Etetal Wõt Ilo Ial Eo An Jehovah

“Kejatdikdik ilo Jehovah im kejbãrok ial eo an, im e naj kautiej yuk ñan am bõk lal.”​—PSALM 37:34, New World Translation.

1, 2. Etetal ilo ial eo an Jehovah ta eo ear koba ie ñan Kiiñ David, im ta eo menin ej aikwiji kin kij rainin?

“KWON kõmõn bwe in jela ial eo am in etal iloan, bwe ij leliñwoj aõ ñõn Kwe.” (Sam Ko 143:8) Christian ro rainin kin aolepen burueir rej elij nan kein an Kiiñ David. Rej ilo mol kõnan kabuñburuen Jehovah im etetal ilo ial eo an. Ta eo ekoba ilo menin? Ñan David, kar melelen kejbãrok kien eo an Anij. Ekoba liki Jehovah im jab kobalok ibben ailiñ ko. Aet, im kar melelen karejar ñan Jehovah ilo tiljek, jab anij ko an armij ro ituriir. Ñan Christian ro, etetal ilo ial eo an Jehovah ekoba elõñlok men ko.

² Juõn men, etetal ilo ial eo an Jehovah rainin melelen jerbale tõmak ilo katok in binmour eo an Jesus Christ, kamol kin e einwõt “ial im mol im mour.” (Jon 3:16; 14:6; Dri Hibru 5:9) Ej bareinwõt, melelen, kajejjet “kien Kraist,” eo ekoba kwalok yokwe ñan don, elap tata ñan ri kabit ro jein im jatin Jesus. (Dri Galetia 6:2; Matu 25:34-40) Ro rej etetal ilo ial eo an Jehovah rej yokwe nan in kaiñi ko an im kien ko an. (Sam Ko 119:97; Jabõn Kennan ko 4:5, 6) Rej kejbãrok jerammõn aorõk eo air in bõk kunair ilo jerbal in kwalok nan eo an Christian. (Dri Kolosse 4:17; 2 Timote 4:5) Jar ej juõn mõttan eo ej ekkeini ilo mour eo air. (Dri Rom 12:12) Im rej ‘kanuij kejbãrok im lale bwe wãwen air etetal en jab einwõt jab meletlet ak einwõt armij ro remeletlet.’ (Dri Epesõs 5:15) Rej jab katok kin mweie ko ilo jitõb ñan emõn ko ñan mweiuk ko rej ñan jidik ien ak kamõnõnõ in kanniek ko rej nae kien. (Matu 6:19, 20; 1 Jon 2:15-17) Bareinwõt, tiljek ñan Jehovah im liki e elap tokjeir. (2 Dri Korint 1:9; 10:5; Dri Epesõs 4:24) Etke? Kinke wãwen eo ibbed ej einlok wõt eo an Israel eo etto.

Aikwij eo ñan Liki im Tiljek

3. Etke tiljek, tõmak, im liki rej jibañ kij etetal ilo ial eo an Jehovah?

³ Israel kar juõn ailiñ edik im armij ro ibelakiir rar jab joij ro rar bõk kunair ilo kwojkwoj ko ejelok mour erreo ie ilo kabuñ ñan ekjap in anij ko. (1 Kronikel 16:26) Israel wõt ear karejar ñan juõn wõt Anij eo emol im jejjab loe kin mejed, Jehovah, im ear aikwiji air debij wõt kien erreo ko an reutiej. (Duteronomi 6:4) Einlok wõt rainin, jejjo wõt million armij ro rej kabuñ ñan Jehovah, im rej mour ilo juõn lal eo enañin jiljino billion armij ro me kien ko air im wãwen kabuñ ko air ekanuij in oktak jen ko air. Elañe jej bed ibwiljin jejjo million rein, jej aikwij kejbãrok nae reel ilo juõn ial eo ebwid. Ewi wãwen? Tiljek ñan Jehovah Anij, tõmak ilo e, im juõn liki eo ebin bwe enaj kajejjet kallimur ko an im menin enaj jibañ. (Dri Hibru 11:6) Menin enaj bõprae kij jen ad likit ad liki men ko lal in ej kejatdikdik kaki.​—Jabõn Kennan Ko 20:22; 1 Timote 6:17.

