Jaar Jab Roñjake ke Men eo Mokta?
1 Emol jaar! Elõñ men ko Jehovah ej elijinmen kaki ilo Nan eo an ñan tokjen eo an armij ro an. Emakijkij an Jesus elij katak ko an kin wãwen ko reoktak jen don kin Ailiñ eo. Ri jilek ro an rar elij wõt kin men ko lor jitõb ibben ro ebin bedbed eo air ilo mol eo.—Rom 15:15; 2 Pit. 1:12, 13; 3:1, 2.
2 Ilo ien eo ad dolul eo an Jehovah ear karõk bwe katak ko raorõk ren eliji ilo kwelok ko an congregation eo. Jet book jaar katak kaki elõñ alen. Aet, eaorõk bwe jen roñjake men ko jaar roñjaki mokta!
3 Elijinmen Ej Kajejjet juõn Aikwij Eaorõk: Nan in kakememej ko an Jehovah rej kamũlallok melele eo ad, kalaplok lemnak eo ad, im kakajurlok bebe eo ad ñan bed wõt ilo ial eo ilo jitõb. (Sam Ko 119:129) Elij eo ad kin kien ko im nan in kakabilek ko an Anij ej einwõt ad kalimjek kij ilo juõn kapjur. Ej jibañ kij ñan etale kij make im jumae kõnan eo ñan ad juõn “dri roñjake eo ej meloklok.”—Jem. 1:22-25.
4 Elañe jejjab kakememej kij make kin mol eo, men ko jet renaj jelet buruõd. Nan in kakememej ko an Anij rej kakajurlok kij ñan jumae wãwen ko renana an lal eo an Satan. (Sam ko 119:2, 3, 99, 133; Pil. 3:1) Nan in kakememej ko ekkeini ad bõki ikijen jejjet in kitien karõk ko an Anij rej kamakit kij bwe “[Jen] ekil.” (Mark 13:32-37) Elij mol ko ilo Jeje ko ej jibañ kij ñan bedwõt ilo ial eo ej tellok ñan mour indio.—Sam ko 119:144.
5 Ewi Wãwen Jemaroñ Make Bõk Tokjen: Jej aikwij ‘ukot buruõd ñõn nan in kennan ko [an Anij].’ (Sam ko 119:36) Ñe jenaj etale juõn katak jej jelã kake ilo juõn kwelok an congregation eo, jej aikwij kebojak lok iman, lale eon ko, im lemnak kin ewi wãwen jemaroñ jerbale kamelele eo. Jen jab jolok ad kebojak kin ien elij eo an Theocratic Ministry School eo, im lemnak bwe jejjab aikwij. (Luk 8:18) Jejjab kõnan bwe jen jalimo kinke irinekatak ko ekkã air elij kaki ilo kwelok ko ad.—Hib. 5:11.
6 Jej aikwij kwalok ejja lemnak eo wõt an ri jeje psalm: “I ar lõñliñ ilo ial in nan in kennan ko Am, einwõt ilo mweiuk ko otemjej.” (Sam ko 119:14) Aet, emwij ad roñjake men kein raorõk mokta, im jenaj bar roñjake tokelik. Etke? Kinke Jehovah ej jelã bwe jej aikwij roñkaki!