Christian Ro Rej Lo Mõnõnõ Ilo Jerbal

“Elaplok mõnõnõ ilo lelok jen bõk.”​—ACTS 20:​35, New World Translation.

1. Ta lemnak eo ebwid ej jededlok rainin, im etke ej menin kajorrãn?

ILO yiõ ko eliktata ilo tõre eo 1900, “me-ism” kar nan eo ekkã roñjake. “Me-ism ” ej melelen, ilo mol, “ña mokta” im ej kalikar juõn lemnak eo ej kobaik lemnak in kibbon im ankwonak ibben an jabwe in lemnak kin ro jet. Jemaroñ tõmak bwe ilo yiõ in 2000, lemnak in ña mokta ejjab mij. Jete alen am roñ kajitõk kein, “Ta eo ie ñan ña?” ak, “Ta tokjen eo I naj bõk jene?” Juõn lemnak in kibbon eo einwõt in ejjab kamõnõnõ. Ej lukkun tujorãjet in kien eo Jesus ear ba: “Elaplok mõnõnõ ilo lelok jen bõk.”​—Jerbal 20:⁠35, NW.

2. Ewi wãwen ad lo bwe lelok ej bõktok mõnõnõ?

² Emol ke bwe lelok ej bõktok elaplok mõnõnõ jen bõk? Aet. Lemnak kin Jehovah Anij. Ibben ej “unjen mour.” (Sam 36:9) E ej letok jabdewõt men jej aikwiji ñan kõmman bwe jen mõnõnõ im en wõr tokjen ad mour. Emol, e ej Unjen “men in letok emõn im wãppen otemjelok.” (Jemes 1:​17) Jehovah, “Anij e mõnõnõ” emakijkij an letok wõt. (1 Timote 1:​11) Ej yokwe armij ro rej an menin kõmanman, ro elap an lelok ñan ir. (Jon 3:​16) Lemnak, bareinwõt, kin juõn family in armij. Elañe kwe juõn jemen ak jinen ajiri, kwo jelã jete men ko kwoj karmijeteik yuk kaki, ewi joñan eo kwoj lelok, ñan kakajiririk juõn ajiri. Im ilo elõñ yiõ ko ajiri eo ejjab jelã kin menin karmijeteik ko kwoj kõmmani. Ej baj bõk wõt men kein. Ak, ej menin kamõnõnõik yuk in lo an ajiri eo nejõm eddeklok einwõt juõn tokjen eo kin am kar jab kibbon in lelok. Etke? Kinke kwoj yokwe e.

3. Etke ej juõn menin mõnõnõ ñan jerbal ñan Jehovah im ri tõmak ro mõttad?

³ Ilo juõn wãwen eo einlok wõt, kabuñ eo emol ej walok kadkadin ikijen menin lelok eo ej bedbede ion yokwe. Ke jej yokwe Jehovah im jej yokwe ri tõmak ro mõttad, ej juõn men in lañliñ ñan jerbal ñan ir, ñan lelok kij make ñan ir. (Matu 22:37-​39) Jabdewõt eo ej kabuñ kin un ko rekibbon ej bõk jemlok eo in an lo jidik wõt lañliñ. Ak ro rej jerbal ilo ejelok kibbon, ke ej laplok air lemnak kin ta eo remaroñ lelok jen ta eo rej kejatdikdik ñan air bõke, emol rej lo mõnõnõ. Mol in ej alikar ilo ad etale wãwen eo jet nan ko ilo Bible me ewõr kõtair ñan kabuñ eo ad rej kajerbali ilo Jeje ko. Jenaj konono kin jilu ian nan kein ilo katak in im ilo katak in tok ilokan.

Jerbal eo an Jesus ñan Aolep Armij

4. Ta kadkad eo kin “jerbal ñan armij ro” ilo Christendom?

⁴ Ilo kajin Greek eo jinoin, juõn nan eo elap tokjen im ej jerbal ibben kabuñ ej lei·tour·giʹa, eo rej ukõte einwõt “jerbal ñan armij” ilo New World Translation. Ilo Christendom lei·tour·giʹa ej kwalok nan in “liturgy.”a Bõtab, mantin kabuñ ko an armij ilo Christendom rejjab juõn tokjen eo emol ñan jerbal ñan armij.

