Jerbal in Tel eo Emõn Ia eo Jemaroñ Lo Ie?

“BWE im otemjej armij rej kaleki,” Bible ej ba, “a Eo e ar kalek men otemjej, E Anij.” (Dri Hibru 3:4; Reveles̃õn 4:​11) Ke Anij eo emol, Jehovah, ej Ri Kõmanman eo ad, e “jelã wãwen kõmõnmõn kim.” (Sam 103:14) Eyu jelãlokjen eo an kin joñan maroñ ko im aikwij ko ad. Im kinke e ej juõn Anij in yokwe, ej kõnan kake aikwij kein. (Sam 145:16; 1 Jon 4:8) Aikwij eo ad ñan jerbal in tel eo emõn ejelok oktak.

Ikijen ri kanan Isaiah, Jehovah ear keañ: “Lo! I ar lelok E juõn Dri Kennan ñõn ro dri ailiñ ko, juõn Dri Tel im Iroij ñõn dri ailiñ ko.” (Aiseia 55:4) Mejelan eo ñan jerbal in tel eo ejorrãn rainin ejelet ad lukkun jelã wõn Ri Tel in​—ijitõñin eo Ekajur make. Inem, wõn in ej Ri Tel im Iroij eo kar kanan kake? Ta menin kamol ko an einwõt juõn ri tel? Ia eo enaj tel kij ie? Ta eo jej aikwij kõmmane ñan bõk tokjen jen jerbal in tel eo an?

Ri Tel eo kar Kallimur Kake Ejikrõktok

Jet 2,500 yiõ ko remotlok, enjel Gabriel ear waloklok ñan ri kanan Daniel im jiroñ e: “Im kwon jelã im melele bwe jen ien eo me nan eo ej ilok ñan kajeblak im bar kalek Jerusalem mae Messiah Ri Tel eo, enaj wõr jiljilimjuõn week ko, bareinwõt jiljinoñoul-ruo week ko. E naj jeblak im naj bar kaleke, im kõmmane juõn jikin kwelok im den ko ibelakin, ilo ien ko renana.”​—Daniel 9:​25, NW.

Ealikar, enjel eo ear kejelãik Daniel jejjet in ien eo Ri Tel eo an Jehovah emwij kãlete ej itok. “Messiah Ri Tel eo” enaj kar waloktok ilo jemlokin 69 week ko, ak 483 yiõ ko, bwine jen 455 B.C.E., ke nan eo ear ilok ñan air bar kalek Jerusalem.a (Nihimaia 2:​1-8) Ta eo ear walok ilo jemlokin ien in? Ri jeje Gospel Luke ej kwalok: “Ilo yiõ eo kein kajoñoul-lalem in an Tiberius Caesar iroij, ke Pontius Pilate ear komja in Judea, im Herod ear iroij ilo Galilee [29 C.E.], . . . nan in keañ eo an Anij ear itok ñan John leo nejin Zechariah ilo ene jemaden eo. Inem ear itok ñan aolepen ailiñ eo ibelakin Jordan, kwalok nan kin baptais ilo kakõllan ukwelok ñan jeorlok jerawiwi.” Ilo ien eo, “armij ro rar kiljake” kin Messiah Ri Tel eo. (Luke 3:​1-3, 15, NW) Meñe jar ko rar itok ñan John, ear jab e eo Ri Tel eo.

Inem iturinlok October in 29 C.E. eo, Jesus in Nazareth ear itok ñan John ñan an baptais. Im John ear kennan im ba: “I ar lo Jitõb kãlõltak, einwõt muli, jen lõñ, im Ej ber ion. Im I ar jaje E; a Eo e ar jilkintok iõ bwe in baptais ilo dren, E ar ba ñõn iõ Ion Eo kwo naj lo Jitõb kãlõltak, im ber ion, E in eo ej baptais ilo Jitõb Kwojarjar. Im I ar lo, im kennan bwe E in Nejin Anij.” (Jon 1:​32-​34) Ilo baptais eo an, Jesus ear oktak im Ri Tel eo emwij kãlete​—Messiah eo, ak Christ.

Aet, “Dri Tel im Iroij ñõn ailiñ ko” eo kar kallimur kake ear mol bwe kar Jesus Christ. Im ñe jej etale kadkad ko kadkadin einwõt juõn ri tel, jej bojak in melele bwe jerbal in tel eo an elap an ellãlok jen menin aikwij ko an juõn ri tel ilo ran kein.

