Kajerammõn Eo An Jehovah Ej Namweied
“Kejerammõn jen Jeova—ej namweien armij, im E jab kobaik buromõj na iben.”—Jabon Kennan 10:22.
1, 2. Etke mõnõnõ ejjab kobalok ibben men ko remweie?
JIBADÕK jibadbad ko ilo kanniek ej iroij ion tel elõñ million armij ilo ran kein. Ak men ko ilo kanniek rej kõmman ke bwe ren mõnõnõ? “Ijjab maroñ kememej kin juõn ien ke armij ro rar lukkun buromõj joñan wõt kiõ kin wãwen air mour,” The Australian Women’s Weekly ear ba. Ej ba bareinwõt: “Ej juõn men ebwok. Emwij jiroñ kij bwe ej emõntata an ri Australia ro bed kin wõnãn mour, ak mour eo air ejañin emõnlok jen mokta. . . . Bõtab, Elap wõt buromõj air ibelakin ailiñ eo. Lõmaro im limaro jimor rej eñjake bwe ewõr wõt juõn men rej likjap kake ilo mour eo air ak rejjab maroñ lukkun kile ta men eo.” Elap an mol Jeje ko ilo Bible ilo an kalikar bwe mõnõnõ im mour rejjab waloktok jen men ko mweied!—Ekklisiastis 5:10; Luk 12:15.
2 Bible ej katakin kij bwe mõnõnõ eo elaptata ej itok jen jerammõn eo an Anij. Kin men in, Jabõn Kennan 10:22 ej ba: “Kejerammõn jen Jeova, ej namweien armij, im E jab kobaik buromõj na iben.” Ekkã an eñtan walok jen ad kabukõt ilo kibbon mweiuk ko remweie. Ilo ekkar, ri jilek Paul ear kakkõl: “Ro re kanuij kõnan bwe ren dri mweie, re buñ ilo kabo im oujir im elõñ mõm ko re bwebwe im nana, rej kamaloñ armij im kokkure ir ilo jikin joko. Bwe arõk mõnni ej okran nana otemjej, eo ke jet r’ar arõk r’ar jebãbwe jen tõmak im mõke wie ir kin elõñ men in kaburomõj.”—1 Timote 6:9, 10.
3. Etke ri karejar ro an Anij rej bed ilo melejoñ ko?
3 Ilo tu rãjet, jerammõn ko ejelok eñtan ie, rej itok ion aolep ro rej “eoroñ ainiken Jeova.” (Duteronomi 28:2) Bõtab, jet remaroñ kajitõk, ‘Elañe ejelok eñtan ibben jerammõn eo jen Jehovah, etke elõñ ri karejar ro an Anij rej eñtan?’ Bible eo ej kalikar bwe Anij ej kõtlok melejoñ ko ad ak ilo mol rej itok jen Satan, jukjuk im bed eo an enana, im jen jab wãppen ad make. (Jenesis 6:5; Duteronomi 32:4, 5; Jon 15:19; Jemes 1:14, 15) Jehovah ej unjen “men in letok emõn im wãppen otemjelok.” (Jemes 1:17) Inem, jerammõn ko an rejjab kaeñtan kij ñan jidik. Jen lale jet ian men in letok ko rewãppen an Anij.
Nan in Anij—Juõn Men in Letok Ejej Wõnãn
4. Ta jerammõn im men in letok eo ejej uan armij ro an Jehovah rej lañliñ kake ilo “ien jemlokin”?
4 Ikijen “ien jemlokin,” nan in kanan eo an Daniel ej ba: “Jelãlokjen eo emol enaj lap.” Bõtab, Nan kein kar bõk kamol jen nan ko: “Ejelok jabdewõt ri nana enaj melele; ak ro wõt im ewõr air lolokjen renaj melele kaki.” (Daniel 12:4, 10, New World Translation) Baj lemnak mõk! Nan in Anij—nan in kanan ko ilo alikar—rej walok ilo meletlet eo ekwojarjar im ri nana ro rejjab maroñ melele kake, ak Ri Kennan ro an Jehovah rej melele kaki. “Kom mol O Jema, Iroij in lõñ im lõl, Nejin Anij ear jar, “bwe Kw’ar noj men kein jen dri meletlet im dri jelalokjen, im Kw’ar kwaloki ñõn niñniñ ro.” (Luk 10:21) Ej juõn jerammõn elap ñan ad bõk juõn men in letok eo ejej wõnãn kin Nan in Anij, Bible eo, im ñan bed ibwiljin ro me Jehovah ear kajerammõn ir kin lolokjen ilo jitõb!—1 Dri Korint 1:21, 27, 28; 2:14, 15.
