Elap Ke Am Yokwe Nan In Kakememej Ko An Jehovah Ñan Mãt Joñan?
“Aõ ear kejbãrok nan in kakememej ko am, im elap aõ yokwi.”—PSALM 119:167, New World Translation.
1. Ia eo elaptata ad lo elõñ melele ko rej jitõñlok ñan nan in kakememej ko an Jehovah?
JEHOVAH ekõnan bwe armij ro an ren mõnõnõ. Bwebõta, ñan lañliñ kin mõnõnõ eo emol, jej aikwij etetal ilo kien eo an Anij im lale nan in kibel ko an. Ñan tõbar menin, ej letok ñan kij nan in kakememej ko. Men kein rej elijinmen air kwaloki ilo Jeje ko, elaptata ilo Sam 119, eo bõlen ekin in iroij dikdik eo an Judah Iroij Hezekiah. Al aibujuij in ej ijjino kin nan kein: “Emõnõnõ ro re wãppen ilo ial eo; ro rej etal ilo kien Jeova. Emõnõnõ ro rej kejbãrok nan in kennan ko An, ro rej kabukot E kin aolepen burueir.”—Sam 119:1, 2.
2. Ewi wãwen an nan in kakememej ko an Anij wõr kõttair ñan mõnõnõ?
2 Jej ‘etal ilo kien eo an Jehovah’ ilo ad bõk jelãlokjen eo ejejjet kin Nan eo an im ilo ad jerbale ilo mour. Bõtab, ke kij jejjab wãppen, jej aikwij nan in kakememej. Nan in Hebrew eo ej ukõt “nan in kakememej” ej kwalok bwe Anij ej kir kien eo an, nan in kibel ko, kien ko, bwe ren jeblaktok ñan lemnak ko ad. (Matu 10:18-20) Jenaj bed wõt ilo ad mõnõnõ ilo wõt ad etal wõt im lale nan in kakememej rot kein, bwe rej jibañ kij bõprae roñ in aujid ko ilo jitõb ko ej walok tokjeir ilo jorrãn im buromõj.
Eddeb ñan Nan in Kakememej ko An Jehovah
3. Ion bedbed in Sam 119:60, 61, ta liki eo ewõr ibbed?
3 Nan in kakememej ko an Anij rar jitenburu ibben ri jeje Sam eo ear al: “I ar kijorur, im jab rumijtok, in bokake nan in kaiñi ko Am. To ko toõn ro dri nana r’ar lukwõj iõ, a I ar jab meloklok kiõm.” (Sam 119:60, 61) Nan in kakememej ko an Jehovah rej jibañ kij kijenmij ilo matõrtõr kinke jej liki bwe Jemed ilañ emaroñ bukwe to in lukluk ko ri kijirãt ro rej lukwõj kij kaki. Ilo ien eo ejejjet, ej kanemkwoj kij jen abañ rot kein bwe jen maroñ wõnmanlok wõt ilo jerbal in kwalok nan eo ad kin Ailiñ eo.—Mark 13:10.
4. Ewi wãwen ad aikwij uak ñan nan in kakememej ko an Anij?
4 Jet ien, nan in kakememej ko an Jehovah rej kajimwe kij. Ien otemjej jen kamolol kin kajimwe rot in, einwõt kar ri jeje Sam. E ar jar im ba ñan Anij: “Nan in kakememej ko am rej men in mõnõnõ ibba . . . I ar yokwe nan in kakememej ko am.” (Psalm 119:24, 119, NW) Elõñlok ibbed nan in kakememej ko an Anij jen kar ri jeje Sam. Buki eon ko rar eliji jen Jeje in Hebrew ko rej walok ilo Jeje in Greek ko rejjab kakememej kij kin nan in jiroñ ko an Jehovah wõt ñan armij ro an iumin Kien eo ak bareinwõt karõk ko an kin congregation eo an Christian. Ñe Anij ej lo aikwij eo ñan kakememej kij kin men ko rej jelet kien ko an, jej kamolol kin ial in tel rot in. Im ikijen ad ‘eddeb ñan nan in kakememej ko an Jehovah,’ jej bõprae kabo ko rejerawiwi im rejjab kamõnõnõik Ri Kõmanman eo ad im kate kij kin mõnõnõ.—Sam 119:31.