Messiah Eo—Juõn Ri Tel Emõn

Juõn ri tel eo emõn ej letok ialin tel eo ealikar im jibañ armij ro iumin kejbãrok eo an ñan bõk bebe im maroñ eo emõn bwe ren maroñ lo tõbrak ilo mejelan abañ ko air. ‘Menin ej juõn menin aikwij ñan lo tõbrak ilo jerbal in tel ilo ebeben in kein ka 21,’ book eo 21st Century Leadership: Dialogues With 100 Top Leaders ej ba. Emõn an bolemen an kar Jesus keboj ri roñjake ro an ñan jerbale wãwen ko rej walok jen ran ñan ran! Baj lemnak kin katak eo an ebuñbuñ​—Katak eo ion Tol eo​. Elap an lõñ im emõn nan in kakabilek ko emwij jei ilo Matu chapter 5 lok ñan 7.

Ñan wanjoñok, lemnak kin kakabilek eo an Jesus kin lo mejelan einjuõn ko an armij. E ar ba: “Inem elañe kwoj katok kin am jurtak i lokatok, im ijo kwoj kememej bwe eor am nana ñõn jeõm im jãtõm, Kwon likit am jurtak na iman lokatok, im ilok; kwon kainemõn jeõm im jãtõm mokta, inem item katok.” (Matu 5:​23, 24) Ilo an juõn bõk kunan mokta ilo an kõmman ainemõn ibben ro jet ej men eo moktata elap tokjen jen an kõmmane juõn eddo an kabuñ, einwõt lelok menin jurtak ko ilo lokatok in temple eo ilo Jerusalem einwõt ke ej menin aikwij ikijen Kien eo ikijen Moses. Elañe ejjab eindein, jerbal ko an kabuñ reban emõn ñan Anij. Kakabilek eo an Jesus joñan an emõn rainin wõt einwõt kar ilo ebeben ko remotlok.

Jesus ear bareinwõt jibañ ri roñjake ro an ñan bõprae aujid eo kin mour etton. E ar kõketak ir: “Kom ar rõn bwe ar ba, ‘Kwon jab lũñ.’ A Ij ba ñõn kom, jabrewõt eo ej kalimjek kõra im mijkaiye emwij an lũñ iben ilo buruen.” (Matu 5:​27, 28) Juõn nan in kakkõl ejejjet! Jej aikwij jab jino jerbale lũñ ilo ad bõk lemnak ko kin lũñ. Jen buru ej itok lejen im lũñ, Jesus ear ba. (Matu 15:18, 19) Jemeletlet ñe jej kejbãrok buruõd.​—Jabõn Kennan Ko 4:​23.

Katak eo ion Tol eo ebareinwõt bed ie kakabilek eo emõntata kin yokwe eo an juõn ion ri kijirãt ro an, kalikar joij, im lemnak eo ejimwe kin mweiuk im men ko ilo jitõb, im men ko einlok wõt. (Matu 5:​43-​47; 6:​1-4, 19-​21, 24-​34) Meñe Jesus ear kwalok ñan ro rar kweloklok ibben im roñjake wãwen eo ñan bukõt jibañ eo an Anij ilo an katakin ir wãwen jar. (Matu 6:​9-​13) Messiah Ri tel eo ej etal wõt im kakajur im keboj ri kalor ro an ñan air jerbal ijelman abañ ko an armij ekkã air walok.

Jiljino alen ilo Katak eo an ion Tol eo, Jesus ear kwalok ennan ko an kin kajin in “kom ar roñ bwe ar ba” ak “im ar bareinwõt ba,” inem ear lelok bar juõn lemnak, im ba “A Ij ba ñõn kom.” (Matu 5:​21, 22, 27, 28, 31-​34, 38, 39, 43, 44) Menin ej kalikar bwe ri roñjake ro an rar iminene in jerbal ilo juõn wãwen, ekkar ñan mantin konono ko an Pharisee ro. Ak kiõ Jesus ear kwalok ñan ir juõn wãwen eo einjuõn​—juõn eo ear jelet jitõb eo emol in Kien eo ikijen Moses. Ilo wãwen in Jesus ear kwalok juõn oktak, ear kõmmane menin ilo juõn wãwen eo ear kõmman an bidodo ñan an ri kalor ro an bõke. Aet, Jesus ear kamakit armij ro ñan air kõmman oktak ko ilo mour ko air, ilo jitõb im mour erreo. Menin kar juõn kakõllan juõn ri tel eo emol.

