Kamolol Kin “Menin Letok Ko Ilo Emaan Ro”

“Komin kile ro rej kate ir jerbal ibwiljimi im . . . likit ir bwe ren utiej ilo ami yokwe ir kin jerbal ko air.”​—1 THESSALONIANS 5:12, 13, New World Translation.

1. Ekkar ñan Jerbal 20:35, ta kajur eo ewõr ilo lelok? Kwalok juõn wanjoñok.

“MÕNÕNÕ in lelok elap jen bõk.” (Jerbal 20:35) Kwo maroñ ke kememej ñããt eo eliktata kwar lo mol in nan kein an Jesus? Bõlen kar juõn menin lelok eo kwar lelok ñan juõn jitenburu eo kwoj yokwe. Kwar lukkun lale am kãlete, kinke kwar kõnan bwe en juõn men eo ri yokwe eo am en kõnan. Mõnõnõ eo kwoj lo ilo turin mejen eo kwoj yokwe​—ear kõmãnãn buruõm! Ñe ej jimwe kamakiti, lelok ej juõn menin kalikar yokwe, im kalikar yokwe ewõr kajur in an bõktok ñan kij mõnõnõ.

2, 3. (a) Etke jemaroñ ba bwe ejelok juõn elaplok an mõnõnõ jen Jehovah, im ewi wãwen “menin letok ko ilo emaan ro” maroñ kõmman bwe buruen en lañliñ? (b) Ta eo jenaj jamin kõnan kõmmane kin juõn menin letok eo jen Anij?

² Inem, wõn, emaroñ laplok an mõnõnõ jen Jehovah, Ri Letok eo kin “men in letok emõn im wãppen otemjelok”? (Jemes 1:17; 1 Timote 1:11) Jabdewõt menin letok eo ej letok ej emmakit kin yokwe. (1 Jon 4:8) Menin elukkun mol kin menin letok eo Anij ikijen Christ ear letok ñan congregation eo​—“menin letok ko ilo emaan ro.” (Ephesians 4:8, NW) Menin letok eo kin elder ro ñan lale bwij eo ej juõn menin kalikar yokwe eo emũlal an Anij ñan armij ro an. Emaan rein rej kejbãrok air kãlet ir​—rej aikwij tõbar kadkad ko ilo Jeje ko. (1 Timote 3:1-7; Taitõs 1:5-9) Rejelã bwe rej aikwij “tiriamokake bwijin,” inem sheep ro enaj wõr unin air kamolol kin kain shepherd rein rej kwalok air yokwe. (Jerbal 20:29; Sam 100:3) Ñe Jehovah ej lo bwe sheep ro an eobrak burueir kin kain kamolol rot in, emol buruen make ej aikwij lañliñ!​—Jabõn Kennan Ko 27:11.

³ Jenaj kar jab lukkun kõnan kadiklok aorõkin juõn menin letok jen Anij; im jenaj kar jab kõnan bwe jen jab kamolol kin menin letok ko an. Kin menin ewõr ruo kajitõk ko rej jarjar: En ewi wãwen an elder ro aikwij lemnak kin jerbal eo air ilo congregation eo? Im ewi wãwen an bwij eo maroñ kalikar bwe rej kamolol kin “menin letok ko ilo emaan ro”?

‘Kimij Ri Jerbal ro Mõttami’

4, 5. (a) Ñan ta eo Paul ej kõkkar kin congregation eo bwe ej einwõt, im etke menin ej juõn wanjoñok ejejjet? (b) Ta eo wanjoñok eo an Paul ej kwalok ikijen wãwen eo jej aikwij lemnak kake don im kõmman ñan don?

⁴ Jehovah ear kabeik “menin letok ko ilo emaan ro” kin juõn joñan maroñ ilo congregation eo. Bwebõta, elder ro rejjab kõnan kajerbal maroñ ilo jab jimwe, ak rejelã bwe ekanuij in lap an bidodo einwõt armij jab wãppen ñan air kõmman eindein. Inem, ewi wãwen air aikwij watõk ir make ilo kõtan eo air ñan bwij eo? Lemnak kin wanjoñok eo ri jilek Paul ear kajerbale. Elikin an konono kin etke kar letok “menin in letok ko ilo emaan ro,” Paul ear je: “Jen edrekliñlok ñõn ilo E ilo men otemjej, Eo ej bõr, aet, Kraist; Jen Eo aolepen enbwin ke emwij karõk e im kobaik e, kin men eo an mokwoj otemjej kõke, ekar ñõn an jabrewõt mõtõn jerbale ilo joñõn emõn, ej laplok enbwin ñõn an mõke kalek e ilo yokwe.” (Dri Epesõs 4:15, 16) Inem Paul ej kõkkar kin congregation eo, ekoba elder ro im ro jet uan, ñan juõn enbwinin armij. Etke menin ej juõn wanjoñok eo ekkar?

