Kajoor eo An Wõn ej Tõl Eok? Jeova ke Ak Setan?

‘Jaar jab bõk kajoor eo an Setan; ak jaar bõk kajoor eo an Anij, bwe jen jel̦ã men ko Anij ear letoki ilo jouj.’—1 KOR. 2:12, NW.

1, 2. (a) Armej ro an Jeova rej tarin̦aek wõn? (b) Ta kajjitõk ko jenaaj uwaaki?

ARMEJ ro an Jeova rej pãd ilo juon tarin̦ae. Ri kõjdat eo aer elukkuun kajoor. Ri kõjdat in ejel̦ã kõppel̦ak im elukkuun lap an riab. Ewõr juon an kein tarin̦ae ej kajerbale bwe armej ro ren pãd ium̦win tõl eo an. Bõtab jejjab aikuj mijak kõnke jemaroñ anjo̦ ioon ri kõjdat in. (Ais. 41:10) Ewõr juon ad kein tarin̦ae ekajoorl̦o̦k im emaroñ jipañ kõj ñan anjo̦ ioon ri kõjdat in ad.

² Tarin̦ae in ad ejjab n̦ae armej ro bõtab ej nae ri kõjdat eo ad Setan Tepil̦ eo. Ri kõjdat in ej kajerbale kajoor eo an ãinwõt juon kein tarin̦ae ñan an tõlpiloik armej ro. (1 Kor. 2:12, NW) Ewi wãween jemaroñ anjo̦ ioon ri kõjdat in? Jej aikuji kajoor eo an Anij kõnke eñin ej wãween eo wõt im jemaroñ anjo̦ ioon ri kõjdat in. Jej aikuj kajjitõk bwe Anij en letok kajoor in an. Jej aikuj bareinwõt yokwe men ko Anij ej yokwi im kõm̦m̦ani men ko ekõn̦aan bwe jen kõm̦m̦ani. (Gal. 5:22, 23) Ewi wãween an Setan kajerbale kajoor eo an? Ewi wãween an maroñ tõlpiloik elõñ armej ro? Setan ej ke tõlpiloik eok? Jijej ear kõtl̦o̦k bwe kajoor eo an Anij en tel mour eo an, im ear jab kõtl̦o̦k an Setan tõlpiloik e. Ewi wãween jemaroñ ãinwõt Jijej?

Jinoin an Setan Tõlpiloik Armej Ro

3. Ewi wãween an Setan kajerbale kajoor eo an?

³ Setan, eo ej irooj in lal̦ in ej kajerbale kajoor eo an ñan jum̦ae kajoor eo an Anij. (Jon 12:31; 14:30; 1 Jon 5:19, UBS) Kajoor in an Setan ej kõm̦m̦akũt armej ro bwe ren l̦õmn̦ak ilo jet wãween ko im rej jum̦ae l̦õmn̦ak ko an Anij. L̦õmn̦ak rot kein rej kõm̦m̦an bwe armej ro ren kõm̦m̦ani men ko Anij ej diki. Ilo wãween in, Setan ej kõm̦m̦akũt armej ro bwe ren jum̦ae Anij.

4, 5. Setan ej tõlpiloik enañin aolep armej ro ilo lal̦ in. Ewi wãween an kar men in jino im wal̦o̦k?

⁴ Setan ej tõlpiloik enañin aolep armej ro ilo lal̦ in. Ewi wãween an kar men in jino im wal̦o̦k? Ear jino wal̦o̦k ilo jikin kallib in Iden ke Setan ear m̦on̦e Iv. Ear ba ñan Iv bwe el̦aññe enaaj rupe kien eo an Anij, enaaj mãlõtlõt ãinwõt Anij. Ear ba bwe enaaj bar kajoor ãinwõt Anij im eban aikuji Jeova. Iv ear tõmake Setan. (Jen. 3:13) Bõtab jejel̦ã bwe Setan ear riab! (Jon 8:44) Innem ear kajerbal Iv ñan iuuni Adam bwe en jab pokake Jeova. Eñin men eo Setan ear kõn̦aan. Im kõnke Adam ear l̦oore Iv im kõm̦m̦ane men eo enana, armej ro otemjej rejjab weeppãn im rej kõm̦m̦ani men ko rebõd. Eñin unin epidodo an Setan kapo armej ro, kõnke epãd ippãer kõn̦aan eo ñan kõm̦m̦ani men ko renana.—Riit 1 Jon 2:16.