4. Etke ailiñ ko rej bed “ilo lemnak marok”?

⁴ Ri Jilek Paul ear kwalok wãwen einjuõn eo Christian ro rej aikwij bed ie jen lal in ke ear je: “Inem ij ba men in, im kennan ilo Iroij, bwe komin jab etetal jen kiõ einwõt dri pegan rej etetal, ilo air lemnak wan. Ke emarok ilo air lolãtãt, im rej drua maejet jen mour an Anij, kin jaje eo ilo ir, kin an bin burueir.” (Dri Epesõs 4:17, 18) Jesus ej “maram eo emol.” (Jon 1:9) Jabdewõt eo ej kajekdon e ak ba bwe rej tõmak ilo e ak rejjab bokake “kien eo an Kraist” rej “marok ilo air lolãtãt.” Air ettolok jen air etetal ilo ial eo an Jehovah, rej “drua maejet jen mour an Anij.” Bõtab meñe remaroñ lemnak remeletlet ilo juõn wãwen lal in, ewõr ‘kajekdon ilo ir’ einwõt kin jelãlokjen eo wõt ej tellok ñan mour, an Jehovah Anij im Jesus Christ.​—Jon 17:3; 1 Dri Korint 3:19.

5. Meñe maram in mol eo ej romak ilo lal, etke elõñ buru ko rejjab uak?

⁵ Ak, maram in mol eo ej romak ilo lal in! (Sam Ko 43:3; Dri Pilippai 2:15) “Meletlet ej lamij inabij ilo ial eo.” (Jabõn Kennan Ko 1:20) Yiõ eo lok Ri Kennan ro an Jehovah rar kajerbal elõñlok jen billion awa ko im jiroñ armij ro ituriir kin Jehovah Anij im Jesus Christ. Buki tausan rar uak. Ak, jej aikwij ke ilbõk bwe elõñ ro jet rej likjap in uak? Jab. Paul ear konono kin “armij ro ejelok air eñjake ilo burueir.” Jet ejelok an burueir eñjake in uak kin kibbon ak arõk money. Ro jet rej reel ilo kabuñ wan ak jikin jerbal ko elap air jededlok rainin. Wãwen ko kin an bin mour ear tel elõñ ñan air elkurkuri Anij. Ro jet rej makoko in tõbar kien erreo ko reutiej an Jehovah. (Jon 3:20) Buruen juõn eo ej etetal ilo ial eo an Jehovah en maroñ ke oktak im ejelok an eñjake ilo wãwen rot kein?

6, 7. Meñe rar ri kabuñ ro an Jehovah Anij, ien et ko ri Israel ro rar ellok, im etke?

⁶ Menin ear walok ilo Israel eo etto, einwõt an Paul kwalok. E ar je: “Ak men kein joñok ñõn kij, bwe jen jab ankwonak men ko renana, im einwõt ir r’ar ankwõnaki. Im komin jab kabuñ ñõn ekjõp, einwõt jet iair; einwõt emwij jeje, Armij r’ar jijõt in mõña im irak, im juten kuri. Im jen jab lũñ, einwõt jet iair r’ar lũñ, im mij ilo juõn ran roñoul im jilu tausan.”​—1 Dri Korint 10:6-8.

⁷ Paul ej jitõñlok moktata ñan ien eo ke Israel ear kabuñ ñan juõn kon in kau itõrerein Tol Sinai. (Exodus 32:5, 6) Menin kar ilo jab bokake juõn kien ekwojarjar eo rar errã ñan air bokake jejjo wõt week ko lok iman. (Exodus 20:4-6; 24:3) Inem, Paul ej jitõñlok ñan ien eo ke Israel ear badikdik ñan Baal ibben kõrã ro nejin Moab. (Bwinbwin 25:1-9) Kon in kau eo rar kabuñ ñane ej kalikar kõnan eo an juõn armij make, ‘ewõr an ien mõnõnõ.’a Kabuñ ñan Baal rar kõmmane ikijen mour in lũñ. (Reveles̃õn 2:14) Etke ri Israel ro rar kõmman jerawiwi rot in? Kinke rar kõtlok burueir bwe en oktak im ‘kõnan menin kokkure ko’​—meñe ekjap ak manit ko rej koba ie.

