Ajiri Ro Nejid​—juõn Men In Jolet Eaorõk

“Lo ajiri rõn men in jolit jen Jeova, im leen lojien kõra men in letok jen E.”​—SAM 127:3.

1. Ewi wãwen niñniñ eo moktata ear lotak?

LEMNAK kin men in kabwilõñlõñ ko Jehovah Anij ear kõmmani kin wãwen an kar kõmanman emaan im kõrã eo moktata. Adam, eo jemen, im Eve, eo jinen erro jimor kar wõr kunair ñan ejaak juõn armij ekãl​—niñniñ eo kein kajuõn, ilo jikin niñniñ eo an Eve. (Jenesis 4:1) Tok ñan rainin, etta im lotak an juõn ajiri ej juõn men ekabwilõñlõñ im elõñ rej watõke einwõt juõn men in bwilõñ.

2. Etke kwomaroñ ba bwe men eo ej walok iloan jikin niñniñ eo an juõn kõrã ebõroru ej juõn men ekabwilõñlõñ?

² Iumin 270 ran ko, cell ak kij eo moktata ear walok iloan jinen kin an belele ibben jemen ej eddek im laplok ñan elõñ trillion cell ak kij ko. Iloan kij eo moktata ewõr nan in jiroñ ko ej aikwiji ñan kõmman 200 kain kij ko rekajju jen don. Elikin nan in jiroñ kein rekabwilõñlõñ, me ejelok juõn armij emaroñ melele kaki, kij kein rej eddek ekkar ñan juõn lajrak im wãwen ñan kõmman juõn armij ekãl im mour!

3. Etke elõñ armij ro rekõmmanwa rej errã bwe Anij eo ej unin lotak eo an juõn armij ekãl im mour?

³ Wõn eo ej lukkun ri kõmanmane niñniñ eo? Emol ej Eo ear kõmanman mour ilo jinointata. Ri jeje sam ilo Bible eo ear al im ba: “Komin jela bwe Jeova Anij: E ar kõmõnmõn kij, kij An.” (Sam 100:3) Jemen im jinen ajiri ro, komij lukkun jelã bwe niñniñ eo ekãl im aorõk ear jab waloktok jen meletlet eo ami. Juõn Anij emeletlet otem meletlet wõt emaroñ kõmanman juõn armij ekãl im mour. Iumin elõñ thousand yiõ ko, armij ro rekõmmanwa rar errã bwe Ri Kõmanman eo Elap ear ejaake ajiri eo iloan jikin niñniñ eo an jinen. Kwoj ke?​—Sam 139:13-​16.

4. Ta likjap eo an armij jejjab maroñ naruin Jehovah kake?

⁴ Bõtab, Jehovah ej juõn Ri Kõmanman ejelok an kea ke ak ear baj ejaak juõn karõk wõt bwe maan im kõrã ro ren kõmman ajiri ro nejiir? Jet armij ejelok air kea kin armij ro jet, ak Jehovah ejjab eindein. (Sam 78:38-​40) Bible eo ej ba ilo Sam 127:3: “Lo ajiri rõn men in jolit jen Jeova, im leen lojien kõra men in letok jen E.” Kiõ jen lale ta in men in jolet eo im ta eo ej kamol ñan kij.

Juõn Men in Jolet im juõn Jinekjej

5. Etke ajiri ro rej juõn men in jolet?

⁵ Juõn men in jolet ej einwõt juõn men in lelok. Jemen im jinen ajiri ro ekkã air jolok elõñ awa im kate ir ilo jikin jerbal ko air ñan likit juõn men in jolet ñan ajiri ro nejiir elikin air mij. Emaroñ money, weto, ak bõlen jet mweiuk ko raorõk. Jekdon ta, ej kamol bwe jemeir im jineir rej yokwe ir. Bible eo ej ba bwe Anij ear lelok ñan jemen im jinen ajiri ro nejiir einwõt juõn men in jolet. Rej juõn men in lelok ear lelok ñan ir ilo yokwe. Elañe kwe juõn jemen ak jinen, kwonaj kar ba ke bwe makitkit ko am rej kamol am watõk ajiri ro nejõm einwõt juõn men in letok eo Ri Kõmanman men ko ijoko otemjej ear lewõj ñan yuk?

