“Komin Jumae Devil” einwõt Kar Jisõs
“Komin jumae devil im e naj ko jen kom.”—JEM. 4:7.
1. Ta jumae eo Jisõs ear jela bwe enaj kar jelmae ion lõl, im ta jemlokõn?
JISÕS KRAIST ear jela bwe enaj kar iion jumae jen Devil eo. Ear alikar men in jen men eo Anij ear ba ñõn serpent eo me ilo mol ear jitõb eo enana im ear jumae. Ear ba: “I naj likit kijirãt ikõtam im kõra eo [rolul eo ilõñ an Jeova] im ikõtan ineõm im inen: [Jisõs Kraist] e naj kokkure bõrõm, a kwo naj kokkure jimwin neen.” (Jen. 3:14, 15; Rev. 12:9) Melelen naj kokkure jimwin neen Jisõs, eñin bwe enaj kar iñtan iomin jidrik wõt ien. Ear jejit men in kinke meñe rar mõne ilo ien eo ear ber ion lõl, Jeova ear kajerkakbiji e ñõn bõk aibujuij ilõñ. Ak kin kokkure bõran serpent eo ear melelen bwe Devil enaj mij.—Riit Jerbal 2:31, 32; Dri Hibru 2:14.
2. Etke Jeova ear liki bwe Jisõs enaj kar lo tõbrõk ilo an jumae Devil eo?
2 Jeova ear liki bwe Jisõs enaj kar lo tõbrõk ilo an kajejit jerbal eo an im jumae Devil eo ñe enaj ber ion lõl. Etke Jeova ear maroñ jela men in? Kinke ear kõmõnmõn Jisõs ilo lõñ jen jinoin, im ear lo e im jela bwe “dri mejerik” in im “manjien, im eutiej jen menin kõmõnmõn ko otemjej” ear bokake im etiljek. (Ken. 8:22-31; Kol. 1:15) Inem ke ear jilkintok Jisõs ñõn lõl im kõtlok bwe Devil eo en melejoñ e ñõn mij, Anij ear liki bwe eo Nejin ej mõke wõt enaj kar bõk anjo.—Jon 3:16.
Jeova ej Kejbãrok Ro Dri Korijeran
3. Ewi lemnok eo an Devil eo kin ro dri korijeran Jeova?
3 Jisõs ear jitõñlok Devil eo ñõn “iroij in lõl in” im ear kakkõl ro dri kaloran bwe renaj bõk matõrtõr, einwõt kar e. (Jon 12:31; 15:20) Lõl in me ej ber iomin kajur eo an Setan Devil eo, ej drike dri Kristian ro remol kinke rej korijer ñõn Jeova im kin air dri kwalok ro rewãnik. (Mat. 24:9; 1 Jon 5:19) Devil eo elaptata an kõjjeroro bwen dri kabit ro me ejjabto jen kiõ renaj iroij iben Kraist ilo Ailiñ eo ilõñ. Setan ej bareinwõt kõjjeroro elõñ ian dri Kennan ro an Jeova me kejatdrikdrik eo air ej ñõn mour indrio ilo paredais ion lõl. Nan in Anij ej kakkõl kij: “Dri kijirãte kom, devil eo, einwõt laiõn e rorror, ej etetal wõt im bukot eo ej maroñ in kõñi.”—1 Pit. 5:8.
4. Ta eo ej kamol bwe ro dron Anij rar lo tõbrõk ilo air jumae Devil eo ilo ran kein ar?
4 Einwõt juõn rolul me Jeova Anij ej rejetake, jej lo tõbrõk ilo ar jumae Devil eo. Lemnok kin wãwen kein: Ilo 100 yiõ ko remotlok ñõn kiõ, jet ian iroij ro relej ilo bwebwenato rar kajeoñ jolok aolep dri Kennan ro an Jeova. Ak oran dri Kennan rein ear edreklok wõt im kiõ ej tõbar enañin 7,000,000 ilo elõñlok jen 100,000 congregation ko ibelakin lõl. Iroij ro relej me rar matõrtõr ro dron Jeova ir eo rejoko!
