Jemen Im Jinen Ajiri Ro, Ta Joñok Eo Ami Ñan Katakin Kake?
“Inem komin dri kajeoñwe Anij, einwõt ajiri re jitenburu; Im etetal ilo yokwe.”—DRI EPESÕS 5:1, 2.
1. Kain tel rot Jehovah ear lelok ñan armij ro ruo moktata?
JEHOVAH ej Ri Kõmanmõn eo kin karõk in family. Family ko otemjej rej bed kin e kinke e eo ear kajutak family eo moktata im ear lelok ñan armij ro ruo moktata kajur eo in wõr nejiir. (Dri Epesõs 3:14, 15) Ear lelok ñan Adam im Eve nan in kibel ko kin eddo ko air im ear bareinwõt lelok ñan ir ien eo emõn ñan kajerbal lemnak eo air make ñan kajejjet men kein (Jenesis 1:28-30; 2:15-22) Elikin an Adam im Eve kar jerawiwi, family ko rar aikwij jelmae wãwen ko me ear laplok an bwok. Meñe eindein, Jehovah ilo yokwe ear lelok nan in tel ko ñan jibañ ri karejar ro an ñan kijenmij kin wãwen rot kein.
2. (a) Ikijen ta eo Jehovah ear kabin kien jeje ibben nan in kakabilek ko kar konono kaki? (b) Kajitõk ta eo ro jemen im jinen ajiri ro rej aikwij kajitõkin ir make kake?
2 Einwõt Ri Katakin eo ad Elap, Jehovah ear kõmman elaplok jen an letok wõt nan in tel ko kar jeje kake kin ta eo jej aikwij kõmmane im ta eo jen bõprae ad kõmmane. Ilo ien ko etto ear kobaik nan in kibel ko kar jeje kaki ibben nan ko kar konono kaki ikijen priest ro im ri kanan ro im ikijen ro bõran family eo. Wõn ro ej kajerbal ir ilo ran kein ad ñan letok nan in jiroñ kein? Christian elder ro im jemen im jinen ajiri ro. Elañe kwoj juõn jemen ak jinen, kwoj kõmman ke ijo kunam ñan katakin family eo am kin ial ko an Jehovah?—Jabõn Kennan Ko 6:20-23.
3. Ta eo ro bõran family eo remaroñ katak jen Jehovah ikijen katakin ilo keie?
3 En ewi wãwen air lelok nan in kibel ko ilo juõn family? Jehovah ear likit joñok eo. Ej ba ilo alikar ta eo emõn im ta eo enana, im elap an elijinmen. (Exodus 20:4, 5; Duteronomi 4:23, 24; 5:8, 9; 6:14, 15; Joshua 24:19, 20) Ej kajerbal kajitõk ko rej kamakit lemnak. (Job 38:4, 8, 31) Ilo an kajerbal wanjoñok ko, ej kamakit eñjake ko ad im nalõmen buruõd. (Jenesis 15:5; Daniel 3:1-29, New World Translation) Ro jemen im jinen, ñe komij katakin ajiri ro nejimi, komij kajeoñe ke wanjoñok in?
4. Ta eo jemaroñ katak jen Jehovah ikijen lelok kaje, im etke kaje eaorõk?
4 Jehovah ej bin kin men ko rejimwe, ak ej melele kin tokjen ko rej walok kin ad jab wãppen. Inem mokta jen an kauweik armij, ej katakin ir im lelok nan in kakkõl im nan in kakememej ko ñan armij ro rejjab wãppen. (Jenesis 19:15, 16; Jeremiah 7:23-26, NW) Ñe ej kajeik armij, ej kõmmane ilo juõn joñan ekkar, jab le jen joñan. (Sam 103:10, 11; Aiseia 28:26-29) Elañe eñin wãwen eo jej jerbale ibben ajiri ro nejid, ej kalikar bwe jej jelã Jehovah, im enaj bidodo lok air jelã kajjen bareinwõt.—Jeremiah 22:16, NW; 1 Jon 4:8.
5. Ta eo ro jemen im jinen ajiri ro remaroñ katak jen Jehovah ikijen roñjake?
5 Ilo aibujuij, Jehovah ej roñjake einwõt juõn Jemen ilañ ej yokwe. Ejjab baj letok wõt kien ko. Ej rejañ kij ñan kwalok buruõd ñan e. (Sam 62:8) Im elañe lemnak ko jej kwaloki rejjab jejjet, ejjab kauweik kij ilo juõn ainikien elap jen lañ. Ilo joij ej katakin kij. Inem, elap an jejjet nan in kakabilek eo an ri jilek Paul: “Inem komin dri kajeoñwe Anij, einwõt ajiri re jitenburu”! (Dri Epesõs 4:31-5:1) Jehovah ear likit juõn joñok emõn ñan ro jemen im jinen ajiri ro ñe rej jibadõk air katakin ro nejiir! Ej juõn wanjoñok eo ej tõbar buruõd im kõmman ad kõnan etetal ilo ial in mour eo an.
