Kwon Lañliñ Ibben Anij Eo E Mõnõnõ
“Eliktata, ro jãtiõ, komin lõñliñ, . . . im Anij in yokwe im ainemõn E naj ber ibemi.”—2 KORINT 13:11.
1, 2. (a) Etke ejelok lañliñ ilo mour an elõñ armij? (b) Ta in lañliñ, im ewi wãwen jemaroñ kaddeke?
ILO RAN kein rabañ, elõñ armij rejjab lo unin ñan lañliñ. Ñe juõn jorrãn ej jelet ir ak juõn armij rej yokwe, remaroñ bõk ejja eñjake eo wõt an Job, eo ear ba: “Armij, eo ej lotak jen kõra, reit wõt ran ko an, im rej obrõk kin jorran.” (Job 14:1) Ri Christian ro rejjab anemkwoj jen men in ijjibed ko an “ien [kein] renana,” im ejjab juõn men in ilbõk bwe jet ien ri karejar ro retiljek an Jehovah rej bõk jitõb in ebwer.—2 Timote 3:1.
2 Ak, Ri Christian ro remaroñ lañliñ, meñe rej bed iumin melejoñ. (Jerbal 5:40, 41) Ñan melele kin ewi wãwen emaroñ eindein men in, lemnak mokta kin ta in lañliñ. Lañliñ eo rej ukõte einwõt “eñjake eo ejjeurur kin an bõk ak kõtmene kin juõn men emõn.”a Kin men in, elañe jej bõk ien ñan lemnak kin men ko remõn ewõr ibbed kiõ ñe jej kalmenlokjen kin jerammõn ko rej kõttar kij ilo lal eo ekãl an Anij, jemaroñ lañliñ.
3. Ilo wãwen et jemaroñ ba bwe aolep armij ewõr unin air lañliñ?
3 Aolep armij ewõr jet jerammõn ko remaroñ kamolol kaki. Bõran juõn family emaroñ luji jikin jerbal eo an. Einwõt jemaroñ kõtmene kake, ej inebata. Ekõnan kabwe aikwij ko an ro jitenburu ibben. Ak, elañe ekajur enbwinin im emõn ejmour eo an, emaroñ kamolol kake men kein. Elañe ej lo juõn jikin jerbal, enaj maroñ lukkun jerbal. Ijo tu-rãjet, juõn Ri Christian kõrã emaroñ kar bõk ilo jidimkij juõn nañinmij elap. Ak emaroñ kamolol kin jurak eo an ro jeran reyokwe im ro uan family eo me rar jibañ e ñan jelmae nañinmij eo an ilo jokane im beran. Im aolep Ri Christian ro remol, jekdon wãwen ko ibbeir, remaroñ lañliñ kin jerammõn eo air ñan jelã Jehovah, “Anij e mõnõnõ,” im Jesus Christ, “Iroij emõnõnõ im ejelok bar juõn.” (1 Timote 1:11; 6:15) Aet, Jehovah Anij im Jesus Christ rej ro elaptata air mõnõnõ. Rar debij wõt air mõnõnõ meñe wãwen ko ilo lal in elap an oktak jen ta eo Jehovah ear karõke jen jinoin. Joñok eo air emaroñ lap an katakin kij kin wãwen eo jemaroñ debij lañliñ eo ad.
Rar Jab Luji Lañliñ eo Air
4, 5. (a) Jehovah ear emmakit ilo wãwen et ke armij ro moktata rar jumae? (b) Ilo wãwen et Jehovah ear debiji juõn lemnak emõn kin armij?
4 Ilo jikin kallip in Eden, Adam im Eve rar lañliñ kin ejmour ewãppen im lemnak eo air ear wãppen. Kar wõr jerbal ko ewõr tokjeir rar maroñ kõmmani ilo melan ko rebolemeir. Elaptata iair, kar wõr ibbeir jerammõn eo ñan keini air bwebwenato ibben Jehovah. Kar karõk eo an Anij bwe en wõr ibbeir juõn ilju elemõnõnõ. Ak jemed im jined moktata rar jab juburu kin aolep men in letok kein remõn; rar kwote leen wijki eo emwij kemoiki jen “wijki in jela emõn im nana.” Jab bokake in ear kõmman bedbedin aolep jerata ko me kij, ro bwijjiir, jej iioni rainin.—Jenesis 2:15-17; 3:6; Dri Rom 5:12.