⁵ Setan ear bareinwõt tõlpiloik elõñ enjel̦ ro, im rar erom ro doon. (Rev. 12:3, 4) Men in ear wal̦o̦k m̦okta jãn kar ibwijleplep eo ilo raan ko an Noa. Ke Anij ear kõm̦anm̦an enjel̦ ro, ear karõk bwe ren mour ippãn ilañ. Ear jab kõm̦anm̦an er bwe ren pãlele ippãn kõrã ro ijin ioon lal̦. Bõtab, enjel̦ rein rar kõn̦aan mour ioon lal̦ im pãlele ippãn kõrã ro. Rar ilo̦k jãn ijo jikier ilañ im itok ñan lal̦ in. Rar ukot nemãmeier ñan ãnbwinnin armej im pãlele ippãn elõñ kõrã ro. (Jud 6) Enjel̦ rein renana rar bar jebl̦aak ñan lañ ke ear wal̦o̦k ibwijleplep eo im rar erom ro doon Setan. Rej kiiõ jipañ Setan ‘m̦on̦e aolepen lal̦.’ (Rev. 12:9) Ekabbũrom̦õjm̦õj bwe enañin aolep armej rejjab jel̦ã bwe Setan im enjel̦ rein an renana rej tõlpiloik er.—2 Kor. 4:4.

Kajoor eo an Setan Ej Ke Tõlpiloik Eok?

6. Ta wãween eo wõt im Setan emaroñ tõlpiloik kõj?

⁶ Enañin aolep armej rejjab kile ta ko Setan ej kajerbali ñan tõlpiloik er. Bõtab, Baibõl̦ eo ej kwal̦o̦k ñan kõj men kein Setan ej kajerbali. (2 Kor. 2:11, UBS) El̦aññe jejel̦ã kõn men kein, jenaaj maroñ jum̦ae Setan. Wãween eo wõt im Setan emaroñ tõlpiloik kõj ej ñe jej kõtl̦o̦k an kõm̦m̦ane men in. Ewõr kajjitõk ko emãn im jenaaj etali me renaaj jipañ kõj kile wõn eo ej tõl mour ko ad.

7. Ta eo Setan ekõn̦aan bwe jen m̦õn̦õn̦õ kake bwe jen erom ro rej jum̦ae Anij?

⁷ Ta menin kam̦õn̦õn̦õ ko rem̦m̦an ippa? (Riit Jemes 3:14, 16-18.) Setan ekõn̦aan bwe armej ro ren mõn doon im kõm̦m̦ani men ko renana. Ejel̦ã bwe el̦aññe jenaaj m̦õn̦õn̦õ kake men kein renana, jej erom ro rej jum̦ae Anij. Ilo m̦ool, Baibõl̦ eo ej jiroñ kõj bwe Jeova ej dike armej ro im rej “yokwe lãj.” (Sam 11:5) Setan ej kajerbali bok ko, pija ko, al ko, im mijjin ko ñan kõm̦m̦an bwe jen yokwe men ko renana. Ñan waanjoñak, ilo jet mijjin ko armej ro rej mõn doon im kõm̦m̦ani men ko rejakkar im rettoon. Setan ej m̦õn̦õn̦õ el̦aññe jej yokwe men kein renana meñe jidik wõt.—Sam 97:10.

8, 9. Ta kajjitõk ko kwõj aikuj l̦õmn̦ak kaki?

⁸ Bõtab Anij emaroñ kajerbal kajoor eo an ñan jipañ armej ro bwe ren yokwe men ko rerreo, kwal̦o̦k aenõm̦m̦an im tũriam̦o. Kõn men in jouj im l̦õmn̦ak kõn kajjitõk kein, ‘Ta menin kam̦õn̦õn̦õ ko rem̦m̦an ippa? Men kein ij m̦õn̦õn̦õ kaki rej ke jipañ iõ bwe in juon armej em̦m̦an?’ Anij ejjab m̦õn̦õn̦õ ñe jej m̦on̦e armej ro. Ñan waanjoñak, jeban katakin armej ro ñan kõjparok er jãn m̦anit ko rettoon ak jej alwõji pija ko rettoon. Im jeban katakin armej ro kõn aenõm̦m̦an innem ilo̦k im alwõji pija ko relãj ilo m̦oko im̦õd. El̦aññe jej kõm̦m̦ani men kein, jejjab kõtl̦o̦k bwe kajoor eo an Anij en tõl mour ko ad.