Kilan eo ej Itok Jen Juõn Wanjoñok
6. Ewi wãwen lemnak im joñok ko an ro jemen im jinen ajiri ro rej jelet ro nejiir?
6 Ijellokin nan in kibel ko rej konono kaki, juõn wanjoñok elap an maroñ jelet juõn ajiri. Meñe ro jemen im jinen ajiri ro rekõnan ak jab, ro nejiir renaj anõk ir. Emaroñ kamõnõnõ ro jemen im jinen—im jet ien kailbõk ir—ñe rej roñjake an ro nejiir ba men ko ir make rar ba. Ñe mwil im lemnak jimor an jemeir im jineir rej kwalok juõn kamolol elap kin men ko lor jitõb, menin ej jelet ajiri ro ilo juõn wãwen emõn.—Jabõn Kennan Ko 20:7.
7. Kain joñok rot eo Jephthah ear likit ñan ledik eo nejin, im kin tokjen et eo?
7 Tokjen joñok eo an jemen im jinen ajiri ro emõn air kalikare ilo Bible. Jephthah, eo Jehovah ear kajerbale ñan tel Israel bwe en anjo ion Ri Ammon, ear bareinwõt juõn jemen ajiri. Uak eo an ñan king in Ammon ej kalikar bwe Jephthah ekkã an kar readi bwebwenato eo kin wãwen an Jehovah jerbal ibben Ri Israel ro. Ear bidodo an maroñ elij bwebwenato eo nan kin nan, im ear kwalok juõn tõmak ekajur ilo Jehovah. Ejelok bere, wanjoñok eo an ear jibañ ledik eo nejin ñan kaddek tõmak eo im jitõb in karmijete kõnan ko an make me ear kwaloke ke ear bõk jerbal eo toan an mour einwõt juõn kõrã ej make ian ilo jerbal eo an Jehovah.—Dri Ekajet Ro 11:14-27, 34-40; keidi Joshua 1:8.
8. (a) Ta lemnak eo emõn jemen im jinen Samuel rar kwalok kake? (b) Ewi wãwen an kar Samuel bõk tokjen jen men in?
8 Samuel ear juõn joñok emõn ke ear juõn ajiri im ear tiljek ñan Anij einwõt juõn ri kanan ilo aolepen mour eo an. Kwo kõnan ke bwe ro nejõm ren eindein? Etale joñok eo jemen im jinen Samuel, Elkanah im Hannah, rar likite. Meñe wãwen eo ilo family eo air ear jab wãppen, ear keini air etal ñan Shiloh ñan kabuñ, jikin eo imõn kabbed eo ear bed ie. (1 Samuel 1:3-8, 21) Lale mũlal in eñjake eo an Hannah ke ear jar. (1 Samuel 1:9-13) Lale eñjake eo airro jimor kin aorõkin air kajejjet jabdewõt kallimur ko rar kõmmani ñan Anij. (1 Samuel 1:22-28) Ejelok bere bwe joñok eo air emõn ear jibañ Samuel ñan kaddek kadkad ko me rar kamaroñ e ñan jibadõk juõn ial ejimwe—meñe ear bed ibwiljin armij ro rar baj ba wõt bwe rej karejar ñan Jehovah ak rar jab kwalok air kautiej wãwen ko an Anij. Tokelik, Jehovah ear lelok ñan Samuel eddo eo bwe en ri kanan eo An.—1 Samuel 2:11, 12; 3:1-21.
9. (a) Ta men ko ilo mweo imõn ear jelet Timothy ilo juõn wãwen emõn? (b) Timothy ear erom kain armij rot?
9 Kwo kõnan ke bwe ladik eo nejõm en einwõt Timothy, eo ke ear juõn likao ear erom juõn rejetan ri jilek Paul? Jemen Timothy ear jab juõn ri tõmak, ak jinen im jibwin rar likit juõn joñok emõn ñan kwalok kamolol kin men ko lor jitõb. Ejelok bere bwe men in ear jibañ ñan likit juõn bedbed emõn ilo mour eo an Timothy einwõt juõn Christian. Kar jiroñ kij bwe jinen, Eunice, im jibwin Lois ear wõr ibbeir “tõmak [eo] emol.” Mour ko air einwõt Christian ro ear jab ilo jelã mon; ear mol air mour ekkar ñan ta eo rar tõmak kake, im rar katakin Timothy bwe en eindein an kõmmane. Timothy ear kamol air maroñ liki e im bwe ear mol an lemnak kin ro jet.—2 Timote 1:5; Dri Pilippai 2:20-22.