6. Ta unin an kar Anij kamaroñ armij ro bwe ren kõmman ajiri?

⁶ Unin an Jehovah letok men in letok in kar ñan kobrak lal in kin ro nejin Adam im Eve. (Jenesis 1:​27, 28; Aiseia 45:18) Jehovah ear jab kõmanman armij ro kajjojo, einwõt ear kõmmane elõñ million enjel ro. (Sam 104:4; Reveles̃õn 4:​11) Jen men in, Anij ear kãlet ñan kõmanman armij im kamaroñ ir bwe ren keotak ajiri ro rej bõk nememen jemeir im jineir. Ej juõn jerammõn elap ñan juõn jinen im jemen ñan keotak im kejbãrok juõn armij ekãl! Einwõt jemen im jinen, kwoj kamolol ke Jehovah kin an lewõj ñan yuk men in jolet in eaorõk?

Katak Jen Joñok eo an Jesus

7. Jen men ko jet jemen im jinen ajiri ro rej kõmmani, ewi wãwen an kar Jesus kwalok an itoklimo im tiriamo ñan “ro nejin armij”?

⁷ Ekaburomõj bwe, ejjab aolep ro jemen im jinen rej watõk ajiri ro nejiir einwõt juõn jerammõn. Elõñ jidik wõt air yokwe ajiri ro nejiir. Jemen im jinen rot rein rejjab kajeoñe lemnak eo an Jehovah ak Nejin. (Sam 27:10; Aiseia 49:15) Ak, lemnak kin itoklimo eo an Jesus kin ajiri ro. Mokta jen an kar Jesus bed ion lal einwõt juõn armij​—ke ear juõn enjel ekajur ilañ​—Bible eo ej ba bwe “an lõñliñ e ar iben ro nejin armij.” (Jabõn Kennan Ko 8:​31) Yokwe eo an kin armij ear kanuij lap bwe ear mõnõnõ in lelok mour eo an einwõt juõn binmour bwe jen bõk mour indio.​—Matu 20:28; Jon 10:18.

8. Ewi wãwen Jesus ear likit juõn joñok emõn ñan jemen im jinen ajiri ro?

⁸ Ke ear bed ion lal, Jesus ear likit juõn joñok emõn ñan jemen im jinen ajiri ro. Lemnak kin ta eo ear kõmmane. Ear bõk ien ñan bed ibben ajiri ro, meñe ear lukkun boub im inebata. Ear lale air ikkure ilo jikin kaikujkuj eo im kajerbal makitkit ko air ilo katak ko an. (Matu 11:16, 17) Ilo ien eo eliktata ear etal ñan Jerusalem, Jesus ear jelã bwe enaj kar eñtan im mij. Inem ke armij ro rar ãñintok ajiri ro nejiir ñan e, ri kalor ro an Jesus, bõlen ñan kejbãrok Jesus jen inebata ko relaplok, rar kajeoñ in jilkinlok ajiri ro jen e. Ak Jesus ear koweik ri kalor ro an. Ñan kwalok “lõñliñ” eo an ibben ajiri ro, ear ba: “Komin likit ajiri rõn bwe ren itok ñõn iba; komin jab boprae ir.”​—Mark 10:13, 14.

9. Etke kõmman ko ad remaroñ aorõklok jen ta eo jej ba?

⁹ Jemaroñ katak jen joñok eo an Jesus. Ñe ajiri ro rej kebake kij, ta eo jej kõmmane​—meñe jej boub? Einwõt Jesus ear kõmmane ke? Men eo elap an ajiri ro aikwiji, elaptata jen jemeir im jineir, ej men eo Jesus ear mõnõnõ in lelok ñan ir​—ien im lemnak eo an. Emol, nan rot kein einwõt “Ij yokwe yuk” rej aorõk. Ak, kõmman ko ad elaplok tokjeir jen nan ko wõt. Yokwe eo am ej alikar jab ilo nan ko kwoj ba ak elaplok ilo men ko kwoj kõmmani. Kwoj kwaloki ilo ien, lemnak, im kejbãrok eo kwoj lelok ñan ajiri ro nejemi. Bõtab, meñe ro jemen im jinen rej lelok men kein aolep, jet ien rejjab maroñ lo tokjen ko remõn, ilo mõkaj ekkar ñan lemnak eo ad. Jej aikwij meanwõd. Jemaroñ katak kin meanwõd elañe jej anõk wãwen an kar Jesus emmakit ibben ri kalor ro an.