5. Ta in meletlet, im ewi wãwen ad maroñ bõke?
5 Jej jamin kar bõk lolokjen ilo jitõb elañe jaar jab bõk “meletlet jen lõñ.” (Jemes 3:17) Meletlet ej maroñ eo ñan kajerbal jelãlokjen im melele ñan namejelan abañ ko, kejbãrok kij jen kauwatata ko, jibadõk mejenkajjik ko, ak lelok nan in kakabilek ko rekeie. Ewi wãwen ad maroñ bõk meletlet jen Anij? Jabõn Kennan Ko 2:6 ej ba: “Bwe Jeova ej letok meletlet; jen loñin ej itok jela im lolokjen.” Aet, Jehovah enaj kajerammõn kij kin meletlet elañe jej kate wõt im jar kin kake, ilo ejja wãwen eo wõt ear lelok ñan King Solomon juõn “buru emeletlet im jelalokjen.” (1 Kiñ 3:11, 12; Jemes 1:5-8) Ñan bõk meletlet, jej aikwij wõnmanlok im roñjake Jehovah ilo ad keini katak im jerbale Nan eo an.
6. Etke ej men in meletlet bwe jen jerbale kien ko im Anij ilo mour eo ad?
6 Wanjoñok ko relap kin meletlet jen lañ jemaroñ loi ilo kien ko ilo Bible. Jej bõk tokjen ko jen men kein ilo wãwen otemjej—ilo enbwin, lemnak, eñjake, im jitõb. Ri jeje Sam ear al ilo ekkar: “Kien Jeova e wãppen im ej karõk an; nan in kalek an Jeova e bin im ej kameletlet ro re jaje. Nan ko an in kaiñi an Jeova re jime im re kalõñliñ buruer; kien ko an Jeova rerreo im rej kamramlok mejer. Mijõk Jeova e kwojarjar, im ej ber ñõn in drio; ekajet ko an Jeova re mol wõt, im ir otemjej rejime otem jime. Re men in yokwe emõn jen gold, im jen elõñ gold re kanuij aurõk.”—Sam 19:7-10; 119:72.
7. Ta enaj walok ñe jej kajettokjen kien ko an Anij?
7 Ilo tu rãjet, ro rej kajettokjen kien ko rewãnik an Anij rejjab lo mõnõnõ im anemkwoj eo rej bukõte. Ejjabto tokelik, rej lo bwe rejjab maroñ kajirere kake Anij, bwe juõn armij enaj madmõd men eo ej jeore. (Dri Galetia 6:7) Elõñ million armij ro rej kajettokjen kien ko an Bible inem rej madmõde elõñ kain jerata ko einwõt bõroru ilo jab kõnan, nañinmij in jiroñ im likao, ak añũre uno ko rejakkar. Elañe rejjab kajimwe ial in mour eo air, ial eo air enaj jemlok ilo mij im jako ilo pein Anij.—Matu 7:13, 14.
8. Etke ro rej yokwe Nan in Anij rej mõnõnõ?
8 Bõtab, ro rej yokwe im kaorõk Nan in Anij im jerbali renaj lo jerammõn ko relap kiõ im ilo ran ko rej itok. Rej bõk kajimwe ilo kien eo an Anij, elap air mõnõnõ, im rej kijoror kin ien eo ñe renaj anemkwoj jen jerawiwi im tokjen ko rekauwatata jene. (Dri Rom 8:20, 21; Jemes 1:25) Kejatdikdik in emol kinke ej bedbed ion men in letok in yokwe eo elaptata an Anij ñan armij—katok in binmour eo an manjen, eo ej Jesus Christ. (Matu 20:28; Jon 3:16; Dri Rom 6:23) Kain men in letok rot in emõntata ej kamol mũlalin yokwe eo an Anij ñan armij im kabin kallimur in jerammõn ko rej indio ñan aolep ro rej wõnmanlok im roñjake Jehovah.—Dri Rom 8:32.
