En Bin Am Jurake Katak Eo Ekwojarjar

“Kwon liki Jeova kin aolepen buruõm, im kwon jab atartar ion jelalokjen eo am: kwon kwalok E ilo ial ko am otemjelok, inem E naj bakajen ial ko am.”—JABÕN KENNAN KO 3:​5, 6.

1. Ewi wãwen ad jerwawa ñan jelãlokjen an armij kiõ elaplok jen mokta?

RAN KEIN, enañin wõr 9,000 jikin newspaper ko rej kwalok news ran otemjej ibelakin lal. Ilo kajjojo yiõ tarrin 2,000 book kãl ko rej jei ilo United States wõt. Ekkar ñan juõn watwat, liktak ñan March 1998, kar wõr 275 milliilo page in business ko ilo Internet eo. Rar ba bwe oran page kein rej lõñlok wõt kin joñan in 20 milliilo page ko ilo kajjojo alliñ. Elaplok jen mokta, armij ro remaroñ bõki nan in kamelele ko kin enañin jabdewõt men ko rekõnan jelã. Meñe emaroñ wõr tokjen tõbrak in, men kein relõñ rar bõktok abañ ko.

2. Ta abañ ko remaroñ walok jen ad bõk katak im nan in kamelele ko relap otem lap?

² Jet armij ro rar añũri melele ko, im kate wõt ir ien otemjej ñan kamaat kõnan eo air ñan kabukõt melele ko rekãltata ak rej jerwane men ko elaplok tokjeir. Ibben ro jet rej bõk jet melele ko kin katak ko me ebwe an bin melele kaki im watõk ir make einwõt ro rekabel kin melele kein. Ekkar ñan juõn joñan melele, remaroñ kõmman bebe ko raorõk im kajorrãn ir make ak ro jet. Im kauwatata eo ñan bõk melele ko rejjab jimwe im jejjet rej bellok ñan kij ien otemjej. Ekkã an walok bwe ejelok juõn kilen kamol bwe kamelele ko reibweptok rej jejjet im jokkair wõt juõn.

3. Ta nan in kakkõl ko ikijen ad jibadõk meletlet eo an armij jemaroñ loe ilo Bible eo?

³ Kanuij kõnan jelã kin jabdewõt men ko kar juõn wãwen armij ro rar bõrañe. Jen ran ko an King Solomon im liñtak rar kile kauwatata ko remaroñ walok jen an armij ro kañ ien ilo air bõk melele ko ejelok tokjeir ak ko remaroñ kajorrãn ir. Ear ba: “Emõn kowe yuk: ejelok jemlokõn air kõmõn elõñ buk; im katak elap ej men in kamõk kõniek.” (Ekklisiastis 12:12) Elõñ buki yiõ ko tokelik ri jilek Paul ear jejelok ñan Timothy: “Kwon kejbãrok men eo liki yuk kin e, im illok jen bwebwenato wan, im men in jumae an eo naetan jelalokjen, im riõp: Eo kin an jet kwalok kake r’ar jebwãbwe jen tõmak eo.” (1 Timote 6:​20, 21) Aet, rainin ri Christian ro rej aikwij kejbãrok ir jen lemnak ko rej kajorrãn armij.

4. Ta juõn ian wãwen ko im jemaroñ kwalok liki eo ad ilo Jehovah im nan in katakin ko an?

⁴ Ro don Jehovah rej aikwij bokake nan ko an Jabõn Kennan Ko 3:​5, 6 bareinwõt: “Kwon liki Jeova kin aolepen buruõm, im kwon jab atartar ion jelalokjen eo am: kwon kwalok E ilo ial ko am otemjelok, inem E naj bakajen ial ko am.” Liki Jehovah ej koba ad karmijeteik jabdewõt lemnak ej jumae Nan in Anij, jekdon elañe ej waloktok jen lemnak eo ad make ak jen ro mõttad. Ñan kejbãrok mour in jitõb eo ad, ej juõn men eaorõk bwe jen kibel maroñ eo ad bwe jen kile kamelele ko rekauwatata im illok jen i. (Dri Hibru 5:​14) Jen lale jet ian jikin ko kamelele kein rej itok jen i.

