Nebar Jehovah Kin Jerbal Ko An Relap!
“Aõ ej nebar Iroij . . . bwe Eo ekajur E ar kõmõn mõn men ko relap ñõn iõ.”—Luk 1:46-49.
1. Jej nebar Jehovah kin jerbal et ko relap?
JEHOVAH ej tellokin an bõk nebar kin jerbal ko an relap. Ke ri kanan Moses ear elij kin rõlok eo an Israel jen Egypt, ear ba: “Mejemi rar lo aolepen jerbal ko relap an Jeova.” (Duteronomi 11:1-7) Ilo ejja wãwenlok wõt, ke enjel Gabriel ear keañ kin ien eo ej itok ñan lotak eo an Jesus ikijen lio ejañin belele Mary, liin ear ba: “Aõ ej nebar Iroij . . . bwe Eo ekajur E ar kõmõn mõn men ko relap ñõn iõ.” (Luk 1:46-49) Einwõt Ri Kennan ro an Jehovah, jej kautiej e kin jerbal kein relap einwõt an kanemkwoj Israel jen kamakoko iumin ailiñ in Egypt im lotak eo ekabwilõñlõñ an Nejin eo ej jitenburu ibben.
2. (a) Ta melelen “bebe eo eto im eto” an Anij ñan armij ro rekiblie? (b) Ta eo John ear loe ilo enen Patmos?
2 Elõñ ian jerbal ko relap an Jehovah rar kakobaik “bebe in eto im eto” eo an ñan kajerammõn armij ro ikijen Messiah eo im iroij in Ailiñ eo an. (Dri Epesõs 3:8-13) Bebe in ear alikarlok wõt ke ri jilek eo eritto John ear lo ilo juõn vision juõn kejam ebellok ilo lañ. Ear roñ juõn ainikien einwõt ainikien jilel ej ba: “Kwon wõnliñtok iji im I naj bakajen ñõn yuk men ko re naj walok tokelik.” (Reveles̃õn 4:1) Ke ear bed ilo kamakoko ilo enen Patmos ekkar ñan kien Rome kin an kennan “kin nan in Anij im kennan kin Jisõs,” John ear bõk juõn “reveles̃õn jen Jisõs Kraist.” Men eo ri jilek eo ear loe im roñ ear kalikarlok elõñ men ko kin bebe eo ej indio an Anij, im letok meram eo ilo jitõb im rejañ ilo ien eo ejejjet ñan aolep ri Christian ro remol.—Reveles̃õn 1:1, 9, 10.
3. Elder ro roñoul emen John ear loe ilo vision eo rar pijaik wõn?
3 Ilikin kejam eo ebellok ilañ, John ear lo 24 elder ro, emwij jijet ion bõk belim ko einwõt king ro. Rar buñbero iman mejen Anij im ba: “Ekar ñõn kwe, O Iroij im am Anij, bwe kwon bõk aibujuij im nebar im kajur; bwe kw’ar kõmõnmõn men ko otemjej, im kin ankil am r’ar ber im emwij kõmõnmõni.” (Reveles̃õn 4:11) Elder rein rej kõkkar kin aolep Christian ri kabit ro emwij air jerkakbiji im bed ilo jikin eo eutiej Anij ear kallimuri ir kake. Rar beek in nebar Jehovah kin jerbal ko an relap ikijen men in kõmanman ko. Kij bareinwõt jej bwilõñ kin men ko rej kamol kin “kajur eo ej indio im wãwen Iroij” eo an Jehovah. (Romans 1:20, New World Translation) Im joñan an laplok ad katak kin Jehovah, en laplok wõt ad kautiej e kin jerbal ko an relap.
Kwalok kin Jerbal ko Rej Nebar Jehovah!
4, 5. Kwalok wanjoñok ko kin wãwen an kar David nebar Jehovah.
4 Ri Jeje Sam David ear nebar Anij kin jerbal ko an relap. Ñan wanjoñok, David ear al: “Komin wijtak ilo al ñõn Jeova, eo Ej jokwe i Zaiõn: komin kwalok ñõn dri ailiñ ko jerbal ko An. O Jeova, kwon tiriamokake iõ; lale aõ iñtan kin ro rej kijirãt iõ, Kweo kwoj kwotõke jen kejem ko an mij. Bwe in kwalok wijtak eo Am otemjej ilo kejem ko an kõra nejin Zaiõn: I naj lõñliñ ilo lomor eo Am.” (Sam 9:11, 13, 14) Elikin an lelok ñan Solomon eo nejin juõn plan in kalek temple eo, David ear kajerammõn im nebar Anij, im ba: “Am, O Jeova, lapen, im kajur, im maroñ, im aibujuij, im anjo, im utiejen . . . Am ailiñ eo, O Jeova, im Kwoj utiej im einwõt bõran men otemjej. . . . Inem, amuij Anij, kim kamolol Yuk, im nebar etõm e aibujuij.”—1 Kronikel 29:10-13.
