Wãwen eo Wõt ñan Jolok Kijirãt

“Ejelok kijirãt ñe ejelok mijak. . . . Jej kijirãte men eo jej mijak inem ijo kijirãt ej bed, mijak ej bed ie.”—CYRIL CONNOLLY, LITERARY CRITIC AND EDITOR.

ELÕÑ sociologist ro rej tõmak bwe kijirãt ej bed itumũlal in lemnak eo an armij. “Juõn joñan elap in kijirãt in emaroñ kar wõr to in jarom ko,” emwij ekkejeli ñan wãwen makitkit eo an armij ro, juõn scientist in kien ear ba.

Jemaroñ melele bwe ri katak ro kin wãwen armij rej tõbar kain jemlok rot kein. Men ko wõt rej katak kaki ej maan im kõrã ro rar lotak ilo “jab wãnik” im “jerawiwi,” ekkar ñan eon eo ekakõrmol an Bible. (Sam Ko 51:5) Ri Kõmanmõn eo make, ke ear watõk armij ro rejjab wãppen elõñ thousand yiõ ko remotlok, “ear lo bwe elap nana ko an armij ion lõl, im bwe lemnok otemjej i buruen renana wõt aolepen ien.”​—Jenesis 6:5.

Kalijeklok armij, im kijirãt eo ear walok jen e rar waloktok jen men in jolet kein jab wãppen im kibbon. (Duteronomi 32:5) Ekaburomõjmõj, bwe ejelok juõn jar in armij ak kien, jekdon ta kien eo air, rar maroñ ukõt buruen armij ro ilo kain lemnak rot kein. Ri news eo ilo juõn ailiñ etolok Johanna McGeary ear ba: “Ejelok juõn ri police ekajurtata ibelakin lal, jekdon elañe ekajur otem kajur, emaroñ jolok kijirãt ilo Bosnia, Somalia, Liberia, Kashmir, the Caucasus ijo ej torlok wõt kin bõtõktõk.”

Bõtab, mokta jen ad kabukõt wãwen mejelan abañ ko, jej aikwij melele kin ta eo ej bed ilikin kijirãt.

Kijirãt Ej Waloktok jen Mijak

Ejelok bere, jet ian un ko unin an kijirãt walok ilo ien kein ad rej itok jen kõtan ko an armij im economy. Eñjake in kalijeklok ko rekajur im kijirãt ekkã ad loe ilo jikin ko me eiet ri mweie ro ie. Bareinwõt, ekkã an walok kijirãt ilo jikin ko me elõñ armij ro jen ailiñ ko jet rej emmakit lok ñan e im kabañ wãwen an ro rej jokwe ijo mour.

Jet armij rej lemnak bwe ri ailiñ rein rekãl renaj jiaik ir kin jerbal ko air, jerbal kin dik wõnãn, ak kõmman bwe wõnãn jikin jokwe eo en diklok. Elañe kain mijak rot kein rej mol ak jab ej bar juõn men in ad jelmae. Mijak in luji men in mweie ko im mijak bwe kien ko an jukjuk im bed eo ak wãwen mour enaj jorrãn rej un ko relap unin an walok kalijeklok im kijirãt.

Ta buñten ne eo kein kajuõn ñan kajemlok kijirãt in? Ukõt lemnak ko an armij.

Ukõte Lemnak ko

“Oktak eo emol ej make wõt itok jen bebe eo an armij ro me men in ej jelete,” McGeary ear ba. Im ewi wãwen an maroñ ukõt bebe eo an armij? Emwij kamol bwe men in kareelel eo ekajurtata ñan makitkit nae kijirãt eo ej jen Nan in Anij, Bible eo. Ej mol men in kinke “nan in Anij ej mour im jerbal wõt, im ekõñ jen jabrewõt jãji ruo mejen, im ej wie im bukwe an armij im jitõb, im mokwõj ko im nononmej, im e mõkõj an kili lemnok ko im bebe ko an buru.”​—Dri Hibru 4:​12.

Emol, bwe jolok kalijeklok im kijirãt ejjab maroñ baj walok wõt, im ejjab walok ilo juõn wõt ran. Ak emaroñ joloki. Jesus Christ, eo elap an kamakit buruen armij im bõklikit ko, ear maroñ kamakit armij ñan ukõt mour eo air. Elõñ million armij rar lo tõbrak ilo air lor nan in kakabilek eo emeletlet an Jesus Christ: “Komin yokwe ro dri kijirate kom, im jar kin ro rej matõrtõr kom.”​—Matu 5:​44.