Juõn Lal Satan Ej Kajur Ion

5. Ta juõn ian wãwen bõk lemnak ko renana, im wõn eo ej bed ilikin?

⁵ Lal in ej obrak kin lemnak ko rekauwatata. (1 Dri Korint 3:​19) Jesus Christ ear jar ñan Anij ikijen ri kalor ro an: “I jab jar bwe Kwon bõk ir jen lõl, a bwe Kwon kejbãrok ir jen eo enana.” (Jon 17:15) Kajitõk eo an Jesus bwe ri kalor ro an ren kejbãrok ir jen “dri nana eo” ear kalikar joñan an Satan kareel lal in. Ad bed einwõt Christian ro ejjab baj juõn men in kejbãrok jen kareelel ko renana an lal in. John ear je: “Je jela kij jen Anij, im aolepen lõl ej berwõt ilo dri nana eo.” (1 Jon 5:​19) Elaptata ilo jemlokin ran kein eliktata, jej aikwij kõtmene bwe Satan im demon ro an renaj kobrak lal in kin kamelele ko rekauwatata.

6. Ewi wãwen an lal in kamõnõnõ eo emaroñ kokkure mour eo ad erreo?

⁶ Jej aikwij kõtmene bareinwõt bwe jet ian kamelele kein rekauwatata renaj einwõt ñe rejjab nana. (2 Dri Korint 11:14) Ñan wanjoñok, lale mõk, kin lal in kamõnõnõ in, im ekoba aluij picture TV ko, mubi ko, al im kajañjañ ko im jeje ko. Elõñ rej errã bwe ilo elõñlok wãwen, jet ian men in kamõnõnõ ko rej kowõnmanlok mour etton, kowadoñ, im kokkure kin uno ko rejõkkar. Ñe armij ro rej kab lo juõn men in kamõnõnõ eo elukkun nana, men in emaroñ kailbõk ir. Ak elikin air loe ak roñjake elõñ alen men in enaj kokkure bõklikit eo air. Jejjab kõnan antonelok lemnak kein renana einwõt ñe remõn ak men in kamõnõnõ ko im rejjab kauwatata.​—Sam Ko 119:37.

7. Kain meletlet rot an armij emaroñ kokkure liki eo ad ilo Bible eo?

⁷ Kalmenlokjen kin bar juõn jikin kamelele ko rej itok jene​—⁠lemnak ko rej ibweptok jen scientist im ri meletlet ro rej aitwerõke mol eo an Bible eo. (Keidi Jemes 3:​15.) Ekkã an kamelele kein waloktok jen magazine ko relap im book ko rebuñbuñ, im remaroñ kokkure liki eo ad ilo Bible eo. Jet armij ro rej mõnõnõ in kokkure kajur eo an Nan in Anij ilo air lelemnak wõt ñan ejelok jemlokin. Juõn kauwatata ejja einlok wõt eo kar walok ilo ran ko an ri jilek ro, einwõt an kar nan ko an ri jilek Paul kalikari: “Komin kejbãrok kom bwe ejelok juõn e rakimi kom kin katak in meletlet eo an ak kin an mon bata, ekar ñõn bwebwenato mokta an armij rõn, im ñõn irinekatak ko an lõl, im jab ñõn Kraist.”​—Dri Kolosse 2:8.

Ro Rej Kijirãte Mol Eo

8, 9. Ewi wãwen kijirãte mol eo ej alikar ilo ran kein?

