Jodikdik Ro, Nebar Jehovah!

“Komin nebar Jeova jen lõl, ... man rõn im kõra rõn emõn drer.”​—SAM 148:7, 12.

1, 2. (a) Ta men ko ro redik rej jelã bwe rejjab maroñ kõmmani? (b) Etke ro redik rej jab aikwij makoko in lor kien ko jemeir im jineir rej likit ioir?

RO REDIK ekkã air jelã ta eo ejjab melim air kõmmane. Elõñ iair remaroñ mõkaj in jiroñ yuk kin ewi naj joñan dettair mokta jen air maroñ make kijone ial eo ak mimij ilo boñ ak kattõr juõn wa. Jet ien, juõn jodikdik emaroñ eñjake bwe elõñ ian kajitõk ko an rej bõk ejja uak eo wõt, “Kõttar mae ien kwoj rittolok.”

² Kom ajiri ro komin jelã bwe ro jememi im jinemi rej lemnak ej juõn men in meletlet ñan kõmman kien rot kein, bõlen kin air kõnan kejbãrok kom. Kom jelã, bareinwõt, bwe Jehovah ej buñburuen ñe komij bokake jememi im jinemi. (Dri Kolosse 3:20) Ak, kwonañin ke kar eñjake bwe elukkun to am kõttar mokta jen am maroñ jino kõmmani kõnan ko am make? Aolep men ko raorõk remo ke ñan am kõmmani mae ien kwo ritto? Ejjab mol men in! Ewõr juõn jerbal rej kõmmane rainin me elaplok an aorõk jen jabdewõt jerammõn kwonaj bõke. Kom ro redik emelim ke ami bõk kunami ilo jerbal in? Elaplok jen men in—Anij Eo Eutiejtata ej make kir yuk ñan am kõmmane!

3. Jehovah ej kir ro redik ñan air bõk kunair ilo jerbal et eo ejej uan, im ta kajitõk ko jenaj etali kiõ?

³ Jerbal et eo jej konono kake? Lale nan ko ilo unin tel in katak in: “Komin nebar Jeova jen lõl, ... man rõn im kõra rõn emõn drer, ridto rõn im ajiri rõn.” (Sam Ko 148:7, 12) Eñin jerammõn eo am elap: Kwomaroñ nebar Jehovah. Einwõt juõn jodikdik, kwoj mõnõnõ ke in bõk kunam ilo jerbal in? Elõñ rej. Ñan lo etke ewõr tokjen bõk eñjake in, jen etale jilu kajitõk ko. Mokta, etke kwoj aikwij nebar Jehovah? Kein karuo, ewi wãwen am maroñ nebare ilo bolemen? Kein kajilu, ñããt eo emõn ñan am jino nebar Jehovah?

Etke Jen Nebar Jehovah?

4, 5. (a) Ekkar ñan Sam 148, jej bed ilo wãwen et eo eaibujuij? (b) Ewi wãwen an men in kõmanman ko rejjab konono ak lemnak ilo kõmmanwa maroñ nebar Jehovah?

⁴ Juõn un eaorõk unin ad nebar Jehovah ej eñin bwe ej Ri Kõmanman eo ad. Book in Sam 148 ej jibañ kij ñan lemnak kin mol in. Lemnak mõk: Elañe kwar kebak juõn kumi in armij me rej al ilo juõn ainikien eaibujuij im ekamõnõnõ, enaj ewi eñjake eo am? Ta elañe nan ko ilo al eo rej mol, im rej kwalok lemnak ko raorõk, lañliñ, im kakajuror? Kwonaj kõnan ke katak al in im al? Jemaroñ ba aet. Eokwe, Sam 148 ej kwalok bwe kwoj bed ilo juõn wãwen einlok wõt in, bõtab, elaplok an aibujuij. Sam in ej kwalok kin juõn jar elap, rej nebar Jehovah ilo burukuk. Bõtab, ñe kwoj konono sam eo, kwonaj lo juõn men einjuõn. Ta in?