⁵ Juõn enbwinin armij ej kõmman jen elõñ kajjojo mõttan ko ak juõn wõt bõr. Bõtab, ejelok jabdewõt ilo enbwin eo​—ejjab juõn muscle, ejjab juõn nerve, ejjab juõn eke​—ejelok tokjen. Kajjojo mõttan ewõr tokjen im ewõr ijo kunan ñan ejmour im aibujuij eo an aolepen. Ilo wãwen in lok wõt, congregation eo ej kõmman jen elõñ kajjojo ro uan, ak kajjojo uan​—meñe edik ak ritto, kajur ak mõjno​—emaroñ wõr ijo kunan ñan ejmour eo ilo jitõb im aibujuij eo an congregation eo. (1 Dri Korint 12:14-26) Ejelok juõn ej aikwij eñjake bwe elap an ejelok tokjen ñan wãwen eo. Ijo turãjet, ejelok en aikwij eñjake an utiejlok, bwe kij otemjej​—shepherd ro im sheep ro eirwõt juõn​—rej mõttan enbwin eo, im ewõr wõt juõn bõr, Christ. Kin menin Paul ej pijaiki juõn pija in okmãnãn in yokwe, kejbãrok, im kautiej eo ej aikwij wõr ibbed ñan don. Ilo kile menin ej jibañ elder ro ñan air bõk juõn buru ettã, lemnak eo jokkin wõt juõn ilo jerbal eo air ilo congregation eo.

6. Meñe ear wõr maroñ in ri jilek ibben, ewi wãwen an kar Paul kalikar juõn jitõb in ettã buru?

⁶ Rein rej “menin letok ko ilo emaan ro” rejjab bukõt bwe ren bebeik mour ko ak tõmak ko an ri kabuñ ro mõttair. Paul, meñe ear wõr an maroñ in ri jilek, ilo ettã buru ear jiroñ ri Korint ro: “Jab bwe kim iroij ion ami tõmak, a kim dri jibõñ ilo ami lõñliñ: bwe kin tõmak komij jutõk.” (2 Dri Korint 1:24) Paul ear jab kõnan beek tõmak im ialin mour eo an ro jein im jatin. Emol, ear jab lo aikwij eo ñan kõmman eindein, bwe ear kalikar an liki bwe ededelok an maan im kõrã ro bed ilo dolul eo an Jehovah kinke rar kõnan kõmmane men eo ejimwe. Eindein, ilo an konono kin e make im ri itoitak eo rejetan Timothy, Paul ear einwõt ba: ‘Jerbal eo am ej ñan jerbal ibbemi ñan karejar ñan Anij kin lañliñ.’ (2 Dri Korint 1:1) Juõn jitõbõn ettã buru!

7. Ta eo elder ro ettã burueir rej kile kin jerbal eo air ilo congregation eo, im ta liki eo ewõr ibbeir ilo ri jerbal ro mõttair?

⁷ “Menin letok ko ilo emaan ro” rainin rej bõk ejja jerbal eo wõt. Rej ‘ri jerbal ro mõttad ñan lañliñ eo ad.’ Elder ro ettã burueir rej kile bwe ejjab ir eo rej beek ewi joñan an ro jet maroñ jerbal ilo jerbal eo ñan Anij. Rejelã bwe meñe rej rejañ ro jet ñan air kalaplok ak kõmanmõnlok jerbal in kwalok nan eo air, jerbal ñan Anij ej aikwij jarjar jen juõn mõnõnõ in buru. (Keidi 2 Dri Korint 9:7.) Rej liki bwe elañe ri jerbal ro mõttair rej lañliñ, renaj kõmman joñan wõt air maroñ. Kin menin ej eñjake in kõnan eo jen burueir eo ñan jibañ ro jeiir im jatiir ñan “karejar ñan Jehovah kin lañliñ.”​—Psalm 100:2, NW.

