Jerammõn Ko An Ailiñ Eo Remaroñ Am
CHRISTIAN ri jilek Paul ear wejepedik ilo jet ian kajin ko relap ilo ran ko an. E ar bõk katak ko einlok wõt ko an juõn university rainin. E ar lañliñ kin aolep tokjen ko im jimwe ko an juõn armij in Rom. (Jerbal 21:37-40; 22:3, 28) Maroñ im jerammõn kein remaroñ kar kamaroñ e ñan an oktak im mweie im buñbuñ. Ak, ear ba: “A men ko men in jibarek iba, men kein I ar watõki jerata kin Kraist . . . im ij watõki men otemjej jerata wõt, kin an kanuij emõn aõ jela Kraist Jisõs.” (Dri Pilippai 3:7, 8) Etke Paul ear kwalok juõn ennan eo einwõt in?
Moktalok rar jelã kin e einwõt Saul in Tarsus im einwõt juõn ri kõmman matõrtõr ñan ro rej an “Ial” eo, Paul ear oktak im juõn ri tõmak elikin an kar bõk juõn vision in jerkakbiji im kaibujuij eo an Jesus. (Jerbal 9:1-19) Ñan Paul, menin ear loe ion ial eo lok ñan Damascus ear menin kamol eo ellãlok jen an maroñ wõr bere ie bwe Jesus ej Messiah eo kar kallimur kake, ak Christ, iroij eo an Ailiñ eo kar kallimur kake ilo ran ko rej itok. Menin ear bareinwõt bõktok juõn oktak ilo ial in mour eo an Paul, einwõt an alikar ilo ennan eo an ekajur jej lo ijin ilañ. Ilo bar juõn wãwen ba, kin ettã buru im mol in buru, Paul ear ukwelok.—Dri Galetia 1:13-16.
Ilo Bible, nan in “ukwelok” ekkã ukõte jen juõn nan in Greek eo melelen “elikin an jelã,” einwõt keidi ñan “jelã lok iman.” Kin menin, ukwelok ekoba juõn oktak ilo lemnak, eñjake eo an juõn, ak un, juõn kajekdon eo ñan ial in mour eo mokta an juõn bwe ejjab juburuõn kake. (Jerbal 3:19; Reveles̃õn 2:5) Ilo wãwen eo an Paul, ear jab kõtlok bwe men eo ear walok iumin jejjo wõt minute ion ial eo lok ñan Damascus en baj juõn eñjake wõt ak men ear walok juõn men eo naetan men eo ear loe ilo jitõb. Ñan e ear juõn menin karujruj ñan mol eo bwe ial in mour eo an mokta, ilo kajekdon Christ, kar men bata. Bareinwõt, ear kile bwe ñan an maroñ bõk tokjen jen jelãlokjen eo an ekãl ear loe kin Christ, ear aikwij kõmmane juõn men ñan kajimwe ial in mour eo an.—Dri Rom 2:4; Dri Epesõs 4:24.
Juõn Oktak Eo Ear Bõktok Jerammõn Ko
Moktalok, jelãlokjen eo an Paul kin Anij ear itok elap wõt jen kabuñ eo an Pharisee ro, eo ear juõn uan. Tõmak ko air ekoba elap wõt jen meletlet im manit ko an armij. Kin kalijeklok ko an kabuñ, kijejeto im jibadbad ko an Paul rar menin telbilo. Meñe ear lemnak bwe ear karejar ñan Anij, ak ear lukkun tarinae nae e.—Dri Pilippai 3:5, 6.
Elikin an bõk jelãlokjen eo ejimwe kin Christ im ijo kunan ilo karõk eo an Anij, Paul ear maroñ lo bwe ear jelmae juõn jokãlet: Ear aikwij bed wõt ke einwõt juõn Pharisee im etal wõt im lañliñ ilo wãwen eo ej bed ie im aorõkin, ak ej aikwij ke ukõt ial in mour eo an im jino kõmmane jabdewõt men eo ear menin aikwij ñan bõk buñburu eo an Anij? Ekamõnõnõ, bwe Paul ear kõmmane jokãlet eo ejimwe, bwe ear ba: “Bwe I jab jok kin gospel: bwe ej kajur an Anij ñõn lomor iben ro otemjej rej tõmak, iben dri Ju mokta, im bareinwõt iben dri Grik.” (Dri Rom 1:16) Paul ear oktak im juõn eo ej kijejeto ilo kwalok nan kin news eo emõn kin Christ im Ailiñ eo.
Elõñ yiõ ko tokelik, Paul ear jiroñ Christian ro mõttan: “I jab watõk iõ emwij aõ bõk; a juõn aõ kõmõn, ke ij meloklok men ko rej ber ilikiõ, im mõllok ñõn men ko rej ber imaõ. Ij kõtõbarlok ñõn kakõle, ñõn mejenkajik eo an kir eutiej an Anij ilo Kraist Jisõs.” (Dri Pilippai 3:13, 14) Paul ear bõk tokjen jen news eo emõn kinke ear mõnõnõ in bõjrak jen men eo ear tellok e jen Anij im kin aolepen buruen jibadõk mejenkajjik ko rar lajrak ibben karõk eo an Anij.
Ta Eo Kwonaj Kar Kõmmane?