Meanwõd im Yokwe eo an Jesus

10. Ewi wãwen an kar Jesus katakin ri kalor ro an kin ettã buru, im ta eo ear walok ilo ien eo kein kajuõn?

¹⁰ Jesus ear jelã kin akwel eo ikõtan ri kalor ro an kin wõn iair ear buñbuñ im laptata. Elikin an tõbraklok ñan Capernaum ibben ri kalor ro an, ear kajitõk ibbeir: “Ta eo kom ar akwaile dron kake ilo ial? A rej ikõñ: bwe ilo ial r’ar akwaile dron, kin wõn iair elaptata.” Jen an koweik ir, ilo meanwõd Jesus ear lelok juõn wanjoñok ñan katakin ir bwe ren kwalok ettã burueir. (Mark 9:​33-​37) Ear ke jebar leen men eo ear kõnan loe? Jab ilo mõkaj. Enañin jiljino alliñ ko tokelik, Jemes im Jon rar rejañ jineir bwe en kajitõk ibben Jesus kin ruo jikin ko reutiej ñan ir ilo Ailiñ eo. Bar juõn alen, ilo meanwõd Jesus ear kajimwe lemnak eo airro.​—Matu 20:20-​28.

11. (a) Ta manit eo ri jilek ro an Jesus rar likjap in kõmmane elikin air tõbartok bo eo ibben Jesus? (b) Ta eo Jesus ear kõmmane, im ear lo ke tõbrak ilo ien eo?

¹¹ Ejjabto tokelik ran in Kijone eo ilo 33 C.E. ear mottok, im Jesus ear kwelok ilo ittino ibben ri jilek ro an ñan kememe kwojkwoj eo. Ke rar deloñ ilo bo eo, ejelok juõn ian ri jilek ro 12 rar bõk eddo eo ñan kwal neen ro jet ekkar ñan mantin karuwainene​—juõn jerbal ettã an juõn ri karejar ak juõn kõrã ilo mweo. (1 Samuel 25:41; 1 Timote 5:​10) Jesus ear lukkun buromõj kin an ri kalor ro an akwel wõt kin wõn iair eutiejtata! Inem Jesus ear kwal neen ri kalor ro kajjojo im rejañ ir ñan lor joñok eo an ñan karejar ñan ro jet. (Jon 13:​4-​17) Rar lore ke? Bible eo ej ba bwe ejjabto tokelik ilo ejja boñen eo wõt “juõn akwail ej walok ibeir, wõn iair e naj laptata.”​—Luk 22:24.

12. Ewi wãwen an jemen im jinen ajiri ro kajeoñe Jesus ñe rej katakin ajiri ro nejiir?

¹² Ñe ajiri ro nejemi rejjab jerbale nan in kakabilek eo ami, kom jemen im jinen komij kile ke kin ewi wãwen kar eñjake eo an Jesus? Kememej bwe Jesus ear jab ebwer jen an jibañ ri jilek ro an, meñe rar rumij in kajimwe likjap ko air. Meanwõd eo an ear jebar leen tokelik. (1 Jon 3:​14, 18) Jemen in jinen ajiri ro, komij aikwij kajeoñe yokwe im meanwõd eo an Jesus, jab bõjrak jen ami katakin ajiri ro nejemi.

13. Etke juõn jemen ak jinen en jab koweik ajiri eo nejin ñe ej kwalok kajitõk ko?

¹³ Ajiri ro rej aikwij eñjake bwe jemeir im jineir rej yokwe im itoklimo kin ir. Jesus ear kõnan jelã kin ta lemnak eo an ri kalor ro an, inem ear roñjake ke ear wõr air kajitõk. Ear kajitõk ibbeir kin ta lemnak ko air kin jet men ko. (Matu 17:25-​27) Aet, katak ko remõn rekoba lukkun roñjake im lukkun itoklimo kin ir. Juõn jemen ak jinen en jab kabõjrak juõn ajiri eo nejin ilo an ba ilo lej: “Etal jen iõ! Kwojjab loe ke bwe I boub?” Elañe juõn jemen ak jinen ej boub, ej aikwij jiroñ ajiri eo nejin bwe enaj uake kajitõk eo an tokelik. Inem jemeir im jineir rej aikwij kememej in bwebwenato ibben ajiri eo tokelik kin kajitõk eo an. Ilo wãwen in ajiri eo enaj kile bwe jemen ak jinen ej lukkun itoklimo kin e, im enaj bidodo an kebake jemen ak jinen tokelik.

