõn kaju iair einwõt air maroñ.” Emaroñ kar melelen juõn silver talent, juõn joñan wõnãn juõn ri karejar enaj kar bõke elañe ear jerbal iumin 14 yiõ ko​—juõn joñan money elap! Ke leo ear jeblak, ear kajitõk ibben ri karejar ro ñan kwalok kin ta eo rar kõmmane ilo “ien eto” ear jako. Ri karejar ro ruo mokta rar kalaplok ruo alen wõnãn money eo kar lelok ñan ir. Ear ba “emõn am kõmõn,” ear kallimur ñan kajjojo iairro eddo ko relaplok, im ear kajemlok: “Kwon dreloñ ilo lõñliñ an am iroij.” Ilo an ba bwe master eo ear juõn armij ebin, ri karejar eo ear bõk juõn talent ear jab kajerbale ilo juõn wãwen ear wõr tokjen. Ear noje money eo, ear jab kadeloñe ilo bank bwe en wõr jimmair. Master eo kar naetan “korijera enana im jowõn” kinke ear jerbal nae tokjen ko an master eo. Kin men in, kar bõk talent eo jen e, im kadioj e inabõj “ijo re naj jõñ im ñi lõllõl.”

13. Ewi wãwen Jesus ear einwõt master eo ilo parable eo?

¹³ Bar juõn alen, tibdikdik in parable in jemaroñ melele kake einwõt nan in kõkkar. Ñan wanjoñok, Jesus, eo leo ear ilok ñan ailiñ ko jet ear pijaiki, enaj ilok jen ri karejar ro an, ñan etal ñan lañ, im enaj to an kõttar mae ien enaj bõk kajur in iroij.b (Sam 110:1-4; Jerbal 2:34-36; Dri Rom 8:34; Dri Hibru 10:12, 13) Ak, bar juõn alen, jemaroñ lo juõn katak ak nan in kakabilek elaplok me kij aolep jej aikwij jerbale ilo ad mour. Ta in?

14. Parable eo kin talent ko ej kalikar aikwij et eo eaorõk?

¹⁴ Meñe kejatdikdik eo ad ej mour ilo jab wabanban ilañ ak mour indio ilo paradise ion lal, ej alikar jen parable eo an Jesus bwe jej aikwij kate kij ilo makitkit ko in Christian. Ilo mol, ennan eo ilo parable in jemaroñ eliji ilo juõn wõt nan: niknik. Ri jilek ro rar likit wanjoñok eo jen ien Pentecost 33 C.E. manlok. Jej read: “Kin elõñ nan ko [Peter] ej kennan in kowe ir, im ba, Komin mõke lomoremi jen ebeben in ankeke.” (Jerbal 2:40-42) Im elap tokjen ko remõn rar walok jen jibadbad ko an! Ke ro jet rar koba ibben ri jilek ro ilo jerbal in kwalok nan an Christian, ir bareinwõt rar niknik, im news eo emõn ej laplok “ilo aolepen lõl.”​—Dri Kolosse 1:3-6, 23; 1 Dri Korint 3:5-9.

15. Ilo wãwen et eo ejej uan jej aikwij jerbale point eo elap ilo parable eo kin talent ko?

¹⁵ Lemnak kin ta eo eon ko ibelakin parable in kar konono kaki​—juõn kanan kin bed eo an Jesus. Ej bwe nan in kamol ko bwe pa·rou·siʹa eo an Jesus ej wõnmanlok im ejjabto naj tõbar mõttan eo elaptata. Kememej kõtan eo Jesus ear kõmmane ikõtan “jemlokõn” im jerbal eo Christian ro rej aikwij kõmmane: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” (Matu 24:14) Ilo lemnak kin men in, ri karejar et eo jej anõke? Kajitõkin kwe make: ‘Ewõr ke un ñan tõmak bwe ña ij einwõt ri karejar eo ear noje men eo kar lelok ñan e, ke ear lale men ko an make? Ak ej alikar ke bwe ij einwõt ro rar emõn im tiljek? Ij jerbal ke ilo joñan eo I maroñ ñan kalaplok tokjen ko an Master eo ien otemjej?’

Ekkõl im Niknik Ilo Ien Bed eo An

16. Ennan et eo ewõr ilo parable ko ruo jaar etale?

¹⁶ Aet, ijellokin meleleir ilo nan in kõkkar im nan in kanan, parable kein ruo rej kwalok ñan kij nan in rejañ ko rej itok jen loñin Jesus make. Ennan eo an ej eñin: Kwon ekkõl, kwon niknik, elaptata ñe jemaroñ lo kakõlle ko kakõllan pa·rou·siʹa eo an Jesus. Ej walok kiõ. Inem jej ekkõl im niknik ke?

