Ta Eo Ailiñ In Anij Enaj Kõmmane
“En itok Am Ailiñ. Ren kõmõnmõn ankil Am i lõñ, bareinwõt ion lõl.”—MATU 6:10.
1. Ta naj melelen itok eo an Ailiñ eo?
KE Jesus ear katakin ri kalor ro an bwe ren jar kin Ailiñ in Anij, ear jelã bwe itok eo an enaj kar bõktok juõn jemlok ñan thousand yiõ ko in an armij iroij im jenoloklok ian jen Anij. Ilo aolepen ien ko, ankilan Anij kar jab kõmanmane ion lal. (Sam Ko 147:19, 20) Ak elikin kar ejaake Ailiñ in Anij ilo lañ, ankilan Anij naj kõmanman ijoko otemjelok. Ien eo ñan oktak eo ekabwilõñlõñ jen an armij iroij ñan an iroij Ailiñ eo an Anij ilañ ekanuij in ebaktok.
2. Ta eo enaj kakõlleik oktak eo jen an armij iroij ñan an Ailiñ eo iroij?
2 Ñan kakõlleik oktak in enaj jejjet ilo tõre eo Jesus ear naetan “elap iñtan, eo e jañin einwõt jen jinoin lõl ñõn ien in, aet, e jamin einwõt tokelik.” (Matu 24:21) Bible ejjab kalikar aetokin naj ien in, ak jorrãn ko renaj walok ilo ien in renaj nanalok jen jabdewõt men lal in ear loe. Ilo jinoin eñtan eo elap, enaj walok juõn menin lokjenan elap ñan enañin aolep armij ro ion lal: jeebeplok eo an kabuñ wan ko otemjej. Menin ejamin juõn menin lokjenan ñan Ri Kennan ro an Jehovah, kinke etto air kõttare menin. (Reveles̃õn 17:1, 15-17; 18:1-24) Eñtan eo elap ej jemlok ilo Armageddon ñe Ailiñ in Anij enaj kabedakilkil aolepen jukjuk im bed eo an Satan.—Daniel 2:44, New World Translation; Reveles̃õn 16:14, 16.
3. Ewi wãwen an Jeremiah kwalok kin jemlok eo an ro rejjab bokake?
3 Ta naj melelen menin ñan armij ro “rejaje Anij kab ro rejjab bokake news eo emõn” kin Ailiñ eo an ilañ ilo pein Christ? (2 Thessalonians 1:6-9, NW) Kanan eo ilo Bible ej jiroñ kij: “Lo! Juõn jorrãn ej etal jen ailiñ ñan ailiñ, im juõn lañ elap enaj make walok liñtak jen mõttan ko retoloktata ilal. Im ro Jehovah enaj kokkure ir renaj ilo ran en jen juõn jabõn lal lok ñan jabõn eo juõn in lal in. Ejelok en enaj buromõj kake ir, im rejamin aintok ir in kalbwin ir. Renaj bed ion bũdej einwõt kũbwe.”—Jeremiah 25:32, 33, NW.
Jemlokin Nana
4. Etke Jehovah ej kamol ilo kajemlok jukjuk im bed in enana?
4 Iumin thousand yiõ ko, Jehovah Anij ear kõtlok nana, ñan joñan eo ebwe an aetok bwe ro emol burueir ren lo bwe an armij iroij ej juõn menin jorrãn elap. Ñan wanjoñok, ilo ebeben in kein ka 20 make, elõñlok jen 150 million armij rar mij ilo tarinae ko, bwoktak ko ñan ukõt juõn kien [government], im keojaljal ko jet, ekkar ñan juõn unjen melele. An armij lej rar lo menin ilo Bata eo an Lal kein Ka II ke jet 50 million armij rar mõn ir, im elõñ wõt iair rar mij kin wãwen ko rekamijak ilo camp in kalbuj eo an Nazi ro. Einwõt an kar Bible kanan, ilo ien kein ad ‘armij ro renana im ri jelã mon renaj wõnmanlok wõt jen nana ñan lukkun nana.’ (2 Timote 3:1-5, 13) Rainin, mour in ãjãj, rupe kien, kowadoñ, nana, im kajekdon kien ko an Anij ekanuij lap. Kin menin, Jehovah elukkun jimwe ilo an bõktok jukjuk im bed in enana ñan jemlokin.
