‘Ri Korijer Eo Etiljek’ Ej Bõk Anjo Ion Melejoñ Eo!

“Bwe ien in ien jino ekajet ilo imõn Anij.”—1 Piter 4:​17.

1. Ta eo Jesus ear iioni ke ear ekajete “dri korijer” eo?

ILO Pentecost 33 C.E., Jesus ear kãlet juõn “dri korijer” ñan lelok ekan ilo ien ekkar ñan “ro dron.” Ilo 1914, kar kairoij Jesus einwõt King, im ejjabto ear ien ñan an ekajete “dri korijer” eo. Ear lo bwe jarlepju in ro uan “dri korijer” eo ear kamol air “tiljek im meletlet.” Kin men in, ear kairoij e “ion men ko otemjelok an.” (Matu 24:45-​47) Bõtab, ear wõr bareinwõt juõn dri korijeran eo enana, eo ear jab tiljek im meletlet.

“Dri Korijeran eo Enana”

2, 3. “Dri korijeran eo enana” ear itok jen ia, im ewi wãwen an kar ejaak?

² Jesus ear konono kin ri karejar eo enana mwij in wõt an konono kin “dri korijer e tiljek im meletlet.” Ear ba: “A elañe dri korijeran eo enana e naj ba ilo buruen, Aõ iroij ej kõtar an itok; im e naj jino an dreñlokwe ro dri korijer iben, im naj mõña im irak iben ro dri karek: Iroij an dri korijeran eo e naj itok ilo ran eo ñe e jab kõtõmene, im ilo auõ eo e jaje kake, im e naj bukwe, im naj likit jikin iben ro dri jela mon: ijo e naj jõñ im ñi lõllõl.” (Matu 24:48-​51) Nan kein “dri korijeran eo enana” ej kareilok kij ñan nan ko an Jesus lok iman kin ri karejar eo etiljek im meletlet. Aet, “dri korijeran eo enana” rar mokta mõttan ro uan ri karejar eo etiljek.a Ewi wãwen?

³ Mokta jen 1914, elõñ ro uan class in ri karejar eo etiljek ear lap air kejatdikdik ñan iion Leo Belele eo ilañ ilo yiõ eo, ak kejatdikdik ko air rar jab jejjet kitieir. Tokjen men in im men in walok ko jet, elõñ ear rup burueir im jet ear meo burueir. Jet iair rar oktak im ‘dreñlokwe’ ilo nan ro jeiir im jatiir mokta im kamao ibben “ro dri karek,” kumi in kabuñ ko an Christendom.​—Aiseia 28:​1-3; 32:6.

4. Ewi wãwen an kar Jesus jerbal ibben “dri korijeran eo enana” im ibben aolep ro rej kwalok ejja jitõb in wõt?

⁴ Rein rar Ri Christian mokta rar oktak im kar kile ir einwõt “dri korijeran eo enana,” im Jesus ear kajeik ir ilo an “bukwe” ir. Ewi wãwen? Ear karmijeteik ir, im rar luji kejatdikdik eo air ilañ. Bõtab, ear jab mõkaj im kokkure ir. Rar aikwij mokta kijenmij kin juõn ien jañ im ñi lõllõl ilo “kabin marok” eo ilikin congregation in Christian. (Matu 8:​12) Jen ien ko mokta, jejjo ri kabit ro jet rar kwalok ejja jitõb in wõt enana, im kwalok ir make ibben “dri korijeran eo enana.” Jet ian “sheep ro jet” rar kajeoñe jab tiljek eo air. (John 10:​16, NW) Aolep ri kijirãt rein an Christ rej iion ejja “kabin marok” eo wõt ilo jitõb.

5. Ewi wãwen an kar ri karejar eo etiljek im meletlet emmakit, ilo oktan “dri korijeran eo enana”?

⁵ Mekarta, ri karejar eo etiljek im meletlet rar iion ejja melejoñ ko wõt an “dri korijeran eo enana.” Bõtab, jen air oktak im meo burueir rar kõmman oktak ko. (2 Dri Korint 13:11) Yokwe eo air ñan Jehovah im ro jeiir im jatiir ear kajurlok. Tokjen men in, rar erom juõn “jurõn im loñtak in mol” ilo “ran [kein] eliktata” im nana.​—1 Timote 3:​15; 2 Timote 3:1.

