Jutak Wãnik Kin Juõn Tõmak Eebin

“Ien otemjej elap an kate e kin kom ilo jar ko an, bwe komin jutõk wãnik im [“kin juõn tõmak ebin,” New World Translation] ilo ankil otemjej an Anij.”—DRI KOLOSSE 4:​12.

1, 2. (a) Ri ilikin rar kile ta kin ri Christian ro jinoin? (b) Ewi wãwen book in Dri Kolosse ej kwalok itoklimo eo ej yokwe?

RI kalor ro an Jesus ear lap air itoklimo kin ri kabuñ ro mõttair. Tertullian (ri jeje eo ilo ebeben eo kein karuo im kein kajilu C.E.) ear kwalok kin joij eo rar kwaloke ñan ajiri ro ratajinimjin, ro rejeramel, im ritto ro. Joñan an lap an kein kamol ko kin yokwe kabwilõñ ro rejjab tõmak rar ba kin ri Christian ro, ‘Lale wãwen rej yokwe don.’

² Book in Dri Kolosse ej kwalok kin ejja itoklimo eo eyokwe an ri jilek Paul im an eo mõttan Epaphras kin ro jein im jatin maan im kõrã ilo Colossae. Paul ear jeje ñan ir: Epaphras “ien otemjej elap an kate e kin kom ilo jar ko an, bwe komin jutõk wãnik im [“kin juõn tõmak ebin,” NW] ilo ankil otemjej an Anij. Ilo yiõ eo 2001, ri Kennan ro an Jehovah renaj bõk einwõt unin tel in yiõ eo air jen nan kein ilo Colossians 4:​12, NW: “Jutak wãnik im kin juõn tõmak ebin ilo ankil otemjej an Anij.”

3. Epaphras ear jar kin ta men ko ruo?

³ Kwomaroñ lo bwe jar ko an Epaphras kin ro jitenburu ibben ear wõr ruo wãwen ko: (1) bwe ren “jutõk wãnik” im (2) bwe ren jutak “kin juõn tõmak ebin ilo ankil otemjej an Anij.” Kamelele in kar kobaiki ilo Jeje ko kin tokjen ñan kij. Inem kajitõkin yuk make, ‘Ta eo ij aikwij make kõmmane ñan jutak wãnik im kin juõn tõmak ebin ilo ankil otemjej an Anij? Im ñe ij kõmmane, enaj walok ilo tokjen ta?’ Jen lale.

Kate Yuk ñan “Jutõk Wãnik”

4. Ri Colossae ro rar aikwij “wãnik” ilo wãwen et?

⁴ Epaphras ear kõnan bwe ro jein im jatin maan im kõrã ilo jitõb ilo Colossae ren “jutõk wãnik.” Nan eo Paul ej kajerbal, ijin rej ukõte “wãnik,” emaroñ melelen wãppen ak ritto. (Matu 19:21; Dri Hibru 5:​14; Jemes 1:​4, 25) Bõlen kwoj jelã bwe meñe juõn armij ej juõn ri Kennan an Jehovah emwij an baptais ejjab melelen bwe ej juõn ri Christian eritto ilo jitõb. Paul ear je ñan ri Ephesus ro, ro rej jokwe tu-rilik in Colossae, bwe shepherd ro im ri kaki ro ren kajeoñ in jibañ aolep ñan “tõbare juõn wõt tõmak, im jela Nejin Anij, ñõn armij eridto, ñõn joñõn ridtõn an Kraist obrõk.” Ilo jikin ko jet Paul ear rejañ ri Christian ro “ilo lolãtãt komin ridto ro.”​—Dri Epesõs 4:​8-​13; 1 Dri Korint 14:20.