⁹ Jeova ekõn̦aan bwe jen yokwe e kõn aolepen bũruod im pokake e aolep iien. Bõtab Setan ekõn̦aan bwe jen kwal̦o̦k ad yokwe men ko renana elapl̦o̦k jãn ad yokwe Jeova, meñe juon wõt alen. Eñin men eo ear kõn̦aan bwe Jijej en kõm̦m̦ane. (Luk 4:7, 8) Kõn men in kwõn kajjitõk ippam̦ make, ‘Ta menin kam̦õn̦õn̦õ ko rem̦m̦an ippa? Men kein rej ke kwal̦o̦k bwe ij yokwe Jeova kõn aolepen bũruõ? Rej ke jipañ eõ bwe en pidodo aõ pokake Jeova aolep iien? Men kein rej ke kõm̦m̦an bwe en pidodo an Setan maroñ tõlpiloik eõ? Ij aikuj ke kõm̦m̦an oktak ko bwe in maroñ kam̦õn̦õn̦õik bũruon Jeova?’

10, 11. (a) Ta eo Setan ej tõlpiloik armej ro bwe ren kõn̦aan? (b) Ilo wãween et Anij ekõn̦aan bwe jen kajerbali jããn ko ad?

¹⁰ Ij ke arõk jããn im m̦weiuk? (Riit Luk 18:24-30.) Setan ej tõlpiloik armej ro bwe ren kõn̦aan wõt koorl̦o̦k men ko m̦weier. Kõn men in, ñe armej ro rej loi m̦weiuk ko rekõn̦aan wõt wiaki. (1 Jon 2:16) Elõñ armej ro rej kamaat joñan aer maroñ bwe ren m̦weiie. (1 Tim. 6:9, 10) Setan ekõn̦aan bwe jen l̦õmn̦ak bwe el̦aññe jem̦weiie, eban wõr ad inepata. (Ken. 18:11, UBS) Setan enaaj anjo̦ el̦aññe jej kõtl̦o̦k an tõlpiloik kõj bwe jen yokwe jããn im m̦weiuk ko elapl̦o̦k jãn ad yokwe Jeova. Kwõn jouj im l̦õmn̦ak kõn kajjitõk kein raorõk, ‘Ta men eo eaorõktata ilo mour eo aõ? Ij ke jol̦o̦k elap iien ñan kõm̦m̦an bwe en lõñ aõ jããn? Ij ke aolep iien l̦õmn̦ak kõn m̦weiuk ko me ikõn̦aan wiaki?’

¹¹ Ilo wãween et Anij ekõn̦aan bwe jen kajerbali jããn ko ad? Baibõl̦ eo ej katakin kõj bwe jej aikuj jããn ñan ad mour, bõtab men in ejjab men eo eaorõktata ilo mour ko ad. Anij ekõn̦aan bwe jen jerbal ñan kabwe aikuj ko ad, an ro rejetad im an ro nejid. (1 Tim. 5:8) Bareinwõt, Anij ekõn̦aan bwe jen ãinwõt e im jipañ ro jet. Eaorõkl̦o̦k armej jãn m̦weiuk! Kõn men in, jen m̦õn̦õn̦õ in kajerbali men ko m̦weied ñan jipañ armej ro rej pãd ilo aikuj. (Ken. 3:27, 28) El̦aññe jej kõtl̦o̦k bwe kajoor eo an Anij en tõl kõj, men ko rej ankilaan Anij renaaj pãd m̦oktata ilo mour ko ad im jab jããn im m̦weiuk ko.

12, 13. Anij ej kajerbal kajoor eo an ñan jipañ kõj ta?

