Ewi Wãwen Am Maroñ Jibañ Juõn Ajiri Eo “Ejerwan?”

“Lõñliñ bwe . . . e kar joko, im ej walok.”​​—⁠LUK 15:⁠32.

1, 2. (a) Ewi wãwen an jet jodikdik ro kar emmakit ñan mol eo an Christian? (b) Ewi wãwen eñjake eo an jemen im jinen im ajiri ro rej bed ilo wãwen rot in?

“I’J ILOK jen dolul eo an Jehovah!” Ej menin kailbõk ñan ro jemen im jinen rej mijak Anij im rar kate ir kakajiririk ro nejiir ilo ial in Christian ñe rej roñ nan kein jen juõn ajiri! Jodikdik ro jet rej baj “ellãlok wõt ilo air jab ba jabdewõt karõk ko air. (Dri Hibru 2:⁠1) Elõñ iair rej einwõt nejin eo ejerwan ilo parable eo an Jesus, eo ear ilok jen mweo imõn jemen im jerwane menin jolet eo an ilo juõn ene etolok.​​—⁠Luk 15:​11-​16.

² Meñe ejjab aolep Ri Kennan ro an Jehovah ewõr abañ in ibbeir ilo an ajiri eo nejiir ilok jen mol eo, ak ro ewõr abañ in ibbeir, ejelok nan in kainemõn emaroñ jolok aolepen buromõj eo air. Im jejjab likjap in kile jerata eo jodikdik eo ejebwãbwe emaroñ make iione. Ilo tumũlalin buruen, bõklikit eo an emaroñ kabõnõnõik e. Ilo parable eo an Jesus, nejin eo ejerwan eliktata ear “ieñaktok an,” im menin ear kalañliñ jemen. Ewi wãwen an jemen im jinen im ro jet ilo congregation eo maroñ jibañ rein rejerwan ñan ‘ieñaktok eo air’?​​—⁠Luk 15:⁠17.

Etke Jet Ajiri Rej Beek ñan Air Ilok jen Mol eo

3. Ta jet ian un ko unin an jodikdik ro beek ñan air ilok jen congregation eo an Christian?

³ Elõñ buki thousand jodikdik rej karejar ñan Jehovah ilo mõnõnõ ilo congregation eo an Christian. Inem, etke jodikdik ro jet rej ellok? Remaroñ eñjake bwe rej likjap jen men ko lal in ej litoki. (2 Timote 4:​10) Ak remaroñ watõk kejbãrok eo an Jehovah einwõt ellã jen joñan an bin. Juõn bõklikit eo ej eñjake an bwid, juõn itoklimo eo ekajur kin juõn emaan ak kõrã ejjab belen, ak juõn kõnan bwe ro dettair wõt ren buñburueir ibben remaroñ bareinwõt kõmman menin an juõn jodikdik ellok jen bwij eo an Jehovah. Juõn jodikdik emaroñ bõjrak jen an karejar ñan Anij kin men eo einwõt jelã mon an jemen im jinen ak Christian ro jet.

4. Ta eo ekkã an okran men eo ej kõmman an jodikdik ro jebwãbwe?

⁴ Lemnak im mwilin juõn ajiri eo ekiblia ekkã an kakõllan mõjno ilo jitõb, im ej kwalok ta eo ej bed ilo buruen. (Jabõn Kennan Ko 15:13; Matu 12:34) Kin jabdewõt ta unin an juõn jodikdik jebwãbwe, ekkã an okran abañ eo an bedbed ion an ejelok “jelãlokjen eo ejimwe kin mol eo ilo buruen.” (2 Timothy 3:​7, NW) Jen air kõmman bwe kabuñ ñan Jehovah ej juõn manit bajjek wõt, elap tokjen bwe ro redik ren kaddek juõn kõtan eo ebak ibben. Ta eo enaj jibañ ir ñan kõmmane?