5 Ilo elijinmen Jeje ko rej kir kij—aet, rej rejañ—kij ñan nebar Anij, einwõt an kar David kõmmane. Book in Sam elõñ nan in nebar Anij rej bed ie, im enañin jimettan ian al kein kar an David. Ear keini an nebar im kamolol Jehovah. (Sam 69:30) Bareinwõt, jen ien ko moktalok, al ko David im ro jet rar kine ilo kakõrmol rar kajerbali ñan nebar Jehovah.
6. Ewi wãwen an kar Sam ko rekakõrmol wõr tokjeir ñan kij?
6 Elap an wõr tokjen book in Sam Ko ñan ri kabuñ ro an Jehovah! Ñe jekõnan kamolol Anij kin aolep jerbal ko an relap ear kõmmani kin kij, lemnak eo ad enaj jeblak ñan nan ko raibujuij ilo book in Sam Ko. Ñan wanjoñok, ñe jej ruj ñan bar juõn ran ekãl, buruõd emaroñ kwalok nan ko einlok wõt nan kein: “Men eo emõn in lelok kamolol ñõn Jeova im al im nebar etõm, O Kwe kwo utiejtata. In kwalok Am joij ne ejiboñ, im Am tiljek ilo boñ otemjej. . . . Bwe Kwe Jeova, kw’ar kalõñliñ iõ kin Am jerbal; I naj lamij kin lõñliñ ilo jerbal ko in peiõm.” (Sam 92:1-4) Ñe jej anjo ion juõn men eo ej kabañ wõnmanlok eo ad ilo jitõb, jekõnan kwalok ad lañliñ im kamolol ilo jar, einwõt Ri Jeje Sam eo ear kõmmane ke ear al: “Komin itok jen al ñõn Jeova, jen kwalok ainiken lõñliñ ñõn dreka in lomor eo an.”—Sam 95:1, 2.
7. (a) Ta aorõkin elõñ ian al ko Ri Christian ro rej al kaki? (b) Ta juõn ian un ko unin ad aikwij mõkajtok ñan kwelok ko im bedwõt ñan jemlokin?
7 Ekkã ad kalaj ainikied ilo al in nebar ko ñan Jehovah ilo kwelok ko an congregation, im kwelok ko relap. Emenin aorõk bwe elõñ ian al kein rar bedbed ion nan in kakõrmol ko jen book in Sam Ko. Elap ad mõnõnõ bwe rar aine al kein rej kõmãnãn buruõd ñan nebar Jehovah ilo ran kein! Al al in nebar ko ñan Anij ej juõn un emõn unin ad kõnan mõkajtok ñan kwelok ko ad im bed mae jemlokin, im ilo wãwen in jej kobalok ibben ri kabuñ ro mõttad in nebar Jehovah kin al im jar.
“Komin Nebar Jeova!”
8. Ta melelen nan eo “Hallelujah,” im ilo wãwen et eo ekkã air kajerbali?
8 Nebar Jehovah ej bed im alikar ilo nan eo “Hallelujah,” juõn nan in kajin Hebrew im enañin aolep ien ej melelen “Nebar Jah, kom armij ro.” Ñan wanjoñok, ilo Sam 135:1-3, nan in kir in emãnãn im alikar: “Komin nebar Jeova: komin nebar E, O komeo kom ro dri korijeran Jeova. Komeo komij jutõk imõn Jeova, iloan worwor ko an imõn amuij Anij. Komin nebar Jeova, bwe Jeova emõn: komin al im nebar etan, bwe men in men in mõnõnõ.”
9. Ta eo ej kamakit kij ñan nebar Jehovah?
9 Ñe jej kalmenlokjen kin jerbal ko rekabwilõñlõñ kin kõmanman im aolepen jerbal ko an ej kõmmani kin kij, kamolol eo jen buruõd ej kamakit kij ñan nebar e. Ñe jej reiliklok ñan men in bwilõñ ko Jehovah ear kõmmani ñan armij ro an ilo ien ko etto, buruõd ej kamakit kij ñan kautiej e. Im ñe jej kalmenlokjen kake kallimur ko an Jehovah kin men ko relap enaj kõmmane, jej bukõt wãwen ko ñan kwalok nebar im kamolol.