5, 6. Kwalok joñan nana eo ear bed ilo Canaan eo etto.
5 Wãwen eo kiõ ej einlok wõt eo ilo Canaan jet 3,500 yiõ ko remotlok. Bible eo ej ba: “Bwe jabrewõt men in jõjõik ñõn Jeova, men eo Ej drike, rar kõmõn ñõn anij ro air, bwe rej tili bareinwõt nejir man im kõra ilo kijeek ñõn anij ro air.” (Duteronomi 12:31) Jehovah ear kejelãik ailiñ in Israel: “Kin nana an ro ri ailiñ kein Jeova am Anij ej kadriojlok ir jen imam.” (Duteronomi 9:5) Ri jeje bwebwenato in Bible eo Henry H. Halley ear lo: “Bwe kabuñ eo ñan Baal, Ashtoreth, im anij ko jet an ri Canaan ro rar kõmmani ilo wãwen ko ekakijoñjoñ air ãjãj, temple ko air kar jikin ko ear jarjar nana jeni.”
6 Halley ear kwalok kin joñan an kar etal im lukkun kajjõjõ nana ko air, bwe ilo juõn ian jikin ko relõñ, archaeologist ro (ro rej katak kin men ko ibulen bũdej) rar “lo oran jãbe ko relõñ im ewõr bwen mõttan enbwinin ajiri ro rar katok kake ir ñan Baal.” Ear ba: “Aolepen melan eo ear juõn jikin kallip ñan niñniñ ro rej kab lotaktok. . . . Ri Canaan ro rar kabuñ, ilo wãwen mour etton eo rej kajju buruen don kake, einwõt juõn mantin kabuñ, iman anij wan ro air; inem, mõn manje ro nejiir, einwõt juõn menin katok ñan ejja anij wan kein wõt. Einwõt bwe, ilo juõn joñan eo elap, enen Canaan ear erom juõn jikin einwõt Sodom im Gomorrah ilo juõn joñan elap. . . . Juõn jukjuk im bed eo ekajjõjõ im etton im lej ewõr ke an jimwe bwe en tolok wõt an bed? . . . Archaeologist ro rar kũb ilo jikin ko rar jorrãn ilo Canaan rar bwilõñ bwe Anij ear jab tarlokboke ir moktalok wõt jen ien eo ear kokkure ir.”
Jolete Lal In
7, 8. Ewi wãwen an naj Anij karreoik lal in?
7 Einwõt an kar Anij karreoik Canaan, ejjabto enaj karreoik aolepen lal im lelok ñan ro rej kõmanman ankilan. “Bwe ro re jime re naj jokwe ilo lõl. Im ro re wãppen re naj berwõt ie. A ro re nana, naj kamõkit ir jen eneo, im ro re jela mon, naj totõk ir jen e.” (Jabõn Kennan Ko 2:21, 22) Im ri jeje Sam ej ba: “Bwe jirik wõt ien, im eo enana e naj jako . . . A ro etã burueir re naj jolit ene eo, im re naj kalõñliñ ir mõke kin ainemõn elõñlok.” (Sam Ko 37:10, 11) Bareinwõt naj jolok Satan, bwe “en jab bar mon dri ailiñ ko ñõn ter eo naj jejit juõn thousand yiõ ko.” (Reveles̃õn 20:1-3) Aet, “lõl e jokolok im mõm ko an; a eo ej kõmõnmõn ankil an Anij ej berwõt in drio.”—1 Jon 2:17.
8 Ñan tarlepe aolepen kejatdikdik eo elap ñan ro rej kõnan mour indio ion lal, Jesus ear ba: “Emõnõnõ ro etã burueir; bwe renaj jolit lõl.” (Matu 5:5) Einwõt ear jitõñlok ñan Sam 37:29, eo ear kanan: “Ro remõn re naj jolit ene eo, im jokwe iloan ñõn in drio.” Jesus ear jelã bwe kar karõk eo an Jehovah bwe ro rewãnik ren jokwe ilo juõn paradise ion lal ñan indio. Jehovah ej ba: “Iar kõmõnmõn lal in, im armij, im menin mour otemjej ion lal, kin kajur eo aõ elab; inem imaroñ leloke ñõn jabdewõt eo ikõnan . . . , im I ar lelok ñan ro rar kamol air jimwe ilo meja.”—Jeremiah 27:5, NW.
