Kwoj Kajejjet Ke Kitien Aolepen Eddo Eo Am Ñan Anij?
“Bwe Anij e naj bõktok jerbal otemjej ilo ekajet, im jabrewõt eo emwij noje, elañe emõn ak nana.”—EKKLISIASTIS 12:14.
1. Ta men in letok ko Jehovah ear litoki ñan armij ro an?
JEHOVAH ej rejetak ro rej kememej e einwõt Ri Kõmanmõn eo air Elap. Nan eo An emwij kakõrmole kar lelok ñan ir jelãlokjen eo rej aikwiji ñan kabuñburuen. Jitõb Kwojarjar eo an Anij ej tel ir ñan kõmanmõn ankil eo ekwojarjar im “jebar leen ilo jerbal ko remõn otemjej.” (Dri Kolosse 1:9, 10) Bareinwõt, Jehovah ej lelok ekan ko lor jitõb im nan in tel eo ekwojarjar ikijen “ri korijer eo e tiljek im meletlet.” (Matu 24:45-47) Inem, ilo elõñ wãwen, armij ro an Anij rej bõk jerammõn jen lañ ñe rej karejar ñan Jehovah im bõk jerbal in kwalok nan kin news eo emõn kin Ailiñ eo.—Mark 13:10.
2. Ikijen jerbal ñan Jehovah, ta kajitõk ko rej walok?
2 Christian ro remol rej mõnõnõ in boub wõt ilo jerbal in ekwojarjar ñan Jehovah. Ak, jet iair remaroñ ebwer im lemnak bwe ejelok tokjen. Ñan wanjoñok, jet ien, Christian ro emwij air wujleplok remaroñ bere bwe ewõr tokjen jerbal ko air. Ñe juõn bõran family ej kalmenlokjen kin katak ibben family eo an im kõmman ko jet, kajitõk kein remaroñ walok: ‘Jehovah ej lukkun mõnõnõ ke kin ta eo jej kõmmane? Jej kajejjet ke kitien aolep jerbal ko ad ñan Anij? Nan ko remeletlet an ri kaki eo remaroñ jibañ kij ñan uake kajitõk kein.
Men Otemjej Rej Men Bata Ke?
3. Ekkar ñan Ekklisiastis 12:8, ta men bata eo elaptata?
3 Jet armij remaroñ ba bwe nan ko an ri meletlet eo rejjab kanuij rejañ jabdewõt armij—jodikdik ak ritto ro. “Men bata otem bata, Dri Kaki eo ej ba; men otemjej rej men bata.” (Ekklisiastis 12:8) Emol, ej juõn men ekanuij nana ñan kajekdon Ri Kõmanmõn eo Elap ilo ien emõn dred, ñan rittolok im jab jerbal ñan e, im ñan kwalok wõt am rittolok einwõt ej men in jibadbad eo wõt. Ñan kain armij rot in, aolep men kar men bata, ak ejelok tokjeir, meñe mweie im buñbuñ etan ñe emij ilo lal in eo ej bed ilo kajur eo an ri nana eo, Satan Devil eo.—1 Jon 5:19.
4. Etke jemaroñ ba bwe jab men ko aolep rej men bata?
4 Jab men otemjej ej men bata ñan ro rej korlok men ko ilañ einwõt ri karejar ro retiljek an Jehovah. (Matu 6:19, 20) Rej boub wõt ilo jerbal eo ewõr tokjen ñan Iroij eo, im kain jerbal rot in ewõr tokjen ñan indio. (1 Dri Korint 15:58) Ak elañe jej ri Christian ro emwij ad wujleplok, jej boub wõt ke ilo jerbal eo Anij ear letok ñan kij ilo ran kein eliktata? (2 Timote 3:1) Ak emwij ke ad reel ñan wãwen mour eo einlok wõt ñan ro ri turid? Rej kobalok ibben elõñ kabuñ ko im remaroñ kajur ilo tõmak eo air, ekkeini air jar ilo imõn jar ko air im kejbãrok kein ko air ilo kijejeto. Bõtab, rejjab ri kwalok ro kin nan in Ailiñ eo. Ejelok jelãlokjen eo ejejjet ibbeir bwe ran kein rej “ien jemlokin” im ejelok jitõb in ekaiuriur kin ran kein ad.—Daniel 12:4.
