Mõnõnõ Indio Ilo Lañ Ke Ak Ion Lal?

MÕNÕNÕ eo am ej atartar wõt ke ion jikin eo kwoj jokwe ie? Enañin aolep armij renaj ba bwe elaplok an mõnõnõ atartar ion men ko einwõt ejmour eo emõn, juõn unin mour, im kõtan ko remõn ibben armij ro jet. Juõn jabõn kennan in Bible eo ej kamelele kake ilo wãwen in: “Emõnlok mõña koninene, ijo yokwe ej ber, jen ñe juõn ox e uwe, im eor kijirãt.”​—Jabõn Kennan Ko 15:17.

Bõtab, ekaburomõjmõj bwe, jikin jokwe eo ad lal in ear obrak kin kijirãt, kowadoñ, im elõñ kain nana ko jet jen etto. Ak ta kin lañ, jikin jitõb eo, ijo elõñ armij rej kejatdikdik in etal ñan e elikin air mij? Ear juõn jikin ainemõn im jokane ien otemjej ke, im ejelok jabdewõt kain bwok, einwõt rar lemnak kake?

Bible ej katakin bwe Anij ej jokwe ilañ im elõñ million jitõb ro rej naetan enjel ro ibben. (Matu 18:10; Reveles̃õn 5:​11) Rar einwõt ro “nejin Anij” ilo jitõb. (Job 38:​4, 7) Einwõt armij ro, ewõr an enjel ro maroñ ñan kãlet ilo anemkwoj wõn rekõnan karejar ñan e bareinwõt; rejjab robot. Kin men in, ir bareinwõt remaroñ kãlet in kõmman emõn ak kõmman nana. Enjel ro renaj kãlet in kõmman nana ke? Emaroñ juõn men in bwilõñ ñan jet armij ñan katak bwe elõñ thousand yiõ ko remotlok, juõn joñan elap in enjel ro rar, ilo mol, jerawiwi nae Anij​—rar jumae e!​—Jud 6.

Ri Jumae Ro Ilañ

Jerawiwi ear walok ilo jikin jitõb eo kin an juõn enjel jumae, eo ear erom Satan (Ri Jumae eo) im Devil (Ri Ruruwe eo). Enjel in eo ear kiblie mokta ear kãlet in kõmman nana kin kõnan eo an make. Tokelik ear erom juõn eo ear kareel jitõb ro jet bwe ren kõmman nana, im ilo ien eo an Noah, mokta jen Ien Ibwijleplep eo, juõn joñan elap iair rar kobalok ibben Satan ñan jumae Anij​—Jenesis 6:2, footnote; 2 Piter 2:4.

Enjel rein emwij air bo rar kadiojlok ir ilo mõkaj. Jen men in, kar kõtlok ir bwe ren bed wõt​—alikar ilo jet kaje ko⁠—iumin elõñ thousand yiõ ko. Bõtab, ke Anij ear kajemlok an kijenmij kin ri nana rein, ear “jolok“ ir jen lañ, bwe ren mij ilo ran ko rej bed imad. Inem juõn ainikien jen lañ ear ba: “Kin men in komin lõñliñ, O lõñ ko, im komeo komij jokwe iloir!” (Reveles̃õn 12:​7-​12) Alikar, enjel ro retiljek rar lañliñ bwe, ri nana rein rar jako jen lañ ko!

Ilo ad lemnak kin tibdik kein jab aolep rar jelã kake, alikar bwe emaroñ ejelok ainemõn eo emol ñe armij ak jitõb ro remeletlet rej kajekdon kien im kaiñi ko an Anij. (Aiseia 57:20, 21; Jeremiah 14:19, 20, New World Translation) Itu rãjet, ñe aolep rej bokake kien Anij, ainemõn im jokane renaj walok im bed. (Sam Ko 119:165; Aiseia 48:17, 18) Inem elañe armij otemjej rej yokwe im bokake Anij im yokwe don, lal in ejjab maroñ erom ke juõn jikin elemõnõnõ? Bible eo ej uak aet!

Ak ta kin ro rej rejjab kõnan ukõt burueir jen wãwen ko renana? Renaj kokkure ke ainemõn eo an ro rekõnan kõmanmõn ankil an Anij? Jaab, Anij ear kajeik enjel ro renana ilañ, im enaj kajeik armij ro renana ion lal bareinwõt.