Jibañ Aolep ñan Karejar Kin Lañliñ

8. Ta jet ian wãwen ko elder ro remaroñ jibañ ro jeiir im jatiir jerbal ñan Jehovah kin lañliñ?

⁸ Elder ro, ewi wãwen ami maroñ jibañ ro jeimi im jatimi ñan karejar kin lañliñ? Kwo maroñ rejañ kin wanjoñok. (1 Piter 5:3) Kõtlok bwe kijejeto im lañliñ eo am ilo jerbal in kwalok nan eo en alikar, im ro jet remaroñ emmakit kin buru ñan kajeoñe joñok eo am. Nebar ro jet kin jibadbad ko jen aolepen air. (Dri Epesõs 4:29) Nanin nebar eo eokmãnãn im mol ej jibañ ro jet ñan eñjake air aikwiji air jerbal. Ej menin rejañ ñan an sheep ro kõnan kõmman joñan wõt air maroñ ñan karejar ñan Anij. Bõprae keidi don eo ejjab emõn. (Dri Galetia 6:4) Keid rot in ej menin kabwer jen an kamakit ro jet ñan air kõmanmõnlok. Ijellokin menin, sheep ro an Jehovah rej kajjojo armij​—kin wãwen ko air reinjuõn jen don im maroñ ko air. Einwõt Paul, kalikar am liki ro jeõm im jatõm. Yokwe “ej tõmak men otemjej,” inem en eindein ñan kij bareinwõt jen tõmak bwe ro jeid im jatid rej yokwe Anij im kõnan kabuñburuen. (1 Dri Korint 13:7) Ñe kwoj ‘kwalok am kautiej ro jet,’ kwoj kwalok men eo emõn tata ilo ir. (Dri Rom 12:10) Lukkun lale bwe ñe sheep ro rej bõk rejañ im kaemololo, elõñ wõt iair renaj kõmman joñan wõt air maroñ ilo karejar ñan Anij, im renaj lo lañliñ ilo jerbal eo.​—Matu 11:28-30.

9. Ta lemnak eo an elder ro ñan don enaj jibañ kajjojo elder ñan an jerbal kin lañliñ?

⁹ Ilo ettã buru kalimjek yuk make einwõt juõn ‘ri jerbal mõttair,’ menin enaj jibañ yuk ñan jerbal ilo lañliñ im kamolol kin menin letok ko ejej uair an elder ro rejetam. Kajjojo elder ewõr kabel ko an make ko emaroñ kajerbali ñan tokjen eo an congregation eo. (1 Piter 4:10) Juõn emaroñ menin letok ilo katakin. Eo juõn emaroñ juõn ri kõmman karõk eo ekeie. Ak bar juõn emaroñ bidodo kebake kin okmãnãn im yokwe eo an. Mol eo ej, ejelok elder ewõr ibben aolep menin letok ko ñan ejja joñan eo wõt. An wõr juõn menin letok ibben​—jen baj ba, menin letok eo kin katakin—menin ej kõmman ke bwe elder eo en utiejlok jen eo juõn? Ejjab ñan jidik! (1 Dri Korint 4:7) Ilo wãwen eo juõn, ejelok aikwij ñan ejjojoiki menin letok eo ewõr ibben armij eo juõn ak eñjake an jabwe ñe maroñ eo an elder eo juõn ej bõktok nebar ñan e jen ro jet. Kememej, kwe make ewõr am menin letok ko Jehovah ej loi ibbam. Im emaroñ jibañ yuk ejaake menin letok kein im kajerbali ñan tokjen eo ñan ro jeõm im jatõm.​—Dri Pilippai 4:13.

‘Kwon Bokake im Kõttã’

10. Etke ejejjet bwe jen kalikar ad kamolol kin “menin letok ko ilo emaan ro”?

¹⁰ Ñe jej bõk juõn menin letok, ejejjet ñan kwalok ad kamolol. “Komin kamolol,” Dri Kolosse 3:15 ej ba. Inem, ta, kin “menin letok ko ilo emaan ro,” menin letok eo eaorõk Jehovah ear letok ñan kij? Bwebõta, jej kamolol Jehovah, Ri Letok eo an menin letok ko. Ak ta kin “menin letok ko ilo emaan ro” make? Ewi wãwen ad maroñ kwalok ad kamolol kake ir?

