Lemnak Kin Jitõb Eo Im Mour!
“Lemnak an jitõb mour.”—DRI ROM 8:6.
1, 2. Ta oktak eo Bible ej kõmmane ikõtan “kõniek” im “jitõb”?
EJJAB juõn men ebidodo ñan debij wõt juõn jutak in mour erreo iman mejen Anij ibwiljin juõn jukjuk im bed eo mour eo ie etton im ej nebar mõnõnõ eo an kõnan ko an kanniek. Bõtab, Jeje ko rej keidi “kõniek” im “jitõb,” im kõmmane juõn lain eo ealikar ej kejebel kõtan eo ikõtan tokjen ko rekamijak ilo an juõn lelok e make ñan kanniek eo ejerawiwi bwe en kajur ion im tokjen ko ewõr jerammõn ie in an juõn lelok e make ñan kajur in jitõb kwojarjar eo an Anij.
2 Ñan wanjoñok, Jesus Christ ear ba: “Jitõb ej kemour; kõniek ejelok an kakajuror: nan ko I ar konono ñõn kom kaki, rej jitõb, im rej mour.” (Jon 6:63) Ñan Christian ro ilo Galatia, ri jilek Paul ear je: “Bwe kõniek ej ineme Jitõb, im Jitõb nae kõniek; bwe rein rej jumae dron; bwe komin jab kõmõn men ko kom kõnan.” (Dri Galetia 5:17) Paul ear bareinwõt ba: “Bwe eo ej jeor ñõn kõniek, jen kõniekin e naj marmir wabõnbõn; a eo ej jeor ñõn Jitõb, jen Jitõb e naj marmir mour in drio.”—Dri Galetia 6:8.
3. Ta eo ej menin aikwij eo ñan ad rõlok im anemkwoj jen kõnan ko rebwid im kõnan ko ñan ad itok wõt in kõmmani?
3 Jitõb kwojarjar eo an Jehovah—kajur eo an ej makitkit—emaroñ totake “mõm ko an kõniek” rejjab erreo im kajur eo ej menin kokkure ikijen kanniek in jerawiwi eo ad. (1 Piter 2:11) Ñan rõlok jen lokjen kõnan ko rebwid, elap tokjen bwe en wõr ibbed jibañ eo an jitõb eo an Anij, bwe Paul ear je: “Bwe lemnok an kõniek mij; a lemnok an Jitõb mour im ainemõn.” (Dri Rom 8:6) Ta melelen lemnak an jitõb?
“Lemnok an Jitõb”
4. Ta eo ej melelen “lemnak an jitõb” eo?
4 Ke Paul ear jeje kin “lemnok an jitõb,” ear kajerbal juõn nan in Greek eo ej kalikar “wãwen lemnak, lemnak(-karõk), . . . aleje, kõnan eo elap, katikat.” Nan eo uanlok wõt melelen “ñan lemnak, ñan lemnak kin juõn wãwen.” Kin menin, lemnak an jitõb melelen kajur eo ej makitkit an Jehovah ej beek, kajur ion, im iun manlok. Ej kalikar bwe jej mõnõnõ in kõttãik lemnak eo ad, men eo jej itok wõt in kõnan kõmmane, im kõnan ko relap ñan kajur in jitõb kwojarjar eo an Anij.
5. Ñan joñan et eo jej aikwij lelok kij ñan kajur eo an jitõb kwojarjar eo?
5 Joñan eo jej aikwij lelok ñan kajur eo an jitõb kwojarjar eo Paul ear kalikare ke ear konono kin ‘ri karejar ñan jitõb.’ (Dri Rom 7:6) Ion bedbed in tõmak eo air ilo katok in binmour eo an Jesus, Christian ro emwij kanemkwoj ir jen kajur eo an jerawiwi im kin menin “mij” ñan wãwen eo air mokta einwõt ri karejar ro an. (Dri Rom 6:2, 11) Rein remij ilo nan in kõkkar ilo wãwen rot in rej mour wõt ilo kanniek im rej kiõ anemkwoj ñan lor Christ einwõt “ri korijeran wãnik.”—Dri Rom 6:18-20.