5, 6. (a) Ta jerbal eo ñan armij ro rar kõmmane ilo Israel, kin ta tokjen ko? (b) Ta jerbal eo eutiejlok ñan armij ear bõk jikin men eo rekin kõmmane ilo Israel, im etke?

⁵ Ri jilek Paul ear kajerbal juõn nanin Greek eo ewõr kõtan ñan lei·tour·giʹa ke ear konono kin priest ro an Israel. E ar ba: “Im priest otemjej ej bõk ijo jikin jen ran ñan ran im kõmman jerbal ñan armij ro [juõn wãwen lei·tour·giʹa] im ekkã an lelok ejja menin katok ko wõt.” (Hebrews 10:​11, NW) Ri Levi priest ro rar lelok juõn jerbal ñan armij ekanuij aorõk ilo Israel. Rar katakin kin Kien eo an Anij im lelok menin katok ko me rar kalibubu jerawiwi ko an armij ro. (2 Kronikel 15:3; Malachi 2:​7, NW) Ke priest ro im armij ro rar lor Kien eo an Jehovah, ailiñ eo ear wõr un ko ñan an lañliñ.​—Duteronomi 16:15.

⁶ Jerbal ñan armij ro iumin Kien eo kar lukkun juõn jerammõn ñan priest ro an Israel, ak jerbal eo air ear bõjrak jen an wõr aorõkin ke Israel ear kajekdone kin jab tiljek eo an. (Matu 21:43) Jehovah ear karõk juõn men eo elaplok an utiej​—jerbal eo ñan armij Jesus ear kõmmane, Priest eo Eutiej im lap. Kin e, jej read: “A E in, kin an ber in drio, jerbal in pris eo An e jamin ukukot. Kin men eo Ej maroñ in lomorir wõt ro rej kebak ñõn Anij kin E, bwe Ej mour in drio im akwelap ñõn E kin ir.”​—Dri Hibru 7:​24, 25.

7. Etke jerbal eo an Jesus ñan armij ro ej bõktok tokjen ko ejelok uair?

⁷ Jesus ej etal wõt einwõt priest ñan indio, im ejelok ri binej jenkwon. Kin menin, e wõt emaroñ lomoren armij ilo likieoin. Ej kõmmane jerbal in ejelok einwõt ñan armij ro, ejjab ilo juõn temple eo kõmman in armij, ak ilo temple eo kar annañelok e, karõk eo elap an Jehovah kin kabuñ eo ear jerbal ilo 29 C.E. Jesus ej kiõ jerbal ilo Jikin Kwojarjar Otem Kwojarjar ilo temple eo, ilo lañ. E ej “Dri jerbal [lei·tour·gosʹ] an jikin kwojarjar, im imõn kaber emol, eo Iroij e ar kalek im jab armij.” (Dri Hibru 8:2; 9:​11, 12) Meñe eutiej ijo jikin Jesus, ej “juõn ri jerbal ñan armij.” Ej kajerbal maroñ eo an eutiej ñan lelok, im jab bõk. Im kain lelok rot in ej bõktok lañliñ ñan e. Ej mõttan “lõñliñ ar likit e iman” im menin ear kakajurlok e ñan kijenmij ilo aolepen ial eo an ion lal.​—Dri Hibru 12:⁠2.

8. Ewi wãwen an kar Jesus kõmmane juõn jerbal ñan armij ro ñan bõk jikin bujen Kien eo?

⁸ Ebar wõr juõn wãwen kin jerbal eo an Jesus ñan armij. Paul ear je: “Jesus ear bõk juõn jerbal emõnlok ñan armij, bwe en bareinwõt ri kõlajrak an bujen eo emõnlok, eo emwij kabine ion kallimur ko remõnlok.” (Hebrews 8:​6, NW) Moses ear ri kõlajrak an bujen eo kar bedbedin kõtan eo an Israel ibben Jehovah. (Exodus 19:​4, 5) Jesus ear kõlajrak ñan juõn bujen ekãl, eo ear kõmman bwe en maroñ lotak juõn ailiñ ekãl, “Israel an Anij,” ejaakin Christian ri kabit ro ilo jitõb jen elõñ ailiñ ko. (Dri Galetia 6:​16; Dri Hibru 8:​8, 13; Reveles̃õn 5:​9, 10) Kar juõn jerbal eo emõn ñan armij! Jej mõnõnõ bwe ewõr ad jelã kin Jesus, juõn ri jerbal ñan armij ro ikijen eo jej maroñ jerbale kabuñ eo emõn ibben Jeovah!​—Jon 14:6.