Ilo an kamol nan in katakin ko an, Jesus ear kobaik ri tel owõj eo Matthew einwõt juõn ian ro jeran im ear liki eo me ri jew ro rar kijirãte. (Matu 9:9; 11:19) Bareinwõt, Jesus ear jinoe juõn wãwen kabuñ eo emol im ear kadeloñ elõñ thousand ro rejjab ri Jew emo air bed iloan mokta im rar kijirãte ir. (Dri Galetia 3:​28) Armij ro ibelakin lal eo mokta rar erom ri kalor ro an Jesus Christ. (Jerbal 10:34, 35) Armij rein kajjojo rar buñbuñ kin yokwe eo air elap. (Jon 13:35) Ke ri kijirãt ro rar kade Stephen ri kalor eo an Jesus ñan mij, nan in jemlok ko an kar: “O Iroij kwon jab narueir ilo jerawiwi in. Stephen ear kõnan bwe ri kijirãt ro an ren bõk men eo emõntata.​—Jerbal 6:​8-​14; 7:​54-​60.

Christian ro remol ran kein rar uak ñan nan in kakabilek eo an Jesus ñan kõmman emõn, jab ñan Christian ro jeiir im jatiir wõt, ak ñan ro rej kijirãte ir bareinwõt. (Dri Galetia 6:​10) Rej kate wõt ir ñan jolok kijirãt jen mour ko air. Ilo air kile ta men ko rekajur remaroñ kaddek kijirãt ilo ir, rej emmakit ilo jimwe ñan ukõt kijirãt ñan yokwe. Aet, einwõt juõn ri meletlet etto ear ba, “men in kakitõtõ ej biuktõki akwail ko a yokwe ej kalibubu bwir ko otemjej.”​—Jabõn Kennan Ko 10:12.

Ri jilek Jon ear ba: “Jabrewõt eo ej kijirãte jein im jatin ej dri uror, im kom jela bwe mour in drio e jab berwõt ilo jabrewõt dr’uror.” (1 Jon 3:​15) Ri Kennan ro an Jehovah rej tõmak kin men in. Kin men in, rej kuktok ibben don kiõ​—jen kil, manit, kabuñ, im wãwen kien ko otemjej​—ñan juõn jukjuk im bed eo eburukuk, ejelok kijirãt ie, juõn jimjera eo iaolepen lal.​—Lale box in kamelele ko itulal.

Kijirãt Enaj Jako!

‘Ak,’ kwomaroñ ba, ‘ej emõn wõt ñan armij ro men in ej jelete. Bõtab, men in ejamin jolok kijirãt jen ibelakin lal.’ Emol, meñe kijirãt ejjab bed ilo buruõm, emaroñ wõt jelet yuk. Inem jej aikwij reilok ñan Anij ñan bõktok mejelan eo emol kin abañ in ej jelet aolepen lal.

Anij ej karõk in jolok aolep tibdik ko tibdikin kijirãt jen lal in mõttan jidik. Men in enaj walok iumin iroij eo an kien ilañ eo me Jesus ear katakin kij ñan jar kake: “Jemeruij ilõn en kokwojarjar etõm. En itok am ailiñ. En kõmõnmõn ankil am, ion lõl einwõt ilõñ.” (Matu 6:​9, 10) Ñe enaj uake jar in ilo wãwen eo eyu, wãwen ko rej kõmman kijirãt renaj jako.

Kiõ ewõr news eo emõnlok! Ewõr men in kamol ko remol rej kamol ad mour ilo “ran ko eliktata.” Kin men in, jemaroñ liki bwe mõttan jidik jenaj lo an kijirãt jako jen lal. (2 Timote 3:​1-5; Matu 24:​3-​14) Ilo lal eo ekãl emwij an Anij kallimur kake, juõn jitõb eo kin jimjãn im jimjatin enaj bed kinke armij ro otemjej renaj jeblak ñan mour eo ewãppen.​—Luk 23:43; 2 Piter 3:​13.

Kimij karuwaineneik yuk bareinwõt ñan bõk kunam ilo dolul in jimjãn jimjatin eyokwe!