Wãwen An Jehovah Tel Kij

“Tel iõ ilo ial e alikar.”​—SAM KO 27:11.

1, 2. (a) Ewi wãwen an Jehovah tel armij ro an rainin? (b) Ta eo ekoba ilo bõk aolepen tokjen kwelok ko?

JEHOVAH ej Unjen meram im mol eo, einwõt ad kar katak ilo katak eo lok iman. Nan eo an ej kameram ial eo ad ke jej etetal ilo eo ealikar. Jehovah ej tel kij ikijen an katakin kij ilo ial ko an. (Sam Ko 119:105) Einwõt ri jeje Sam in etto eo, jej kamolol ilo ad uak ñan tel ko an Anij im jar: “Kwon katakin iõ kin ial eo am, O Jeova, im tel iõ ilo ial e alikar.”​—Sam Ko 27:11.

² Juõn wãwen eo Jehovah ej katakin kij rainin ej ikijen kwelok ko an Christian. Jej bõk ke aolepen tokjen menin letok in yokwe in ikijen (1) ekkeini bed ilo kwelok, (2) lukkun roñjake program eo, im (3) bojak ilo bõk kunad ilo mõttan ko rejelet armij ro rej kobatok in roñjake? Bareinwõt, jej uak ke ilo kamolol ñe jej bõk lemnak ko me renaj jibañ kij ñan ad bed wõt “ilo ial eo e alikar”?

Ewi Wãwen Am Bed Ilo Kwelok?

3. Ewi wãwen an kar juõn full-time servant ejaake manit eo emõn ilo ekkeini an bed ilo kwelok?

³ Jet ri kwalok nan ro an Ailiñ eo rej ekkeini air bed ilo kwelok ko jen ke rar ajiri wõt. “Ke limaro jeiõ im Ña kim ar rittolok ilo yiõ ko 1930 ko,” juõn full-time ri kwalok nan an Ri Kennan ro an Jehovah ej kememej, “kim ar jab aikwij kajitõk ibben jemem im jinim elañe kimij ilok ñan kwelok. Kim ar jelã bwe kimij etal ak ñe kim ab nañinmij wõt. Family eo am ear jab likjap jen kwelok ko.” Einwõt kõrã in ri kanan eo Anna, sister in “ejañin likjap” jen jikin kabuñ eo an Jehovah.​—Luk 2:​36, 37.

4-6. (a) Etke jet ri kwalok nan ro an Ailiñ eo rej likjap jen kwelok ko? (b) Etke ej menin aikwij ñan bed ilo kwelok ko?

⁴ Kwoj ibwiljin ke ian ro rej ekkeini air bed ilo kwelok ko an Christian, ak kwoj oktak ke im jakkeini am kwelok? Jet Christian rar lemnak bwe ear emõn air kõmman rar beek ñan kamol menin. Iumin jejjo week ko, rar jei aolep kwelok ko rar bed ie. Ke rar etale lokbook eo ilo jemlokin ien eo rar karõk ñane, rar bwilõñ kin oran kwelok ko rar likjap jeni.

⁵ ‘Ejjab menin bwilõñ,’ jet remaroñ ba. ‘Rainin armij rej bed iumin elap ijjibed im ejjab bidodo ñan air ekkeini bed ilo kwelok ko.’ Elukkun mol bwe jej mour ilo ien ko ien eñtan. Bar ta, ijjibed ejelok bere enaj laplok wõt. (2 Timote 3:​13) Ak menin ejjab kõmman ke an laplok an bin ñan ekkeini bed ilo kwelok ko? An ejelok juõn ũnen mõñã eo ilo jitõb etal in wõt juõn ñan debij kij, jejjab maroñ kejatdikdik ñan ad jutak nae ijjibed eo jukjuk im bed in ej bõktok. Etke, an ejelok ekkeini koba ibben don jemaroñ bõk kabo ñan karmijete aolepen “ial eo e alikar”! (Jabõn Kennan Ko 4:​18) Emol, ñe jej itaklok mweo imõd ilo jemlokin juõn ran eo ebin, ien otemjej jemaroñ jab eñjake ad iten etal ñan juõn kwelok. Bõtab, ñe jej bed ilo kwelok eo meñe jemõk, jej bõk tokjen ñan kij make im jej kõketak Christian ro mõttad ilo Kingdom Hall eo.

