Kaminene Wõt Kin Men Ko Emwij Am Katak
“Men ko kom ar katak, im bõki, im roñjaki, im lo ilo ña, komin kõmõnmõn men kein: im Anij in ainemõn e naj ber ibemi.”—DRI PILIPPAI 4:9.
1, 2. Ilo elõñ wãwen ko, Bible eo ej lujur ke juõn kareelel ilo mour ko an armij ro rej watõk ir make bwe rej ri kabuñ? Kamelele.
“KABUÑ ej laplok kilan, ak debij kien ko Kien Mour Erreo ej jakolok/diklok kilan.” Eñin ennan eo iman ilo newsletter eo Emerging Trends ear eliji tokjen ko rar walok jen juõn katak in etale eo rar kõmmane ilo aolepen belakin United States. Ealikar, bwe ailiñ in ear lo juõn laplokin oran armij ro rej bed ilo imõn jar ko im ba bwe kabuñ ej debij juõn jikin eo elap tokjen ilo mour eo air. Bõtab, report eo ej ba: “Meñe ekabwilõñlõñ joñan oran kein, elõñ Ri America ro ewõr air bere kin tõmak eo an kabuñ im ej jelet mour an kajjojo armij im aolepen jukjuk im bed eo.”
2 Wãwen in ejjab jeja im jejjab lo ilo juõn wõt ailiñ. Ilo belakin lalin, elõñ armij ro rej ba bwe rej bõk Bible eo im rej ri kabuñ ak rejjab kõtlok bwe Jeje ko ren jerbale kareelel eo emol ilo mour eo air. (2 Timote 3:5) “Jej debij wõt ad kautiej Bible eo,” juõn eo ej jeban kumi in etale eo im ekkatak ear ba, “ak ilo lukkun mol jolok ien ñan readi, ekkatak kake im jerbale—ej juõn men an ien ko remotlok.”
3. (a) Ewi wãwen an Bible eo jelet ro rar oktak im Christian ro remol? (b) Ewi wãwen an ri kalor ro an Jesus jerbale nan in kakabilek eo an Paul ilo Dri Pilippai 4:9?
3 Bõtab, wãwen eo ibben Christian ro remol einjuõn. Jerbale nan in kakabilek eo jen Nan in Anij ear bõktok oktak ko ilo lemnak ko air im mwiliir. Im armij eo ekãl ej alikar ke ro jet rej loe im kile. (Dri Kolosse 3:5-10) Ñan ro ri kaloran Jesus, Bible eo ejjab juõn book eo rejjab kajerbale im ej bed im bũñalñal ion ijo ej bed ie. Ilo keidi, ri jilek Paul ear jiroñ Christian ro ilo Philippi: “Men ko kom ar katak, im bõki, im roñjaki, im lo ilo ña, komin “kõmõnmõn men kein; im Anij in ainemõn e naj ber ibemi.” (Dri Pilippai 4:9) Elaplok ijo Christian ro rej kõmmane jen baj bõk wõt mol eo kin Nan in Anij. Rej kõmmane men eo rej katak, im etal wõt im jerbale nan in kakabilek eo ilo Bible—ilo family eo, ilo jikin jerbal eo air, ilo congregation eo, im ilo aolepen wãwen ko jet ilo mour.
4. Etke ej juõn aitwerõk ñan jerbale kien ko an Anij?
4 Likit ilo kaminene kien ko an Anij im nan in kaiñi ko an ejjab bidodo. Jej mour ilo juõn lal eo ej bed iumin kajur eo an Satan Devil eo, eo Bible ej naetan “anij in lõl in.” (2 Dri Korint 4:4; 1 Jon 5:19) Kin menin, eaorõk bwe jen kejbãrok nae jabdewõt men ej kabañ kij jen ad jibadõk juõn ial in tiljek ñan Jehovah Anij. Ewi wãwen ad maroñ ri kejbãrok tiljek?