Juõn Lal Ekãl Eaibujuij
9. Ta kain lal eo Anij enaj jeblaktok?
9 Elikin Armageddon, Ailiñ in Anij enaj bõktok juõn “lõl ekãl” im aibujuij eo “wãnik enaj bed ie.” (2 Piter 3:13) Enaj juõn ellã im deod elap ñan ro renaj ellã im mour jen Armageddon bwe enaj jako ijjibed ko an jukjuk im bed in enana! Renaj mõnõnõ bwe renaj deloñlok ilo lal eo ekãl im wãnik iumin kien eo an Ailiñ in lañ, kin jerammõn ko rekabwilõñlõñ im mour indio eo rej kalimjeklok!—Reveles̃õn 7:9-17.
10. Ta men ko renana rejamin bed iumin an Ailiñ eo iroij?
10 Armij rejamin bar lelñoñ kin tarinae, kõtõrãik kien, kwuli, ak meñe menin mour ko rawia. “Inaj kejemlok ibben [armij ro aõ] juõn bujen ainemõn, im I naj lukkun kõmman bwe menin mour awia ko rej kõmman jorrãn ren jako jen ene eo . . . Im wijki in melaj eo en kalle leen, im ene eo make enaj kouwa, im renaj lukkun kamol air bed ilo bũdej eo air ilo jokane.” “Renaj aikwij jolok jãje ko air na ilo kein kabidodo bũdej ko im made ko air na ilo kein jekjek ujoj ko. Rejamin kotak jãje, nae ailiñ, im rejamin bar katak tarinae. Im renaj lukkun jijet, kajjojo iumin wijki vine eo an im iumin wijki fig eo an, im enaj ejelok en ej kõmman menin air wũdiddid.”—Ezekiel 34:25-28, NW; Micah 4:3, 4, NW.
11. Etke emaroñ wõr ibbed liki eo bwe nañinmij ko an enbwin renaj jako?
11 Nañinmij, buromõj, im meñe mij renaj jako. “Inem ro rej jokwe ie rejamin ba: ‘I nañinmij.’ Armij ro rej jokwe ilo ene eo enaj ro emwij jolok rueir kin bwid eo air.” (Isaiah 33:24, NW) “[Anij] E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta rejoko. ‘Lo, Ij kõmõn men otemjej bwe ren ekãl.’ ” (Reveles̃õn 21:4, 5) Ke ear bed ion lal, Jesus ear kalikar maroñ eo an ñan kõmmani men ko kin kajur eo Anij ear lelok ñan e. Kin jutaklik eo an jitõb kwojarjar eo, Jesus ear etal ilujen ene eo im kemour ro renañinmij.—Matu 15:30, 31.
12. Ta kejatdikdik eo ewõr ñan ro remij?
12 Elõñlok men Jesus ear kõmmane. Ear kajerkak ri mij ro. Ewi wãwen an kar armij ro ettã burueir emmakit? Ke ear kajerkak juõn ledik eo 12 yiõ dettan, jemen im jinen rar “bwilõñ kin elap bwilõñ.” (Mark 5:42) Menin kar bar juõn wanjoñok in ta eo Jesus enaj kõmmane ibelakin lal iumin an Ailiñ eo iroij, bwe ilo ien en “ro remõn im ro renana re naj jerkakbiji.” (Jerbal 24:15) Kalmenlokjen kin kabwilõñlõñ eo elap ñe kumi elikin kumi in armij ro remij rej bar jeblaktok im mour im rej kobaik ir ibben jitenburu ro air! Ejelok bere enaj wõr juõn jerbal elap in katakin iumin tel eo an Ailiñ eo bwe “lõl e naj obrõk kin jela Jeova einwõt dren ko rej kalibubu lojit.”—Aiseia 11:9.