⁶ Dri Hibru 10:25 ej kwalok bar juõn un eo elap tokjen kin unin ad aikwij ekkeini bed ilo kwelok ko. Ijin ri jilek Paul ej kõketak Christian ro mõttan ñan air make kweloktok ibben don im ‘elaplok ke rej lo an ran eo ebaktok.’ Aet, jej aikwij jab likjap in lolokjen kin mol eo bwe “ran eo an Jehovah” ej ebaktok. (2 Peter 3:​12, New World Translation) Elañe jen kar bõk lemnak in bwe jemlokin jukjuk im bed in ej ettolok wõt, jemaroñ jino jolok makitkit ko ilo jitõb me rej menin aikwij, einwõt bed ilo kwelok ko. Inem, einwõt an kar Jesus kakkõl, ‘emõkaj an ran eo itok iod ilo idiñ.’​—Luk 21:34.

Kwon Juõn Ri Roñjake Emõn

7. Etke elap tokjen ñan an ajiri ro kanuij roñjake ilo kwelok ko?

⁷ Ejjab bwe ñan baj bed wõt ilo kwelok ko. Jej aikwij kanuij roñjake, madjake ta eo rej ba ijo. (Jabõn Kennan Ko 7:​24) Menin ekoba ajiri ro nejid. Ñe juõn ajiri ej etal ñan school, rej watõk an mad ibben ri kaki eo, meñe unin tel in katak eo ejjab kaitoklimoen ak einwõt ellãlok jen an melele kake. Ri kaki eo ejelã bwe elañe ajiri eo ej kajeoñ mad ibben, enaj bõk jet tokjen ko jen katak eo. Inem, ejjab menin kõmmanwa ke, ñan an ajiri in ri school ro mad ilo nanin katak ko rej lilok ilo kwelok ko an congregation eo jen air kõtlok bwe ren kiki mwijin wõt an ijjino kwelok eo? Emol, ibwiljin mol ko raorõk jej loi ilo Jeje ko “jet men ko ebin melele kaki.” (2 Peter 3:​16, NW ) Ak jej aikwij jab likjap in jelã maroñ eo an juõn ajiri ñan an katak. Anij ejjab. Ilo ien ko an Bible, ear kaiñ ri karejar ro an redik ñan ‘roñjake im katak im mijak Jehovah im kejbãrok ñan jerbale aolep nan ko ilo kien in,’ ko jet iair ejelok bere ear bin ñan an ajiri ro melele. (Duteronomi 31:12; keidi Livitikõs 18:​1-​30.) Jehovah ej watõk ke an diklok ibben ajiri ro rainin?

8. Ta buñten nee ko jet jemen im jinen ajiri ro rej bõki ñan jibañ ajiri ro nejiir bwe ren emõn ilo ien kwelok ko?

⁸ Christian ro jemen im jinen ajiri ro rej kile bwe lelok ko rej kabwe jet ian aikwij ko ilo jitõb an ajiri ro nejiir. Eindein, jet jemen im jinen ajiri ro rej kõmman karõk ñan an ajiri ro kiki jidik ien mokta jen kwelok ko bwe ñe rej tõbraklok ilo Kingdom Hall eo rejjab mõk im rebojak ñan katak. Jet jemen im jinen ajiri ro remaroñ kõmman joñan ak meñe ilo meletlet kakien nae an ajiri ro aluij television ilo boñen ko ewõr kwelok ie (Dri Epesõs 5:​15, 16) Im ajiri ro jemeir im jineir rej kõmman eindein rej kejbãrok bwe ro nejiir en dik air mad, kõketak ir ñan air roñjake im katak, ekkar ñan dettair im maroñ.​—Jabõn Kennan Ko 8:​32.

9. Ta eo emaroñ jibañ kij ejaake maroñ eo ñan roñjake?

⁹ Jesus ear konono ñan ritto ro ke ear ba: “Inem komin lale kijkan ami roñjake.” (Luk 8:​18) Ran kein, ekkã an bidodo ba jen kõmmane. Emol, niknik ilo roñjake ej juõn jerbal ebin, ak maroñ eo ñan roñjake jemaroñ ejaake. Ilo am roñjake juõn konono in Bible ak juõn mõttan kwelok, kajeoñ kajenolok unleplep in lemnak ko. Kõtmene kin ta eo ri konono eo ej iten ba kake tok ilokan. Bukõt point ko kwo maroñ kajerbali ilo jerbal in kwalok nan eo am ak jerbali ilo mour eo am. Eliji ilo am lemnak point ko rej etali. Jei ilo tukaduin.

10, 11. Ewi wãwen an jet jemen im jinen ajiri ro jibañ ajiri ro nejiir bwe ren oktak im ri roñjake ro remõnlok, im ta kilen ko emwij am loi bwe rej jibañ?

