Kwo Maroñ Tõbar Jeim Im Jatim

“Im elañe jeõm ak jãtõm e naj kõmõnmõn nana ñõn yuk, kwon ilem kennanek e, komro wõt: Elañe enaj eoroñ yuk, kw’ar jebarek jeõm ak jãtõm.”​—MATU 18:15.

1, 2. Ta kakabilek eo emõn Jesus ear letok ikijen jerbal ibben likjap ko?

IBBEN an diklok joñan ien eo ebed jen juõn yiõ in jerbal in kwalok nan eo an, Jesus ear wõr ibben katak ko raorõk ñan ri kalor ro an. Kwo maroñ konono kaki ilo Matu chapter 18. Juõn kar aorõkin ad kõttã buruõd, einwõt ajiri ro. Jeltokin ear kalikar bwe jej aikwij bõprae ad lõkatipi “juõn ian rein redik” im bwe jej aikwij kajeoñ bar kajeblak “rein redik” rej jebwãbwe bwe ren jab jakolok. Inem ear kobaiktok kakabilek eo eaorõk im emõn kin kajemlok abañ ko ikõtan Christian ro.

² Kwo maroñ kememej nan ko an: “Im elañe jeõm ak jãtõm e naj kõmõnmõn nana ñõn yuk, kwon ilem kennanek e, komro wõt: elañe e naj eoroñ yuk, kw’ar jebarek jeõm im jãtõm. A elañe e jamin eoroñ yuk, kwon añinlok juõn ak ruo na ibõm, bwe kin loñin ruo ak jilu dri kennan, nan otemjej ren bin. Im elañe ej abwin eoroñ ir, kwon kennanek eklisia, im elañe ej abwin eoroñ eklisia, kwon likit e einwõt dri pegan im dri tel owõj.” (Matu 18:15-17) Ñããt eo jej aikwij jerbale nan in kakabilek rot in, im en ewi wãwen lemnak eo ad ilo ad kõmman eindein?

3. Ta wãwen kebak eo jej aikwij bõke ñan bwid ko an ro jet?

³ Katak eo lok iman ear kalikar bwe ke kij aolep jejjab wãppen im jej itok wõt in kõmman bwid, jej aikwij jerbale jeorlok bwid. Elaptata an eindein ñe ej wõr kõmmetak kin men eo juõn Christian eo rejetad ear ba ak kõmmane. (1 Piter 4:8) Ekkã an emõntata ñan kõtlok an ellã jerawiwi eo​—ñan jeorlok bwid im meloklok. Jemaroñ reilok ilo wãwen kõmmane menin einwõt juõn kakkunana ñan ainemõn ilo congregation eo an Christian. (Sam 133:1; Jabõn Kennan Ko 19:11) Ak, emaroñ wõr juõn ien ñe kwo maroñ eñjake bwe kwoj aikwij kõmman mejelan juõn wãwen eo ibben eo jeim im jatim maan ak kõrã eo ej kõmetak yuk. Ilo wãwen rot in, nan ko an Jesus ijin ilañ rej letok ialin tel eo.

4. Ikijen kien, ewi wãwen ad maroñ jerbale Matu 18:15 ñan bwid ko an ro jet?

⁴ Jesus ear kakabilek bwe kwon “ilem kennanek e, komro wõt,” elañe ear kõmman nana.” Menin ej menin meletlet. Jet ukok ko in German rej ukõt kajin in, lelok bwid eo an “iomin emen mej ko,” melelen mejem im mejen. Ñe kwoj ilo joij bõkmantak juõn abañ ilo makelok ian, ekkã an bidodolok lo mejelan. Juõn jimjãn jimjatin maan eo ear kõmmane ak ba juõn nan enana ak jab joij emaroñ bojak in kamol bwid eo ñan yuk make. Elañe ro jet rar roñjake, jab wãppen eo an armij emaroñ itok wõt in kariap bwid eo ak kajeoñ kamol bwe emõn men eo ear kõmmane. Ak ke kwoj bõkmantak menin konono eo “iomin mejem ko emen,” kwo maroñ lo bwe ear juõn jamelele im jab juõn jerawiwi ak bwid eo kwar karõke. Ñe emwij amiro jimor bõke einwõt juõn jamelele, komro maroñ kamõje, jab kõtlok bwe juõn men edik tokjen ñan an eddek im kokkure kõtan eo amiro. Kin menin, nan in kaiñi eo ilo Matu 18:15 emaroñ jerbal meñe ñan bwid dikdik ko ilo mour eo ran otemjej.