5. Elañe jibadbad ko bajjek an mour rar erom men ko raoroktata ilo mour eo ad, ta eo jej aikwij kõmmane?
5 Jesus Christ ear ba kin ran kein renana: “Einwõt ran ko an Noa, e naj ein drein ilo ran ko mokta jen ibij liplip eo, r’ar mõña im irak, r’ar belele im lelok bwe ren belele, ñõn ran eo Noa e ar dreloñ iloan wa eo, im re jaje ñõn ter eo ibij liplip ej itok, im bõklok ir otemjej; e naj eindrein an Nejin armij itok.” (Matu 24:37-39) Ilo joñan eo emõn, ejjab nana mõña im idak, im mour in belele ej juõn karõk jen Anij. (Jenesis 2:20-24) Ak, elañe jej kile bwe jibadbad ko an mour rej men ko moktata ilo mour eo ad, etke jejjab jar kin men in? Jehovah enaj jibañ kij ñan likit mokta men ko an Ailiñ eo, kõmman men eo ejimwe, im kajejjet kitien eddo eo ad ñan e.—Matu 6:33; Dri Rom 12:12; 2 Dri Korint 13:7.
Wujleplok im Eddo eo Ad ñan Anij
6. Ilo wãwen et eo eaorõk jet armij ro emwij air baptais rar likjap ilo air kajejjet kitien eddo eo air ñan Anij?
6 Jet ri Christian ro emwij air baptais rej aikwij kate wõt ilo jar kinke rejjab mour ekkar ñan eddo in karejar ko rar beek in bõki ke rar wujleplok air mour ñan Anij. Kajjojo yiõ, elõñlok jen 300,000 armij ro rar baptais ilo elõñ yiõ ko kiõ, ak ñe jej kobaik aolep oran Ri Kennan ro an Jehovah rar jab orlok wõt. Jet ro rar erom ri kwalok ro an Ailiñ eo rar bõjrak ilo air kwalok nan kin news eo emõn. Ak, ej aikwij wõr juõn joñan tõbrak ibben kajjojo ri kwalok ilo jerbal in kwalok nan mokta jen air maroñ baptais. Inem rej melele kin jerbal eo Jesus ear lelok ñan aolep ri kalor ro an: “Komin ilok . . . im kõmõn dri ailiñ ko otemjej bwe ren dri kalora, im baptais ir ilo etan Jema im Nejin im Jitõb Kwojarjar im katakin ir bwe ren bokake nan ko otemjej I ar jiroñ kom.” (Matu 28:19, 20) Elañe unin an dik jerbal eo air ejjab kinke rej nañinmij ak ewõr abañ ko jet me ejelok air maroñ in kamadmõdi, ri kwalok ro kajjojo emwij air baptais im rejjab niknik einwõt Ri Kennan ro an Anij im Christ rejjab mour ekkar ñan aolepen eddo eo air iman mejen Ri Kõmanmõn eo Elap.—Aiseia 43:10-12.