⁸ Ri kijirãt ro remaroñ kabañ mour in jitõb eo ad. Ri jilek Paul ear kanan bwe ri kijirãt rein ro rej bukwelok im jumae mol eo renaj itok jen ro rej baj ba wõt rej Christian. (Jerbal 20:29, 30; 2 Dri Tessalonika 2:3) Ilo an jejjet kitien nan ko an, elikin mij eo an ri jilek ro, juõn jumae elap ear ejaake dolul in Christendom eo. Rainin, ejelok juõn jumae elap ej waloktok ibwiljin armij ro an Anij. Bõtab, ewõr jejjo armij ro rar illok jen ir, im jet iair rar jek ilo burueir bwe ren katton etan Ri Kennan ro an Jehovah ilo air kariap ir im kajededlok nan ko rejjab jimwe kin ir. Jet iair rej jerbal ibben kumi ko jet im karõk bwe ren jumae kabuñ eo erreo. Ilo wãwen in, rej kobalok ibben ri kijirãte eo moktata, Satan.

⁹ Jet ian ri kijirãt rein rej laplok wõt ilo air kajerbal elõñ wãwen communicate ko, ekoba Internet, ñan kajededlok nan in riap ko kin Ri Kennan ro an Jehovah. Kin men in, ñe armij ro emol burueir rej etale katak ko ad, remaroñ lo kamelele ko an ri kijirãt ro. Im jet Ri Kennan ro ilo jaje kake rar readi katak kein renana bareinwõt. Kobatok ibben men in, jet ien ri kijirãt ro rej bõk kunair ilo program ko ilo TV ak radio. Ta ial eo emeletlet jej aikwij lore ikijen men in?

10. Ta uak eo emeletlet ewõr ibbed kin lemnak ko an ri kijirãt ro rejededlok?

¹⁰ Ri jilek John ear rejañ ri Christian ro bwe ren jab kadeloñe ri kijirãt rein ilo moko imwiir. Ear je: “Elañe jabrewõt armij ej iwij ñõn kom, im jab bõkwoj katak in, komin jab bõk e ilo mweo imwemi, im jab yokyokwe e; Bwe eo ej yokyokwe e ej bõk mõtõn jerbal ko an renana.” (2 Jon 10, 11) Kejbãrok kij jen ri kijirãt rein ilo wãwen otemjej enaj kejbãrok kij jen lemnak ko air renana. Kajerwawaik kij ñan katak ko an ri kijirãt rein ikijen wãwen communicate ilo ran kein ej joñan wõt ad kadeloñtok ir ñan loan mweo mweied. Jejjab kõnan kõtlok bwe itoklimo eo ad kin katak ko air en kareel kij ñan deloñ ilo ial eo ej kajorrãn kij!​—Jabõn Kennan Ko 22:3.

Iloan Congregation eo

11, 12. (a) Lemnak ko rekauwatata rar itok jen ia ilo congregation eo ilo ebeben eo kein kajuõn? (b) Ewi wãwen an jet ri Christian ro kar likjap in jutak bin kin katak ko rekwojarjar?

¹¹ Bar lemnak kin bar juõn wãwen lemnak ko renana rej itok jen e. Meñe jejjab kõnan katakin armij kin katak ko rewan, ri Christian ro emwij air wujleplok ñan Anij remaroñ bõk juõn manit bwe en mõkaj air konono jen air lemnak. (Jabõn Kennan Ko 12:18) Kinke jejjab wãppen, kij aolep jenaj bwid ilo ad konono jet ien. (Jabõn Kennan Ko 10:19; Jemes 3:8) Alikar bwe, ilo ran ko an Paul, kar wõr jet ian ro ilo congregation eo rar likjap in debij lo ko loir im bõk kunair ilo iakwelel ko kin nan ko. (1 Timote 2:8) Kar wõr ro jet me rar kaorõk lemnak ko air le jen joñan im tellok ir bwe ren aitwerõke maroñ eo an Paul. (2 Dri Korint 10:10-​12) Kain jitõb rot in ear tellok ñan jumae ko ejelok tokjeir.