Ruaklok ñan Anij

5. Ta eo eaorõk ñan an juõn jodikdik kaddeklok juõn kõtan eo ebak ibben Anij?

⁵ “Komin druaklok ñõn Anij,” ri kalor eo James ear je, “im E naj druakwoj ñõn kom.” (Jemes 4:⁠8) Ñan kõmman eindein, juõn jodikdik ej aikwij bõk jibañ ñan kaddek juõn kõnan kin Nan in Anij. (Sam 34:⁠8) Ilo jinoin enaj aikwij “milk”​​—⁠irinekatak ko ilo Bible. Ak ke ej lañliñ kin Nan in Anij im jino kõnan bõk “ekõn ko rebin,”​​—⁠melele ko remũlal ilo jitõb​​—⁠ejjabto enaj ritto ilo jitõb. (Dri Hibru 5:​11-​14; Sam 1:⁠2) Juõn jodikdik eo ear lukkun lorak ilo wãwen ko ilo lal in ear jino kamolol kin men ko raorõk ilo jitõb. Ta eo ear jibañ e ñan an oktak? Ilo an emmakit ñan juõn nan in rejañ ñan read aolepen Bible, ear kejbãrok juõn schedule im ekkeini an read Bible. Aet, ekkeini read Nan in Anij eaorõk ñan kaddeklok juõn kõtan ebak ibben Jehovah.

6, 7. Ewi wãwen an jemen im jinen ajiri ro maroñ jibañ ajiri ro nejiir ñan ejaake juõn kõnan kin nan in Anij?

⁶ Elap an aorõk bwe ro jemen im jinen ren jibañ ro nejiir kaddeklok juõn kõnan kin Nan in Anij! Meñe rar ekkeini air katak einwõt juõn family, juõn jiroñ ear tel an ibben ri nana ro. Ikijen katak eo an ibben family eo, ej kememej: “Ke Jema ear bõkmantak jet kajitõk ko, iar baj readi wõt uak ko, ak iar jab reilok ñan mejen.” Jen air baj etale wõt katak eo ikijen kajitõk im uak, jemen im jinen ro remeletlet renaj kajerbal kabel in katakin. (2 Timote 4:⁠2) Ñan an lañliñ kin katak eo, jodikdik eo ej aikwij eñjake bwe katak eo ej jelet mour eo an im men ko ej inebata kaki. Etke kwoj jab bõkmantak kajitõk ko rej kajitõk kin lemnak ko an inem kõtlok bwe en kwalok lemnak eo an make? Rejañ ajiri eo ñan an jerbale katak eo komij etale.a

⁷ Bareinwõt, kõmman bwe bwebwenato eo kin Jeje Ko en kemourur. Ñe ekkar, karõk bwe ro redik ren kõmman tieta kin menin walok ko ak drama ko ilo Bible. Jibañ ir ñan lo ilo lemnak eo air jikin eo im wãwen ko ilo ene eo ijo bwebwenato eo ear walok ie. Map ko im chart ko remaroñ menin jibañ. Aet, ilo am lemnak jidik, kwo maroñ kõmman bwe katak eo an family eo en kalimomo im ukoktak. Ro jemen im jinen ren bareinwõt etale kõtan eo air make ibben Jehovah. Ke rej make ruaklok ñan Jehovah, remaroñ jibañ ro nejiir ñan kõmman eindein.​​—⁠Duteronomi 6:​5-7.