Ewõr Ad Kamolol kin Men in Letok in Jitõb Kwojarjar
9, 10. Ewi wãwen ad bõk tokjen jen men in letok eo ilo jitõb kwojarjar eo an Jehovah? Kwalok juõn wanjoñok.
9 Bar juõn men in letok eo Anij ear letok ilo yokwe im jej aikwij kamolol kake ej jitõb kwojarjar eo. Ilo ran in Pentacost eo 33 C.E., ri jilek Peter ear rejañ jar in armij ro ilo Jerusalem: “Kom otemjej, komin ukwelok ibemi, im baptais ilo etan Jisõs Kraist bwe En julok jerawiwi ko ami, im kom naj bõk men in letok eo, Jitõb Kwojarjar.” (Jerbal 2:38) Ilo ran kein, Jehovah ej letok jitõb kwojarjar eo ñan ri karejar ro an retiljek im rej jar kake im kin ro rej kõnan kõmanmõn ankil an. (Luk 11:9-13) Ilo ien ko etto, kajur eo elaptata iaolepen lañ im lal—jitõb kwojarjar eo an Anij, ak kajur eo ej jerbal,—kakajur lomaro im limaro rej tõmak, koba Ri Christian ro jinoin. (Zechariah 4:6, NW; Jerbal 4:31) Emaroñ kõmman eindein ñan kij, meñe jej jelmae abañ ak aitwerõk ko einwõt armij ro an Jehovah.—Joel 2:28, 29, NW.
10 Lale joñok eo an Laurel, eo ear bõk nañinmij in polio im bedwõt ilo juõn iron lung ak kein jibañ in menono iumin 37 yiõ ko.a Meñe ear bed wõt ilo abañ in, ear jerbal ilo kijejeto ñan Anij mae ien an mij. Iumin aolepen yiõ kein, jerammõn ko relap an Jehovah kar bed ion Laurel. Ñan wanjoñok, ear maroñ jibañ tarrin 17 armij ro ñan bõk jelãlokjen eo ejimwe kin mol in Bible eo, meñe ear bedwõt ilo an bõk jibañ jen iron lung eo 24 awa ko ilo juõn ran! Abañ eo an ej kakememej kij kin nan ko an ri jilek Paul: “Ñe I mõjino, inem I kajur.” (2 Dri Korint 12:10) Aet, jabdewõt tõbrak emaroñ waloktok jen jerbal in kwalok kin news eo emõn, jab jen maroñ im kajur eo ad make, ak ej itok jen jibañ eo an Anij ikijen jitõb kwojarjar, eo me ej lelok ñan ro rej roñjake e.—Aiseia 40:29-31.
11. Ta kadkad ko jitõbõn Anij ej kaddeklok ilo armij ro rej kõnak “armij eo ekãl”?
11 Elañe jej kiblie im roñjake Anij, jitõb eo an ej kaddek ilo kij kadkad ko einwõt yokwe, lañliñ, tõmak, meanwõd, im jatõr. (Dri Galetia 5:22, 23) “Leen jitõb” in ej mõttan “armij ekãl” Ri Christian ro rej likiti bwe en bõk jikin kadkad ko relej rar kwaloki mokta ilo mour eo air. (Dri Epesõs 4:20-24; Aiseia 11:6-9) Kadkad eo eaorõk ñan leen jitõb in ej yokwe, kinke ej juõn “ken lukwoj” eo ewãppen.—Dri Kolosse 3:14.
