Rõlok Jen Inebata—Juõn Wãwen Kamadmõd Ekeie
“Komin itok ñõn iba, kom otemjej rej jerbal im ban, im I naj kakijeik kom.”—MATU 11:28.
1, 2. (a) Ta eo ewõr ilo Bible im ej jibañ ñan kadiklok inebata ko? (b) Kar ewi joñan an bolemen katak ko an Jesus?
BÕLEN kwonaj errã bwe inebata ele jen joñan ekauwatata; ej tellok ñan eñtan. Bible eo ej kalikar bwe armij otemjej rej ajjibanban kin eddo ko im rej kijoror im kõttar air rõlok jen mour eo rainin elap inebata ko ie. (Dri Rom 8:20-22) Ak Jeje ko rej bareinwõt kwalok kin ewi wãwen ad maroñ bõk rõlok kiõ jen men in kainebata ko. Men in ej itok jen ad lor nan in kakabilek im wanjoñok eo an juõn emaan eo ear mour enañin ruo thousand yiõ ko remotlok. E kar juõn carpenter, ak elaplok an kar yokwe armij jen jerbal eo an. Ear konono im jelet buruen armij, lale aikwij ko air, jibañ ro remõjno im kainemõn eo rar buromõj. Elaplok jen men in, ear jibañ elõñ ñan tõbar maroñ eo air elaptata ilo jitõb. Ilo wãwen in rar rõlok jen inebata ko rele jen joñan, einlok wõt am naj maroñ.—Luk 4:16-21; 19:47, 48; Jon 7:46.
2 Emaan in, Jesus in Nazareth, ear jab bõk tel jen jelãlokjen eo an lal me jet rar bukõte ilo Rome, Athens, ak Alexandria eo etto. Mekarta, katak ko an rebuñbuñ. Kar wõr juõn air unin tel: kien eo me Anij enaj kajerbale im lo tõbrak in iroij ion lal. Jesus ear bareinwõt kamelele kin kakabilek ko relap ñan mour—kakabilek ko me emol air aorõk rainin. Ro rej katak im jerbale ta eo Jesus ear katakin kake rej lañliñ kin tokjen ko ilo mõkaj, ekoba rõlok jen inebata ko rele jen joñan. Kwojamin mõnõnõ ke kin men in?
3. Ta nan in kir eo elap Jesus ear letoke?
3 Emaroñ wõr am bere. ‘Juõn armij eo ear mour ilo juõn ien etto emaroñ ke lap an jelet mour eo aõ kiõ?’ Eokwe, roñjake ñan nan ko remejaja an Jesus: “Komin itok ñõn iba, kom otemjej rej jerbal im ban, im I naj kakijeik kom. Komin bõk Aõ ine im likite i aerami, im katak iba; bwe Ij inemõn im etã buruõ: im kom naj lo an ami kakije. Bwe Aõ ine ej emõn, im men eo Ij inek e mera.” (Matu 11:28-30) Kar ta melelen nan kein an? Jen etale nan kein im lale ewi wãwen air kabellok juõn ial ñan am rõlok jen inebata ko elap air ijjibed.
4. Jesus ear konono ñan wõn ro, im etke ri roñjake ro rar lo bwe ebin air kõmman men eo ear kajitõkin ir bwe ren kõmmane?
4 Jesus ear konono ibben elõñ ro rar kate ir ñan kõmman men ko rejimwe ak rar “jerbal im ban” kinke ri tel in Ri Jew ro rar kõmman bwe kabuñ en juõn men eddo. (Matu 23:4) Rar kalimjeke wõt kien ko ejelok jemlokair kin wãwen mour otemjej. Kwojamin kar inebata ke ñan roñ wõt air ba “kwon jab” kõmman men in ak men en? Ilo keidi, nan in kir eo an Jesus ear tel armij ñan mol eo, ñan wãnik, im ñan juõn wãwen mour emõnlok ilo air bokake e. Aet, wãwen eo ñan jelã Anij eo emol ear kitibuj air bokake Jesus Christ, bwe ilo e, armij rar maroñ lo wãwen Jehovah. Jesus ear ba: “Eo e ar lo Ña, e ar lo Jema.”—Jon 14:9.
Mour eo Am Eobrak ke kin Inebata?