8. Ewi wãwen an jar jibañ juõn armij ñan ruaklok ñan Anij?

⁸ Bareinwõt jar ej jibañ juõn armij ñan ruaklok ñan Anij. Juõn jiroñ ear inebata kinke ear jab maroñ kãlet ikõtan wãwen mour in Christian im an tel an ibben ro mõttan me eoktak tõmak ko air. (Jemes 4:​4) Ta eo ear kõmmane? “Ej kab juõn alen,” ear kamol, “I ar lukkun jar ñan Jehovah kin eñjake eo aõ.” E ar bõk jemlok eo bwe Anij ear uake jar eo an ke ear lo juõn jeran ilo congregation eo an Christian eo ear maroñ kwalok buruen ñan e. Ilo an eñjake bwe Jehovah ear tel e, ear jino ejaake juõn kõtan ebak ibben Anij. Jemen im jinen ajiri ro remaroñ jibañ ajiri ro nejiir ilo air kõmanmanlok jar ko air make. Ñe rej jar einwõt juõn family, jemen im jinen remaroñ kwalok ta eo ilo burueir bwe ro nejiir ren maroñ kile lukjak eo ej bed ikõtan jemeir im jineir im Jehovah.

Kwon Meanwõd ak Kwoj Bin

9, 10. Ta joñok eo Jehovah ear likiti ilo an meanwõd ibben Ri Israel ro rar kiblia?

⁹ Ñe juõn jodikdik ej jino an jebwãbwe, emaroñ kajeoñ in kamakelok ian im jumae jibadbad ko an jemen im jinen ñan bwebwenato ibben kin men ko ilo jitõb. Ta eo ro jemen im jinen remaroñ kõmmane ilo kain wãwen rot in ebin? Lemnak kin ta eo Jehovah ear kõmmane ibben Israel in etto eo. E ar kijenmij ibben Ri Israel ro e “kijñiñi kenwair” iumin 900 yiõ ko mokta jen an kar ellok jen ir ilo ial in jumae eo air. (Exodus 34:9; 2 Kronikel 36:​17-​21; Dri Rom 10:21) Meñe rar eliji air ‘melejoñ e,’ Jehovah “ear tiriamo” kake ir. “Elõñ alen E ar kajeor An illu, im E ar jab biuktok aolepen illu eo An.” (Sam 78:​38-​42) Anij ear jab likjap ilo an jerbal ibbeir. Ro jemen im jinen rej yokwe rej anõk Jehovah im kwalok meanwõd ñe ejjab mõkaj an ro nejiir emmakit ñan jibadbad ko air ñan jibañ e.

¹⁰ Air meanwõd ej bareinwõt melelen bwe rejjab jolok kejatdikdik eo bwe kõtan eo enana enaj emõnlok, Jehovah ear likit joñok eo ñan kwalok meanwõd. E ar bõk buñten nee eo mokta ilo an jilkinlok ri keañ ro an ñan ibben Ri Israel ro “elõñ alen.” Jehovah ear “tiriamokake ro dron,” meñe rar “kajirere kake ro dri jilik jen Anij, im kajekron nan ko An.” (2 Kronikel 36:​15, 16) E ar akwelap ibben Ri Israel ro, im ba: “Joij im oktak jen ial ko ami renana.” (Jeremiah 25:​4, 5, NW) Ak, Jehovah ear jab ebbururu kin kien ko an rewãnik. Kar kaiñ Ri Israel ro bwe ren “oktak” ñan Anij im wãwen ko an.

11. Ewi wãwen an jemen im jinen ajiri ro maroñ kwalok meanwõd ak ilo ejja ien eo wõt bin ilo air jerbal ibben ajiri eo ejebwãbwe?

¹¹ Jemen im jinen ajiri ro remaroñ anõk meanwõd eo an Jehovah ilo air jab mõkaj in jolok kejatdikdik eo kin ajiri eo ejebwãbwe. Ilo air jab ebwer, remaroñ bõk buñten nee eo ñan kõmman bwe ial in konono eo ibben don en bellok wõt ak ñan bar jino air konono ibben don. Ke rej eddeb ñan kien ko rewãnik, remaroñ “akwelap im bar akwelap” ibben ajiri eo bwe en jeblak ñan ial in mol eo.

Ñe Bukwelok Juõn Ajiri

12. Ta eddo eo ebed ibben jemen im jinen ajiri ro ñan juõn ajiri eo ej jokwe ibbeir ak emwij bukwelok jen congregation eo?