¹² Ewi wãween aõ kõm̦m̦an ñan ro jet? (Riit Kolosse 3:8-10, 13.) Setan ej kajerbal kajoor eo an ñan kõm̦m̦an bwe armej ro ren dike doon im kõm̦m̦ani men ko renana ñan ro jet. (Gal. 5:19-21) Wõn eo ej tõl eok? Epidodo ñan kwal̦o̦k jouj ñan ro jet el̦aññe rej jouj ñan eok. Ak ta el̦aññe juon jeid ak jatid ilo congregation eo ejjab jouj ñan eok? Ta el̦aññe armej in ejjab kõnnaan waj? Ak ta el̦aññe ear kõm̦m̦ane juon men elukkuun nana ñan eok? Enaaj kar ewi wãween am̦ kõm̦m̦an ñan ri tõmak in m̦õttam̦? Bareinwõt, ewi wãween am̦ kõm̦m̦an ñan eo rejetam̦ ak ro nejõm̦? Kwõj ke kõnnaan ñan er ilo jouj? Wãween am̦ kõm̦m̦an ñan baam̦le eo am̦ enaaj kalikkar wõn eo kwõj anõke. Jouj im l̦õmn̦ak kõn kajjitõk kein, ‘Ewi wãween aõ kar kõm̦m̦an ñan armej ro ium̦win allõñ ko jiljino remootl̦o̦k? Em̦m̦anl̦o̦k ke aõ kõm̦m̦an ñan armej ro kiiõ? Ij ke l̦oore joñak eo an Jijej ilo wãween aõ kõnono im wãween aõ kõm̦m̦an ñan armej ro?’

¹³ Anij ej kajerbal kajoor eo an ñan jipañ kõj jol̦o̦k m̦anit ko ad kar m̦okta. Ej jipañ kõj bwe jen kwal̦o̦k yokwe, jouj im kõm̦m̦an em̦m̦an ñan armej ro. Ej lujur kõj bwe jen jol̦o̦k an doon bõd meñe jemaroñ l̦õmn̦ak bwe jejim̦we im armej eo juon ebõd. Ej bareinwõt jipañ kõj bwe jen jab illulu, bũroñ ak kwal̦o̦k naan ko reddo ñan ro jet. Kajoor eo an Anij ej jipañ kõj bwe jen kwal̦o̦k “jouj ñan doon.”—Ep. 4:31, 32.

14. Ta l̦õmn̦ak eo an elõñ armej ro kõn Baibõl̦?

¹⁴ Ij ke kautiej im kaorõke Baibõl̦ eo? (Riit Jabõn Kõnnaan Ko 3:5, 6.) Setan ej tõlpiloik armej ro bwe ren jab pokake Baibõl̦ eo. Jet armej rejjab errã ilo jet iaan katak ko ilo Baibõl̦, kõn men in rejjab l̦oore. Rej l̦oore wõt m̦anit ko an rũtto ro jineir im jemaer, im jibwier im jim̦m̦aer. Rekõn̦aan wõt tõmake naan in tõl ko an armej ro. (2 Tim. 4:3, 4) Jet armej rej ba bwe Baibõl̦ eo ejjab jãn Anij im rej l̦õmn̦ak bwe jejjab aikuj kõm̦m̦ani men ko ej jiroñ kõj ñan kõm̦m̦ani. Rej l̦õmn̦ak bwe rejel̦ã ta ko rejim̦we im rej aikuj kõm̦m̦ani. Ñan waanjoñak, rej ba bwe em̦m̦aan ro remaroñ pãlele ippãn doon, im kõrã ro remaroñ bareinwõt pãlele ippãn doon. Rej bareinwõt ba bwe ejjel̦o̦k jorrããn el̦aññe ri pãlele ro rej bar ellolo ak rej jepel. Ilo wãween in, rej katakin armej ro bwe ‘men ko renana rem̦m̦an im men ko rem̦m̦an renana.’ (Ais. 5:20) Setan ej ke kajerbale wãween kein ñan tõlpiloik eok? El̦aññe ewõr am̦ apañ, ia eo kwõj bõk jipañ ie? Kwõj ke kõm̦m̦ani men ko armej ro rej rõjañ eok ñan kõm̦m̦ani, ak kwõj ke kõm̦m̦ani men ko Baibõl̦ ej rõjañ eok ñan kõm̦m̦ani?

15. Ta eo jej aikuj kõm̦m̦ane ijello̦kun ad atartar ioon jel̦ãl̦o̦kjen̦ eo ad make?

¹⁵ El̦aññe jej kõtl̦o̦k an Anij kajerbale kajoor eo an ñan tõl kõj, jenaaj pokake aolep naan ko an ilo Baibõl̦ eo. Jenaaj kajerbale naan ko an Anij ñan jipañ kõj kõm̦m̦ani pepe ko, ãinwõt ad kajerbale juon teeñki ñan kameram ial̦ eo ad. (Sam 119:105) Jen jab atartar ioon jel̦ãl̦o̦kjen̦ eo ad make ak jen kõtl̦o̦k bwe Baibõl̦ eo en tõl mour ko ad kõnke Jeova ejel̦ã ta men ko rem̦m̦an ñan kõj. El̦aññe jej kõm̦m̦ane men in, jej kwal̦o̦k bwe jej kautieje Baibõl̦ eo im elap ad yokwe kien ko an Jeova.—Sam 119:97.

