Ia Eo Kwomaroñ Lo Ainemõn eo ilo Lemnak im Jitõb Ie?
Elõñ oktak ko ikõtan ien eo ad im eo an Thoreau, katak eo lok iman ear kamelele kake. Juõn oktak elap ej bwe ilo ran kein ejelok likjap kin nan in kakabilek ko kin ewi wãwen jemaroñ bõk ainemõn eo ilo lemnak. Psychologist im ro ri jeje book ko ñan jibañ kij make—elaptata ri jeje news ro—rej kwalok lemnak ko air. Kakabilek ko air remaroñ jibañ ilo tukaduin; ak ñan bõk mejelan ko etto air bed, ej aikwij wõr juõn men elaplok. Eñin men eo armij ro kajjojo ilo katak eo lok iman rar kile kake.
ANTÔNIO, Marcos, Gerson, Vania, im Marcelo rar kajjo jen don ilo wãweir im abañ ko air. Ak rar errã ibben don ilo men ko jilu. Moktata, juõn ien kar “ejelok kejatrikrik [ibbeir], im [rar] jibil jen Anij ilo lõl.” (Dri Epesõs 2:12) Kein ka ruo, rar kijoror kin ainemõn ilo lemnak. Im kein ka jilu, ir aolep rar lo ainemõn iloa elikin air katak Bible ibben Ri Kennan ro an Jehovah. Ke rar wõnmanlok ilo jitõb, rar kile bwe Anij ear itoklimo kin ir. Emol, einwõt an kar Paul jiroñ ri Athen ro ilo ran ko an, bwe Anij “E jab etolok jen kij otemjej.” (Jerbal 17:27) Ad lukkun tõmak kin men in ej juõn men elap ñan ad bõk ainemõn ilo lemnak im jitõb.
Etke Jidik Wõt Ainemõn?
Bible eo ej kwalok ruo un ko unin an dik ainemõn ilo lal in—elañe ejjab ainemõn ilo lemnak inem ainemõn ikõtan armij. Un eo kein ka juõn Jeremiah 10:23 (New World Translation), ej kamelele kake: “Emõn aõ jelã, O Jehovah, bwe ñan armij in lal in ial eo an ejjab an. Ejjab an armij eo ej etetal meñe ñan tel buñten neen.” Ejelok an armij meletlet ak lolokjen ñan iroij ion emake kin ejelok jibañ, im jibañ eo wõt ewõr tokjen eo emol ie ej itok jen Anij. Armij ro rejjab bukõt tel eo an Anij rejamin bõk ainemõn indio. Un eo kein ka ruo kin an ejelok ainemõn eo ej alikar ilo nan ko an ri jilek John: “aolepen lõl ej berwõt ilo dri nana eo.” (1 Jon 5:19) Ñe ejelok wãwen tel jen lañ, kõmman ko rekajur an—”dri nana eo,” Satan eo ej lukkun bed, renaj kabõjrak aolep wãwen ko an armij ro ñan bõk ainemõn.
Kin un kein ruo—bwe enañin aolep armij rejjab bukõt tel eo an Anij im bwe elap an Satan jerbal ilo lal in—armij ro an lal rej bed ilo juõn wãwen ekaburumõjmõj. Ri jilek Paul ear lukkun kalikar men in ke ear ba: “Aolepen men in kõmõn e mat im ñõr, im mat im iñtan ñõn ien in.” (Dri Rom 8:22) Wõn eo emaroñ jab errã kin watwat in? Ilo ailiñ ko remweie im ko rejeramel, abañ ko an family, kowadoñ, ekajet jab jimwe, lemnak ko an armij reidaptok ibben don, wãwen economy eo ejjab alikar an bed, kijirãte bwij ko im ailiñ ko, ijjibed, nañinmij im abañ ko jet, rej kwote ainemõn eo ilo lemnak jen armij.
Ia Eo Kwoj Lo Ainemõn Eo Ilo Lemnak im Jitõb Ie
Ke Antônio, Marcos, Gerson, Vania, im Marcelo rar katak kin Nan in Anij, Bible eo, men ko rar katak kaki kar ukõt mour eo air. Kin juõn men, rar katak bwe juõn ran wãwen lal in enaj oktak. Men in ejjab juõn kejatdikdik etab bwe men otemjej renaj oktak im emõn ilo ien jemlokin. Ej juõn liki emol, im bin bwe Anij ear kõmman juõn karõk kin armij im bwe jemaroñ bõk tokjen karõk in kiõ elañe jej kõmanmõn ankil an. Rar lo elaplok mõnõnõ im ainemõn jen air lemnak kake.
Antônio emwij an jolok kunan ilo jumae im kiojaljal ko kin jerbal. Ej jelã bwe ejjabto an oktak ko rej walok jen wãwen jumae kein bed. Lein eo ear ri tel in jerbal eo mokta ear katak kin Ailiñ eo an Anij. Ej Ailiñ eo bwe elõñ million armij ro rej jar kake ñe rej ba Jar eo an Iroij (ak, Jememuij ilañ) im ba ñan Anij: “En itok Am Ailiñ.” (Matu 6:10a, New International Version) Antônio ear katak kin Ailiñ eo an Anij einwõt juõn lukkun kien ilañ eo enaj bõktok ainemõn eo emol ñan armij.