⁵ Elõñ ian rein me rej nebar Jehovah ilo Sam 148 rejjab maroñ konono ak lemnak ilo kõmmanwa. Ñan wanjoñok, jej konono bwe al, alliñ, iju ko, snow, kõto, im tol ko rej nebar Jehovah. Ewi wãwen men in kõmanman kein rejjab mour remaroñ kõmman men in? (3, 8, 9 eon) Emol, rej kõmmane men in ilo ejja wãwen eo wõt wijki ko, ek ko, im men in mour ko rej kõmmane. (7, 9, 10 eon) Kwonañin kar lale ke an al tulok ak reiliñlok im lo an aliñ eo ilañ ak ettõñdikdik ñan men in mour ko ñe rej ikkure ak lukkun bwilõñ kin juõn jikin kallip eaibujuij? Inem emwij am “eoroñ” al in nebar eo ej itok jen men in kõmanman ko. Men in kõmanman ko otemjej an Jehovah rej kakememej kij bwe ej Ri Kõmanman eo eutiejtata, im ejelok bar juõn ijellokin ijoko otemjej ilañ im lal ekajur, meletlet, im yokwe einwõt e.—Dri Rom 1:20; Reveles̃õn 4:11.

6, 7. (a) Ilo Sam 148 ej kamelele kin ta men in kõmanman ko remeletlet rej nebar Jehovah? (b) Etke buruõd emaroñ kamakit kij ñan nebar Jehovah? Kwalok wanjoñok.

⁶ Sam 148 ej bareinwõt kwalok bwe men in kõmanman ko remeletlet rej nebar Jehovah. Ilo 2 eon, “jar in tõrinae ko,” ak enjel ro an Jehovah, rej nebar Anij. Ilo 11 eon, armij ro rekajur im utiej, einwõt king im ri ekajet ro, rej kobatok ñan nebar e. Elañe enjel ro rej lo mõnõnõ ilo air nebar Jehovah, ejjab ke bwe ejelok juõn armij emaroñ ba bwe ejjab aikwij nebar Jehovah kinke eutiej jen Anij? Inem ilo eon 12 im 13 eon, ej rejañ kom jodikdik ro ñan ami bõk kunami im nebar Jehovah. Kwoj mõnõnõ ke in kõmmane men in?

⁷ Lemnak kin juõn wanjoñok. Elañe ekar wõr juõn jeram emakade—ilo ikkure, jiña pija ko, ak al im kajañjañ—kwonaj ke konono kake ibben family eo am im armij ro jet? Aet. Eokwe, katak kin men ko otemjej Jehovah ear kõmmani emaroñ jelet kij ilo ejja wãwen dein. Ñan wanjoñok, Sam 19:1, 2 ej ba bwe lõñ ko rej “katorlok nan.” Ñan kij, ñe jej lemnak kin men ko rekabwilõñlõñ Jehovah ear kõmmani, ebin ad jab konono ñan ro jet kin Anij eo ad.

8, 9. Ta un ko unin an Jehovah kõnan bwe jen nebar e?

⁸ Bar juõn un elap unin ad aikwij nebar Jehovah ej kinke ekõnan bwe jen kõmman eindein. Etke? Ej men in aikwij ke bwe en bõk nebar jen armij ro? Jaab. Jet ien armij ro rej bõk nebar, ak Jehovah eutiejlok jen kij. (Aiseia 55:8) Ejelok an bere kin e make ak kadkad ko kadkadin. (Aiseia 45:5) Ak, ekõnan bwe jen nebar e im ej buñburuen ñe jej kõmman eindein. Etke? Lemnak kin ruo un ko. Mokta, ej jelã bwe jej aikwij nebar e. Ear kõmanman kij im likit juõn aikwij, ñan kabuñ ñan e. (Matu 5:3) Ñe jej kabwe aikwij in Jehovah ej buñburuen, einwõt an ro jemem im jinim buñburueir ñe rej lo am kañi mõñã ko rejelã bwe rej emõn ñan yuk.—Jon 4:34.

