Bedwõt Ilo Kijenmij Einwõt An Lo Eo Reban Lo E!
[Moses ear] kijenmij einwõt an lo Eo re ban lo E.”—Dri Hibru 11:27.
1. Ta ennan eo ekabwilõñlõñ kin Anij Jesus ear kwaloke ilo Katak eo an ion Tol eo?
JEHOVAH ej Anij eo jeban loe. Ke Moses ear kajitõk bwe en lo aibujuij eo An, Jehovah ear uak: “Kwo ban lo meja, bwe armij re ban lo Iõ im mour.” (Exodus 33:20) Im ri jilek John ear je: “Ejelok armij e ar lo Anij jabrewõt ien.” (Jon 1:18) Ke Jesus Christ ear bed ion lal einwõt juõn armij, e bareinwõt ear jab maroñ lo Anij. Bõtab, ilo Katak eo an ion Tol eo, Jesus ear ba: “Emõnõnõ ro erreo burueir; bwe re naj lo Anij.” (Matu 5:8) Ta melele eo an Jesus?
2. Etke jejjab maroñ lo Anij kin mejed ilo kanniek?
2 Jeje ko rej kile Jehovah einwõt juõn jitõb eo jeban loe. (Jon 4:24; Dri Kolosse 1:15; 1 Timote 1:17) Kin men in, Jesus ear jab ba bwe kij armij jemaroñ lukkun lo Jehovah kin mejen kanniek. Emol, Christian ri kabit ro renaj lo Jehovah Anij ilo lañ elikin air jerkakbiji einwõt menin kõmanman ko ilo jitõb. Ak armij ro “erreo burueir” im ewõr air kejatdikdik in mour indio ion lal remaroñ bareinwõt “lo” Anij. Ewi wãwen an menin maroñ?
3. Ewi wãwen an armij maroñ jelã jet ian kadkad ko kadkadin Anij?
3 Jej katak juõn men kin Jehovah ikijen ad lukkun lale men ko ear kõmanmani. Kin menin jemaroñ bwilõñ kin kajur eo an im emmakit ñan ad kamol kin e einwõt Anij Ri Kõmanman eo. (Dri Hibru 11:3; Reveles̃õn 4:11) Ikijen menin, ri jilek Paul ear je: “Kadkad ko kadkadin [Anij] jeban loi rej alikar jen kar kõmanman eo an lal in im manlok, kinke jej maroñ jelã kaki ikijen men ko kar kõmmani, kajur eo an ej indio im an Anij.” (Romans 1:20, NW) Inem nan ko an Jesus kin lo Anij ekoba maroñ eo ñan melele kin jet ian kadkad ko kadkadin Jehovah. Kain lo rot in ej bedbed ion jelãlokjen eo ejimwe im melele ilo jitõb kin ‘mejen buru.’ (Dri Epesõs 1:18) Nan ko im jerbal ko an Jesus elap wõt ijo rej bareinwõt kalikare kin Anij. Kin men in, Jesus ear ba: “Eo e ar lo Ña, e ar lo Jema.” (Jon 14:9) Jesus ear wãppen an kalikar kadkadin Jehovah. Kin menin, jelãlokjen eo kin mour eo an Jesus im katak ko an remaroñ jibañ kij lo, ak jelã, jet ian kadkad ko kadkadin Anij.
Melele Kake im Kamolol kin Men ko ilo Jitõb Elap Tokjen
4. Ewi wãwen an alikar an jabwe mour in jitõb ibben elõñ armij rainin?
4 Rainin, tõmak im mour eo emol ilo jitõb ekanuij jeja. “Tõmak ejjab juõn men eo mweien armij otemjej,” Paul ear ba. (2 Thessalonians 3:2, NW) Elõñ armij elap wõt air madjaki jibadbad ko air make im ejelok air tõmak ilo Anij. Mwilin jerawiwi eo air im jabwe ilo mour in jitõb ej bõprae ir jen air lo e kin mejen burueir, bwe ri jilek John ear je: “Eo ej kõmõn nana e ar jab lo Anij.” (3 Jon 11) Kin an armij rot in jab lo Anij kin mejeir ilo kanniek, rej kõmman einwõt ñe e jab lo men eo rej kõmmane. (Ezekiel 9:9, NW) Rej karmijeteik men ko ilo jitõb, inem rejjab maroñ tõbar “jelalokjen kin Anij.” (Jabõn Kennan Ko 2:5) Inem, ejejjet an kar Paul je: “A armij kin biktokin e jab bõk men ko an Jitõb õn Anij: bwe re men in bwebwe iben; im e jab maroñ in jela, bwe re melele kin Jitõb.”—1 Dri Korint 2:14.
