Jerbal In Tel Eo An Christ Emol Ke Ñan Yuk?

“Im ren jab naetami ‘ri tel,’ bwe juõn ami ri tel, Christ.” —MATTHEW 23:​10, New World Translation.

1. Wõn eo e wõt ej Ri Tel eo an Christian ro remol?

KAR RAN IN Tuesday, Nisan 11. Jilu ran tokelik, renaj kar mõn Jesus Christ. Eñin kar lolok eo an eliktata ñan temple eo. Ilo ran in, Jesus ear lelok juõn katak eo eaorõk ñan jar in armij ro rar kweloklok ijo im ñan ri kalor ro an. E ar ba: “A komin jab bõk etami Rabbai: bwe juõn ami ri kaki: im kom otemjej jimjãn jimjãten. Im jab naetan jabdewõt armij jememi i lal: bwe juõn Jememi, eo ej ber i lañ. Im ren jab naetami ‘ri tel,’ bwe juõn ami ri Tel, Christ.” (Matthew 23:​8-​10, NW) Ealikar, Jesus Christ ej Ri Tel eo an Christian ro remol.

2, 3. Eoroñ Jehovah im bõk Ri Tel eo emwij an kãlete ta eo menin ej jelete ilo mour ko ad?

² Ta tokjen ko remõn jerbal in tel eo an Jesus ej jelet mour ko ad ñe jej bõke! Ilo an kar kanan lok iman kin itok eo an Ri Tel in, Jehovah Anij ear keãñ ikijen ri kanan Isaiah: “O, jabrewõt eo ej maro, komin itok ñõn dren ko, im eo ejelok mõnni iben; komin itok, wiaik, im mõña; aet, komin itok, wiaik wain im milk kin ejelok mõnni im ejelok wõnan. . . . Komin kanuij eoroñ Iõ, im mõña men eo emõn, im ami en mõnõnõ kin kioeo. . . . Lo! I ar lelok E juõn Dri Kennan ñõn ro dri ailiñ ko, im juõn Dri Tel im Iroij ñõn dri ailiñ ko.”​—Aiseia 55:​1-4.

³ Isaiah ear kajerbal den ko​—aebõj, milk, im wine​—einwõt (juõn nan ñan juõn men im ñan bar juõn men) ñan kwalok wãwen eo ej jelet mour eo ad kajjojo ñe jej eoroñ Jehovah im lore Ri Tel im Iroij eo ear letok ñan kij. Tokjen eo ej kaemololo. Ej einwõt idak juõn kap in den molo ilo juõn ran eo ebwil. Ad mãro ñan mol im kwojarjar ej kajju buru. Einwõt an milk kakajur niñniñ ro im jibañ ir ñan air rittolok, ‘milk eo ilo nan eo’ ej kakajurlok kij im kalaplok eddeklok eo ilo jitõb ilo kõtan eo ad ibben Anij. (1 Piter 2:​1-3) Im wõn emaroñ kariap bwe wine ej bõktok lañliñ ilo ien kwojkwoj ko? Ilo juõn wãwen eo einlok wõt, kabuñ ñan Anij eo emol im anõk buñten nee ko an Ri Tel eo an emwij kãlete ej kõmman bwe mour en “ejelok jabdewõt ak lañliñ.” (Deuteronomy 16:​15, NW) Inem, elap tokjen, bwe kij otemjej​—dik im ritto, maan im kõrã⁠—jen kwalok bwe jerbal in tel eo an Christ emol ñan kij. Inem, ewi wãwen ad maroñ kalikar ilo mour eo ad ran otemjej bwe Messiah eo ej Ri Tel eo ad?

Jodikdik ro​—Etal Wõt im “Wõnmanlok ilo Meletlet”

4. (a) Ta eo ear walok ke Jesus ej 12-yiõ dettan im ear lolok Jerusalem ilo ien Kwojkwoj in Kijone eo? (b) Ewi joñan an kar emõn an Jesus bõk melele ke ear 12 wõt yiõ dettan?