Yokwe in Christian —Juõn Men in Letok Eo Ñan Kaorõk
12. Ewi wãwen an kar Tabitha im Ri Christian ro jet ilo ebeben eo kein kajuõn kwalok air yokwe?
12 Yokwe in Christian ej bar juõn men in letok eo jen Jehovah—juõn eo jej aikwij kaorõke. Ej bedbed ion kien, ak joñan an lap yokwe elaplok an karuaktok ri tõmak ro ñan don jen mour in kanniek maroñ. (Jon 15:12, 13; 1 Piter 1:22) Ñan wanjoñok, lemnak kin Tabitha, juõn kõrã Christian emõn ilo ebeben eo kein kajuõn. “Kõra in eobrõk kin jerbal ko remõn im mweien tiriamo ko,” elaptata ikijen kõrã ro ejako ro beleir ilo congregation eo. (Jerbal 9:36) Bõlen kõrã rein kar wõr nukiir ilo kanniek, ak Tabitha ear kõnan jibañ im rejañ ir joñan wõt an maroñ. (1 Jon 3:18) Ta joñok eo emõn Tabitha ear kõmmane! Yokwe jimjãn jimjatin ear kamakit Prisca im Aquila ñan ‘bojak in mij’ kin Paul. Bareinwõt yokwe ear kamakit Epaphras, Luk, Onesiphorus, im ro jet ñan jibañ ri jilek eo ke ear bed ilo kalbuj eo ilo Rome. (Dri Rom 16:3, 4; 2 Timote 1:16; 4:11; Pailimon 23, 24) Aet, Ri Christian ro ilo ran kein rej ‘yokwe dron,’ men in ej juõn men in letok eo jen Anij eo ej kalikar ir einwõt ri kalor ro remol an Jesus.—Jon 13:34, 35.
13. Ewi wãwen ad maroñ kwalok ad kamolol kin Christian jimjãn jimjatin eo ad?
13 Kwoj kaorõk ke kadkadin yokwe eo rej kwaloke ilo congregation eo an Christian? Ewõr ke am kamolol kin jimjãn jimjatin ro ad ilo jitõb, ibelakin lal? Rein bareinwõt rej bõk jerammõn im men in letok ko remweie jen lañ. Ewi wãwen ad maroñ kwalok bwe jej kaorõki? Ilo ad jerbal ilo kwojarjar ñan Anij, ilo ad jerbal ilo kwojarjar ñan Anij, bõk kunad ilo kwelok ko an Christian, im ilo ad kwalok yokwe im leen ko jet leen jitõbõn Anij.—Dri Pilippai 1:9; Dri Hibru 10:24, 25.
“Men in Letok” in Armij
14. Ta eo juõn Ri Christian ej aikwiji elañe ekõnan jerbal einwõt juõn elder ak ministerial servant?
14 Christian lõmaro rej kõnan karejar ñan ri kabuñ ro mõttair einwõt elder ro ak ministerial servant ro ewõr juõn mejenkajjik emõn ibbeir. (1 Timote 3:1, 8) Ñan tellokin bõk jerammõn kein, juõn brother ej aikwij bed einwõt juõn eo eritto ilo jitõb, elap an melele kin Jeje ko an Bible im kijejeto ilo jerbal in kwalok nan. (Jerbal 18:24; 1 Timote 4:15; 2 Timote 4:5) Ej aikwij kwalok ettã buru, inemõn, im meanwõd, kin jerammõn kein jen lañ ren jab wãlok, utiej buru, im kijejeto ilo jõkkar. (Jabõn Kennan Ko 11:2; Dri Hibru 6:15; 3 Jon 9, 10) Elañe emwij mare, ej aikwij bed einwõt juõn bõran family eo ej yokwe im emaroñ tel ilo jimwe aolep ro uan family eo ilo mweo imõn. (1 Timote 3:4, 5, 12) Kinke ej kaorõk men ko lor jitõb, kain emaan rot in enaj bõk jerammõn ko jen Jehovah.—Matu 6:19-21.
15, 16. Kar wõn ro “men in letok in armij”? Kwalok wanjoñok ko.