11. (a) Ewi wãwen ad maroñ kalikar ad kamolol kin “menin letok ko ilo emaan ro”? (b) Ta aorõkin nan ko “bokake” im kõttã”?

¹¹ Jemaroñ kwalok kamolol eo ad kin “menin letok ko ilo emaan ro” ilo ad mõkaj in bõk ñan buruõd nanin kakabilek im bebe ko air rej bedbede ion Bible eo. Bible ej kakabilek kij: “Komin bokake im kõtãik kom ñõn ro rej tel kom, bwe rej lale ami, einwõt ro re naj kwalok kin air kõmõn, bwe ren kwalok im lõñliñ im jab buromõj. Bwe men in e jab men in kakajuror kom.” (Dri Hibru 13:17) Lale bwe jejjab aikwij “bokake” wõt ak bareinwõt “kõttã” ñan ro rej tel. Nanin Greek eo kin “kõttã” ej melelen “kwe make kwoj lelok yuk iumin.” Ilo an konono ikijen menin kalikar ko kin “bokake” im “kõttã,” Bible scholar eo R. C. H. Lenski ej ba: “Juõn ej bokake ñe juõn ej errã ibben men eo rej jiroñ e bwe en kõmmane, ej etal ie kin jimwe im tokjen eo ie; juõn ej kõttã . . . ñe ej wõr juõn an lemnak einjuõn.” Ñe jej melele im errã ibben ial eo an ro rej tel, bokake emaroñ itok ilo an bojak. Ak ta elañe jejjab melele un eo ilikin juõn bebe?

12. Etke jej aikwij kõttã, ak kõtlok, meñe jejjab lukkun melele kin un eo ilikin juõn bebe?

¹² Eñin ijo jemaroñ aikwij kõttã ie, ak lelok. Etke? Juõn men, jej aikwij liki bwe emaan rein tellokiir ilo jitõb ebed itoklimo eo air emõn tata kin kij ilo burueir. Ke, emõn air jelã bwe rej aikwij bõk eddo ñan Jehovah kin sheep ro emwij likit ir ilo kejbãrok eo air. (Jemes 3:1) Kobatok ibben menin, emõn ñe jej kememej bwe jemaroñ jab jelã aolep menin ittino ko remol ko rej tel ir ñan juõn melele emwij air jelã kake.​—Jabõn Kennan Ko 18:13.

13. Ta eo emaroñ jibañ kij kõttã ñe ej itok jemlokin bebe in ekajet ko an elder ro?

¹³ Ak ta kin kõttã ñe ej itok ñan bebe in ekajet ko? Emol, menin emaroñ jab bidodo, elap tata elañe juõn bebe ej kõmman ñan bukwelok juõn eo jej yokwe​—juõn nukid ak juõn jerad eo ebak. Ijin bareinwõt, emõn tata lelok ñan bebe eo an “menin letok ko ilo emaan ro.” Elaplok air jelã kin men eo jen ad maroñ, im emaroñ laplok air jelã kin mol ko. Maan rein jeid im jatid ekkã air eñtan kin kain bebe rot in; ej juõn eddo ewõr kejbãrok ie ñan ‘ekajet ñan Jehovah.’ (2 Kronikel 19:6) Rej jerbale aolep kain jibadbad ñan tiriamokake, bwe rejelã bwe Anij ej “bojak ñan jeorlok bwid.” (Psalm 86:5, NW) Ak rej aikwij bareinwõt kejbãrok congregation eo bwe en erreo, im Bible eo ej tel ir bwe ren bukwelok ro rej kõmman bwid ro rejjab ukwelok. (1 Dri Korint 5:11-13) Ilo elõñ wãwen ko ri kõmman bwid eo make ej bõk bebe eo. Kauwe eo bõlen ej men eo armij eo ej aikwiji ñan kalmenlokjen eo an. Elañe kij, jej ro an ri yokwe, jej kõttã ñan bebe eo, inem ilo wãwen in jemaroñ jibañ e bwe en bõk tokjen jen kauwe eo.​—Dri Hibru 12:11.

“Lelok ñan Ir Elaplok Jen Kautiej eo Elap”

14, 15. (a) Ekkar ñan 1 Dri Tessalonika 5:12, 13, etke elder ro rej tellokin ad lemnak kake ir? (b) Etke jemaroñ ba bwe elder ro ‘elap air jerbal’ ibwiljid?