5. Ewi wãwen Aiseia 54:17 ear jejit kitien ikijen dri korijer ro an Jeova?
5 Anij ear kalimur ñõn jar in Israel eo etto: “Jabrewõt ken tõrinae emwij nawãwen nae yuk, e jamin jerammõn; im jabrewõt lo e naj walok nae yuk ilo ekajet, kwo naj liakelok e. Eñin men in jolit an ro dri korijeran Jeova, im air wãnik ej jen Ña, Jeova ej ba.” (Ais. 54:17) Ej jejit kalimur in ikijen ro dron Jeova ibelakin lõl in ilo ‘ran kein eliktata.’ (2 Tim. 3:1-5, 13) Jej wõnmanlok wõt im jumae Devil eo, im ejelok kein tõrinae me ej kajeoñ in kajerbali ñõn jolok ro dron Anij ej lo tõbrõk kinke Jeova ej ber iber.—Sam 118:6, 7.
6. Ta eo buk in Daniel ej jiroñ kij kin men eo enaj walok ñõn iroij eo an Setan?
6 Ilo jemlokõn jukjuk im ber in enana me emõkaj an itok, aolep wãwen mõtõn ko iomin iroij eo an Setan renaj jebeblok. Ikijen jeje ko rekakõrmol, dri kanan Daniel ear kanan: “Ilo ien an king rein iroij [ilo ran kein ar], Anij in lõñ enaj kajutak juõn ailiñ eo ejamin jebeblok, ak enaj kejebeblok aoleben ailiñ ko jet [kiõ], im enaj bed ñõn indrio.” (Dan. 2:44, UBS) Ñe men in ej walok, iroij eo an Setan im armij ro rejjab wãppen jimor renaj joko. Aolep wãwen ko ilo jukjuk im ber eo an Devil eo renaj joko ñõn indrio, im Ailiñ eo an Anij enaj iroij ilo aolepen lõl im ejelok enaj jumae e.—Riit 2 Piter 3:7, 13.
7. Ewi wãwen ar jela bwe dri korijer ro kajjojo an Jeova remaroñ lo tõbrõk ilo air jumae Devil eo?
7 Ejelok berre bwe rolul eo an Jeova enaj berwõt im enaj wõnmanlok im bõk jerammõn ko ilo jitõb. (Riit Sam Ko 125:1, 2.) Ta kin kij? Baibel eo ej jiroñ kij bwe jemaroñ lo tõbrõk ilo ar jumae Devil eo, einwõt kar Jisõs. Emol, kanan eo Kraist ear letok ikijen dri jilik Jon ej kwalok bwe meñe rej ion jumae jen Setan, ‘jar eo elap’ me kejatdrikdrik eo air ej ñõn mour ion lõl renaj ellã jen jemlokõn jukjuk im ber in. Ekkar ñõn Jeje ko ilo Baibel, rej lamij im ba: “Lomor ñõn amuij Anij eo Ej jijõt ion tron, im ñõn Lam [Jisõs Kraist].” (Rev. 7:9-14) Kar konono kin dri kabit ro kin air bõk anjo jen Setan, im bareinwõt ro mõtair ak ‘s̃ip ro jet’ ikijen air lo tõbrõk ilo air jumae e. (Jon 10:16; Rev. 12:10, 11) Bõtab ñõn lo tõbrõk ilo ar jumae Devil eo ej kitibuj ar kate wõt im niknik ilo jar ñõn bõk ‘lomor jen eo enana.’—Mat. 6:13.