15 Ñe ro rej jerbal einwõt elder ilo congregation eo rej kate ir einwõt ri evanjel, shepherd, im ri katakin armij ro, rej letok ñan kij un ko remõn ñan lukkun kaorõk “maan [rein] einwõt men in lelok ko ilo armij.” (Ephesians 4:8, 11, NW) Ro rej bõk tokjen jerbal eo air ilo yokwe rejjab kwalok air kamolol kin ir aolep ien, ak Jehovah ej lo aolep jerbal ko an elder ro retiljek rej kõmmani. Ejamin meloklok yokwe eo rej kwalok kin etan ilo air karejar ñan armij ro an.—1 Timote 5:17; Dri Hibru 6:10.
16 Lemnak kin wãwen eo juõn elder eniknik eo ear lolok juõn ledik in Christian eo ear bojak in mwijmwij kin nañinmij in kamelij eo an. “Ear kanuij joij, kõketak, im elap an kea,” juõn jeran family eo ear jeje. “Ear kajitõk kin melim ñan jar ñan Jeova. Ke ear jar, jemen ledik eo [ejjab juõn ian Ri Kennan ro an Jehovah] ear mõtato, im den in kemjalal kar torlok jen mejen koba aolep ro rar bed ilo room in hospital eo. Jar eo an elder eo ear lap an joij, im ear lap an Jehovah yokwe kin an jilkintok e ilo kain ien rot in!” Bar juõn Ri Kennan ri nañinmij eo ear ba kin elder ro rar lolok ibben: “Ke rar kebak jikin babu eo an ilo room in intensive care unit, Ijelã bwe jekdon ta eo enaj kar walok tokelik, Imaroñ kar kijenmij kake. Iar kajurlok im ainemõn wõt.” Ewõr ke jabdewõt eo emaroñ wiaik kain jibañ in yokwe rot eo einwõt in? Eban ñan jidik! Ej juõn men in letok jen Anij, ikijen congregation eo an Christian.—Aiseia 32:1, 2.
Men in Letok in Jerbal in Kwalok Nan
17, 18. (a) Ta men in letok in jerbal eo Jehovah ear kabellok ñan armij otemjej? (b) Ta jibañ eo Anij ear letok bwe jen maroñ kamwijlok jerbal eo ad in kwalok nan eo ad?
17 Men in kautiej eo elaptata juõn armij emaroñ bõk ej ñan karejar ñan Jehovah, eo Eutiejtata ilañ im ion lal. (Aiseia 43:10; 2 Dri Korint 4:7; 1 Piter 2:9) Mekarta, jerammõn in kwalok nan ej bellok ñan aolep—ro redik im ritto, maan im kõrã—ro ewõr kõnan eo emol ibbeir ñan jerbal ñan Anij. Kwoj kajerbal ke men in letok in eaorõk? Jet remaroñ jenliklik in bõk jerbal in kinke rej lemnak bwe ejabwe air maroñ, ak rej aikwij kememej bwe Jehovah ej letok jitõb kwojarjar ñan ro rej karejar ñan e, im kabwe jabdewõt men in aikwij ko rej likjap kake.—Jeremiah 1:6-8; 20:11, NW.
18 Jehovah ear lelok jerbal in kwalok nan kin Ailiñ eo ñan ri karejar ro an ettã burueir, jab ñan ro utiej burueir im rej atartar ion maroñ ko air make. (1 Dri Korint 1:20, 26-29) Armij ro rettã burueir im inemõn rej kile joñan maroñ ko air im rej atartar ion jibañ jen Anij ñe rej bõk kunair ilo jerbal in kwalok nan. Bareinwõt ewõr air kamolol kin jibañ ilo jitõb eo ej letoke ikijen “dri kõmñe etiljek im meletlet.”—Luk 12:42-44; Jabõn Kennan Ko 22:4.