¹² Ak ta elañe juõn ajiri eo ej jokwe ibben jemen im jinen ej lorak ilo kõmman eo elap an nana im kin an jab kwalok juõn jitõbõn ukwelok rej bukwelok jen congregation eo? Ke ajiri eo ej jokwe wõt ibben jemen im jinen, rej bõk wõt eddo eo ñan katakin im kauweik e ilo errã ibben Nan in Anij. Ewi wãwen air maroñ kõmmane menin?​​—⁠Jabõn Kennan Ko 6:​20-​22; 29:⁠17.

13. Ewi wãwen an jemen im jinen ajiri ro maroñ kajeoñ tõbar buruen juõn ajiri eo ej kõmman bwid?

¹³ Emaroñ​​—⁠ilo mol, naj emõntata​​—⁠ñan lelok nan in katakin im kauwe ñe rej katak Bible ibben don. Jemen ak jinen rej aikwij jab ekajete ikijen an kijñeñe kenwan im kajeoñ in lale ta eo ej bed ilo buruen. Ewi joñan nañinmij eo an ilo jitõb? (Jabõn Kennan Ko 20:⁠5) Remaroñ ke tõbar mõttan eo ilo buruen ebidodo tõbare? Ta eon ko remaroñ kajerbali ilo bolemen? Ri jilek Paul ej kamol ñan kij: “Bwe nan in Anij ej mour im jerbal wõt, im ekõñ jen jabrewõt jãje ruo mejen, im ej wie im bukwe an armij im jitõb, im mokwõj ko im nononmej, im e mõkõj an kili lemnok ko im bebe ko an buru.” (Dri Hibru 4:​12) Aet, jemen im jinen ajiri ro elaplok air maroñ kõmman jen baj jiroñ wõt ro nejiir bwe ren jab bar bõk kunair ilo kõmman nana. Remaroñ jino bõk buñten nee ko im katakin wãwen kilen kejmour.

14. Ta buñten nee eo mokta juõn jodikdik eo ej kõmman bwid ej aikwij kõmmane ñan kajeblak kõtan eo an ibben Jehovah, im ewi wãwen an jemen im jinen maroñ jibañ ajiri eo ñan bõk buñten nee in?

¹⁴ Juõn jodikdik eo ej kõmman bwid ej aikwij bar kajeblak kõtan eo an ibben Jehovah. Buñten nee eo mokta ej aikwij bõke ej ñan “ukwelok . . . im bar oktõk.” (Jerbal 3:​19; Aiseia 55:​6, 7) Ilo jibañ jodikdik eo ilo mweo imwiir ñan an ukwelok, jemen im jinen rej aikwij ‘meanwõd im ilo inemõn kajimwe’ ajiri eo ej jumae. (2 Timote 2:​24-​26) Rej aikwij “kauweik” e ekkar ñan Bible. Nan in Greek eo rej ukõte “kauwe” emaroñ bareinwõt melelen “lelok menin kamol eo ealikar.” (Reveles̃õn 3:​19; Jon 16:⁠8) Kin menin, ñan kauwe, ekitibuj kwalok kein kamol ko ebwe ñan kalikar ñan ajiri eo kin nana in ial eo an. Emol, ejjab bidodo kõmmane menin. Ijo emaroñ jemen im jinen remaroñ kajeoñ in tõbar buruen, ilo air kajerbal jabdewõt wãwen ko rekkar ñan Jeje ko ñan kareel e. Rej aikwij kajeoñ in jibañ e ñan an kile aikwij eo ñan “kitõtõkake nana, im yokwe emõn.” (Amos 5:​15, NW) Emaroñ bar jeblak bwe “en bar lolokjen im kõtlok e jen aujid an devil.”