Joñok eo Emõntata ikijen Jumae Devil Eo
8. Ta menin kabo eo moktata Setan ear kajerbale nae Jisõs ilo ene jemaren, im ewi wãwen an kar Kraist uak?
8 Devil eo ear kajeoñ rupe tiljek eo an Jisõs. Ilo ene jemaren, Setan ear kajerbal menin kabo ko ñõn kabo Jisõs bwe en jab bokake Jeova. Bõtab, Jisõs ear likit juõn joñok emõntata ikijen jumae Setan. Elikin an jitlok 40 ran im 40 boñ, ejelok berre bwe Jisõs ear lukkun kõnan mõña. Setan ear ba: “Elañe Nejin Anij kwe, Kwon jiroñ dreka kein bwe ren erom bred.” Ak Jisõs ear makoko in kajerbal kajur eo an jen Anij ñõn bõk tokjen ñõn e mõke. Jen an eindrein, Jisõs ear ba: “Ar jeje, Armij e jamin mour kin bred wõt, a kin nan otemjej rej waloktok jen loñin Anij.”—Mat. 4:1-4; Dut. 8:3.
9. Etke jej aikwij jumae jibarbar ko an Devil eo ñõn kajerbal kõnan ko ar ilo kõniek ilo jab jime?
9 Ranin, Devil eo ej bukot kilen ñõn kajerbal kõnan ko ilo koniek an dri korijer ro an Jeova ilo jab jime. Kin men in, jej aikwij beek ñõn jumae menin kabo ko rej tellok ñõn mour in lũñ, me ekkã an walok ilo lõl in enana. Nan in Anij ej ba ilo alikar: “Ak kom jab jela ke bwe ro re jab wãnik re jamin bõk air jolit ailiñ in Anij? Komin jab bwir; ejelok dri lũñ, ak dri kabuñ ñõn ekjõp, ak dri lejen, ak dri ejej, ak dri Sodom . . . e naj bõk an jolit ailiñ in Anij.” (1 Kor. 6:9, 10) Inem ealikar bwe armij ro rej mour etton im rej makoko in oktõk reban ellã im mour ilo lõl eo ekãl an Anij.
10. Ekkar ñõn Matu 4:5, 6, ta menin kabo eo juõn me Setan ear kajerbale ñõn kajeoñ in rupe tiljek eo an Jisõs?
10 Ikijen juõn ian menin kabo ko Jisõs ear jelmaiki ilo enen jemaren, Baibel eo ej ba: “Devil ej añinliñlok E ñõn iloan jikin kwelok ekwojarjar; im kajijõt E na ion kijmen tempel eo, Im ba ñõn E, Elañe Nejin Anij kwe, Kwon kãlõllok: bwe ar je, E naj jiroñ enjel ro An kin Yuk; im re naj baur Yuk ion peir bwe Kwon jab itak neõm ilo dreka.” (Mat. 4:5, 6) Men in enaj kar einwõt juõn kein kakõle ekabwilõñlõñ bwe Jisõs ej Messaia eo. Bõtab ilo mol, enaj kar juõn men ejjab jime im eutiej buru me Anij eban kar buñburuen kake im jurake. Bar juõn alen, Jisõs ear drebij an tiljek ñõn Jeova im uak ikijen an elij juõn eon. Ear ba: “Ar bar je, Kwon jab kabo Iroij am Anij.”—Mat. 4:7; Dut. 6:16.
11. Ewi wãwen Setan emaroñ kabo kij, im naj ta jemlokõn?
11 Setan emaroñ kabo kij ñõn kabuk nebar ilo elõñ wãwen ko. Emaroñ kajeoñ in karel kij ñõn anõk wãwen an lõl in kalitlit emõke ak bõk kunar ilo menin kamõnõnõ ko me remaroñ jab emõn. Ak elañe jaar kejekron nan in kakabilek ko ilo Baibel im anõk wãwen lõl in, jemaroñ ke kõtmene bwe enjel ro ren kejbãrok kij jen wãwen ko renana renaj walok? Meñe Kiñ Devid ear ukwelok jen jerawiwi ko ear kõmõni me ear kitibuj Bat-shiba, ear jab bõk kejbãrok jen tokjen kõmõn ko an. Jen jab melejoñwe Jeova ilo wãwen ko rejjab jime, einwõt ikijen ar kadrek jimjera iben lõl in.—Riit Jemes 4:4; 1 Jon 2:15-17.