⁹ Un eo kein karuo ej bwe, Jehovah e jelã bwe armij ro jet rej aikwij roñjake ad nebar e. Ri jilek Paul ear je nan kein ñan Timote: “Kwon kejbãrok yuk, im men in katakin ko am. Kwon berwõt ilo men kein; bwe ilo am kõmõn ein drein, kwo naj mõke lomoren yuk, kab ro rej roñjake yuk.” (1 Timote 4:16) Aet, ñe kwoj katakin ro jet kin Jehovah Anij, im nebar e, remaroñ jelã kin Jehovah bareinwõt. Jelãlokjen in emaroñ tellok ñan air bõk mour indio!—Jon 17:3.

10. Etke jekõnan nebar Anij eo ad?

¹⁰ Ebar wõr juõn unin ad nebar Jehovah. Kememej wanjoñok eo kin eo jeram. Elañe kwar roñ an armij ro jet riap kin e, ruruwe etan, kwojjab naj kar kõnan ke jojomar im nebar e? Eokwe, emwij an armij ro katton etan Jehovah ilo lal in. (Jon 8:44; Reveles̃õn 12:9) Ro rej yokwe e rekõnan kwalok mol eo kin e, im kajimwe lemnak ko rebwid an armij. Kwe bareinwõt kwokõnan ke kwalok yokwe im kamolol ñan Jehovah im kwalok bwe kwokõnan bwe en Iroij eo am im jab ri kijirãt eo an elap, Satan? Kwomaroñ kõmmane men kein aolep ilo am nebar Jehovah. Ak, ewi wãwen?

Ewi Wãwen Jet Jodikdik Rar Nebar Jehovah?

11. Ta wanjoñok ko ilo Bible rej kwalok bwe jodikdik ro remaroñ nebar Jehovah?

¹¹ Bible eo ej kwalok bwe ekkã an jodikdik ro bolemeir ilo air nebar Jehovah. Ñan wanjoñok, ear wõr juõn ledik in Israel Ri Syria ro rar bõke einwõt juõn ri kamakoko. Ilo beran ear kwalok nan ibben kõrã eo ear karejar ñan e kin Elisha ri kanan eo an Jehovah. Nan ko an rar tellok ñan juõn men ekabwilõñlõñ ear walok, im ear letok juõn men in kamol elap. (2 Kiñ 5:1-17) Jesus ear bareinwõt kwalok nan ilo beran ke ear juõn ajiri. Jen aolep men ko ear kõmmani ke ear juõn jodikdik ekkar ñan Bible eo, Jehovah ear kãlet juõn, ien eo ke Jesus ear kajitõk ilo beran ibben ri kaki ro an kabuñ ilo temple eo ilo Jerusalem im rar bwilõñ kin an melele kin wãwen ko an Jehovah.—Luk 2:46-49.

12, 13. (a) Mokta jen an kar mij, ta eo Jesus ear kõmmane ilo temple eo, im ewi wãwen an kar jelet armij ro ijo? (b) Ewi wãwen an kar Jesus lemnak ke jodikdik ro rar nebar e?

¹² Einwõt juõn emaan, Jesus ear bareinwõt kamakit ajiri ro bwe ren nebar Jehovah. Ñan wanjoñok, jejjo ran mokta jen an kar mij, Jesus ear bed ilo temple eo ilo Jerusalem. Bible eo ej ba bwe ear kõmman “men in bwilõñ ko” ijo. Ear kadiojlok ri wia ro jen temple eo. Bareinwõt ear kejmour ro ri bilo im ajkuk. Aolep armij ro ijo, elaptata ri tel ro an kabuñ, ren kar emmakit ñan nebar Jehovah im Nejin, eo ej Messiah. Ekaburomõjmõj bwe, elõñ armij ilo ien eo rar jab nebar ir. Rar jelã bwe Anij ear jilkintok Jesus, ak rar mijak ri tel ro an kabuñ eo. Bõtab, juõn kumi in armij rar beran in kwalok nan. Kwoj jelã ke wõn ro? Bible eo ej ba: “A ke pris ro relap im skraib ro rej lo men in bwilõñ ko E ar kõmõni, im ajiri rej lamij iloan tempel im ba, Hosana ñõn nejin Devid; elap air illu, Im re ba ñõn E, Kwoj roñ ke men ko re ba? Im Jisõs e ar ba ñõn ir, Aet; kom ar jab konono ilo buk ke, Kw’ar kowãppen nebar jen loñin niñniñ ro im ro rej ninnin?”—Matu 21:15, 16; Jon 12:42.