Juõn Oktak Ealikar
6. Ta oktak eo ro “ri korijeran wãnik” rej loe?
6 Oktak eo jen “korijeran jerawiwi” ñan karejaran Anij einwõt “karejar ñan wãnik” emol ealikar. Kin jet ro rar ione juõn oktak eo einwõt in, Paul ear je: ‘A emwij kwole kom, a emwij kokwojarjar kom, a emwij kowãnik kom, ilo etan Iroij Jisõs Kraist, im ilo Jitõb õn ar Anij.’—Dri Rom 6:17, 18; 1 Dri Korint 6:11.
7. Etke elap tokjen bwe en wõr ibbed lemnak eo an Jehovah kin wãwen men ko?
7 Ñan ad maroñ lo juõn oktak eo ekabwilõñlõñ einwõt in, moktata jej aikwij katak kin wãwen an Jehovah lale wãwen ko. Ilo ebeben ko etto, ri jeje Sam David ear eowor ñan Anij: “Kwon kwalok ñõn iõ ial ko Am, O Jeova . . . Kwon tel iõ ilo Am mol, im katakin iõ.” (Sam 25:4, 5) Jehovah ear roñjake David, im E maroñ uak juõn jar eo einwõt in ñan ro ri karejaran bareinwõt ilo ran kein. Ke ial ko im mol eo an Anij rerreo im kwojarjar, kalmenlokjen kaki enaj menin jibañ elañe jej bõk kabo ñan kamõnõnõik mõm ko an kanniek eo etton.
Jerbal eo Elap Tokjen an Nan in Anij
8. Etke emenin ekaiuriur bwe jen katak Bible?
8 Nan in Anij, Bible eo, ej juõn tokjen jitõb eo an. Kin menin, juõn wãwen eo elap tokjen ñan kõtlok bwe jitõb in en jerbal iod ej ilo ad konono im katak Bible eo—ran otemjej ñe emaroñ. (1 Dri Korint 2:10, 11; Dri Epesõs 5:18) Kanne lemnak eo ad im buruõd kin mol ko ilo Bible im nan in kaiñi ko enaj jibañ kij ñan jutak nae tarinae ko ion mour in jitõb eo ad. Aet, ñe mour in lũñ ej walok, jitõb eo an Anij emaroñ kakememej kij kin nan in kakememej ko ilo Jeje ko me remaroñ kabin bebe eo ad ñan jerbal ekkar ñan ankil an Anij. (Sam 119:1, 2, 99; Jon 14:26) Kin menin, reban mone kij ñan ad lor juõn ial eo ebwid.—2 Dri Korint 11:3.
9. Katak Bible ewi wãwen an kakajurlok bebe eo ad ñan kejbãrok wõt kõtan eo ad ibben Jehovah?
9 Ke jej wõnmanlok wõt ilo ad mol im niknik ilo katak Jeje ko ibben jibañ eo an publication ko rej bedbed ion Bible, jitõb eo an Anij ej kareel lemnak eo ad im buruõd, im kõmman menin ad kautiej kien ko an Jehovah ñan air mũlallok. Kõtan eo ad ibben Jehovah men eo elaptata tokjen ilo mour eo ad. Ñe jelmae kabo, lemnak ko kin joñan an kamõnõnõ eo maroñ kamõnõnõ ñan ad lorak ie ilo kõmman bwid jeban bõke. Ak, lemnak eo ad moktata ej ñan debij wõt tiljek eo ad ñan Jehovah. Juõn kamolol eo ekajur kin kõtan eo ad ibben ej lujur kij ñan ad tarinaik jabdewõt kõnan eo me emaroñ kokkure ak joloke.
