Ro Jemen Im Jinen—komin Katakin Ajiri Ro Nejimi Ilo Yokwe
“Kõmmõni jerbal ko ami otemjej ilo yokwe.”—1 CORINTH 16:14.
1. Ro jemen im jinen kain eñjake rot eo rej bõke ilo ien lotak an niñniñ eo nejiir?
ENAÑIN aolep ro jemen im jinen renaj errã bwe ien lotak an juõn ajiri ej mõttan ian men ko rekanuij kalañliñ. “Ke iar reilok ñan mejen eo nejiõ ej kab lotak,” juõn jinen etan Aleah ear ba, “elap aõ mõnõnõ. Iar lemnak bwe niñniñ eo ear lukkun deeo.” Bõtab, meñe ien lotak an juõn ajiri ej juõn ien ekamõnõnõ, ilo mol emaroñ kainebata ñan ro jemen im jinen ajiri ro. “Aõ inebata,” leo ibben Aleah ear ba, “Elañe iar maroñ jibañ ledik eo nejiõ bwe en bõk anjo ion abañ ko enaj jelmae ilo mour eo an.” Ejja kain inebata rot kein ewõr ibben elõñ ro jemen im jinen me rekõnan katakin ajiri ro nejiir ilo yokwe. Bõtab, Ri Christian ro jemen im jinen me rekõnan katakin ro nejiir ilo yokwe renaj jelmae aitwerõk ko. Ta jet ian aitwerõk ko renaj ione?
2. Ta men in aitwerõk ko ro jemen im jinen rej jelmae?
2 Kiõ jej mour ebak ñan jemlokin jukjuk in bed in. Einwõt an Bible eo kanan kake, bwe lal eo jej bed ie ej obrak kin ro rejjab kwalok yokwe. Bareinwõt, ikõtan ro uan family, armij “re jab yokwe ro nukiir,” im “re jab kamolol, im dri nana, . . . ro re jab kamanwa.” (2 Timote 3:1-5) Air bed ran otemjej ibben ro rej kwalok kadkad kein emaroñ jelet wãwen an ro uan family eo watõk don. Bareinwõt, ro jemen im jinen rej inebata kin likjap ko air make kin air jab kwalok jatõr, ilo air ba juõn men ejjab joij, ak kõmman juõn men ejjab lukkun meletlet.—Dri Rom 3:23; Jemes 3:2, 8, 9.
3. Ewi wãwen ro jemen im jinen remaroñ kakajiririk ajiri ro ñan yokwe Anij im bed ebak ñan e?
3 Meñe aitwerõk kein rej bed, ro jemen im jinen remaroñ kakajiririk ajiri ro nejiir ñan yokwe Anij im bed ebak ñan e. Ewi wãwen ro jemen im jinen remaroñ kõmmane men in? Ikijen air lor nan in kakabilek ko ilo Bible eo: “Men otemjej komij kõmõnmõn, komin kõmõni ilo yokwe.” (1 Dri Korint 16:14) Inem, yokwe ej “ken lukwõj ej kowãppemi.” (Dri Kolosse 3:14) Jen katak mõttan ko jilu kin kadkadin yokwe eo Paul ear kameleleiki ilo letter eo an kein kajuõn ñan Ri Korint ro im jen lale jet wãwen ko rejejjet me ro jemen im jinen remaroñ kajerbali ñe rej katakin ajiri ro nejiir.—1 Dri Korint 13:4-8.
Aikwij eo an Ro Jemen im Jinen ñan Kwalok Meanwõd
4. Etke ro jemen im jinen rej aikwij kwalok meanwõd?
4 Paul ear je: “Yokwe ej meanwõr.” (1 Dri Korint 13:4) Ta unin an ro jemen im jinen aikwij kwalok meanwõd? Enañin aolep ro jemen im jinen rejelã ta unin. Jen lale jet iair. Ejeja an ajiri ro kajitõk juõn wõt alen kin juõn men relukkun kõnan bõke. Meñe juõn jemen ak jinen ej uak im ba jab, ajiri eo enaj bar kajitõk elõñ alen, kinke ekõnan bwe jemen ak jinen en ba aet. Jodikdik ro remaroñ kwalok elõñ un ko unin air kõmman juõn men me rejelã kadede bwe ejjab emõn. (Jabõn Kennan Ko 22:15) Im kij aolep ekoba ajiri ro ekkã ad kõmman bwid.—Sam 130:3.