5. Ta mol eo armij ro reritto ilo lemnak rej jelã kake?
5 Bõtab, elañe jej lukkun lemnak kin men ko ilo jitõb, jej naj jelã wõt bwe meñe Jehovah ejjab juõn Anij ej kabuk likjap ko, e jelã ñããt eo jej kõmmani lemnak ko im kõnan ko renana. Emol, “etetal ko an juõn armij rej iman mejen Jeova; im Ej lale wõt ial ko an otemjej.” (Jabõn Kennan Ko 5:21) Elañe jerawiwi ej jibwe kij, jej emmakit ñan ad ukwelok im bukõt an Jehovah jolok ad bwid kinke jej yokwe e im jejjab kõnan kõmetak e.—Sam 78:41; 130:3.
Ta eo ej Kõmman Ad Kijenmij?
6. Ta melelen ñan kijenmij wõt?
6 Meñe Jehovah ejjab alikar ñan mejed, ien otemjej jen kememej bwe ej lo kij. Ad jelã kin an bed im tõmak bwe ej ebake ro otemjej rej kir ñan e enaj jibañ kij kijenmij wõt—bin im ban makitkit ilo tiljek eo ad ñan e. (Sam 145:18) Jemaroñ einwõt Moses, eo Paul ear jeje kin e: “Kin tõmak e ar illok jen Ijipt, im jab mijõk illu an kiñ eo, bwe ej kijenmij einwõt an lo Eo re ban lo E.”—Dri Hibru 11:27.
7, 8. Ta eo ear kõmman menin an Moses beran iman mejen Pharaoh?
7 Ilo an kar kõmmane jerbal eo lelok in Anij ñan tel im kadiojlok Ri Israel ro jen air kamakoko ñan Ri Egypt, Moses ekkã an kin jede iman leo elej Pharaoh ilo jikin ekajet eo an king eobrak kin ri utiej ro an kabuñ im ri tarinae ro elap kilair. Bõlen, ion worwor ko ilo jikin eo an king ekjap ko rej lajrak ie. Ak Jehovah, meñe reban loe, ear juõn men eo emol ñan Moses, ejjab einwõt aolep ekjap ko rar jutak ikijen anij wan ko an Egypt rejjab mour. Ejelok bwilõñ Moses ear jab mijak Pharaoh!
8 Ta eo ear kaberan Moses ñan an elijinmen an jede iman Pharaoh? Jeje ko rej jiroñ kij bwe “armij eo, Moses, e kanuij inemõn, jen armij otemjej rej ber ion mejen lõl.” (Bwinbwin 12:3) Ealikar, mour in jitõb eo an ekajur im liki eo an bwe Anij ear bed ibben ear lelok ñan Moses kajur eo ear aikwiji ñan jutak ilo etan ‘Eo reban loe’ iman mejen king eo elej an Egypt. Ta jet ian wãwen ko ro rej “lo” Anij eo reban loe rej kalikar tõmak eo air ilo e rainin?
9. Ta juõn wãwen eo jemaroñ etal wõt im kijenmij ie?
9 Juõn wãwen ñan kalikar tõmak im etal wõt im kijenmij einwõt air lo Eo reban loe ej air ilo beran ilo jerbal in kwalok nan meñe rej iion matõrtõr. Jesus ear kakkõl ri kalor ro an: “Im armij otemjej re naj kijirãte kom kin Eta.” (Luk 21:17) E ar bareinwõt jiroñ ir: “Dri korijer e jab utiej jen iroij eo an. Elañe r’ar matõrtõr Iõ, re naj bareinwõt matõrtõre kom.” (Jon 15:20) Ñan mol in nan ko an Jesus, ejjabto elikin an mij, ri kalor ro an rar iion matõrtõr ilo wãwen kamijak, kalbuji ir, im mõn ir. (Jerbal 4:1-3, 18-21; 5:17, 18, 40) Meñe ear walok matõrtõr, ri jilek ro an Jesus im ri kalor ro jet rar etal wõt im kwalok nan kin news eo emõn ilo beran.—Jerbal 4:29-31.