17, 18. Nan in kakabilek et eo ri kalor eo James ear kwalok kake ikijen bed eo an Jesus?

¹⁷ James jatin Jesus ear jab bed ion Tol Olive ñan roñjake kanan eo an Jesus; ak ear jelã kake tokelik, im ear alikar an melele kin aorõkin. Ear je: “Inem ro jãtiõ, komin mijmijlolõmi mae ien [bed eo] an Iroij. Lo, dri kallip ej kõtar leen lõl e aurõk im ej mijmijlolin ñõn ter eo emwij an bõk wut mokta im wut eliktata. Komin bareinwõt mijmijlolõmi; komin kabin buruemi: bwe [bed eo] an Iroij ej ebak.”​—Jemes 5:7, 8.

¹⁸ Elikin an kamol bwe Anij enaj ekajete ro rej kajerbal mweieir ilo juõn wãwen ebwid, James ear rejañ Christian ro bwe ren jab kijoror ñe rej kõttar an Jehovah emmakit. Juõn Christian eo ejaje kõttar emaroñ kwalok juõn jitõb in idenwõne, einwõt ñe ej aikwij make kajimwe bwid ko ro jet rar kõmmani. Ak, en kar jab eindein kinke ien ekajet enaj mol an itok. Wanjoñok eo kin juõn ri kallip ej kalikar men in, einwõt James ear kamelele kake.

19. Juõn ri kallip in Ri Israel ear maroñ kwalok kain mijmijlolin rot eo?

¹⁹ Juõn ri kallip in Ri Israel eo ear kalbwini ine ko ear aikwij in kõttar, mokta ñan an eddek bwilõk ko, inem bwe men in eddek eo en rittolok, im eliktata kin ien madmõd eo. (Luk 8:5-8; Jon 4:35) Iumin alliñ kein, kar wõr ien im bõlen unin an inebata. Wõt ko mokta renaj itok im bwe ke? Ak ta kin wõt ko eliktata? Menin mour ko redik ak juõn lañ emaroñ ke kokkure menin eddek ko? (Keidi Joel 1:4; 2:23-25.) Ijoke, ekkã an juõn ri kallip in Ri Israel maroñ liki Jehovah im ittirolol ko ear karõki. (Duteronomi 11:14; Jeremiah 5:24, NW) Mijmijlolin an ri kallip eo emaroñ einwõt kõtmene. Ilo tõmak ear jelã bwe men eo ear kõttare enaj kar itok. Emol enaj itok!

20. Ilo burukuk ibben nan in kakabilek eo an James ewi wãwen ad maroñ kwalok mijmijlolõmid?

²⁰ Ke juõn ri kallip ear maroñ jelã ñããt enaj ien madmõd, Christian ro ilo ebeben eo kein kajuõn rar jab maroñ jennade ñããt eo bed eo an Jesus enaj kar walok. Ak, emol an naj itok. James ear je: “Bwe bed [Greek, pa·rou·siʹa] eo an Iroij ej ebak.” Ke James ear je nan kein, kakõlle eo kakõllan bed eo an Christ, ibelakin lal, ejañin kar walok. Ak ej walok kiõ! Inem en ewi eñjake eo ad ilo ien in? Kakõlle eo ej alikar ñan mejed. Jemaroñ loe. Emol ad maroñ ba, ‘Ij lo an jejjet kitien kakõlle eo.’ Jemaroñ ba ilo liki, ‘Bed eo an Iroij ej walok kiõ, im bwiltõñtõñ in ien eo ej ebak.’

21. Ta eo emwij ad beek bwe jenaj kõmmane?

²¹ Kin an mol men in, ewõr un eo ekajur ñan bõk ñan buruõd im jerbale katak ko an parable ko ruo an Jesus me jaar etali. Ear ba: “Inem komin ekil, bwe kom jaje ran eo ak auõ eo.” (Matu 25:13) Kiõ ej ien ad aikwij kijejeto ilo jerbal in Christian eo ad. Jen kwalok ilo mour ko ad ran otemjej bwe je melele kin point eo an Jesus. Jen ekkõl! Jen niknik!

[Kamelele ko itulal]

Kwoj Kememej Ke?

◻ Point et eo elap kwar bõk jen parable eo kin virgin ro remeletlet im bwebwe?

◻ Ikijen parable eo kin talent ko, nan in kakabilek et eo Jesus ej lewõj?

◻ Ilo wãwen et mijmijlolõm eo am kin pa·rou·siʹa eo ej einlok wõt eo an juõn ri kallip in Ri Israel?

◻ Etke jej mour kiõ ilo juõn ien elap an kairujruj lojid im ej aikwiji ad kate kij?

[Pija ko ilo peij 29]

Katak et ko kwomaroñ katak kaki jen parable eo kin virgin ro im kin talent ko?