15. Ta mõttan eo jar ej jerbale ilo kajeblak kõtan eo an eo ej kõmman bwid ibben Jehovah?

¹⁵ Ñan an juõn kajeblak kõtan eo an ibben Jehovah, jar ej juõn men eaorõk. Bwebõta, ejelok juõn ej aikwij “koman kajitõk” kin jabdewõt eo me juõn ien ear tel an ibben congregation eo an Christian ak ealikar an kõmmani manit ko renana im ejjab ukwelok. (1 Jon 5:​16, 17; Jeremiah 7:​16-​20, NW; Dri Hibru 10:​26, 27) Ak, ro jemen im jinen remaroñ kajitõk ibben Jehovah ñan an lelok ñan ir meletlet bwe ren maroñ jerbale wãwen eo. (Jemes 1:⁠5) Elañe juõn jodikdik eo emwij bukwelok ej kalikar an kõnan ukwelok ak ejjab “anemkwoj in konono ibben Anij,” jemen im jinen remaroñ jar im kajitõk bwe elañe Anij ej lo juõn bedbed in jeorlok bwid an ajiri eo, en kõmanman ankil An. (1 Jon 3:​21) An roñ jar kein ej aikwij jibañ jodikdik eo ñan an lo Jehovah einwõt juõn Anij in tiriamokake.b​​—⁠Exodus 34:​6, 7; Jemes 5:​16.

16. Ewi wãwen ad maroñ jibañ ro uan family eo an jodikdik ro emwij bukwelok ir?

¹⁶ Elañe rej bukwelok juõn jodikdik eo ear baptais, rej watõk an ro uan congregation eo “jab kõmao” ibben. (1 Dri Korint 5:​11; 2 Jon 10, 11) Menin emaroñ jibañ e bwe en ‘ieñaktok an’ im jeblak ñan bwij in kejbãrok eo an Anij. (Luk 15:17) Bõtab, meñe ej roltok ñan dolul eo an Anij ak jab, ro uan congregation eo remaroñ rejañ family eo an jodikdik eo kar bukwelok. Jemaroñ aolep bukõt ien ko remõn ñan kwalok “tiriamokake don” im “keni” don.​​—⁠1 Piter 3:​8, 9.

Wãwen An Ro Jet Maroñ Jibañ

17. Ta eo ro uan congregation eo rej aikwij kememej ñe rej kajeoñ in jibañ juõn ajiri eo ejebwãbwe?

¹⁷ Ak ta kin juõn jodikdik eo rar jab bukwelok jen congregation eo an Christian ek ear mõjno lok ilo tõmak? “Ñe juõn ra ej iñtan,” ri jilek Paul ear je, “ra ko otemjej rej iñtan iben.” (1 Dri Korint 12:26) Ro jet remaroñ kwalok air itoklimo ilo juõn jodikdik eo einwõt in. Bwebõta, rej aikwij kejbãrok, bwe juõn jodikdik eo ej nañinmij ilo jitõb emaroñ jelet jodikdik ro jet ilo nana. (Dri Galetia 5:​7-9) Ilo juõn congregation, ritto ro rar kõnan jibañ jet jodikdik ro rar mõjnolok ilo jitõb rar kirtok ir ñan iiaio ko ñan roñjake kajañjañ ko rebuñbuñ. Meñe jodikdik rein rar lore nan in tel ko im lañliñ kin ibben don ko, kareelel eo air ñan don ear etal em tellok ir ñan kabõjrak air koba ibben congregation eo. (1 Dri Korint 15:33; Jud 22, 23) Ta eo emaroñ jibañ kejmour ajiri eo enañinmij ilo jitõb, ejjab iiaio eo ibben don eo ejelok tel eo ilo jitõb ie, ej ibben don eo ej jibañ e ñan kaddeklok juõn kõnan ñan men ko ilo jitõb.c