12. Ta menin kabo eo kar kwalok kake ilo Matu 4:8, 9, im ewi wãwen an kar Nejin Anij emmakit?
12 Bar juõn menin kabo me Devil ear kajerbale ilo ene jemaren ear kitibuj an kar lelok ñõn Jisõs kien ko an lõl. Setan ear kwalok ñõn Jisõs aolep ailiñ ko an lõl in im aibujuij eo air im ba: “Men kein otemjej I naj lewoj ñõn Yuk, elañe Kwo naj bero im kabuñ ñõn iõ.” (Mat. 4:8, 9) Ear juõn kabo enana ñõn bõk kabuñ eo ej tellokin wõt Jeova im ñõn kareel Jisõs bwe en jab tiljek ñõn Anij! Ilo an lemnok kin kõnan eo bwe ren kabuñ ñõn e, enjel eo me ilo jinoin ear tiljek ear bo ilo jerawiwi kin an kibbon im ear erom dri nana eo Setan Devil eo. (Jem. 1:14, 15) Bõtab ilo okõtõn, Jisõs ear beek ñõn drebij an tiljek ñõn Jemen ilõñ, kin men in ear ba: “Kwon ilok, Setan: bwe ar je, Kwon kabuñ ñõn Iroij am Anij, im kwon jerbal ñõn E wõt.” Ilo wãwen in, Jisõs ear bar jumae Devil eo ilo alikar. Nejin Anij ear jab kõnan mõtõn lõl eo an Setan im ejamin kar kabuñ ñõn eo enana!—Mat. 4:10; Dut. 6:13; 10:20.
“Komin Jumae Devil im E Naj Ko Jen Kom”
13, 14. (a) Ikijen an kar kwalok ñõn Jisõs aolep ailiñ ko an lõl, ta eo Devil ear lelok ñõn e? (b) Ewi wãwen Setan ej kajeoñ kokkure kij?
13 Ilo an kwalok ñõn Jisõs aolep ailiñ ko an lõl, Devil eo ear kõnan lelok ñõn e kajur eo me ejañin kar or iben jabrewõt armij. Setan ear kõtmene bwe men ko Jisõs ear loi renaj kareel e bwe en maroñ erom dri tel eo ekajurtata ion lõl. Ranin, Devil eo ejjab letok ñõn kij ailiñ ko, ak ej kajeoñ in kokkure buruer ikijen men ko jej loi, roñjaki, im lemnok kaki.
14 Lõl in ej ber iomin pein Devil eo. Inem, eor an maroñ ion men ko rej riiti ilo nuuj im buk ko, roñjake im aluiji ilo radio im TV ko. Kin men in jejjab ilbõk bwe men kein reobrak kin mour in lũñ im lej. Menin kareelel ko an lõl in rej kajeoñ kadrek juõn kõnan iber ñõn wia elõñ mweiuk ko meñe jejjab aikwiji. Ilo wãwen kein, Devil eo ejjab bwijrõk jen an kabo kij kin mweiuk ko me rej kareelel ñõn mejer, lojilñier, im lemnok ko ar. Ñe jej abwin aluij, roñjake, im riiti men ko rejjab emõn ekkar ñõn Baibel, einwõt jej ba: “Kwon ilok, Setan!” Ilo wãwen in, jej anõk Jisõs ikijen ar jutõk bin ilo ar karmijete lõl eo enana an Setan. Jej kamol ar jab mõtõn lõl eo an Setan kin wãwen ar beran im kalikar bwe jej dri Kennan ro an Jeova im dri kaloran Kraist ilo jikin jerbal, ilo jikuul, ilo bukwon eo ar, im ibwiljin ro nukuer.—Riit Mark 8:38.