10. (a) Joñok et ko ilikin mweo remaroñ jelet ro nejid? (b) En ewi wãwen ad emmakit ñe wãwen kein rej walok ilo konono ak lemnak ko an ro nejid?
10 Joñok ko me rej jelet ro nejid rejjab aolep bed iloan family eo. Ewõr ajiri ro rej school ibbeir, ri kaki ro me jerbal eo air ej ñan jek nalõmen lemnak ko an ajiri ro, armij ro me ekajur air tõmak bwe aolep rej aikwij lor manit ko an ailiñ eo, ri ikkure ro rebuñbuñ me elap air bõk nebar kin tõbrak ko air, im ri utiej ro an kien me mwiliir ekkã air news kake. Elõñ million ajiri ro emwij air iion bareinwõt jorrãn ko rej walok jen tarinae ko. En kar kailbõk kij ke elañe wãwen kein rej walok ilo konono ak lemnak eo an ro nejid? Ewi wãwen ad emmakit ñe rej walok? Nan in kauwe eo elej enaj kamadmõd abañ eo ke? Jen am uak ilo mõkaj ñan ajiri eo, ejjab emõn lok ke ñan kajitõkin kij make, ‘Ewõr ke juõn men ilo wãwen eo Jehovah ej jerbal ibbed me emaroñ jibañ iõ ñan jelã ewi wãwen aõ maroñ jerbale abañ in?’—Keidi Dri Rom 2:4.
11. Ñe ro jemen im jinen ajiri ro rej kõmman bwid ko, ewi wãwen an menin maroñ jelet lemnak eo an ro nejiir?
11 Emol, jemen im jinen ro rejjab wãppen rejamin jerbale abañ ko ilo wãwen eo emõntata ien otemjej. Renaj kõmman bwid ko. Ñe ajiri ro rej kile menin, en kadiklok ke air kautiej jemeir im jineir? Emaroñ, elaptata elañe jemen im jinen rej kajeoñ in kalibubu bwid ko air make ilo air kwalok ilo lej kin maroñ eo air. Ak tokjen eo emaroñ oktak elañe jemen im jinen rej kwalok air ettã buru im kwalok kin bwid ko air. Ilo wãwen in, remaroñ likit juõn joñok eaorõk ñan ro nejiir, ro me rej aikwij katak ñan kõmman ejja men eo wõt.—Jemes 4:6.
Joñok eo Ad Ta eo Emaroñ Katakin
12, 13. (a) Ta eo ajiri ro rej aikwij katak kin yokwe, im ewi wãwen air maroñ katakin kin menin ilo wãwen eo emõntata? (b) Etke eaorõk bwe ajiri ro ren katak kin yokwe?
12 Elõñ men ko raorõk remaroñ katakin kake ilo keie ñe rej koba nan in kibel ko ibben juõn joñok emõn. Lemnak kin jet.
13 Kwalok yokwe ilo ejelok jitõb in kibbon: Juõn ian katak ko elaptata an aorõk ñan kabine ikijen joñok ej aorõkin yokwe. “Jej yokwe bwe E ar yokwe kij mokta.” (1 Jon 4:19) E ej Unjen im joñok eo elaptata kin yokwe. Yokwe in, a·gaʹpe, ej walok elõñlok jen 100 alen ko ilo Bible. Ej kadkad eo me ej kwalok kajjen Christian ro remol. (Jon 13:35) Yokwe rot in rej aikwij kwaloke ñan Anij im Jesus Christ im bareinwõt an armij ro ñan don—meñe ñan armij ro rejjab lukkun yokwe. (Matu 5:44, 45; 1 Jon 5:3) Yokwe in ej aikwij bed ilo buruõd im alikar ilo mour ko ad mokta jen ad maroñ katakin ro nejid kake ilo keie. Jerbal ko elaplok air alikar jen nan ko. Iloan family eo, ajiri ro rej aikwij lo im iion yokwe im kadkad ko jet rej koba ibben, einwõt juõn jitõb emãnãn. Ñe ejelok men kein, enaj kautameik eddeklok eo an ajiri eo ilo enbwin, ilo lemnak, im ilo eñjake. Ajiri ro rej aikwij bareinwõt lo wãwen air kwalok yokwe im juõn jitõb emãnãn ñan Christian ro jeid im jatid ilikin family eo.—Dri Rom 12:10; 1 Piter 3:8.