7. Etke jej aikwij keini ad kwelok ibben don ilo kabuñ?
7 Israel eo etto kar juõn ailiñ emwij wujleplok ñan Anij, im iumin bujen Kien eo, armij ro an ear wõr eddo ko air ñan Jehovah. Ñan wanjoñok, aolep maan ro rar aikwij bed ilo kwojkwoj ko jilu ilo kajjojo yiõ, im elañe juõn emaan ear jab bed ie ilo jelã kake im kejbãrok kwojkwoj in Kijone eo rar “bukwelok” e ilo mij. (Bwinbwin 9:13; Livitikõs 23:1-43; Duteronomi 16:16) Ñan kajejjet kitien eddo eo air ñan Anij einwõt armij ro emwij air wujleplok, ri Israel ro rar aikwij kwelok ibben don ilo kabuñ. (Duteronomi 31:10-13) Ejelok nan ilo Kien eo ear ba, ‘Kwon kõmman men in ilo mour eo am elañe ewõr am ien.’ Ñan ro emwij air wujleplok ñan Jehovah kiõ, kien in ej kortokjen nan ko an Paul: “Jen lale dron, im kõkãtok dron ñõn yokwe im jerbal ko remõn im jen jab likit ar kwelok im jar, einwõt mõnit an jet, a jen kowe dron im kalaplok ar kõmõn men bwe jej lo an ran eo ebaktok.” (Dri Hibru 10:24, 25) Aet, ekkeini ad kwelok ibben ri tõmak ro mõttad ej mõttan eddo eo an juõn Christian emwij wujleplok ñan Anij.
Lukkun Etale Tokjen Bebe Ko Am!
8. Etke juõn jodikdik emwij wujleplok an mour ej aikwij kalmenlokjen ilo jar kin jerbal eo an ekwojarjar?
8 Bõlen kwoj juõn eo emõn ded im emwij an wujleplok an mour ñan Jehovah. Jerammõn ko relap renaj am elañe kwoj likit mokta men ko an Ailiñ eo ilo mour eo am. (Jabõn Kennan Ko 10:22) Ilo jar im karõklok iman ilo jimwe, kwomaroñ kajerbal yiõ ko ñe emõn dettan ilo juõn ian jerbal ko rej full-time ñan Anij—juõn wãwen emõn ñan kwalok bwe kwoj kememej wõt Ri Kõmanmõn eo am Elap. Elañe jab, inem men ko ilo kanniek renaj bõk enañin aolepen ien ko am im kwonaj boub kaki. Einwõt armij ro rewan, kwomaroñ belele ilo ien emõn dettam im kõmman elap am muri kin men ko ilo kanniek. Juõn jerbal emweie emaroñ bõk elap am ien im kajur. Elañe ewõr nejim, kwonaj aikwij bõk eddon family eo iumin elõñ yiõ ko. (1 Timote 5:8) Bõlen kwojañin kar meloklok Ri Kõmanmõn eo am Elap, ak emenin meletlet ñan kile bwe am naj ak jab karõklok iman am ien ñe emõn dettam, enaj kalikar ta ial in mour eo am ñe kwoj rittolok. Ilo yiõ ko tokelik, kwomaroñ reiliklok im lemnak bwe emõn elañe kwar kajerbal ien ko ke kwar dik ñan kalaplok am jerbal ilo jerbal eo ekwojarjar ñan Ri Kõmanmõn eo ad Elap. Etke kwojjab likit kejatdikdik ko am ilo jar kiõ, inem kwonaj lo tõbrak ilo am bõk kunam ilo jerbal eo ekwojarjar ñan Jehovah ilo yiõ ko emõn dettam?
9. Ta eo emaroñ walok ñan juõn eo ear rittolok im kar bõk juõn jerbal eddo mokta ilo congregation eo?
9 Kalmenlokjen kin bar ien kein—ien ko an juõn emaan ear shepherde “bwijin Anij.” (1 Piter 5:2, 3) Kin juõn un, ear to jen jerbal ko an. Emol, kiõ rittolok, im emaroñ binlok an wõnmanlok ilo jerbal eo an Anij. Ak emaroñ ke bar jibadõk jerbal ko rekwojarjar? Elap jerammõn ko leo emaroñ bõklok ñan ro jet elañe ear kalaplok an jerbal ilo congregation eo! Im ejelok jabdewõt ej mour kin emake, ro jeran im jitenburu ro an renaj lañliñ elañe ej kalaplok jerbal eo an, ñan kaibujuij Anij. (Dri Rom 14:7, 8) Elaptata, Jehovah ejamin meloklok men eo jabdewõt eo ej kõmmane ilo jerbal eo an. (Dri Hibru 6:10-12) Inem, ta eo emaroñ jibañ kij kememej Ri Kõmanmõn eo ad Elap?