5 Bõtab, Jehovah ear jab kõtlok bwe lemnak in jab kamolol eo an Adam im Eve en kwote lañliñ eo an. Ear liki bwe buruen jet ro bwijjiir renaj emmakit ñan karejar ñan e. Ilo mol, joñan an liki, mokta jen an kar Adam im Eve wõr nejiir, ear keañ kin karõk eo an ñan binmoure ro bwijjiir rebokake! (Jenesis 1:31; 3:15) Iumin buki yiõ ko jeltokin, elõñ wõt ian armij ro rar etetal ilo buñten nee ko an Adam im Eve, ak Jehovah ear jab elikinjepjepe armij kin jab bokake eo air. Jen an eindein, ear lalelok maan im kõrã ro rar ‘kamõnõnõik buruen,’ ro rar kate ir ñan kabuñburuen kinke rar yokwe e.—Jabõn Kennan Ko 27:11; Dri Hibru 6:10.
6, 7. Ta men ko rar jibañ Jesus ñan lañliñ wõt?
6 Ta kin Jesus—ewi wãwen ear debij wõt lañliñ eo an? Einwõt juõn jitõb ekajur ilañ, Jesus ear maroñ lo aolep makitkit ko an maan im kõrã ro ion lal. Jab wãppen ko air rar alikar, ak Jesus ear yokwe ir. (Jabõn Kennan Ko 8:31) Tokelik, ke ear itok ñan lal im “ber” ibben armij, lemnak eo an kin ir ear jab oktak. (Jon 1:14) Ta eo ear kamaroñ Nejin Anij ewãppen ñan kejbãrok juõn lemnak emõn kin armij ro rejjab wãppen?
7 Moktata, Jesus ear kwalok kõmmanwa kin men ko ear kõtmene jen e make im ro jet jimor. Ear jelã bwe ejamin ukõt aolepen lal in. (Matu 10:32-39) Inem ear lañliñ ke juõn armij emol buruen ear uak ilo emõn ñan ennan in Ailiñ eo. Meñe mwil im lemnak ko an ri kalor ro an rar jab emõn ien otemjej, Jesus ear jelã bwe ilo burueir rar lukkun kõnan kõmanman ankil an Anij, im ear yokwe ir kin men in. (Luk 9:46; 22:24, 28-32, 60-62) Kin un in, ilo jar eo an ñan Jemen ilañ, Jesus ear kõlajrak ial eo emõn me ri kalor ro an rar bõke ñan ien eo: “R’ar kejbarok Am in nan.”—Jon 17:6.
8. Kwalok jet ian wãwen ko jemaroñ kajeoñe Jehovah im Jesus ikijen ad debiji lañliñ eo ad.
8 Ejelok bere, kij aolep naj bõk tokjen jen ad kalmenlokjen kin joñok eo Jehovah Anij im Christ Jesus rar likiti ikijen men in. Jemaroñ ke kajeoñe Jehovah ilo ad jab le jen joñan ad inebata ñe ejjab tõbrak men ko einwõt jaar kejatdikdik kaki? Jemaroñ ke anõk buñten nee ko neen Jesus ilo ad debij juõn lemnak emõn kin wãwen ko ibbed kiõ, im bareinwõt ilo ad kwalok kõmmanwa kin ta eo jej kõtmene jen kij make im ro jet? Jen lale ewi wãwen jemaroñ jerbale ilo juõn wãwen ekeie kin jet ian kakabilek kein ilo men eo ebak ñan buruen Ri Christian ro rekijejeto ijoko otemjej—jerbal in kwalok nan.
Kejbãrok juõn Lemnak Emõn kin Jerbal in Kwalok Nan
9. Ewi wãwen ear bar urur lañliñ eo an Jeremiah, im ewi wãwen joñok eo an emaroñ jibañ kij?
9 Jehovah ekõnan bwe jen lo lañliñ ilo jerbal eo an. Lañliñ eo ad ej aikwij jab ekkejel ion tokjen ko jej bõki. (Luk 10:17, 20) Ri kanan eo Jeremiah ear kwalok nan iumin elõñ yiõ ko ilo juõn territory ear ejelok tõbrak. Ke ear lemnakelok uak eo enana an armij ro, ear luji lañliñ eo an. (Jeremiah 20:8, New World Translation) Ak ke ear kalmenlokjen kin aibujuij in ennan eo, ear bar urur lañliñ eo an. Jeremiah ear ba ñan Jehovah: “Kar lo nan ko am, im I ar jino kañe, im nan eo am ej erom ñan iõ juõn men in kalañliñ im men in kamõnõnõik buruõ; bwe kar likit etõm ioõ, O Jehovah.” (Jeremiah 15:16, NW) Aet, Jeremiah ear lañliñ kin jerammõn eo an ñan kwalok kin nan eo an Anij. Jemaroñ bareinwõt.