¹² Jet ien iakwelel kein rar laplok wõt ñan “aituerõk ko r’ankeke” kin men ko ejelok tokjeir im rar kokkure ainemõn eo an congregation eo. (1 Timote 6:5; Dri Galetia 5:​15) Paul ear jeje kin ro rar ejaak iakwelel kein: “Elañe jabrewõt armij ej katakin ein juõn, im jab bõk ñõn nan ko remõn, aet, nan ko an ar Iroij Jisõs Kraist, kab katak eo ekar ñõn kõmõnmõn emõn; ej jua, e dri jajelokjen, im e kanuij yokwe kajitõk ko im akwail in nan ko, jen eo ej walok junmar, akwail, kajirere, mãten ko renana.”​—1 Timote 6:​3, 4.

13. Mwil rot eo kar mwilin ri Christian ro ilo ebeben eo kein kajuõn?

¹³ Ekalemõnõnõ bwe, ilo ien ko an ri jilek ro jarlepju in ri Christian ro rar tiljek wõt im madjake jerbal eo ñan kwalok nan kin news eo emõn kin Ailiñ eo an Anij. Rar boub wõt ilo air wõnake “atajinemjen im kõra ejoko beleir ilo air jorran” im kejbãrok ir jen “lipjinjin kin lõl in,” im jab kokkure ien ko air kin akwelel ko ejelok tokjeir kin nan ko. (Jemes 1:​27) Rar kejbãrok ir jen “dri kõmao ko re nana” meñe iloan congregation in Christian bareinwõt bwe ren kejbãrok mour in jitõb eo air.​—1 Dri Korint 15:33; 2 Timote 2:​20, 21.

14. Elañe jejjab kejbãrok, ewi wãwen ad naj jaketo jaketak lemnak ko maroñ oktaklok ñan akwel ko?

¹⁴ Ilo ejja wãwen dein, wãwen ko emwij an paragraph 11 kamelele kake ejeja an walok ilo congregation ko an Ri Kennan ro an Jehovah. Bõtab, ewõr tokjen bwe jen kile bwe ien iakwelel ko ejelok tokjeir remaroñ walok. Emol, bwe jemaroñ bwebwenato ibben don kin bwebwenato ko an Bible ak lemnak kin wãwen ko ejañin alikar ilo lal eo ekãl emwij an kallimure. Im ejjab nana ad jaketo jaketak lemnak ko kin men ko ad make, einwõt balled im baotokid ak jokãlet in men in kamõnõnõ ko. Bõtab, elañe jej jutak bin im bõk lemnak ko ad make im lõkatip ñe armij ro jet rejjab errã ibbed, congregation eo emaroñ jebel kin men ko ejelok tokjeir. Bwebwenato eo ear ijjino einwõt juõn bwebwenato bajjek emaroñ laplok ñan juõn bwebwenato ej kajorrãn armij.

Kejbãrok Liki eo Ad

15. “Katak ko an dimon rõn” remaroñ kajorrãn kij ñan joñan et eo, im Bible ej letok nan in kakabilek et eo kin men in?

¹⁵ Ri jilek Paul ej kakkõl: E alikar an Jitõb ba, bwe ilo ien ko elik, re naj buñ jen tõmak, im eoroñ jitõb ro rej mon ir, im katak ko an jimõn rõn.” (1 Timote 4:1) Aet, lemnak ko renana rej juõn lukkun men in kabañbañ. Kin men in, Paul ear eowore eo jeran Timote: “O Timote, kwon kejbãrok men eo liki yuk kin e, im illok jen bwebwenato wan, im men in jumae an eo naetan jelalokjen, im riõp: eo, kin an jet kwalok kake r’ar jebwãbwe jen tõmak eo.”​—1 Timote 6:​20, 21.

16, 17. Ta eo Anij ear letok ñan kij, im ewi wãwen ad aikwij kaorõk e?