Christian ro Bareinwõt Rej Jerbal ñan Armij ro

9, 10. Ta jet ian wãwen ko ñan jerbal ñan armij ro Christian ro rar kommane?

⁹ Ejelok armij ej kõmmane juõn jerbal ñan armij joñan an utiej wõt einwõt eo an Jesus. Bõtab, ñe Christian ri kabit ro rej bõk jinekjej eo air ilañ, rej bõk jikiir ibben Jesus im bõk kunair ilo jerbal eo an ñan armij einwõt king ro im priest ro ilañ. (Reveles̃õn 20:6; 22:​1-5) Ak, Christian ro ion lal rej kõmman juõn jerbal ñan armij ro, im rej lo elap lañliñ ilo air kõmman eindein. Ñan wanjoñok, ke ear wõr juõn ñitta ilo Palestine, ri jilek Paul ear bõklok jabawõt ko jen ro jein im jatin ilo Europe ñan jibañ kadiklok eñtan eo an Christian Ri Jew ro ilo Judea. Menin kar juõn jerbal ñan armij ro. (Dri Rom 15:27; 2 Dri Korint 9:​12) Rainin, Christian ro rej mõnõnõ in kõmmane juõn jerbal eo einlok wõt in, lelok jibañ ilo mõkaj ñe ro jeiir im jatiir rej iion abañ, ak jorrãn ko jet.​—Jabõn Kennan Ko 14:21.

¹⁰ Paul ear jitõñlok ñan bar juõn jerbal ñan armij ke ear je: “Aet, im elañe naj katok kin iõ, ilo jurtak im jerbal in tõmak eo ami, ij lõliñ, im ij mõnõnõ ibemi otemjej.” (Dri Pilippai 2:​17) Jerbal eo elap an Paul ilo etan Ri Philippi ro kar juõn jerbal ñan armij ro ear kõmmane ilo yokwe im kijejeto. Juõn jerbal ñan armij ro einwõt in rej kõmmane rainin, elaptata ikijen Christian ri kabit ro, ro rej jerbal einwõt “dri korijer e tiljek im meletlet,” im lelok mõñã ko ilo jitõb ilo ien emõn. (Matu 24:45-​47) Bareinwõt, einwõt juõn kumi, rein rej “pris rokwojarjar,” kar kajerbal ir ñan “lelok men in katok ko rekar ñõn Jitõb, im ko rej kabuñburuen Anij kin Jisõs Kraist” im ñan “kennaneklok men ko remõn an Eo e ar kir kom jen marok im ñõn loan maram eo An e men in bwilõñ.” (1 Piter 2:​5, 9) Einwõt Paul, rej lañliñ kin kain jerammõn kein ke rej ‘katok kin ir make’ ñan kajejjet kitien eddo ko air. Im “sheep ro jet” rejetair rej kobalok ibbeir im rejetak ir ilo jerbal in jiroñ armij ro kin Jehovah im karõk ko an.b (Jon 10:16; Matu 24:14) Juõn jerbal ñan armij ro elap im kalañliñ!​—Sam 107:​21, 22.