¹⁴ Jemaroñ bareinwõt kalikar kamolol eo ad kin “menin letok ko ilo emaan ro” ilo ad kwalok kamolol ñan ir. Ilo an jeje ñan congregation eo ilo Tessalonika, Paul ear rejañ ro uan: “Komin kili ro rej jerbal ibemi, im lale kom ilo Iroij, im kowe kom; im . . . komin likit ir bwe ren utiej ilo ami yokwe ir, kin jerbal ko air.” (1 Dri Tessalonika 5:12, 13) “Elap jerbal”​—menin ejjab kalikar ke bwe elder ro rej tiljek ro rejjab kibbon rej lelok ir make ñan tokjen eo kin kij? Kalmenlokjen, iumin jidik ien, kin jerbal eo eddo rein jeid im jatid jitenburu rej ineke.

¹⁵ Ilo elõñ wãwen ko ir rej emaan ro ewõr air family im rej aikwij jerbal ilo jikin jerbal ko ñan kabwe aikwij ko an family ko air. (1 Timote 5:8) Elañe elder eo ewõr nejin ajiri, rein redik rej aikwij ien im lale jen jemeir. E maroñ aikwij jibañ ir ilo jerbal ko air ilo school, bareinwõt schedule jet ien ñan kalaplok ikkure ko an jodikdik ñan ejmour eo air. (Ekklisiastis 3:1, 4) Men eo elap tata an aorõk, ej kejbãrok aikwij ko ilo jitõb an family eo, ekkeini kõmman juõn katak Bible, jerbal ibbeir ilo jerbal in kwalok nan, im bõk ir ñan kwelok ko an Christian. (Duteronomi 6:4-7; Dri Epesõs 6:4) Jen jab meloklok bwe kobatok ibben eddo kein me ekkã air bed ibben elõñ iad, elder ro elõñ bar jerbal ko jet air: kebojak ñan mõttan ko ilo kwelok, kõmman jerbal in shepherd ñan lolok ñan moko, kejbãrok jitõb eo an congregation eo im, ñe ej menin aikwij, jerbale case in ekajet ko. Jet rej bõk elaplok eddo eo ej kobalok ibben circuit assembly ko, district convention ko, ekkal in Kiiñdom Hall, im Hospital Liaison Committee ko. Emol, maan rein jeid im jatid “elap air jerbal”!

16. Kwalok wãwen ko jemaroñ kwalok ad lemnak kin elder ro.

¹⁶ Ewi wãwen ad maroñ kwalok ad lemnak kake ir? Juõn jabõn kennan ilo Bible ej ba: “Juõn nan ilo ien ekar, e nañin emõn wõt!” (Jabõn Kennan Ko 15:23; 25:11) Inem nanin kamolol ko ilo ettã buru im nanin kakajur ko remaroñ kwalok ñan ir bwe jejjab kamol wõt kin jerbal eo air elap. Bareinwõt, jej aikwij kõmmanwa ilo men eo jej kõtmene kin ir kake. Ilo wãwen eo juõn, jej aikwij eñjake ad anemkwoj in kebak ir ñan jibañ. Emaroñ wõr ien en ñe ‘ej lukkun rup buruõd’ im jej aikwij kakajur ilo jitõb, ialin tel, im nanin kakabilek jen rein ro “tellokiir ñan katakin” Nanin Anij. (Sam Ko 55:4; 1 Timothy 3:2, NW) Ilo ejja ien eo wõt, jej aikwij kememej bwe ewõr joñan ien juõn elder emaroñ letok ñan kij, kinke ejjab maroñ kajekdon aikwij ko an family eo an make ak ro jet ilo congregation eo. Ad “tiriamokake dron” ñan rein jeid im jatid elap air jerbal, jenaj jamin kõnan kõmman akwelap ko rejjab menin kõmmanwa ioir. (1 Piter 3:8) Ak, jen kamolol kin jabdewõt ien im lale eo remaroñ letok ñan kij.​—Dri Pilippai 4:5.

17, 18. Ta menin karmijete ko elõñ limaro belen elder ro rej kõmmani, im ewi wãwen ad maroñ kwalok bwe jejjab bõk kõrã rein retiljek bwe baj eindein wõt?