10. Ewi wãwen jemaroñ kejbãrok lañliñ eo ad ilo jerbal in kwalok nan meñe ejjab lukkun lap tõbrak ko rej walok ilo territory eo ad kiõ?
10 Meñe jarlepju in armij ro rej makoko in uak ilo emõn ñan news eo emõn, ewõr unin ad lañliñ bwe jaar bõk kunad ilo jerbal in kwalok nan. Kememej bwe Jehovah ear liki bwe jet armij renaj emmakit ñan karejar ñan e. Einwõt Jehovah, jej aikwij jab jolok ad kejatdikdik bwe jet renaj kile aitwerõk eo kin iroij bõtata eo ijoko otemjej im bõk ennan in Ailiñ eo. Jej aikwij jab meloklok bwe wãwen ko ibben armij remaroñ oktak. Ñe rej jelmae jet abañ ko rar jab kõtmene kaki, armij eo elap an juburu kin tõbrak ko an bareinwõt emaroñ jino lemnak kin un eo unin mour. Kwonaj bed ie ke ñan jibañ ñe armij rot in rej jino ‘lemnak kin aikwij ko air ilo jitõb’? (Matu 5:3) Bõlen, juõn armij ilo territory eo am emaroñ bojak in roñjake kin news eo emõn ñe kwonaj bar lolok e!
11, 12. Ta eo ear walok ilo juõn bukwon, im ta eo jemaroñ katak jen men in?
11 Wãwen territory eo emaroñ oktak bareinwõt. Lemnak kin juõn wanjoñok. Ilo juõn bukwon, kar wõr juõn kumi in ri belele ro rejjab kanuij ritto ro rebake don im ewõr nejiir. Ke Ri Kennan ro an Jehovah rar lolok ir, rar iion ejja uak eo wõt ilo kajjojo em, “Kimij jab itoklimo!” Elañe juõn armij ear mol an kwalok an itoklimo ilo ennan in Ailiñ eo, ro ri turin rar mõkaj im kabwer e jen an bar konono ibben Ri Kennan ro. Alikar, ear juõn men ebin ñan kwalok nan ilo jikin eo. Bõtab, Ri Kennan ro rar jab ebwer; rar etal wõt im kwalok nan. Kin tokjen et eo?
12 Tokelik, elõñ ian ajiri ro ilo bukwon eo rar ritto lok, inem mare, im kõmman jikiir ijo. Ilo air kile bwe wãwen mour eo air ear jab bõktok mõnõnõ eo emol, jet ian jodikdik rein rar jino bukõt mol eo. Rar loe ke rar mõnõnõ in roñjake news emõn me Ri Kennan ro rar kwalok kake. Elikin elõñ yiõ ko, juõn congregation edik ear jino eddeklok. Lemnak kin lañliñ eo an ri kwalok ro kin Ailiñ eo ro rar jab ebwer! Kimij kejatdikdik bwe ilo ad kijenmij im jakelok ennan eo eaibujuij kin Ailiñ eo men in enaj bõktok lañliñ ñan kij bareinwõt!
Ri Tõmak ro Mõttad Renaj Rejetak Yuk
13. Jemaroñ reilok ñan wõn ñe jej buromõj im iten ebwer?
13 Ñe ijjibed ko rej laplok ak ñe juõn jorrãn ej walok, ia eo kwomaroñ bõk kainemõn ie? Elõñ million ri karejar ro emwij wujleplok air mour ñan Jehovah rej oktaklok ñan e ilo jar moktata, inem ñan Christian ro jeiir im jatiir maan im kõrã. Ke ear bed ion lal, Jesus make ear kaorõk jurak eo an ri karejar ro an. Ilo boñin ran eo mokta jen an kar mij, ear konono kake ir einwõt “ro r’ar ber iba ilo men ko r’ar kabo Iõ kaki.” (Luk 22:28) Emol, ri kalor rein rar jab wãppen, ak tiljek eo air kar juõn men in kainemõn ñan Nejin Anij. Kij bareinwõt jemaroñ bõk kajur jen ri kabuñ ro mõttad.
14, 15. Ta eo ear jibañ ruo ri belele ñan kijenmij ke ear mij likao eo nejiir, im ta eo kwomaroñ katak jen experience in?