Men in Jibañ Ko ñan Kememej Ri Kõmanmõn eo Ad Elap
10. Etke ri kaki eo ear bed ilo juõn wãwen emõn ñan lelok nan in jiroñ ko ñan kememej Ri Kõmanmõn eo ad Elap?
10 Ri kaki eo ear bed ilo ien eo emõn ñan lelok nan in jiroñ ko ñan ad kememej Ri Kõmanmõn eo ad Elap. Jehovah ear uake jar ko an ilo buruen ilo an lelok meletlet eo elap. (1 Kiñ Ro 3:6-12) Solomon ear lukkun etale aolep wãwen mour ko an armij ro. Bareinwõt, ilo kakõrmol eo ekwojarjar ear jeje men ko ear loi bwe armij ro jet ren bõk tokjen jen i. Ear je: “Kin an Dri Kaki meletlet, e ar katakin wõt armij ro jelalokjen, aet, e ar kalomõnlokjen im kabukot im kilajrõk elõñ jabõn kennan. Dri Kaki eo e ar bukot bwe en lo nan ko remõn, im ko emwij jeje jime, aet, nan ko remol wõt.”—Ekklisiastis 12:9, 10.
11. Etke jej aikwij bõk nan in kakabilek eo emeletlet an Solomon?
11 Ukok eo Greek Septuagint ear ukõt nan kein einwõt in: “Bareinwõt, kinke ri kwalok eo ear meletlet, kinke ear katakin armij kin meletlet; bwe lojilñin armij ren eoroñ nan ko remõn jen parable ko, ri kwalok eo ear niknik ilo an kabukõt nan ko remõn im jimwe—nan ko remol.” (The Septuagint Bible, Charles Thomson ear ukõti) Solomon ear kate wõt ñan tõbar buruen ri konono ro an kin nan ko remõn im katak ko rekaitoktoklimo im ewõr tokjeir. Kinke nan ko an rej kakõrmol ikijen jitõb kwojarjar ilo Bible eo, ilo ejelok bere jemaroñ bõk etale ko an im nan in kakabilek ko an.—2 Timote 3:16, 17.
12. Ilo nan ko am make, ewi wãwen am naj kwalok ta eo Solomon ear ba kake ilo Ekklisiastis 12:11, 12?
12 Meñe kar ejelok kein jeje ko einwõt ilo ran kein, ekar lõñ book ko ilo ran ko an Solomon. En kar ewi wãwen lemnak ko an armij kin book kein? Ear ba: “Nan ko an ro re meletlet rej einwõt ken kaje ko einwõt drila ko re bin nan ko an ro rej iroij in jar ko, emwij lelok ñõn juõn seperd. Im bar juõn, nejiõ, emõn kowe yuk, ejelok jemlokõn air kõmõn elõñ buk im katak elap ej men in kamõk kõniek.”—Ekklisiastis 12:11, 12.
13. Ewi wãwen an kar nan ko an ro remeletlet ilo jitõb maroñ einwõt kein kaje ko, im wõn ro rej einwõt “drila ko re bin”?