⁴ Lemnak kin joñok eo Ri Tel eo ad ear likiti ñan jodikdik ro. Meñe edik jelã kake Jesus kin ien eo ear ajiri wõt, juõn men eo ear walok ebwe an alikar. Ke Jesus ear 12 yiõ dettan, jemen im jinen rar bõke ibbeir ilo ien lolok eo air ñan Jerusalem yiõ otemjej ñan kwojkwoj in kijone eo. Ilo ien in ear lukkun mar an ilo juõn konono kin Jeje ko, im family eo an ear ilok jen e ilo air jaje bwe ear jab etal ibbeirlok. Jilu ran elikin jemen im jinen Joseph im Mary rar inebata, rar loe ilo temple eo, “Ej jijõt iolapin ro dri kaki, Ej roñjake ir, im kajitõk ibeir.” Bareinwõt, “ir otemjej rej roñjake re bwilõñ kin An meletlet im nan in uak.” Kalmenlokjen, ke ej 12 wõt yiõ dettan, Jesus ear jab maroñ kajitõk wõt kin lemnak ko remũlal, im kajitõk ko an men ko ilo jitõb ak ear bareinwõt lelok uak ko remeletlet! Ejelok bere, ear bõk jibañ jen katak eo an jemen im jinen.​—Luk 2:​41-​50.

5. Ewi wãwen an jodikdik ro maroñ etale air lemnak kin katak Bible eo an family eo?

⁵ Bõlen kwe juõn jodikdik. Elañe jemõm im jinõm rej ri karejar ro reniknik an Anij, alikar ewõr juõn program in katak Bible an family eo rej ekkeini ilo mweo imõm. Ta eñjake eo am kin katak eo an family eo? Ewõr tokjen ñan kalmenlokjen kin kain kajitõk kein einwõt: ‘Ij rejetak ke karõk eo ñan katak Bible ilo family eo aõ kin aolepen buruõ? Ij karõk ke ien ñan katak eo?’ (Dri Pilippai 3:​16) ‘Ij juõn eo ke ej niknik in bõk kunan ilo katak eo? Ñe ekkar, Ij kwalok ke kajitõk ko kin men ko ilo katak eo im bõk kunaõ im uak kin men ko rej jerbali ie? Ke Ij wõnmanlok ilo jitõb, Ij ejaake ke juõn edjoñ ñan “ekõn ko rebin rej ekar ñõn ro re ridto?”​—Dri Hibru 5:​13, 14.

6, 7. Ewi wãwen an juõn program in read Bible ran otemjej maroñ aorõk ñan jodikdik ro?

⁶ Juõn program in read Bible ran otemjej ebareinwõt aorõk. Ri jeje sam ear al: “Emõnõnõ armij eo e jab etal ilo bebe an ro dri jerawiwi, . . . a ej lõñliñ ilo kien Jeova; im ej lemnok kin kien eo ran im boñ.” (Sam 1:​1, 2) Joshua, leo ear bõk jikin Moses, ear ‘kalmenlokjen kake, ran im boñ.’ Menin ear kamaroñe ñan an jerbal ilo meletlet im ear lo tõbrak ilo an jerbale eddo eo lelok in Anij. (Joshua 1:8) Ri Tel eo ad, Jesus Christ, ear ba: “Ar jeje, ‘Armij e jamin mour kin bred wõt, a kin nan otemjej rej waloktok jen loñin Anij.’” (Matu 4:4) Elañe jej aikwij ekõn ko ilo kanniek ran otemjej, elaplok joñan ad aikwiji ekõn ko ilo jitõb im ekkeini ad bõki!

⁷ Ilo an kile aikwij eo an ilo jitõb, Nicole 13-yiõ dettan ear jino read Bible ran otemjej.a Kiõ, ke ej 16 yiõ dettan, ededelok an readi aolepen Bible juõn alen im enañin tõbarlok jimettan in ilo ien in kein karuo. Kilen eo ej kajerbale ebidodo. “Ij karõk ñan aõ read juõn chapter juõn ran,” ej ba. An read Bible ran otemjej ewi wãwen an menin jibañ e? Ej uak: “Elap an lõñ kareelel ko renana rainin. Ran otemjej Ij jelmae ijjibed ko ilo school im ijoko jet me rej aitwerõk tõmak eo aõ. Read Bible ran otemjej ej jibañ ñan an mõkaj aõ kememej tok kien ko im nan in kaiñi ko ilo Bible im rej kakajur iõ ñan jumae ijjibed kein. Einwõt juõn tokjen, Ij eñjake aõ ebaklok ñan Jehovah im Jesus.”