Virgin Ro Remeletlet im Ro Renana

6. (a) Ewi wãwen Jesus ear wanjoñok kake tiljek eo an class in ri karejar eo etiljek? (b) Mokta jen 1914, ta ennan eo Christian ri kabit ro rar keañ kake?

⁶ Elikin an konono kin “dri korijeran eo enana,” Jesus ear kwalok ruo parable ko ñan kwalok kin etke jet Christian ri kabit ro renaj tiljek im meletlet ke ro jet rejjab.b Ñan kalikar meletlet, ear ba: “Ilo ien eo ailiñ in lõñ e naj einwõt joñoul virjin, rej bõk lamp ko air, im ilok bwe ren wõnmae leo belele. Lailim iair re bwebwe, im lailim re meletlet. Bwe ro re bwebwe ke rej bõk lamp ko air re jab bõk oil na ibeir. A ro re meletlet rej bõk oil ilo air ken eteñ na iben lamp ko air.” (Matu 25:​1-4) Virgin ro joñoul rej kakememej kij kin Christian ri kabit ro mokta jen 1914. Rar watwat bwe leo belele, Jesus Christ, ear bojak in walok. Kin men in, rar “ilok” in wõnmaik e, im kwalok nan ilo beran bwe “ien ko an dri ailiñ ko” enaj jemlok ilo 1914.​—Luk 21:24.

7. Ñããt im etke Christian ri kabit ro rar ‘mejki im kiki,’ einwõt ba ilo nan in kõkkar?

⁷ Rar jimwe. Ien ko an ri ailiñ ko rar jemlok ilo 1914, im Ailiñ in Anij iumin Christ Jesus ear jino jerbal. Ak men in ear walok ilo lañ ko ijo jejjab loe kin mejed. Ion lal, armij rar jino eñtan kin “woe” eo kar kanan kake. (Reveles̃õn 12:​10, 12) Juõn ien melejoñ ear walok. Ilo an jab alikar air melele kin men ko, Christian ri kabit ro rar lemnak bwe “leo belele e rumijtok.” Ilo air bwok im jelmae kijirãt jen lal in, rar kadiklok im enañin kabõjrak air kõmman jerbal in kwalok nan ilobwilij. Einwõt virgin ro ilo parable eo, ilo kajin kõkkar rar “mijki im kiki,” einwõt Ri Christian ro rejjab tiljek rar kõmmane elikin mij eo an ri jilek ro an Jesus.​—Matu 25:5; Reveles̃õn 11:​7, 8; 12:17.

8. Ta eo ear tellok ñan air lamõj: “Lo, leo belele!” im ekar ien ñan an Christian ri kabit ro kõmmane ta eo?

⁸ Inem ilo 1919 juõn men me rar jab kõtmene kake ear walok. Jej konono: “Im ñe lukwõn boñ, juõn lamij, Lo, leo belele! komin iten wõnmae e. Inem virjin ro otemjej rej jerkak, im kõmõni lamp ko air.” (Matu 25:​6, 7) Ke men ko rar walok im einwõt ejelok kejatdikdik, ear wõr juõn kir bwe ren bar kijejeto! Ilo 1918, Jesus, “ri keañ eo an bujen eo,” ear itok ñan temple eo ilo jitõb an Jehovah ñan ekajete im karreoik congregation eo an Anij. (Malachi 3:​1, NW) Kiõ, Christian ri kabit ro rar aikwij in ilok im wõnmaik e iloan worwor in temple eo ilal. Ear ien eo ñan air “romak.”​—Aiseia 60:1; Dri Pilippai 2:​14, 15.

9, 10. Ilo 1919, etke jet Ri Christian ro rar “meletlet” im ro jet rar “bwebwe”?