¹³ Priest ro rar lemnak bwe Jesus enaj kar kabõjrak ajiri ro jen air nebar e. Ear ke? Ear jab. Jesus ear uake priest ro: “Aet; kom ar jab konono ilo buk ke, Kw’ar kowãppen nebar jen loñin niñniñ ro im ro rej ninnin?” Alikar, Jesus im Jemen rar buñburueir kin an ajiri ro nebar e. Ajiri ro rar kõmmane men eo ritto ro ijo rar aikwij kõmmane. Ekkar ñan lemnak ko an jodikdik ro, ear lukkun alikar ta eo rar aikwij kõmmane. Rar lo an lein kõmman men ko rekabwilõñlõñ, konono ilo beran im tõmak, im kwalok yokwe eo elap kin Anij im armij ro an. Ear—Messiah eo, “Nejin Devid” emwij kallimur kake. Kin air tõmak ilo e, jodikdik rein rar bõk jerammõn eo ñan kajejjet kitien kanan in.—Sam Ko 8:2.

14. Ewi wãwen men in letok ko an jodikdik ro rej kajerbali ñan nebar Jehovah?

¹⁴ Ta eo jemaroñ katak jen wanjoñok kein? Eñin bwe ajiri ro remaroñ lukkun bolemen ilo air nebar Jehovah. Ekkã air lo mol eo ilo alikar im lamwan, im kwalok tõmak eo air ilo kijejeto. Bareinwõt ewõr ibbeir men in letok eo ilo Jabõn Kennan Ko 20:29: “Aibujuij an likao ro, kajur eo air; im men in kalitlit lõlap ro, bõrair re uõn.” Aet, kom likao ro komij kajur im kijejeto—kadkad ko relap ñan nebar Jehovah.Ewi wãwen am maroñ kajerbal men in letok kein?

Ewi Wãwen Kwomaroñ Nebar Jehovah?

15. Elañe jekõnan nebar Jehovah ilo bolemen, ta un eo jej aikwij bõke?

¹⁵ Nebar ilo bolemen ej jino jen buruõd. Kwojjab maroñ nebar Jehovah ilo bolemen elañe kwoj kõmmane kinke armij ro jet rekõnan bwe kwon kõmmane. Kememej bwe, kien eo elaptata ej: “Jisõs e ba ñõn e, Kwon yokwe Iroij am Anij kin aolepen buruõm im kin aolepen am, im kin am lemnok otemjej.” (Matu 22:37) Emwij ke am jelã kajjen Jehovah ilo am katak ibbem make kin Nan eo an? Tokjen katak in bwe kwon yokwe Jehovah. Wãwen ad kwalok yokwe in ej ilo ad nebar e. Ñe unin am nebar e ej alikar im kajur, inem kwoj bojak in nebar Jehovah ilo kijejeto.

16, 17. Ewi wãwen mwilid emaroñ nebar Jehovah? Kwalok wanjoñok.

¹⁶ Kiõ, mokta jen am lemnak kin ta eo kwonaj ba, kwoj aikwij jelã kin mwilõm. Elañe ledik in Israel eo ilo ran ko an Elisha ear jaje manit, jab kautiej ri utiej ro, ak riap, kwoj tõmak Ri Syria ro renaj kar roñjake ke ta eo ledik eo ear ba kin ri kanan eo an Jehovah? Jaab. Ilo ejja wãwen eo wõt, armij ro renaj mõnõnõ in roñjake yuk elañe rej lo bwe kwoj kautiej armij, mol, im emõn mwilõm. (Dri Rom 2:21) Lemnak kin wanjoñok in tok ilal.