Marcos ear katak in jerbale nan in kakabilek eo emeletlet an Bible ikijen mour in belele eo. Tokjen men in bwe, lein eo ear juõn ri politic eo mokta ej mõnõnõ kiõ kin an bar kobalok ibben lio belen. E bareinwõt, ej reimanlok wõt ñan ien eo, mõttan wõt jidik, bwe Ailiñ in Anij enaj bõk jikin jukjuk im bed in ekibbon kin eo juõn emõnlok. Ewõr ibben juõn melele emũlallok kin nan ko an Jar eo an Iroij ej ba: “Kõmanmõn ankil Am ion lal einwõt ilañ.” (Matthew 6:10b, NIV ) Ñe ededelok an kõmmane ankil an Anij ion lal, armij ro renaj bõk juõn joñan mour eo rejañin kar loe jen mokta ñan kiõ.
Ak ta kin Gerson? Ejjab juõn ri jebwãbwe im ri kwot. Mour eo an lein eo ear homeless mokta ewõr melelen kiõ kinke ej kajerbal kajur eo an ñan jibañ ro jet bwe ren lo ainemõn eo ilo lemnak. Bwebwenato kein rej kwalok bwe, katak Bible eo im jerbale men ko rej ba emaroñ ukõt mour eo an juõn armij bwe en emõnlok.
Ainemõn ilo Lemnak im Jitõb ilo juõn Lal Eabañ
Eo ej bedbed elap ñan kajejjet kitien ankil an Anij ej Jesus Christ, im ñe armij ro rej katak Bible ibben Ri Kennan ro an Jehovah, rej katak kin e. Boñen eo ear lotak, enjel ro rar al kin al in nebar ko an Anij: “Aibujuij ñõn Anij ilo utiejtata, im ainemõn ion lõl iben armij rõn E buñburuen kin ir.” (Luk 2:14) Ke Jesus ear rittolok, ear boub wõt ñan kakõmanmõnlok mour eo an armij. Ear melele kin eñjake ko air im tiriamokake ro rar eñtan im nañinmij. Im, ekkar ñan nan ko an enjel ro, ear lelok juõn joñan in ainemõn ñan ro rej inemõn. Ilo tujemlokin jerbal eo an, ear ba ñan ri kalor ro an: “Ainemõn Ij likit na ibemi, Aõ ainemõn Ij lewoj ñõn kom: Ña Ij lewoj ñõn kom, jab einwõt an lõl lewoj. En jab biuk buruemi, im en jab lelñoñ.”—Jon 14:27.
Jesus ear laplok jen an juõn ri jibañ armij. Ear keidi emake ñan juõn ri lale sheep, im kõkkar ri kalor ro an ñan bwijin sheep ke ear ba: “Bar jet Aõ s̃ip, re jab jen worwor in: emõn bareinwõt In añintok ir, im re naj roñ ainikiõ; im re naj juõn wõt bwij, im juõn s̃eperd.” (Jon 10:10, 11) Aet, jab einwõt elõñ ri tel ro in ran kein rej lemnak kin ir make mokta, Jesus ear lelok mour eo an ñan sheep ro an.
Ewi wãwen jemaroñ bõk tokjen jen men eo Jesus ear kõmmane? Elõñ rej jelã kin nan ko: “Kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.” (Jon 3:16) Jerbale tõmak ilo Jesus ej aikwij wõr, moktata, jelãlokjen kin e im Jemen, eo ej Jehovah. Jelãlokjen kin Anij im Jesus Christ emaroñ tellok ñan ad bõk juõn kõtan ebak ñan Jehovah Anij eo enaj jibañ kij ñan bõk ainemõn ilo lemnak.
Jesus ear ba: “Aõ s̃ip rej roñjake ainikiõ, im I jela ir, im rej lor Iõ: Im Ij lelok ñõn ir mour in drio; im re jamin joko in drio, im ejelok en e naj kwotak ir jen peiõ.” (Jon 10:27, 28) Elap an kainemõn im mãnãn nan kein! Emol, Jesus ear ba nan kein enañin ruo thousand yiõ ko remotlok, ak kajurin nan kein rej joñan wõt juõn einwõt ilo ien eo etto. Jab meloklok bwe Jesus Christ ej mour wõt im jerbal, im ej iroij kiõ einwõt King ilo Ailiñ in Anij. Einwõt ke ear etetal ion lal ilo yiõ kan etto, eindein an itoklimo kin ro rej inemõn ro rar kõnan bõk ainemõn ilo lemnak. Bareinwõt, ej Shepherd eo ñan bwijin sheep ro an. Elañe jej lore, enaj jibañ kij ñan bõk ainemõn eo ilo lemnak im jitõb, eo ekoba ad liki bwe jenaj lo ainemõn eo eyu ilo ran ko rej bedotok—im enaj melelen ejako kowadoñ, tarinae, im kõtõrei kien.