Ta Kar Melele Eo An?

5, 6. Ilo kobaiki ibben don, kain jerawiwi rot ko Matu 18:15 ear jitõñlok ñani, im ta eo ej kalikar menin?

⁵ Ilo tiljek in konono, men eo Jesus ear kakabilek kake ej jitõñlok ñan wãwen ko relaplok. Jesus ear ba: “Elañe jeim im jatim ej kõmmane juõn jerawiwi.” Ilo juõn melele eo elaplok, “juõn jerawiwi” emaroñ jabdewõt bwid ak likjap. (Job 2:10; Jabõn Kennan Ko 21:4; Jemes 4:17) Bõtab, melele in ej kwalok bwe melele eo an Jesus kin jerawiwi ej aikwij lap melelen. Ear bwe an lap bwe emaroñ kar tellok ñan an ri kõmman bwid eo lemnak kake einwõt juõn armij in ailiñ ko im einwõt juõn ri teltel owõj.” Ta melele eo ilo kajin in?

⁶ Ri kalor ro an Jesus rar roñjaki nan kein rar jelã bwe emaan in ailiñ eo air rar jab maroñ kobalok ibben Gentiles (Ri Ailiñ ko). (Jon 4:9; 18:28; Jerbal 10:28) Im rar lukkun ellok jen ri teltel owõj ro, maan ro bwijjier ri Jew ak ro rar oktak im kajerbal armij ro ilo bwid. Inem ilo konono kake, melele eo ilo Matu 18:15-17 kar ñan jerawiwi ko relap, jab bwid ko an juõn armij ak menin kõmmetak ko kwoj maroñ in baj jeorilok im melokloki.​—Matu 18:21, 22.a

7, 8. (a) Kain jerawiwi rot ko elder ro rej aikwij jerbali? (b) Kain jerawiwi rot ko remaroñ kajemloki ikõtan ruo Christian, ilo kajejjete ibben Matu 18:15-​17?

⁷ Iomin Kien eo, jet jerawiwi rar laplok jen jeorlok bwid an juõn armij eo ear jerawiwi. Blaspim, buñ jen tõmak, kabuñ ñan ekjap, im jerawiwi ko kin lũñ, im emaan ñan emaan ak kõrã ñan kõrã rej babu ibben don ren kar kejelã kaki bwe elder ro (ak pris ro) ren jerbali. Menin ej bareinwõt mol ilo congregation eo an Christian. (Livitikõs 5:1; 20:10-13; Bwinbwin 5:30; 35:12; Duteronomi 17:9; 19:16-19; Jabõn Kennan Ko 29:24) Ak, lale, bwe jerawiwi rot in Jesus ear konono kake ijin rar maroñ kajemlok ikõtan ruo armij. Ñan wanjoñok: Ilo an emmakit kin illu ak kamo, juõn armij ej ruruwe maan ro rejetan. Juõn Christian ej kõmman kwon ñan kõmmane juõn jerbal kin kõbwebweien ekkal em ko im ñan kamõj ilo juõn ran eo emwij karõke. Bar juõn Christian ej errã bwe enaj kõllã money ilo juõn ien emwij karõke ak ilo ran eo eliktata emwij karõk ñane. Juõn armij ej kallimur bwe armij eo ej jerbal ñane ej katakin e, ejamin aitwerõk ak kajeoñ in bõk ri wia ro an armij eo ej jerbal ñane iomin juõn ien eo emwij karõke.b Elañe juõn jimjãn jimjatin maan ejamin kamol nan eo an im ejjab ukwelok jen bwid rot in, enaj lukkun juõn bwid elap. (Reveles̃õn 21:8) Ak bwid rot kein remaroñ kajimwe ikõtan ruo armij ro ejelet ir.

