Devil Eo Ej Kõmman Ke Bwe Jen Nañinmij?

NAÑINMIJ EJJAB AIKWIJ KAR WÕR. Anij ear kõmanmõn kij ñan ad mour indio ilo wãppen in ejmour. Kar juõn jitõb in kõmanmõn, Satan, eo ear kõmman nañinmij, eñtan, im mij bwe en jelet family eo an armij ke ear tel jemed im jined ro moktata, Adam im Eve, ñan jerawiwi.​—JENESIS 3:1-5, 17-19; DRI ROM 5:12.

MELELEN menin ke bwe aolep nañinmij otemjej rej kajju im walok jen an jitõb eo an lal in bõk kunan ie? Einwõt an walok ilo katak eo lok iman, elõñ armij rainin eindein air lemnak. Eindein kar ibben lio jibwin ledik jidikdik eo Owmadji. Ak nañinmij in diarrhea eo an Owmadji​—jet ien juõn nañinmij elap ñan ajiri ro redik ilo jikin ko reokmãnãn​—lukkun mol ke bwe ej kõmman in jitõb ro jejjab loi?

Jerbal An Satan

Ekanuij alikar an Bible uak kajitõk in. Moktata, ej kwalok bwe jitõb ro an ro jimmad rejjab maroñ jelet ro remour. Ñe armij rej mij, “ejelok air jelãlokjen ñan jidik.” Ejelok air jitõb en ej ellã jen mij. Rej kiki ilo lũp, ijo “ejelok jerbal, ak men in kine, ak jela, ak meletlet.” (Ecclesiastes 9:5, 10, New World Translation.) Ejelok jabdewõt wãwen, eo emij emaroñ kõmman bwe eo emour en nañinmij!

Bõtab, Bible ej kalikar bwe ewõr jitõb ro renana rej bed. Eo moktata ear jumae ijoko ilañ kar jitõb in kõmanmõn eo kiõ jej jelã kake einwõt Satan. Ro jet rar kobalok ibben im kar naetair demon ro. Satan im demon ro remaroñ ke kõmman nañinmij? Ear walok menin. Jet ian menin kabwilõñlõñ ko ilo kemour eo an Jesus kar kajutõklok demon ro. (Luk 9:37-43; 13:10-16) Bõtab, elõñ wõt ian kemour ko Jesus ear kõmmani kar nañinmij ko kar jab kajju im kõmman jen demon ro. (Matu 12:15; 14:14; 19:2) Ilo wãwen in lok wõt rainin, einwõt juõn rule, nañinmij ej walok jen baj nañinmij wõt, im jab kõmman in kajur ko an jitõb ro.

Ewi Wãwen An Satan Jerbal?

Ilo enañin aolep jabdewõt wãwen, kõtan eo deo ikõtan Satan im an armij nañinmij ej mol eo bwe Satan ear kabo armij ro ruo jinoin tata, im rar wõtlok ñan loan jerawiwi. E im demon ro an ejjab ir eo rej kõmman im kajjuiki kajjojo jorrãn im jabdewõt nañinmij. Bõtab, Satan ejjab utiej buru ñan an kajeoñ in kareel kij ñan ad kõmman bebe ko rejjab meletlet im ebbururu kin tõmak eo ad, eo emaroñ walok tokjen ilo jorrãn ñan ejmour eo ad. E ar jab ekkõbel, uror, ak kokkure Adam im Eve kin nañinmij. E ar kareel Eve ñan an jab bokake Anij, im Adam ear lore ilo ialin jab bokake eo. Nañinmij im mij rar mõttan tokjen eo ear walok.​—Dri Rom 5:19.

Kõrã eo jibwin Owmadji ear kajeoñ kareel Hawa ñan an kajerbal men ko juõn armij ej kõnaki ñan kejbãrok e jen nana im menin katok ko rej kabuñ ñani einwõt juõn menin kejbãrok nae nañinmij. Ta eo enaj kar walok elañe Hawa enaj kar kõtlok? E naj kar kwalok juõn jabwe in liki ilo Jehovah Anij, im enaj kar jako an liki kejbãrok eo an.​—Exodus 20:5; Matu 4:10; 1 Dri Korint 10:21.

Ad lemnak bwe jitõb ro jejjab loi ewõr kilair ilo jabdewõt nañinmij ko rej kajju im itok iod menin ej juõn jen. Emaroñ jarõk ñan an wõr juõn mijak kin jitõb ro. Inem, ñe jej nañinmij, jemaroñ bõk kabo ñan ad kajeoñ jibadõk demon ro jen ad katoanlok kij jen ir. Elañe Satan emaroñ kamijak kij ñan ad bõk jibañ jen mantin ko mantin jitõb, menin enaj juõn menin karmijeteik Anij eo emol, Jehovah. (2 Dri Korint 6:15) Mijak eo ewõr kautiej ie kin Anij ej aikwij tel kij, im jab mijak eo kin Ri jumae eo an.​—Reveles̃õn 14:7.