Debij “Wãwen Nan Ko Remol”
5. Ta eo ennan eo an Jesus ej kwalok kin: “Lor wõt Iõ”?
5 Juõn wãwen kaminene kin men eo jaar katak ej na kitien tiljek ilo debij kabuñ eo emol, jekdon jumae jen ri jab tõmak ro. Kijenmij ej aikwij an wõr jibadbad. “Elañe jabrewõt armij e kõnan lor iõ,” Jesus ear ba, “en mõke karmijete, im bõk alal in eñtan eo an im etal wõt im lor iõ.” (Matu 16:24, NW) Jesus ear jab ba bwe jej aikwij lor e ñan juõn wõt week, juõn alliñ, ak juõn yiõ. Ak, ear ba: “Etal wõt im lor iõ.” Nan ko an rej kalikar bwe jerbal in kõmman ri kalor eo ad ejjab maroñ baj juõn wõt ien ilo mour eo ad ak juõn wãwen kabuñ ilo mour eo ad im ekadu jetñakin. Tiljek ilo debij kabuñ eo emol ej melelen bwe ilo tiljek jej kijenmij ilo ial eo emwij ad kãlete, jekdon ta eo emaroñ walok. Ewi wãwen ad maroñ kõmmane menin?
6. Ta joñok eo kin nan ko remõn Christian ro ilo ebeben eo kein kajuõn rar katak jen Paul?
6 Paul ear kõketak ri jerbal eo mõttan Timothy: “Kwon kanuij drebij joñok in nan ko remol kw’ar roñjaki jen ña, ilo tõmak im yokwe eo ej ilo Kraist Jisõs.” (2 Timote 1:13, NW) Ta kar melele eo an Paul? Nan in Greek in ijin im ej ukõt “joñok” ak debij ej jitõñlok ñan jerbal in elmokot. Meñe ejjab bwe tibdikin, pija in elmokot rot in emõn an kwalok jekjek ko jekjekin bwe juõn eo ewõr an jelã im ej kalimjeke emaroñ melele kin aolepen pija eo. Eindeinlok, joñok in mol eo Paul ear katakin Timothy kake im ro jet kar eiki ñan lelok juõn uak ñan jabdewõt kajitõk eo emaroñ walok. Ak, enbwin katakin in ej letok ebwe ialin tel—juõn lajrak, einwõt juõn elmokot ilo lajrak, ilo nan in kõkkar—bwe ro emol burueir ren maroñ melele kin ta eo Jehovah ej aikwiji ibbeir. Bwebõta, ñan kabuñburuen Anij, rej aikwij debij wõt joñok in mol in ilo air kaminene kin men eo emwij air katak.
7. Ewi wãwen an Christian ro maroñ eddeb wõt ñan joñok eo kin nan ko remõn?
7 Ilo ebeben eo kein kajuõn, armij rot in einwõt Hymenaeus, Alexander, im Philetus rar kalaplok lemnak ko rar jab kwon ñan “joñok in nan ko remol.” (1 Timote 1:18-20; 2 Timote 2:16, 17) Ewi wãwen an kar Christian ro jinoin bõprae an ro rar buñ jen tõmak telbiloik ir? Ilo air kejbãrok air katak jeje ko rekakõrmol im jerbali ilo mour eo air. Ro rar etetal ekkar ñan wanjoñok eo ear wõr ibben Paul im ri tõmak ro jet rar maroñ kile im kajekdon jabdewõt men eo ear ekkar ñan joñok in mol eo rar katak. (Dri Pilippai 3:17; Dri Hibru 5:14) Jen air “dri jajelokjen, kin kajitõk im akwail in nan ko,” rar emmakit manlok wõt ilo ial eo air ejimwe in tiljek ñan Anij. (1 Timote 6:3-6, NW) Jej kõmman ejja eindein wõt ñe jej jerbale mol ko emwij ad katak kaki. Ej menin kakajurlok tõmak ñe jej lo bwe million armij ro rej karejar ñan Jehovah ibelakin lalin rej debij im kamejojoiki joñok in mol eo ilo Bible rar katak.—1 Dri Tessalonika 1:2-5.
