Moses—Juon Em̦m̦aan me Ekajoor Tõmak eo An
TA IN TÕMAK?
Ekkar ñan Baibõl̦, “tõmak ej ãinwõt lõke kõn men ko jej kõjatdikdik kõj kaki, im reel bũruod kõn men ko jejjab loi.” (Hibru 11:1) Juon eo ewõr an tõmak ej lõke bwe Anij enaaj kajejjet kallim̦ur ko an.
EWI WÃWEEN MOSES EAR KWAL̦O̦K AN TÕMAK?
Moses ear kõm̦m̦ani pepe im jokãlõt ko me rar kwal̦o̦k an tõmak ilo kallim̦ur ko an Anij. (Jenesis 22:15-18) Meñe ear l̦ap an jeraam̦m̦an im m̦weiie ke ear mour ilo Ijipt, bõtab ear ilo̦k jãn aolep men kein. Ear “l̦õmn̦ak bwe an eñtaan ippãn ro doon Anij em̦m̦an jãn m̦õn̦õn̦õ ko an jerawiwi me rej ñan jidik wõt iien.” (Hibru 11:25) Moses ear ke ajl̦o̦k tokãlik kõn pepe eo an? Ear jab. Baibõl̦ ej ba bwe Moses ear “kijenmej ãinwõt an lo Eo reban lo E.” (Hibru 11:27) Pepe ak jokãlõt eo an Moses ear itok jãn an lukkuun tõmaki kallim̦ur ko an Anij. Moses ear jab ajl̦o̦k kake pepe in an.
Moses ear kõn̦aan kakajoor tõmak eo an ro jet. Ñan waanjoñak, l̦õmn̦ak m̦õk kõn iien eo Ri Israel ro rar l̦õmn̦ak bwe ejjel̦o̦k ial̦ in aer ko ke rar pãd iturin Lom̦al̦o Ekilmir im ri tarin̦ae ro an Pero rar lukwarkware er. Kõn aer lõl̦ño̦ñ kõn men eo ej pojak in wal̦o̦k, rar lam̦õj im kajjitõk jipañ ippãn Jeova im Moses. Ta eo Moses ear kõm̦m̦ane?
Moses emaroñ kar jab jel̦ã bwe Anij ear pojak in kõjepel lom̦al̦o eo bwe en pel̦l̦o̦k ial̦ in an Ri Israel ro ko. Bõtab, Moses ear lõke bwe Anij enaaj kar baj wõt lo̦mo̦o̦ren im kõjparok armej ro An. Im ear kõn̦aan bwe Ri Israel ro ren bar tõmak men in. Baibõl̦ ej ba: “Im Moses ear uwaak im ba, ‘Kom̦win jab lõl̦ño̦ñ! Kom̦win jutak pen im kom̦ naaj lo wãween an Irooj naaj lo̦mo̦o̦ren kom̦ rainin.’” (Exodus 14:13, UBS) Moses ear ke lo tõprak ilo an kar kakajoor tõmak eo an Ri Israel ro? Ilo m̦ool, Baibõl̦ ej ba: “Kõn tõmak rar etal iol̦apen Lom̦al̦o Ebũrõrõ ãinwõt ioon ãne emõrã.” Mel̦el̦ein men in bwe ear jab baj Moses wõt ear kwal̦o̦k an tõmak ak kar bar aolep ri Ri Israel ro. (Hibru 11:29) Aolep armej ro rar bõk tokjãn jãn tõmak eo an Moses.
TA KO JEJ KATAK JÃN MOSES?
Jemaroñ anõke Moses ilo ad kõm̦m̦ani pepe ak jokãlõt ko me rej kaalikkar ad tõmaki kallim̦ur ko an Anij. Ñan waanjoñak, Anij ej kallim̦ur bwe enaaj kabwe aikuj ko ad ñe jej likũt men ko ekõn̦aan m̦oktata ilo mour ko ad. (Matu 6:33) Jet iien elukkuun pidodo ad kõn̦aan bwe jen m̦weiie kõnke eñin ej men eo elõñ rej kõttõpare rainin. Bõtab, jejel̦ã bwe ñe jej kate kõj ñan likũt Jeova m̦oktata ilo mour ko ad, enaaj kabwe aolep aikuj ko ad. Ej ba: “Ijamin likũt eok, im Ijamin ilo̦k jãn kwe indeeo.”—Hibru 13:5.
Jej bareinwõt kate kõj ñan jipañ ro jet bwe en kajoorl̦o̦k tõmak eo aer. Ñan waanjoñak, ro jemen im jinen rej aikuj katakin ro nejier ñan tõmak ilo Anij. Ilo an ajri ro rũttol̦o̦k, rej aikuj jel̦ã bwe ewõr Anij im bwe ej katakin kõj ñan jel̦ã ta men ko rem̦m̦an im ko renana. Bareinwõt, rej aikuj mel̦el̦e im tõmak bwe mour eo aer enaaj lukkuun em̦m̦an el̦aññe rej pokake kien ko an Anij. (Aiseia 48:17, 18) El̦ap an naaj ajri ro jeraam̦m̦an el̦aññe ro jemãer im jineer rej jipañ er ñan tõmak bwe “ewõr Anij, im bwe e eo ej lel̦o̦k jinõkjeej ñan ro rej pukote.”—Hibru 11:6, UBS.