10. Ewi wãwen liki eo ad ilo kejbãrok eo an Jehovah jibañ kij ilo jerbal in kwalok nan eo?
10 Einwõt Moses, ri kalor ro jinoin an Jesus rar jab lelñoñ kin elõñ ri kijirãt ro air rar alikar. Ri kalor ro an Jesus rar tõmak ilo Anij, im einwõt juõn tokjen, rar maroñ kijenmij ilo matõrtõr eo elap rar iione. Aet, rar etal wõt im kijenmij einwõt air lo Eo reban loe. Rainin, einwõt juõn men eo ekkã ad jelã kake kin kejbãrok eo an Jehovah ej kakajur kij, ej kõmman ad beran im jab mijak ilo jerbal in kwalok nan eo ad kin Ailiñ eo. Nanin Anij ej ba bwe “mijõk armij ej bõktok juõn jen; a eo ej liki Jeova, ejelok an uota.” (Jabõn Kennan Ko 29:25) Tokjen menin, jejjab jenliklik ilo mijak matõrtõr; im bareinwõt jejjab jook kin jerbal in kwalok nan eo ad. Tõmak eo ad ej kamakit kij ñan kennan ilo beran ñan ro ri turid, ri jerbal ro mõttad, ri school ro mõttad, im ro jet.—Dri Rom 1:14-16.
Eo Reban Loe Ej Tel Armij ro An
11. Ekkar ñan Peter im Jude, ewi wãwen an kar jet ro rar kobalok ibben congregation eo an Christian kalikar juõn jabwe ilo mour in jitõb?
11 Tõmak ej jibañ kij ñan ad lo Jehovah einwõt eo ej tel dolul eo an ijin ion lal. Kin menin jej bõprae juõn lemnak in notaiki ro rej bõk eddo ilo congregation eo. Erro jimor ri jilek Peter im Jude leo jein im jatin Jesus rar kakkõl kin ro jet me kin an jabwe mour in jitõb eo air rar konono nana nae maan ro rar tel ibwiljin Christian ro. (2 Piter 2:9-12; Jude 8) Kain armij rot in rej ruruwe ren kar konono ke ilo wãwen in elañe Jehovah ear bed im alikar ñan mejeir? Ebin air naj kar! Ak kinke reban lo Anij, armij rein ilo kanniek rar likjap in lemnak kin eddo eo air ñan e.
12. Ta lemnak eo jej aikwij kalikar ñan ro rej tel ilo congregation eo?
12 Emol, congregation eo an Christian ej ejaak in armij jab wãppen. Ro rej jerbal einwõt elder ro rej kõmman bwid im jet ien emaroñ jelet kij make. Mekarta, Jehovah ej kajerbal maan rot in einwõt shepherd ro an bwij eo an. (1 Piter 5:1, 2) Maan im kõrã ro reritto ilo jitõb rej kile bwe eñin juõn wãwen eo Jehovah ej kajerbale ñan tel armij ro an. Kin menin, einwõt Christian ro, jej bõprae ad bõk juõn jitõb in abõnõnõ im kwalok kautiej kin men eo Anij ear karõke ñan tel armij ro an. Ad bokake ro rej tel ibwiljid, jej kwalok bwe jej lo Eo reban loe.—Dri Hibru 13:17.
Lo Anij Einwõt Ri Katakin eo Elap Ad
13, 14. Lo Jehovah einwõt Ri Katakin eo Elap ta melelen ñan yuk?
13 Ebar wõr juõn jikin eo ej aikwiji lolokjen eo ilo jitõb. Isaiah ear kanan: “Mejam ej aikwij oktak im lo Ri Katakin eo Elap am.” (Isaiah 30:20, NW) Ej aikwij wõr tõmak ñan kile bwe Jehovah ej e eo ej katakin kij ikijen dolul eo an ion lal. (Matu 24:45-47) Lo Anij einwõt Ri Katakin eo Elap ad elaplok melelen men in jen ad bõk wõt mantin katak Bible ko remõn im ekkeini bed ilo kwelok ko an Christian. Ej melelen ad lukkun kortokjen menin letok ko ilo jitõb an Anij. Ñan wanjoñok, jej aikwij kanuij lale elaplok jen mokta ialin tel eo Jehovah ej letok ikijen Jesus bwe jen jab jebwãbwe ilo jitõb.—Dri Hibru 2:1.
14 Jet ien ej bõk jibadbad eo einjuõn ñan bõk tokjen ilo likieoin jen mõñã eo ilo jitõb. Ñan wanjoñok, jemaroñ iten baj lale wõt jidik im wõnmanlok wõt jen jet bwebwenato ko ilo Bible me jej lo ebin ad melele. Ñe jej read Imõniaroñroñ im Awake! magazine ko, bõlen jej kijone im ellãlok jen ad readi jet katak ko kinke unintel in konono eo ejjab kaitoklimoid. Ak jemaroñ kõtlok bwe lemnak ko ad ren mad ilo kwelok ko an Christian. Bõtab, jemaroñ bed wõt ilo ad kanuij lale elañe jej lukkun kõmmanwa im lale point ko rej konono kaki. Kamolol eo ad emũlal kin katak eo ilo jitõb jej bõke ej kwalok bwe jej kile Jehovah einwõt Ri Katakin eo Elap ad.