5. Ewi wãwen jemaroñ kõmman wãnik bwe en mejenkajjik eo ad elap?

⁵ Elañe jet ilo Colossae rejañin kar ritto ilo jitõb, rar aikwij kõmmane bwe en mejenkajjik eo air. En kar jab eindein bareinwõt ke ilo ran kein? Meñe jaar baptais elõñ yiõ ko remotlok ak ilo yiõ ko kiõ, jemaroñ ke lo ilo alikar bwe jaar kõmman wõnmanlok ilo maroñ eo ad ñan kõmmanwa im ilo lemnak ko ad? Jej etale ke nan in kakabilek ko ilo Bible mokta jen ad kõmman bebe ko? Men ko ikijen Anij im congregation eo rej laplok ke ilo mour eo ad, jen air baj jabdetak wõt? Kimij jab maroñ kõmman wanjoñok ijin kin aolep wãwen ko me jemaroñ kwalok wõnmanlok rot in ñan ad wãnik, ak lale ruo wanjoñok ko.

6. Ta juõn ian men ko jemaroñ wõnmanlok wõt ñan ad wãppen, einlok wõt Jehovah?

⁶ Wanjoñok eo kein kajuõn: Jen ba bwe jaar rittolok ilo juõn mejatoto elõñ kalijeklok ie ak rej lej ñan armij ro jen bar juõn jowi, ailiñ, ak jikin. Kiõ emwij ad katak bwe ejelok kalijeklok ibben Anij, im bwe ej aikwij eindein kij. (Jerbal 10:14, 15, 34, 35) Ilo congregation ak circuit eo ad, ewõr armij ro jen ailiñ ko jet, inem jej aikwij bed ibbeir. Ak, ñan joñan et eo jej debij wõt eñjake ko renana iloa ak jej ekiljake kin armij ro jen ailiñ ko jet? Ewõr ke juõn lemnak in jememe ibbam, ilo am mõkaj im bõk juõn lemnak enana elañe juõn armij jen bar juõn ailiñ ej kõmman juõn bwid edik nae yuk? Kajitõk ibbam make, ‘Ij aikwij kalaplok ke aõ kõmman wõnmanlok ñan bõk lemnak in jab kalijeklok an Anij?’

7. Ad erom wãppen einwõt juõn ri Christian emaroñ kitibuj ad bõk lemnak ta kin ro jet?

⁷ Wanjoñok eo kein karuo: Ekkar ñan Dri Pilippai 2:3, jej aikwij “jab kõmõn jabrewõt ilo wãlok ak aibujuij jekron, a kin etã buruemi jabrewõt en lemnok ro jet remõn jen e.” Ekijkan ad kõmman wõnmanlok ikijen men in? Kajjojo armij ewõr kadkad ko remõn im men ko ej mõjno kaki. Elañe ilo ien ko remotlok jaar mõkaj in lo mõjno ko an ro jet, jaar kõmman ke wõnmanlok, im kiõ ejako ad kõtmene bwe rej aikwij enañin “wãppen”? (Jemes 3:2) Kiõ, elaplok jen mokta, jemaroñ ke lo​—ak bõlen bukõt​—wãwen ko ro jet rej utiejlok? ‘Ij aikwij ba bwe sister in ej laplok an maroñ kwalok meanwõd jen iõ.’ ‘Armij en ej kwalok juõn tõmak elaplok an kajur.’ ‘Emol, ej juõn ri kaki emõnlok jen iõ.’ ‘Emõnlok an jelã kõmmanwa jen iõ.’ Bõlen jet ro ilo Colossae rar aikwij kõmman wõnmanlok ilo men in. Jej ke?

8, 9. (a) Ilo wãwen et Epaphras ear jar kin ri Colossae ro bwe ren “jutõk” wãnik? (b) ‘Jutak wãnik’ ear kwalok ta kin ilju im jeklaj?

⁸ Epaphras ear jar bwe ri Colossae ro ren “jutõk wãnik.” Alikar, Epaphras ear jar ñan Anij bwe joñan an kar ri Colossae ro tõbar air ri Christian ro rewãppen im ritto ilo jitõb, ren “jutõk,” ak eindein air bed wõt.