14 Ruo Christian ri belele etair Michel im Diane rar katak kin aorõkin jurak eo an jeiir im jatiir maan im kõrã. Likao eo nejiir 20 an yiõ, etan Jonathan, juõn Ri Christian ekajur im kar wõr kejatdikdik ko remõn iman, kar etale im lo juõn brain tumor. Doctor ro rar kate ir ñan kamadmõde, ak mour eo an Jonathan ear nana lok mae elikin raelep in juõn ran, ke ear kiki ilo mij. Michel im Diane rar lañmwijidjid kin buromõj. Rar kile bwe mõttan jidik Service Meeting eo, me ej walok ilo jotenin ran eo, enaj kar jemlok. Ak, kin air aikwij bõk kainemõn, rar kajitõk ibben elder eo ear bed ibbeir ñan etal ibbeir ñan Kingdom Hall eo. Rar tõbar ijo ilo ejja ien eo wõt ke rar kejelãik congregation eo kin mij eo an Jonathan. Elikin kwelok eo, ro jeiir im jatiir maan im kõrã rar kabole jemen im jinen rej jañ, atbokwõje ir im lelok nan in kainemõn ñan ir. Diane ej kememej: “Kim ar eñjake am lañmwijidjid kin buromõj ke kim ar tõkeãktok ñan kingdom hall eo, ak kim ar bõk kainemõn elap jen ro jeim im jatim—elap air kar kõketak kim! Meñe rar jab maroñ jolok metak eo am, rar jibañ kim ñan kijenmij iumin ijjibed!”—Dri Rom 1:11, 12; 1 Dri Korint 12:21-26.
15 Juõn jorrãn ear kõmman bwe Michel im Diane ren ruaklok ñan ro jeiir im jatiir. Ear bareinwõt kõmman bwe ren ebaklok ñan don. Michel ej ba: “I ar katak ñan kaorõk lio beliõ. Ilo ien ko kimij buromõj, kimij bwebwenato ibben don kin mol eo ilo Bible im ewi wãwen Jehovah ear kõketak kim.” Diane ej kobaik: “Kejatdikdik in Ailiñ eo elaplok an wõr melelen ñan kim kiõ.”
16. Etke eaorõk bwe jen bõk buñten nee ko mokta ñan kejelãik brother ro kin aikwij ko ad?
16 Aet, Christian ro jeid im jatid maan im kõrã remaroñ “kainemõn” kij ilo ien ko rabañ im ilo wãwen in jibañ kij debij lañliñ eo ad. (Dri Kolosse 4:11) Emol, rejjab maroñ jelã ta eo ej bed ilo lemnak eo ad. Kin men in, ñe jej aikwiji jibañ emõn bwe jen ba ñan ir. Inem jemaroñ kwalok kamolol eo emol kin jabdewõt men in kainemõn ro jeid im jatid remaroñ letoke, im watõke einwõt ej itok jen Jehovah.—Jabõn Kennan Ko 12:25; 17:17.
Lale Congregation eo Am
17. Ta men ko rebin juõn jinen me ejelok rejetan ej jelmaiki, im ewi wãwen ad watõk armij ro einwõt e?
17 Ñe ej laplok am etale ri tõmak ro mõttam, enaj laplok am katak ñan kamolol kake ir im lo lañliñ in koba ibbeir. Lale congregation eo am. Ta eo kwoj loe? Ewõr ke juõn jinen ejelok rejetan im ej kate e ñan kakajiririk ro nejin ilo ial in mol eo? Kwar lemnak ke kin joñok eo emõn ej likiti? Kajeoñ in lemnak kin jet ian abañ ko ej jelmaiki. Juõn jinen ejelok rejetan etan Jeanine ej kwalok kin jet iair: buromõj kin an make ian, maan ro ilo jikin jerbal eo an rej kabo e, jabwe money. Ak abañ eo elaptata iair, ej ba, ej kitibuj an lale aikwij ko ilo eñjake an ro nejin, ke kajjojo iair reinjuõn jen don. Jeanine ej bõkmantak bar juõn abañ: “Ej juõn aitwerõk elap ñan jumae kõnan eo ñan kõmman bwe ladik eo nejõm en bõran family eo bwe en kabwe likjap eo kin an jako leo belen. Ewõr juõn nejiõ ledik, im ij aikwij kate iõ ñan kememej bwe in jab kaddo e ilo aõ kwalok abañ ko aõ make ñan e.” Einwõt thousand ro jemen im jinen me ejelok rejetair im rej mijak Anij, Jeanine ej jerbal full-time im ej lolorjake family eo an. Ej bareinwõt katak Bible ibben ro nejin, kamineneik ir ilo jerbal in kwalok nan, im bõktok ir ñan kwelok ko an congregation eo. (Dri Epesõs 6:4) Elap an Jehovah mõnõnõ ñe ej lale jibadbad ko an family in ñan kejbãrok tiljek eo air ran otemjej! Ejjab kamõnõnõik ke buruõm ñan lo armij rot in ibwiljid? Emol, aet.