¹⁶ Ewi wãwen ad maroñ bõk tokjen jen nan in kakkõl in eyokwe ilo ran kein? Timothy ear bed ilo juõn men in liki​—juõn men eaorõk ñan kaorõk im kejbãrok e. Kar ta? Paul ear kamelele: “Kwon kanuij drebij wãwen nan ko remol kw’ar roñjaki jen ña, ilo tõmak im yokwe eo ej ilo Kraist Jisõs. Men eo emõn, emwij likit e ibõm, kwon kejbãrok e kin Jitõb Kwojarjar eo Ej jokwe ilo kij.” (2 Timote 1:​13, 14) Aet, Men in liki eo ear bed ibben Timote ear koba “nan ko remõn,” “katak ko” ekkar ñan kabuñ eo ekwojarjar. (1 Timote 6:3) Ekkar ñan nan kein, ri Christian ro ran kein rar beek ilo burueir bwe ren kejbãrok tõmak eo air im katak ko emwij air bõk ilo liki.

¹⁷ Kejbãrok liki in ej koba ad kaddeklok men ko einwõt manit ko remõn kin katak Bible eo im kate kij ilo jar, im ilo ejja ien eo wõt, kõmman “emõn ñõn armij otemjej, im elaplok ñõn ro rej ber ilo nukin tõmak.” (Dri Galetia 6:​10; Dri Rom 12:11-​17) Paul ear bar rejañ: “Lor emõn, kwojarjar, tõmak, yokwe, kijenmij, im inemõn. Kwon tõrinae tõrinae emõn eo an tõmak, im drebij mour in drio, eo emwij kir yuk ñõn e, im emõn am kar kwalok kake iman mejen elõñ dri kennan.” (1 Timote 6:​11, 12) Paul ear kajerbal nan ko einwõt “tõrinae tõrinae eo emõn” im “drebij mour in drio” rej kalikar bwe jen kijejeto wõt im jek ilo buruõd ñan bõprae men in kareelel ko renana ilo jitõb.

Aikwij eo ñan Lolokjen

18. Ewi wãwen ad maroñ jokkin wõt juõn einwõt juõn Christian ikijen katak ko an lal in?

¹⁸ Emol, ilo ad bõk kunad ilo tarinae eo emõn an tõmak, jej aikwiji lolokjen. (Jabõn Kennan Ko 2:​11; Dri Pilippai 1:9) Ñan wanjoñok, ejjab juõn lemnak ekõmmanwa ñan jab liki nan ko otemjej jen lal in. (Dri Pilippai 4:5; Jemes 3:​17) Jab lemnak ko otemjej rej jumae Nan in Anij. Jesus ear konono kin aikwij eo ñan an ri nañinmij ro bõk jibañ jen juõn doctor​—juõn jerbal an lal in. (Luk 5:​31) Meñe kilen kamadmõd nañinmij eo ilo ran ko an Jesus ear jab kanuij emõn, ear kile tokjen jibañ eo jen juõn doctor. Ri Christian ro ran kein rej kwalok juõn lemnak ejokkin wõt juõn kin kamelele ko jen lal in, ak rej kejbãrok ir jen jabdewõt men emaroñ kajorrãn mour in jitõb eo air.

19, 20. (a) Ewi wãwen an elder ro kwalok lolokjen ñe rej jibañ ro rejjab lemnak mokta jen air konono? (b) Ewi wãwen an congregation eo emmakit ñe juõn uan congregation eo ej wõnmanlok wõt im katakin armij kin katak ko rewan?

¹⁹ Lolokjen ej men in aorõk ñan elder ro bareinwõt ñe rej jibañ ro rejjab konono ilo meletlet. (2 Timote 2:7) Jet ien, ro uan congregation eo remaroñ bõk kunair ilo akwel ko kin men ko jidik wõt tokjeir im iakwelel ko ejelok bedbed ioir. Ñan kejbãrok burukuk eo an congregation eo, elder ro rej aikwij kajimwe abañ kein ilo mõkaj. Ilo ejja ien eo wõt, rej kejbãrok ir jen air bõk juõn lemnak enana kin ro jeiir im jatiir im jab watõk ir ilo mõkaj bwe rej einwõt ri jumae ro.