14. (a) Ewi wãwen air maroñ katakin ajiri ro ñan kõmman jerbal ko remõn me remaroñ bõktok juburu? (b) Ewi wãwen am maroñ kõmman menin ilo family eo am?
14 Katak kilen jerbal: Jerbal ej juõn wãwen elap ilo mour. Bwe en wõr juõn eñjake in kautiej emake ilo ekkar, juõn armij ej aikwij katak kilen kõmman jerbal ko remõn. (Ekklisiastis 2:24; 2 Dri Tessalonika 3:10) Elañe rej lelok ñan juõn ajiri jerbal ko rar jab katakin e kaki inem kauweik e kin an jab kõmmani ilo juõn wãwen emõn, ebin ad tõmak bwe enaj katak kilen kõmman jerbal ko remõn. Ak ñe ajiri ro rej katak kilen jerbal ilo air jerbal ibben jemeir im jineir im rej bõk nebar, elaplok air naj maroñ katak kõmman jerbal ko rej kajuburueir. Elañe joñok eo an jemen im jinen ej koba kamelele, ajiri ro renaj katak jab kilen kõmmane jerbal eo wõt ak renaj bareinwõt katak kilen anjo ion abañ ko, wãwen eo ñan kate ir mae ien ededelok jerbal eo, im wãwen eo ñan kõmmanwa im kõmman bebe ko. Ilo wãwen in remaroñ jibañ ir ñan kile bwe Jehovah bareinwõt ej jerbal, ej kõmman jerbal ko remõn, im Jesus ej anõk Jemen. (Jenesis 1:31; Jabõn Kennan Ko 8:27-31; Jon 5:17) Elañe juõn family ewõr juõn jikin kallip ak juõn business, jet uan family eo remaroñ jerbal ibben don. Ak bõlen jinen emaroñ katakin ladik ak ledik eo nejin ñan kõmat ak karreo elikin air mõñã. Juõn jemen eo jikin jerbal eo an ej bed ilo bar juõn jikin emaroñ karõk ñan kõmman jet jerbal ko ibben ro nejin ilo mweo. Elap an wõr tokjen ñe jemen im jinen rej lemnak jab kin air kõmmane jerbal ko ilo ien eo wõt ak bareinwõt ñan keboj ro nejiir ñan toan wõt air mour!
15. Ilo wãwen et ko kwomaroñ katakin kin tõmak? Kwalok juõn wanjoñok.
15 Kejbãrok tõmak ñe rej jelmae abañ ko: Tõmak ej juõn wãwen eaorõk ilo mour ko ad bareinwõt. Ñe rej bwebwenato kin tõmak ilo katak in family eo, ajiri ro remaroñ katak kameleleiki. Remaroñ jelã bareinwõt kin menin kamol ko me rej kõmman bwe en eddeklok tõmak ilo burueir. Ak ñe rej lo an jemeir im jineir kwalok tõmak eo ebin ñe rej jelmae abañ ko relap, tokjen eo emaroñ to an bed. Leo belen juõn ri katak Bible ilo Panama ear kamijake ilo an ba bwe enaj jolok e jen mweo elañe ejjab bõjrak jen an karejar ñan Jehovah. Meñe eindein, ibben ajiri ro emen nejin redik, ear keini air etetal enañin 10 mile ko inem iuwe ion bus mõttan 20 mile ko ñan tõbar Kiiñdom Hall eo ebaktata. Ilo air bõk rejañ jen joñok eo, enañin 20 uan family eo an rar bõk mol eo.
Likit juõn Joñok ilo Read Bible Ran Otemjej
16. Etke rej rejañ kin read Bible ran otemjej einwõt juõn family?
16 Juõn ian manit ko raorõktata juõn family emaroñ kajutake—juõn manit eo enaj wõr tokjen ñan jemen im jinen im naj juõn joñok emõn ñan an ajiri ro anõke—ej air keini air read Bible. Elañe emaroñ, read Bible ran otemjej. Ejjab joñan eo kwoj readi me ej aorõk. Men eo elaplok an aorõk ej bwe en keini am read im wãwen eo kwoj kõmmane. Ñan ajiri ro, konono Bible eo emaroñ koba air roñjake cassette in roñjake ko kin Aõ Buk in Bwebwenato ko Jen Baibel elañe ewõr ilo kajin eo am. Konono Nan in Anij aolep ran ej jibañ kij ñan kõmman bwe lemnak ko an Anij en bed imantata. Im elañe komij kõmmane jab einwõt kajjojo armij wõt ak einwõt juõn family bareinwõt, menin emaroñ jibañ aolepen family eo ñan etetal ilo ial ko an Jehovah. Manit in kar rejañ kake ilo “Mour Ekkar Ñan Wãwen Anij” Convention ko ilo drama eo Family ko—Kõmman Bwe Read Bible Ran Otemjej En Wãwen Mour Eo Am!—Sam 1:1-3.