Bõlen ejjabto jen ke kwoj kab roñ kin news eo emõn kin Ailiñ eo. Kejatdikdik eo kin mour indio ilo juõn paradise wãppen ekaitoklimo ke ñan yuk? Enaj kar baj eindein wõt, kinke kij otemjej ear wõr kõnan in ibbed ke jar lotaktok ñan mour im ñan lañliñ ilo mour ilo ainemõn im jokane. Bible ej ba bwe Anij ej likit “ien in drio” ilo buruõd. (Ekklisiastis 3:11) Inem kar baj eindein wõt ñan kij ñan kejatdikdik kin ien eo ñe armij remaroñ mour indio ilo ainemõn im mõnõnõ. Im eñin men eo news eo emõn kin Ailiñ eo ej letok.
Bõtab, ñan kõmman bwe kejatdikdik in en juõn men eo emol, kwoj aikwij etale im bukõt ta eo ej aolepen news eo emõn. Ri jilek Paul ear kõketak: “Komin melejoñ [ñan kwe] ta ankil an Anij emõn im kabuñburuen im wãppen.” (Dri Rom 12:2) Inem, einwõt Paul, elikin bõk jelãlokjen im melele, kwoj aikwij kõmmane juõn kãlet.
Ilo wãwen eo juõn, emaroñ dedelok am bõk jet tõmak ko kin ilju eo am. Kememej bwe Saul ear dedelok an wõr lemnak ko an make kin ankil an Anij mokta jen an kar oktak im ri jilek Paul. Ak jen am kõtmene kin juõn menin kalikar eo ekabwilõñlõñ jen Anij, etke kwoj jab lale wãwen eo ilo mol in? Kajitõkin yuk make: ‘Ij lukkun jelã ke kin ta eo ankil an Anij kin armij im lal in? Ta kamol eo I maroñ kwalok ñan kamol tõmak ko aõ? Kamol eo aõ emaroñ ke jutak iumin etale eo ilo meram in Nan in Anij, Bible eo?’ Ejelok jabdewõt men kwo naj luji ilo am etale tõmak ko an kabuñ eo am ilo wãwen in. Ilo mol, kwoj aikwij kõnan kõmman eindein kinke Bible eo ej rejañ kij: “Komin melejoñ men ko otemjej; kejbãrok wõt men ko remõn.” (1 Dri Tessalonika 5:21) Ijellokin men otemjej, ejjab kowãppen eo an Anij eo elap tokjen ke?—Jon 17:3; 1 Timote 2:3, 4.
Ri tel ro an kabuñ remaroñ kallimuri kij kin juõn ilju eo ej indio. Ak mae ien kallimur in ej bedbed ion katak ko ilo Bible, ejamin jibañ kij ñan tõbar jerammõn ko an Ailiñ in Anij. Ilo Katak eo an ebuñbuñ ion Tol eo, Jesus ear kajur an kakkõl: “Jab otemjej rej ba ñõn Iõ, ‘Iroij, Iroij,’ re naj dreloñtok ilo ailiñ in lõñ; e eo ej kõmõnmõn ankil an Jema ej ber i lõñ.”—Matu 7:21.
Lale Jesus ej lukkun kalikar kin kõmanman ankil an Jemen einwõt menin melejoñ eo ñan bõk jerammõn ko an Ailiñ in Anij. Ilo bar juõn wãwen ba, juõn men eo baotokin einwõt menin tiljek ñan Anij ejamin aikwij menin kabuñburuen Anij. Ilo mol, Jesus ear etal wõt im ba: “Elõñ re naj ba ñõn Iõ ilo ran eo, Iroij, Iroij, kim ar jab drikanij kin Etõm ke? im kajutõklok dimon ro kin Etõm ke? im kõmõnmõn elõñ men in bwilõñ kin Etõm ke? Inem I naj ba ñõn ir, I ar jaje kom: komin ilok jen Iõ, kom rej kõmõn nana.” (Matu 7:22, 23) Ealikar, men eo eaorõk ej bwe jen lukkun lale bwe ejimwe ad melele kin ta eo ej lukkun news eo emõn kin Ailiñ eo inem jerbal ilo errã ibben.—Matu 7:24, 25.
Ewõr Jibañ
Ilo elõñlok jen 100 yiõ ko, Ri Kennan ro an Jehovah rej kwalok nan kin news eo emõn kin Ailiñ in Anij. Ikijen book im magazine ko rej print im ikijen nan jen loñiir, rej jibañ armij ro ibelakin lal ñan bõk jelãlokjen eo ejimwe kin ta eo ej Ailiñ eo, ta jerammõn ko enaj bõktok, im ta eo juõn ej aikwij kõmmane ñan bõk jerammõn rot in.
Kimij rejañ yuk ñan am uak ñan ennan eo Ri Kennan ro an Jehovah rej kwalok nan kake. Ilo am bõke im jerbale news eo emõn, kwo maroñ bõk jerammõn ko relap ejjab kiõ wõt ak bareinwõt ilo ilju eo ej itok ñe Ailiñ in Anij ej iroij iaolepen lal.—1 Timote 4:8.
Emmakit kiõ, ñan jerammõn ko an Ailiñ in Anij rej ebaktok!
[Pija]
Ikijen book im magazine ko rej print im nan jen loñiir, Ri Kennan ro an Jehovah rej kwalok nan kin news eo emõn kin Ailiñ in Anij