Katak jãn Jijej

16. Ta ko jej aikuj kõm̦m̦ani bwe jen maroñ anõke Jijej?

¹⁶ El̦aññe jekõn̦aan bwe Anij en kajerbal kajoor eo an ñan tõl kõj, jej aikuj anõke Jijej. (1 Kor. 2:16) Ewi wãween jemaroñ kõm̦m̦ane men in? Jej aikuj m̦okta jel̦ã kõn men ko ear kõm̦m̦ani im wãween an kar l̦õmn̦ak. (Rom 15:5; 1 Pit. 2:21) Jen etale jet wãween ko im jemaroñ kõm̦m̦ane men in.

17, 18. (a) Ta eo jej katak kõn jar jãn joñak eo an Jijej? (b) Etke jejjab aikuj bõjrak jãn ad eoware Jeova?

¹⁷ Jar bwe Anij en letok kajoor eo an. Ke Jijej ear aikuj jipañ, ear jar ñan Anij im kajjitõk bwe en lel̦o̦k kajoor eo an. (Luk 22:40, 41) Jej aikuj bareinwõt kajjitõk ippãn Anij bwe en letok kajoor eo an ñan jipañ kõj. Jeova ej lel̦o̦ke kajoor eo an ñan ro im em̦ool aer kajjitõk im rej lukkuun tõmak bwe Anij enaaj uwaake jar ko aer. (Luk 11:13) Jijej ear ba: “Kajjitõk im naaj lewõj ñan kom̦; kappukot im kom̦ naaj lo; kal̦l̦al̦l̦al̦ im naaj kapel̦l̦o̦k ñan kom̦. Bwe eo ej kajjitõk ej bõk, im eo ej kappukot ej lo, im eo ej kal̦l̦al̦l̦al̦ naaj kapel̦l̦o̦k ñan e.”—Matu 7:7, 8.

¹⁸ Jet iien ãinwõt eto an Anij uwaake kõj ñe jej kajjitõk jipañ jãn e. Jejjab aikuj in ebbeer ak jen niknik wõt im jar. El̦aññe jej aikuji jipañ eo an Jeova, jejjab aikuj kajjitõk juon wõt alen im bõjrak. Jen wõnm̦aanl̦o̦k wõt im eoware Jeova bwe en jipañ kõj. Jeova elukkuun kõn̦aan jel̦ã ewi joñan ad aikuji jipañ eo an. Bareinwõt ekõn̦aan jel̦ã el̦aññe armej ro rej lukkuun tõmak bwe enaaj jipañ er.a

19. Ta eo Jijej ear kõm̦m̦ane aolep iien, im etke jej aikuj anõke?

¹⁹ Pokake Jeova aolep iien. Jeova ear buñbũruon kõn aolep men ko Jijej ear kõm̦m̦ani. Bõtab juon iien ear pen ñan an Jijej kõm̦m̦ane men eo Anij ear kõn̦aan bwe en kõm̦m̦ane. Meñe ear pen ak Jijej ear ba: “A en jab ankil aõ a Am̦ wõt.” (Luk 22:42) Jouj im kajjitõk ippam̦ make, ‘Ij ke pokake Anij meñe emaroñ lukkuun pen ñan ña?’ Jej aikuj pokake Anij kõnke ear kõm̦anm̦an kõj im ear letok men otemjej ñan kõj. (Sam 95:6, 7) Wãween eo wõt jemaroñ kam̦õn̦õn̦õik Jeova ej ilo ad pokake e aolep iien. Im el̦aññe Jeova ej m̦õn̦õn̦õ ippãd, enaaj letok ñan kõj mour indeeo.