Mour in Family eo Elemõnõnõ —Juõn Men in Letok
19. Ta men ko rej tellok ñan ad lo tõbrak ilo katakin im kabwe aikwij ko an ajiri ro?
19 Mour in belele im juõn family elemõnõnõ rej men in letok ko jen Anij. (Rut 1:9; Dri Epesõs 3:14, 15) Ajiri ro bareinwõt rej einwõt juõn “men in jolit jen Jeova,” im rej kalañliñ jemen im jinen ro rej lo tõbrak ilo wãwen air likit kadkad ko rekwojarjar ilo ir. (Sam 127:3) Elañe kwe juõn jemen ak jinen, kwon roñjake wõt Jehovah ilo am katakin ajiri ro nejim ekkar ñan Nan eo an. Ro rej kõmman eindein renaj lo jurak im jerammõn ko remweie an Jehovah.—Jabõn Kennan Ko 3:5, 6; 22:6; Dri Epesõs 6:1-4.
20. Ta eo emaroñ jibañ jemen in jinen ajiri ro me ro nejiir rar ellok jen kabuñ eo emol?
20 Meñe jemen in jinen ajiri ro rej mijak Anij remaroñ kate ir katakin ajiri ro nejiir, bõlen jet ian ro nejiir renaj kãlet im ellok jen kabuñ eo emol ñe rej rittolok. (Jenesis 26:34, 35) Men in emaroñ einwõt juõn men in kabwer ñan jemen im jinen ro. (Jabõn Kennan Ko 17:21, 25) Bõtab, jen air ebwer, emaroñ juõn men in jibañ nan ir bwe ren kememej kin wanjoñok eo an Jesus kin juõn nejin emaan ejerwan. Meñe nejin ear ellok jen mweo im kõtõbrak juõn ial ejerwan, tokelik ear jeblak ñan mweo imõn jemen, eo ear bar bõke ilo lañliñ im yokwe. (Luk 15:11-32) Jekdon ta eo emaroñ walok, Christian jemen im jinen ajiri ro remaroñ tõmak wõt ilo melele eo an Jehovah, yokwe, im rejetak eo an.—Sam 145:14.
21. Jej aikwij roñjake wõn, im etke?
21 Inem, kij kajjojo, jen jek ilo buruõd ta men eo eaorõktata ilo mour eo ad. Jej kijejeto wõt ke ilo ad jibadõk elõñ men ko ilo kanniek, ko me renaj kaeñtan kij im family ko ad? Ak jej jibadõk ‘men in lelok ko remõn im wãppen otemjelok’ rej itok jen “Jemen maram ko.” (Jemes 1:17) Satan, “jemen riõp,” ekõnan bwe jen boub wõt kin men ko ilo kanniek im luji mõnõnõ im mour jimor. (Jon 8:44; Luk 12:15) Bõtab, Jehovah, elap an kea kin kij ekõnan bwe jen bõk men eo emõntata. (Aiseia 48:17, 18) Inem, jen roñjake wõt Jemedwõj eo ej yokwe im ien otemjej “lõñliñ” ilo e. (Sam 37:4) Elañe jej jibadõk kain ial rot in, men in letok ko ejej uan an Jehovah im jerammõn ko relap renaj kamweie kij—im ejelok eñtan ñan jidik ibben.
[Kamelele ko itulal]
a Lale magazine in Awake!, January 22, 1993, page 18-21.
Kwoj Kememej Ke?
• Ia eo jemaroñ lo mõnõnõ eo elaptata ie?
• Ta jet ian men in letok ko Jehovah ej lelok ñan armij ro an?
• Etke jerbal in kwalok nan ej juõn men in letok?
• Ta eo jemen im jinen ajiri ro rej aikwij kõmmani ñan bõk jerammõn eo an Anij ñe rej kibel ajiri ro nejiir?
[Pija eo ilo peij 14]
Ewõr ke am kamolol kin men in letok eo an Anij kin Nan eo an emwij jeje?
[Pija eo ilo peij 15]
Meñe elõñ abañ ko, Laurel Nisbet ear jerbal ñan Anij ilo kijejeto
[Pija eo ilo peij 16]
Einwõt Tabitha, Ri Christian ro ilo ran kein rej bõk juõn ãt ebuñbuñ kin jerbal in yokwe ko air
[Pija eo ilo peij 17]
Ewõr an Christian elder ro yokwe kin ri tõmak ro mõttair