13 Nan ko an ro remeletlet ilo jitõb rar einwõt kein kaje ko. Ewi wãwen? Rej kajeik ak kajimwe ri konono ro ak ri roñjake ro ñan wõnmanlok ekkar ñan nan ko remeletlet ko rej konono ak eoroñi. Bareinwõt, ro rej boub wõt kin “nan ko,” ak nan ko remeletlet im wõr tokjeir, rej einwõt “drile ko,” ak ko rebin. Remaroñ eindein kinke nan ko remõn an armij rein rej kalikar meletlet eo an Jehovah im remaroñ kabin im rejetak ri konono ak ri roñjake ro. Elañe kwoj juõn jemen ak jinen eo ej mijak-Anij, kwojjab kõnan kate wõt yuk ñan joñan eo emaat ñan likit ilo lolãtãt im buruen ajiri eo nejim ke?—Duteronomi 6:4-9.
14. (a) Ñan kain book rot ko ejelok tokjen ad jolok “elap” ien kaki? (b) Ñan kain book rot ko jej aikwij madjaki, im etke?
14 Bõtab, etke Solomon ear men in kin book ko? Eokwe, ilo keidi ibben Nan eo an Jehovah, aolep book ko an lal in reobrak kin lemnak ko an armij. Enañin aolep lemnak kein rej kwalok lemnak eo an Satan Devil eo. (2 Dri Korint 4:4) Kin men in, “lap” ien ñan katak kin men kein enaj letok jidik wõt tokjen. Emol, elap katak rot kein remaroñ kajorrãn mour in jitõb eo ad. Einwõt Solomon, jej aikwij kalmenlokjen kin ta eo Nan in Anij ej ba kin mour. Men in enaj kakajurlok tõmak eo ad im karuaklok kij ñan Jehovah. Jolok elap ien ñan katak book ko jet remaroñ kamõk kij. Elaptata ñe katak ko rej bedbed lemnak ko an lal rej jumae meletlet eo ekwojarjar rej nana im kokkure tõmak eo kin Anij im karõk ko an. Inem, jen kememej bwe jeje ko elap tokjeir ilo ran ko an Solomon im ad rej jeje ko rej kalikar meletlet eo an “juõn shepherd,” Jehovah Anij. Ear letok 66 book ko an Jeje ko Rekwojarjar, im jej aikwij madjaki jeje kein. Bible eo im book ko an ‘ri karejar eo etiljek’ elap tokjeir rej kamaroñ kij ñan bõk “jelalokjen kin Anij.”—Jabõn Kennan Ko 2:1-6.
Eddo Eo Ad Aolep ñan Anij
15. (a) Ewi wãwen am maroñ kamelele kin nan ko an Solomon kin “aolepen kõmõn emõn an armij ro”? (b) Ta eo jej aikwij kõmmane ñan kajejjet kitien eddo eo ad ñan Anij?
15 Ilo an kajemlok etale eo an, Dri Kaki eo, Solomon, ej ba: “Eñin tokjen men eo, emwij roñjake aolepen, kwon mijõk Anij im bokake kein ko An bwe eñin aolepen kõmõn emõn an armij ro. Bwe Anij e naj bõktok jerbal otemjej ilo ekajet, im jabrewõt eo emwij noje, elañe emõn ak nana.” (Ekklisiastis 12:13,14) Ilo ad mijak ilo jimwe ak kautiej, Ri Kõmanmõn eo ad Elap enaj kejbãrok kij, im ilo kejatdikdik family ko ad, jen ad jibadõk juõn ial in mour enana eo emaroñ kabañ kij im jitenburu ro ad. Mijak eo ejimwe kin Anij ej erreo im ej jinoin meletlet im jelalokjen. (Sam Ko 19:9; Jabõn Kennan Ko 1:7) Elañe ewõr lolokjen ibbed eo ej bedbed ion Nan in Anij emwij kakõrmole im jerbali nan in kakabilek ko ilo aolepen mour eo ad, jenaj kajejjet kitien “aolepen kõmõn” ko remõn ñan Anij. Jaab, ejjab juõn lajrak in men ko jej aikwij kõmmani. Jen men in, men eo jej aikwij kõmmane ej bwe jen reilok ñan Jeje ko Rekwojarjar ñe jej namejelan abañ in mour ko im kõmman men ko ekkar ñan wãwen Anij.