Lelok Jerbal eo Ekwojarjar

11. Ewi wãwen an kar kõrã ri kanan eo Anna letok juõn joñok emõn ñan Christian ro otemjej?

¹¹ Bar juõn nanin Greek eo ej jerbal ibben ad kabuñ ej la·treiʹa, eo rej ukõte “jerbal eo ekwojarjar” ilo New World Translation. Jerbal eo ekwojarjar ej jerbal ibben kõmman ko an kabuñ. Ñan wanjoñok, kõrã eo 84-yiõ-dettan im ejako belen im ej ri kanan Anna rej kwalok kake bwe “ejañin kar ilok jen temple eo, ej lelok jerbal eo ekwojarjar [juõn nanin Greek eo ewõr kõtan ñan la·treiʹa] boñ im ran ibben jitlok ko im jar ko.” (Luke 2:​36, 37, NW) Anna ear nikniki an kabuñ ñan Jehovah. E ej juõn joñok emõn ñan kij otemjej​—dik im ritto, maan im kõrã. Im einwõt an kar Anna jar ñan Jehovah im ekkeini an kabuñ ñan e ilo temple eo, jerbal eo ad ekwojarjar ekoba jar im bed ilo kwelok ko.​—Dri Rom 12:12; Dri Hibru 10:​24, 25.

12. Ta juõn wãwen eo elap ilo jerbal eo ad ekwojarjar, im ewi wãwen an menin bareinwõt juõn jerbal ñan armij ro?

¹² Ri jilek Paul ear kwalok juõn men elap kin jerbal eo ad ekwojarjar ke ear je: “Bwe Anij aõ dri kennan, Eo ij jerbal ñõn E ilo aõ ilo gospel an Nejin, ekijkan e jab jokwõr aõ ba kin kom [ilo jar ko aõ, NW].” (Dri Rom 1:​9,) Aet, kwalok nan kin news eo emõn ejjab juõn jerbal ñan armij ro wõt rej roñjake ak ej bareinwõt juõn jerbal in kabuñ ñan Jehovah Anij. Meñe jej lo juõn eo emõn an bõke ak jab, jerbal in kwalok nan eo ej jerbal eo ekwojarjar jej kõmmane ñan Jehovah. Kijejeto eo ad ñan jiroñ ro jet kin kadkad ko remõn im karõk ko ewõr tokjeir an Jemed ejitenburu ibbed ilañ emol ej bõktok ñan kij elap lañliñ.​—Sam 71:23.

Ia eo Jej Kõmmane Jerbal eo Ekwojarjar Ie?

13. Ta kejatdikdik eo an ro rej kõmmane jerbal eo ekwojarjar ilo tuloa in temple eo ilo jitõb an Jehovah, im wõn ro rej lañliñ ibbeir?

¹³ Ñan Christian ri kabit ro, Paul ear je: “Kin men eo, bwe jej bõk ailiñ eo e ban makõtkit, en or joij iber, bwe jen jerbal ñõn Anij im kabuñburuen kake kin ujõke ekwojarjar im mijõk.” (Dri Hibru 12:28) Kin liki in kõtmene eo ñan jolet Ailiñ eo, ri kabit ro rej bin wõt ilo tõmak ke rej kabuñ ñan Eo Eutiej tata. Ir wõt remaroñ lelok ñan e jerbal eo ekwojarjar ilo Jikin Kwojarjar im ilo melan eo ituloa in temple eo ilo jitõb an Jehovah, im rej reimanlok ilo air bojaklok iman ñan jerbal ibben Jesus ijo Ekwojarjar Otem Kwojarjar, ilo lañ make. Ro rejetair, class in sheep ro jet, rej lañliñ ibbeir ilo kejatdikdik eo air emõn.​—Dri Hibru 6:​19, 20; 10:19-​22.

14. Ewi wãwen an jar eo elap bõk tokjen jen jerbal eo an Jesus ñan armij ro?

¹⁴ Ak, ta, kin sheep ro jet? Einwõt an kar ri jilek John lo lok iman, juõn jar elap iair ej waloktok ilo ran kein eliktata, im “r’ar kwoli im kamouj nuknuk ko air ilo bõtõktõkin Lam.” (Reveles̃õn 7:​14) Melelen men in bwe, einwõt ri kabit in ri kabuñ ro mõttair, rej jerbale tõmak ilo jerbal eo an Jesus ñan armij ro, katok kin mour in armij wãppen eo an ilo etan armij. Sheep ro jet rej bareinwõt bõk tokjen jen jerbal eo an Jesus ñan armij ro bwe rej “drebij wõt bujen eo Aõ [Jehovah].” (Aiseia 56:6) Jab, rejjab mõttan bujen eo ekãl, ak rej debiji ilo wãwen in bwe rej bokake kien ko rej mõttanin im karejar ibben karõk ko kar kõmmani ikijen. Rej kobalok ibben Israel eo an Anij, mõñã ilo ejja table eo wõt ilo jitõb im jerbal ibben ro uan, nebar Anij ibwiljin armij ro im lelok men in katok ko ilo jitõb ko rej kamõnõnõik e.​—Dri Hibru 13:15.

