Komin Jumae “Jitõb õn Lõl”

“J’ar bõk, jab jitõb õn lõl, a Jitõb eo jen Anij.”​—1 KOR. 2:​12.

1, 2. (a) Ilo ran ko etto, etke rar kajerbal bao ko ilo roñ in tol ko? (b) Kauwatata rot ko Ri Christian ro rej jelmae?

ILO yiõ eo 1911, ailiñ in Britain rar kajutak juõn kien ñan kejbãrok mour an ri jerbal ro rej kabuk coal ak dekã ko rekilmej me rej tili ñan kõmãnãn armij. Ilo kajjojo roñ ko ilo tol eo me rej kabuk kain dekã rot kein, rar aikwij likit ruo bao ie. Ta unin? Kinke elañe ear bwil roñ eo im rej aikwij bõk jibañ jen ro jet, ri jibañ rein rar aikwij bõklok ibbeir bao kein. Bao jidikdik kein rejelã elañe epoison ijo. Elañe mejatoto eo epoison, enaj kõmman an bao ko lotlok. Elap an aorõk kein kakkõl in. Poison in naetan carbon monoxide, jejjab maroñ loe im ãtbwin. Ej kabõjrak bõtõktõk eo jen an bõkto bõktak oxygen ilo enbwinin armij. Elañe ri jibañ ro rejaje bwe rej aikwij dioj jen ijo, ilo jab jelã kake remaroñ mij.

² Eindein ibben Ri Christian ro rej jelmae men ko rekauwatata. Ewi wãwen? Ke Jesus ear kakien ri kalor ro an ñan kwalok nan kin news eo emõn ibelakin lal, ear jelã kadede bwe renaj aikwij etal ñan jikin ko rekauwatata, jikin eo me Satan ej iroij ie im manit ko renana rej walok ie. (Mat. 10:16; 1 Jon 5:​19) Joñan an lap an Jesus inebata kin ri kalor ro an bwe ilo boñin eo ke ear mij, ear jar ñan Jemen: “I jab jar bwe Kwon bõk ir jen lõl, a bwe Kwon kejbãrok ir jen eo enana.”​​—Jon 17:15.

3, 4. Ta nan in kakkõl eo Jesus ear kwalok ñan ri kalor ro an, im etke jej aikwij jelã kake?

³ Jesus ear kakkõl ri kalor ro an kin men ko rekauwatata me rej tellok ir ñan air bõjrak jen air kabuñ ñan Anij. Ri Christian ro remol ilo jemlokin jukjuk im bed in elap air kaorõk ennan ko an. Ear rejañ ri kalor ro an: “A komin ekil . . . bwe komin maroñ in ko jen men otemjej men ko re naj walok, im bwe komin jutõk iman mejen Nejin armij.” (Luk 21:​34-​36) Bõtab, elap ad mõnõnõ bwe Jesus ear kallimur bwe Jemen enaj letok jitõb kwojarjar eo ñan kakememej im jibañ ir ñan ekkõl im kajur wõt.​​—Jon 14:26.

⁴ Ta kin kij rainin? Jitõb kwojarjar in ebojak ke ñan jibañ kij? Elañe aet, ta eo jej aikwij kõmmane ñan bõke? Ta in jitõb in lal, im ewi wãwen an jerbal? Im ewi wãwen jemaroñ anjo ion jitõb in lal in?​​—Read 1 Dri Korint 2:​12.

Jitõb Kwojarjar eo ak Jitõb in Lal In?

5, 6. Ta eo jitõb kwojarjar emaroñ kõmmane ñan kij, ak ta eo jej aikwij kõmmane ñan bõke?

⁵ Jitõb kwojarjar eo ear jab jerbal ibben Ri Christian ro jinoin wõt ak ej bed ibbed rainin bareinwõt. Emaroñ kakajur kij ñan kõmmane men ko rejimwe im ñan lujur kij ñan kwalok kijejeto ilo jerbal eo an. (Rom. 12:11; Pil. 4:​13) Bareinwõt emaroñ jibañ kij ejaake kadkad ko remõn einwõt yokwe, joij, im lejokmen, men kein rej “leen Jitõb.” (Gal. 5:​22, 23) Bõtab, Jehovah Anij ejjab lelok jitõb kwojarjar eo an ñan ro rej makoko in bõke.

