Lo Jokane ilo Juõn Lal Eobrak kin Kauwatata

ÑAN ETETAL ilo juõn melaj in bakutañ, kein ruprup, emaroñ bõktok mij. Ak ejamin juõn menin jibañ ke, elañe ear wõr juõn am map eo ear kwalok jikin ko rej melaj in kein ruprup ko? Bareinwõt, bõlen kwar katak ñan am kile elõñ kain kein ruprup ko. Alikar, jelãlokjen rot in enaj kar bwe an kadiklok kauwatata eo ñan am kinejnej ak mij.

Bible eo jemaroñ keidi ñan map in koba ibben katak eo ñan kile kein ruprup ko. Bible eo ebed ie meletlet eo ejelok joñan ñe ej itok ñan bõprae jedmatmat ñan jorrãn ko im jerbale abañ ko rej walok ilo mour.

Lale kallimur in emol jej loe ilo Jabõn Kennan Ko 2:​10, 11: “Bwe meletlet e naj dreloñ na ilo buruõm, im jelalokjen e naj men in mõnõnõ ilo am; lolokjen emõn e naj lale yuk, jelalokjen e naj kejbãrok yuk.” Meletlet im jelãlokjen eo rej kwaloke ijin rejjab itok jen armij ak rej jen Anij. “A jabdewõt eo enaj eoroñ iõ [meletlet eo an Anij], enaj bed ilo jokane im ejamin abõnõnõ kin lelñoñ kin jorrãn.” (Proverbs 1:​33, New World Translation) Jen lale wãwen an Bible eo maroñ kalaplok jokane eo ad im jibañ kij bõprae elõñ abañ ko.

Bõprae Lanwõtwõt ko Rej Tellok ñan Mij

Joñan oran ko ilo ien kein ran kein im World Health Organization (WHO) ear kwalok kaki kin oran mij ko rar walok jen lanwõtwõt in wan ettõr ko ilo ial enañin joñan in 1,171,000. Iturinlok 40 million ro jet rar ikkinejnej, im elõñlok jen 8 million etto air eñtan kin mõjno in enbwin.

Meñe ejjab lukkun maroñ wõr jokane ilo kattõr, jokane eo ad ej bwe an laplok ñe jej bokake kien kattõr ko an wan ettõr ko ilo ial. Ilo an konono kin maroñ ko an ri kien ro, ro rej kõmman im kabin kien wan ettõr ko, Bible ej ba: “Armij otemjej ren kiblie ñõn ro routiej jen ir.” (Dri Rom 13:1) Ro rej kattõr im rej jerbale nan in kakabilek in ej diklok kauwatata eo ñan air ion juõn lanwõtwõt, im ibben ekkã an walok tokjen ko.

Bar juõn men ej bõktok emõn ñan kattõr ilo jokane ej kautiej mour. Bible ej ba kin Jehovah Anij: “Bwe ibõm unin dren in mour.” (Sam 36:9) Inem mour ej juõn menin letok ekwojarjar. Tokjen menin, jejjab maroñ in bõk menin letok in jen jabdewõt ro jet ak kwalok ad jab kautiej mour, ekoba mour eo ad make.​—Jenesis 9:​5, 6.

Eindein, kautiej mour an armij ekoba ad lukkun lale bwe wan ettõr eo waad im mweo imõd ren menin jokane ñan mour joñan wõt air maroñ. Ilo Israel eo etto, jokane eo ñan mour kar juõn men eo moktata im lap ilo wãwen ko otemjej ilo mour. Ñan wanjoñok, ñe rej kalek juõn em, Kien eo an Anij ear menin aikwij bwe bõrwoj in mweo​—juõn jikin makitkit an family eo​—en wõr juõn an worwor. “Bareinwõt kwoj aikwij kõmmane juõn worwor ñan bõrwoj in mweo imõm, bwe kwon jab maroñ naruõn mweo imõm kinke juõn armij . . . emaroñ wõtlok jene.” (Deuteronomy 22:​8, NW) Elañe juõn armij ear wõtlok kinke rar jab bokake kien in kien kejbãrok mour, Anij ear likit eddo eo ion armij eo imõn mweo. Ejelok bere, jerbale nan in kaiñi in yokwe in emwij likit ilo kien in enaj kar kadiklok lanwõtwõt ko ilo jikin jerbal eo ak ilo ikkure bareinwõt.