8. Ta eo jemaroñ katak kake jen wãwen ko Israel ear ioni?

⁸ Paul ear kwalok bwe jej aikwij katak jen wãwen kein. Katak ta? Ejelok lemnak kake bwe juõn Christian emaroñ badikdik ñan juõn kon in kau ak juõn anij an Moab eo etto. Ak ta kin mour in lũñ ak an juõn armij jab bõprae kõnan ko an make rejjab emõn? Men kein rej men ko ekkã air walok rainin, im elañe jej kõtlok juõn kõnan ñani bwe en eddek ilo buruõd, renaj itok ikõtad im Jehovah. Tokjen eo enaj ejja einwõt ñe jaar kabuñ ñan ekjap​—im oktaklok jen Anij. (Keidi Dri Kolosse 3:5; Dri Pilippai 3:19.) Emol, Paul ej kajemlok konono eo an kin men kein ilo an kõketak ri tõmak ro mõttan: “Komin ko jen kabuñ ñõn ekjõp ko.”​—1 Dri Korint 10:14.

Jibañ ilo Etetal ilo Ial eo An Anij

9. (a) Ta jibañ eo jej bõke ñan kejbãrok wõt ad etetal ilo ial eo an Jehovah? (b) Ta juõn wãwen eo jej roñ ‘nan eo ilikid’?

⁹ Elañe jej beek ñan kejbãrok ad etetal ilo ial eo an Jehovah, jejjab makelok iad im ejelok jibañ. Isaiah ear kanan: “Im ilo lojilñõm re naj roñjake juõn nan elikõm, ej ba, Eñin ial eo, komin etetal iloan; ñe komij jeor ñõn anbijmaroñ, im ñe kom jeor ñõn anmiñ.” (Aiseia 30:21) Ewi wãwen an ‘lojilñid’ roñjake ‘nan eo ilikid’? Eokwe, ejelok juõn rainin ej roñ juõn ainikien ak bõk juõn ennan jen Anij. “Nan” eo jej roñjake ej itok ñan kij otemjej ilo juõn wãwen. Mokta im lap tata, ej itok ikijen Jeje in kakõrmol ko, Bible, eo ebed ie lemnak ko an Anij im juõn lokbook in jerbal ko an ibben armij. Ke ran otemjej jej jedmatmat ñan kareelel ko jen unjen ko rej “jebel jen mour eo ej an Anij,” ñan ejmour eo emõn ilo jitõb, jej aikwij konono Bible eo im ekkeini ad kalmenlokjen kake. Menin enaj jibañ kij bõprae “men wan ko” im “wãppen, im emwij kõmõmõn ñõn jerbal emõn otemjej.” (Jerbal 14:14, 15; 2 Timote 3:16, 17) Enaj kakajur kij, kabin kij, im jibañ kij ‘ñan kõmmane ial eo ad bwe en jerammõn.’ (Joshua 1:7, 8) Eindein, Nan eo an Jehovah ej rejañ: “Kiõ, O ro nejiõ, komin eoroñ iõ; bwe re mõnõnõ wõt ro rej kejbãrok ial ko aõ. Komin eoroñ nan in katak, im komin meletlet, im komin jab makoko kake.”​—Jabõn Kennan Ko 8:32, 33.

10. Ta wãwen eo juõn kein karuo jej roñ ‘nan eo ilikid’?

¹⁰ ‘Nan eo ilikid’ ej bareinwõt itok ikijen “ri karejar eo etiljek im meletlet,” eo ej “najirik ir ilo ien emõn.” (Matu 24:45-47) Juõn wãwen eo mõñã in ej itok ie ej ilo publication ko emwij jei im rej bedbed ion Bible, im ilo yiõ ko kiõ mõñã in ear lap. Ñan wanjoñok, ikijen magazine in Imõniaroñroñ eo, melele eo ad kin kanan eo emwij kõmanmõnlok. Ilo journal in, emwij kõketak kij ñan ad niknik ilo jerbal in kwalok nan eo im kõmman ri kalor meñe jab itoklimo ej laplok, emwij jibañ kij ñan bõprae aujid ko, im emwij rejañ kij ñan ejaake kadkad ko remõn kadkadin Christian. Ewi wãwen ad kaorõk mõñã rot in ilo ien emõn!