⁶ Inem, enaj emõn ñan kajitõk ibbed, ‘Ta eo ij aikwij kõmmane ñan bõk jitõb kwojarjar eo?’ Eokwe, Bible eo ej kwalok elõñ men ko jemaroñ kõmmani ñan bõke. Juõn ian buñten nee ko eaorõk ej kajitõk ibben Anij kake. (Read Luk 11:13.) Bar juõn wãwen ej ikijen ad katak im jerbale nan in kakabilek ko rej itok jen Nan eo an Anij ekakõrmol. (2 Tim. 3:​16) Ilo mol, ejjab melelen bwe aolep ro rej read Bible eo rej bõk jitõb kwojarjar eo an Anij. Ak ñe juõn Ri Christian ej katak Nan eo an Anij, emaroñ melele kobban. Eaorõk ñan ad kile bwe Jehovah ear kamaroñ Jesus bwe en jutak kin E im ej kajerbale ñan letok jitõb kwojarjar eo an. (Kol. 2:6) Inem, jekõnan anõk Jesus im jerbali katak ko an. (1 Pit. 2:​21) An laplok ad kate kij ñan kajeoñe Christ, enaj laplok ad bõk jitõb kwojarjar eo.

7. Ewi wãwen an kilan lal in kareel armij ro?

⁷ Oktan men in, kilan lal in ej kareel armij bwe ren anõk Satan. (Read Dri Epesõs 2:​1-3.) Kõmman ko an lal in ej jerbal ilo elõñ wãwen ko. Einwõt jej loe ibelakid rainin, ej kamakit armij bwe ren jumae kien ko an Anij. Ej kowõnmanlok “mõm an kõniek, mõm an mej ko, im wuj wan an mour in.” (1 Jon 2:​16) Ej kõmman bwe armij ro ren kwalok jerbal in kanniek, einwõt lũñ, kabuñ ñan ekjap, madmõd, akwel ko, illu ko, im kadõk. (Gal. 5:​19-​21) Ej kowõnmanlok lemnak ko an ro rej nae men ko rekwojarjar. (2 Tim. 2:​14-​18) An laplok an bo ilo menin kareelel ko an lal in, jidik kin jidik ej jino im kwalok kadkad ko an Satan.

8. Ta bebe eo kij aolep jej aikwij kãlet?

⁸ Menin kareelel ko an lal in rej bed ibelakid. Kajjojo armij rej aikwij bebe ial ta eo rej aikwij lore, ial eo an jitõb kwojarjar ak wãwen lal in. Ro rej bed iumin kajur eo an lal in remaroñ bõk anemkwoj jene im kõtlok bwe jitõb kwojarjar eo en tel ir. Bõtab, ro me etto an jitõb kwojarjar tel ir remaroñ lorak ilo aujid ko an lal in. (Pil. 3:​18, 19) Jen lale ewi wãwen jemaroñ jumae mõm ko an lal in.

Mõkaj in Kile Kakõlle Ko

9-11. Kain kakõlle rot ko rej kwalok bwe men ko an lal in rej jino jelet kij?

⁹ Ri jerbal ro ilo roñ in tol ko, me kar kennan kake ilo jinoin katak in rar kajerbal bao ko ñan air kile elañe ewõr poison ijo. Elañe juõn ri jerbal ear lo an bao eo lotlok im mij, ear jelã bwe en aikwij ko ilo mõkaj bwe en mour. Elañe jej jerbale wanjoñok in ñan mour eo ad einwõt juõn Christian, ta kakõlle ko jemaroñ loi im rej kwalok bwe wãwen lal in ej jino in jelet kij?

¹⁰ Ilo jinoin ad katak Nan in Anij im wujleplok ad mour ñan Jehovah, bõlen jaar mõnõnõ im keini ad read Bible eo. Emaroñ kar ikutkut ad jar im mõnõnõ in bed ilo kwelok ko an congregation im watõki bwe rej menin kõketak. Wãwen kein elap air kanemkwoj kij jen wãwen ko an lal in.

¹¹ Jej wõnmanlok im read ke Bible eo kajjojo ran? (Sam 1:2) Ekkeini ke ad jar jen buruõd? Jej kaorõk ke kwelok ko an congregation im bed ilo kwelok ko aolep kajjojo week? (Sam 84:​10) Ak ejako ke ad kaorõk wãwen kein aolep? Emol, bõlen elõñ men ko jej boub kaki, im ebin ñan ad lor juõn lajrak ñan kajenolok ien ñan kõmmani men kein. Ak elañe ediklok ad kõmmani manit kein remõn, ej melelen ke bwe men ko an lal in rej jino jelet kij? Jej aikwij kate kij ñan kõmman oktak ko ñan jino lor manit ko remõn einwõt kar mokta.

“Ab Obrõk Buruemi Kin Dõr”

12. Jesus ear jiroñ ri kalor ro an bwe ren “kejbãrok” wõn, im etke?

¹² Bar ta eo jemaroñ kõmmane ñan jumae kilan lal in? Ke Jesus ear rejañ ri kalor ro an bwe ren “ekil” wõt, ear kakkõl ir kin men ko rekauwatata. “A komin kejbãrok kom,” ear ba, “ñe ab obrõk buruemi kin dõr, im karek, im inebata ko an lõl in, im emõkõj an ran eo itok iomi einwõt jen.”​​—Luk 21:​34, 35.