Tarinaik Kõnan ko Rej Tellok ñan Mij

Ekkar ñan WHO, ebed kiõ elõñlok jen juõn billion ri kõbatat ilo lal in, im ewõr emen million armij rej mij ilo juõn yiõ im mij kein jemaroñ karõklok ñan tobacco. Joñan in rej watõk an laplok ñan enañin 10 million ilo 20 ñan 30 yiõ kane rej bedotok. Ebar lõñ ri kõbatat ro rej mij jen kõbatat, bareinwõt ro jet rej kajerbal unokan kadõk ko rej “menin ikkure” renaj kokkure ejmour eo air im aorõk in mour eo air kin kõnan kein air rej karõki.

Meñe Nan in Anij ejjab lukkun kwalok kin kajerbal tobacco im kajerbal unokan kadõk ko ilo jõkkar, nan in kaiñi ko ie remaroñ kejbãrok kij jen kain manit kein. Ñan wanjoñok, 2 Dri Korint 7:1 ej kakabilek: “Jen mõke karreoik kij jen etton otemjej in kõniek kab ar.” Ejelok bere bwe tobacco im unokan kadõk ko rej katton, ak kõmman an nana, enbwin kin elõñ chemical ko rej kõmman jorrãn. Bareinwõt, Anij ekõnan bwe enbwinid en “kwojarjar,” melelen ejelok an mãr im erreo. (Dri Rom 12:1) Kwoj jab errã ke bwe jerbale nan in kaiñi kein renaj kadiklok juõn kauwatata eo elap ñan mour eo an juõn armij?

Ellã Ion Manit ko Rekauwatata

Elõñ armij ejjab jokkin wõt juõn ilo air mõñã im idak. Tokjen ko rej walok jen tarjen joñan air mõñã im idak emaroñ koba tõñal, cancer, im nañinmij in menono. Kajerbal alcohol ilo jõkkar ej tellok ñan bar abañ ko jet, einwõt añũri den in kadõk, family ko rej jebel, lanwõtwõt ko ilo wan ettõr ko ilo ial. Ilo ijo turãjet, mantin kadiklok mõñã ak diet le jen joñan emaroñ bareinwõt tellok ñan jorrãn im emaroñ tellok ñan nañinmij in-​anorexia nervosa ak nañinmij in aidiklok le jen joñan.

Meñe Bible ejjab juõn textbook in jerbal in doctor, ej letok kakabilek eo emol kin aikwij eo ñan joñan mõñã im idak eo emõn. “Kwon eoroñ, nejiõ, im kwon meletlet, im kwon tellok buruõm ilo ial eo. Kwon jab ber iben ro rej irak wain; iben ro re kejo dreka: Bwe dri karek im dri mãtia re naj jeramel wõt.” (Jabõn Kennan Ko 23:19-​21) Bareinwõt, Bible ej ba bwe mõñã im idak ej menin kalañliñ. “Jabrewõt armij en mõña im irak, im lõñliñ ilo tokjen aolepen jerbal eo an, eñin men in lelok jen Anij.”​—Ekklisiastis 3:​13.

Bible ej bareinwõt kõketak kin juõn lemnak eo jokkin wõt juõn kin kamineneik enbwin, ilo an kamol bwe “kamineneik enbwinõm wõt, e naj jar rik an kakajuror yuk.” Ak ej kobaiktok: “A jerbal in Anij ej kakajuror yuk kin men otemjej, im eor an kalimur kin mour in, kab mour eo e naj itok.” (1 Timote 4:8) Kwomaroñ kajitõk, ‘Ewi wãwen an jerbal in Anij wõr tokjen kiõ?’ Ilo elõñ wãwen ko. Ijellokin an kobaiktok juõn wãwen eo elap tokjen ilo jitõb ñan mour eo an juõn armij, jerbal in Anij ej letok katak kin kadkad kein ewõr tokjeir einwõt yokwe, lañliñ, ainemõn im jatõr​—aolepeir ewõr kunair ñan juõn kõtmene eo ewõr liki ie im ejmour eo emõn.​—Dri Galetia 5:​22, 23.