5. Ta eo emaroñ jibañ ro jemen im jinen ñan kwalok meanwõd?
5 Ta eo emaroñ jibañ ro jemen im jinen ñõn kwalok meanwõd ibben ajiri ro nejiir? Solomon ear je: “Jelalokjen an juõn armij ej kõmõn bwe en rumij an illu.” (Jabõn Kennan Ko 19:11) Ro jemen im jinen remaroñ melele kake mwilin ajiri ro nejiir ikijen air kememej bwe kar wõr juõn ien rar make “konono einwõt ajiri, . . . [im] jelã einwõt ajiri.” (1 Dri Korint 13:11) Kom jemen im jinen ajiri ro, kom nañin kememej ke ien ko ke kom ar dik im kom ar kabõnõnõik jemõm ak jinõm ñan lewõj juõn men ejjab aorõk? Einwõt juõn jodikdik, kwar lemnak ke bwe jemõm im jinõm rar jab melele kin eñjake ko am ak abañ ko kwar ioni? Elañe kwoj kememej, inem kwo jelã kin etke ej eindein wãwen an ajiri ro nejimi makitkit im etke kwoj aikwij kwalok meanwõd ilo am kakememej ir ien otemjej kin bebe ko emwij am kõmmane. (Dri Kolosse 4:6) Ej juõn men aorõk bwe Jehovah ear jiroñ ro jemen im jinen ajiri ro ilo ailiñ in Israel bwe ren “kanuij katakin” ajiri ro nejiir kin kien ko an. (Duteronomi 6:6, 7) Nan eo ilo kajin Hibru “kanuij katakin,” melelen “ñan bar eliji,” “ñan ba elõñ kõtan, elõñ alen,” “ñõn lukkun kalikar.” Men in ej kwalok bwe ibben ro jemen im jinen renaj aikwij im bar kalikar ennan ko air elõñ alen elañe juõn ajiri enaj jerbale kien ko an Anij. Ekkã an aikwiji kain elij rot in ñan katakin ajiri ro kin wãwen mour.
6. Etke ñe juõn jemen im jinen ej meanwõd, ejjab melelen ej kõtlok ajiri ro nejiir ñan kõmmane jabdewõt men rej mõnõnõ kake?
6 Bõtab, juõn jemen im jinen me ej kwalok meanwõd, ejjab melelen rej kõtlok ajiri ro nejiir ñan kõmmane jabdewõt men rej mõnõnõ kake. Nan in Anij ej kakkõl: “A ñe likit ajiri mõke ian, ej kajok jinen.” Ñan bõprae men in jen an walok, ejja jabõn kennan eo wot ej ba: “Ken dreñdreñ im nan in kowe, rej lelok meletlet.” (Jabõn Kennan Ko 29:15) Jet ien, ajiri ro rej lemnak bwe maroñ eo ñan kajeik im kajimwe ir ejjab bed ibben ro jemeir im jineir. Ak family ko rej lor katak ko an Jesus rejjab jerbal einwõt juõn kien an lal eo me armij ro ie rej make bebe kin ewi wãwen kien eo enaj iroij iod. Ejjab melelen bwe maroñ eo an ro jemen im jinen ñan ejaak kien ko ñan tel ro nejiir ej wawa ion an ajiri ro nejiir kowãppeni. Ijellokin men in, Jehovah, einwõt Bõr eo Elap Bõran family eo, ej kamaroñ ro jemen im jinen ñan katakin im kajeik ajiri ro nejiir ilo yokwe. (1 Dri Korint 11:3; Dri Epesõs 3:15; 6:1-4) Emol, bwe kauwe im kajimwe ej ekkejellok ñan mõttan eo kein karuo kin yokwe eo me Paul ear konono kake.
Wãwen eo ñan Lelok Kaje ilo Yokwe
7. Etke ro jemen im jinen rejoij renaj kajeik ajiri ro nejiir, im men in ej kitibuj ta?
7 Paul ear je bwe “Yokwe ej . . . joij.” (1 Dri Korint 13:4) Ro jemen im jinen me rej lukkun yokwe ajiri ro nejiir renaj keini air katakin ir ilo juõn wãwen ejoij. Ilo wãwen in, rej kajeoñe Jehovah. “Iroij ej kajeik eo Ej yokwe e,” Paul ear jeje. Joij im lale bwe kaje rot eo me Bible eo ej konono kake ejjab kinke ear kõmmane juõn men enana. Ej jitõñlok ñan lemnak eo ñe juõn ej bõk katak ko bwe en meletlet. Ta unin ñan lelok kain kaje rot in? “Ro emwij kajeik ir kin kaje rot in” Paul ear je, “rej lo jinekjej in ainemmõn tokelik, kin mour eo ewãnik.” (Hebrew 12:6, 11) Ñe ro jemen im jinen rej katakin ajiri ro nejiir ekkar ñan ankil an Anij, rej kamaroñ ro nejiir bwe ren erom ritto ro rainemõn, im emõn. Elañe ajiri ro rej bõk “kaje an Jeova,” renaj bõk meletlet, jelãlokjen, im lolokjen—men ko rej aorõklok jen silver ak gold.—Jabõn Kennan Ko 3:11-18.