10, 11. Ewi wãwen an bed eo ad letok unin ad nebar Anij?
10 Ad bed im mour ej letok ñan kij juõn un emõn ñan nebar Jehovah. David ear al: “I naj kamolol Yuk, bwe Am kõmõnmõn iõ men in lelñoñ im bwilõñ: jerbal ko Am men in bwilõñ: im men in, aõ e kanuij jelakake.” (Sam 139:14) Aet, emwij kõmõnmõn kij ilo juõn wãwen e “lelñoñ im bwilõñ” im ewõr ibbed men in letok ko raorõk einwõt lolokjen, roñjake, im maroñ in lemnak. Inem, jejjab ke aikwij in tel mour eo ad ilo juõn wãwen eo me jen maroñ nebar Ri Kõmanman eo ad? Paul ear ba eindein ke ear je: “Inem elañe komij mõña ak irak ak kõmõn jabrewõt, komin kõmõn men otemjej ñõn aibujuij an Anij.”—1 Dri Korint 10:31.
11 Jenaj kõmanman men otemjej ñan kaibujuij Jehovah elañe jej yokwe e. Jesus ear ba bwe kien eo moktata ej: “Kwon yokwe Iroij am Anij kin aolepen buruõm, im kin aolepen am, im kin aolepen am lolãtãt, im kin aolepen am kajur.” (Mark 12:30; Duteronomi 6:5) Emol jej aikwij yokwe Jehovah im nebar e einwõt Ri Kõmanman eo ad im Ri Letok eo kin “men in letok emõn im wãppen otemjelok.” (Jemes 1:17; Aiseia 51:13; Jerbal 17:28) Ilo mol jej aikwij kõmmane men in kinke, lemnak ko ad rekõmmanwa, mour eo ad ilo jitõb, im kajur eo ad ilo kanniek—baotokid im maroñ ko ad aolep—rej itok jen Jehovah. Einwõt ke ej Ri Kõmanman eo ad, ej tellokin bwe en bõk yokwe im nebar eo ad.
12. Ewi am lemnak kin jerbal ko relap an Jehovah im nan ko ilo Sam 40:5?
12 Kõmman ko relap an Jehovah rej letok ñan kij un ko jejjab maroñ bwiniir ñan yokwe im nebar e! “O Jeova aõ Anij, elõñ men in bwilõñ, jerbal ko Kw’ar kõmõne, kab lemnok ko Am ñõn kim,” David ear ba. “Reban kilajrõk ir ñõn Kwe; elañe I naj kõnan kwalok im konono kaki, relõñ jen maroñ in bwini.” (Sam 40:5) David ear jab maroñ bwini aolep jerbal ko rekabwilõñlõñ an Jehovah, im ej eindein ibbed bareinwõt. Ak jen nebar Anij ien otemjej ñe jabdewõt kõmman ko an relap rej waloklok imad.
Jerbal ko Rej Ekkeijak Ibben Karõk eo Ej Indio an Anij
13. Ewi wãwen kejatdikdik eo ad ej kobalok ibben jerbal ko relap an Anij?
13 Kejatdikdik eo ad ej bedotok ej lokjak wõt ibben jerbal ko relap im tellokin bõk nebar im rej ekkeijak ñan karõk eo ej indio an Anij. Elikin jumae eo ilo Eden, Jehovah ear letok kanan eo moktata im eobrak kin kejatdikdik. Ke ear ekajete serpent eo, Anij ear ba: “I naj likit kijirãt ikõtam im kõra eo, im ikõtan ineõm im inen: e naj kokkure bõrõm, a kwo naj kokkure jimwin neen.” (Jenesis 3:15) Kejatdikdik ilo Ine eo emwij kallimuri inen kõrã eo ej mour manlok ilo buruen armij ro retiljek elikin an Jehovah kõmman juõn jerbal elap ilo an kejbãrok Noah im family eo an ilujen ibwijleplep eo me ear kokkure juõn lal enana. (2 Piter 2:5) Kallimur ko emwij kanan kaki ñan armij rein einwõt Abraham im David rar bar letok lolokjen kin ta eo Jehovah enaj kajejjet kitien ikijen Ine eo.—Jenesis 22:15-18; 2 Samuel 7:12.