Tokjen ko Remeo kin Mour Etton

Rainin, elõñ million armij emwij air jolok air debij wõt mour erreo. Nañinmij in AID ko ej juõn ian tokjen ko. Ekkar ñan WHO, elõñlok jen 16 million emwij air mij jen jinoin nañinmij in AID, im ilo tõre in kiõ, enañin 34 million rej bo kin HIV, kij ko rej kõmman nañinmij in AIDS. Elõñ ro rej bõk AIDS rej bõk nañinmij in jen belele wan, wã ko retton im ro rej añũri unokan kadõk ko rej kajerbali, ak bõk bõtõktõk eo ejjab erreo ilo eke.

Bar tokjen ko jet jen luji mour erreo ekoba, nañinmij in herpes, gonorrhea, hepatitis B im C, im syphilis. Meñe kajin doctor rot kein rar jab kajerbali ilo ien ko an Bible, mõttan in enbwin ko nañinmij ko rar jeleti ilo ien eo rar jelã kaki. Ñan wanjoñok, Jabõn Kennan Ko 7:​23 ej kwalok kin tokjen ko rekamijak kin lũñ einwõt ‘juõn mõri wie ajin.’ Syphilis ekkã an kokkure aj, einwõt hepatitis. Aet, ejejjet ien im menin yokwe bwe nan in kakabilek eo ilo Bible bwe Christian ro ren ‘kejbãrok jen bõtõktõk im jen lũñ’!​—Jerbal 15:28, 29.

Aujid in Arõk Money

Ilo juõn jibadbad ñan mõkaj in mweie, elõñ armij rej bõk elap kauwatata kin money ko air. Ekaburomõjmõj, bwe bõk kauwatata rot in ekkã an tellok ñan luuj ak jorrãn. Bõtab, ñan eo ej ri karejaran Anij, Bible ej ba: “A emõnlok en jerbal im kõmõn kin pein men eo emõn bwe en or iben in lelok ñõn eo ej aikwij.” (Dri Epesõs 4:​28) Emol, ri jerbal eo ej kate emaroñ jab aolep ien oktak im mweie. Ak, ej ainemõn ilo lemnak, make-​kautiej, im emaroñ wõr money ko bareinwõt ñan jabawõt kaki ñan juõn men ej aikwiji jibañ ie.

Bible ej kakkõl: “A ro re kanuij kõnan bwe ren dri mweie, re buñ ilo kabo im oujir im elõñ mõm ko re bwebwe im nana, rej kamaloñ armij im kokkure ir ilo jikin joko. Bwe arõk mõnni ej okran nana otemjej, eo ke jet r’ar arõk r’ar jebwãbwe jen tõmak im mõke wie ir kin elõñ men in kaburomõj.” (1 Timote 6:​9, 10) Ejjab riap bwe elõñ “ro rej beek ñan air mweie” rej mweie. Ak kin wõnãn et eo? Ejjab mol ke bwe ejmour eo air, family eo, mour in jitõb eo, im bareinwõt aorõkin air kiki rej jorrãn?​—Ekklisiastis 5:​12.

Juõn armij eo emeletlet ej kile bwe “an armij mour e jab kin an lõñ men ko an.” (Luk 12:15) Money im jet mweiuk rej menin aikwij ilo elõñ wõt jukjuk im bed ko. Ilo mol, Bible ej kwalok bwe “money ej juõn men in kejbãrok,” ak ej kobaiktok “a tokjen jelalokjen, eñin, meletlet ej lomoren eo ej ber iben.” (Ecclesiastes 7:​12, NW) Ilo an jab einwõt money, jelãlokjen eo ejimwe im meletlet emaroñ jibañ kij ilo wãwen ko otemjej, ak elaptata ilo wãwen ko rej jelet mour eo ad.​—Jabõn Kennan Ko 4:​5-9.

Ñe Meletlet Make Enaj Kejbãrok Kij

Meletlet eo emol ejjabto enaj ‘kejbãrok mour eo an armij eo an’ ilo juõn wãwen eo ejamin bar wõr einwõt tokelik​—kejbãrok eo ilo “eñtan eo elap,” emõkaj an-​ebaktok ñe Anij ej jolok nana. (Matthew 24:​21, NW) Ilo ien en armij renaj jolok money ko air ñan loan ial ko einwõt “juõn menin jõjõ,” ekkar ñan Bible. Etke? Kinke rar katak ilo juõn wãwen eo emeo bwe gold im silver rejamin wiaik mour ñan ir ilo “ran in illu eo an Jehovah.” (Ezekiel 7:​19, NW) Ilo wãwen eo juõn, “juõn jar elap,” ro rar kejbãrok mwiliir ‘rar likit menin aorõk ko air ilañ, ilo air likit tokjen ko ilo jitõb mokta ilo mour eo air, renaj bõk tokjen jen jortoklik eo air emol im bõk mour indio ilo juõn paradise ilal.​—Reveles̃õn 7:​9, 14; 21:​3, 4; Matu 6:​19, 20.