⁹ Jejjab maroñ baj tõmak bwe kajjojo armij eo ej erom juõn ri Christian, meñe ej juõn eo eritto ilo jitõb, enaj eindein an bed wõt. Jesus ear ba bwe juõn enjel nejin Anij ear “jab jutõk ilo mol.” (Jon 8:​44) Im Paul ear kakememej ri Corinth ro kin jet ilo ien ko remotlok me rar karejar ñan Jehovah iumin jet ien inem rar bõjrak. Ear kakkõl brother ro emwij kabit ir kin jitõb kwojarjar: “Eo ej lemnok ej jutõk, en lale bwe en jab buñ.” (1 Dri Korint 10:12) Men in ej kõmman an kajurlok jar eo bwe ri Colossae ro ren “jutõk wãnik.” Ke rar erom wãppen im ritto ilo jitõb, rar aikwij wõnmanlok, im jab jenliklik, mõk, ak belok. (Dri Hibru 2:1; 3:​12; 6:6; 10:39; 12:25) Ilo wãwen in renaj “wãnik” ilo ran eo naj ekajete im kowãnik ir.​—2 Dri Korint 5:​10; 1 Piter 2:​12.

10, 11. (a) Epaphras ear likit joñok ta eo ñan kij ikijen jar? (b) Ekkar ñan men eo Epaphras ear kõmmane, bebe ta eo kwo kõnan kõmmane?

¹⁰ Ededelok ad kar etale kin aorõkin ad jar kin ro jet im kajerbal etair, en jejjet ad kajitõk ibben Jehovah bwe en jibañ ir, kainemõn ir, kajerammõn ir, im lelok jitõb kwojarjar ñan ir. Jar ko an Epaphras kin ri Colossae ro kar eindein. Im jemaroñ​—ilo mol jej aikwij​—lo ilo nan kein juõn nan in rejañ eaorõk kin ta eo jej bõkmantak kake ilo jar ñan Jehovah kin kij make. Ejelok kajitõk, jej aikwij kajitõk kin jibañ jen Jehovah bwe kij kajjojo jen “jutõk wãnik.” Kwoj ke?

¹¹ Etke kwojjab kwalok kin wãwen eo ibbam ilo jar eo am? Konono ibben Anij kin joñan eo kwar wõnmanlok ilo am tõbar am “wãnik” im ritto ilo jitõb. Akwelap ibben ñan jibañ yuk kile ijo kwoj aikwij rittolok ilo jitõb kaki. (Sam 17:3; 139:23, 24) Alikar, ewõr jet wãwen rot kein ibbam. Inem, jen am ebwer kin men in, akwelap ibben Anij ilo alikar im jejjet kin jibañ ñan kõmman wõnmanlok. En laplok jen juõn alen am kõmman men in. Ilo mol, etke kwojjab bebek bwe ilo week in tok kwonaj kaetoklok am jar bwe kwonaj “jutak wãnik.” Im karõk ñan kalaplok am kõmmane ñe kwoj lemnak kin unin tel in yiõ eo. Ilo jar ko am, lemnakelok men ko ekkã am kõmmani einwõt jenliklok, mõk, ak belok jen jerbal eo an Anij im ewi wãwen kwomaroñ bõprae am kõmmani.​—Dri Epesõs 6:​11, 13, 14, 18.

Jar kin Juõn Tõmak Ebin

12. Etke ri Colossae ro elaptata rar aikwiji “juõn tõmak ebin”?

¹² Epaphras ear jar kin bar juõn men me ear aorõk elañe ri Colossae ro rar kõnan bwe ren jutak im men in kabuñburuen Anij. Ej eindein an men in aikwij ñan kij bareinwõt. Kar ta eo? Ear jar bwe ren jutak “kin juõn tõmak ebin ilo ankil otemjej an Anij.” Buñ jen tõmak im katak in meletlet ko rekokkure an armij rar kabol ir, jet iair rar walok ilo etao einwõt kabuñ eo emol. Ñan wanjoñok, kar jibed ir ñan kememe jet ran ko rejej uair kin jitlok ak kwojkwoj, einwõt air kar aikwij kõmmane ilo kabuñ in ri Jew ro. Ri kaki ro rewan rar lemnakelok wõt enjel ro, jitõb ro rekajur kar kajerbali ñan lelok Kien eo ñan Moses. Lemnak kin am bed iumin ijjibed rot kein! Kar wõr elõñ lemnak ko rej idaptõk ibben don.​—Dri Galetia 3:​19; Dri Kolosse 2:​8, 16-​18.