5. Ewi wãwen ad maroñ lukkun yokwe nan in kakememej ko an Jehovah ñan mãt joñan?
5 Ewi joñan ad aikwij yokwe nan in kakememej ko an Jehovah? “Aõ ear kejbãrok nan in kakememej ko am, im ear lap aõ yokwi,” ri jeje Sam ear al. (Psalm 119:167, NW) Enaj lap ad yokwe nan in kakememej ko an Jehovah elañe jej lemnaki im bõki einwõt nan in kakkõl an juõn Jemed eo ej lukkun kea kin kij. (1 Piter 5:6, 7) Jej aikwiji nan in kakememej ko an, im yokwe eo ad ñani enaj eddek ke jej lo tokjeir ñan kij.
Etke Jej Aikwiji Nan in Kakememej ko An Anij
6. Ta juõn un eo unin ad aikwiji nan in kakememej ko an Jehovah, im ta eo enaj jibañ kij kememeji?
6 Juõn unin ad aikwiji nan in kakememej ko an Jehovah ej kinke jemmãlele. World Book Encyclopedia eo ej ba: “Armij ej laplok im laplok wõt air meloklok melele ko ke ien ej ellãlok. . . . Bõlen emwij am lo am jab maroñ lemnak kin juõn ãt ak bar jet mõttan melele eo kwar nañin maroñ kememejlok im ej bed wõt ion loem. . . . Kain meloklok rot in iumin jidik ien, eo ekkã an walok, rej naetan likjap eo ej bar jeblaktok. Scientist ro rej keidi ñan kajeoñ in lo juõn men eo ear bwid likit ilo jikin ilo juõn room ebwok loan. . . . Juõn wãwen eo emõn ñan kememej juõn mõttan melele ej ñan kaetok am katak kake elikin am lemnak bwe ewãppen am melele kake.” Katak im elijinmen eo ewõr kijejeto ie enaj jibañ kij kememej nan in kakememej ko an Anij im jerbal ekkar ñani ñan emõn eo ad make.
7. Etke elaplok ad aikwiji nan in kakememej ko an Anij rainin jen mokta?
7 Jej aikwiji nan in kakememej ko an Jehovah ran kein elaplok jen mokta kinke nana emwij an tõbar joñan eo elaptata ilo bwebwenato an armij. Elañe jej kanuij lale nan in kakememej ko an Anij, jej tõbar jelã eo ej menin aikwij ñan bõprae air kabo kij ñan loan ial ko an lal in enana. “Elaplok aõ melele jen aolep ri kaki ro aõ,” ri jeje Sam ear ba, “kinke nan in kakememej ko am rej juõn menin aõ kalmenlokjen kaki. Ij emmakit kin an laplok aõ melele jen emaan ritto ro ibba, kinke Iar lale nan in kibel ko am make. Iar debij neiõ jen ial ko renana otemjej, kin un eo bwe in maroñ kejbãrok nan eo am.” (Psalm 119:99-101, NW) Ilo lale nan in kakememej ko an Anij, jenaj kejbãrok kij jen “ial ko renana otemjej” im bõprae ad naj oktak im einwõt jarlepju in armij ro, ro rej “marok ilo lemnak, im ruwamaejet jen mour eo an Anij.”—Ephesians 4:17-19, NW.