8. Ta jemlok eo ekkã an walok ibben ro jemen im jinen me rej likjap in kajeik ajiri ro nejiir?
8 Ijo tu-rãjet, ejjab juõn men in joij ñe ro jemen im jinen rej likjap in kajeik ajiri ro nejiir. Jehovah ear kakõrmol Solomon ñan je: “Eo ej drebij wõt alal in kaje, ej drike nejin; a eo ej yokwe e, ej kajeik e ilo ien ekar.” (Jabõn Kennan Ko 13:24) Ajiri ro me ejakkeini air bõk kaje, ekkã air jab mõnõnõ im rej lemnak kin kõnan ko air make. Ilo oktan, ajiri ro me jemeir im jineir rejoij im tiriamokake ir ak jab ãliklik in kajeik ir ñe ewõr aikwij, kar emõnlok air katak ilo school, emõnlok air jelã kilen kamao ibben don, im ekkã air mõnõnõ. Inem, ilo mol, ro jemen im jinen me rej kajeik ajiri ro nejiir rej kwalok joij ñan ir.
9. Ta men ko Ri Christian ro jemen im jinen rej aikwij katakin ajiri ro nejiir kake, im ewi wãwen rej watõk aikwij kein?
9 Ta men ko rej kitibuj ñan kajeik ajiri ro ilo juõn wãwen ejoij im yokwe? Ro jemen im jinen renaj aikwij bwebwenato ilo alikar ibben ajiri ro nejiir ta men ko ren aikwij bokake. Ñan wanjoñok, ajiri ro me ro jemen im jinen rej Ri Christian rej katak kin nan in kaiñi ko jen Bible eo jen ke rar dik wõt. Bareinwõt rej katak kin aikwij eo ñan bõk kunair ilo makitkit ko ilo kabuñ eo emol. (Exodus 20:12-17; Matu 22:37-40; 28:19; Dri Hibru 10:24, 25) Ajiri ro rej aikwij jelã bwe men kein rej aikwij kõmmane.
10, 11. Etke ro jemen im jinen remaroñ lemnak kin aikwij ko an nejiir ñe rej kõmman jet kien ko ibben family eo?
10 Ak, jet ien, ro jemen im jinen renaj kõtlok ajiri ro nejiir bwe ren bõk kunair ilo ien rej beek ta aikwij ko renaj lore ilo family eo. Elañe jodikdik ro remaroñ bõk kunair ilo bwebwenato kein kin ta men ko rej aikwij in lore ñe rej bed wõt ilo mweo, bõlen renaj mõnõnõ im bokake. Ñan wanjoñok, elañe ro jemen im jinen rej beek juõn awa in roltok ñan mweo, remaroñ kãlet juõn awa ejejjet bwe ajiri ro ren kõmmane menin. Ak, remaroñ kõtlok ro nejiir ñan kãlet ak kwalok juõn awa im kõtlok bwe ren kamelele ta unin emõn awa in ibbeir. Ro jemen im jinen remaroñ kwalok lemnak ko air make kin awa in roltok eo im kamelele un ko unin air ba bwe awa eo ej ekkar. Elañe rej jab errã ibben don, im ejelok bere bwe men in enaj walok, inem ta eo rej aikwij kõmmane? Jet ien, ro jemen im jinen renaj bebe ñan kõtlok ro nejiir bwe ren jeblak ilo awa eo rekõnan ñe ejjab nae nan in kaiñi ko jen Bible. Men in ej ke melelen bwe ro jemen im jinen rej jolok eddo eo air ñan kõmman bebe ko?