Kajekdon “Bwebwenato Ko Rewan”
8. (a) Ewi wãwen an Satan kate wõt e ñan kokkure tõmak eo ad rainin? (b) Ta nan in kakkõl eo jen Paul jej loe ilo 2 Timote 4:3, 4?
8 Satan ej kajeoñ rupe tiljek eo ad ikijen men ko ewõr bere ie kin men ko jaar katak. Rainin, einwõt ilo ebeben eo kein kajuõn, ro rar buñ jen tõmak im ro jet rar bukõt air kokkure tõmak eo an ro ejelok rueir. (Dri Galetia 2:4; 5:7, 8) Jet ien rej kajerbal jikin kõmman news ko ñan kajededlok melele ko rejjab mol ak kwalok nan in riap ko kin kilen im kõmman ko an armij ro an Jehovah. Paul ear kakkõl bwe jet renaj ellok jen mol eo. “Bwe ien e naj itok,” ear je, “ñe re naj drike katak emõn, a kin mõm ko air re naj koorlok ro dri kaki ñõn ir mõke, eremõm lojiliñiir; im re naj okõtõklok lojilñiir jen mol, im naj ilok ñõn bwebwenato rewan.”—2 Timote 4:3, 4.
9. Ta eo emaroñ kar bed ilo lemnak eo an Paul ke ear jitõñlok ñan “bwebwenato ko rewan”?
9 Jen air debij wõt joñok in nan ko remõn, jet ear jarjar kõnan eo air kin “bwebwenato ko rewan.” Ta kar bwebwenato wan kein? Bõlen ear bed ilo lemnak eo an Paul inoñ ko, einwõt ko jej loi ilo book eo ewõr bere ie etan Tobit.a Ak emaroñ kar bar koba ilo inoñ kein nan in roñiluial ko kin eñjake im lemnak ko ejelok menin kamoli. Inem, bareinwõt, jet—“kin kõnan eo air make”—remaroñ kar bõk kabo jen ro rar kõtlok juõn melim in lemnak eo kin kien ko an Anij ak ro rar einwõt lo notan ro rar tel ilo congregation eo. (3 Jon 9, 10; Jude 4) Jabdewõt menin kabañ kin lakatip ko rar walok, jet ealikar rar kõnan wõt men ko rejjab mol jen mol ko ilo Nan in Anij. Ejjabto rar bõjrak jen air kaminene wõt kin men ko rar katak, im menin ear menin jorrãn ñan mour in jitõb eo air make.—2 Piter 3:15, 16.
10. Ta jet bwebwenato ko rewan ilo ran kein, im ewi wãwen an John kar kalikar juõn aikwij ñan kejbãrok?
10 Jemaroñ bõprae ad oktaklok ñan bwebwenato ko rewan rainin elañe jej etale im kãlet men eo jej roñjake im men eo jej read. Ñan wanjoñok, jikin kõmman news ko ekkã air kalaplok mour in etton. Elõñ armij rej kõketak armij ñan tõmak bwe ejelok armij emaroñ jelã kajjen Anij ak tõmak bwe ejelok Anij. Elaplok an ri notata ro notaiki an Bible eo ba bwe ej kakõrmol in kwojarjar. Im ri buñ jen tõmak ro ilo ran kein rej etal wõt im kajeoñ in jeor ine in bere ko ñan jolok tõmak eo an Christian ro. Ikijen juõn kauwatata eo einlok wõt im ri kanan wan ro ilo ebeben eo kein kajuõn rar kwalok, ri jilek John ear kakkõl: “Ro jitenburu, komin jab tõmak jitõb otemjej, a melejoñ jitõb rõn elañe rej jen Anij ke jab ke, bwe elõñ dri kanan riõp r’ar driojilok na ilo lõl.” (1 Jon 4:1) Inem jej aikwij kejbãrok.
