Kajur eo ikijen Jar
Al eo ej tuloklok ion jikin kwelok in Nahor ilo Middle East. Juõn emaan ri Syria eo etan Eliezer ej tõbraklok ibben joñoul camel ko iturin aebõjlõl eo tunabõjen jikin kwelok eo. Meñe ear mõk im mãro, elap an Eliezer itoklimo kin aikwij ko an ro jet. Ear itok jen juõn ene ruwamaejet ñan kabukõt juõn jiroñ bwe en belek likao eo nejin master eo an. Ijellokin aikwij in, ej aikwij kabukõt jiroñ eo ibwiljin ro nukin master eo an bareinwõt. Ewi wãwen enaj kar kõtõbrak jerbal in ebin?
ELIEZER ej tõmak ilo kajur eo ikijen jar. Ilo jar eo ekabwilõñlõñ, im erreo, ej kajitõk ilo ettã buruen: “O Jeova, Anij an karo eo aõ, Ebream, ij akwelap ñõn Yuk bwe Kwon kejerammõn iõ ranin im kwalok joij ñõn Ebream aõ karo. Lo, ij jutõk iturin unin dren eo im limaro nejin armij ro in jikin kwelok eo rej droijtok in itõk im en walok men in, bwe jiroñ eo I naj ba ñõn e, Ij akwelap ñõn yuk, kwon drorlõl am ken itõk, bwe in irak; im enaj ba, kwon irak im bareinwõt I naj kairak kamel ko am; eñin en lio Kwar kãlet ñõn korijerõm Aisak im kin men in I naj jela bwe Kwar kwalok joij ñon aõ karo.”—Jenesis 24:12-14.
Liki eo an Eliezer ilo kajur eo ikijen jar ear jab jettokjen. Ilo bwilõñ, jiroñ eo moktata ej itok ñan aebõjlõl eo ej jibwin jatin Abraham! Etan jiroñ in ej Rebekah, im ejañin belele, erreo ilo mour, im deeo. Ekabwilõñlõñ bwe, ejjab kairak Eliezer wõt, ak ej kairak aolep camel ko nejin bareinwõt. Tokelik, elikin an bebe ibben family eo, Rebekah ej errã ilo mõnõnõ bwe en jeblak ibben Eliezer lok ñan ene eo etolok bwe en erom lio ibben Isaac eo nejin Abraham. Men in ear juõn uak elap an alikar im kabwilõñlõñ ñan jar eo an Eliezer ilo ien eo ke Anij ear walok jejjo wõt ien im lelok jibañ ilo wãwen ko rekabwilõñlõñ!
Elap ad maroñ katak jen jar eo an Eliezer. Ear kwalok ilo juõn joñan elap kin tõmak eo an, ettã buruen, im lemnak eo an ejelok kibbon ie kin aikwij ko an ro jet. Bareinwõt jar eo an Eliezer ear kwalok wãwen an kõttãik wõt ñan wãwen eo Jehovah ej jerbal ibben armij ro. Ejelok bere ear jelã kin kõtan eo an Anij ebak ñan Abraham im kallimur eo An bwe jerammõn ko ilo ran ko rej itok renaj itok ion armij otemjej ikijen Abraham. (Jenesis 12:3) Inem, Eliezer ear jinoe jar eo an kin nan kein: “Jeova, Anij an karo eo aõ.”
Jesus Christ kar jen bwijin Abraham eo me armij otemjej renaj bõk jerammõn jen e. (Jenesis 22:18) Elañe jekõnan bwe en wõr uak ñan jar ko ad rainin, jej aikwij kile ilo ettã buru wãwen an Anij jerbal ibben armij ro ikijen Nejin. Jesus Christ ear ba: “Elañe komij ber ilo Ña, im nan ko Aõ rej ber ilo kom, komin kajitõk jabrewõt eo kom kõnan im naj kõmõne ñõn kom.”—Jon 15:7.
Juõn ri kaloran Christ eo ear eñjake mol eo an nan kein an Jesus kar ri jilek Paul. Tõmak eo an ilo jar ear lo tokjen ie. Ear rejañ ri Christian ro mõttan bwe ren bõklok aolep inebata ko air ñan Anij ilo jar im ba: “I maroñ in kõmõn men otemjej ilo Eo ej kakajur iõ.” (Dri Pilippai 4:6, 7, 13) Men in ej melelen ke bwe Anij ear uake aolepen jar ko an? Jen lale.