13, 14. Kajitõk rot ko remõn jej aikwij kajitõkin kij make kin mõñã im idak?

¹³ Lemnak kin nan in kakkõl in. Jesus ear kamoik ke ad mõnõnõ in mõñã im idak? Jaab! Ear jelã kin nan ko an Solomon: “Ña I jela bwe ejelok men emõnlok ñõn ir, jen bwe ren mõnõnõ, im bwe ren kõmõn emõn toõn air mour. Im bareinwõt, bwe jabrewõt armij en mõña im irak, im lõñliñ ilo tokjen aolepen jerbal eo an, eñin men in lelok jen Anij.” (Ekk. 3:​12, 13) Bõtab, Jesus ear jelã bwe lal in ej rejañ armij bwe ren dõr.

¹⁴ Ewi wãwen jemaroñ jelã bwe lal in ear telbiloik kij ñan kauwatata in dõr? Jemaroñ kajitõk ibbed make: ‘Ewi lemnak eo aõ ñe ij readi nan in kakabilek ko jen Bible eo ak ko jet jen book ko ad kin broklep? Ekkã aõ kajekdon nan in kakabilek in ke im lemnak bwe men in ejjab lukkun aorõk, ak bõlen ij kowãnik ña make kin men in?a Ta lemnak eo aõ kin nan in kakabilek ko kin idak denin kadõk ñan joñan eo emõn im jab le jen joñan? Ak ij kajettokjen ke nan in kakabilek in im lemnak bwe ejjab lukkun aorõk im ejjab jerbal ñan ña? Elañe ro jet rej kwalok air inebata kin joñan aõ idak, ij lõkatip ak illu ke? Ij rejañ ke ro jet ñan kajettokjen nan in kakabilek kein jen Bible eo?’ Emol, lemnak eo an juõn armij kin kajitõk kein ej kalikar elañe ebo kin men ko an lal in ak jab.​​—Keidi Dri Rom 13:​11-​14.

Inebata Ko Ren Jab Kautameik Yuk

15. Ta ko armij ro rekin kõmmani im Jesus ear kakkõl kij kake?

¹⁵ Wãwen eo juõn eaorõk ñan bõprae kij jen men ko an lal in ej kitibuj ad bõk anjo ion men ko rej kautameik kij. Kin an armij ro jab wãppen, Jesus ear jelã bwe renaj inebata kin men ko jidik wõt tokjeir. Ilo yokwe, Jesus ear jiroñ ri kalor ro an: “Komin jab inebata.” (Matu 6:​25) Jej lemnak kin men ko raorõk, einwõt kõnan eo ñan kabuñburuen Anij, eddo ko ad ilo congregation eo im kabwe aikwij ko an family eo ad. (1 Kor. 7:​32-​34) Inem, ta eo jemaroñ katak jen nan in kakkõl eo an Jesus?

16. Ewi wãwen kilan lal in ej jelet elõñ armij?

¹⁶ Kilan lal in, ekoba ibben kõnan eo ñan kautiej emake kin mweiuk ko an, emaroñ jelet elõñ armij ilo juõn wãwen ejjab emõn. Ri lal in rej kajeoñ in kareel kij ñan tõmak bwe jej jokane elañe elap ad jããn, jen ad kwalok kadkad ko kadkadin Christian. Ro rej bo im tõmak ilo men kein rej kate wõt ir ñan jibadõk mweiuk ko im aolep ien rej kõnan wõt bukõt men ko remõnlok, relaplok, im rekãltata. (Ken. 18:​11) Lemnak rot in kin mweiuk ej bõprae an armij eo wõnmanlok ilo men ko an Anij.​​—Read Matu 13:​18, 22.

17. Ewi wãwen jemaroñ anjo ion inebata?

¹⁷ Jemaroñ anjo ion inebata elañe jej bokake kien eo an Jesus: “Komin bukot mokta ailiñ in Anij” im ankilan. Jesus ej kakajur kij bwe elañe jenaj kõmmane men in, Anij enaj kabwe menin aikwij ko ad. (Mat. 6:​33) Ewi wãwen jemaroñ kwalok bwe jej tõmak ilo kallimur in? Juõn wãwen ej ikijen ad bukõt mokta ankilan Anij, melelen bwe jej bokake kien eo an Anij kin wãwen kajerbal jããn. Ñan wanjoñok, jej aikwij mol ilo ad kõllã owõj ak jab riap ñan “jidik” ñe jej kõmman kon ibben juõn armij kin jerbal in business, inem jej kate kij ñan kajejjet kallimur ko ad kin bebe eo ad kin men in. Ilo wãwen in jej kwalok bwe ad “Aet” en aet. (Mat. 5:​37; Sam 37:​21) Ad kwalok mol emaroñ jab kõmman bwe juõn armij en mweie, ak ej kabuñburuen Anij im jej bõk juõn bõklikõt emõn, im ej kadiklok inebata.