5, 6. Wãwen ko im wõnãn jerbal ilo ran ko an Jesus ewi wãweiir ñe jej keidi ibben ejja men ko ilo ran ko ad?
5 Men in emaroñ kaitoklimoen yuk kinke job eo am ak wãwen mour in family eo am emaroñ kainebata yuk. Ak eddo ko jet remaroñ le jen joñan maroñ eo am. Elañe eindein, kwoj einwõt ro emol burueir me Jesus ear iioni im lelok jibañ. Ñan wanjoñok, lemnak kin abañ eo ñan kabwe aikwij ko an family eo. Elõñ rej kate ir kin men in rainin, im elõñ rar kõmman eindein ilo ien eo an Jesus.
6 Ilo ien eo, juõn ri jerbal ear jerbal iumin 12 awa ko ilo juõn ran, 6 ran ko ilo juõn week, ekkã kin baj juõn wõt denarius kin aolepen juõn ran. (Matu 20:2-10) Ewi wãwen men in ej keidi ñan wõnãn jerbal eo am ak an ro mõttam? Emaroñ bin keidi wõnãn ko ilo ien ko etto ibben ko an ran kein. Juõn wãwen kõmmane ej ñan lemnak kin ewi joñan mweiuk ko money emaroñ wiaiki. Juõn ri meletlet ej ba bwe ilo ran eo an Jesus wõnãn juõn wõt loaf in bread rar kõmman jen emen cup in flour wheat kar joñan wõt wõnãn jerbal iumin juõn awa. Bar juõn ri meletlet ej ba bwe juõn cup in wine emõn kar joñan wõt wõnãn jerbal iumin ruo awa. Kwomaroñ kile jen tibdikin kamelele kein bwe armij ro ilo ien eo rar aikwij to air jerbal ñan kabwe aikwij ko air. Rar aikwij bõk rõlok im kakije, einwõt kij. Elañe ewõr am jerbal ilo jikin jerbal eo, remaroñ jibede yuk ñan kalaplok am jerbal. Ekkã ad jab lo ien ñan kõmman bebe ko rejimwe. Kwomaroñ ba bwe kwoj kijoror ñan bõk rõlok.
7. Kar ta uak eo an armij ñan ennan eo an Jesus?
7 Alikar, nan in kir eo an Jesus ñan aolep ro rej “jerbal in ban” enaj kar juõn ennan emejaja ñan elõñ ri roñjake ro ilo ien eo. (Matu 4:25; Mark 3:7, 8) Im kememej bwe Jesus ear kakobaik kallimur in, “I naj kakijeik kom.” Im emaroñ jerbale ñan ro jej jitenburu ibbeir, im rej bed ilo ejja abañ ko einlok wõt.
8. Ewi wãwen an kakajiririk ajiri im an armij rittolok rej kalaplok inebata?
8 Ebar wõr men ko reddo armij ro rej ineki. Kakajiririk ajiri ro ej juõn jerbal elap an bin kõmmane. Bareinwõt mour an ajiri emaroñ bwe an bin. Elõñlok armij ro redik im ritto rej jelmae abañ ko kin ejmour ilo enbwin im lolãtãt. Im meñe emaroñ aetoklok an armij mour, ewõr abañ ko reinjuõn ritto ro rej aikwij tarinae, meñe elõñ tõbrak ko kin uno in doctor.—Ekklisiastis 12:1.
Bed Iumin Ine eo
9, 10. Ilo ien ko etto, ta eo ine eo ear kõkkar kake, im etke Jesus ear kir armij bwe ren bõk ine eo an?
9 Kwar lo ke bwe ilo nan ko ilo Matu 11:28, 29, Jesus ear ba: “Komin bõk aõ ine im likite i aerami, im katak iba.” Ilo ien eo, juõn armij ettã emaroñ kar lemnak bwe ear jerbal iumin juõn ine eddo. Jen ien etto, ine eo ear kõkkar kin kamakoko ak karejar. (Jenesis 27:40; Livitikõs 26:13; Duteronomi 28:48) Elõñ ri jerbal ro rej jerbal ilo ran me Jesus ear iioni rar lukkun ineke juõn ine ion aerãir, im kwotak men ko reddo. Ekkar ñan wãwen air jekjek juõn, emaroñ emõn ke rar likite ion kenwair ak aerãir ak kaeñtan ir. Einwõt juõn carpenter, Jesus ear maroñ kõmman ine ko, im emaroñ kar jelã kilen jeke juõn bwe en “emõn” air ineke. Bõlen ear likit kilin cow ak nuknuk eran bwe en emõn.