14. Ta joñok eo emõntata ikijen jerbal ko relap an Jehovah ñan armij?
14 Men in kabwilõñlõñ eo an Jehovah me ej kalikar bwe e eo ej kõmman jerbal ko relap ilo etan armij ear walok ke ear lelok manje eo Nejin—Ine eo emwij kallimuri, Jesus Christ—einwõt juõn katok in binmour eo. (Jon 3:16; Jerbal 2:29-36) Binmour eo ear letok juõn bedbed ñan bar jeblak ñan Anij. (Matu 20:28; Dri Rom 5:11) Jehovah ear aini armij ro moktata me rar bar jeblak ñan Christian congregation, eo ear jutak ilo Pentecost 33 C.E. Kin jibañ eo an jitõb kwojarjar eo, rar kwalok nan kin news eo emõn ijoko otemjej, im kwalok kin ewi wãwen mij im jerkakbiji eo an Jesus naj kabellok ial eo bwe armij ro rekiblie ren lo jerammõn ko rej indio iumin kien eo an Ailiñ eo an Anij ilañ.
15. Ewi wãwen an kar Jehovah emmakit ilo juõn wãwen ekabwilõñlõñ ilo ran kein ad?
15 Ilo ran eo ad, Jehovah ear jerbal ilo juõn wãwen ekabwilõñlõñ ñan aini Christian ri kabit ro eliktata. Rar kadebijik kõto in kokkure ko ñan kõtlok ien ñan sili bwen 144,000 ro, me renaj iroij ibben Christ ilañ. (Reveles̃õn 7:1-4; 20:6) Anij ear lale bwe Christian ri kabit ro rar rõlok jen kamakoko eo ilo jitõb ñan “Babylon” eo Elap, dolul in kabuñ ko rewan ibelakin lal. (Reveles̃õn 17:1-5) Rõlok in ilo yiõ eo 1919 im kejbãrok eo ekwojarjar rar loe jen ien eo mantak ear kõtlok bwen ri kabit ro ñan kõmman ta? Ñan romaklok ilo air kennan lok kake ennan eo eliktata mokta jen an Jehovah kajemlok jukjuk im bed eo enana an Satan ilo “iñtan” eo elap eo ej mõkajtok wõt.—Matu 24:21; Daniel 12:3, NW; Reveles̃õn 7:14.
16. Ta eo ej walok jen jerbal in kwalok nan kin Ailiñ eo ibelakin lal ilo ran kein?
16 Ilo kijejeto Ri Kennan ro emwij kabit ir an Jehovah rar bed iman jerbal in kwalok nan kin Ailiñ eo ibelakin lal. Tokjen men in, laplok in oran “s̃ip” ro jet rej erom ri kabuñ ro an Jehovah. (Jon 10:16) Jej lañliñ bwe ebellok wõt ien bwe ro emol burueir ion lal remaroñ kobatok ibbed ñan nebar Jehovah. Ro rej uake nan in kir in ñan “itok” rej bed ilo ial in mour im naj joor jen eñtan eo elap, kin kõtmene eo ñan nebar Jehovah ñan indio.—Reveles̃õn 22:17.
Elõñ Thousand Rej Kuktok nan Kabuñ eo Emol
17. (a) Ewi wãwen an Jehovah kõmman jerbal ko relap ikijen jerbal in kwalok eo ad? (b) Ewi wãwen an Zechariah 8:23 (NW), jejjet kitien kiõ?
17 Jehovah ej kõmman kiõ jerbal ko relap im rej tellokin bõk nebar ikijen jerbal in kwalok nan eo ad. (Mark 13:10) Ilo yiõ ko rej kab motlok, ear ‘kabellok kejam ko relap rej tellok ñan jerbal.’ (1 Dri Korint 16:9) Men in ear kõmman bwe news eo emõn en jededlok ilo aolepen territory ko me ro rar kijirãte mol eo rar jumae mokta. Elõñ ro rar mour ilo marok ilo jitõb mokta rej kiõ eoroñ nan in kir eo ñan kabuñ ñan Jehovah. Rej kajejjet kitien nan in kanan kein: “Eñin nan eo Jehovah in inelip eo ear ba, ‘Enaj walok ilo ran kane bwe emaan ro joñoul ian kajin ko otemjej in ailiñ ko renaj debij, aet, renaj jibwe nuknuk eo an juõn emaan ri Jew eo, im ba: Kimnaj etal ibbemi kom armij ro, kinke kim ar roñ bwe Anij ej bed ibbemi.” (Zechariah 8:23, NW) “Armij” rein rej ri Jew ro ilo jitõb, bwen Christian ri kabit ro ilo ran kein. Kinke joñoul ej kõkkar kin wãwen eo eyu ion lal, “emaan ro joñoul” rej kõkkar kake “jar elap” eo ear kobalok ibben “Israel eo an Anij,” einwõt “juõn bwij.” (Reveles̃õn 7:9, 10; Dri Galetia 6:16) Emenin lañliñ nan lo elõñ rej jerbal ibben don ilo jerbal eo ekwojarjar einwõt ri kabuñ ro an Jehovah!