15. Ia eo jar eo elap ej kõmmane jerbal eo ekwojarjar ie, im ewi wãwen an jerammõn in jelet ir?

¹⁵ Kin menin, jar eo elap rej lo an “jutõk iman tron eo im iman mejen Lam, kõnõki kin nuknuk ko remouj.” Bareinwõt, “rej iman tron an Anij, im rej korijer ñõn E ran im boñ ilo tempel eo An; im Eo ej jijõt ion tron E naj kaimweim ir ilo mweo imõn.” (Reveles̃õn 7:​9, 15) Ilo Israel, ruwamaejet ro rar kobalok rar kabuñ ilo melan eo itulik in temple eo an Solomon. Ilo juõn wãwen eo einlok wõt, jar eo elap rej kabuñ ñan Jehovah ilo melan eo itulik in temple eo an ilo jitõb. Air jerbal ijin ej kõmman men in air lañliñ. (Sam 122:⁠1) Meñe elikin an ri kabit ro eliktata rejetair ej bõk jolet eo an ilañ, renaj etal wõt im lelok jerbal eo ekwojarjar ñan Jehovah einwõt armij ro an.​—Reveles̃õn 21:3.

Jerbal eo Ekwojarar Me Ejjab Emõn

16. Ta kakkõl ko rej litok ikijen jerbal eo ekwojarjar?

¹⁶ Ilo ran ko an Israel eo etto, jerbal eo ekwojarjar kar aikwij jerbale ilo errã ibben kien ko an Jehovah. (Exodus 30:9; Livitikõs 10:​1, 2) Einlok wõt rainin, ewõr menin aikwij ko ñan lali bwe jerbal eo ekwojarjar en emõn ñan Jehovah. Eñin unin Paul ear jeje ñan Ri Colossae ro: “Kim . . . e jab jokwõr am jar im kajitõk kin kom, im kõnan bwe komin obrõk kin jela ankil An ilo meletlet otemjej im lolãtãt jen Jitõb, bwe ami etetal en tellokõn Iroij im kabuñburuen ilo men otemjej, im bwe komin jebar leen ilo jerbal ko remõn otemjej, im edrekok ilo jela Anij.” (Dri Kolosse 1:​9, 10) Ejjab ad bebe ñan beek ial eo ejimwe ñan kabuñ ñan Anij. Jelã eo ejimwe kin Jeje ko, lolãtãt eo ilo jitõb, im meletlet eo an Anij elap tokjeir. Elañe ejjab eindein, tokjen eo emaroñ walok ilo jorrãn.

17. (a) Ewi wãwen an kar jerbal eo ekwojarjar bwid kajerbale ilo ran ko an Moses? (b) Ewi wãwen an jerbal eo ekwojarjar maroñ bwid tele rainin?

¹⁷ Kememej Ri Israel ro ilo ran ko an Moses. Jej read: “Inem Anij ear oktak im lelok ir bwe ren kõmmane jerbal eo ekwojarjar ñan jar in tarinae eo ilañ.” (Acts 7:​42, NW) Ri Israel rar lo kõmman ko rekajur an Jehovah ilo etair. Ak, rar oktaklok ñan anij ko jet ke rar lemnak bwe menin enaj kar ñan emõn eo air. Rar jab tiljek, im tiljek ej juõn menin aikwij bwe jerbal eo ad ekwojarjar en kamõnõnõ ñan Anij. (Sam 18:25) Emol, ewõr jejjo rainin renaj kar oktaklok jen Jehovah ñan kabuñ ñan iju ko ak kau gold ko, ak ebar wõr jet wãwen ko kin kabuñ ñan ekjab. Jesus ear kakkõl nae jerbal ñan “Mweie,” im Paul ear naetan ankwonak einwõt kabuñ ñan ekjab. (Matu 6:​24; Dri Kolosse 3:5) Satan ej kautiej e make einwõt juõn anij. (2 Dri Korint 4:⁠4) Kain kabuñ ñan ekjab rot in rej jeededlok im rej juõn aujid. Ñan wanjoñok, lemnak kin juõn eo ej ba ej loor Jesus ak lukkun mejenkajjik eo an ilo mour ej ñan an oktak im mweie ak lukkun liki eo an ej ilo e make im lemnak ko an make. Wõn eo ej lukkun karejar ñane? Ewi joñan oktak eo an jen Ri Jew ro ilo ran ko an Isaiah ro rar kõnejnej ilo etan Jehovah ak rar lelok tokjen kõmman ko an relap ñan ekjab ko retton?​—Aiseia 48:​1, 5.