13. Air kile ta eo emaroñ kar jibañ ri Colossae ro, im ewi wãwen men in emaroñ jibañ kij?

¹³ Paul ear jumaik ir ilo an kalikarlok jerbal eo an Jesus Christ. “Einwõt kom ar bõk Kraist Jisõs Iroij, ein drein komin etetal ilo E, Im en elle okrami im kalek kom ilo E, im komin bin ilo tõmak, einwõt emwij katakin kom.” Aet, kar wõr juõn aikwij (an ri Colossae ro im ad) kin tõmak eo ebin kin jerbal eo an Christ ilo karõk eo an Anij im ilo ad mour. Paul ear kamelele: “Bwe ilo E im wãwen enbwin, rej jokwe men otemjej an Anij wõt, Im komij wãppen ilo E, eo ej bõran iroij otemjej im kajur ko otemjej.”​—Dri Kolosse 2:​6-​10.

14. Etke kejatdikdik ear juõn men emol ñan ro ilo Colossae?

¹⁴ Ri Colossae ro rar ri Christian ro emwij kabiti kin jitõb kwojarjar. Ear wõr ibbeir juõn kejatdikdik einjuõn, mour ilañ, im kar wõr unin air kejbãrok bwe en meram wõt kejatdikdik eo. (Dri Kolosse 1:5) Ear “ankil otemjej an Anij” bwe en wõr ibbeir juõn tõmak ebin kin kejatdikdik eo air. Jabdewõt iair en kar bere ke kejatdikdik eo? Jab ñan jidik! En kar einjuõn ke rainin ñan aolep ro ewõr kejatdikdik eo letok in Anij kin mour ilo paradise ion lal? Emol, jaab! Alikar bwe kejatdikdik in emol ej mõttan “ankil otemjej an Anij.” Kiõ lemnak kin kajitõk kein: Elañe kwoj kate wõt yuk bwe kwon juõn ian “jar eo elap” eo enaj deor jen “iñtan eo elap,” ewi molin kejatdikdik eo am? (Reveles̃õn 7:​9, 14) Ej mõttan ke “tõmak [eo am] ebin ilo ankil otemjej an Anij”?

15. Lelkan in ta ko Paul ear kõlajraki me ear koba kejatdikdik?

¹⁵ Ikijen “kejatrikrik” in ejjab melelen juõn kõnan ak ettõnak ejjab alikar. Jemaroñ lo men in jen lajrak in point ko Paul ear bõkmantak kaki mokta ñan ri Rome ro. Ilo lajrak in, kajjojo men ko ear konono kaki ear ekkejel ion ak tellok ñan point in tok. Lale ijo Paul ear likit “kejatrikrik” ie ilo kamelele eo an: “Jej lõñliñ ilo iñtan ko ar: im je jela bwe iñtan ej jerbale kijenmij; Im kijenmij [“juõn bed emõn ibben Anij; im bed emõn kejatdikdik,” NW]; Im kejatrikrik e jab kajok; bwe emwij lutõk yokwe an Anij ilo buruer kin Jitõb Kwojarjar.”​—Dri Rom 5:​3-5.

16. Ke kwar katak mol eo ilo Bible, kejatdikdik ta eo kwar bõke?

¹⁶ Ke ri Kennan ro an Jehovah rar kwalok ennan eo ilo Bible ibbam, bõlen juõn ian mol ko ear kabwilõñ yuk, einwõt wãwen ro remij ak jerkakbiji eo. Ñan elõñ, melele eo ekãl kar maroñ eo ej bedbed ion Bible kin mour ilo juõn paradise ion lal. Kememej ien eo ke kwoj kab roñ kin katak eo. Ear juõn kejatdikdik elap an kabwilõñlõñ​—nañinmij im bwijwõlã renaj jako, kwomaroñ mour manlok im lañliñ kin tokjen jerbal ko am, im enaj wõr ainemõn ibben menin mour ko! (Ekklisiastis 9:​5, 10; Aiseia 65:17-​25; Jon 5:​28, 29; Reveles̃õn 21:​3, 4) Kwar bõk juõn kejatdikdik elap an aibujuij!