8. Ta kar manit eo an Jesus kin imõn kwelok eo, im ewi wãwen an jodikdik ro maroñ kajeoñe e?

⁸ Jesus ear bed manit in ibben ñan roñjake im bõk kunan ilo read Jeje ko ilo imõn kwelok eo. (Luk 4:​16; Jerbal 15:21) Emõn menin ñan an jodikdik ro anõk joñok in ilo air ekkeini bed ilo kwelok ko an Christian, ijo rej read im katak Bible ie! Ilo an kwalok an kamolol kin kain kwelok rot in, Richard 14-yiõ dettan ej ba: “Kwelok ko raorõk ñan ña. Ekkã aõ bõk nan in kakememej ijo kin ta eo emõn im nana, ta eo erreo im jab erreo, ta eo ej einwõt Christian im ta eo ejjab. Ij jab aikwij katak menin ilo wãwen eo ebin.” Aet, “kakememej eo an Jehovah tellokin liki, ej kõmman bwe eo ejelok an jelã en meletlet.” (Sam 19:7) Nicole bareinwõt ej kõmman bwe en juõn karõk ñan an bed ilo aolep kwelok ko lalem an congregation eo week otemjej. Ej kajerbal jen ruo ñan jilu awa im kebojak ñani.​—Dri Epesõs 5:​15, 16.

9. Ewi wãwen an jodikdik ro maroñ etal wõt im kõmman “wõnmanlok ilo meletlet”?

⁹ Jodikdik ej juõn ien emõn ñan bõk ‘jelãlokjen eo kin Anij eo ej make wõt mol, im eo ear jilkintok, Jesus Christ.’ (Jon 17:3) Kwo maroñ jelã jodikdik ro rej kajerbal elap ien ñan read comic book ko, aluij television, ikkure kin video game ko, ak lale Internet ñan ennan ko ilo Internet network eo. Etke kwoj aikwij kajeoñe ir ñe kwoj anõk joñok eo ewãppen an Ri Tel eo ad? Einwõt juõn ladik, ear lo mõnõnõ ilo an katak kin Jehovah. Im ta kar tokjen eo? Kin yokwe eo an ñan men ko ilo jitõb, “Jesus ej laplok ilo An meletlet.” (Luk 2:​52) Eindein kwe kwo maroñ.

“Kõtãik Kom ñõn Dron”

10. Ta eo enaj jibañ mour in family eo bwe en juõn unjen ainemõn im mõnõnõ?

¹⁰ Mweo jikin jokwe emaroñ juõn jikin ainemõn im jokane ak juõn jikin tarinae kin akwel im bwoktak. (Jabõn Kennan 21:19; 26:21) Ad bõk jerbal in tel eo an Christ ej jibañ kij kalaplok ainemõn im mõnõnõ ilo family eo. Ilo mol, joñok eo an Jesus ej joñok eo ñan kõtan ko an family. Jeje ko rej ba: “Im kõtãik kom ñan dron ilo mijõk Kraist. Kõra ro, komin kõtãik kom ñõn lõmaro belemi, einwõt ñõn Iroij, bwe leo e bõran lio belen, einwõt Kraist e bõran eklisia, im E Dri Lomoren enbwin. . . . Man ro, komin yokwe limaro belemi, einwõt Kraist e ar bareinwõt yokwe eklisia, im mõke lelok E kin e.” (Dri Epesõs 5:​21-​25) Ñan congregation (eklisia) eo ilo Colossae, ri jilek Paul ear je: “Ajiri, komin kiblie ñõn ro jememi im ro jinemi ilo men otemjej, bwe men in ej kabuñburuen Iroij.”​—Dri Kolosse 3:​18-20.

