Keañ Ilo Kijejeto News Eo Emõn

“Komin bõplolin ilo ami; komin jerbal ñõn Iroij [Jehovah].”​—DRI ROM 12:11.

1, 2. Kain lemnak rot eo Christian ro rej kate ir ñan kejbãroke einwõt ri kwalok ro kin news eo emõn?

JUÕN likao ej kijerjer kin juõn job ekãl. Ilo ran eo kein kajuõn ilo jikin jerbal eo an, ej kijoror in kõttar nan in jiroñ ko an boss eo an. Ej reimanlok ñan jerbal eo an mokta im ej kate e kake. Ej kijoror in kõmman joñan an maroñ.

² Ilo juõn wãwen einlok wõt, kij einwõt Christian ro jemaroñ watõk kij make einwõt ri jerbal ro rekãl. Kinke kejatdikdik eo ad ej ñan mour indio, jemaroñ ba bwe ej kab jino ad jerbal ñan Jehovah. Emol elõñ jerbal ko ri Kõmanmõn eo ad ej lemnak ñan ad kõmmani me renaj kaboub kij ñan indio. Ak jerbal eo moktata jaar bõke kar ñan keañ kin news eo emõn kin Ailiñ eo an. (1 Dri Tessalonika 2:4) Ewi eñjake eo ad kin jerbal in jen Anij? Einwõt likao eo, jekõnan kajejjete ilo joñan ad maroñ, kin kijejeto, im ilo lañliñ​—aet, ilo kijerjer!

3. Ta eo juõn ri karejar kin news eo emõn ej aikwiji ñan lo tõbrak?

³ Emol, ñan kejbãrok juõn lemnak emõn emaroñ juõn aitwerõk elap. Ijellokin jerbal in kwalok nan eo ad, elõñ eddo ko jet ad, jet iair remaroñ kaddo kij ilo enbwinid im ilo eñjake. Elõñ alen, jemaroñ lolorjake men kein ke ilo ejja ien eo wõt lale jerbal in kwalok nan eo ad. Ak, jemaroñ aikwij wõnmanlok im kate wõt kaki. (Mark 8:​34) Jesus ear kalikar bwe ñan ad lo tõbrak einwõt Christian ro jej aikwij kate kij.​—Luk 13:24.

4. Ewi wãwen inebata ko jen ran ñan ran rej jelet lemnak eo ad ilo jitõb?

⁴ Kin an lõñ men ko jej aikwij kõmmani, ebidodo ad eñjake air iabuñi kij jet ien. “Inebata ko an lõl in” remaroñ kautameik kijejeto im kamolol eo ad kin makitkit ko rej theocratic. (Luk 21:34, 35; Mark 4:​18, 19) Kinke jejjab wãppen, jemaroñ ilok jen ‘yokwe eo ad mokta.’ (Reveles̃õn 2:​1-4) Jet wãwen ko kin jerbal eo ad ñan Jehovah remaroñ einwõt juõn manit. Ewi wãwen Bible eo ej letok ñan kij nan in rejañ ko jej aikwiji bwe kijejeto eo ad kin jerbal in kwalok nan en emmourur?

Einwõt “juõn Kijeek Eurur” ilo Buruõd

5, 6. Ewi kar lemnak eo an ri jilek Paul kin jerammõn eo an ñan kwalok nan?

⁵ Jerbal in kwalok nan me Jehovah ear letok ñan kij elap an aorõk ñan kõtlok bwe en juõn jerbal bajjek. Ri jilek Paul ear watõk jerbal in kwalok nan kin news eo emõn einwõt juõn jerammõn elap, im ear watõk e make einwõt an jab tellokin bõke. Ear ba: “Ña, I rik jen eo eriktata ian ro remõn otemjej, emwij letok joij in ñõn iõ, bwe in kwalok ñõn ro dri ailiñ ko mweiuk ko an Kraist, ko je ban bukot im loi; Im kalo armij otemjej kin jerbal in men eo etino, eo jen eto im eto e ar nojõk ilo Anij eo E ar kõmõnmõn men otemjej.”​—Dri Epesõs 3:​8, 9.

⁶ Lemnak emõn eo an Paul kin jerbal in kwalok nan eo an ej juõn joñok emõn ñan kij. Ilo letter eo an ñan ri Rome, ear ba: “Einwõt aõ maroñ, I pojõk bwe in kwalok gospel.” Ear jab jook kin news eo emõn. (Dri Rom 1:​15, 16) Ear bed lemnak eo ejimwe ibben im ear kijoror in kajejjet jerbal in kwalok nan eo an.