Kajur Bõtata eo an Jehovah Rej Kalikare
13. Ewi wãwen naj kwalok wãnik in an Anij iroij?
13 Ilo jemlokin thousand yiõ ko in an Ailiñ eo iroij, family eo an armij enaj kar dedelok kajeblaktok ñan wãppen ilo lolãtãt im enbwin. Lal in enaj juõn jikin kallip in Eden ibelakin lal, juõn paradise. Ainemõn, lemõnõnõ, jokane, im jukjuk im bed eo an armij ewõr yokwe ie enaj dedelok tõbari. Ejañin kar wõr ilo bwebwenato in armij mokta jen an Ailiñ eo iroij ear wõr jabdewõt men rar loe einwõt in. Enaj juõn oktak elap emwij kar kalikare ikõtan thousand yiõ ko lok iman in an nana an armij iroij im iroij eo ekabwilõñlõñ an Ailiñ in Anij ilañ in juõn thousand yiõ ko! Iroij eo an Anij ikijen Ailiñ eo an emwij kalikare an kajur bõtata ilo jabdewõt wãwen. Jimwe eo an Anij in iroij, kajur bõtata eo an, enaj kar dedelok kalikare ilo likieo in.
14. Ta eo enaj walok ñan ro rej jumae ilo jemlokin thousand yiõ ko?
14 Ilo jemlokin thousand yiõ ko, Jehovah enaj kõtlok an armij ro rewãppen jerbale anemkwoj in jokãlet eo air kin wõn eo rej kõnan karejar ñane. Bible eo ej kwalok bwe renaj “kõtlok Setan jen prisõn eo an.” Enaj bar kajeoñ in tel biloik armij ro, jet iair renaj kãlet air jenoloklok iair jen Anij. Ñan kabõjrak ‘jorrãn jen an wanliñtak ilo alen eo kein karuo,’ Jehovah enaj kajeebeplok Satan, im dimon ro an, im aolep ro rej jumae kajur bõtata eo an Jehovah. Ejelok juõn emaroñ jumae im ba bwe jabdewõt armij ro rej kokkure ir ñan indio ilo ien en ear jab wõr juõn air ien emõn ak bwe ial eo air ebwid kar kin jab wãppen. Jab, renaj wãppen einwõt kar Adam im Eve, ro rar kãlet ilo mõnõnõ in jumae jimwe in iroij eo an Jehovah.—Reveles̃õn 20:7-10; Nahum 1:9, NW.
15. Ta kõtan eo ibben Jehovah enaj wõr ibben ro rej tiljek?
15 Ilo ijo turãjet, einwõt jarlepju in armij ro renaj kãlet ñan air debij wõt kajur bõtata eo an Jehovah. Ibben an jako jabdewõt eo ej jumae, ro rewãnik renaj jutak iman Jehovah, einwõt ke emwij air ellã jen melejoñ eo eliktata in tiljek. Rein retiljek Jehovah enaj bõk ir einwõt ro nejin maan im kõrã. Kin menin renaj jeblaktok ñan loan kõtan eo ibben Anij eo ear wõr ibben Adam im Eve mokta jen air kar jumae. Eindein, Dri Rom 8:21 enaj jejjet kitien: “Bwe bareinwõt men in kõmõnmõn [armij] e naj mejõl jen kamokoko an wabõnbõn, ñõn iloan anemkwoj in aibujuij an ro nejin Anij.” Ri kanan Isaiah ej kanan: “[Anij] E ar warõñlok mij ñõn in drio; im iroij Jeova e naj kõmraik dren in kemjalal jen mejeir otemjej.”—Aiseia 25:8.
Kejatdikdik eo in Mour Indio
16. Etke ejimwe reimanlok ñan jinekjej eo kin mour indio?
16 Ej juõn jerammõn emõn ej kõttar ro retiljek, in jelã bwe Anij enaj ñan indio utdikdik laltak ioir juõn lutõklok eo kin jerammõn ko ilo jitõb im mweiuk! Ri jeje Sam ear jimwe an ba: “Kwoj erlokwe peiõm im kamat air kõnan ñõn men otemjej remour.” (Sam 145:16) Jehovah ej rejañ ro uan jar eo ilal bwe en wõr ibbeir kejatdikdik in kin mour ilo Paradise einwõt mõttan tõmak eo air ilo e. Meñe unleplep eo kin kajur bõtata eo an Jehovah elaplok an aorõk, ejjab kajitõk bwe armij ro ren karejar ñan e ilo ejelok kõtmene kin juõn jinekjej. Ilo aolepen Bible eo, tiljek ñan Anij im kejatdikdik eo kin mour indio rej jimor koba ibben don im ej aikwij mõttan tõmak eo an Christian ilo Anij. “Eo ej itok ñõn Anij, emõn en tõmak kin an Anij ber, im kin An letok jinekjij ñõn ro rej kabukot E.”—Dri Hibru 11:6.