¹⁰ Manit ko remõn mantin roñjake emõntata ñan katak kaki ilo ien eo juõn ej dik wõt. Meñe mokta jen air katak read im jeje, jet ro redik me rej kab iten jino school jemeir im jineir rej rejañ ir bwe ren jeje “nan ko elap tokjeir ilo tukaduin” ilo ien kwelok ko. Rej likit juõn kakõlle ilo juõn mõttan paper ñe nan ko ewõr air jelã kaki ñe rej kajerbali einwõt “Jehovah,” “Jesus,” ak “Ailiñ” eo. Ilo wãwen in, ajiri ro remaroñ katak ñan air kanuij lale men eo rej konono kake jen jikin konono eo.

¹¹ Meñe ajiri ro rerittolok jet ien rej aikwij rejañ ñan lukkun lale. Ilo an lo bwe ladik eo nejin 11-yiõ-dettan ear ettõnak ilo juõn ien convention an Christian, juõn bõran family ear lelok ñan ladik eo juõn Bible im kajitõk ibben bwe en bukõt eon ko ke ri konono ro rej kwalok kaki. Leo jemen, eo ear jeje nan ko elap tokjeir ilo tukaduin, ear kalimjeke ke ladik eo nejin ej jibwe Bible eo. Elikin, ladik eo ear lor program in convention eo ibben an laplok an itoklimoen.

Ren Roñjake Ainikiõm

12, 13. Etke elap tokjen ñan bõk kunad ñan al ilo congregation eo?

¹² King David ear al: “I naj kabol lokatok eo Am, O Jehovah, bwe in kwalok kin ainikien kamolol eo ellaj.” (Psalms 26:​6, 7, NW ) Kwelok ko an Ri Kennan ro an Jehovah rej letok ien ko remõn ñan ad kwalok ilo ellaj tõmak eo ad. Juõn wãwen jemaroñ kõmmane menin ie ej ilo ad bõk kunad ilo al ko an congregation eo. Menin ej juõn wãwen elap tokjen ilo ad kabuñ, ak emaroñ bidodo ad kajekdone.

¹³ Jet ajiri ro rej jañin read rej kememej nanin al ko an Ailiñ eo ko renaj kajerbali ilo kwelok ko kajjojo week. Rej bwilõñ bwe rej maroñ al ibben reritto ro. Bõtab, ke ajiri ro rej rittolok jidik, emaroñ iten diklok air kobalok in al ilo al ko an Ailiñ eo. Jet ritto rej bareinwõt jook in al ilo kwelok ko. Ak, al ej mõttan ad kabuñ, einwõt jerbal in kwalok nan ej mõttan ad kabuñ. (Dri Epesõs 5:​19) Jej kõmman joñan wõt ad maroñ ñan nebar Jehovah ilo jerbal in kwalok nan. Jejjab bar maroñ kaibujuij e ke ilo ad leliñlok ainikied​—jekdon elañe emõn ainikien ak jab​—jen eñjake in buru ilo al ko al in nebar?​—Dri Hibru 13:15.

14. Etke men eo jej katak ilo kwelok ko an congregation eo ej tellokin ad kejbãrok ad kabojaklok iman?

¹⁴ Jej bareinwõt bõktok nebar ñan Anij ñe jej kwalok nan ko rej menin kalek ilo mõttan ko ilo kwelok ko ad me rej kir ñan an ro rej kwelok bõk kunair ie. Menin ej aikwij ad kebojak. Ej bõk ien ñan etale wãwen ko remũlallok ilo Nanin Anij. Ri jilek Paul, juõn ri school eo elap an itoklimo ilo Jeje ko, ear kile menin. Ear je: “O imlõl in mweien meletlet im jela an Anij!” (Dri Rom 11:33) Bõran family ko, elap an lap tokjen bwe komin jibañ kajjojo ro uan family eo ami bukõt ñan loan meletlet eo an Anij, einwõt air kwalok ilo Jeje ko. Kajenolok jet ien ilo ien an family eo katak ñan kameleleik melele ko rebin im jibañ family eo kebojak ñan kwelok ko.

15. Ta lemnak ko remaroñ jibañ juõn ñan an bõk kunan im uak ilo kwelok ko?

¹⁵ Elañe kwoj kõnan bwe en emakijkijlok am uak ilo kwelok ko, etke kwoj jab kabojaklok iman juõn men eo kwoj kõnan ba? Ejjab menin aikwij ñan lukkun tibdiki. Reade juõn eon ilo Bible jen buruõm ak jejjo nan ko emõn kar kãleti ñan konono jen buru enaj menin kamolol. Jet ri kwalok nan rej kajitõk ibben armij eo ej kõmman katak bwe en likit wõt nanin konono ko jinoin ilo juõn paragraph ñan ir, bwe ren jab likjap jen ien eo ñan kwalok tõmak eo air.