7. Ilo letter eo an ñan Ri Rome, Paul ear kakkõl kin ta eo?

⁷ Ri jilek Paul ear kile aikwij eo ñan kejbãrok juõn lemnak ekijejeto, inem ear rejañ Christian ro ilo Rome: “Kin kijejeto, komin jab jowõn; komin bõplolin ilo ami; komin jerbal ñõn Iroij.” (Dri Rom 12:11) Nan in Greek eo rej ukõte “jowõn” ewõr lemnak in “jammourur.” Meñe jejjab emmadmad ilo jerbal in kwalok nan eo ad, kij aolep jej aikwij ekkõl kin jabdewõt kakõlle in jammourur ko ilo jitõb im kõmman oktak ko rekkar ilo lemnak eo ad elañe jej lo kakõlle kein ilo kij make.​—Jabõn Kennan Ko 22:3.

8. (a) Ta eo ear einwõt “juõn kijeek eurur” ilo buruen Jeremiah, im etke? (b) Ta eo jemaroñ katak jen experience eo an Jeremiah?

⁸ Jitõb an Anij emaroñ bareinwõt jibañ kij ñe ewõr juõn jitõb in ebwerer ibbed. Ñan wanjoñok, juõn ien ri kanan eo Jeremiah ear eñjake an iten ebwer, im ear lemnak in kabõjrak jerbal in kanan eo an. Bareinwõt ear ba kin Jehovah: “I jamin konono kin e, im jab bar konono ilo etan.” Men in ear kamol ke bwe ekar wõr juõn likjap elap ilo jitõb ibben Jeremiah? Jaab. Ilo mol, mour in jitõb eo an Jeremiah ekajur, yokwe eo an ñan Jehovah, im kijejeto eo an kin mol eo ear kakajur e ñan wõnmanlok im kanan wõt. Ear kamelele: “Ilo buruõ [nan eo an Jehovah] ear einwõt juõn kijeek eurur ilo dri ko driõ; im iar mõk in debiji, im iar jab maroñ bed kake.” (Jeremiah 20:​9, New World Translation) Ekkã an ri karejar ro retiljek an Anij iion jitõb in ebwer jen ien ñan ien. Ak ñe rej jar ñan Jehovah kin jibañ, enaj lo burueir im lelok jitõb kwojarjar eo an ñan ir elañe, einwõt Jeremiah, nan eo an ej bed ilo burueir.​—Luk 11:​9-​13; Jerbal 15:8.

“Komin Jab Kwũne Jitõb Kwojarjar”

9. Ta eo emaroñ kautameik jerbal eo an jitõb kwojarjar ilo tokjen eo ad ?

⁹ Ri jilek Paul ear rejañ ri Thessalonica ro: “Komin jab kwũne Jitõb Kwojarjar.” (1 Dri Tessalonika 5:​19) Aet, kõmman ko im lemnak ko rej nae kien ko rekwojarjar remaroñ kautameik jitõb kwojarjar jen an jerbal ilo tokjen eo ad. (Dri Epesõs 4:​30) Christian ro rainin ewõr jerbal eo ñan kwalok kin news eo emõn. Jej jerbale jerammõn in ilo kautiej eo emũlal. Ejjab kailbõk kij ñe ro rejjab jelã Anij rej kijirãte jerbal in kwalok nan eo ad. Ak ñe juõn Christian ej jerwane jerbal in kwalok nan eo an, emaroñ walok ilo an kun kijeek in jitõb eo ekamakitkit an Anij.

10. (a) Ewi wãwen lemnak eo ad kin armij emaroñ jelet kij? (b) Lemnak ta eo eutiej kin jerbal in kwalok nan eo ad 2 Korint 2:​17 ej kwalok kake?

¹⁰ Ro jet ilikin congregation in Christian remaroñ watõk jerbal in kwalok nan eo ad einwõt juõn jerbal in baj leto-letak book ko wõt. Ro jet remaroñ bõk jemlok eo ebwid bwe jej etal jen em ñan em ñan bõk wõt jabawõt. Elañe jej kõtlok bwe lemnak rot kein renana ren jelet lemnak eo ad, men in emaroñ kadiklok bolemen in jerbal in kwalok nan eo ad. Jen ad kõtlok bwe lemnak rot kein ren jelet kij, jen kejbãrok lemnak eo ewõr ibben Jehovah im Jesus kin jerbal in kwalok nan eo ad. Ri jilek Paul ear konono kin lemnak in eutiej ke ear ba: “Bwe kim jab einwõt elõñ, ro rej [“wiakake,” NW] nan in Anij; a einwõt jen mol, a einwõt jen Anij, iman mejen Anij, kimij konono ilo Kraist.”​—2 Dri Korint 2:​17.