⁹ Ak kõttar! Ilo parable eo, ear wõr juõn abañ ibben jet ian jiroñ ro. Jesus ear wõnmanlok: “Im ro re bwebwe re ba ñõn ro re meletlet, ‘komin letok ñõn kim jen ami oil; bwe lamp ko am re nañin kwũn.’” (Matu 25:8) Ñe ejelok oil, lamp ko rejamin romak. Kin men in, oil in lamp eo ej kakememej kij kin mol eo ilo Nan eo an Anij im jitõb kwojarjar eo an, eo ej kamaroñ ri kabuñ ro remol bwe ren ro im ej romak air meram. (Sam 119:130; Daniel 5:​14, NW) Mokta jen 1919, Christian ri kabit ro remeletlet rar tiljek in bukõt air jelã kin ta eo ankil an Anij ñan ir, meñe iumin jidik ien rar bed ilo juõn wãwen emõjno. Kin men in, ke kir eo ear walok bwe en romak air meram, rar bojak.​—2 Timote 4:2; Dri Hibru 10:24, 25.

¹⁰ Bõtab, jet ian ri kabit ro rar jabojak in karmijete kõnan ko air make ak ñan kalaplok air kate ir​—meñe rar lukkun kõnan bed ibben Leo Belele eo. Inem ke ear ien ñan air kijejeto in kwalok kin news eo emõn, rar jabojak. (Matu 24:14) Rar bareinwõt kajeoñ in kamõjnolok ro mõttair rekijejeto, im kajitõk, ilo juõn wãwen kõkkar, kin jidikin oil ko air. Ilo parable eo, virgin ro remeletlet rar uak ilo wãwen et eo? Rar ba: “Bwelen je jamin bwe kake; a komin ilok ñõn iben ro rej wia im wiaik ami.” (Matu 25:​9) Eindein lok wõt, Christian ri kabit ro retiljek ilo 1919 rar makoko in kõmmane jabdewõt men me enaj kar kadiklok maroñ eo air ñan karomak air meram. Kin men in, rar le jen melejoñ eo.

11. Ta eo ear walok ñan virgin ro rebwebwe?

¹¹ Jesus ear kajemlok: “Im ke r’ar ilen wiaik, leo belele ej itok: im ro rej rerelok rej dreloñ iben ñõn kwojkwoj in belele: im ekil aur. Tokelik virjin ro jet rej bareinwõt itok, im ba, ‘Iroij, iroij, kwon kebellok ñõn kim.’ A e uak im ba, ‘Emol Ij ba ñõn kom, I jaje kom.’” (Matu 25:10-​12) Aet, jet rar jabojak kin itok eo an Leo Belele eo. Kin men in, rar likjap ilo etale eo im luji ien eo emõn ñan bed ilo kwojkwoj in belele eo ilañ. Emol elap an kaburomõjmõj!

Parable eo kin Talent ko

12. (a) Ta eo Jesus ear kajerbale ñan wanjoñok kin tiljek? (b) Wõn eo kar emaan eo ear “etallok”?

¹² Elikin an wanjoñok kin meletlet, Jesus ear wõnmanlok im wanjoñok kin tiljek. Ear ba: “Bwe ej einwõt ke juõn armij ej ilok ñõn bar juõn ailiñ, e ar ãñiñintok ro dri korijeran, im lelok ñõn ir mweiuk ko an. Im e ar lelok lailim talent ñõn juõn, im ruo ñõn juõn, im juõn ñõn bar juõn; ñõn kaju iair einwõt air marõn, im ej etallok.” (Matu 25:14, 15) Emaan eo ilo parable in ej Jesus make, eo ear “etallok” ke ear wanliñlok ñan lañ ilo yiõ eo 33 C.E. Ak mokta jen an kar wanliñlok, Jesus ear lelok “mweiuk ko an” ñan ri karejar ro an retiljek. Ewi wãwen?

13. Ewi wãwen an kar Jesus keboj juõn melaj elap kin jerbal im kamaroñ “dri korijeran” ñan wia?

¹³ Ilo jerbal in kwalok nan eo an ion lal, Jesus ear jino keboje juõn melaj elap ñan jerbal ilo an kwalok nan kin news eo emõn kin Ailiñ eo ilujen enen Israel. (Matu 9:​35-​38) Mokta jen an kar “etallok,” ear lelok melaj in ñan ri karejar ro an retiljek, im ba: “Komin ilok, im kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar; im katakin ir bwe ren bokake nan ko otemjej I ar jiroñ kom.” (Matu 28:18-​20) Kin nan kein, Jesus ear kamaroñ “dri korijeran” ñan wia mae ien ej jeblaktok, “kaju iair einwõt air maroñ.”