17. Ewi wãwen read Bible einwõt juõn family im kili eon ko rej jibañ in jerbale nan in kakabilek eo ilo Epesõs 6:4?
17 Read Bible einwõt juõn family ej errã ibben ta eo ri jilek Paul ear jeje kake ilo letter in kakõrmol eo an ñan Christian ro ilo Epesõs, eñin: “Ro jemeir, komin jab biutõke ro nejimi ñõn illu: a komin kakajiririik ir ilo kaje im kowe an Iroij.” (Dri Epesõs 6:4) Ta melelen menin? “Kowe” ej melelen “likit ilo lemnak”; inem rej rejañ Christian ro jemen ñan likit lemnak eo an Jehovah Anij ilo ro nejiir—ñan jibañ ro nejiir ñan jelã lemnak ko an Anij. Rejañ ajiri ro ñan kili eon ko emaroñ jibañ kõtõbrak men in. Mejenkajjik eo ej ñan kõmman bwe lemnak ko an Jehovah en tel lemnak ko an ajiri ro bwe kõnan ko air im mwiliir ren kwalok kien Anij meñe jemen im jinen rej bed ibben ajiri ro ak jab. Bible eo ej bedbed in lemnak rot in.—Duteronomi 6:6, 7.
18. Ñe kwoj read Bible, ta eo kwoj aikwiji (a) bwe en alikar am melele kake? (b) ñan bõk tokjen jen nan in kakabilek ko iloan? (c) ñan emmakit ñan ta eo ej ba kin karõk eo an Jehovah? (d) ñan bõk tokjen jen ta eo ej ba kin lemnak im jerbal ko an armij?
18 Emol, elañe Bible eo en jelet mour ko ad, jej aikwij melele ta eo ej ba. Ñan elõñ, menin emaroñ aikwij air read jet mõttan ko elõñlok jen juõn alen. Ñan bõk melele eo ealikar kin jet nan ko, jemaroñ aikwij lale nan ko ilo juõn dictionary ak Insight on the Scriptures. Elañe eon eo ewõr juõn nan in kakabilek ak juõn kien, bõk ien ñan konono kin wãwen ko rekkar ilo ran kein ad. Inem kwomaroñ kajitõk, ‘Ewi wãwen ad maroñ bõk tokjen jen ad jerbale nan in kakabilek in?’ (Aiseia 48:17, 18) Elañe eon eo ej konono kin jet wãwen ko kin karõk eo an Jehovah, kajitõk, ‘Ewi wãwen menin ej jelet mour ko ad?’ Bõlen kwoj read juõn bwebwenato eo ej konono kin lemnak ko im jerbal ko an armij. Ta abañ ko in mour rar jelmaiki? Ewi wãwen air kar jerbali men kein? Ewi wãwen jemaroñ bõk tokjen jen joñok eo air? Kõtlok bwe en wõr ien ñan konono kin ta melelen bwebwenato eo ilo mour ko ad rainin.—Dri Rom 15:4; 1 Dri Korint 10:11.
19. Ilo ad kajeoñe Anij, ta eo jej lelok ñan ajiri ro nejid?
19 Ej juõn wãwen emõn ñan kõmman bwe lemnak ko an Anij en bed ilo lemnak ko ad im buruõd! Ilo wãwen in jenaj bõk jibañ bwe jen “dri kajeoñwe Anij, einwõt ajiri re jitenburu.” (Dri Epesõs 5:1) Im jenaj likit juõn joñok tellokin an ro nejid kajeoñe.
Kwoj Kememej Ke?
◻ Ewi wãwen an ro jemen im jinen ajiri ro maroñ bõk tokjen jen joñok eo an Jehovah?
◻ Etke lelok nan in jiroñ ko ñan ajiri ro rej aikwij koba ibben wanjoñok ko remõn an jemen im jinen?
◻ Ta jet ian katak ko emõn lok air katakin ikijen wanjoñok eo an jemen im jinen?
◻ Ewi wãwen ad maroñ bõk tokjen ko relap jen read Bible einwõt juõn family?
[Pija ko ilo peij 20]
Elõñ rej lañliñ kin air read Bible ran otemjej einwõt juõn family