Devil eo Elaplok Jen Baj Tõmak ilo Mantin Kajitõbtõb
“Ijoko jabdewõt ilo Kalimur Ekãl ewõr juõn lakabwokbwok ikõtan kajur ko an Anij im kin emõn, ilo juõn wãwen, im ko an nana Satan ej teli, ilo wãwen eo juõn. Menin ejjab lemnak eo an juõn ak ruo ri jeje Bible ro, ak ej men eo ekkã jelã kake. . . . Inem menin kamol eo ilo Kalimur Ekãl ealikar. Satan ej juõn men eo emol an bed im enana, ien otemjej ej ri kijirãt ñan Anij im ñan armij ro an Anij.”—“The New Bible Dictionary.”
INEM, etke elõñ ro rej ba rej Ri Christian—im rej ba bwe rej tõmak Bible eo—rej kajekdon lemnak in bwe elukkun wõr juõn Devil eo ej bed? Kinke, ilo mol, rejjab bõk Bible eo bwe ej einwõt Nanin Anij. (Jeremiah 8:9, New World Translation) Ri jeje Bible ro, rej ba, rar kwalok lemnak ko an ailiñ ko ibelakiir im ear jab jimwe air tilmake mol eo jen Anij. Ri Kabel in Catholic eo Hans Küng, ñan wanjoñok, ej je: “Bwebwenato in lemnak ko an armij kin Satan ibben legion in demon ro . . . ear ejaak jen bwebwenato ko an Ri Babylon ñan loan kabuñ in Judaism eo mokta im jen ijo ñan loan Kallimur Ekãl.”—On Being a Christian.
Ak Bible eo ejjab nan an armij; emol ej Nan in kakõrmol an Anij. Kin menin, ej menin meletlet, ñan lukkun bõk ta eo ej ba kin Devil eo.—2 Timote 3:14-17; 2 Piter 1:20, 21.
Ta eo Jesus Ear Lemnake?
Jesus Christ ear tõmak bwe emol ewõr juõn Devil. Jesus kar jab kabo e jen juõn nana eo ear bed iloan e make. Juõn mol in armij ear tarinaik e eo ear naetan tokelik “iroij in lõl in.” (Jon 14:30; Matu 4:1-11) E ar bareinwõt tõmak bwe menin kõmanman in jitõb ko jet rar rejetake Satan ilo kilten ko an renana. E ar kemour armij ro “dimon e ar miok na enbwinin.” (Matu 12:22-28) Ke Jesus ear konono kin Devil eo im demon ro an, ear jab eliji tõmak ko an mantin kajitõbtõb kar bõki mantak jen bwebwenato eo an armij in Babylon. E ar jelã bwe rar lukkun bed.
Ekkar ñan Jon 8:44, Devil eo, juõn ãt eo melelen “ri ruruwe,” kar juõn “dri riõp, im jemen riõp.” E kar menin kõmanman eo jinointata ñan riap kin Anij, im ear kõmman eindein ilo jikin kallip eo ilo Eden. Jehovah ear ba bwe jemed im jined ro jinointata renaj kar “mij otem mij” elañe rar mõñã jen wijki in jelã emõn im nana eo. Ikijen loñin juõn serpent, Satan ear ba bwe nan kein rar jab mol. (Jenesis 2:17; 3:4) Ejejjet, kar naetan “serpent e ridto, naetan devil im Setan.”—Reveles̃õn 12:9.
Ilo Jon 8:44, Jesus ear bareinwõt ba bwe Devil eo kar “dri uror jen jinoin” im bwe “e jab jutõk ilo mol.” Ejjab melelen menin bwe Jehovah ear kõmanman Devil eo einwõt juõn “dri uror.” Kar jab kõmanman e ñan an einwõt juõn kain menin mour ekamijak ñan bõk eddon juõn jikin kijeek im eñtan ñan jabdewõt eo ej jumae Anij.
Devil eo ilo jinointata ear bed “ilo mol eo.” Juõn ien ear mõttan family eo an Jehovah ilañ einwõt juõn jitõb wãppen nejin Anij. Ak ear jab “jutak bin ilo mol eo.” E ar kõnan ial ko an make im kien ko an make me rar bedbed ion riap. “Ijjino eo an einwõt Devil eo im juõn ri uror ear,” jab ilo ien eo ke kar kõmanman e einwõt juõn enjel nejin Anij, ak ke ear kõnan jumae Jehovah im riap ñan Adam im Eve. Satan ear oktak im juõn “dri uror” ke ear jumae im oktak im bõk eddon mij eo an Adam im Eve im, ilo mol, aolepen family eo an armij.—Dri Rom 5:12.
Devil eo Ej Ri Kijirãt eo Ebin Anjo Jene
Devil eo ej juõn ri kijirãt eo ebin anjo jene. Ej “einwõt laiõn e rorror, ej etetal wõt im bukot eo ej maroñ in kõñi.” (1 Piter 5:8) E ejjab juõn wãwen nana eo ejjab alikar eo ej bed ilo enbwinid eo ejjab wãppen. Emol, jej kate kij ran otemjej nae kõnan ko ad rejerawiwi im jej itok wõt in kõnan kõmmani. (Dri Rom 7:18-20) Ak kate eo emol ej “iben jaran jitõb renana ijo ko i lõñ.”—Dri Epesõs 6:12.
Ewi joñan an jededlok kareelel eo an Devil eo? “Aolepen lõl ej berwõt ilo dri nana eo,” ri jilek John ej ba. (1 Jon 5:19) Bwebõta, jejjab kõnan bwe jen oktak im mad ibben Devil eo ak kõtlok bwe mijak eo ilo jitõb kin e en kakãik kij. Ak, e men in meletlet, ñan ad bed wõt im ekkõl kin jibadbad ko an ñan kabiloik kij kin mol eo im rupe tiljek eo ad ñan Anij.—Job 2:3-5; 2 Dri Korint 4:3, 4.
Bõprae an bidodo an Satan mone kij ikijen jerbale jabdewõt men eo ej ekkeijaklok ibben jerbal in anijnij. (Duteronomi 18:10-12) Kwon juõn ri katak eo emõn an niknik ilo Nanin Anij, im kememej bwe Jesus Christ ear eliji an jitõñlok ñan Nanin Anij ke Devil eo ear kabo e. (Matu 4:4, 7, 10) Bareinwõt, jar ñan Jehovah ñe kwoj eñjake am bed iumin ijjibed ilo jet wãwen ko jen Devil eo im demon ro an.—Dri Pilippai 4:6, 7.
Ejjab aikwij wõr lelñoñ kin Devil eo. Jehovah ej kallimur kin kejbãrok eo emol nae jabdewõt men eo Satan emaroñ kõmmane. (Sam 91:1-4; Jabõn Kennan Ko 18:10; Jemes 4:7, 8) “Komin bin ilo Iroij, im ilo kajur in maroñ eo An,” ri jilek Paul ej ba. Inem kom naj “maroñ in jutõk mae etao ko an devil.”—Dri Epesõs 6:10, 11.