¹⁷ Juõn ledik 11-an-yiõ ilo Portugal ear iion juõn melejoñ ilo school ñan bõk kunan ilo kwojkwoj ko rej jumae bõklikit eo an ej bedbed ion Bible. Ilo ettã buru ear kamelele ñan ri kaki eo an kin unin ear jab kõnan bõk kunan ilo kwojkwoj ko, ak ri kaki eo ear kajirere. Tokelik, ri kaki eo ear bar kajeoñ im kajook e elõñ alen, im kajirere kake kabuñ eo an ledik eo. Bõtab, ledik eo ear kwalok wõt an ettã buru. Elõñ yiõ ko tokelik, ledik in ear bed ilo jerbal in kwalok nan full-time. Ilo juõn kwelok elap, ear lale an armij ro baptais im ear kile juõn iair. Kar ri kaki eo an! Elikin airro wõnmaik don, ri kaki eo an mokta ear jiroñ ledik eo bwe ear jab meloklok mwilin. Juõn ri kwalok ear konono ibben, im ri kaki eo ear konono kin mwilin ri school eo. Kin men in, kõrã in ear jino katak Bible, im bõk mol eo. Aet, mwilõm emaroñ juõn wãwen ekajur ñan nebar Jehovah!

18. Ta eo juõn jodikdik emaroñ kõmmane elañe ej ãliklik in jino bwebwenato ko ibben ro jet kin Bible im Jehovah Anij?

¹⁸ Elõñ ke ien ko ilo school kwoj lo bwe ebin am jino bwebwenato ko kin tõmak eo am? Kwojjab make iam ilo men in. Bõtab, kwomaroñ kamakit ro jet bwe ren kebak yuk im kajitõk ibbem kin tõmak eo am. Ñan wanjoñok, elañe emõn im ejjab nae kien ko, etke kwojjab bõk book ko rej bedbed ion Bible ibbem im readi ilo ien mõñã in raelep ak ien ko jet ñe rej kõtlok am kõmmane? Bõlen ilo ien eo ri school ro mõttam remaroñ kajitõk ibbem ta eo kwoj readi. Ilo am uake kajitõk ko air im kamelele kin ta eo kwoj itoklimo kake ilo katak ak book eo, kwomaroñ lo bwe emwij am jino juõn bwebwenato ibben armij eo. Kememej in kwalok kajitõk ko im lale ta eo ri school ro mõttam rej tõmak kake. Kwon roñjake ilo ettã buru, kwalok ta ko kwar katak kaki ilo Bible eo. Ilo bwebwenato ko ilo page 29, rej kwalok bwe elõñ jodikdik ro rej nebar Anij ilo school. Ej kalañliñ ir im jibañ elõñ armij bwe ren jelã kin Jehovah.

19. Ewi wãwen jodikdik ro remaroñ kakõmanmanlok air jerbal in kwalok nan jen em ñan em?

¹⁹ Jerbal in kwalok nan jen em ñan em ej wãwen eo emõntata ñan nebar Jehovah. Elañe kwojañin jino bõk kunam ilo jerbal in, kwon kõmman bwe en juõn am mejenkajjik. Elañe kwoj bõk kunam, ebar wõr ke mejenkajjik ko kwomaroñ jibadõki kin jerbal in? Ñan wanjoñok, ijellokin am kwalok ejja nan ko wõt jen em ñan em, kwon bukõt wãwen ko jet ñan kakõmanmanlok, kajitõk jibañ ibben jemem im jinim im ri kwalok ro jet rej kabel ilo jerbal in. Katak kajerbal Bible eo ilo bolemen, kakõmanmanlok jerbal in bar jeblak ibben ro rej itoklimo, im jino juõn katak ilo Bible ibben armij ro. (1 Timote 4:15) Ñe kwoj kalaplok am nebar Jehovah ilo wãwen kein, enaj laplok am bolemen im lañliñ ilo jerbal in kwalok nan.