Jelã eo Ej Oktak im Meletlet

16, 17. Ta nanin kakabilek eo juõn elder ear lelok ñan juõn ministerial servant, im etke ear bolemen?

¹⁶ Ilo kwelok ko an Ri Kennan ro an Jehovah, ekkã air kakememej kij ñan konono Nanin Anij ran otemjej. Ad kõmman eindein ej menin kaemololo. Ej bareinwõt jibañ kij kõmman bebe ilo meletlet, kajimwe likjap ko ad, jumae kabo ko, im bar kemour jokkin wõt juõn eo ilo jitõb elañe jaar bõk juõn buñten nee ilo ial eo ebwid.​—Sam Ko 19:7.

¹⁷ Elder ro an congregation eo ewõr air iminene rej bojak wõt in letok nanin kakabilek jen Jeje ko me emwij keboji ñan aikwij ko ad. Men eo jej aikwij kõmmane deeo “bõke” im bukõt nanin kakabilek eo air ej bedbede ion Bible eo. (Jabõn Kennan Ko 20:5) Juõn ran juõn jodikdik ministerial servant ewõr an itoklimo ear kajitõk ibben juõn elder ñan kwalok an lemnak kin wãwen oktak im laplok tokjen ilo congregation eo. Elder eo, eo ear emõn an jelã kin likao dikdik eo, ear kabellok Bible eo an ñan 1 Timothy 3:3 (NW ), eo ej ba bwe maan ro emwij kãlet ir rej aikwij “kõmmanwa.” Ilo joij ear jitõñlok ñan wãwen ko likao dikdik eo emaroñ kalikar an kõmmanwa ie ilo kõtan eo an ibben ro jet. Likao dikdik eo ear lõkatip kin nanin kakabilek eo ear bõke? Jab ñan jidik! “Elder eo ear kajerbal Bible eo,” ear kamelele, “inem Iar kile bwe nanin kakabilek eo ear itok jen Jehovah.” Ministerial servant eo ilo kamolol ear jerbale nanin kakabilek eo im kõmman emõn ilo an wõnmanlok.

18. (a) Ta eo ear jibañ juõn Christian jodikdik ñan an jumae kabo ilo school? (b) Ta eon ko ilo Bible kwoj kememeji ñe kwoj jelmae kabo?

¹⁸ Nanin Anij emaroñ bareinwõt jibañ armij ro redik ñan air “ko jen mõm ko an likao.” (2 Timote 2:​22) Juõn jodikdik Ri Kennan an Jehovah eo ear kadiojlok ilo ran ko kiõ jen high school ear maroñ jumae kabo ilo aolepen yiõ in school ko an ilo an kalmenlokjen kin jet eon ko ilo Bible im jerbali. Ledik eo ekkã an lemnak kin nanin kakabilek eo emwij je ilo Jabõn Kennan Ko 13:20: “Kwon etetal iben ro dri meletlet, inem kwo naj meletlet.” Kin menin, ledik eo ear kejbãrok an ejaake jimjera eo an ibben ro wõt ear mũlal air kautiej nanin kaiñi ko ilo Jeje ko. Ear kamelele: “Ña ijjab emõnlok jen jabdewõt armij ro jet. Elañe ij oktak im lorak ibben jarin armij ro rebwid, Inaj kõnan kamõnõnõik ro jera, im menin emaroñ tellok ñan jorrãn.” Nanin kakabilek eo Paul ear je ilo 2 Timote 1:8 ear bareinwõt jibañ ledik eo. Ear je: “Inem kwon jab jok kin kennan an ar Iroij, . . .  a kwon bõk mõtõn iñtan ko an gospel.” Ilo an errã ibben nanin kakabilek in, ledik eo ear beran im bõk ilo an lelok tõmak ko an me rej bedbed ion Bible ñan ri school ro ilo class eo an jabdewõt ien emõn im ekkar. Jabdewõt ien rej lelok kunan ñan an report ñan class eo, ej kãlet juõn unintel eo ej kõtlok an kennan kin Ailiñ eo an Anij ilo juõn kilen eo ebolemen.