18, 19. Ta eo ej kamol bwe Jehovah ej kajerammõn jerbal in kwalok nan?
18 Jej mõnõnõ bwe elõñ thousand—emol, elõñ buki thousand—rej bõk kabuñ eo emol ilo ene ko kabuñ wan ear kajur ioir mokta im einwõt armij ro ie rar jab kõnan bõk news eo emõn ñan jidik. Lale book eo Yearbook of Jehovah’s Witnesses ñan yiõ in, im lale ailiñ ko kiõ rej reporte jen 100,000 ñan enañin 1,000,000 ri kwalok ro an Ailiñ eo. Men in ej juõn men in kamol ekajur bwe Jehovah ej kajerammõn jerbal in kwalok nan kin Ailiñ eo.—Jabõn Kennan Ko 10:22.
19 Einwõt armij ro an Jehovah, jej nebar im kamolol Jemeduij ilañ kin an letok ñan kij juõn un eo emol ñan mour, juõn jerbal eo ewõr tokjen ie ilo jerbal eo an, im juõn ilju eo emõn im ewõr kejatdikdik ie. Jej kijoror wõt im kõtmene kin an jejjet kallimur ko rekwojarjar kitieir im bebek ñan ‘bedwõt ilo yokwe an Anij, im kõtmene wõt ñan mour indio.’ (Jud 20, 21) Elap ad lañliñ ñan lo bwe oran jar eo elap ej nebar Anij kiõ ej tarrin 6,000,000! Ikijen jerammõn jen Jehovah, bwen ri kabit ro im bar sheep ro mõttair rej koba ibben don ilo enañin 91,000 congregation ko ilo 235 ailiñ ko. Kij aolep jej mãttõk ilo jitõb kin an “ri korijer etiljek im meletlet” kate wõt ir im jab mõk. (Matu 24:45) Juõn dolul ekwojarjar eo ej wõnmanlok wõt im tel ilo yokwe ej lolorjake jerbal eo an Ailiñ eo ilo 110 branch office ko an Ri Kennan ro an Jehovah. Jej kamolol bwe Jehovah ear kamakit buruen armij ro ñan ‘kautiej e kin men ko raorõk.’ (Jabõn Kennan Ko 3:9, 10) Inem, jerbal in kwalok nan eo ad ej wõnmanlok wõt ibelakin lal, im ibben jikin kõmman book ko, Bethel im moko imõn missionary, mõn kwelok in Kingdom Hall ko, im jikin kwelok ko relap rar kaleki ekkar ñan aikwij eo.
20. Ad kalmenlokjen kin jerbal ko relap an Jehovah im rej tellokin bõk nebar ren jelet kij ilo wãwen et eo?
20 Jejjab maroñ kwalok aolep jerbal ko relap an Jemed ilañ im ej tellokin bõk nebar. Ak ewõr ke jabdewõt eo emol buruen im ejjab kõnan kobalok ibben juõn jar in ri nebar ro an Jehovah? Emol ejelok! Inem, aolep ro rej yokwe Anij ren lamõj ilo lañliñ: “Komin nebar Jeova. Komin nebar Jeova jen lõñ ko; komin nebar E ilo jikin reutiej. Komin nebar E, komeo enjel ro An . . . . , Man rõn im kõra rõn emõn drer, ridto rõn im ajiri rõn. Ren nebar etan Jeova; bwe etan wõt eliñlok, An aibujuij ilõñin lõl im lõñ.” (Sam 148:1, 2, 12, 13) Aet, kiõ im ñan indio, jen nebar Jehovah kin jerbal ko an relap!
Ewi Wãwen Am Naj Kar Uak?
• Ta jet ian jerbal ko an Jehovah rej tellokin bõk nebar?
• Etke ewõr am eñjake ñan emmakit ñan nebar Jehovah?
• Ewi wãwen kejatdikdik eo ad ej ekkeijak ñan jerbal ko relap an Anij?
• Ewi wãwen an Jehovah kõmman jerbal ko rej tellokin bõk nebar ikijen jerbal in kwalok nan kin Ailiñ eo?
[Pija]
Kwoj kobalok ibbeir ke ilo al in nebar ko ñan Jehovah?
[Pijas]
Jej lañliñ bwe ebellok wõt ien ñan an ro ettã burueir kobatok ibbed ilo nebar ñan Jehovah