⁸ Ak, ewi wãwen, am naj kar etal wõt em kõmman mejelan wãwen eo? Nan ko an Jesus ekkã lali ilo jilu buñten nee ko. Jen etale kajjojo iair. Jen ad lali einwõt jerbal in kien ko ejelok oktak ie, jen etale ñan ad melele jitõbõn nan ko an Jesus, im jab luji am lo mejenkajjik in yokwe eo am.

Jibadbad ñan Tõbar Jeim im Jatim

9. Ta eo jej aikwij likiti ilo ad lemnak einwõt ñan jerbale Matu 18:15?

⁹ Jesus ear jinoe: “Im elañe jeõm ak jãtõm e naj kõmõnmõn nana ñõn yuk, kwon ilem kennanek e, komro wõt. Elañe e naj eoroñ yuk, kw’ar jebarek jeõm im jãtõm.” Alikar, menin ejjab juõn buñten nee eo ej bedbed ion enoiki. Ej aikwij wõr am menin kamol ak melele eo ekwon bwe kwon maroñ kajerbale ñan jibañ jeim im jatim ñan an lo bwe ear kõmmane juõn bwid im ej aikwij in kajimwe wãwen eo. Emõn jerbale ilo mõkaj, jab kõtlok bwe wãwen eo en oktak im laplok ak kõtlok bwe an lemnak en oktak im mõjno. Im jab meloklok bwe am inebata kake emaroñ kokkure yuk bareinwõt. Ke konono eo ej ikõtam im e make, jenlik jen am konono lok iman ñan ro jet ñan am wini air lemnak kin yuk ak kõmanmõnlok annañũm make. (Jabõn Kennan Ko 12:25; 17:9) Etke? Kin mejenkajjik eo am.

10. Ta eo enaj jibañ kij tõbar eo jeid im jatid?

¹⁰ Jibadbad eo am ej aikwij ñan tõbar jeim im jatim, jab ñan kajeiki, kõttãiki, ak kokkure e. Elañe ear lukkun kõmman bwid, kõtan eo an ibben Jehovah ebed ilo kauwatata. Kwoj lukkun kõnan kejbãrok e einwõt Christian eo jeim im jatim. Am einwõt naj lo tõbrak enaj laplok elañe ilo amiro makelok iamiro im konono kwoj bed wõt im ikõñ, bõprae nan ko renana ak juõn ainikien naruõn. Ilo menin yokwe in kwoj jelmaiki, kememej bwe komro jimor komij jab wãppen, armij jerawiwi. (Dri Room 3:23, 24) Ke ej kile bwe kwoj jab ununuji im bwe kwoj mol in kõnan jibañ, juõn mejelan emaroñ lukkun tõbrak. Kain in, alikar am kebak enaj laptata an jelet meletlet elañe ej etal im alikar bwe komro jimor ej bõk kunan don ilo juõn joñan likjap ak bwe jab melele ear lukkun okran wãwen eo.​—Jabõn Kennan Ko 25:9, 10; 26:20; Jemes 3:5, 6.

11. Meñe juõn ri kõmman bwid ejjab eoroñ kij, ta eo jemaroñ kõmmane?

¹¹ Elañe kwoj jibañ e bwe en lo bwe ear walok juõn bwid im bwe elap, emaroñ emmakit ñan an ukwelok. Ak ilo mol, utiej buru emaroñ kabañbañ. (Jabõn Kennan Ko 16:18; 17:19) Inem meñe ilo jinoin ejjab kamol an bwid im ukwelok, kwo maroñ kõttar mokta jen am konono manlok wõt kin wãwen eo. Jesus ear jab ba bwe ‘ilok juõn wõt alen im kajimwe bwid eo an.’ Ke ej juõn jerawiwi eo kwo maroñ lo mejelan, watõk ñan am bar kebak e ilo jitõbõn Galatians 6:1 (NW) im “iomin mej ko emen.” Kwo maroñ lo tõbrak. (Keidi Jud 22, 23.) Ak, ta elañe kwoj tõmak bwe ear kõmmane juõn jerawiwi im bwe ejañin emmakit ñan uak?