“Aõ Yokwe Kiõm!”
10. Etke bokake kien eo an Anij ej menin aikwij ñan lemnak kin jitõb eo?
10 Ñan bõk lemnak an jitõb, jelãlokjen eo kin Nan in Anij ejjab bwe. King Solomon ear kanuij emõn an bõk kien ko an Jehovah, ak ear likjap in mour kaki ilo mõttan mour eo an tokelik. (1 Kiñ Ro 4:29, 30; 11:1-6) Elañe jej bõk lemnak in jitõb, jenaj lo aikwij eo ejjab ñan jelã wõt ta eo Bible ej ba ak bareinwõt ñan bokake kien eo an kin aolepen buruõd. Melelen menin kõmmane juõn etale in bõklikit kin kien ko an Jehovah im niknik ilo ad kate kij lori. Ri jeje Sam ear wõr kain lemnak rot in ibben. E ar al: “O e nañin lap aõ yokwe kiõm! I kalomõnlokjen kake iomin aolepen ran.” (Sam 119:97) Ñe ej mol ad lemnak ñan lor kien eo an Anij, jej emmakit ñan kalikar kadkad ko kadkad in Anij. (Dri Epesõs 5:1, 2) Jen ad mõjno im reel ñan kõmman bwid, jej kalikar leen jitõb eo, im juõn kõnan ñan kamõnõnõik Jehovah ej ukõtlok kij jen “mõm in kõniek” ko renana.—Dri Galetia 5:16, 19-23; Sam 15:1, 2.
11. Ewi wãwen am naj kar kamelele bwe kien eo an Jehovah ej kemo lũñ ej juõn menin kejbãrok ñan kij?
11 Ewi wãwen ad maroñ ejaake kautiej eo emũlal im yokwe ñan kien eo an Jehovah? Juõn wãwen ej ilo ad kejbãrok ad etale aorõk in. Lemnak kin kien eo an Anij me ej kõmman joñan babu ibben don ilo kõtan ko ñan belele im kemo lũñ im lejen. (Dri Hibru 13:4) Bokake kien in ej bõk ke jen kij jabdewõt men emõn? Juõn Jemed ilañ eo ej yokwe en kar kõmmane ke juõn kien eo ej bõprae kij jen juõn men eo ewõr tokjen? Bwebõta, eban! Lale ta eo ej walok ilo mour ko an elõñ ro rejjab mour ekkar ñan kien mour erreo ko an Jehovah. Bõroru ko rejjab kõnan ekkã air tellok ir ñan mõn lojiir ak bõlen ñan mare ilo mõkaj im bed ilo belele ko rejjab mõnõnõ. Elõñ rej aikwij kakajiririk juõn ajiri ilo an ejelok leo belen ak lio belen. Bareinwõt, ro rej jerbale mantin lũñ rej kajedmatmate ir make ñan nañinmij ko rekabobo kin lũñ. (1 Dri Korint 6:18) Im elañe juõn ri karejaran Jehovah ej lũñ, eñjake ko rej jelete remaroñ menin kokkure. Kajeoñ jibed jorrãn eo an juõn bõklikit eo ebwid emaroñ kõmman an bin kiki ilo boñ im eñtan in lemnak. (Sam Ko 32:3, 4; 51:3) Inem, ejjab alikar ke, bwe kien eo an Jehovah im ej kemo lũñ ej eiki ñan kejbãrok kij? Aet, emol ewõr tokjen eo elap ilo debij wõt mour erreo!
Jar ñan Jibañ eo an Jehovah
12, 13. Etke ejimwe ñan jar ñe mõm ko an jerawiwi rej tarinaik kij?