Juõn Lal Emwij Karreoike

Anij ej ba, “Lõñ ej aõ tron, im lõl eran neiõ.” (Aiseia 66:1) Kinke ej kwojarjar otem kwojarjar, Anij ejamin kõtlok bwe nana en katton “eran” neen ñan indio. (Aiseia 6:​1-3; Reveles̃õn 4:8) Einwõt ear jolok jitõb ro renana jen lañ, eindein enaj jolok armij ro renana otemjej jen lal, einwõt jeje kein tok ilal:

“Bwe ro rej kõmman nana renaj jako; a ro rej kõttar Jehovah renaj jolet lal.”​—Psalm 37:​9, NW.

“Ro rejimwe renaj jokwe ion lal, im ro ejelok rueir renaj bedwõt ion. Ak ro renana, naj kamakit ir jen lal; im ro rej jelã mon naj totak ir jen e.”​—Proverbs 2:​21, 22, NW.

“Im lõl [in armij ro renana] e jokolok im mõm ko an: a eo ej kõmõnmõn ankil an Anij ej berwõt in drio.”​—1 Jon 2:​17.

Lal In Enaj Ke Bedwõt ilo Ainemõn?

Meñe Jeje ko rekwojarjar rej kalikar bwe ewõr joñan kijenmij eo an Anij kin ro renana, jemaroñ ke tõmak bwe, ñe ejako nana, ejamin bar walok? Kinke, elikin Ibwijleplep eo ilo ran eo an Noah, ear bar walok ñan joñan eo me Anij ear aikwij in bwokõj kajin eo air.​—Jenesis 11:​1-8.

Un eo elaptata ñan ad tõmak bwe nana ejamin bar walok ej bwe armij ro rejamin iroij ion lal einwõt kar walok elikin wõt jen ien Ibwijleplep eo. Ak, Ailiñ in Anij enaj iroij ion. Ilo an iroij jen lañ, Ailiñ in wõt enaj make kien eo an lal. (Daniel 2:​44; 7:​13, 14, NW) Enaj jerbal ilo mõkaj nae jabdewõt eo ej kajeblaktok nana. (Aiseia 65:20) Emol, mõttan jidik enaj kokkure eo ej unjen nana​—Satan Devil eo​—im demon ro an, enjel ro renana rar lore.​—Dri Rom 16:20.

Etke Jet Rej Etal ñan Lañ

Bõtab, elõñ ri konono Bible ro, rej jelã kin nan ko an Jesus: “Ilo imõn Jema elõñ jikin. . . . Ij ilen kapojõk jikõmi.” (Jon 14:​2, 3) Men in ejjab ke jumae lemnak eo kin mour indio ilo juõn paradise ion lal?

Katak kein rejjab jumae don. Ilo mol, rej rejetak don. Moktata, Bible eo ej kwalok bwe ewõr juõn joñan oran ri Christian ro retiljek​—144,000​—renaj kar jerkakbiji einwõt jitõb ro ñan mour ilañ. Etke rej lelok ñan ir ãjinkij in eaibujuij? Kinke rej jar im armij ro Jon ear loe ilo juõn vision im “r’ar mour im kiñ iben Kraist iomin juõn tausan yiõ. (Reveles̃õn 14:​1, 3; 20:​4-6) Keidi ibben elõñ billion armij ro ion lal, emol 144,000 rej juõn “bwij erik.”​—⁠Luk 12:32.

Jokãlet eo Ad​—Mour ak Mij

Ta eo jej aikwij kõmmane ñan bõk jerammõn in mour indio ilo Paradise eo ion lal? Buñten ne eo kein kajuõn ej ñan katak Nan in Anij, Bible eo Ekwojarjar. “Men in mour in drio,” Jesus ear ba ilo jar, “bwe ren jela Kwe juõn wõt Anij emol, im Jisõs Kraist, eo Kw’ar jilkintok.”​—Jon 17:3.

Jerbale jelãlokjen in ej buñten ne eo juõn ñan mõnõnõ indio. (Jemes 1:​22-​24) Ro rej mour ekkar ñan Nan in Anij ewõr juõn kejatdikdik ñan lo juõn lal en erom juõn Paradise, einwõt an Bible eo kallimur kake.