20. Ta men eo eaorõktata ippãn Jijej, im ewi wãween jemaroñ anõk e?

²⁰ Katak Baibõl̦ eo. Jijej ear kajerbale naan ko an Anij ñan jojomare tõmak eo an ke Setan ear kajjioñ kapoiki. (Luk 4:1-13) Ke jet ri tõl ro an kabuñ rar jum̦ae Jijej, ear kajerbale naan in Anij ñan kwal̦o̦k bwe katak ko an armej rein reriab. (Matu 15:3-6, UBS) Jijej ear kõm̦m̦ani men ko me Jeova ear buñbũruon kaki. Eñin men eo ear aorõktata ilo mour eo an. (Matu 5:17) Kõj bareinwõt jej aikuj jel̦ã kõn Baibõl̦ eo. Kõn men in, jej aikuj wõnm̦aanl̦o̦k wõt im katak Baibõl̦ ippãd make im bareinwõt ippãn baam̦le eo ad. (Pil. 4:8, 9) Jet iien jemaroñ l̦õmn̦ak bwe ejjel̦o̦k ad iien ñan kõm̦m̦ane men in. Bõtab enaaj wõr ad iien ñan katak Baibõl̦ eo el̦aññe jejjab ko̦kkure iien ko ad.—Ep. 5:15-17.

21. Ta eo ri karejar eo etiljek im mãlõtlõt ej rõjañ eok ñan kõm̦m̦ane?

²¹ ‘Ri karejar eo etiljek im mãlõtlõt’ ej rõjañ kõj ñan katak Baibõl̦ ippãd make im ippãn baam̦le eo ad kajjojo wiik. (Matu 24:45) Kwõj ke katak Baibõl̦ eo ippãn baam̦le eo am̦ kajjojo wiik? El̦aññe jekõn̦aan anõke Jijej, jemaroñ katak kõn e ilo iien eo jej katak ippãd make ak ippãn baam̦le eo. Ñan waanjoñak, ilo Imõniaroñroñ eo an Tijemba 2008 im Tijemba 2009 ewõr juon laajrak in katak ko ilo peij eo ãliktata. Kwomaroñ kappukote katak ko kõn Jijej ilo laajrak in ñan am̦ etale ippam̦ make ak ippãn baam̦le eo am̦.

Jemaroñ Anjo̦ Ioon Setan

22, 23. Ta eo jej aikuj kõm̦m̦ane bwe jen maroñ anjo̦ ioon Setan?

²² Jej aikuj kõtl̦o̦k bwe Anij en kajerbal kajoor eo an ñan tõl kõj im jum̦ae l̦õmn̦ak ko an Setan. Men in ejjab pidodo. (Jud 3) Bõtab, jemaroñ anjo̦ ioon Setan kõnke Jijej ear ba ñan ri kal̦oor ro an: “Ilo lal̦ kom̦ij eñtaan, a kom̦win m̦õn̦õn̦õ; ña iar bõk anjo̦ ioon lal̦.”—Jon 16:33.

²³ Kõj bareinwõt jemaroñ anjo̦ ioon Setan el̦aññe jej jum̦ae l̦õmn̦ak ko an im kate kõj bwe Anij en maroñ letok kajoor eo an. Ilo m̦ool, ‘el̦aññe Anij ej pãd ippãd, wõn emaroñ jum̦ae kõj?’ (Rom 8:31) Kõn men in, jen kajjitõk ippãn Anij bwe en letok kajoor eo an. Im jen bareinwõt kõm̦m̦ani men ko Baibõl̦ eo ej jiroñ kõj bwe jen kõm̦m̦ani. Ilo wãween in, jenaaj aenõm̦m̦an im m̦õn̦õn̦õ, im mour ñan indeeo ilo jukjuk im pãd eo ekããl im ej epaaktok!

[Kamelele eo itulal]

Kwõj Ke Keememej?

• Setan ej tõlpiloik enañin aolep armej ro. Ewi wãween an kar men in jino im wal̦o̦k?

• Ta kajjitõk ko emãn jej aikuj l̦õmn̦ak kaki?

• Jijej ear kõtl̦o̦k bwe kajoor eo an Anij en tõl e. Ta men ko jilu rar jipañ e ñan an kõm̦m̦ane men in?

[Pija ilo peij 8]

Ewi wãween an kar jet enjel̦ ro oktak im erom ro doon Setan?

[Pija ilo peij 10]

Setan ej kajerbale kajoor eo an ñan tõlpiloik armej ro, bõtab jemaroñ jum̦ae Setan im jab kõtl̦o̦k bwe en tõlpiloik kõj