12 Lemnak an jitõb emol ej kir ñan jar ilo eñjake in buru. Ekkar kajitõk jibañ eo an jitõb eo an Anij, bwe Jesus ear ba: “Elañe komeo . . . kom jelã kijkan lelok men ko remõn ñõn ro nejemi; ta e jamin lap an Jememiuij i lõñ lelok Jitõb Kwojarjar ñõn ro otemjej rej kajitõk iben ke?” (Luk 11:13) Ilo jar, jemaroñ kalikar ad atartar ion jitõb eo ñan jibañ ikijen mõjno ko ad. (Dri Rom 8:26, 27) Elañe jej kile bwe kõnan ko rejerawiwi ak lemnak ko rej jelet kij, ak elañe juõn ri tõmak eo mõttad ej kwalok menin ñan ad lemnak kake, enaj menin meletlet ñan tibdiki abañ eo ilo jar ko ad im kajitõk jibañ eo an Anij ñan ad ellã jen kõnan kein jej itok wõt in kõmmani.
13 Jehovah emaroñ jibañ kij ñan ad lale wõt men ko rewãnik, reolbo, mour erreo, im men ko tellokin nebar. Im ejejjet ñan kajitõk im eowor ñan e bwe “ainemõn jen Anij” enaj kejbãrok buruõd im kajur in lemnak ko ad! (Dri Pilippai 4:6-8) Kin menin jen jar ñan jibañ eo an Jehovah ñan “lor emõn, kwojarjar, tõmak, yokwe, kijenmij, im inemõn.” (1 Timote 6:11-14) Kin jibañ eo an Jemed ilañ, inebata ko, kabo ko rejamin eddek ñan joñan eo jejjab maroñ bebeki. Ak, mour ko ad naj kakõlleiki ikijen jokane eo letok in Anij.
Jab Kaburomõj Jitõb eo
14. Etke jitõb eo an Anij ej juõn kajur ñan karreo?
14 Ri karejar ro reritto ilo jitõb an Jehovah rej kajerbal nan in kakabilek eo an Paul: “Komin jab kwũne Jitõb Kwojarjar.” (1 Dri Tessalonika 5:19) Ke jitõb eo an Anij ej “jitõb õn kwojarjar,” erreo, ejelok an likjap, ekwojarjar. (Dri Rom 1:4) Ñe ej jerbal iod, jitõb in ej juõn kajur ñan kwojarjar, ak erreo. Ej jibañ kij kejbãrok kij ilo juõn ial in mour erreo eo ej kakõlleiki kiblie eo ñan Anij. (1 Piter 1:2) Jabdewõt manit eo ejjab erreo ej kõmmane juõn menin kajekdon jitõb in, im menin emaroñ kõmman an wõr tokjen ko ewõr jorrãn ie. Ewi wãwen?
15, 16. (a) Ewi ad maroñ kaburomõj jitõb eo an Anij? (b) Ewi wãwen ad maroñ bõprae ad kaburomõj jitõb eo an Jehovah?
15 Eokwe, Paul ear je: “Im komin jab kaburomõj Jitõb Kwojarjar an Anij, ilo Eo emwij sil kom mae ran in lomor.” (Dri Epesõs 4:30) Jeje ko rej kile jitõb eo an Jehovah einwõt juõn bujen, ak juõn ‘kakõlle in men eo enaj kar itok,’ ñan Christian ri kabit ro retiljek. Im men in ej mour in jab wabanban eo ilañ. (2 Dri Korint 1:22; 1 Dri Korint 15:50-57; Reveles̃õn 2:10) Jitõb eo an Anij emaroñ tel ri kabit ro im ro mõttair kin juõn kejatdikdik ñan lal ilo juõn mour in tiljek im emaroñ jibañ ir bõprae jerbal ko rejerawiwi.