14. Ta eo ritto ro remaroñ katak jen Jesus kin kwalok yokwe ñan ajiri ro nejiir?

¹⁴ Ekkar ke an jemen im jinen ajiri ro jiburi ro nejiir? Men in ej bar juõn joñok, ro jemen im jinen remaroñ katak jen Jesus. Bible eo ej ba bwe ear “jiburlep ir, im likit pein ioir.” (Mark 10:16) Ewi wãwen am lemnak bwe ajiri ro rar emmakit? Emol bwe burueir rar lukkun mõnõnõ, im rar ruaklok ñan Jesus! Elañe ewõr juõn kõtan ebak im yokwe eo emol ikõtan kom ro jemen im jinen im ro nejemi, renaj kate ir ñan jerbali katak ko ami.

Kajitõk eo Ej Ewi Joñan Ien Am Bed Ibben Ajiri Ro Nejim

15, 16. Ta lemnak eo ebuñbuñ kin katakin ajiri, im ta eo ear ejaake lemnak in?

¹⁵ Jet armij rar kajitõk elañe jemen im jinen ajiri ro rej aikwij bõk elap ien ñan bed ibben ajiri ro nejiir. Juõn lemnak elõñ rar rejañ kake ilo kabel kin lale ajiri ro rar naetan ien eo emõntata. Ro rar kowõnmanlok lemnak in rar ba bwe ajiri ro rejjab aikwij elap ien jen jemeir im jineir elañe ien ko rej liloki ewõr meleleir, im rar kebojak, im karõki lok iman. Emõn ke lemnak in kin lelok ien eo emõntata, im unin air kõmmane karõk in ke bwe ren jibañ ajiri ro nejiir?

¹⁶ Juõn ri jeje ear konono ibben elõñ ajiri ro im ear ba bwe men eo “rar lukkun aikwij jen jemeir im jineir kar ien ko,” im “roñjake ir kin aolepen burueir.” Ikijen men in, juõn ri meletlet in college ear ba: “Lemnak in lelok ien eo emõntata ear walok kinke jemen im jinen ajiri ro rar kile likjap eo air. Armij ro rar kõtlok ir make bwe ren kadiklok ien air bed ibben ajiri ro nejiir.” Ewi joñan an ro jemen im jinen aikwij bed ibben ajiri ro nejiir?

17. Ta eo ajiri ro rej aikwiji jen jemeir im jineir?

¹⁷ Bible eo ejjab ba. Bõtab, kar jiroñ Ri Israel ro jemen im jinen ajiri ro rar jiroñ ir bwe ren konono ibben ro nejiir ñe rej bed ilo moko imwiir, ñe rej etetal ilo ial, ñe rej babu, im ñe rej jerkak. (Duteronomi 6:7) Alikar bwe ej melelen bwe ro jemen im jinen ajiri ro rej aikwij communicate ibben ajiri ro im keini air katakin ir ilo kajjojo ran.

18. Ewi wãwen an kar Jesus bõk ien ko remõn ñan katakin ri kalor ro an, im ta eo jemen im jinen ajiri ro remaroñ katak jen men in?

¹⁸ Jesus ear lo tõbrak ke ear mõñã ibben ri kalor ro an, katakin ir, im bareinwõt kakije ibbeir. Ear kajerbal ien ko remõn otemjej ñan katakin ir. (Mark 6:​31, 32; Luk 8:​1; 22:14) Ilo ejja wãwen in lok wõt, Christian jemen im jinen ajiri ro rej aikwij bojak in kajerbal ien ko remõn otemjej ñan kajutak im debij juõn wãwen emõn ñan communicate ibben ro nejiir im katakin ir ilo ial ko an Jehovah.

Ta eo Kwoj Katakin Kake im Ewi Wãwen Am Maroñ Kõmmane

19. (a) Ta men in aikwij eo ijellokin bõk ien ñan bed ibben ajiri ro? (b) Ta eo ro jemen in jinen rej aikwiji ñan katakin ajiri ro nejiir?

¹⁹ Bõk ien ñan bed ibben ajiri ro im bareinwõt katakin ir ejabwe ñan lo tõbrak ilo jerbal in katakin. Men eo eaorõk bareinwõt, ej ta eo jej katakin ir kake. Lale kin ewi wãwen an Bible eo kalikar kin ta eo jej aikwij kobaik ilo katak eo. “Nan kein, ij jiroñ yuk rainin,” ej ba “kwon kanuij katakin ro nejõm kaki.” Ta “nan kein” jej aikwij katakin ajiri ro kaki? Alikar, rej nan ko ej kab mwij ad bwebwenato kaki, rej: “Kwon yokwe Jeova kin aolepen buruõm, kin aolepen am, im kin aolepen am kajur.” (Duteronomi 6:​5-7) Jesus ear ba bwe kien in ej kien eo eaorõktata jen aolep kien ko an Anij. (Mark 12:28-30) Jemen im jinen ajiri ro rej aikwij katakin ro nejiir moktata kin Jehovah, im kamelele kin un eo ej make wõt tellokin bõk yokwe im kabuñ kin aolepen ad.