8. Ewi wãwen ad maroñ oktak im emõnlok ad bojak ñan ione melejoñ ko kin tõmak im lo tõbrak?
8 Nan in kakememej ko an Anij rej bareinwõt menin aikwij kinke rej kakajurlok kij ñan kijenmij ilo melejoñ ko ad relõñ ilo ien in “jemlokin ien.” (Daniel 12:4, NW) Ilo an ejelok nan in kakememej rot in jenaj oktak im ‘ri roñjake ro remmãlele.’ (James 1:25, NW) Ak niknik ilo ad make katak im katak eo an congregation eo kin Jeje ko kin jibañ eo ilo book ko jen “dri korijer e tiljek im meletlet” enaj jibañ kij ione melejoñ in tiljek ko im lo tõbrak. (Matu 24:45-47) Menin letok rot kein ilo jitõb rej kamaroñ kij ñan lo ta eo jej aikwij kõmmane ñan kamõnõnõik Jehovah ñe jej lo kij make ilo melejoñ ko elõñ wãweiir.
Jerbal eo Elap Tokjen ilo Kwelok ko Ad
9. Wõn ro rej “menin letok ko ilo armij,” im ewi wãwen air jibañ ri tõmak ro mõttair?
9 Aikwij eo ad ñan nan in kakememej ko an Anij jej tõbar mõttan ilo kwelok ko an Christian, ijo nan in katak ko rej litok ikijen brother ri kabit ro. Ri jilek Paul ear je bwe ke Jesus “Ear wanliñlok ñan lañ ear bõklok ibbenlok ri jibokwe ro; ear lelok menin letok ko ilo armij.” Paul ear kobaiktok: “[Christ] ear lelok jet einwõt ri jilek, jet einwõt ri kanan, jet einwõt ri evanjel, jet einwõt shepherd ro im ri kaki ro, bwe ren kajimwe ro rekwojarjar, ñan jerbal, ñan ejaake enbwinin Christ.” (Ephesians 4:8, 11, 12, NW) Jemaroñ kamolol bwe “menin letok ko ilo armij”—elder ro emwij jitõñ ir—rej jitõñlok kij ñan nan in kakememej ko an Jehovah ñe jej kwelok ibben don ñan kabuñ!
10. Ta un eo elap ilo Dri Hibru 10:24, 25?
10 Kamolol kin menin letok ko rekwojarjar renaj kamakit kij ñan ad bed ilo kwelok ko lalem an congregation eo kajjojo week. Aikwij eo ñan ekkeini ad kweloktok ibben don Paul ear kalikare. Ear je: “Im jen lale dron, im kõkãtok dron ñõn yokwe im jerbal ko remõn; im jen jab likit ar kwelok im jar, einwõt mõnit an jet, a jen kowe dron im kalaplok ar kõmõn men in, bwe jej lo an ran eo ebaktok.”—Dri Hibru 10:24, 25.
11. Ewi wãwen an kwelok ko ad kajjojo week wõr tokjen ñan kij?
11 Kwoj kamolol ke kin ta eo kwelok ko ad rej kõmmani ñan kij? Katak Imõniaroñroñ eo week otemjej ej kakajurlok tõmak eo ad, jibañ kij jerbal ekkar ñan nan in kakememej ko an Jehovah, im kabinlok kij nae “jitõb õn lõl.” (1 Dri Korint 2:12; Jerbal 15:31) Ilo Public Meeting eo, ri konono ro rej kwalok melele ko jen Nan in Anij, ekoba nan in kakememej ko an Jehovah im nan emõnmõn eo an Jesus eo ej ba “nan ko nan in mour in drio.” (Jon 6:68; 7:46; Matu 5:1–7:29) Jej jeme kabel in katakin ko ad ilo Theocratic Ministry School eo. Service Meeting eo elap an aorõk ilo an jibañ kij ñan kõmanmõnlok kilen kwalok nan eo ad kin news eo emõn jen em ñan em, ilo bar jeblak ko, katak Bible ibben armij ro ilo moko imwiir, im ilo wãwen ko jet ilo jerbal in kwalok nan eo ad. Juõn kumi eo ediklok ilo Congregation Book Study eo ej letok elaplok ien emõn ñan kõmman menin kalikar ko ekkã air jelet nan in kakememej ko an Anij.
12, 13. Ewi wãwen an armij ro an Anij ilo juõn ene ilo Asia kan kar kalikar air kamolol kin kwelok ko an Christian?