11. Kamelele wãwen eo juõn kein kajilu jej maroñ roñ ‘nan eo ilikid.’

¹¹ Ri karejar eo etiljek im meletlet ej bareinwõt letok ekan ko ikijen kwelok ko ad. Men kein ekoba kwelok ko an congregation eo ilo juõn bukwon, kwelok ko ilo jimettan in yiõ otemjej ilo circuit assembly ko, im convention ko relaplok yiõ otemjej. Ta Christian ro retiljek rejjab kaorõk kweloktok ibben don rot kein ke? Rej juõn jibañ elap tokjen ñan jurake kij ilo etetal ilo ial eo an Jehovah. Ke elõñ rej aikwij kajerbal elap ien ilo jikin jerbal ak ilo school ko ilo air bed ibben ro rejjab bõk kunair ilo tõmak eo air, ekkeini kobalok ilo bed eo an Christian ej menin lomoren mour. Kwelok ko rej letok ñan kij ien emõn ‘ñan kõketak don ilo yokwe im jerbal ko remõn.’ (Dri Hibru 10:24) Jej yokwe ro jeid im jatid, im jej yokwe ad tel ad ibbeir.​—Sam Ko 133:1.

12. Ta bebe eo ewõr an Ri Kennan ro an Jehovah, im ewi wãwen air kar kalikare ilo ien kein kiõ?

¹² Ilo air kajurlok kin ekan ko ilo jitõb, enañin jiljino million armij ro rainin rej etetal ilo ial eo an Jehovah, im elõñ million ro jet rej katak Bible ñan jelã wãwen kõmmane. Rej ebwer ke ak mõjnolok kin mol eo bwe eiet orair ñe keidi ibben billion oran armij in lal in? Rejjab! Rej beek ñan air kejbãrok air eoroñ wõt ‘nan eo’ ilikiir, im ilo tiljek kõmanmõn ankil an Jehovah. Einwõt juõn menin kalikar kin bebe in, ilo 1998/99 “Ialin Mour eo An Anij” District im International Convention ko, ri kwalok ro rar bõk juõn resolution in kalikar eñjake in jutak eo an burueir. Ijin tok ilal ej kobban resolution eo.

Resolution

13, 14. Ta lemnak eo emol kin wãwen lal in ewõr ibben Ri Kennan ro an Jehovah?

¹³ “Kim, einwõt Ri Kennan ro an Jehovah kimij kwelok ilo ‘Ialin Mour eo An Anij’ Convention in, kin aolepen buruem kimij errã bwe ial eo an Anij ej ial in mour eo emõn tata. Bõtab, kimij kile, bwe jarlepju in armij ro rainin einjuõn eñjake eo air. Jukjuk im bed eo an armij emwij an etale im katak elõñ lemnak ko, tõmak ko an armij, im lemnak ko an kabuñ ion men eo ej ejaake ial in mour eo emõn tata. Juõn lale eo emol ilo bwebwenato in armij im wãwen ko ilo lal in rainin ej kwalok mol eo kin keañ eo ekwojarjar emwij je ilo Jeremiah 10:23: ‘Ejjab an armij eo ej etetal meñe ñan tel buñten neen.’

¹⁴ “Ran otemjej kimij lo elõñlok menin kamol ko rej kamol mol in nan kein. Ilo mõttan eo elap tata, jukjuk im bed eo an armij ej kajekdon ial in mour eo an Anij. Armij ro rej jibadõk men eo einwõt ejimwe ilo mejeir make. Tokjen ko rej menin jorrãn​—rup bedakilkil in mour in family, ilok jen ajiri ro ilo ejelok ialin tel; aolepen burueir ñan jibadõk mweiuk, jemlok in ejelok kobban im menin kainebata; kõtõrãik kien im kowadoñ, ennan ko kin ro rej jorrãn im reban bwini orair; bwoktak an jar in armij ro im tarinae ko, menin kalelñoñ im jorrãn ko ilo mour ko an armij; an laplok mour in lũñ, kakajur lok nañinmij in kabobo ko an jiroñ im likao. Men kein rej jejjo wõt ian men ko relõñ in abañ ko rekabwokbwok ko rej idaptõk ibben jibadbad eo ñan mõnõnõ, ainemõn, im jokane.