20. Ta eo Anij ear kakien ritto ro bwe ren katakin ro nejiir kake ilo ien etto?

²⁰ Bõtab, “nan kein” me ro jemen im jinen rej aikwij katakin ro nejiir kaki rej koba elõñlok men ko jen ad baj yokwe wõt Anij kin aolepen buruõd. Kwonaj lo bwe ilo chapter eo lok iman ilo Duteronomi, Moses ear eliji kien ko bwe Anij ear jei ion dekã ko​—Kien ko Joñoul. Kien kein rej koba kien ko kin jab riap, jab kwot, jab uror, im jab lũñ. (Duteronomi 5:​11-​22) Inem jemen im jinen ajiri ro etto rar aikwij katakin ajiri ro nejiir kin tokjen mour erreo. Christian jemen im jinen ajiri ro rainin rej aikwij lelok ñan ajiri ro nejiir ejja nan in jiroñ ko wõt elañe rekõnan jibañ ir ñan bõk juõn ilju ejokane, im kamõnõnõ.

21. Kar ta melelen nan in jiroñ eo ñan “kanuij katakin” Nan in Anij ñan ajiri ro?

²¹ Kar jiroñ ro jemen im jinen kin ewi wãwen rej aikwij katakin “nan kein,” ak kien kein, ñan ro nejiir: “Kwon kanuij katakin ro nejõm kaki.” Nan eo “kanuij katakin” ej melelen “katakin im jek ilo buruen ilo am eliji ak kakabileke: rejañ ak kabine ilo lemnak.” Emol, Anij ej lukkun jiroñ jemen im jinen ajiri ro bwe ren jino juõn program in katak Bible ñan jek ilo lemnak ko an ajiri ro nejiir men ko lor jitõb.

22. Ta eo Ri Israel ritto ro rar aikwij kõmmane ñan katak ibben ajiri ro nejiir, im kar ta melelen men in?

²² Jemen im jinen ajiri ro rej aikwij kate ir ñan bõk eddo eo ñan kõmman kain program rot in. Bible ej ba: “Kwon lukwoji juõn kakõle ion peõm, im ren bed ikõtan mejõm. Im kwon jei ilo jurõn kejem ilo mweo imõm, im ilo aor ko am.” (Duteronomi 6:​8, 9) Ejjab melelen bwe ritto ro rej aikwij lukkun je kien ko an Anij ion jurõn kejem, lukwoji ion pein ajiri ro nejiir, im likit ikõtan mejeir. Jen men in, point eo elap ej eñin bwe ritto ro rej aikwij keini air katakin ajiri ro nejiir kin katak ko an Anij. Joñan air keini katakin ajiri ro nejiir ej einwõt ñe katak ko an Anij rej bed iman ajiri ro ien otemjej.

23. Ta eo jenaj katak kake ilo katak eo tok ilal?

²³ Ta jet ian men ko raorõk ritto ro rej aikwij katakin ajiri ro nejiir kaki? Etke ej aorõk bwe ren katakin im kamineneik ajiri ro rainin ñan kejbãrok ir make? Ta jibañ eo ro jemen in jinen remaroñ bõk kiõ ñan katakin ajiri ro nejiir ilo bolemen? Kajitõk kein im ko jet rej jelet elõñ jemen im jinen ajiri ro jenaj uaki ilo katak eo tok lal.

Ewi Wãwen Am Naj Uak?

• Etke ritto ro rej aikwij kaorõk ajiri ro nejiir?

• Ta eo jemen im jinen ajiri ro im ro jet remaroñ katak jen Jesus?

• Ewi joñan ien ritto ro rej aikwij lelok ñan ajiri ro nejiir?

• Ta eo ajiri ro rej aikwij katak kake, im ewi wãwen air maroñ katak ibbeir?

[Pija eo ilo peij 19]

Ta eo jemen im jinen ajiri ro remaroñ katak jen katakin eo an Jesus?

[Pija ko ilo peij 20]

Ñããt im ewi wãwen Ri Israel ritto ro rar katakin ajiri ro nejiir?

[Pija ko ilo peij 21]

Ritto ro rej aikwij likit wõt katak ko an Anij iman ajiri ro nejiir