Tokjen ko remol rej itok jen ad jelã im tõmak bwe Jehovah, ikijen Jesus, enaj jibañ kij. Kwoj kememej wõt ke kin Vania, ledik eo ear aikwij bõk aolepen eddo ko ñan kabwe aikwij ko an family eo an im ear lemnak bwe Anij ear meloklok e? Kiõ Vania ej jelã bwe Anij ear jab illok jen e. Ej ba: Iar katak bwe Anij ej juõn jitõb emour im ewõr kadkad ko kadkadin yokwe. Yokwe eo an ear kamakit e ñan jilkintok Nejin ñan lal ñan kemour kij. Elap an aorõk ñan jelã kin men in.”
Marcelo ej kwalok bwe kõtan eo an ibben Anij ej mol an bed. Lein eo ear mõnõnõ wõt kin party ko mokta ear ba: “Jodikdik ro ekkã air jab jelã kin ta eo rej aikwij kõmmane, im ilo jemlokin rej kajorrãn ir make. Jet iair rej bõk uno ko rejõkkar ñan kamõnõnõik ir, einwõt ña mokta. Ij kejatdikdik bwe elõñlok armij renaj bõk jerammõn, einwõt ña, ilo air katak mol eo kin Anij im Nejin.”
ILo air etale Bible eo, Vania im Marcelo rar kaddek tõmak eo ekajur ilo Anij im liki bwe ej mõnõnõ in jibañ irro ilo abañ ko air. Elañe jej kõmman eindein—katak Bible im jerbali ta eo ej ba—jenaj lo ainemõn eo ilo lemnak im jitõb ñan juõn joñan elap, einwõt rar loe. Inem nan in rejañ eo an ri jilek Paul enaj jerbale ñan kij: “Komin jab inebata kin jabrewõt: a ilo men otemjej kin jar im akwelap kab kamolol, kajitõk ko ami ren walok ñõn Anij. Im ainemõn jen Anij, eo ej elã jen jela otemjej, e naj kejbãrok buruemi im lemnok ko ami ilo Kraist Jisõs.”—Dri Pilippai 4:6, 7.
Bukõt Ainemõn Eo Emol Ran Kein
Jesus Christ ej tel armij ro rekwuli kin mol eo ñan ial eo ñan mour indio ilo paradise eo ion lal. Ñe ej tel ir ñan kabuñ eo erreo an Anij, rej lo ainemõn eo ejja einwõt eo me Bible ear konono kake: “Ro dri ailiñ Aõ re naj jokwe ilo juõn imõn ainemõn, im ilo mo ko ejelok uota ie, im ilo jikin kakije re tõt wõt.” (Aiseia 32:18) Im men in ej jidik wõt ian ainemõn eo renaj lañliñ kake ilo ran ko renaj itok. Jej konono: “A ro etã burueir re naj jolit ene eo, im re naj kalõñliñ ir mõke kin ainemõn elõñlok. Ro remõn re naj jolit ene, im jokwe iloan ñõn in drio.”—Sam Ko 37:11, 29.
Inem jemaroñ bõk ke ainemõn eo ilo lemnak im jitõb ilo ran kein? Aet. Bareinwõt, jemaroñ liki bwe ilo ran ko renaj itok, Anij enaj kajerammõn ro etta burueir kin ainemõn eo ejañin kar wõr einwõt moktalok. Inem, etke kwojjab kajitõk ibben ilo jar bwe en lewoj ainemõn eo an? Elañe ewõr abañ ko am rej kwote ainemõn eo am, kwon jar einwõt King David: “Jorran ko an buruõ relaplok: O kwon bõktok iõ jen iñtan ko aõ. Kwon kalomõnlokjen kin aõ jorran im aõ iñtan, im jolok jerawiwi ko aõ otemjej.” (Sam Ko 25:17, 18) Kwon liki bwe Anij ej roñjake kain jar rot kein. Ej edlokwe pein im lelok ainemõn ñan aolep ro emol burueir rej bukõte. Ilo yokwe ej kallimure kij: “Jeova ej ebak ñõn ir otemjej rej kir ñõn E, ñõn ro otemjej rej kir ñõn E ilo mol. E naj kamol kõnan an ro remjõk E; e naj bareinwõt roñjake air lamij im lomorir.”—Sam Ko 145:18, 19.
[Kareelel ilo page 5]
Ejelok an armij meletlet ak lolokjen ñan tel emake ilo ejelok jibañ, im jibañ eo ewõr tokjen eo emol ej jen Anij wõt
[Kareelel ilo page 6]
Jelãlokjen kin Anij im Jesus Christ emaroñ tellok ñan ad bõk juõn kõtan ebak ibben Jehovah Anij eo enaj jibañ kij ñan bõk ainemõn ilo lemnak
[Pija ilo page 7]
Lor nan in kakabilek eo an Bible ej tellok ñan juõn mour in family eainemõn