10 Ke Jesus ear ba: “Komin bõk aõ ine im likite i aerami,” emaroñ kar keidi emake ñan juõn eo ear lelok ine ko emõn an jekjek im enaj kar “emõn” ñan kenwan im aeran ri jerbal. Inem, Jesus ear kakobaik: “Men eo Ij inek e emera.” Nan kein rar kalikar bwe ine eo ear jab nana ñan kajerbale, im jerbal eo ear jab bin bareinwõt. Emol, ilo an kir ri roñjake ro ñan bõk ine eo an, Jesus ear jab lelok juõn ien bwe ren rõlok ilo mõkaj jen ijjibed ko aolep rar jelmae ilo ien eo. Mekarta, oktak in lemnak in ear kwaloke enaj kar bõktok elap aemololo ilo jitõb. Oktak ko ilo wãwen air mour im kõmman men ko renaj kar kainemõn ir bareinwõt. Men eo eaorõklok, juõn kejatdikdik ealikar im bin enaj kar jibañ ir ñan kadiklok inebata ilo mour eo air.
Aemololo ilo Jitõb Emaroñ Am
11. Etke Jesus ear jab baj rejañ ir ñan air jenij ak ukõtlok ine ko ñan ibben bar juõn?
11 Joij im lale, Jesus ear jab ba bwe armij renaj ukõt juõn ine ñan bar juõn. Ailiñ in Rome ear iroij wõt ilo ene eo, einlok wõt kien ko an lal ilo ran kein rej iroij ilo jikin ko Ri Christian ro rej jokwe ie. Owõj in Rome ilo ebeben eo kein kajuõn ear bedwõt. Abañ ko kin ejmour im economy rar bedwõt. Jab wãppen im jerawiwi rar jelet wõt armij ro. Ak, aemololo eo emaroñ kar air ilo air jerbale katak ko an Jesus im emaroñ ad bareinwõt ilo ran kein.
12, 13. Ta eo Jesus ear kalikare bwe enaj kar bõktok aemololo ilo jitõb, im kar ewi lemnak an jet kin men in?
12 Juõn wãwen eaorõk ñan jerbale wanjoñok eo an Jesus kin ine eo ear alikar ilo jerbal in kõmman ri kalor. Ejelok bere bwe jerbal eo elaptata an Jesus kar jerbal in katakin ro jet, elaptata kin Ailiñ eo an Anij. (Matu 4:23) Inem ke ear ba, “Komin bõk aõ ine im likite i aerami,” emol enaj kar kitibuj air lore ilo ejja jerbal in wõt. Lokbook in Gospel eo ej kwalok bwe Jesus ear kamakit maan ro emol burueir bwe ren ukõt jerbal ko air, juõn men eaorõk elõñ armij rej lemnak kake ilo mour eo air. Kememej wõt kin nan in kir eo an ñan Peter, Andrew, James, im John: “Komin iten lor Iõ, im I naj likit kom dri añwõr armij.” (Mark 1:16-20) Ear kalikar ñan ri eñwõd ro joñan an naj kajuburueir elañe rej kõmman jerbal eo ear likit mokta ilo mour eo an, im kõmmane iumin tel eo an im bõk jibañ jen e.
13 Jet ian Ri Jew ri roñjake ro an rar melele kin katak ko an Jesus im jerbali. Kalmenlokjen kin ien eo iturin lojet me jej konono kake ilo Luke 5:1-11. Ri eñwõd ro emen rar jerbal iaolepen boñin eo ak rar jab lo tõbrak. Ilo iriñ, ok ko air rar obrak kin ek ko! Men in ear jab baj walok wõt; ear walok kin an Jesus bõk eddon kake. Ke rar reilok itu barijet eo, rar lo bwijin armij rej itoklimo kin nan in katakin ko an Jesus. Men in ear jibañ ñan kamelele kin ta eo Jesus ear jiroñ ir rein emen: “Jen ien in kwo naj drouk armij.” Kar ewi uak eo air? “Ke emwij air tartok wa ko ñõn ene, rej likit men otemjej in lor E.”