18. Ta joñok eo emõn Jesus ear likit ñan kij, im ewi wãwen jej bõk tokjen ikijen ad anõke?

¹⁸ Bukõt mokta Ailiñ in Anij ej melelen likit men ko raorõk tata mokta. Lemnak mõk kin joñok eo an Jesus. Jet ien, ear kõnake juõn nuknuk emõn im elap wõnãn. (Jon 19:​23) Ear mõñã men ko renno im idak wain ibben ro mõttan rebake. (Mat. 11:​18, 19) Ak meñe ear wõr ibben men kein ilo mour eo an, rar jab men ko raorõktata ibben. Kõmanman ankilan Jehovah kar men eo eaorõktata ibben Jesus. (Jon 4:​34-​36) Jenaj mõnõnõ ñe jej kajeoñe joñok eo an Jesus! Jej lañliñ ñe jej jibañ ro rej bãrok bwe ren bõk kainemõn jen Bible eo. Ro jeid im jatid ilo congregation eo rej kwalok yokwe im rej rejetake kij im jej kabuñburuen Jehovah. Ñe jej likit moktata men ko raorõk, mweiuk ko im menin kamõnõnõ ko rejjab maroñ iroij iod. Bõtab, rej kein jerbal ñan jibañ kij ilo ad kabuñ ñan Jehovah. An laplok ad niknik ilo jerbal eo kin Ailiñ in Anij, enaj diklok an men ko an lal in jelete kij.

Wõnmanlok Im ‘Lemnak Kin Men Ko An Jitõb’

19-21. Ewi wãwen jemaroñ wõnmanlok im ‘lemnak kin men ko an jitõb,’ im etke jej aikwij kõmmane?

¹⁹ Jej aikwij lemnak mokta jen ad kõmmane juõn men. Kõmman ko armij ro rej watõki einwõt rebwebwe, ekkã air walok jen lemnak ko an armij rejjab wãppen. Kin men in, ri jilek Paul ej kakememej kij kin aikwij eo ñan kejbãrok lemnak ko ad. Ear je: “Bwe ro rej ekar ñõn kõniek rej lemnok men ko an kõniek; a ro rej ekar ñõn jitõb men ko an jitõb.”​​—Rom. 8:5.

²⁰ Ewi wãwen jemaroñ bõprae kilan lal in jen an iroij iod ilo lemnak im jerbal ko ad? Jej aikwij kejbãrok lemnak ko ad jen menin kareelel ko an lal. Ñan wanjoñok, ñe jej kãlet menin kamõnõnõ ko, jen jab katton lemnak ko ad kin pija in kelwan ak lej. Jejelã bwe jitõb kwojarjar eo an Anij, eban jerbal ibben juõn armij me etton lemnak eo an. (Sam 11:5; 2 Kor. 6:​15-​18) Bareinwõt, jej kõtlok bwe jitõb kwojarjar eo an Anij en tel lemnak ko ad ikijen ad keini ad read Bible, jar, kalmenlokjen, im bed ilo kwelok ko. Jej jerbal ibben jitõb kwojarjar eo an Anij bareinwõt ilo ad keini ad bõk kunad ilo jerbal in kwalok nan.

²¹ Emol, jej aikwij bõprae lal in im mõm ko an. Ñan kõmmane men in jej aikwij lukkun kate kij kinke einwõt an kar Paul ba bwe, “lemnok an kõniek mij; a lemnok an Jitõb mour im ainemõn.”​​—Rom. 8:6.

[Kamelele Eo Itulal]

Kwoj Kememej Ke?

• Ñan bõk jitõb kwojarjar eo, ta eo jej aikwij kõmmane?

• Ta jet ian wãwen ko lal in emaroñ jelet kij?

• Ewi wãwen jemaroñ bõprae wãwen ko an lal in?

[Pija eo ilo peij 21]

Mokta jen ad etal ñan jikin jerbal ak school, jen jar kin jitõb kwojarjar eo

[Pija ko ilo peij 23]

Jej aikwij kejbãrok bwe lemnak ko ad rerreo, kejbãrok bwe jen kwalok im kõmman jerbal ko remõn im mol, im kõmman manit ko remõn