19. Etke juõn likao jodikdik ear jab maroñ jumae ijjibed ko an lal in, ak ta eo ear lelok ñan e kajur eo ilo jitõb?

¹⁹ Elañe jelokan jebwãbwelok jen “ial eo e alikar,” Nanin Anij emaroñ jibañ kij kajimwe buñten need. (Jabõn Kennan Ko 4:​18) Juõn likao jodikdik ej jokwe ilo Africa ear katak menin ilo an loe. Ke juõn ian Ri Kennan ro an Jehovah ear lolok e, ear bõke im katak Bible. Ear lañliñ kin men eo ear katak ak ejjabto ear lorak ilo an tel an ibben ro renana ilo school. Tokelik, ear belok ñan loan mour in etton. “Bõklikit eo aõ ear kabõnõnõik iõ, im Iar aikwij in bõjrak jen aõ bed ilo kwelok ko,” likao eo ej kamol. Tokelik, ear jino bar bed ilo kwelok ko. Likao dikdik eo ear kwalok ennan in: “Iar lo bwe un eo elap ñan aolepen menin kar bwe Iar kwuli ilo jitõb. Ejelok katak iar katak. Eñin unin Iar jab maroñ jumae kabo ko. Inem Iar jino konono Imõniaroñroñ im Awake! Jidik kin jidik, Iar bar bõk kajur eo aõ ilo jitõb im karreoik mour eo aõ. Menin kar juõn menin kennan emõn ñan ro rar lo oktak eo Iar kõmmane. Iar baptais, im kiõ ij mõnõnõ.” Ta eo ear lelok ñan likao in kajur eo ñan an ellã jen mõjno eo an ilo kanniek? Ear bar bõk kajur eo ilo jitõb ilo an ekkeini, katak Bible.

20. Ewi wãwen an juõn jodikdik jumae mõnmõn ko an Satan?

²⁰ Christian jodikdik ro, komij bed iumin jumae rainin! Ñan ami jumae mõnmõn ko an Satan, komij aikwij ekkeini bõk ekan ko ilo jitõb. Ri jeje Sam, alikar e make juõn likao dikdik, ear melele menin. Ear kamolol Jehovah kin an lelok ñan e Nan eo an, bwe en einwõt ‘juõn likao dikdik emaroñ karreoik ial eo an.’​—Sam Ko 119:9.

Jabdewõt Ijo Anij Ej Tel Ie, Jenaj Lore

21, 22. Etke jej aikwij jab bõk jemlok in bwe ialin mol eo elap an bin?

²¹ Jehovah ear tel ailiñ in Israel jen Egypt ñan loan Enen Kallimur eo. Ial eo ear kãlete emaroñ kar einwõt bin etal ielok ilo wãwen an armij lale. Jen air bõk wãwen eo ealikar an bidodo, ilo kajjulok itõrerein Lomalo in Mediterranean, Jehovah ear tel armij ro an ilo juõn ial eo lok ebin ilo enen jemaden. Bõtab, menin, kar lukkun juõn menin joij ilo mõttan eo kunan Anij. Meñe ear kadulok, ial eo ilo lomalo eo enaj kar bõklok ri Israel ro ilujen ene eo enen ri kijirãt in Philistine ro. Ilo an kãlet bar juõn ial, Jehovah ear kajoor armij ro an jen air imaajaj ibben ri Philistine ro.

²² Ilo wãwen in lok wõt, ial eo Jehovah ej tel kij ie rainin emaroñ einwõt bin ilo jet ien. Kajjojo week, ewõr juõn ad schedule eo eobrak kin makitkit ko an Christian, ekoba kwelok ko an congregation eo, katak Bible, im jerbal in kwalok nan. Ial ko jet remaroñ einwõt bidodo. Ak ilo ad lor wõt ial eo an Anij jenaj tõkeãklok ilo jemlokin ijo jej kate kij ñan ad tõbare. Kin menin, jen etal wõt im bõk nanin katak eo eaorõk jen Jehovah im bed wõt ion “ial eo e alikar” ñan indio!​—Sam Ko 27:11.

Kwomaroñ Ke Kamelele?

• Etke elaptata ad aikwij ekkeini ad bed ilo kwelok ko an Christian?

• Ta eo jemen im jinen ajiri ro remaroñ kõmmane ñan jibañ ajiri ro nejiir kanuij roñjake ilo ien kwelok ko?

• Ta eo ekoba ilo juõn ri roñjake eo emõn?

• Ta eo emaroñ jibañ kij bõk kunad im uak ilo kwelok ko?

[Pija ilo page 14]

Bed ilo kwelok ko an Christian ej jibañ kij kejbãrok ilo ad lemnak kin ran eo an Jehovah

[Pija ilo page 16]

Elõñ kajjojo wãwen ko ñan nebar Jehovah ilo kwelok ko an Christian