12 Ekkeini bed ilo kwelok ko an congregation eo ej jerbal ñan kakememej kij kin kien ko an Anij im jibañ kij ñan debij wõt ad kajur ilo jitõb ilo jelmae bwoktak ko, abañ in money, im melejoñ ko jet in tõmak eo ad. Aorõk in kwalok ko ad 70 Christian ro ilo ene in Asia kan rar eñjake ro rar kadiojlok ir jen moko imwiir im jibed ir bwe ren jokwe ilo bwiljin wijki ko. Kin air kar beek ñan air etal wõt im ekkeini air kwelok ibben don, rar jeblaklok ñan bukwon eo air elap bwoktak ie, rupe bwen Kingdom Hall eo, im bar kaleke ilo bulen wijki ko.
13 Elikin air kijenmij ilo yiõ in bwoktak ko ilo bar juõn mõttan ilo ejja ailiñ eo wõt, armij ro an Jehovah rej jerbal wõt ilo kijejeto. Juõn ian elder ro ilo melan eo rar kajitõk ibben: “Ta eo ear lap an jibañ ilo debij wõt brother ro ibben don?” Uak eo an? “Ilo 19 yiõ ko, kim ar jab jolok juõn kwelok. Jet ien kin wõt bakutañ ko ak abañ ko jet, jet ian brother ro rar jab maroñ tõbar jikin kwelok eo, ak kim ar jab kabõjrak juõn kwelok.” Brother rein jitenburu maan im kõrã emol rej kamolol kin aorõk in ‘jab karmijete kweloktok eo air make ibben don.’
14. Ta eo jemaroñ katak kake jen manit eo an kõrã ritto eo Anna?
14 Kõrã eo 84-yiõ dettan im ejako belen Anna “e jab ilok jen temple.” Tokjen menin, ear bed ilo ien eo ke niñniñ eo Jesus rar bõktok ñan ijo jidik wõt ien elikin an lotak. (Luk 2:36-38) Kwoj kõmmane ke bwe en juõn karõk ñan am jab jako jen kwelok ko? Kwoj kajeoñ ke joñan wõt am maroñ bwe kwon bed ilo aolep kwelok in assembly ko im convention ko ad? Nan in katak eo ewõr tokjen ilo jitõb jej bõke ilo ien kweloktok kein ej letok ñan kij menin kamol eo ealikar bwe Jemed ilañ ej kea kin armij ro an. (Aiseia 40:11) Ien rot kein rej bareinwõt kalaplok lañliñ, im ad bed ie ej kalikar kamolol eo ad kin nan in kakememej ko an Jehovah.—Nehemiah 8:5-8, 12.
Jenolok Ikijen Nan in Kakememej ko An Jehovah
15, 16. Lale nan in kakememej ko an Jehovah ewi wãwen air jelet mwilid?
15 Lali nan in kakememej ko an Anij ej jibañ kij jenolok jen lal in enana. Ñan wanjoñok, kanuij lale nan in kakememej ko an Anij ej bõprae kij jen ad bõk kunad ilo mour in lũñ. (Duteronomi 5:18; Jabõn Kennan Ko 6:29-35; Dri Hibru 13:4) Kõnan eo ñan riap, jab mol, ak kwot jemaroñ lo tõbrak ilo ad kajekdone ikijen ad jerbal ekkar ñan nan in jiroñ ko rekwojarjar. (Exodus 20:15, 16; Livitikõs 19:11; Jabõn Kennan Ko 30:7-9; Epesõs 4:25, 28; Dri Hibru 13:18) Lale nan in kakememej ko an Jehovah ej bareinwõt debij kij jen ad idenwõne, debij ad lotan, ak ruruwe jabdewõt.—Livitikõs 19:16, 18; Sam 15:1, 3.