Jej Aikwij Lelok Juõn Nan kin Kij Make
15. Ewi wãwen an kar jet emmakit im einwõt ñe rar jab alikar ñan Jehovah?
15 Elaptata kinke nana elap an lap ilo ien in “ien jemlokin,” tõmak ilo Eo jeban loe elap an aorõk. (Daniel 12:4, NW) Jab mol im mour in lũñ rej jededlok. Bwebõta, ej menin meletlet ñan kememej bwe Jehovah ej lale kõmman ko ad meñe armij rejjab maroñ lo kij. Jet rar luji air jelã kin mol in. Ñe ro jet rejjab lo ir, remaroñ bõk kunair ilo mwil ko rejjab ekkar ñan jeje ko. Ñan wanjoñok, jet rar jab jumae kabo eo ñan lale menin kamõnõnõ ko renana im pija in kelwan ko ilo Internet, television, im wãwen ko jet rekãl ilo ran kein. Ke armij eo emaroñ bõk kunan ilo kain men rot kein ilo an juõn makelok ian, jet rar kõmman einwõt ñe mwiliir ear jab alikar ñan Jehovah.
16. Ta eo en jibañ kij ñan errã ibben kien ko reutiej an Jehovah?
16 Emõn likit ilo lemnak eo ad nan kein an ri jilek Paul: “Inem jabrewõt iar e naj lelok nan kin e mõke ñõn Anij.” (Dri Rom 14:12) Jej aikwij jelã bwe jabdewõt ien jej jerawiwi, jej jerawiwi nae Jehovah. Ad jelã menin en kar jibañ kij bokake kien ko an reutiej im ñan bõprae mwil ko retton. Bible eo ej kakememej kij: “Im ejelok men in kõmõn e jab alikar ñõn E, a men otemjej re kelwan im bellok iman mejen Eo ej bebek kij. “ (Dri Hibru 4:13) Emol, jej aikwij lelok juõn nan kin kij make ñan Anij, ak ej yokwe eo ad emũlal ñan Jehovah me ej un eo elaptata jej kõmanman ankilan im ñan bokake kien ko an rewãnik. Kin menin jen jerbale meletlet ilo men ko einwõt jokãlet eo ad kin menin kamõnõnõ im mwilid ibben juõn maan ak kõrã ejjab beled.
17. Kin kain itoklimo rot eo Jehovah ej lale kij?
17 Jehovah ej itoklimoen kin kij, ak ejjab melelen menin bwe ej kõttar ad kõmman bwid bwe en maroñ kajeik kij. Jen an eindein, ej lale kij kin an yokwe, einwõt juõn jemen eo ej kõnan lelok jinekjej ñan ajiri ro nejin rej kiblie. Ej menin kainemõn ñan ad jelã bwe Jemed eo ilañ ej mõnõnõ kin tõmak eo ad im ej “lelok jinekjij ñõn ro rej kabukot E”! (Dri Hibru 11:6) Jen jerbale tõmak kin aolepen buruõd ilo Jehovah im “korijer ñõn E kin buru e wãppen.”—1 Kronikel 28:9.
18. Kinke Jehovah ej lale kij im lo tiljek eo ad, ta menin kamol eo jej bõke jen Jeje ko?
18 Jabõn Kennan Ko 15:3 ej ba: “Mejen Jeova rej ber ijoko otemjej; im rej lali ro remõn im ro re nana.” Aet, Anij ej lale armij ro renana im jerbal ibbeir ekkar ñan mwiliir. Bõtab, elañe jej ibwiljin “ro remõn,” jemaroñ liki bwe Jehovah ej lale kõmman ko ad retiljek. Ej menin kakajur tõmak ñan jelã bwe ‘jerbal eo ad ejjab jekdon ilo Iroij’ im bwe eo jeban loe ejamin ‘meloklok jerbal im yokwe eo ad jaar kwalok kin etan’!—1 Dri Korint 15:58; Dri Hibru 6:10.