14. (a) Ewi wãwen ad maroñ lo kaemololo ilo ran kein? (b) Ta news eo emõn aemololo Jesus ear kwalok kake?
14 Inem, kwomaroñ uak ilo ejja wãwen in lok wõt. Jerbal in katakin armij kin mol eo ilo Bible eo ej wõnmanlok wõt. Enañin jiljino million Ri Kennan ro an Jehovah ibelakin lal rar bõk nan in kir eo an Jesus ñan “bõk [an] ine im likite” ioir; rar erom “ri añwor armij.” (Matu 4:19) Jet armij rej kõmman bwe jerbal in en full-time ibbeir; ro jet rej kõmman jerbal in joñan wõt air maroñ part-time. Ir aolep rej loe einwõt juõn jerbal ekaemololo, inem ear diklok an wõr inebata ilo mour eo air. Ej kitibuj air kõmman men eo rej lañliñ kake, jiroñ ro jet kin news eo emõn—”gospel in ailiñ eo. (Matu 4:23) Ej juõn men ekalañliñ ien otemjej ñan konono kin news in emõn. Kobban Bible eo ewõr katak ko relap jej aikwiji ñan tõbar buruen elõñ armij bwe ren bõk juõn mour ediklok inebata ie.—2 Timote 3:16, 17.
15. Ewi wãwen am maroñ bõk tokjen jen katak ko an Jesus kin mour?
15 Ñan juõn joñan, armij ro rej kab jino katak kin Ailiñ eo an Anij rar bareinwõt bõk tokjen jen nan in katakin ko an Jesus kin wãwen air aikwij mour. Elõñ remaroñ ba ilo mol bwe nan in katakin ko an Jesus rej kaemololo ir im jibañ ir ñan ukõt mour ko air. Kwomaroñ make kabin oktak in ilo am etale jet ian kien ko kin mour me bwebwenato ko kin mour im jerbal eo an Jesus rar kwalok kaki, elaptata Gospel ko emwij an Matthew, Mark, im Luke jeje kake.
Juõn Wãwen ñan lo Kaemololo
16, 17. (a) Ia eo jemaroñ lo jet ian katak ko raorõk an Jesus? (b) Ta eo jej aikwiji ñan lo aemololo ñe jej jerbale katak ko an Jesus?
16 Ilo ien man rak ilo 31 C.E., Jesus ear kwalok juõn katak eo ebuñbuñ ibelakin lal ñan ran kein. Emakijkij air naetan Katak ion Tol eo. Rar jeje kake ilo book in Matthew chapter 5 ñan 7 im Luke chapter 6, im ej kamelele ilo tukaduen elõñ ian nan in katakin ko an. Kwomaroñ lo katak ko jet an Jesus ilo eon ko jet ilo Gospel ko. Elõñ ian men ko ear konono kake ej alikar meleleir, bõtab emaroñ bin jerbali. Etke kwojjab lukkun konono chapter kan im kalmenlokjen kaki? Kõtlok bwe kajur in lemnak ko an en kamakit lemnak im eñjake eo am.
17 Alikar, nan in katakin ko an Jesus jemaroñ karõki ilo wãwen ko reinjuõn jen don. Jen karõk nan in katak ko raorõk ibben don bwe en wõr juõn kin kajjojo ran ilo alliñ eo, im likit juõn mejenkajjik ñan jerbali ilo mour eo am. Ewi wãwen? Eokwe, jab baj lale jidik point ko im jab kalmenlokjen kaki. Kememej kin iroij eo emweie eo ear kajitõkin Jesus Christ: “Ta eo I naj kõmõn bwe in jolit mour indrio?” Ke Jesus ear elij kien ko raorõk an Anij, leo ear uak bwe emwij an jerbali men kein. Ak, ear kile bwe elõñlok men ko ear aikwij kõmmani. Jesus ear rejañ e bwe en kalaplok an kate wõt e ñan jerbale kien ko rekwojarjar ilo wãwen ko rekeie, bwe en juõn ro kalor ekijejeto. Alikar, leo ear jabojak in kõmman men in. (Luk 18:18-23) Inem, eo ekõnan katak kin nan in katakin ko an Jesus ilo ran kein ej aikwij kememej bwe ewõr oktak ikõtan an errã ibben katak ko an Jesus im ñan an bõki ilo an mour, im ilo wãwen in kadiklok inebata ko.