Juõn management textbook ej kwalok ewi joñan an bin ñan kõtõbrak juõn oktak eo einwõt in. Ej ba: “Ri tel eo ej jelet oktak in ej aikwij eñjake eo an juõn ri jerbal, jelãlokjen ko an juõn psychologist (ri katak kin kalmenlokjen im manit), kijenmij eo an juõn rittõr ilo marathon, niknik eo an juõn bulldog, juõn eo ej make atartar ion e make, im inemõn eo an juõn saint. Im meñe kin aolep kadkad kein, ejelok kamol ñan lo tõbrak ie.”

“Ri tel ro rej aikwij bwe mwiliir en einwõt ilo wãwen eo rej kõnan bwe en mwilin ri kalor ro air,” juõn bwebwenato eo title eo an kar “Jerbal in Tel: Eaorõk ke kadkadin?” Emol, juõn ri tel eo emõn ej jerbale men eo ej kwalok nan kake. Ear mol menin ibben Jesus Christ! Aet, ear katakin ro rar bed ibben bwe ren kõttã, ak ear bareinwõt lelok juõn menin katak ñan ir ilo an kwal neiir. (Jon 13:​5-​15) E ar jab baj jilkinlok wõt ri kalor ro an bwe ren kwalok nan kin news eo emõn kin Ailiñ in Anij, ak e make ear jerbal ilo kijejeto ilo jerbal eo. (Matu 4:​18-​25; Luk 8:​1-3; 9:​1-6; 10:​1-​24; Jon 10:40-​42) Im ilo wãwen eo kin emmakit ñan jerbal in tel, Jesus ear likit juõn joñok. “Nejin e jab mõke maroñ kõmõnmõn jabrewõt,” ear ba kin e make, “a men eo Ej lo Jemen kõmõne.”​—Jon 5:​19.

Etale eo ej walok ijin iman kin men eo Jesus ear ba im kõmmane ej kwalok ilo alikar bwe e ej Ri Tel eo emõn. Ilo mol, ear ellãlok jen aolep kien ko an armij kin jerbal in tel eo emõn. Jesus ewãppen. Ke ear bõk mour in jab wabanban elikin mij im jerkakbiji eo an, ej mour ñan indio. (1 Piter 3:​18; Reveles̃õn 1:​13-​18) Ta ri tel eo an armij emaroñ joñan lok wõt kadkad kein?

Ta eo Jej Aikwij Kõmmane?

Einwõt King eo ej iroij ilo Ailiñ in Anij, “Messiah Ri Tel eo” enaj lutõke jerammõn ko ion armij ro rekiblie. Ikijen menin Jeje ko rej kallimur: “Bwe lõl e naj obrõk kin jela Jeova einwõt dren ko rej kalibubu lojit.” (Aiseia 11:9) “A ro etã burueir re naj jolit ene eo, im re naj kalõñliñ ir mõke kin ainemõn elõñlok.” (Sam 37:11) “Renaj jijet, kajjojo iomin wijki vine eo an im iomin wijki fig eo an, im enaj ejelok juõn ej kõmman bwe ren udiddid.” (Micah 4:​4, NW) “Anij make enaj bed ibbeir. Im enaj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.”​—Revelation 21:​3, 4, NW.

Lal in rainin ej ione juõn jerbal in tel eo ejorrãn. A Jesus Christ, ej tel ro ettã burueir ñan loan juõn lal eainemõn im kãl, ijo armij ro rekiblie renaj burukuk ilo kabuñ ñan Jehovah Anij im naj wõnmanlok wõt ñan wãppen. Elap an aorõk bwe jen bõk ien ñan tõbar jelãlokjen eo kin Anij eo emol im Ri Tel eo an emwij kãlete im jerbal ilo errã ibben jelãlokjen in!​—Jon 17:3.

Juõn ian menin nebar ko remõntata jemaroñ lelok ñan juõn armij ej ñan kajeoñe e. Inem jej aikwij jab kajeoñ in kajeoñe Ri Tel eo elaptata ilo bwebwenato an armij ke​—Jesus Christ? Ewi wãwen ad maroñ kõmman eindein? Ta eo enaj jelet mour ko ad ilo ad bõk jerbal in tel eo an? Kajitõk kein im ko jet naj konono kaki ilo katak kein ruo tok ilokan.

[Kamelele eo itulal]

[Pija eo ilo peij 4]

Daniel ear kanan kin itok eo an Ri Tel eo an Anij emwij kãlete

[Pija ko ilo peij 7]

Katak ko an Jesus rar keboj armij ro an ñan jerbal ijelman abañ ko ilo mour in

[Pija eo ilo peij 7]

Jesus enaj tel armij ro rekiblie ñan loan juõn lal eainemõn im kãl