11 Ñan uak kajitõk in, lale ta wãwen eo Jehovah ear kõmmane ilo yokwe ke ear jerbal ibben Lot im family eo an. Elikin an enjel ro ãñinlok Lot, lio belen, im ledik ro nejin jen Sodom, rar jiroñ ir im ba: “Kwon ko ñõn tol en, bwe kwon jab joko.” Bõtab, Lot ear uak im ba: “O, en jab einwõt, aõ Iroij!” Lot ear kajitõk: “Lo, kiõ, jikin kwelok en ebak bwe in ko ñõn e, im erik. O, in ko ñõn ijo (e jab erik ke?)” Kar uak et eo an Jehovah? “Lo, I ar bareinwõt eoroñ yuk kin men in,” ear ba. (Jenesis 19:17-22) Jehovah ear to ke jen an ineki eddo eo an? Ilo mol ear jab! Mekarta, ear jab kajekdon kajitõk eo an Lot im ear beek ñan an kwalok joij ñan e kin men in. Elañe kwe kwoj juõn jemen ak jinen, enaj wõr ke ien ñan am maroñ bõk lemnak eo an nejõm ñe kwoj kõmman jet kien ko ibben family eo am?
12. Ta eo enaj jibañ juõn ajiri bwe en jokane wõt?
12 Bõtab, ajiri ro ren jab aikwij jelã kien ko wõt ak bareinwõt kaje ko elañe juõn ej kokkure kien ko ilo family eo. Elikin air bebe kin kaje ko im emwij kwo wãppen e, rej aikwij in lore im jerbale. Ro jemen im jinen rejjab kwalok joij elañe aolep ien rej kamijak ajiri ro nejiir im ba bwe renaj bok kaje im rejjab kajejjet nan ko air. “Kin an rumij kamol nan in ekajet nae juõn men e nana, inem buruen ro nejin armij re kanuij beran bwe ren kõmõn nana.” (Ekklisiastis 8:11) Emol, juõn jemen ak jinen emaroñ jab kajeik nejiir iman mejen ro jet ak iman mejen ro jeran, inem rej kejbãrok bwe ren jab kajook e. Enaj laplok an ajiri ro debij juõn eñjake ejokane im kautiej ñan yokwe jemeir im jineir ñe rejelã bwe ñe rej ba “Aet” ej melelen aet im “Jab” ej melelen jab—meñe ajiri eo ej tellokin an bõk kaje.—Matu 5:37.
13, 14. Ewi wãwen ro jemen im jinen remaroñ kajeoñe Jehovah ilo ien rej katakin ajiri ro nejiir?
13 Elañe kaje eo enaj walok ilo joij, kaje eo im wãwen air lelok kaje ren walok ekkar ñan ajiri eo me ear kõmman bwid. “Aikwij ko an ajiri ro ruo nejim rar oktak jen don ke rar bõk kaje,” Pam ear kememej. “Tõbrak ko rar walok ñan eo nejiõ, ear jab eindein ibben eo juõn.” Leo belen, Larry ear kamelele: “Ledik eo nejim ritto tata aolep ien ebõt, im ej bokake ilo ien eo wõt ej bõk kaje eo ebin. Bõtab, ledik eo edik nejimro emõkaj an bokake ñe ej baj roñ wõt nan in kaje ko rekajur im ke kimro baj kalimjek wõt e.” Emol, ro jemen im jinen rejoij rej kate wõt ñan melele kain kaje rot enaj wõr tõbrak ie ñan kajjojo ian ajiri ro nejiir.
14 Jehovah ej kwalok joñok eo ñan ro jemen im jinen bwe ejelã kin mõjno im kajur ko air kajjojo. (Dri Hibru 4:13) Ekoba ibben men in, bwe Jehovah ejjab lelok kaje le jen joñan ak ejjab le jen joñan an kõtlok bwe armij ro ren emmakit ekkar ñan kõnan ko air make. Ijellokin, aolep ien ej kajeik armij ro an ñan emõn joñan ‘eddon.’ (Jeremiah 30:11) Kom ro jemen im jinen, kom jelã ke joñan kajur im mõjno ko an ajiri ro nejimi? Kom maroñ kajerbale ke jelãlokjen in ñan katakin im kamineneik ir? Elañe kom maroñ, ami yokwe kin ajiri ro nejimi enaj alikar.
Jibañ Ajiri Ro Nejimi Bwe Ren Konono Jen Burueir
15, 16. Ewi wãwen ro jemen im jinen remaroñ rejañ ajiri ro nejiir ñan konono jen burueir, im ta kõl ko jet ri Christian jemen im jinen ro emwij air lo tõbrak kin wãwen in?