Ewi wãwen ad maroñ bõk jokane in an ran ko rej itok? Jesus ej uak: “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Elõñ armij emwij air lo jelãlokjen in ilo Nan in Anij, Bible eo. Rein ejjab wõr wõt juõn air kejatdikdik eo emõn ñan ilju eo ej itok ak rej bareinwõt lo juõn joñan ainemõn im jokane kiõ. Ejja einwõt an kar ri jeje Sam kwalok: “Ilo ainemõn inaj babu im kiki, bwe Kwe make, O Jehovah, kwoj kõmman bwe in bed ilo jokane.”​—Psalm 4:​8, NW.

Kwomaroñ ke lemnak kin bar jet unjen melele eo me emaroñ jibañ kadiklok kauwatata ko ñan ejmour im mour eo am ñan joñan eo Bible ej kõmmane? Ejelok bar juõn book ewõr maroñ eo an Bible ie, im ejelok bar juõn book emaroñ jibañ yuk ñan am lo jokane eo emol ilo lal in rainin eobrak kin kauwatata. Etke kwoj jab etale manlok wõt?

[Box/Pija ilo page 6]

Ejmour im Jokane eo Emõnlok​—Kin Jibañ eo An Bible

Ñan ko jen mol ko ilo mour, juõn kõrã dikdik etan Janea kar juõn an manit in kajerbal marijuana, tobacco, cocaine, amphetamines, LSD, im unokan kadõk ko jet. Ear bareinwõt lap an idak alcohol. Ekkar ñan Jane, leo belen ear jab emõnlok ilo wãwen kein. Ilju eo air ear einwõt marok. Inem Jane ear ion Ri Kennan ro an Jehovah. Ear jino bed ilo kwelok ko an Christian im read Imõniaroñroñ im magazine eo rejetan Awake!, eo ear jake ibben leo belen. Erro jimor ar jino katak Bible ibben Ri Kennan ro. Ke rar ejaake juõn kamolol kin kien ko reutiej an Jehovah, rar bõjrak jen kajerbal aolep menin kadõk ko. Tokjen eo? “Mour eo am ekãl ear kõmman an lap am lañliñ,” Jane ear je jejjo yiõ tokelik. “Elap aõ kamolol Jehovah kin kajur in karreo eo an Nan eo an im mour in ejmour im jokane kimij bõk kunam kiõ.”

Aorõk in mol eo an juõn ri jerbal rej kalikare ikijen case eo an Kurt, eo jerbal eo an ekoba kejbãrok computer ko. Kein jerbal in computer eo rekãl rar aikwiji, im leo Kurt ear jerbal ñane ear kamaroñe bwe en bukõte ilo jikin eo emõn wõnãn ie. Kurt ear lo juõn eo emõn rej wia kake, im juõn wõnãn rar errã kake. Bõtab, clerk eo ej wia kake computer eo ear kõmmane juõn bwid kin wõnãn eo rar je, inem wõnãn eo ear diklok kin enañin joñan in $40,000 (U.S.) ediklok jen joñan eo rar errã kake. Ke ej lo bwid eo, Kurt ear kir company eo, im manager eo ear ba bwe ilo 25-​yiõ ko in an jerbal, ejañin kar lo mol rot in. Kurt ear kamelele bwe Bible eo ear ãje bõklikit eo an. Tokjen eo manager eo ear kajitõk kin 300 copy ko in kajjo Awake! ko me rar jerbal ibben mol ilo business bwe en maroñ lilok ñan ri jerbal ro mõttan. Ak Kurt, mol eo an ear tellok ñan juõn utiejlok ilo jikin jerbal eo an.

[Kamelele eo itulal]

[Pija]

“Ña Jehovah, am Anij, Eo ej katakin yuk ñan tokjen eo ñan kwe make.” ISAIAH 48:17, NW.