18. Ewi wãwen an kar bwid kõmmane jerbal eo ekwojarjar ilo ien ko remotlok im ilo rainin?

¹⁸ Jesus ear bareinwõt kakkõl: “Awa ej itok ñe jabdewõt eo ej mõn kom enaj lemnak ej kõmmane jerbal eo ekwojarjar ñan Anij.” (John 16:​2, NW) Saul, eo ear oktak im ri jilek Paul, ear jab bere ilo an lemnak bwe ear jerbal ñan Anij ke ear ‘kamelim air urore Stephen’ im ke ej ‘buñañõn kalelñoñ im uror ñõn ro dri kaloran Iroij.’ (Jerbal 8:1; 9:1) Rainin, jet kumi in ri nana ro rej torlokbõke juõn ailiñ in armij rej bareinwõt ba bwe rej kabuñ ñan Anij. Elõñ armij rej ba rej kabuñ ñan Anij, ak ilo mol air kabuñ ej kajju lok ñan anij ko an ailiñ, bwij, mweie, e make, ak bar jet anij wan.

19. (a) Ewi wãwen ad lemnak kin jerbal eo ekwojarjar? (b) Kain jerbal rot ekwojarjar enaj bõktok lañliñ ñan kij?

¹⁹ Jesus ear ba: “Kwon kabuñ ñõn Iroij [Jehovah] am Anij, im kwon jerbal ñõn E wõt.” (Matu 4:​10) E ar konono ñan Satan, ak elap tokjen bwe kij otemjej jen eoroñ nan ko an! Kõmmane jerbal eo ekwojarjar ñan Iroij Kajur Bõtata eo an ijoko otemjelok ilañ im ilal ej juõn jerammõn eutiej im kabwilõñlõñ. Im ta eo jemaroñ ba kake kin kõmmane ñan armij ro jerbal eo ej kobalok ibben kabuñ eo ad? Kõmmane menin ilo etan armij ro mõttad ej juõn jerbal ekalañliñ im ej bõktok elap mõnõnõ. (Sam Ko 41:​1, 2; 59:16) Ak, jerbal rot in ej bõktok mõnõnõ eo emol ilo wõt ad jerbale kin aolepen buruõd im ilo wãwen eo ejimwe. Wõn ro ej lukkun jimwe air kabuñ ñan Anij? Jerbal eo ekwojarjar an wõn ro Jehovah ej bõke? Jemaroñ uake kain kajitõk rot kein elañe jej etale nan eo kein kajilu ilo Bible im ewõr kilan ibben kabuñ eo ad. Menin in jenaj kõmmane ilo katakin tok ilokan.

[Kamelele ko itulal]

Ewi Wãwen Am Naj Kar Uak?

• Ta jerbal eo elap ñan armij ro Jesus ear kõmmane?

• Ta jerbal eo ñan armij ro Christian ro rej kõmmane?

• Ta eo ej jerbal eo ekwojarjar an Christian, im ia eo ej kõmman ie?

• Ta eo jej aikwij tõbare bwe jerbal eo ad ekwojarjar en kamõnõnõik Anij?

[Pija]

Jemen im jinen ajiri ro rej lo elap lañliñ ilo lelok

[Pija]

Christian ro rej kõmmane jerbal eo ñan armij ro ñe rej jibañ ro jet im ñe rej keañ kin news eo emõn

[Pija]

Jej aikwij jelãlokjen eo ejimwe im melele ñan liki bwe jerbal eo ad ekwojarjar Anij ej buñburuen kake