11. Ta eo ear kamaroñ Christian ro mokta ñan air kijejeto wõt iumin matõrtõr, im ewi wãwen joñok eo air en jelet kij?

¹¹ Mokta lok jidik jen an kar Jesus mij, ri karejar ro an ilo Jerusalem rar jelmae juõn ien matõrtõr. Kar kamijak im kakien ir ñan kabõjrak air kwalok nan. Ak, Bible ej ba bwe ir otemjej “robrõk kin Jitõb Kwojarjar, im kin air beran rej kwalok nan in Anij.” (Jerbal 4:​17, 21, 31) Jet yiõ ko tokelik nan ko an Paul ñan Timothy kar kwalok bwe Christian ro rar aikwij kejbãrok juõn lemnak emõn. Paul ear ba: “Bwe Anij e ar jab letok ñõn kij jitõb in lelñoñ, a jitõb in kajur im yokwe im kajime. Inem kwon jab jok kin kennan an ar Iroij, ak kin iõ dri prisõn eo An, a kwon bõk mõtõn iñtan ko an gospel kin kajur an Anij.”​—2 Timote 1:​7, 8.

Jej Muri Kin Ta eo Ñan Ri Turid?

12. Ta un eo elaptata unin ad kwalok kin news eo emõn?

¹² Bwe en wõr juõn lemnak emõn kin jerbal in kwalok nan eo ad, ej aikwij wõr juõn un ejimwe eo ej kamakit kij. Etke jej kwalok nan? Jemaroñ lo un eo elaptata ilo nan ko an ri jeje psalm: “Ro remõn Am re naj kamõnõnõik Yuk [Jehovah]. Re naj ba kin aibujuij in ailiñ eo Am, im naj konono kin Am kajur. In kwalok ñõn ro nejin armij men ko rekajur E ar kõmõnmõni, im aibujuij in utiej eo An.” (Sam Ko 145:10-​12) Aet, jej kwalok nan bwe jen maroñ nebar Jehovah ilobwilij im ñan kokwojarjar etan iman armij otemjej. Meñe eiet armij rej roñjake, ad keañ ilo tiljek kin ennan in lomor eo enaj bõktok nebar ñan Jehovah.

13. Ta eo ej kamakit kij ñan jiroñ ro jet kin kejatdikdik eo kin lomor?

¹³ Jej bareinwõt kwalok nan kin yokwe eo ad ñan armij im ñan bõprae ad bõk ruõn kin bõtõktõk. (Ezekiel 33:​8, NW; Mark 6:​34) Ekkejel ibben men in rej nan ko an Paul ke ear konono kin ro ilikin congregation in Christian: “Ña dri muri ñõn ro dri Grik, im ñõn ro dri pegan; ñõn ro re meletlet im ñõn ro re jab meletlet.” (Dri Rom 1:​14) Paul ear eñjake bwe ear muri ñan armij ñan keañ kin news eo emõn ñan ir, bwe ej ankil an Anij bwe en “lomoren armij otemjej.” (1 Timote 2:4) Rainin, jej eñjake ejja yokwe im eddo eo wõt kin ri turid. Yokwe eo an Jehovah ñan armij ear kamakit e ñan jilkintok Nejin ñan lal in ñan mij kin ir. (Jon 3:​16) Men in kar juõn men in katok elap. Jej kajeoñe yokwe eo an Jehovah ñe jej kajerbal ien im jibadbad ko ad ñan jiroñ ro jet kin news eo emõn kin lomor eo ej wawa ion katok eo an Jesus.

14. Ewi wãwen Bible eo ej kwalok kin lal eo ilikin congregation an Christian?

¹⁴ Ri Kennan ro an Jehovah rej watõk armij einwõt ro remaroñ erom ro uan dolul in jimjãn jimjatin in Christian. Jej aikwij kwalok nan ilo beran, ak beran eo ad ejjab juõn eo ej jumae. Ilo mol, Bible eo ej kajerbal nan ko rekajur ñe ej konono kin lal in. Paul ej kajerbal nan eo “lal” ilo juõn wãwen enana ke ear konono kin “meletlet in lõl” im “mõm ko an lõl.” (1 Dri Korint 3:​19; Taitõs 2:​12) Paul ear bareinwõt kakememej Christian ro ilo Ephesus bwe ke rar etetal im “lor ial in lõl in,” rar “mij” ilo jitõb. (Dri Epesõs 2:​1-3) Ennan kein im ko jet einwõt ir rej errã ibben nan ko an ri jilek John: “Aolepen lõl ej berwõt ilo dri nana eo.”​—1 Jon 5:⁠19.