15 Bar juõn mõttan yokwe ej bwe “E jab lõñliñ ilo jerawiwi, a e mõnõnõ kake mol.” (1 Dri Korint 13:6) Ewi wãwen ro jemen im jinen rej katakin ajiri ro nejiir ñan yokwe men ko remõn im remol? Buñten nee eo elap ej ñan rejañ ir ñan konono jen burueir, meñe men ko ajiri ro rej konono kake renaj kaillu ak kabõnõnõik ro jemeir im jineir. Ilo mol, ro jemen im jinen rej lañliñ ñe ajiri ro nejiir rej konono kaki men ko rewãnik im ekkar ñan kien ko rewãnik ilo Bible eo. Jet ien, eñjake eo jen buruen ajiri eo ej kwalok juõn kõnan ejjab jimwe. (Jenesis 8:21) Ewi wãwen ro jemen im jinen remaroñ uak im emmakit? Ilo jinoin, bõlen eñjake ko air enaj kamakit ir ñan kajeik ajiri ro nejiir ilo mõkaj kin air kwalok lemnak ko rejjab jimwe. Elañe ro jemen im jinen renaj emmakit ilo kain wãwen rot in, ajiri ro remaroñ jino konono im kwalok wõt men ko ro jemeir im jineir renaj mõnõnõ kake im jab kwalok eñjake ko air remol. Bõtab, ro jemen im jinen ren aikwij kajimwe ilo mõkaj nan ko ejelok kautiej ie me ajiri ro nejiir rej kwaloke. Ak, ewõr juõn oktak ikõtan katakin ajiri ro kin ewi wãwen ren konono ilo joij, im ñan beek kin ta men ko renaj ba im uak.
16 Ewi wãwen ro jemen im jinen remaroñ rejañ ro nejiir ñan konono jen burueir? Aleah, eo ear konono ilo jinoin katak in ear ba, “Emwij am ejaak juõn kilen konono ibben don im jab illu ak ilbõk ñe ro nejim rej konono men ko rej kaillu ak kailbõk kimro.” Juõn jemen etan Tom ej ba: “Kimij rejañ ledik eo nejimro ñan kwalok an eñjake ñan kim, meñe ear jab errã ibben lemnak eo amro. Kim kar lemnak bwe elañe aolep ien kim ar kabõjrak e ke ear kwalok an make lemnak, enaj barõk im jab katak ñan kwalok men ko jen buruen. Kim ad bõk eñjake eo bwe ilo am eoroñ e ear rejañ e ñan roñjake kim.” Ilo mol, ajiri ro rej aikwij bokake ro jemeir im jineir. (Jabõn Kennan Ko 6:20) Ak ñe rej kwalok burueir im konono ibben don kake emaroñ jibañ ajiri ro nejiir ñan kaddek maroñ eo air ñan kwalok kõmmanwa. Vincent, juõn jemen ewõr emen nejin ear ba: “Ekkã amro konono ibben don kin tokjen ko remõn im tokjen ko renana kin juõn men, ilo wãwen in ajiri ro nejimro remaroñ kile im lo jokãlet eo emeletlet tata. Men in ear jibañ ir ñan kaddek juõn lemnak ekõmmanwa.”—Jabõn Kennan Ko 1:1-4.
17. Ta men ko ro jemen im jinen remaroñ tõmak im liki?
17 Emol, ejelok juõn jemen ak jinen enaj wãppen an jerbale nan in kakabilek ko jen Bible eo kin wãwen kakajiririk ajiri ro. Meñe eindein, kwomaroñ tõmak im liki bwe ajiri ro nejimi enaj lap air kamolol kin jibadbad ko ami ñan katakin ir ilo meanwõd, joij, im ilo juõn wãwen eyokwe. Emol bwe Jehovah enaj kajerammõn yuk kin am kate wõt ñan kõtõbrak men kein. (Jabõn Kennan Ko 3:33) Un eo elap, aolep ri Christian ro jemen im jinen rekõnan bwe ajiri ro nejiir ren katak ñan yokwe Jehovah joñan wõt ir. Ewi wãwen ro jemen im jinen remaroñ tõbar mejenkajjik in ekanuij emõn? Katak in tok enaj kwalok jet ian wãwen ko.
Kwoj Kememej Ke?
• Ewi wãwen kwalok lolokjen enaj jibañ juõn jemen ak jinen ñan jerbale meanwõd?
• Ewi wãwen joij im kaje rej ekkejel ibben don?
• Etke konono jen buru ikõtan ro jemen im jinen im ajiri ro ej lukkun aorõk?
[Pija ko ilo peij 23]
Kom ro jemen im jinen, kom maroñ kememej ke ien eo kwar juõn ajiri wõt?
[Pija eo ilo peij 24]
Kwoj rejañ ajiri ro nejimi ke bwe ren konono jen burueir?