Kir Jehovah ñan Etale Kij
19. Ta jet ian tokjen ko remõn rej walok jen tõmak eo ad ebin ilo Jehovah?
19 Einwõt ro ri karejaran Jehovah retiljek, jej aorõk ñan e. (Matu 10:29-31) Meñe e jeban loe, emaroñ juõn men emol ñan kij, im jemaroñ kaorõk kõtan eo ad eaorõk ibben. An wõr juõn lemnak eo einwõt in ñan Jemed ilañ ej bõktok elõñ tokjen ko remõn ñan kij. Tõmak eo ad ebin ej jibañ kij ñan bõk juõn buru eo erreo im juõn bõklikit emõn iman mejen Jehovah. Tõmak eo ejelok etao ie ej bareinwõt kabõjrak kij jen ad etal ilo juõn wãwen mour eo ruo mwiañan. (1 Timote 1:5, 18, 19) Tõmak eo ad ejjab makitkit ilo Anij ej likit juõn joñok emõn im emaroñ juõn menin kõketak ñan ro ibelakid. (1 Timote 4:12) Bareinwõt, tõmak rot in ej kabuñburuen Anij, im kalañliñ buruen Jehovah.—Jabõn Kennan Ko 27:11.
20, 21. (a) Etke ej menin kõnan ñan an mejen Jehovah lale kij? (b) Ewi wãwen ad maroñ jerbale Sam 139:23, 24 ñan kij make?
20 Elañe emol ad meletlet, jej mõnõnõ bwe Jehovah ej kejbãrok kij. Jejjab kõnan bwe en lo wõt kij ak jej bareinwõt kõnan bwe en lukkun etale lemnak im kõmman ko ad. Ilo jar, emõn bwe jen kir Jehovah ñan an lukkun etale kij im jelã elañe ewõr ad kõnan en ejjab jimwe. E maroñ lukkun jibañ kij kamadmõde abañ ko ad im kõmman jabdewõt kajimwe ko rej menin aikwij. Ejejjet an kar ri jeje Sam al: “Kwon kalimjek iõ, O Anij, im jela buruõ: Kwon melejoñ iõ im jela lemnok ko aõ. Im Kwon lo elañe jabrewõt ial enana iba: im Kwon tel iõ ilo ial ej ñõn in drio.”—Sam 139:23, 24.
21 David ear eowor bwe Jehovah en let an etale in lale elañe ear wõr jabdewõt “wãwen enana” ilo e. Einwõt ri jeje Sam, jejjab kõnan ke bwe Anij en etale buruõd im lale elañe ewõr makitkit ko ad rebwid? Inem, kin tõmak, jen kajitõk ibben Jehovah ñan an etale kij. Ak ta elañe jej jorrãn kin inebata kin jet bwid ak ewõr jet men ilo kij ej kõmetak kij? Inem jen etal wõt im jar ñan Anij eo ad ej yokwe, Jehovah, im ilo ettã lelok kij ñan ialin tel eo an jitõb kwojarjar eo an im Nanin kakabilek eo an. Jemaroñ liki bwe enaj itok ñan an jibañ kij im naj jibañ kij ñan jibadõk juõn ial eo enaj tellok ñan mour indio.—Sam 40:11-13.
22. Ta eo ej aikwij bebe eo ad kin Eo reban loe?
22 Aet, Jehovah enaj kajerammõn kij kin mour indio elañe jej tõbar menin aikwij ko an. Bwebõta, jej aikwij kamol kajur im maroñ eo an, einwõt ri jilek Paul ear kõmmane ke ear je: “Kiõ ñõn Kiñ eo Ej mour wõt jen in drio ñõn in drio, e jab wabõnbõn im je ban lo E, eo E mõke wõt Anij, nebar im aibujuij in drio im in drio. Amen.” (1 Timote 1:17) Ien otemjej jen kalikar eñjake in buru rot in ñan kautiej Jehovah. Im jekdon ta eo emaroñ walok, jen jab ebbolol ilo bebe eo ad ñan etal wõt im kijenmij einwõt ad lo Eo reban loe.
Ewi Wãwen Am Naj Kar Uak?
• Ewi wãwen an armij maroñ lo Anij?
• Elañe Jehovah ej juõn eo emol ñan kij, enaj ewi wãwen ad emmakit ñe jej bõk matõrtõr?
• Ta melelen ñan lo Jehovah einwõt Ri Katakin eo Elap ad?
• Etke jej aikwij kõnan bwe Jehovah en etale kij?
[Pija eo ilo peij 26]
Moses, kin an jab mijak Pharaoh, ear emmakit einwõt ñe ear maroñ lo Jehovah, Anij eo reban loe
[Pija eo ilo peij 29]
Jen jab emmakit im einwõt ñe Jehovah ejjab maroñ lo men eo jej kõmmane
[Pija eo ilo peij 31]
Jej kõnan bukõt jelãlokjen eo kin Anij kinke jej lo e einwõt Ri Katakin eo Elap ad