14. Etke ear jab kõtmene bwe aolep ren kõmmane ejja joñan eo wõt ikijen wia?

¹⁴ Nan kein, “kaju iair einwõt air maroñ,” rej kalikar bwe ear jab joñan wõt juõn wãwen ko ak maroñ ko an aolep Ri Christian ro ilo ebeben eo kein kajuõn. Jet, einwõt Paul im Timothy, rar anemkwoj in bõk kunair ilo joñan eo elaptata air maroñ ilo jerbal in kwalok nan im katakin. Wãwen ko ibben ro jet remaroñ kar kõmman joñan air anemkwoj ñan jerbal. Ñan wanjoñok, jet Ri Christian ro rar ri kamakoko ro, im ro jet rar nañinmij, ritto, ak ear wõr eddo ko in family ibbeir. Emol, jet jerammõn ko ilo congregation eo rar jab bellok ñan aolep ri karejar ro. Ri kabit kõrã ro im jet ri kabit emaan ro rar jab katakin ilo congregation eo. (1 Dri Korint 14:34; 1 Timote 3:1; Jemes 3:1) Bõtab, jekdon ta wãwen ko ibbeir, aolep ri kabit ri karejaran Christ​—maan im kõrã​—kar jitõñ ir ñan wia, ñan kortokjen ien ko im wãwen ko remõn ilo jerbal in kwalok nan eo an Christian. Ri karejaran Christ ilo ran kein rej kõmman eindein.

Ien Ekajet Ej Jinoe!

15, 16. (a) Ñããt eo kar ien watõk ibbeir? (b) Ta ien ko remõn im rekãl ñan ‘wia’ kar liloki ñan ro retiljek?

¹⁵ Parable eo ej wõnmanlok: “Elikin ien eto, iroij eo an ro dri korijeran ej item watõk ibeir.” (Matu 25:19) Ilo 1914​—emol juõn ien eaetok elikin 33 C.E.​—Christ Jesus ear ijjino bed in iroij eo an. Jilu im jimettan yiõ ko tokelik, ilo 1918, ear itok ñan temple eo ilo jitõb an Anij im kajejjet kitien nan ko an Peter: “Bwe ien in ien jino ekajet ilo imõn Anij.” (1 Piter 4:17; Malachi 3:​1, NW) Ear ien ñan watõk ibbeir.

¹⁶ Ta eo ri karejar ro, ri kabit ro jatin Jesus, rar kõmmane kin “talent ko” an King eo? Jen 33 C.E. manlok, ekoba yiõ ko rej tellok ñan 1914, elõñ rar kate ir jerbal ilo jerbal in “wia” an Jesus. (Matu 25:16) Meñe ilo ien bata eo an lal kein kajuõn, rar kwalok juõn kõnan ekajur ñan karejar ñan Master eo. Ear ekkar kiõ ñan lelok ñan ro retiljek ien ko remõn im rekãl ñan ‘wia.’ Ien jemlokin jukjuk im bed in emottok. Ear juõn men in aikwij ñan kwalok kin news eo emõn ibelakin lal. Rar aikwij madmõd “jonikõn lõl.” (Reveles̃õn 14:​6, 7, 14-​16) Rar aikwij bukõte ro eliktata uan class in wheat eo im aini juõn “jar elap” in sheep ro jet.​—Reveles̃õn 7:9; Matu 13:24-​30.

17. Ewi wãwen Christian ri kabit ro retiljek rar ‘dreloñ ilo lõñliñ an air iroij’?

¹⁷ Ien jonikan ej juõn ien lañliñ. (Sam 126:6) Inem, ear ekkar, ke ilo 1919, Jesus ear lelok ñan ri kabit ro jatin retiljek eddo eo elaplok, ear ba: “Kw’ar tiljek kin men kõn reit, I naj kairoij yuk ion men ko relõñ: kwon dreloñ ilo lõñliñ an am iroij.” (Matu 25:21, 23) Bareinwõt, lañliñ eo an Master eo einwõt King eo ekãl kar kairoij e ilo Ailiñ in Anij ele jen joñan ad maroñ lemnak kake. (Sam 45:​1, 2, 6, 7) Class in ri karejar eo etiljek ej koba ilo lañliñ in ilo air binej jenkwon King eo im kalaplok men ko an ion lal. (2 Dri Korint 5:​20) Jemaroñ lo lañliñ eo air ilo nan in kanan eo ilo Aiseia 61:10: “I naj kanuij lõñliñ ilo Jeova, aõ e naj lõñliñ ilo aõ Anij; bwe E ar kanuknuk iõ kin nuknuk ko in lomor.”