Bõk Jibañ eo Eritto

12, 13. (a) Jesus ear karõk ta buñten nee eo kein karuo ilo jerbal ibben likjap ko? (b) Ta kakabilek eo ejimwe ilo jerbale buñten nee in?

¹² Kwon kar kõnan ke bwe ro jet en mõkaj air bõjrak jen yuk elañe kwar bwid kin juõn bwid elap? Ebin. Ilo wãwen in, Jesus ear kalikar bwe elikin buñten nee eo kein kajuõn, kwoj aikwij jab bõjrak ilo am kajeoñ in tõbar eo jeim im jatim, ñan am kejbãroke bwe en burukuk wõt ibbam im ro jet ilo kabuñ ñan Anij ilo wãwen eo emõn. Jesus ear kalajrak buñten nee eo kein karuo: “Elañe e jamin eoroñ yuk, kwon añinlok juõn ak ruo na ibõm, bwe kin loñin ruo ak jilu dri kennan, nan otemjej ren bin.”

¹³ E ar ba kwon bõk “juõn ak bar ruo lõñlok.” E ar jab ba bwe elikin am bõk buñten nee eo kein kajuõn, kwoj anemkwoj ñan am konono abañ eo ibben elõñ ro jet, ñan kebak traveling overseer eo, ak jeje ñan ro jeim im jatim kin abañ eo. Meñe kwo maroñ tõmak kin bwid eo, ejañin lukkun dedelok kabine. Kwo jamin kar kõnan kajededlok melele eo ebwid bwe en oktak im juõn nan in ruruwe ilo ijo kunam. (Jabõn Kennan Ko 16:28; 18:8) Ak Jesus ear ba bõk juõn ak bar ruo. Etke? Im emaroñ wõn ro?

14. Wõn ro jemaroñ bõk ir ñan buñten nee eo kein karuo?

¹⁴ Kwoj kajeoñ in tõbar eo jeim im jatim ilo am kamol ñan e bwe emwij an kõmmane juõn jerawiwi im kwoj kamakit e ñan an ukwelok bwe en bed ilo ainemõn ibbam im ibben Anij. Ñan kõtõbrak menin, wãwen eo emõn enaj kar elañe “juõn ak ruo” rar ri kamol ñan bwid eo. Bõlen rar bed ke ear walok men eo, ak ewõr ibbeir melele eo ejimwe kin men eo kar kõmmane (ak jab kõmmane) ilo juõn wãwen jerbal. Elañe ejako ri kamol rein, ro kwoj bõktok ir emaroñ wõr air iminene ilo menin konono eo im kin menin remaroñ kabine elañe men eo ear walok emol kar juõn bwid. Bareinwõt, elañe enaj menin aikwij tokelik, remaroñ ri kamol ñan men eo kar ba kake, kabine mol ko kar kwaloki im jibadbad eo kar kõmmane. (Bwinbwin 35:30; Duteronomi 17:6) Inem rejjab baj bed wõt iolaplap, ro rej jitõñlok ñan ir ak, air bed ej ñan jibañ tõbar ro jeimi im jatimi im bar ñan ir jeiir im jatiir.

15. Etke elder ro remaroñ kamol air jibañ elañe jej aikwij bõk buñten nee eo kein karuo?

¹⁵ Kwoj aikwij jab lemnak bwe ro kwoj bõktok ir rej aikwij maan ro rej elder ilo congregation eo. Bõtab, maan ro reritto rej elder bõlen remaroñ bõk kunair ilo kadkadin jitõb ko air. Elder rot rein rej “einwõt juõn jikin tilekek jen kõto, im juõn ken tõrak jen lañ eo, einwõt river in dren ko ilo jikin e mõra, im einwõt lurin juõn deka elap ilo juõn ene in mõk.” (Isa 32:1, 2) Ewõr air iminene ilo kõmmanwa ibben im kajimwe jeiir im jatiir maan im kõrã. Im rikõmman bwid eo ewõr un eo emõn ibben ñan kwalok an liki ilo “menin letok ko ilo maan ro.”c (Dri Epesõs 4:8, 11, 12) Konono kin wãwen eo ibben rein reritto im bõk kunam ilo jar ibbeir emaroñ kõmmane juõn mejatoto ekãl im lo mejelan men eo einwõt ejjab maroñ kar wõr mejelan.​—Keidi Jemes 5:​14, 15.