18. Kwalok wãwen am maroñ kajerbal box eo ekoba ibben katak in ilo juõn wãwen ewõr tokjen.
18 Ñan jinoe etale im jerbale katak ko an Jesus, lale mõk point number 1 ilo box eo. Ej jitõñlok ñan Matu 5:3-9. Emol, jabdewõt iad jemaroñ jolok elap ien ñan kalmenlokjen kin nan in kakabilek ko raibujuij ilo eon kan. Bõtab, ilo am lale ir, ta jemlok eo kwoj bõke ikijen lemnak an armij? Elañe emol am kõnan anjo ion inebata ko elap air jelet mour eo am, ta eo enaj jibañ yuk? Ewi wãwen am maroñ kakõmõnmõnlok mour eo am elañe kwoj kalaplok am lale men ko lor jitõb, im kõtlok men kein bwe en laplok air jerbal ilo lemnak ko am? Ewõr ke juõn men ilo mour eo am im kwoj aikwij kadiklok am kaorõke, im kalaplok ien ñan am lale men ko ilo jitõb? Elañe kwoj kõmman eindein, enaj kalaplok am mõnõnõ kiõ.
19. Ta eo kwomaroñ kõmmane ñan kalaplok lolokjen im melele eo am?
19 Kiõ ewõr bar juõn men kwoj aikwij kõmmane. Etke kwojjab bwebwenato ibben bar juõn ri karejar eo an Anij kin eon kein, bõlen ri belele eo mõttam, juõn nukim, ak juõn jeram? (Jabõn Kennan Ko 18:24; 20:5) Kememej wõt bwe iroij eo emweie ear kajitõk ibben bar juõn armij—Jesus—kin juõn men eaorõk. Uak eo emaroñ kar kalaplok kejatdikdik eo an ñan bõk mõnõnõ im mour indio. Ri kabuñ eo mõttam kwoj bwebwenato ibben kin eon kein ejamin joñan wõt Jesus; bõtab, bwebwenato eo kin katak ko an Jesus enaj bõktok tokjen ñan kwe im e jimor. Kate yuk im kõmman men in ilo mõkaj.
20, 21. Ta program eo kwomaroñ lore ñan katak kin nan in katak ko an Jesus, im ewi wãwen am maroñ jelã wõnmanlok eo am ilo jitõb?
20 Bar lale box eo ilo katak in, “Katak ko ñan Jibañ Yuk.” Rar karõke katak kein ilo juõn wãwen bwe kwon maroñ lale juõn katak ilo juõn ran. Moktata kwomaroñ konono kin ta eo Jesus ear ba ilo eon ko. Inem kwomaroñ lemnak kin nan ko an. Kalmenlokjen kin wãwen am maroñ jerbali ilo mour eo am. Elañe kwoj lemnak kwoj kõmmane kadede, kalmenlokjen kin bar ta eo kwomaroñ kõmmane ñan mour ekkar ñan katak ko rekwojarjar. Jerbale katak eo ilo ejja ran eo wõt. Elañe ej ad in bin am melele kake ak ñan lale wãwen eo kwomaroñ jerbale, bõk bar juõn ran ñan kalmenlokjen kake. Bõtab, kememej bwe kwojjab aikwij wejepedik in jerbale mokta jen am wõnmanlok ñan katak eo juõn. Ilo ran eo jeltokin, kwomaroñ lale bar juõn katak. Ilo jemlokin week eo, kwomaroñ elij im lale ewi tõbrak in am jerbale emen ak lalem ian katak ko an Jesus. Week eo kein ka ruo kwon kakobaik point ko jet, ran kin ran. Elañe kwoj lo bwe kwar likjap in jerbale jet ian katak ko, jab ebwer. Ri Christian ro otemjej renaj bed ilo ejja likjap in wõt. (2 Kronikel 6:36; Sam 130:3; Ekklisiastis 7:20; Jemes 3:8) Wõnmanlok im jerbale katak kein ilo week eo kein kajilu im kein kemen.