16 Ri jilek eo ear kakkõl nae kõnan ko ñan kõmman riap, kwot, kwalok mwil kajookok, im men ko eierlok wõt. Elañe jej kõtlok kij make ñan ad reel ilo men rot kein, jenaj etal nae nan in kakabilek in kakõrmol in jitõb eo an Nan in Anij. (Dri Epesõs 4:17-29; 5:1-5) Kin menin ilo juõn joñan, jemaroñ kaburomõj jitõb eo an Anij, im emol menin ej juõn men eo jenaj kõnan bõprae. Kin wãwen in, elañe jabdewõt iad ej jino iten kajekdon nan in kakabilek eo an Nan eo an Jehovah, jemaroñ jino ejaake lemnak ko ak ial ko emaroñ walok tokjeir ilo jerawiwi eo ewõr kõnan ie im luji aolepen kwojarjar eo emõn. (Dri Hibru 6:4-6) Meñe jemaroñ jab jerbale mantin jerawiwi kiõ, jemaroñ kaioklok ial in. Ilo ad etal wõt ijelman tel eo an jitõb eo, jenaj kaburomõj e. Jenaj bareinwõt jumae im kaburomõj Jehovah, eo ej unjen jitõb kwojarjar eo. Einwõt ro rej yokwe Anij, jejamin kõnan kõmmane menin. Ak, jemaroñ jar ñan jibañ eo an Jehovah bwe jen jab kaburomõj jitõb eo an ak jen maroñ bõktok nebar ñan ãt eo etan ekwojarjar ilo ad etal wõt im lemnak kin jitõb eo.
Debij wõt Lemnak kin Jitõb eo
17. Ta jet ian mejenkajjik ko ilo jitõb jemaroñ karõki, im etke jerbal ñan tõbari ej menin meletlet?
17 Juõn wãwen eo ewõr tokjen ñan ad lale ñan lemnak wõt kin jitõb eo ej ñan karõk mejenkajjik ko ilo jitõb im jerbal ñan ad tõbari. Ilo atartar ion aikwij ko ad im wãwen ko, mejenkajjik ko ad ekoba kõmanmanlok mantin ad katak, kalaplok ad bõk kunad ilo jerbal in kwalok nan, ak jibadõk juõn jerbal in jerammõn eo ealikar, einwõt jerbal in full-time pioneer, jerbal ilo Bethel, ak jerbal in missionary. Menin enaj debij wõt an boub ad lemnak kin tokjen ko ilo jitõb im enaj jibañ kij ñan jumae ad ajelok kij ñan mõjno in armij eo ad ak jibadõk mejenkajjik ko an mweiuk im kõnan ko an jukjuk im bed in rejjab ekkar ñan jeje ko. Menin emol ej ial in meletlet, bwe Jesus ear rejañ: “Komin jab koorlok mweiuk ñõn kom ion lõl, ijo drile im jo rej kõñi, im ijo ro dri kwot rej rupe im kwote. A komin koorlok mweiuk ñõn kom i lõñ, ijo drile im jo re jab kõñi, im ijo ri dri kwot re jab rupe im kwote. Bwe ijo mweiõm ej ber, bareinwõt buruõm e naj ber ie.”—Matu 6:19-21.
18. Etke elap tokjen ñan debij wõt ad lemnak kin jitõb eo ilo ran kein eliktata?
18 Lemnak kin jitõb eo im jolok kõnan ko an lal emol ej ial in meletlet ilo “ran kein eliktata.” (2 Timote 3:1-5) Eokwe ke, “lõl e jokolok im mõm ko an: a eo ej kõmõnmõn ankil an Anij ej berwõt in drio.” (1 Jon 2:15-17) Elañe juõn Christian jodikdik ej jibadõk mejenkajjik eo ñan jerbal in full-time, ñan wanjoñok, menin emaroñ jerbal einwõt juõn meram in tel ilo yiõ in aitwerõk ko ilo ien eo ej jodikdik ak rittolok. Ñe ej bõk ijjibed ñan ebbururu, juõn armij eo einwõt in enaj alikar an lale ta eo e maan ak kõrã ej kõnan kõtõbrake ilo jerbal eo an Jehovah. Juõn armij in jitõb eo einwõt in enaj tõmak bwe ejjab menin meletlet, ak bwebwe, ñan an luji an tõbar mejenkajjik ko ilo jitõb kin wõt tokjen eo ñan jibadõk mweiuk ak jabdewõt menin kamõnõnõ eo jerawiwi ej kallimur ñan an lelok. Kememej bwe kin kõnan eo ilo jitõb Moses ‘ear kãlet ñan an eñtan ibben armij ro an Anij jen kamõnõnõ eo an jerawiwi jidik wõt ien.’ (Dri Hibru 11:24, 25) Meñe dik ak ritto, jej kõmmane juõn kãlet eo einlok wõt in ñe jej debij wõt lemnak kin jitõb im jab kanniek eo ej jakolok.