17. Ewi wãwen an kar Jesus kwalok bwe ear jimwe ñan ad maroñ bed wõt kin kejatdikdik eo ad?
17 Jesus ear ba: “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Ijin ear karõktok jelãlokjen kin Anij im karõk ko an ibben jinekjej eo me menin ej bõktok. Einwõt juõn wanjoñok, ke juõn ri kõmman bwid ear kajitõk bwe en kememeje elikin an Jesus itok ñan Ailiñ eo an, Jesus ear ba: “Kwo naj ber iba ilo paradise.” (Luk 23:43) Ear jab jiroñ leo bwe en wõr an tõmak meñe ear jab bõk juõn jinekjej. Ear jelã bwe Jehovah ekõnan bwe ro ri karejaran en wõr air kejatdikdik kin mour indio ion juõn paradise ilal ñan jibañ debij wõt ir ke rej ion elõñ kajjo kain melejoñ ko ilo lal in. Kin menin, ilo reimanlok ñan jinekjej eo menin ej juõn jibañ elap tokjen ilo kijenmij einwõt juõn Christian.
Ilju eo An Ailiñ eo
18, 19. Ta eo enaj walok ñan King eo im Ailiñ eo ilo jemlokin Iroij eo ilo Millennium?
18 Ke Ailiñ eo kar kien eo Jehovah ear kajerbale ñan kajeblaktok lal in im armij ro ie ñan wãppen im kakon kõtan eo air ibben, ta jerbal eo an King eo Jesus Christ im 144,000 king ro im pris ro elikin Millennium eo? “Inem, jemlokõn, ñe ej lelok ailiñ ñõn Anij, aet, Jemen; ñe e naj emwij An kalotlok kajur otemjej an iroij rõn kab kieir im air maroñ otemjej. Bwe emõn En iroij ñõn ter eo emwij An likit ro otemjej rej kijirãt E iomin neen.”—1 Dri Korint 15:24, 25.
19 Ñe Christ ej karollok Ailiñ eo ñan Anij, ewi wãwen ad melele kin jeje ko rekwojarjar me ej konono kake einwõt ej bed ñan indio? Tõbrak ko an Ailiñ eo renaj kijenmij ñan indio. Christ enaj bõk nebar ñan indio kin jerbal eo an ilo jerbale ñan kowãnik kajur bõtata eo an Anij. Ak ke jerawiwi im mij enaj dedelok joloki, im emwij binmouri armij, menin ej kajemlok aikwij eo ñan e einwõt juõn Ri Binmour. Iroij eo an Ailiñ eo iumin Millennium enaj dedelok kõtõbrake; inem enaj ejelok juõn aikwij ñan juõn kien eo ej jibañ bwe en bed wõt ikõtan Jehovah im armij ro rej bokake. Kin menin, “Anij en otemjej ilo otemjej.”—1 Dri Korint 15:28.
20. Ewi wãwen ad maroñ lo ta eo ilju eo ej keboje ñan Christ im 144,000 eo?
20 Ta jerbal eo ilo ilju eo ej itok enaj an Christ im iroij ro mõttan elikin an dedelok Iroij eo ilo Millennium eo? Bible eo ejjab ba. Ak, jemaroñ liki bwe Jehovah enaj lelok ñan ir elõñ jerammõn ko ilo jerbal eo ilo menin kõmanman eo an. Kij otemjej rainin jen debij wõt kajur bõtata eo an Jehovah im bõk melim eo ñan mour indio, bwe ilo ilju eo ej itok, jenaj mour ñan ad lo ta eo Anij ear karõke ñan Ailiñ eo im King eo im king ro im pris ro rejetan, im bareinwõt ñan aolepen ijoko otemjej ilañ im ilal im rekabwilõñlõñ!
Un ko ñan Elij
• Ta oktak eo ilo jerbal in iroij jej ebaklok?
• Ewi wãwen an naj Anij ekajete ro renana im ro rewãnik?
• Ta wãwen ko renaj bed ilo lal eo ekãl?
• Ewi wãwen naj kowãnik kajur bõtata eo an Jehovah?
[Pija]
“Enaj wõr jerkakbiji ñan ro rewãnik im ro rej jab wãnik”
[Pija]
Ro retiljek renaj jeblaktok ñan kõtan eo emõn ibben Jehovah