16. Ikijen ekajet eo, ta eo Jehovah enaj kõmmane?
16 Jej aikwij kememej bwe ejelok juõn men ej nojak jen Ri Kõmanmõn eo ad Elap. (Jabõn Kennan Ko 15:3) Enaj “bõklok jerbal otemjej ilo ekajet.” Aet, Eo Eutiejtata enaj ekajete men otemjej, ekoba ro rej nojak jen mejen armij. Ad jelã kin men kein remaroñ kamakit kij ñan bokake kien ko an Anij. Ak men eo elaptata ej kamakit kij ej yokwe kin Jemed ilañ, bwe ri jilek Jon ear je: “Bwe eñin yokwe Anij, bwe jen kejbãrok kein ko An im kein ko An re jab erro.” (1 Jon 5:3) Im kinke kien ko an Anij rej kowõnmanlok mour emõn ñan indio, emol bwe men in ejjab juõn men ejimwe wõt ak ej juõn men emeletlet ñan bokake. Men in ejjab eddo ñan ro rej yokwe Ri Kõmanmõn eo Elap. Rekõnan kajejjet kitien eddo eo air ñan e.
Kajejjet Kitien Eddo Eo Am Aolep
17. Ta eo jenaj kõmmane elañe jekõnan kajejjet kitien eddo eo ad ñan Anij?
17 Elañe jej meletlet im lukkun kõnan kajejjet kitien aolepen eddo eo ad ñan Anij, ijellokin ad kejbãrok kien ko an, jenaj mijak ilo jimwe im jab kaburomõj e. Emol, “mijõk Anij jinoin meletlet,” im ej “emõn” ibben ro rej bokake kien ko an. (Sam 111:10; Jabõn Kennan Ko 1:7) Inem jen meletlet im bokake Jehovah ilo men otemjej. Ej juõn men eaorõk kiõ, bwe King eo Jesus Christ ej bed, im ran in ekajet eo an einwõt Ri Ekajet eo Anij ear jitõñe ej ebak.—Matu 24:3; 25:31, 32.
18. Ta eo enaj walok ñan kij elañe jej kajejjet kitien aolepen eddo eo ad ñan Jehovah Anij?
18 Eo ekwojarjar ej etale kij kajjojo kiõ. Jej meletlet ke ilo jitõb, ak emwij ad kõtlok bwe kareelel ko an lal in ren kamõjnoik kõtan eo an ibben Anij? (1 Dri Korint 2:10-16; 1 Jon 2:15-17) Elañe kij jodikdik ro ak ritto ro, jej aikwij kamaat ad maroñ ñan kabuñburuen Ri Kõmanmõn eo ad Elap. Elañe jej bokake Jehovah im kejbãrok kien ko an, jenaj karmijeteik men bata ko an lal in eo ej jakolok. Inem jemaroñ kijoror wõt kin kejatdikdik eo ñan mour indio ilo jukjuk im bed eo ekãl eo emwij an Anij kallimur kake. (2 Piter 3:13) Rej kejatdikdik ko relap ñan aolep ro rej kajejjet kitien aolepen eddo eo air ñan Anij!
Ewi Wãwen Kwonaj Kar Uak?
◻ Etke kwonaj kar ba bwe jab aolep men rej men bata?
◻ Etke juõn Christian jodikdik en kalmenlokjen ilo jar kin jerbal eo an ekwojarjar?
◻ Ñan kain book rot ko naj ejelok tokjen jolok “elap” ien kaki?
◻ Ta in “aolepen kõmõn emõn an armij ro?
[Pija eo ilo peij 14]
Jab men otemjej ej men bata ñan ro rej karejar ñan Jehovah
[Pija eo ilo peij 17]
Jab einwõt elõñ book ko an lal in, Nan in Anij ej juõn men ekaemololo im wõr tokjen