15. Ikijen armij ro kajjojo ilikin congregation an Christian, ta eo jejjab kõmmane, im etke jab?

¹⁵ Ak, kememej bwe ennan rot kein rej jitõñlok ñan lal eo ejebel jen Anij, jab ñan armij ro kajjojo. Christian ro rejjab ilo wãlok ekajet lok iman kin ewi wãwen armij renaj uak ñan jerbal in kwalok nan. Ejelok juõn bedbed ibbeir ñan kwalok kin jabdewõt armij bwe rej einwõt goat ko. Ejjab kunad ñan ba ta eo enaj walok ñe Jesus enaj itok in kejebel “s̃ip ko” jen “goat ko.” (Matu 25:31-​46) Kar jitõñ Jesus einwõt ri ekajet eo; ejjab kij. Bareinwõt, experience ear kwalok bwe jet ro me ear lukkun nana mwiliir rar bõk ennan eo ilo Bible, ukõt wãweiir, im erom Christian ro emõn mwiliir. Kin men in, meñe jejjab bukõt ad kamao ibben jet armij, jejjab ãliklik in konono ibbeir kin kejatdikdik in Ailiñ eo ñe ej walok ien eo emõn. Jeje ko rej konono kin jet armij ro, meñe rejjab ri tõmak, kar “likit ir bwe ren mour in drio.” (Jerbal 13:48) Je ban jelã wõn eo ej tellokin bõk mour mae ien jej kwalok nan ñan ir​—bõlen elõñ alen. Ilo ad lemnak kin men in, jej jerbal ibben ro rejañin bõk ennan in lomor eo ilo “inemõn” im “mijõk,” im kejatdikdik bwe jet iair renaj uak ilo emõn ñan ennan in mour.​—2 Timote 2:​25; 1 Piter 3:​15.

16. Ta juõn ian un ko jekõnan kaddek “kabel in katakin” eo?

¹⁶ Kaddek kabel ko einwõt ri kaki ro renaj kalaplok kijoror eo ad ñan keañ kin news eo emõn. Ñan kwalok juõn wanjoñok: Juõn ikkure ekairujruj loje emaroñ juõn men in jalimo ñan juõn armij ejaje kilen ikkure kake. Ak ñan juõn eo ej tijemlok in ikkure, ekamõnõnõ. Eindein, Christian ro me rej kaddek “kabel eo in katakin” rej kalaplok lañliñ eo air ilo jerbal in kwalok nan. (2 Timote 4:2; Titus 1:​9, NW) Paul ear rejañ Timothy: “Kwon kate yuk bwe Anij en lo kwo mõn, dri jerbal e jamin jok im ejimewõt an katakin kin nan in mol.” (2 Timote 2:​15) Ewi wãwen jemaroñ kaddek kabel ko ad in katakin?

17. Ewi wãwen jemaroñ “mako” ak kaddek juõn kõnan kin jelãlokjen eo an Bible, im ewi wãwen jelãlokjen rot in emaroñ wõr tokjen ñan jerbal in kwalok nan eo ad?

¹⁷ Juõn wãwen ej ilo ad bõk jelãlokjen eo ejimwe. Ri jilek Peter ej rejañ kij: “Im einwõt niñniñ rej kab lotak, komin mako milk emõn im erreo wõt, bwe komin edreklok kake ñõn lomor.” (1 Piter 2:2) Ilo an jab katak, juõn niñniñ eo emõn an mour ej jelã mako milk. Bõtab, juõn Christian emaroñ aikwij “mako” ak kaddek juõn kõnan ñan jelãlokjen eo ilo Bible. Emaroñ kõmman men in ilo an kaddek manit ko remõn kin read im katak. (Jabõn Kennan Ko 2:​1-6) Kate im kajimwe e make rej men in aikwij ko elañe jekõnan erom ri kaki ro rekabel kin Nan in Anij, ak jibadbad kein rej bõktok tokjen ko remõn. Mõnõnõ eo ej itok jen ad etale Nan in Anij enaj kõmman ad bõplolin kin jitõb an Anij, im kijoror ñan jaketo-jaketak ibben ro jet men ko emwij ad katak kaki.