Ejjab Uake Aolep Jar Ko
Ilo jerbal eo an ejelok kibbon, Paul ear eñtan jen men eo ear naetan “kãliklik ilo kõniekin.” (2 Dri Korint 12:7) Eñtan in emaroñ kar inebata ilo lemnak im eñjake eo me ri jumae ro im “ro jimjãn jimjãten riõp” rar kõmmane. (2 Dri Korint 11:26; Dri Galetia 2:4) Ak emaroñ kar eñtan kin nañinmij eo kin mejen. (Dri Galetia 4:15) Jekdon ta abañ eo ibben, “kãliklik in kõniekin” ear kamõjnoik Paul. “I ar akwelap ñõn Iroij kin men in alen jilu, bwe en joko jen iõ,” ear je. Bõtab, ear jab uake kajitõk eo an Paul. Ear kameleleik ñan Paul bwe tokjen ko ilo jitõb emwij an kar bõki jen Anij, einwõt kajur ñan kijenmij ilo melejoñ ko, ear bwe ñan e. Bareinwõt, Anij ear ba: “Aõ kajur e wãppenlok ilo mõjino.”—2 Dri Korint 12:8, 9.
Ta eo jej katak jen wanjoñok ko an Eliezer im Paul? Emol bwe Jehovah Anij ej roñjake jar ko an ro rej bukõte ilo ettã burueir. Ak ejjab melelen bwe enaj lelok men ko rej kajitõk kaki kinke Anij ej lemnakelok iman kin men ko bebe eo an enaj jeleti ilo ien ko tokelik. Elaplok an jelã jen kij kin ta men ko ad remõntata. Elaptata, ilo ien otemjej ej jerbal ekkar ñan karõk eo an ilo Bible eo.
Juõn Ien Kejmour ilo Jitõb
Anij ej kallimur bwe enaj kejmour armij ro jen nañinmij ko otemjej ilo kanniek, lemnak, im eñjake ilo Ien Iroij eo an Nejin ion lal iumin Juõn Thousand Yiõ ko. (Reveles̃õn 20:1-3; 21:3-5) Ri Christian ro emol burueir rej kijoror wõt kin ran in iman emwij an kallimur kake, im tõmak kin aolepen burueir bwe kajur eo an Anij enaj kajejjet kitien men in. Meñe rejjab kõtmene bwe renaj bõk kejmour kein rekabwilõñlõñ kiõ wõt, rej jar ñan Anij bwe en kainemõn im kakajur ir ñan kijenmij ilo melejoñ ko. (Sam Ko 55:22) Ñe renaj nañinmij, remaroñ jar ñan Anij ñan tel ir ñan kabukõt wãwen eo emõntata ñan kejmoure nañinmij eo air ekkar joñan wõnãir.
Jet dolul in kabuñ ko rej rejañ ri nañinmij ro ñan jar bwe ren ejmour jen nañinmij eo air kiõ wõt, im rej jitõñlok ñan ien ko mokta Jesus im ri jilek ro an rar kejmoure armij. Ak ekar wõr unin air kõmman kain kejmour rot kein rekabwilõñlõñ. Rar kamol bwe Jesus Christ kar Messiah eo emol im kwalok bwe Anij ear ukõt kajerammõn eo an jen ailiñ in ri Jew ro ñan congregation eo ekãl an Christian. Ilo ien eo, rar aikwij men in letok ko rekabwilõñlõñ ñan kakajur tõmak eo an congregation in Christian eo ekãl ej kab jutak. Ke congregation in ekãl ear kajurlok, im rittolok ilo jitõb, men in letok ko rekabwilõñlõñ “e naj joko.”—1 Dri Korint 13:8, 11.
Ilo ien in eaorõk, Jehovah Anij ej tel ri kabuñ ro an ilo juõn jerbal eaorõklok ñan kejmour ilo jitõb. Ke ewõr wõt ien, armij ro rej lukkun aikwij uake kejelã in: “Komin bukot Jeova ke kwo maroñ in lo E; komin kir ñõn e ke Ej ebak: dri jerawiwi en illok jen ial eo an, im dri jab wãnik jen lemnok ko an; inem en jeblak ñõn iben Jeova, im E naj tiriamo kake e; im ñõn iben aruij Anij, bwe e naj kanuij wujlep in jolok bwir ko an.”—Aiseia 55:6, 7.
Kejmourur rot in ilo jitõb ñan ri jerawiwi ro rej ukwelok ej tõbrak kin jerbal in kwalok nan kin news eo emõn kin Ailiñ eo an Anij. (Matu 24:14) Ilo an kakajur ri karejar ro an ñan kamwijlok jerbal in lomoren armij, Jehovah Anij ej jibañ elõñ million armij ro jen ailiñ otemjej bwe ren ukwelok jen bwid ko air im bõk juõn kõtan emõn ibben mokta jen jemlokin jukjuk im bed in enana. Aolep ro emol burueir im rej jar kin kejmour eo ilo jitõb im aolep ro rej jar ñan bõk jibañ ñan kõmman jerbal in kejmourur in emol renaj lo uak ñan jar ko air.
[Etan eo ear kõmman pija ilo page 3]
Eliezer im Rebekah/The Doré Bible Illustrations/Dover Publications