11. Ta juõn wãwen eo ñan melejoñe im lale elañe jej bed ilo tõmak eo?
11 Ilo wãwen in, Paul ear je: “Komin mõke melejoñ kom elañe kom ber ilo tõmak eo.” (2 Dri Korint 13:5) Ri jilek eo ej rejañ kij ñan ad melejoñe wõt kij make im lale elañe jej debij wõt aolepen tõmak ko an Christian. Elañe lojilñid ej itok wõt in errã ibben men ko rejõkkar, jej aikwij etale kij make ilo jar. (Sam 139:23, 24) Jej itok wõt ke in lo likjap ko ibben armij ro an Jehovah? Elañe eindein, etke? Jaar lõkatip ke nan ko ak kõmman ko an juõn armij? Elañe eindein, jej lemnak wõt ke kin men ko ilo juõn wãwen eñjake eo ejimwe im watõke ilo ad keidi ibben jabdewõt wãwen ko jet? Jabdewõt eñtan eo jej jelmaiki ilo jukjuk im bed in ej ñan jidik wõt ien. (2 Dri Korint 4:17) Meñe jej ion jet melejoñ ilo congregation eo, etke jej aikwij bõjrak jen ad karejar ñan Anij? Elañe jej inebata kin juõn men, ejjab laplok an emõn ke ñan kõmmane men eo jemaroñe ñan lo mejelan wãwen eo inem likit ilo pein Jehovah?—Sam 4:4; Jabõn Kennan Ko 3:5, 6; Dri Epesõs 4:26.
12. Ewi wãwen an kar Ri Beroea ro likit juõn joñok emõn ñan kij?
12 Jen ad itok wõt in notaiki ro jet, jen debij wõt juõn jitõb in ejmour im lemnak wõt kin melele eo jej bõk ikijen ad katak ibbed make im ilo kwelok ko an congregation eo. (1 Dri Korint 2:14, 15) Im jen ad bere ak akwele Nan in Anij, elaplok an menin meletlet ñan bõk lemnak eo an Ri Beroea ro ilo ebeben eo kein kajuõn ro rar kanuij etale Jeje ko! (Jerbal 17:10, 11) Inem, jen jerbale men eo jej katak, kajekdon bwebwenato ko rewan im eddeb wõt ñan mol eo.
13. Ewi wãwen ad maroñ ilo ad jab jelã kake kajeeded bwebwenato ko rewan?
13 Ebar wõr juõn kain bwebwenato wan jej aikwij kejbãrok kij jene. Elõñ bwebwenato ko rekabwilõñlõñ rej kajeededi, ekkã wõt ikijen E-mail. Ej menin meletlet ñan kejbãrok jen kain bwebwenato rot in, elaptata elañe jejjab jelã kin ia eo bwebwenato eo ear itok jen e. Meñe juõn bwebwenato eo juõn Christian emol ear jilkintok, armij in emaroñ kar jab juõn ri kamol kin mol ko ak ear jab lo kin mejen. Eñin unin elap tokjen bwe jen kejbãrok ilo ad eliji ak jilkinlok melele ko jejjab maroñ kamoli. Emol jenaj jamin kõnan eliji “inoñ ko ejelok ankilan Anij ie,” ak “bwebwenato ko rewan me rej kõtõrãik men eo ekwojarjar.” (1 Timote 4:7; New International Version) Ke ebar wõr juõn ad eddo ñan konono ilo mol ñan don, jej jerbal ilo meletlet ilo ad bõprae jabdewõt men eo enaj kõmman bwe jen ilo jab melele kake kajeeded lok men ko rejjab mol.—Dri Epesõs 4:25.
Tokjen ko Remol ilo Jerbale Mol
14. Ta tokjen ko rej walok kin ad jerbale men ko jaar katak jen Nan in Anij?
14 Jerbale men eo jej katak ikijen ad katak Bible im ilo kwelok ko an Christian enaj bõktok elõñ tokjen ko. Ñan wanjoñok, jemaroñ lo bwe kõtan ko ad ibben ro nukid ilo tõmak ej emõnlok. (Dri Galetia 6:10) Wãwen eo ad jej bed ie enaj oktak ñan an emõnlok ñe jej jerbale nan in kaiñi ko ilo Bible. (Sam 19:8) Bareinwõt, ad jerbale men eo jej katak, jej ‘kaibujuij katak eo an Anij’ im einwõt kañaltok ro jet ñan kabuñ eo emol.—Taitõs 2:6-10.