15, 16. Ikijen ialin mour eo an Anij, ta bebe eo kar kalikare ilo resolution eo?

¹⁵ “Kin wãwen in kin an armij buromõj kin wãwen ko rejjab emõn im an ebaktok ‘tarinae in ran elap ran in Anij Ekajur otem Kajur,’ naetan Armageddon (Reveles̃õn 16:14, 16), kim einwõt Ri Kennan ro an Jehovah kimij kabine bwe:

¹⁶ “Kein kajuõn: Kimij kalimjek kim make einwõt an Jehovah Anij, emwij am kajjojo wujleplok kim make ñan e ilo ejelok kien nae, im kim naj debij wõt tõmak eo ejjab makitkit ilo menin letok eo an Jehovah kin binmour eo ikijen Nejin, Jesus Christ. Kim ar beek ñan am etetal ilo ialin mour eo an Anij, jerbal einwõt Ri Kennan ro an im lelok kim ñan kajur bõtata eo an einwõt an kar walok ikijen jerbal in iroij eo an Jesus Christ.

17, 18. Ewi ijo Ri Kennan ro an Jehovah renaj etal wõt ie im kejbãroke ikijen kien mour erreo ko im jimjãn jimjatin eo an Christian?

¹⁷ “Kein karuo: Kim naj etal wõt im eddeb ñan kien erreo ko ilo jitõb im utiej ilo Bible eo. Kim ar beek ñan am kejbãrok kim jen etetal einwõt an ailiñ ko etetal ilo an ejelok orlok in lemnak ko air. (Dri Epesõs 4:17-19) Ej bebe eo am ñan bed wõt im erreo iman mejen Jehovah im ejelok lipjinjin jen lal in.​—Jemes 1:27.

¹⁸ “Kein kajilu: Kim naj bin wõt ñan ijo kimij bed ie ilo Jeje ko einwõt juõn jar in Christian jimjãn jimjatin ibelakin lal. Kim naj debij wõt iolaplap eo an Christian ibwiljin ailiñ ko, jab kõtlok kim make ñan am lorak ilo kijirãt ak jebelbel ko ikõtan bwij, armij, im ailiñ ko.

19, 20. (a) Ta eo jemen im jinen Christian ro rej kõmmane? (b) Ewi wãwen an naj Christian ro otemjej etal wõt im kile ir make einwõt ri kalor ro an Christ?

¹⁹ “Kein kemen: Kim ro jemen im jinen ajiri ro kim naj likit ial eo an Anij ilo ajiri ro nejim. Kim naj likit juõn joñok ilo mour in Christian, eo ekoba ekkeini konono Bible, katak an family eo, im bõk kunam kin aolepen am ilo congregation eo an Christian im ilo jerbal in kwalok nan.

²⁰ “Kein kalalem: Kim aolep kim naj kate kim kalek kadkad ko remõn Ri Kõmanmõn eo am ej joñok kaki, im kim naj kate kim kajeoñe kadkadin im ial ko an, einwõt kar Jesus. (Dri Epesõs 5:1) Kim ar beek ñan am lelok jerbal ko am otemjej bwe ren kõmman kin yokwe, im ilo wãwen in kile kim make einwõt ri kaloran Christ.​—Jon 13:35.

21-23. Ta eo Ri Kennan ro an Jehovah renaj etal wõt em kõmmane, im kin ta eo rej tõmake?

²¹ “Kein kajiljino: Ilo ejelok bõjrak kim naj etal wõt im kwalok nan kin news eo emõn kin Ailiñ eo an Anij, kõmman ri kalor, im kim naj katakin ir ialin mour eo an Anij im kõketak ir ñan air etal wõt im katak ilo kwelok ko an congregation eo.​—Matu 24:14; 28:19, 20; Dri Hibru 10:24, 25.