16 Ilo ad kanuij lale nan in kakememej ko an Anij, jej bed wõt im kwojarjar ak jenolok, ñan jerbal eo an. Im elap tokjen bwe jen jenolok jen lal in! Ilo an jar ñan Jehovah ilo joten eo eliktata in mour eo an ion lal, Jesus ear kõmmane kajitõk in ñan ri kalor ro an: “I ar lelok ñõn ir nan eo Am; im lõl e ar kijirãte ir, bwe re jab jen lõl, einwõt Ña, I jab jen lõl. I jab jar bwe Kwon bõk ir jen lõl, a bwe Kwon kejbãrok ir jen eo enana. Re jab jen lõl, einwõt Ña I jab jen lõl. Kwon kokwojarjar ir ilo mol: Am in nan mol eo.” (Jon 17:14-17) Jen etal wõt im kaorõk Nan in Anij, eo ej kajenolok kij ñan jerbal eo an ekwojarjar.
17. Ta eo emaroñ walok elañe jej kajekdon nan in kakememej ko an Anij, inem ta eo jej aikwij kõmmane?
17 Einwõt ro ri karejaran Jehovah, jej kõnan bed wõt im emõn ñan jerbal eo an. Bõtab, elañe jenaj kajekdon nan in kakememej ko an, jitõbõn lal in emaroñ tuwe kij, kalaplok ilo konono ko an, book, kamõnõnõ, im mwil. Im emol jejjab kõnan oktak im ri arõk money, ri jualõñlõñ, ri jua, jab kamolol, jatiljek, lej, emalkaro, kemjãje, yokwe menin kamõnõnõ jen yokwe Anij—ñan kwalok wõt jejjo kadkad kein rej alikar ibben ro rej ellok jen Anij. (2 Timote 3:1-5) Ke jej mour ilo toktoklok in ran ko eliktata in jukjuk im bed in enana, jen kejbãrok wõt ad jar ñan jibañ eo ekwojarjar bwe jen maroñ etal wõt im lale nan in kakememej ko an Jehovah im kin menin ‘kanuij lale ekkar ñan nan eo an.’—Sam 119:9.
18. Lale nan in kakememej ko an Anij enaj kamakit kij bwe jen bõk buñten nee et ko remol?
18 Nan in kakememej ko an Jehovah elaplok men eo rej kõmmane jen kakkõl wõt kij kin men ko jej aikwij jab kõmmani. Lale nan in kakememej ko an enaj kõmman bwe jen bõk emmakit eo emol, kamakit kij ñan liki Jehovah ilo ejelok bere ñan jidik, im ñan yokwe e kin aolepen buruõd, ad, lemnak, im kajur. (Duteronomi 6:5; Sam 4:5; Jabõn Kennan Ko 3:5, 6; Matu 22:37; Mark 12:30) Nan in kakememej ko an Anij rej bareinwõt lujur kij ñan yokwe ro ri turid. (Livitikõs 19:18; Matu 22:39) Elaptata jej kalikar ad yokwe Anij im ro ri turid ilo ad kõmmane ankilan eo ekwojarjar im jake jebõl eo ibben ro jet kin “jelãlokjen eo kin Anij” im ej letok mour.—Jabõn Kennan Ko 2:1-5.
Lale Nan in Kakememej ko an Jehovah Melelen Mour!
19. Ewi wãwen ad maroñ kwalok ñan ro jet bwe emõn im wõr tokjen ñan kanuij lale nan in kakememej ko an Jehovah?
19 Elañe jej lale nan in kakememej ko an Jehovah im jibañ ro jet ñan kõmman eindein, jenaj lomoren kij make im ro rej roñjake kij. (1 Timote 4:16) Ewi wãwen ad maroñ kwalok ñan ro jet bwe ren kanuij lale nan in kakememej ko an Jehovah relukkun emõn im wõr tokjeir? Ilo ad jerbale nan in kaiñi ko ilo Bible ilo mour eo ad make. Ro “ar likit ir bwe ren mour in drio” renaj ilo wãwen in wõr ibbeir menin kamol eo bwe ial eo emwij karõke ilo Nan in Anij ej lukkun ial eo emõntata ñan jibadõke. (Jerbal 13:48) Renaj bareinwõt lo bwe ‘Anij ej lukkun bed ibwiljid’ im naj emmakit ñan kobatok ibbed ilo kabuñ eo an Kajur Bõtata eo Iroij Jehovah.—1 Dri Korint 14:24, 25.