Ñããt Kwoj Aikwij Jino Nebar Jehovah?

20. Etke ejelok unin an jodikdik ro lemnak bwe rej dik wõt ñan nebar Jehovah?

²⁰ Jen kajitõk ko jilu ilo katak in, ebidodo uake kajitõk eo eliktata. Lale ta eo Bible eo ej ba: “Kwon bareinwõt kememej Eo Dri Kõmõnmõn yuk ilo ran ko ñe emõn ridtõm, mokta jen an ran ko re nana itok, im yiõ ko rej kebaktok, ñe kwo naj ba, I jab mõnõnõ kake.” (Ekklisiastis 12:1) Aet, ien eo ñan jino jerbal in nebar Jehovah ej kiõ. Ebidodo ba: “Ijjab maroñ nebar Jehovah kinke ij dik wõt. Ijañin iminene. Ij aikwij kõttar mae ien ij rittolok.” Ejjab kwe wõt kwoj lemnak rot in. Ñan wanjoñok, Jeremiah ear ba ñan Jehovah: “O Iroij Anij, ijaje ta eo in ba, kinke ña ij ajiri wõt.” Jehovah ej kallimuri kij bwe jejjab aikwij mijak. (Jeremiah 1:6, 7, NW) Ein dein, jejjab aikwij mijak ñe jej nebar Jehovah. Jehovah emaroñ kamadmõde jabdewõt jorrãn rej itok iod.—Sam Ko 118:6.

21, 22. Etke mõlawi ej kõkkar kin jodikdik ro rej nebar Jehovah, im etke nan in keidi in ej juõn men in rejañ?

²¹ Inem, kimij rejañ kom jodikdik ro: Jab jenliklik jen am nebar Jehovah! Kiõ ke emõn dettam ej ien eo emõntata ñan am bõk kunam ilo jerbal eo eaorõktata ej walok ion lal rainin. Ñe kwoj kõmmane men in, kwoj erom uan juõn men eaibujuij—juõn family in ro rej nebar Jehovah ijoko otemjej ilañ im ion lal. Jehovah elap an mõnõnõ in kobaik yuk einwõt juõn uan family eo an. Lale nan ko an ri jeje sam ñan Jehovah: “Ro drom rej mõnõnõ im lewoj ir mõke ilo ran in Am kajur: ilo wõlio ko in kwojarjar, jen lojien ejiboñ: ibõm molawi an ien emõn drer.”—Sam Ko 110:3.

²² Rabõlbõl in mõlawi ilo jibboñ ej juõn pija eaibujuij, ejjab ke? Rej kaemololo im rabõlbõl im joñan an lõñ biliñliñ kein jejjab maroñ bwini. Eñin wãwen an Jehovah lo jodikdik ro rej tiljek ilo air nebar e ilo ien kein renana. Alikar, ñe kwoj beek in nebar Jehovah kwoj kamõnõnõik buruen. (Jabõn Kennan Ko 27:11) Inem, kom jodikdik ro, komin nebar Jehovah!

Ewi Wãwen Am Naj Uak?

• Ta jet ian un ko raorõk unin ad nebar Jehovah?

• Ta joñok ko ilo Bible rej kwalok bwe jodikdik ro remaroñ nebar Jehovah ilo bolemen?

• Ewi wãwen an jodikdik ro maroñ nebar Jehovah rainin?

• Ñããt jodikdik ro maroñ jino nebar Jehovah, im etke?

[Pija ko ilo peij 27]

Elañe eo jeram ear lukkun kabel, kwonaj mõnõnõ ke in konono kin e ñan ro jet?

[Pija eo ilo peij 29]

Ri school ro mõttam remaroñ itoklimo in jelã kin men ko kwoj tõmak kake?

[Pija eo ilo peij 30]

Elañe kwokõnan kakõmanmanlok jerbal eo am kin kwalok nan, kajitõk jibañ ibben Ri Kennan ro rekabel ilo kwalok nan