18. Etke jet rar jab ellã jen ekajet eo, im kin ta tokjen?

¹⁸ Ekaburomõjmõj, jet rar jab ellã jen ekajet eo. Jej konono: “Inem eo e ar bõk juõn talent, ej itok im ba, ‘Iroij I ar jela kajem, kwe armij ebin, kwoj marmir ijo kw’ar jab jeor na ie, im kwoj ae jen ijo kw’ar jab illik na ie. Im I ar lelñoñ, im ilok im noje am talent ilo brij; lo mõnni am ibõm.’” (Matu 25:​24, 25) Eindein, jet Christian ri kabit ro rar jab bõk kunair im “wia.” Mokta jen 1914 rar jab kijejeto in jaketo-jaketak kejatdikdik eo air ibben ro jet, im rar jab kõnan jinoe ilo 1919. Ewi wãwen an kar Jesus emmakit ñan utiej buru eo air? Ear bõk aolep jerammõn ko air. Kar ‘jolok ir ñan kabin marok; ijo re naj jañ im ñi lõllõl.’​—Matu 25:28, 30.

Ekajet eo Ej Wõnmanlok Wõt

19. Ilo wãwen et eo ekajet eo ej wõnmanlok wõt, im ta eo aolep Christian ri kabit ro rar bebe ilo burueir ñan kõmmane?

¹⁹ Emol, jarlepju ian ro rar erom ri kabit ro karejaran Christ ilo ien jemlokin rejañin kar karejar ñan Jehovah ke Jesus ear jino ekajet eo an ilo 1918. Rar jerata ke? Jaab. Ekajet eo ear baj jino wõt ilo 1918/19 ke ri karejar eo etiljek im meletlet einwõt juõn class rar ellã jen melejoñ eo. Christian ri kabit ro kajjojo rej wõnmanlok im bõk ekajet mae ien emwij kabin seal eo air. (Reveles̃õn 7:​1-3) Ilo air kile men in, ri kabit ro jatin Christ emwij air bebe ilo burueir bwe ren tiljek wõt in ‘wia.’ Emwij air bebe bwe ren meletlet, im rej kõmmane bwe en lap oil ibbeir bwe meram eo air en lap an romaklok. Rej jelã bwe ñe rej kajjojo tõbare jemlokin ial in mour eo an ilo tiljek, Jesus enaj bõk e ñan jikin eo ilañ.​—Matu 24:13; Jon 14:​2-4; 1 Dri Korint 15:50, 51.

20. (a) Ta eo sheep ro jet rainin rar bebe ñan kõmmane? (b) Ta eo Christian ri kabit ro rej jelã kake?

²⁰ Jar eo elap in sheep ro jet rej kajeoñe ri kabit ro jeiir im jatiir. Rej jelã bwe jelãlokjen eo air kin karõk ko an Anij ej bõktok ioir juõn eddo elap. (Ezekiel 3:​17-​21, NW) Kin men in, kin jibañ jen jitõb kwojarjar im Nan eo an Jehovah, ir bareinwõt rej kejbãrok bwe en lap oil eo ibbeir ikijen air katak im kamao ibben don ilo kwelok ko an Christian. Im rej kõmman bwe en romak meram eo air, ilo air bõk kunair ilo jerbal in kwalok nan im katakin im ilo wãwen in kõmman jerbal in ‘wia’ ibben ri kabit ro jeiir im jatiir. Bõtab, Christian ri kabit ro rej jelã bwe talent ko kar likiti ilo peiir. Rej aikwij uak kin wãwen eo kar kajerbal men ko mweien Iroij eo ion lal. Meñe eiet orair, rejjab maroñ lelok eddo eo air ñan jar eo elap. Ilo lemnak kin men in, ri karejar eo etiljek im meletlet ej wõnmanlok im tel business eo an King eo, im ej kamolol kin jibañ eo an ro uan jar eo elap retiljek. Rein rej kile eddo eo an ri kabit ro jeiir im jatiir im rej watõke juõn jerammõn ñan jerbal iumin tel eo air.