20, 21. Nan in kakememej ko an Anij im jitõb eo an renaj kamaroñ kij ñan ad kõmmane ta eo?
20 Ad etal wõt im katak Jeje ko, jerbale men eo jej katak, im bõk tokjen aolepen menin letok ko an Jehovah ilo jitõb, jenaj itok im yokwe nan in kakememej ko an ellãlok. Elañe jej kanuij lale, nan in kakememej kein renaj jibañ kij bwe jen “kõnak armij ekãl, eo ekar ñõn Anij emwij kõmõne ekal ilo wãnik im kwojarjar im mol.” (Dri Epesõs 4:20-24) Nan in kakememej ko an Jehovah im jitõb kwojarjar eo an renaj jibañ kij ñan kalikar yokwe, lañliñ, ainemõn, meanwõd, joij, lejokmen, tiljek, inemõn, jatõr—kadkad kein me rejjab einlok wõt kadkad ko an lal in eo ej bed ilo kajur eo an Satan! (Dri Galetia 5:22, 23; 1 Jon 5:19) Kin menin, jemaroñ kamolol ñe jej bõk kakememej kin menin aikwij ko an Jehovah ilo ien katak Bible eo ad make, jen elder ro emwij kãlet ir, ilo kwelok ko ad, assembly ko, im convention ko.
21 Kinke jej lale nan in kakememej ko an Jehovah, jej maroñ lañliñ bareinwõt jej eñtan kin tokjen eo emõn. (Luk 6:22, 23) Jej reilok ñan Anij ñan lomoren kij jen wãwen ko elap air kalelñoñ. Men in elaptata an lap tokjen kiõ bwe ailiñ ko otemjej rej kokweloklok ir ñan “tõrinae in ran elap, ran in Anij ekajur otem kajur” ilo Har–Magedon.—Reveles̃õn 16:14-16.
22. Ta eo ej aikwij bebe eo ad kin nan in kakememej ko an Jehovah?
22 Ñan ad bõk menin letok in joij eo kin mour indio, jej aikwij yokwe nan in kakememej ko an Jehovah ellãlok im lali kin aolepen buruõd. Kin menin en wõr ibbed jitõb eo an ri jeje Sam eo ear al: “Nan in kakememej ko am rewãnik rej ñan indio. Kõmmane iõ bwe in jelã, bwe in maroñ mour wõt.” (Psalm 119:144, NW) Im jen kalikar kamol in bebe eo ilo nan ko an ri jeje Sam: “I ar kir Kwe, [Jehovah] kwon lomor iõ: inem I naj kejbãrok nan in kakememej ko am.” (Psalm 119:146, NW) Aet, ilo nan im ilo jerbal, jen kamol bwe en lukkun lap ad yokwe nan in kakememej ko an Jehovah.
Ewi Wãwen Am Naj Kar Uak?
• Ewi wãwen an kar ri jeje Sam lemnak kin nan in kakememej ko an Jehovah?
• Etke jej aikwiji nan in kakememej ko an Anij?
• Ta jerbal eo kwelok ko ad rej kõmmane ikijen nan in kakememej ko rekwojarjar?
• Ewi wãwen an nan in kakememej ko an Jehovah kajenolok kij jen lal in?
[Pija]
Ri jeje Sam ear lap an yokwe nan in kakememej ko an Jehovah ñan mãt joñan
[Pija]
Ilo am anõk joñok eo an Anna, kwoj kate yuk ke bwe kwon jab likjap jen kwelok ko?
[Pija]
Kanuij lale nan in kakememej ko an Jehovah ej kajenolok kij einwõt ri karejar ro an rerreo im emõn