18. Ewi wãwen kwelok ko an Christian remaroñ kamaroñ kij bwe en jimwe wõt ad katakin nan in mol?

¹⁸ Kwelok ko an Christian rej bareinwõt aorõk ñan kamaroñ kij ñan ad kabel in kajerbal Nan in Anij. Ñe rej readi eon ko ilo Bible ilo public talk ko im katak ko jet, ej emõn elañe jej lori ilo Bible ko ad make. Ej men in meletlet ñan ad liñõre katak ko ilo kwelok ko, ekoba ko elap an jerbale jerbal in kwalok nan eo ad. Jen jab kadiklok aorõkin demonstration ko, im kõtlok ad mad kin men ko jet. Bar juõn alen, kajimwe kij make im kalmenlokjen rej men in aikwij ko. (1 Timote 4:​16) Kwelok ko an Christian rej kalek tõmak eo ad, jibañ kij kaddek juõn kõnan kin Nan in Anij, im kamineneik kij bwe jen ri keañ ro rekijejeto kin news eo emõn.

Jemaroñ Liki Jurake eo an Jehovah

19. Etke bõk kunad ilo jerbal in kwalok nan eaorõk?

¹⁹ Christian ro me rej “bõplolin ilo [air]” im rej kijejeto in keañ kin news eo emõn rej kate ir ñan keini air bõk kunair ilo jerbal in kwalok nan. (Dri Epesõs 5:​15, 16) Emol, wãwen ko rej oktak jen don, im ejjab aolep remaroñ kajerbal ejja joñan ien eo wõt ilo jerbal in lomor in. (Dri Galetia 6:​4, 5) Ak, bõlen men eo elaplok an aorõk jen joñan ien eo jej kajerbale ilo jerbal in kwalok nan ej emakijkij in ad konono kin kejatdikdik eo ad ñan ro jet. (2 Timote 4:​1, 2) Elaplok ad kwalok nan, enaj laplok ad kamolol kin aorõkin jerbal in. (Dri Rom 10:14, 15) Tiriamokake eo ad naj laplok ñe ej keini ad kebak armij ro emol burueir me rej jañ im limõ im ejelok air kejatdikdik.​—Ezekiel 9:​4, NW; Dri Rom 8:​22.

20, 21. (a) Jerbal ta eo ej bed wõt imad? (b) Ewi wãwen Jehovah ej jurake jibadbad ko ad?

²⁰ Jehovah ilo liki ear letok ñan kij news eo emõn. Eñin jerbal eo moktata jaar bõk jen e einwõt “dri jerbal [ro] ibben Anij.” (1 Dri Korint 3:​6-9) Jej kijoror in kajejjet eddo eo eletok in Anij, ilo joñan wõt ad maroñ. (Mark 12:30; Dri Rom 12:1) Ewõr wõt ilo lal in ro jabdewõt ar likit ir bwe ren mour me rej kwuli kin mol eo. Ej lõñ wõt jerbal ko jej aikwij kõmmani, ak jemaroñ liki bwe Jehovah enaj jurake kij ñe jej kajejjet jerbal eo ad.​—2 Timote 4:5.

²¹ Jehovah ej letok ñan kij jitõb eo an im “jãji an Jitõb,” Nan in Anij. Kin jibañ eo an jemaroñ walõñi loñid im “beran in kwalok men eo etino in gospel.” (Dri Epesõs 6:​17-​20) Jen kõtlok bwe ren ba kin kij men eo Paul ear jeje lok ñan Christian ro ilo Thessalonica: “Ekijkan gospel eo am e ar jab iwij ñõn kom ilo nan wõt, a bareinwõt ilo kajur im ilo Jitõb Kwojarjar, im lap an rel buruemi.” (1 Dri Tessalonika 1:5) Aet, jen keañ ilo kijejeto news eo emõn!

Juõn Elij Ekadu

• Kin inebata ko an mour, ta eo emaroñ walok ñan kijejeto eo ad ilo jerbal in kwalok nan?

• Ilo wãwen et eo kõnan eo ad ñan keañ kin news eo emõn en einwõt juõn “kijeek eurur” ilo buruõd?

• Jej aikwij bõprae lemnak ta ko renana kin jerbal in kwalok nan?

• Ewi wãwen jen lemnak kin ro rejjab errã ibben tõmak ko ad?

• Ewi wãwen Jehovah ej jibañ kij ñan kejbãrok kijejeto eo ad ilo jerbal in kwalok nan?

[Pija ilo page 19]

Christian ro rej kajeoñe kijejeto eo an Paul im Jeremiah

[Pija ilo page 20]

Yokwe eo ñan Anij im ri turid ej kamakit kijejeto eo ad ilo jerbal in kwalok nan