²² “Kein kajiljilimjuon: Einwõt kajjojo armij im einwõt juõn dolul in kabuñ, kim naj etal wõt im likit ankil an Anij mokta ilo mour ko am. Kajerbal Nan eo an, Bible eo, einwõt ialin tel eo am, kim naj jamin oktaklok ñan anbijmaroñ ak ñan anmiñ, im ilo wãwen in kamol bwe ial eo an Anij elap an kajurlok jen ial ko an lal in. Kim ar beek ñan jibadõk ialin mour eo an Anij​—ilo bin im ilo tiljek, kiõ im ñan indio!

²³ “Kimij kõmmane resolution in kine kimij likit aolepen liki eo am ilo kallimur in yokwe eo an Jehovah bwe eo ej kõmanmõn ankil an Anij ej bed ñan indio. Kimij kõmmane resolution in kinke kimij tõmak bwe mour kin nan in kaiñi ko ilo Jeje ko, nan in kakabilek, im kauwe ej kõmman ñan emõn tata eo an ialin mour eo rainin im likit juõn bedbed emõn ñan ran ko rej itok, bwe jen maroñ bõk juõn debdeb eo ebin ion mour eo emol. (1 Timote 6:19; 2 Timote 4:7b, 8) Ilañin men otemjej, kimij kõmmane resolution in kinke kimij yokwe Jehovah Anij kin aolepen buruem, am, lemnak, im kajur.

24, 25. Ta kar uak eo ñan resolution eo rar lõmake, im ta bebe eo kin ro rej etetal ilo ial eo an Jehovah?

²⁴ “Aolep ro otemjej rej kwelok ilo convention in ro emõn ibbeir ñan bõk resolution in, joij im ba AYE!”

²⁵ Buki arena ko im stadium ko ibelakin lal ear wõr ainikien elaj ke ro otemjej rar kwelok rar uak kin juõn ainikien jorur “AYE!” Ri Kennan ro an Jehovah ejelok air bere bwe renaj etal wõt im etetal ilo ial eo an Jehovah. Rej lukkun liki Jehovah im tõmak bwe enaj kajejjet kitien kallimur ko an. Rej bed wõt ilo air tiljek ñan e, jekdon ta ej walok. Im rar beek ñan air kõmanmõn ankil an.

“Anij Ej ñan Kij”

26. Ta wãwen eo ekamõnõnõ an ro rej etetal ilo ial eo an Jehovah?

²⁶ Ri Kennan ro an Jehovah rej kememej nan in kõketak eo an ri jeje Psalm: “Kejatdikdik ilo Jehovah im kejbãrok ial eo an, im enaj kautiej yuk ñan am bõk lal.” (Psalm 37:34, NW) Jejjab meloklok nan in rejañ ko an Paul: “Elañe Anij ej iber, wõn ej jumae kij? Eo e ar jab drebij Nejin wõt jen iñtan, a E ar ketõk E kin kij otemjej, ekijkan, E jamin bareinwõt wujleptok men otemjej iben ñõn kij?” (Dri Rom 8:31, 32) Aet, elañe jej etetal wõt ilo ial eo an Jehovah, enaj letok ñan kij “men ko otemjej bwe jen mõnõnõ kaki.” (1 Timote 6:17) Ta jikin eo emõnlok emaroñ wõr jen ijo jej bed ie​—etetal ilo ial eo an Jehovah, iturin jitenburu ro jeid im jatid maan im kõrã. Ibben an Jehovah bed iturid, jen beek ñan ad bed wõt ijen im kijenmij wõt ñan jemlokin, lukkun liki bwe ilo an jejjet ien eo an, jenaj lo an kajejjet kitien kallimur ko otemjej an eliktata.​—Taitõs 1:2.

[Kamelele eo itulal]

Kwoj Kememej Ke?

◻ Ta aikwij eo ñan juõn Christian ñan etetal ilo ial eo an Jehovah?

◻ Etke jej aikwij kalek liki eo ilo Jehovah im tiljek ñan e?

◻ Ta jibañ eo ewõr ke jej etetal ilo ial eo an Jehovah?

◻ Kwalok jet un ko an resolution eo kar bõke ilo “Ialin Mour eo An Anij” Convention ko.

[Pija ko ilo peij 26]

Juõn resolution eaorõk kar bõke ilo “Ialin Mour eo An Anij” District im International Convention ko