¹⁷ A ta kin kõrã ro belen elder ro? Rej jab bar tellokin ad lemnak kake ir ke? Eokwe ke, ir rej bõk kunair ibben lõmaro beleir ibben congregation eo. Menin ekkã an kir ñan karmijete kõnan ko air. Jet ien, elder ro ej aikwij kajerbal ien ilo awa ko ilo jota ñan etale men ko an congregation eo ke elañe jab ren kar maroñ kajerbale ibben family ko air. Ilo elõñ congregation ko Christian kõrã ri tõmak ro rej mõnõnõ in kõmman karmijete rot in bwe lõmaro beleir ren maroñ lale sheep ro an Jehovah.​—Keidi 2 Dri Korint 12:15.

¹⁸ Ewi wãwen ad maroñ kwalok bwe jejjab bõk wõt ri tõmak Christian kõrã rein jimjãn jimjatin bwe baj eindein wõt? Emol ilo air jab akwelap ilo jab kõmmanwa ñan lõmaro beleir. Ak jen bareinwõt jab meloklok kajur in nan ko relamwan in kamolol. Jabõn Kennan Ko 16:24 ej ba: “Nan ko nan in joij rej einwõt men eo nien hõnni, re tõñõl ñõn an, im men in mour ñõn dri ko.” Lemnak kin juõn bwebwenato. Elikin juõn kwelok an Christian, ruo ri belele rar kebak juõn elder im kajitõk ñan air konono ibben kin jodikdik ladik eo nejiiro. Ke elder eo ear konono ibben ri belele ro, lio belen ear kõttar wõt ilo inemõn. Tokelik, lio jinen ladik eo ear kebak kõrã eo belen elder eo im ba: “I kõnan kamolol yuk kin ien eo leo beleõm ear kajerbale ñan jibañ family eo aõ.” Nan kein relamwan im tõñal kin kamolol emol rar tõbar buruen lio belen elder eo.

19. (a) Elder ro, einwõt juõn kumi, rej ilo tiljek kajejjet kitien ta menin kõtõbar ko? (b) Ta eo kij otemjej jej aikwij beek ñan ad kõmmane?

¹⁹ Menin letok eo kin elder ro ñan lale sheep ro ej juõn ian ‘men in letok emõn’ an Jehovah. (Jemes 1:17) Jab, emaan rein rejjab wãppen; einwõt kij otemjej, rej kõmman bwid. (1 Kiñ Ro 8:46) Ak, einwõt juõn kumi, elder ro ilo congregation ko ibelakin lal rej tiljek ilo air kajejjet kitien kõtõbar ko rej bed ilo lemnak eo an Jehovah kin ir​—einwõt ba, ñan kajimwe, kalek, burukuk, im kejbãrok bwij eo. Kajjojo elder en bin bebe eo an ñan etal wõt im kejbãrok sheep ro an Jehovah, im ilo wãwen in kamol e make juõn menin letok, ak jerammõn, ñan ro jein im jatin. Im kij otemjej jen aolep beek ñan ad kwalok ad kamolol kin “menin letok ko ilo emaan ro” ilo ad bokake im kõttã ñan ir im kwalok ñan ir ad lemnak kin jerbal eo air elap. Elap ad kamolol bwe Jehovah ilo yokwe ear letok emaan ro me, ilo juõn wãwen, rej ba ñan sheep ro an: ‘Ej am jerbal ñan jibañ kom jerbal ñan Anij kin lañliñ’!

Ewi Wãwen Am Naj Kar Uak?

◻ Etke emaroñ jejjet keidi congregation eo ñan juõn enbwin?

◻ Ewi wãwen an elder ro maroñ jibañ ro jeiir im jatiir ñan jerbal ñan Jehovah kin lañliñ?

◻ Etke jej aikwij jab bokake wõt ak bareinwõt kõttã ñan ro rej tel?

◻ Ilo wãwen et ko jemaroñ kwalok ad kamolol kin elder ro?

[Pija eo ilo peij 14]

Elder ro, rej nebar ro jet kin jibadbad ko air kin aolepen air

[Pija eo ilo peij 15]

Kin joñok in kijejeto eo air ilo jerbal in kwalok nan, elder ro remaroñ jibañ ro uan family eo im ro jet ñan jerbal kin lañliñ

[Pija ko ilo peij 17]

Jej kamolol kin jerbal eo elap an elder ro ad!