19. Ta tokjen ko jenaj lañliñ kaki elañe jej debij wõt lemnak kin jitõb eo?
19 “Bwe lemnak an kõniek ej kijirãte Anij,” ak “lemnak an jitõb [melelen, NW] mour im ainemõn.” (Dri Rom 8:6, 7) Elañe jej debij lemnak an jitõb, jenaj lo ainemõn eo emõn. Buruõd im kajur ko an lemnak eo ad enaj laplok air bõk kejbãrok jen kareelel eo an wãwen jerawiwi eo ad. Enaj emõnlok ad maroñ jumae kabo ko ñan bõk kunad ilo kõmman bwid. Im enaj wõr ibbed jibañ eo ekwojarjar ñan kamadmõde keojaljal eo ej wõnmanlok wõt ikõtan kanniek im jitõb.
20. Etke jemaroñ liki bwe jemaroñ anjo ilo tarinae eo ikõtan kanniek im jitõb?
20 Ilo ad etal wõt im lemnak kin jitõb eo, jej debij wõt ekkeitak eo eaorõk ibben Jehovah, eo ej unjen mour im jitõb kwojarjar jimor. (Sam Ko 36:9; 51:11) Satan Devil eo im agent ro an rej kõmman jabdewõt men eo remaroñ ñan jolok kõtan eo ad ibben Jehovah Anij. Rej kajeoñ in tõbar air bebek lemnak ko ad, ke rejelã bwe elañe jej ebwer, menin enaj etal em tellok kij ñan ri kijirãt ibben Anij im ñan mij. Ak jemaroñ bõk anjo ilo tarinae in ikõtan kanniek im jitõb. Eñin men eo Paul ear ione, bwe ilo an kar jeje kin tarinae eo an make, mokta ear kajitõk: “Wõn e naj kõtlok iõ jen enbwinin mij in?” Inem, kwalok bwe kõtlok eo emaroñ, ke ear lamõj: “Ij kamolol Anij kin Jisõs Kraist ar iroij!” (Dri Rom 7:21-25) Kij bareinwõt jemaroñ kamolol Anij ikijen Christ kin an letok wãwen ko ñan ad kamadmõd ibben mõjno eo an armij im debij wõt ad lemnak kin jitõb eo kin kejatdikdik eo emõn kin mour indio.—Dri Rom 6:23.
Kwoj Kememej Ke?
• Ta melelen lemnak kin jitõb eo?
• Ewi wãwen ad maroñ kõtlok bwe jitõb eo an Jehovah en jerbal iod?
• Kamelele etke, ilo tarinae eo ad nae jerawiwi, elap tokjen ñan katak Bible, ñan bokake kien eo an Jehovah, im ñan jar ñan e.
• Karõk mejenkajjik ko ilo jitõb ewi wãwen an maroñ debij kij ilo ial in mour eo?
[Pija]
Katak Bible ej jibañ kij kijenmij ilo tarinae ko nae mour in jitõb eo ad
[Pija]
Ejimwe jar ñan bõk jibañ eo an Jehovah ñan ellã jen mõm ko rejerawiwi
[Pija]
Mejenkajjik ko ilo jitõb remaroñ jibañ kij debij wõt ad lemnak kin jitõb eo