21. Ta nan in rejañ eo ej jerbal ñan Ri Christian ro otemjej jen ien ko mokta jen 1919 mantak ñan ran kein ad?

²¹ Kin men in, meñe parable kein ruo rej kameramlok kij kin men ko rar walok ilo 1919 ak ien ko rebak, kakabilek eo ej jerbal ñan aolep Ri Christian ro remol ilo ran kein eliktata. Ilo wãwen in, ke nan in rejañ eo me Jesus ear letoke ilo jemlokin parable eo kin virgin ro joñoul ej jerbal elaptata ñan Christian ri kabit ro mokta jen 1919, kakabilek eo ej jerbal ñan Ri Christian ro otemjej. Inem, jen aolep bokake nan kein an Jesus: “Inem komin ekil, bwe kom jaje ran eo ak auõ eo.”​—Matu 25:⁠13.

[Kamelele ko itulal]

Kwomaroñ ke Kamelele?

• Ñããt eo Jesus ear ekajete ri kalor ro an, im ta eo ear loe?

• Etke jet ian Christian ri kabit ro rar bõk jitõb eo an “dri korijeran eo enana”?

• Ewi wãwen jemaroñ kwalok bwe je meletlet ilo jitõb?

• Ilo ad kajeoñe ri kabit ro jatin Jesus retiljek, ilo wãwen et eo jemaroñ kõmman wõt jerbal in ‘wia’?

[Bo̦o̦k eo ilo peij 24]

ÑÃÃT EO JESUS EJ ITOK?

Ilo Matu chapter 24 im 25, Jesus ear “itok” ilo elõñ wãwen ko. Ejjab aikwij emmakit ilo kanniek ñan an “itok.” Jen an eindein, ej “itok” ilo wãwen eo ej lale armij ak ri kalor ro an, ekkã wõt bwe en ekajete ir. Kin men in, ilo 1914 ear “itok” ñan jino bed eo an einwõt King eo emwij kairoije. (Matu 16:28; 17:1; Jerbal 1:​11) Ilo 1918 ear “itok” einwõt ri keañ eo an bujen eo im jino an ekajete ro rej ba rej karejar ñan Jehovah. (Malachi 3:​1-3, NW; 1 Piter 4:​17) Ilo Armageddon, enaj “itok” ñan ekajete ri kijirãt ro an Jehovah.​—Reveles̃õn 19:11-​16.

Itok eo (ak, tõkeãktok) me elõñ alen rej konono kaki ilo Matu 24:29-​44 im 25:31-​46 ej ilo ‘eñtan eo elap.’ (Reveles̃õn 7:​14) Ijo tu-rãjet, itok eo me elõñ alen rej konono kake ilo Matu 24:45 ñan 25:30 ewõr kõtan ñan an ekajete ro rej ba rej ri kalor ro an jen 1918 manlok. Ejamin juõn men in kõmmanwa ñan ba, ñan wanjoñok, bwe ien lelok jinekjej ñan ri karejar eo etiljek, ien ekajete virjin ro rebwebwe, im ekajet eo an ri karejar eo enana im jowan, eo ear noje talent eo an Master eo an, enaj walok ñe Jesus enaj “itok” ilo eñtan eo elap. Men in enaj melelen bwe elõñ ian ri kabit ro naj lo air jab tiljek ilo ien eo im renaj aikwij bukõt ro jet ñan bõk jikiir. Bõtab, Reveles̃õn 7:3 ej kalikar bwe ilo ien eo aolep ri kabit ro karejaran Christ enaj emwij kabin air “sil” ir.

[Pija eo ilo peij 22]

“Dri korijeran eo enana” ear jab bõk jerammõn ko ilo 1919

[Pija eo ilo peij 23]

Virjin ro remeletlet rar bojak ke leo belele ear itok

[Pija eo ilo peij 25]

Ri karejar eo etiljek ear kõmman jerbal in “wia”

Ri karejar eo enana im jowan ear jab

[Pija ko ilo peij 26]

Ri kabit ro im “jar eo elap” rej wõnmanlok im kõmman bwe en romak meram eo air