21 Elikin juõn alliñ ak lõñlok, kwomaroñ kar etale 31 point ko aolep. Jekdon ta eo ej walok, enaj ewi lemnak eo am kin tokjen eo? Kwojamin kar mõnõnõ lok ke, bõlen elaplok am ainemõn? Meñe ej jidik wõt am kõmanmõnlok mour eo am, enaj kar diklok inebata ko am, ak ilo diktata enaj kar emõnlok wãwen am kijenmije inebata ko, im enaj wõr juõn kilen ibbem ñan wõnmanlok wõt. Jab meloklok bwe ewõr point ko jet remõn jen katak ko an Jesus me rejjab bed ilo lajrak in. Etke kwojjab bukõti im jerbali?—Dri Pilippai 3:16.
22. Ta tokjen eo emaroñ walok jen ad lore katak ko an Jesus, ak bar ta eo jej aikwij katak kake?
22 Kwomaroñ kile bwe ine eo an Jesus, meñe eddo jidik, ak ej joij. Ine in katak ko an im jerbal in kõmman ri kalor emera wõt. Elikin elõñlok jen 60 yiõ ko in an mour einwõt juõn Ri Christian, ri jilek John, jeran Jesus eo ej jitenburu ibben, ear errã: eñin yokwe Anij, bwe jen kejbãrok kien ko An: im kein ko An re jab erro.” (1 Jon 5:3) Emaroñ eindein liki eo am. Toan wõt am jerbale katak ko an Jesus, enaj joñan wõt am lo bwe men eo ej kainebata elõñ armij rainin ejjab lukkun juõn abañ ibbem. Kwonaj lo bwe emwij am lukkun rõlok jen men eo. (Sam 34:8) Ak, ebar wõr juõn wãwen ñan ine eo emõn an Jesus im kwoj aikwij jelã kake. Jesus ear bareinwõt konono kin an “inemõn im etã buru[en].” Ewi wãwen an men in naj jejjet ñan ad katak jen im kajeoñe Jesus? Ilo katak eo tok juõn, jenaj lale men in.—Matu 11:29.
Ewi Uak eo am?
• Ñe jej kabukõt mejelan inebata ko etke jej aikwij reilok ñan Jesus?
• Juõn ine ear kõkkar kin ta, im etke?
• Etke Jesus ear kir armij bwe ren bõk ine eo an?
• Aemololo ilo jitõb ewi wãwen an maroñ am?
[Kareelel ilo page 26]
Unin tel in yiõ eo an Ri Kennan ro an Jehovah ilo 2002 enaj: “Komin itok ñõn iba, . . . I naj kakijeik kom.”—Matu 11:28.
[Box/Pija ilo page 24,25]
Katak ko ñan Jibañ Yuk
Ta men ko remõn kwomaroñ loe ilo Matthew chapter 5 ñan 7? Ilo chapter kein ewõr katak ko Ri Kaki eo Elap, Jesus, ear kwaloki iturin juõn tol in Galilee. Joij im reade eon ko itulal, ilo am kajerbal Bible eo am, im kajitõkin yuk kin kajitõk ko ituriir.
1. 5:3-9 Ta eo ej jiroñ iõ kin lemnak eo aõ? Ewi wãwen aõ maroñ kalaplok mõnõnõ? Ewi wãwen aõ maroñ kalaplok aõ lale aikwij ko ilo jitõb?
2. 5:25, 26 Ta eo emõnlok jen aõ anõk jitõb in akwelel eo ebed ibben elõñ?—Luk 12:58, 59.
3. 5:27-30 Ta eo nan ko an Jesus rej kalikar kaki kin ettõnak ko kin mour etton? Ewi wãwen aõ kejbãrok iõ jen men in emaroñ kalaplok mõnõnõ eo aõ im ainemõn ilo lolãtãt?
4. 5:38-42 Etke Ij aikwij kejbãrok iõ jen lemnak eo an jukjuk im bed in ilo ran kein kin beran le jen joñan?
5. 5:43-48 Ewi wãwen inaj bõk tokjen jen aõ kalaplok aõ jelã kajjen ro me iar watõk ir mokta einwõt ri kijirãt ro? Ta eo men in enaj kõmmane ñan kadiklok ak jolok inebata ikõtan don?
6. 6:14, 15 Elañe ij jab jolok bwid jet ien, unleplep eo ej kin aõ ankwonak ke ak notaik armij? Ewi wãwen aõ maroñ ukõt men in?
7. 6:16-18 Elaplok ke aõ lemnak kin baotokiõ jen ta eo ej bed iloa? Ta eo ij aikwij kalaplok jelã kake?