17, 18. (a) Ewi wãwen lajrak eo me Paul ear kwaloke ñan ri Rome ro kar tellok ñan kejatrikrik? (b) Kain kejatdikdik rot kar konono kake ilo Dri Rom 5:​4, 5, im ewõr ke ibbam?

¹⁷ Tokelik, bõlen kwar jelmae jumae ak matõrtõr. (Matu 10:34-​39; 24:9) Meñe ilo yiõ ko kiõ, Ri Kennan ro ilo elõñ ene ko rar jelmae jorrãn ko ke armij rar rakimi moko imwiir ak kar jibed ir ñan ko jen kabijukneir. Jet kar mõn ir, kar bõk book in Bible ko air, ak news ko kar kwalok report ko reriap kake ir. Jekdon kain matõrtõr rot kwar jelmaiki, Dri Rom 5:3 ej ba, kwar maroñ lañliñ ilo eñtan, im ear bõktok juõn tokjen emõn. Einwõt Paul ear je, eñtan ear jerbale kijenmij ilo yuk. Inem kijenmij ear tellok ñan juõn bed emõn ibben Anij. Kwar jelã bwe men eo kwar kõmmane ear jimwe, kwar kõmanmõn ankil an Anij, inem kwar liki bwe Anij ear buñburuen kake yuk. Ilo nan ko an Paul, kwoj eñjake am bõk juõn “bed emõn ibben Anij.” Ilo an wõnmanlok, Paul ear je bwe “juõn bed emõn ibben Anij, ilo oktan, ej [jerbale] kejatrikrik.” Men in emaroñ oktak jidik. Etke ear rumij an Paul kõlajrak “kejatrikrik”? Ear jab etto wõt ke am bõk kejatdikdik, ke kwar jino am roñ kin news eo emõn?

¹⁸ Alikar, Paul ijin ejjab jitõñlok ñan eñjake in kejatdikdik eo ad ilo jinoin kin mour wãppen. Men eo ej konono kake ej ellã jen men in; emũlal im laplok an kamakitkit. Ñe jej kijenmij ilo tiljek im kin men in kile bwe Anij ej buñburuen kake kij, men in ej walok ilo an kobaiklok ñan im kakajurlok kejatdikdik eo ad mokta. Kejatdikdik eo ear wõr ibbed ej kiõ laplok an mol, elaplok an bin, elaplok an jerbale ñan kij make. Kejatdikdik in emũlallok ej laplok an romak. Ej jededlok ilo aolepen ad, ilo kajjojo kadkad ko ad. “Im kejatrikrik e jab kajok; bwe emwij lutõk yokwe an Anij ilo buruer kin Jitõb Kwojarjar.”

19. Ewi wãwen kejatdikdik eo am en mõttan jar ko kwoj keini am kõmmani?

¹⁹ Kar jar eo emol an Epaphras bwe ro jein im jatin maan im kõrã ilo Colossae ren itoklimo wõt im tõmak kin men eo ear bed imair, im en wõr ibbeir “juõn tõmak ebin ilo ankil otemjej an Anij.” En eindein ad kajjojo keini ad kebak Anij kin kejatdikdik eo ad. Ilo jar ko am make, kakobaik kejatdikdik eo am kin lal eo ekãl. Kwalok ñan Jehovah kin joñan am jañnuwaade, kin liki bwe enaj itok. Akwelap ibben kin jibañ ñan kamũlallok im kadebakbaklok liki eo am. Einwõt Epaphras ear jar bwe en wõr ibben ri Colossae ro “juõn tõmak ebin ilo ankil otemjej an Anij,” en eindein am kõmmane. En emakijkij am kõmmane.