²⁰ Paul ear kamelele kin wãwen air aikwij lelok jibañ. Ear ba: “Ro jatiõ, elañe emwij erãtik juõn armij ilo jabrewõt bwir, komeo kom ilo Jitõb komin kajime eo ein drein ilo inemõn; im mõke lale kwe, ñe ab bareinwõt kabo yuk.” (Dri Galetia 6:1) Ikijen ri Christian ro rej inebata wõt kin men ko rej bere kake, Jude ear je: “Komin tiriamokake jet ro rej berre; im jet komin lomorir im kwotak ir jen kijeek.” (Jud 22, 23) Emol, elañe elikin ad lelok elõñ nan in kaje ko juõn armij ej wõnmanlok wõt im kwalok katak ko rewan, elder ro rej aikwij bõk eddo eo ñan kejbãrok congregation eo.​—1 Timote 1:​20; Taitõs 3:​10, 11.

Kobrak Lolãtãt Eo Ad Kin Men Ko Ej Tellokin Air Bõk Nebar

21, 22. Kin ta eo jej aikwij jokãlet, im jej aikwij kobrak lolãtãt eo ad kin ta?

²¹ Congregation eo an Christian ej dike nan ko renana ko rej “einwõt bõkke ko rej mõñañi.” (2 Timote 2:​16, 17; Taitõs 3:9) Emol men in jekdon elañe rej kalikar “meletlet” eo an lal, lemnak ko an ri kijirãt ro an mol eo, ak ro rejjab lemnak mokta jen air konono ilo congregation eo. Meñe emaroñ wõr tokjen katak kin men ko rekãl, itoklimo eo ad ilo ejelok joñan kin men ko emaroñ kajerwawaik kij ñan lemnak ko renana. Jejjab jajelokjen kin men ko an Satan. (2 Dri Korint 2:​11) Jej jelã bwe ej lukkun kate wõt e ñan kamade kij im kadiklok ad jerbal ñan Anij.

²² Einwõt ri karejar ro remõn, jen jutak bin im kautiej katak ko rekwojarjar. (1 Timote 4:6) Jen kajerbal ien eo ad ilo meletlet im kãlet kain nan rot ko jej bõki. Inem jejamin bo ilo lemnak eo enana Satan ear kakõrmole. Aet, jen lale wõt “jabrewõt men ko remol, jabrewõt men ko rejime, jabrewõt men ko re wãnik, jabrewõt men ko rokwojarjar, jabrewõt men ko re olbo, jabrewõt men ko emõn air buñbuñ; elañe eor emõn, im elañe eor nebar.” Elañe jej kobrak lolãtãt eo ad im buruõd kin men kein, Anij in ainemõn eo enaj bed ibbed.​—Dri Pilippai 4:​8, 9.

Ta Eo Jar Katak Kake?

• Ewi wãwen an meletlet eo an lal kabañ mour in jitõb eo ad?

• Ta eo jej aikwij kõmmane ñan kejbãrok kij jen lemnak ko rekauwatata an ri kijirãt ro an kabuñ eo emol?

• Kain konono rot eo jej aikwij kejbãrok kij jen e ilo congregation eo?

• Ewi wãwen ad maroñ kwalok jokkin wõt juõn an Christian ñe jej eoroñ nan ko relõñ otem lõñ?

[Pija ilo page 21]

Elõñ magazine im book ko rejõkkar ñan nan in kaiñi ko an Christian eo ad

[Pija ilo page 22]

Christian ro remaroñ jaketo jaketak lemnak ko im jab watõki einwõt men ko ro jet rej aikwij kõmmani