8. 6:19-32 Ta eo emaroñ walok elañe ele jen joñan aõ lemnak kin money im mweiuk ko? Ta eo in lemnak kake ñan jibañ iõ bwe en jokkin wõt juõn aõ lemnak kin men in?
9. 7:1-5 Ewi eñjake eo aõ ñe Ij bed ibben armij ro rekin ekajete armij ilo burueir im notaik ir, ro rej naruõn armij ien otemjej? Etke ej aorõk bwe In jab eindein?
10. 7:7-11 Elañe jitõb in kate wõt ej emõn ñe Ij jar im kajitõk ibben Anij, ewi wãwen aõ maroñ kõmman eindein ilo wãwen ko jet ilo mour?—Luk 11:5-13.
11. 7:12 Meñe Ij jelã kin Golden Kien, ewi joñan aõ jerbale nan in kakabilek in ilo wãwen aõ jerbal ibben ro jet?
12. 7:24-27 Kinke Ij aikwij uak kin wãwen aõ mour, ewi wãwen aõ maroñ kijenmij im anjo ion abañ ko relap? Etke Ij aikwij lemnak kin men kein kiõ?—Luk 6:46-49.
Katak ko jet Imaroñ lemnak kaki:
13. 8:2, 3 Ewi wãwen aõ maroñ kwalok tiriamo ñan ro rejeramel, einwõt ekkã an kar Jesus kõmmane?
14. 9:9-38 Ewi joñan aõ kwalok tiriamo ilo mour eo aõ, im ewi wãwen aõ maroñ kalaplok aõ kwaloke?
15. 12:19 Ilo aõ katak jen nan in kanan eo an Jesus, ij kate wõt ke ñan kejbãrok iõ jen akwelel ko?
16. 12:20, 21 Ta emõn eo imaroñ kõtõbrake ilo aõ jab kabwer ro jet kin nan ko ak kõmman ko aõ?
17. 12:34-37 Ta eo ij bwebwenato kake enañin aolep ien? Ij jelã bwe ñe ij kiene juõn leen orange, orange juice ej torlok, inem etke ij aikwij kalmenlokjen kin ta eo ej bed iloa, ilo buruõ?—Mark 7:20-23.
18. 15:4-6 Jen nan ko an Jesus, ta eo ij loe kin kejbãrok ilo yokwe ro reritto?
19. 19:13-15 Ij aikwij bõk ien ñan kõmman ta?
20. 20:25-28 Etke ejelok tokjen ñan kate in iroij ion armij ro kin kõnan eo an make? Ewi wãwen imaroñ kajeoñe Jesus ilo men in?
Lemnak ko jet, Mark ear jeje kaki:
21. 4:24, 25 Ewi aorõkin aõ jelã wãwen jerbal ibben ro jet?
22. 9:50 Elañe men eo ij ba im kõmmane ej emõn wõt, ta tokjen ko remõn renaj walok?
Eliktata, jejjo katak ko, Luke ear jeje kaki:
23. 8:11, 14 Elañe ij kõtlok bwe inebata, mweie, im men in kamõnõnõ ren iroij ion mour eo aõ, ta tokjen eo emaroñ walok?
24. 9:1-6 Meñe kar wõr ibben Jesus kajur ñan kamadmõde nañinmij, ta men eo ear likit mokta?
25. 9:52-56 Emõkaj ke aõ lõkatip? Ij kejbãrok iõ ke jen aõ ukõt nana kin nana?
26. 9:62 Ewi wãwen aõ aikwij watõk eddo eo ñan konono kin Ailiñ eo an Anij?
27. 10:29-37 Ewi wãwen aõ maroñ in kamol bwe ña ij juõn ri turiir, jab juõn ri ruwamaejet?
28. 11:33-36 Ta oktak ko imaroñ kõmmane ilo mour eo aõ bwe en bidodolok?
29. 12:15 Ta kõtan eo ikõtan mour im mweiuk ko?
30. 14:28-30 Elañe ij bõk ien ñan etale bebe ko ilo jimwe, ta eo imaroñ kejbãrok iõ jen e, im kin tokjen et eo?
31. 16:10-12 Ta tokjen ko imaroñ bõki ilo aõ mour ilo tiljek?
[Pija eo ilo peij 22]
Jerbal in lomor eo iumin ine eo an Jesus ej men in kaemololo eo