20. Elañe jejjo armij rej ilok jen ial in Christian, etke men in en jab unin am ebwer?

²⁰ Mol eo bwe ejjab aolep renaj jutak wãnik im kin juõn tõmak ebin en jab kamad ak kabwer yuk. Jet remaroñ likjap, jebwãbwe, ak baj ebwer. Men in ear walok ñan ro rebaktata ñan Jesus, ri jilek ro an. Ak ke Judas ear oktak im juõn ri ketak, ri jilek ro jet rar kadikdik ak kabõjrak ke air jerbal? Jab ñan jidik! Peter ear jerbale Sam 109:8 ñan kwalok bwe bar juõn enaj bõk jikin Judas. Kar kãlet juõn eo enaj bõk jikin, im ro retiljek ñan Anij rar wõnmanlok kin kijejeto ilo jerbal in kwalok nan eo air. (Jerbal 1:​15-​26) Rar bebek bwe renaj jutak wãnik im kin juõn tõmak ebin.

21, 22. Ilo wãwen et renaj lo am jutak wãnik im kin juõn tõmak ebin?

²¹ Kwomaroñ lukkun liki bwe am jutak wãnik im kin juõn tõmak ebin ilo ankil otemjej an Anij ejamin jab alikar. Enaj wõr ro renaj loe im kamolol kake. Wõn ro?

²² Eokwe, ro jeõm im jatõm maan im kõrã, ro rej jelã kajjeõm im rej yokwe yuk, renaj loe. Meñe elõñ iair rejjab ba ilo nan ko, tokjen eo enaj einlok wõt ta eo jej konono kake ilo 1 Dri Tessalonika 1:​2-6: “Kimij kamolol Anij ien otemjej kin kom otemjelok, im ba kin kom ilo jar ko am; Im e jab jokwõr am kememej ami jerbal in tõmak kab yokwe, im ami kijenmij in kejatrikrik ilo ar Iroij Jisõs Kraist, iman mejen Anij eo Jemer; Bwe . . . gospel eo am e ar jab iwij ñõn kom ilo nan wõt, a bareinwõt ilo kajur im ilo Jitõb Kwojarjar, im lap an rel buruemi . . . ; Im kom ar dri kajeoñwe kim im Iroij.” Enaj eindein eñjake an ri Christian ro retiljek ibelakõm ñe rej lo am “jutak wãnik im kin juõn tõmak ebin ilo ankil otemjej an Anij.”​—Colossians 1:​23, NW.

23. Ilo yiõ in tok, en ta eo kwon bebek ñan am kõmmane?

²³ Ejja eindein, Jemõm ilañ enaj loe im naj buñburuen kake yuk. Kwon liki kin men in. Etke? Kinke kwoj jutak wãnik im kin juõn tõmak ebin “ilo ankil otemjej an Anij.” Ilo kõketak Paul ear je ñan ri Colossae ro kin air etetal im “tellokõn Iroij im kabuñburuen ilo men otemjej.” (Dri Kolosse 1:​10) Aet, armij ro rejjab wãppen remaroñ kabuñburuen Anij. Ro jeõm im jatõm maan im kõrã ilo Colossae rar kõmmane. Ri Christian ro ibelakõm rej kõmmane kiõ. Kwe bareinwõt kwomaroñ kõmmane! Kin men in, ilo yiõ in tok, kwon kõmman bwe jar ko am ran otemjej im kõmman ko am ren kamol bwe emwij am beek bwe kwonaj “jutak wãnik im kin juõn tõmak ebin ilo ankil otemjej an Anij.”

Kwomaroñ ke Kememej?

• Ta eo ej koba ilo am ‘jutak ãnik’?

• Ta men ko kin kwe make kwon kar kobaiki ilo jar eo am?

• Einwõt Dri Rom 5:​4, 5 ej rejañ kake, kain kejatdikdik rot kwo kõnan bwe en wõr ibbam?

• Katak eo ad ear kamakit yuk ñan bõk mejenkajjik ta eo ilo yiõ in tok?

[Pija]

Epaphras ear jar bwe ro jein im jatin ren jutak wãnik, kin juõn tõmak ebin ilo Christ im kejatdikdik eo air

[Pija]

Elõñ million ro jet rej kwalok ejja kejatdikdik im tõmak ebin einwõt kwoj kwaloki