18. Ewi wãwen ad maroñ anõk lemnak eo an jemen likao eo ejerwan ilo parable eo an Jesus?

¹⁸ Ñe juõn jodikdik eo ear ilok jen congregation eo ej bar itok ñan Kingdom Hall eo ak bed ilo juõn kwelok elap assembly, lemnak kin eñjake eo an. Jej aikwij jab kwalok ke ejja jitõb in karuwainene eo wõt an jemen nejin eo ejerwan ilo parable eo an Jesus? (Luk 15:​18-​20, 25-​32) Juõn jodikdik eo ear ilok jen congregation eo an Christian im tokelik bed ilo juõn district convention ear ba: “Iar lemnak bwe aolep renaj kar kajekdon juõn armij eo einwõt ña, ak brother im sister ro rar kebak iõ im karuwaineneik iõ. Menin ear lap an jelet buruõ.” E ar jino bar katak Bible im tokelik ear baptais.

Kwon Jab Ebwer

19, 20. Etke jej aikwij kejbãrok juõn lemnak emõn kin juõn ajiri ejerwan?

¹⁹ Jibañ juõn ajiri eo e “jerwan” ñan ‘ieñaktok an’ ej aikwiji ad kwalok meanwõd im emaroñ juõn men ebin ñan jemen im jinen im ro jet. Ak jab ebwer. “Iroij [Jehovah] ej jab kemmer kin An kalimur, einwõt jet rej watõk rumij; a Ej meanwõr ñõn kom, im jab kõnan bwe jabrewõt en joko, a bwe ren otemjej itok im ukwelok ibeir.” (2 Piter 3:⁠9) Ewõr ibbed Jeje ko rej kamol ñan kij bwe Jehovah ekõnan bwe armij ren ukwelok im mour. Ilo mol, ear bõk buñten nee eo mokta ilo an kõmman karõk ñan kilajrak armij ñan e make. (2 Dri Korint 5:​18, 19) An meanwõd ear kõmman bwe million armij ren maroñ ieñaktok air.​​—⁠Aiseia 2:​2, 3.

²⁰ Inem, jemen im jinen ajiri ro rej aikwij ke jab kajerbal jabdewõt kilen ko rekkar ñan Jeje ko ñan jibañ nejiir eo ejerwan ñan ieñaktok an? Ilo anõk Jehovah, komin meanwõd ke komij bõk buñten nee ko ñan jibañ eo nejimi bwe en jeblak ñan Jehovah. Eddeb wõt ñan kien ko ilo Bible, im kajeoñ in kwalok kadkad ko kadkadin Jehovah einwõt yokwe, ekajet jimwe, im meletlet ke kwoj jar ñan e ñan jibañ eo an. Einwõt an lõñ ri jumae ro rej emmakit ñan nan in kir eo an Jehovah ñan bar jeblak, ladik eo ak ledik eo nejõm ejerwan emaroñ jeblak ñan bwij in kejbãrok eo an Anij.​​—⁠Luk 15:​6, 7.

[Kamelele ko itulal]

Kwoj Kememej Ke?

• Ta eo emaroñ okran men eo ej kõmman abañ ñe jodikdik ro rej ilok jen congregation eo?

• Ewi wãwen an jodikdik ro maroñ bõk jibañ ñan kaddek juõn kõtan ibben Jehovah?

• Etke jemen im jinen ajiri ro rej aikwij meanwõd ak bin ilo jibañ juõn ajiri eo ejerwan?

• Ewi wãwen an ro ilo congregation eo maroñ jibañ juõn jodikdik eo ejerwan ñan an jeblak?

[Pija ilo page 27]

Konono nan in Anij elap tokjen ñan juõn lokjak eo ebak ibben Jehovah

[Pija ilo page 27]

Jar eo an jemen im jinen ajiri ro jen eñjake in buru emaroñ jibañ ajiri ro nejiir ñan air eñjake lokjak eo ikõtan jemeir im jineir im Jehovah

[Pija eo ilo peij 29]

Karuwaineneik juõn ajiri e ejerwan ñe ej ‘ieñaktok an’

[Pija eo ilo peij 30]

Bõk buñten nee ko ñan jibañ ajiri eo nejõm ñan an jeblak ñan Jehovah