Juõn Jibadbad eo Eliktata ñan Tõbar Leo

16. Ta buñten nee eo kein kajilu Jesus ear karõke?

¹⁶ Elañe buñten nee eo kein karuo ej likjap ñan namejelan wãwen eo, congregation overseer ro rej aikwij lukkun kobalok ilo buñten nee eo kein kajilu. “Elañe ejjab eoroñ [eo juõn ak ruo], konono ñan congregation eo. Elañe ejjab eoroñ meñe congregation eo, kõtlok bwe e ñan yuk en ejja einwõt juõn armij in ailiñ ko im einwõt juõn ri teltel owõj.” Ta eo menin ej aikwiji?

17, 18. (a) Ta joñok eo ej jibañ kij ñan melele tokjen eo elap ilo ‘konono ñan congregation eo’? (b) Ewi wãwen ad jerbale buñten nee in rainin?

¹⁷ Jejjab melele kake einwõt juõn ialin tel ñan bõkliñtak jerawiwi eo ak bwid eo ilo juõn ien kwalok ak kwelok eo einjuõn an aolepen congregation eo. Jemaroñ beek karõk eo ekwon jen Nan in Anij. Lale ta eo rar kõmmane ilo Israel eo etto ilo juõn wãwen eo kin kiblia, tõr im kadõk: “Elañe iben jabrewõt armij juõn nejin man e ankeke im bõt, eo e jab kõnan bokake ainiken jemen, ak ainiken jinen, im, meñe rej kajeik e, e jab eoroñ ir, inem jemen im jinen ren jibwe, im ãñinlok e ñõn ridto ro an jikin kwelok eo an im ñõn kejem in jikin kwelok eo an, im ren ba ñõn ridto ro an jikin kwelok eo an, ‘Lein nejim e bõt im ankeke, e jab kõnan bokake ainikem; e broklip im dri karek.’ Inem maan ro otemjej in jikin kwelok eo an rej aikwij kade kin dekã.”​—Duteronomi 21:18-21.

¹⁸ Jerawiwi ko an armij aolepen ailiñ eo ear jab roñjaki im ekajeti ak meñe aolepen bwij eo an. Ak, “maan ritto ro” rar kile ir, ir eo rar jerbale wãwen eo einwõt ke rej jutak ilo etan congregation eo. (Keidi Duteronomi 19:16, 17 kin juõn wãwen ‘pris ro im ri ekajet ro ir eo rar jerbale ilo ran ko.’) Ilo wãwenlok wõt rainin, ñe ej menin aikwij ñan bõk buñten nee eo kein kajilu, elder ro, ro rej jutak ilo etan congregation eo, rej jerbale wãwen eo. Mejenkajjik eo air ejja einwõt, ñan tõbar Christian eo jeiir im jatiir elañe emaroñ. Rej kalikar menin ikijen air kwalok emõn,, jab kalijeklok ilo wãwen eo ak jeb.

19. Ta eo elder ro renaj jitõñe ñan roñjake wãwen eo rej kate ir ñan air kõmmane?

¹⁹ Renaj kate ir ñan etale mol ko im roñjake ri kamol ro rej aikwiji ir ñan ejaake in lale elañe jerawiwi eo emol rar kõmmane (ak ej etal wõt im kõmman). Rej kõnan kejbãrok congregation eo jen nana im ñan likit wõt bwe en diojlok jitõbõn lal in. (1 Dri Korint 2:12; 5:7) Ilo an errã ibben kadkad in jitõb ko, renaj kate ir ñan “drebij wõt nan emol, einwõt ar katakin e, bwe kin nan in katak ejime, en maroñ in kowe im koukwelok ro rej karkar ajaj.” (Taitõs 1:9) Kejatdikdik bwe ri kõmman bwid eo ejamin einwõt ri Israel ro ri kanan eo an Jehovah ear jeje kake ir: “I ar kir, ak kom ar jab uak; I ar konono, ak kom ar jab roñjake; im kom ar etal wõt im kõmmane men eo enana ilo meja, im men eo ejelok aõ mõnõnõ kake kom ar kãlete.”​—Isaiah 65:12, NW.