Elõñ Men ko Rej Kõmman Nañinmij

Elõñ wõt armij rejjab tõmak ilo jitõb ro. Ñe rej nañinmij, rej ilok ñan ibben juõn doctor​—elañe remaroñ kõllã wõnãn. Bwebõta, juõn armij eo enañinmij emaroñ etal ñan ibben juõn doctor ak ej nañinmij wõt. Doctor ro rejjab maroñ kõmman menin bwilõñ ko. Ak elõñ armij ro rej tõmak ilo jitõb ro rekajur rej ilok ñan ibben juõn doctor remaroñ kar mour ak kin air kar rumijlok. Rej kajeoñ mokta kin kilen kemour ko ilo jitõb, im ñe men kein rej likjap rej ilok ñan ibben juõn doctor einwõt juõn menin jibañ eo eliktata. Elõñ rejjab aikwij kar mij.

Ro jet rej jelmae mij ilo jab jejjet in ien kin air jajelokjen. Rejjab kile kakõlle ko im rejjab jelã ta buñten ne ko ekkar etal ie ñan bõprae nañinmij. Jelãlokjen ej jibañ bõprae eñtan eo ejelok tokjen. Ej menin aorõk ñan lo bwe kõrã ro rejelã read im jeje im ewõr nejiir eietlok ajiri ro rej luji ir kin nañinmij jen ro rejaje read im jeje. Aet, jajelokjen emaroñ kõmman jorrãn ilo jemlokin.

Kajekdon ej bar juõn men eo ej kõmman nañinmij. Ñan wanjoñok, elõñ rej nañinmij kinke rej kõtlok an kij ko ettõbalbal ion mõñã eo mokta jen air mõñã ak kinke ro rej kõmman mõñã rejjab kwal peiir mokta. Ilo wãwen ko kin ejmour, ekkã an mol bwe “juõn ounce in kejbãrok aorõkin juõn pound in kemour.”

Juõn style in mour eo ebwebwe ej kõmman an million armij ro nañinmij im mij lok iman. Kadõk, mour in lũñ, kajerbal unokan kadõk ilo bwid, im kajerbal jikka ej kokkure ejmour eo an elõñ. Elañe juõn armij ej kõtlok kõnan eo an ilo men kein renana inem nañinmij, ej kinke ewõr juõn eo ear kõbel e ak juõn jitõb ear kokkure e ke? Jab. E eo ren naruõn kin nañinmij eo an. Naruõn jitõb ro enaj juõn menin makoko in bõk eddo eo kin juõn style in mour ebwebwe.

Mejelan eo Eaetok Jetñakin

Nañinmij ejjab juõn likjap an Anij. “Kin men ko renana Anij ejjab maroñ kabo kaki im e make ejjab kabo jabdewõt armij.” (James 1:13, NW) Aet, Anij ewõr an yokwe. Ej kõnan jibañ kij, im jab kõmetak kij.

Emol, Jehovah ewõr juõn an mejelan eo eaetok jetñakin kin nañinmij​—mij im jerkakbiji eo an Jesus. Ikijen katok in binmour eo an Jesus, ro ejimwe burueir rej kõtlok ir jen wãwen jerawiwi eo air im enaj etal im wõr ibbeir ejmour wãppen im mour indio ilo juõn paradise ilal. (Matu 5:5; Jon 3:16) Menin kabwilõñlõñ ko Jesus ear kõmmani rar einwõt juõn menin kalikar lok iman kin kemour eo emol Ailiñ in Anij enaj bõktok. Anij enaj bareinwõt kokkure Satan im demon ro an. (Dri Rom 16:20) Emol, ewõr men ko remõn ibben Jehovah emwij an keboji ñan ro rej jerbale air tõmak ilo e. Jej aikwij baj kõttar wõt im kijenmij.

Ilo kõtan ien in, Anij ej letok meletlet eo emõn im ialin tel eo ilo jitõb ikijen Bible eo im dolul in jimjãn jimjatin an ri kabuñ ro retiljek ibelakin lal. Ej kwalok ñan kij wãwen bõprae men ko renana rej kõmman abañ ko ñan mour in ejmour. Im ej letok ñan kij ro jerad remol ro renaj jibañ kij ñe ej walok abañ kein.

Ta eo ear walok ñan ledik jidikdik eo Owmadji? Jinen ear kememej juõn katak ilo Awake! magazine eo mõttan Watchtower, kin kamelele in oral rehydration therapy.a (kamadmõd in jabwe den ilo enbwin). Kõrã eo ear lor kamelele ko ie im keboj den eo ñan an Owmadji idak. Kiõ ledik jidikdik eo emõn an mour im ejmour.

[Kamelele eo itulal]