15. (a) Ewi wãwen an kar juõn jodikdik kõmman an beran ñan kennan ilo school? (b) Ta eo kwar katak jen bwebwenato in?
15 Ibwiljin Ri Kennan ro an Jehovah elõñ jodikdik ro rej jerbale men eo rar katak ikijen air katak Bible im book ko an Christian im bareinwõt ilo air ekkeini bed ilo kwelok ko an congregation eo. An emõn mwiliir ej juõn menin kennan ekajur ñan ri kaki ro im ri school ro ilo school. (1 Piter 2:12) Lemnak kin Leslie, juõn ledik 13-yiõ dettan ilo United States. Ej kamol bwe ekin lo an bin an konono ñan ri school ro mõttan kin tõmak eo an, ak juõn ran menin ear oktak. “Class eo ear konono kin wãwen an armij kajeoñ in wia kake men ko ñan yuk. Juõn ledik ear kajutak pein im kwalok einwõt juõn joñok kin Ri Kennan ro an Jehovah.” Einwõt juõn Ri Kennan, ewi wãwen an kar Leslie emmakit? “I ar jojomare tõmak eo aõ,” ej ba, “eo Ij tõmak ear kailbõk aolep, ke ekin lap wõt aõ ikõñ ilo school.” Ta tokjen eo ear walok kin beran eo an Leslie? “I ar maroñ likit juõn brochure im juõn tract ibben ri school eo, ke ear wõr bar jet an kajitõk,” Leslie ej ba. Ewi wãwen an Jehovah lañliñ ñe jodikdik ro rej jerbale men eo rar katak im ej kakajur ir ñan kennan ilo school!—Jabõn Kennan Ko 27:11; Dri Hibru 6:10.
16. Theocratic Ministry School ewi wãwen an kar wõr tokjen ñan juõn Ri Kennan jodikdik?
16 Bar juõn wanjoñok ej eo an Elizabeth. Ilo jinoin ke ej jiljilimjuõn yiõ dettan im ilo aolepen yiõ ko an ilo elementary school, ledik in ear kir ri kaki ro an ñan Kingdom Hall eo jabdewõt ien ej wõr kunan ilo Theocratic Ministry School. Elañe juõn ri kaki ear jab maroñ bed ilo kwelok eo, Elizabeth ear bed elikin school im kwalok konono eo ñan ri kaki eo. Ilo yiõ in school eo an eliktata ilo high school, Elizabeth ear je juõn report joñoul-page in kin tokjen ko jen Theocratic Ministry School eo im kõmmane juõn an konono iman juõn kumi in ri kaki emen uan (juõn emaan, jilu kõrã) Rar bareinwõt kiri bwe en kwalok juõn joñok in konono ilo Theocratic Ministry School, im unintel in konono eo ear kãlete kar “Etke Anij Ej Kõtlok Nana?” Elizabeth ear bõk tokjen jen program in school eo Ri Kennan ro an Jehovah rej kõmmane ilo Theocratic Ministry School. Ledik in ej juõn ian elõñ Christian jodikdik ro rej bõktok nebar ñan Jehovah ilo air jerbali men ko rar katak jen Nan eo an.
17, 18. (a) Ta nan in kakabilek eo Bible ej letok kin mol? (b) Mwil eo emol mwilin juõn ian Ri Kennan ro an Jehovah ewi wãwen an kar jelet juõn emaan?
17 Bible eo ej kõketak Christian ro bwe mwiliir en mol ilo men otemjej. (Dri Hibru 13:18) Jab mol emaroñ kokkure kõtan eo ad ibben ro jet im, elaplok tokjen, ibben Jehovah make. (Jabn Kennan Ko 12:22) Liki eo kin kij kin mwilid ej kamol bwe jej jerbale men ko katak, im kõmman bwe en lõñlok ro ej laplok air kautiej Ri Kennan ro an Jehovah.