18, 19. Kwalok juõn wanjoñok kin ewi wãwen jemaroñ kamũlallok kamolol eo ad kin ro uan congregation eo.
18 Bar lale congregation eo am. Kwomaroñ lo maan im kõrã ro me ejako beleir im retiljek ro rejjab “jako” jen kwelok ko. (Luke 2:37, NW) Jet ien rej buromõj ke kin air make iair? Aet. Elap air oñ kake beleir! Ak rej kõmman air boub wõt ilo jerbal eo an Jehovah im rej kwalok air itoklimo kin ro jet. Lemnak eo air ejokkin wõt juõn im emõn ej kalaplok lañliñ eo an congregation eo! Juõn Ri Christian eo ear bed ilo jerbal in kwalok nan full-time elaplok jen 30 yiõ ko ear ba: “Juõn ian lañliñ eo aõ elaptata ej ilo aõ lo brother im sister ro reritto me rar iion elõñ melejoñ ko ak rej jerbal wõt ñan Jehovah ilo tiljek!” Aet, Ri Christian ro reritto ibwiljid rej juõn men in kõketak elap ñan ro redik.
19 Ta kin ro rekãl me rej kab koba ibben congregation eo? Ejjab kõketak kij ke ñe rej kwalok tõmak eo air ilo kwelok ko? Lemnak kin wõnmanlok eo rar kõmmane jen ke rar jino katak Bible. Alikar elap an Jehovah buñburuen kake ir. Jej ke? Jej kwalok ke ad buñburuen kake ir, im nebar ir kin jibadbad ko air?
20. Etke jemaroñ ba bwe kajjojo ro uan congregation eo rej kõmman juõn jerbal eaorõk ilo congregation eo?
20 Kwoj belele ke, make iam, ak juõn jemen ak jinen eo ejelok rejetõm? Kwoj juõn ladik ak ledik me ejako jemõm (ak jinõm) ke, ak juõn maan ak kõrã im ejako beleõm? Kwoj juõn eo eto an koba ibben congregation eo ke ak juõn eo ej kab koba ibben? Kwon liki bwe joñok eo am etiljek ej juõn men in kõketak ñan kij aolep. Im ñe kwoj koba im al juõn al in Ailiñ eo, ñe kwoj uak, ak kwalok juõn katak ilo Theocratic Ministry School, ijo kunam ej kalaplok lañliñ eo ad. Elaplok an aorõk, ej kalañliñ buruen Jehovah.
21. Elõñ un ko ñan ad kõmman ta, ak kajitõk ta ko rej walok?
21 Aet, ilo ien kein rabañ bareinwõt, jemaroñ lañliñ in kabuñ ñan Anij eo ad emõnõnõ. Elõñ un ko ibbed ñan emmakit ñan nan in rejañ eo an Paul: “Komin lõñliñ, . . . im Anij in yokwe im ainemõn E naj ber ibemi.” (2 Dri Korint 13:11) Ak, ta elañe jej jelmae juõn natural disaster (jorrãn ko einwõt makitkit lal, ibwijleplep, lañ im men ko eierlok wõt), matõrtõr, ak abañ elap kin money? Jemaroñ ke debij wõt ad lañliñ meñe jej jelmae wãwen rot kein? Kwon make bebe ñe kwoj etale katak in tok.
[Kamelele ko itulal]
a Lale Insight on the Scriptures, Volume 2, page 119, jeje an Ri Kennan ro an Jehovah.
Kwomaroñ ke Uak?
• Rej kamelele kin lañliñ einwõt ta?
• Ilo ad kejbãrok juõn lemnak emõn ewi wãwen emaroñ jibañ kij ñan ad lañliñ wõt?
• Ta eo emaroñ jibañ kij bõk juõn lemnak emõn kin territory eo an congregation eo?
• Ilo wãwen et ko kwoj kaorõke brother im sister ro ilo congregation eo am?
[Pija]
Armij ro ilo territory eo ad remaroñ oktak
[Pija]
Ta men ko rebin ro ilo congregation eo am rej jelmaiki?