20. Ta eo Jesus ear ba ej aikwij walok elañe ri jerawiwi eo ej makoko in eoroñe im ukwelok?

²⁰ Bõtab, ilo jejjo wãwen ko eierlok wõt, ri jerawiwi eo ej kalikar ejja lemnak eo wõt. Elañe eindein, ialin tel eo an Jesus ealikar: “Kwon watõk e ñan yuk einwõt juõn ri ailiñ ko im einwõt juõn ri tel owõj.” Iroij eo ear jab ba ejjab kanimarmij ak juõn kõnan ñan jabdewõt menin kõmmetak. Ak, ejelok lakabwokbwok kin nan in tel eo an Paul ñan kadiojlok jen congregation eo ri jerawiwi ro rejjab ukwelok. (1 Dri Korint 5:11-13) Meñe menin, ak emaroñ etal em walok tokjen ilo jibadbad eo ñan tõbar ri jerawiwi eo.

21. Ta men eo emaroñ bed wõt im bellok ñan armij eo emwij kadiojlok jen congregation eo?

²¹ Jemaroñ lo menin elap tokjen jen parable eo an Jesus kin nejin eo ejerwan. Einwõt kar wanjoñok kake, elikin juõn ien in an kar jokwe ilikin yokwe in ibben don eo ilo mweo imõn jemen, ri jerawiwi in ear etal im “ieñaktok an.” (Luk 15:11-18) Paul ear kwalok ñan Timothy bwe jet ri jerawiwi renaj etal em ukwelok im “jeblak ñan kalmenlokjen ko air rejimwe jen aujir eo an devil.” (2 Timothy 2:24-26, NW) Jenaj kar lukkun kejatdikdik bwe jabdewõt eo ej jerawiwi im jab ukwelok im rej aikwij kadiojlok jen congregation eo renaj eñjake air jebwãbwe​—ilo men kein jimor kowãppen eo an Anij im ibben don eo eokmãnãn im air tel air ibben Christian ro retiljek​—inem ieñaktok eo air kin kalmenlokjen ko air rejimwe.

22. Ewi wãwen ad maroñ tõbar eo jeid im jatid?

²² Jesus ear jab watõk armij in ailiñ ko im ri tel owõj ro einwõt ellãlok jen air maroñ bar jeblaktok tokelik. Juõn eo tokelik, Matthew Levi, ear ukwelok, ilo ettã buru ‘lor Jesus,’ im kar kãlete einwõt juõn ri jilek. (Mark 2:15; Luk 15:1) Tokjen menin, elañe juõn ri jerawiwi ej “jab eoroñ meñe congregation eo” im ej diojlok jene, jemaroñ kõttar in lale elañe e, tokelik, enaj ukwelok im kõmman ial ko rejimwe ñan buñten neen. Ñe ej kõmman eindein im ej bar juõn uan congregation eo, inem jenaj mõnõnõ in tõbar in jeid im jatid ilo an bar jeblaktok ñan bwij eo an kabuñ eo emol.

[Kamelele ko itulal]

Kwoj Kememej Ke?

◻ Moktata, jerawiwi rot eo Matu 18:15-​17 ej jerbal ñane?

◻ Ta eo jej aikwij kememej elañe jej aikwij bõk buñten nee eo kein kajuõn?

◻ Wõn eo emaroñ jibañ elañe jej aikwij etal ñan buñten nee eo kein karuo?

◻ Wõn ro rekoba ilo bõk buñten nee eo kein kajilu, im ewi wãwen ad maroñ tõbar eo jeid im jatid?

[Pija eo ilo peij 14]

Ri Jew ro rar katoanlok ri tel owõj ro. Matthew ear oktaklok jen ial ko an im lor Jesus

[Pija eo ilo peij 16]

Ekkã ad maroñ lo mejelan juõn wãwen “iomin mej ko emen”