18 Lemnak kin bwebwenato eo kin juõn emaan ri tarinae etan Phillip. Ear bwid an likit juõn check eo emwij an signi ak ear ejelok jabdewõt jeje ie im ear jab kile menin mae ien eo ear jeblaklok ñane ilo mail. Check eo juõn ian Ri Kennan ro an Jehovah ear loe, im ear wõr juõn ennan ear je im likiti ibben check eo im ennan eo ej ba bwe tõmak in kabuñ eo an armij eo ear loe ear kamakit bwe en kajeblaklok. Phillip ear lokjenan. “Remaroñ kar kwote iõ kin joñan in $9,000!” ear ba. Ear inebata ilo bar juõn ien ke rar kwote ãt eo an ilo imõn jar. Alikar, juõn eo ejelã kajjen ear bõk ãt eo an, ak ilo keidi juõn ruwamaejet ear karollok juõn check eo aorõkin thousand dollar! Emol, Christian ro remol rej bõktok nebar ñan Jehovah Anij!
Etal Wõt Im Jerbale Men Eo Kwar Katak
19, 20. Ewi wãwen ad naj bõk tokjen jen ad jerbal ilo errã ibben men ko ekkar ñan Jeje ko im jej katak?
19 Ro rej jerbale men eo rar katak jen Nan in Anij rej madmade elõñ tokjen ko remõn. Ri jilek James ear je: “A eo ej ber im liñõre kien in anemkwoj eo e wãppen, im jab dri roñjake eo ej meloklok, a e dri kõmõn ej jerbale, armij eo e naj mõnõnõ ilo an kõmõn.” (Jemes 1:25) Aet, elañe jej jerbal ekkar ñan men ko ilo Jeje ko im jaar katak, enaj wõr ibbed mõnõnõ eo emol im enaj emõnlok ad maroñ kamadmõde ijjibed ko ilo mour. Elaptata, jenaj bõk kajerammõn eo an Jehovah im jerammõn eo kin mour indio!—Jabõn Kennan Ko 10:22; 1 Timote 6:6.
20 Inem, kin melele kein otemjej, kwon etal wõt im jerbale yuk make ñan katak Nan in Anij. Ekkeini kobalok ibben ri kabuñ ro an Jehovah, im kanuij roñjake katak ko rej kwaloki ilo kwelok ko an Christian. Jerbale men eo kwar katak, debij wõt am kaminene kake, im “Anij in ainemõn e naj ber ibemi.”—Dri Pilippai 4:9.
[Kamelele ko itulal]
a Tobit, remaroñ kar je ilo ebeben eo kein kajilu B.C.E., ekoba tõmak ilo jitõb-bwebwenato eo an juõn Ri Jew etan Tobias. Rar ba kake bwe ewõr an kajur in kemour im ubakelok jitõb in dimon ro ilo an kajerbal menono, kilin im ajin juõn ek kileplep.
Kwoj Kememej Ke?
• Ta eo ej “joñok in nan ko remõn,” im ewi wãwen ad maroñ debij wõt?
• Ta “bwebwenato ko rewan” jej aikwij kajekdoni?
• Ta tokjen ko rej itok ñan ro rej jerbali men ko rej katak jen Nan in Anij?
[Pija eo ilo peij 15]
Ewi wãwen an Christian ro jinoin maroñ kar bõprae air jab belok ikijen ro rar buñ jen tõmak?
[Pija ko ilo peij 16]
Ine ko inen bere remaroñ jeori jen jikin kõmman news ko, jen Internet, im jen ro rar buñ jen tõmak ilo ran kein
[Pija eo ilo peij 17]
Ejjab menin meletlet ñan kajeeded report ko ejelok menin kamoli
[Pija ko ilo peij 18]
Ilo jikin jerbal, ilo school, im ijoko jabdewõt, Ri Kennan ro an Jehovah rej jerbale men eo rej read ilo Nan in Anij