15. Ilo ar jumae Setan, etke jej aikwij wõnmanlok im ekkõl wõt?
15 Elikin an Devil eo kajeoñ kabo Jisõs alen eo kein kajilu ñõn kokkure tiljek eo an ñõn Anij, “devil ej ilok jen E.” (Mat. 4:11) Bõtab, ejjab melelen bwe Setan ear bwijrõk an kabo Jisõs, kinke kar jiroñ kij: “Im ke devil e ar kamwijlok kabo otemjej [ilo ene jemaren], ej ilok jen E mae bar juõn ien.” (Luk 4:13) Ñe jej lo tõbrõk ilo ar jumae Devil eo, jej aikwij kamolol Jeova. Ak jej aikwij bareinwõt kabukot jibõñ eo jen Anij ejjab jemlok an itok, kinke Devil eo enaj bar jeblak bwe en kabo kij mae bar juõn ien emõn iben im ilo ien eo jemaroñ jab kõtmene juõn menin kabo. Inem jej aikwij ekkõl wõt ien otemjej im pojõk ñõn kijenmij ilo ar lelok jerbal eo ekwojarjar ñõn Jeova jekron ta melejoñ ko jej jelmaiki.
16. Ta kajur eo ekanuij lap Jeova ej letok ñõn kij, im etke jej aikwij in jar kake?
16 Ñõn jibõñ kij kin jibarbar eo ar ñõn jumae Devil eo, jej aikwij jar im jenaj bõk jitõb kwojarjar eo an Anij, kajur eo elaptata ijoko ilõñ im ilõl. Enaj kamaroñ kij ñõn kõmõn men ko jeban maroñ kõmõni kin kajur eo ar mõke. Jisõs ear kalimur ro dri kaloran bwe remaroñ bõk jitõb eo an Anij ikijen an ba: “Elañe komeo [dri jab wãppen im einwõt] dri nana, kom jela kijkan lelok men ko remõn ñõn ro nejemi; ta, e jamin lap an Jememiuij i lõñ lelok Jitõb Kwojarjar ñõn ro otemjej rej kajitõk iben ke?” (Luk 11:13) Jen wõnmanlok wõt im jar ñõn Jeova kin jitõb kwojarjar eo an. Kin kajur in ekanuij lap ej ber ilikier jenaj maroñ bõk anjo ilo ar kate kij ñõn jumae Devil eo. Ijellokin ar baj ekkeini im niknik ilo jar, jej aikwij in kõnõk aolepen ken tõrinae an Anij bwe jen “jutõk mae etao ko an devil.”—Ep. 6:11-18.
17. Kain lõñliñ rot eo ear jibõñ Jisõs ñõn jumae Devil eo?
17 Juõn men ear bar jibõñ Jisõs ñõn jumae Devil eo, im emaroñ bareinwõt jibõñ kij. Baibel eo ej ba: “Eo kin lõñliñ ar likit e iman [Jisõs], E ar iñtan ilo drebail, im kejekron jok eo, im E ar jijõt i anbijmaroñõn tron an Anij.” (Hib. 12:2) Jemaroñ bõk ejja kain lõñliñ rot in ikijen ar rejetake iroij potata eo an Jeova, koutiej ãt eo etan ekwojarjar, im reimanlok wõt ñõn jinekjij eo kin mour indrio. Jenaj lukkun mõnõnõ ñe Setan im aolep jerbal ko an rej joko ñõn indrio im ‘ro etã burueir rej jolit ene eo, im rej kalõñliñ ir mõke kin ainemõn elõñlok’! (Sam 37:11) Inem, einwõt kar Jisõs, jen wõnmanlok wõt im jumae Devil eo.—Riit Jemes 4:7, 8.
Ewi Wãwen Kwonaj Uak?
• Ta menin kamol eo bwe Jeova ej kejbãrok ro dron?
• Ewi wãwen Jisõs ear likit juõn joñok ilo an jumae Setan?
• Ilo wãwen it ko kwomaroñ jumae Devil eo?
[Pija eo ilo peij 29]
Jimjera iben lõl in ej kõmõn bwe jen dri kijirãt an Anij
[Pija eo ilo peij 31]
Jisõs ear karmijete aolep ailiñ ko an lõl me Setan ear lelok