11. Ewi wãwen an juõn emaan ri belele maroñ kwalok bwe jerbal in tel eo an Christ ej juõn men eo emol ñan e?

¹¹ Lor nan in kakabilek in melelen bwe leo ri belele ej tel ilo family eo, lio belen ilo tiljek ej jibañ e, im ajiri ro rej bokake jemeir im jineir. Ak jerbal in tel eo an leo, ej walok tokjen ilo mõnõnõ ilo wõt an jerbale ilo jimwe. Juõn emaan ri belele eo emeletlet ej aikwij katak wãwen kõmmane jerbal in tel eo an ikijen an kajeoñe Bõran im Ri Tel eo an make, Christ Jesus. (1 Dri Korint 11:3) Meñe tokelik Jesus ear oktak im “bõran men otemjej ñõn eklisia,” ear jab itok ñan lal, “bwe armij ren jerbal ñõn E, a bwe En jerbal ñõn ir.” (Dri Epesõs 1:​22; Matu 20:28) Ilo juõn wãwen eo einlok wõt, juõn Christian emaan ri belele ej kõmmane jerbal in tel eo an, ejjab ñan tokjen kibbon, ak ñan iõrõke tokjen ko an lio belen im ajiri ro nejin​—Aet, aolepen family eo. (1 Dri Korint 13:​4, 5) Ej bukõt an kajeoñe kadkadin Anij im bõr eo bõran, Jesus Christ. Einwõt Jesus, ej inemõn im ettã buru. (Matu 11:28-​30) Nan rot kein einwõt “jolok bwid” ak “kwo jimwe” rejjab bin ñan ba ñe ej bwid. Joñok eo an emõn ej kõmman an bidodolok bwe lio belen en juõn “ri jibañ,” juõn ej “kautiej,” im juõn “rejetan” ñan kain emaan rot in, katak jen e im jimor jerbal ibben.​—Jenesis 2:​20; Malachi 2:​14, NW.

12. Ta eo enaj jibañ juõn kõrã ri belele bõke ilo an ejelok jumae nan in kaiñi eo kin jerbal eo an bõr eo?

¹² Lio belele, ijo kunan, ej ñan kõttãik e ñan leo belen, Bõtab, elañe jitõbõn lalin ej jelete, menin emaroñ jino kamõjnoik lok lemnak eo an kin nan in kaiñi eo kin jerbal eo an bõr eo, im lemnak eo kin kõttã ñan juõn emaan ejamin jerbal ñane. Jeje ko rejjab kwalok bwe leo ej aikwij kajur, ak rej aikwiji an kõrã ro ri belele kõttãik ir ñan lõmaro beleir. (Dri Epesõs 5:​24) Bible eo ej bareinwõt aikwiji an leo ri belele ak jemen ajiri bõk eddo ilo family eo, im ñe ej jerbale nan in kakabilek ko ilo Jeje ko, menin elap kilan ñan ainemõn im lajrak ilo family eo.​—Dri Pilippai 2:5.

13. Ta joñok eo kin kõttã Jesus ear kwalok kin ajiri ro?

¹³ Ajiri ro ren aikwij bokake jemeir im jineir. Ikijen menin, Jesus ear likit juõn joñok eo emõntata. Ilokanlok men eo ear walok ilo temple eo ke ear 12-yiõ dettan ke rar ilok jen Jesus iumin jilu ran, “ear wõnlõllok ibeir [jemen im jinen] im itok ñõn Nazareth, im ej bokake ir.” (Luk 2:​51) An ajiri ro kõttãik ir ñan jemeir im jineir menin ej jibañ kalaplok ainemõn im ibben don eo ilo family eo. Ñe jabdewõt ilo family eo ej kõttãik e ñan jerbal in tel eo an Christ, tokjen eo ej juõn family eo elemõnõnõ.

14, 15. Ta eo enaj jibañ kij lo tõbrak ñe jej jelmae juõn wãwen aitwerõk ilo mweo? Kwalok juõn wanjoñok.

¹⁴ Meñe ilo ien ko me wãwen ko rebin rej walok ilo mweo, key eo ñan lo tõbrak ej ñan kajeoñe Jesus im ialin tel eo an. Ñan wanjoñok, belele eo an Jerry 35-yiõ dettan ibben Lana, jinen juõn jodikdik ledik, ear kõmmane juõn abañ eo ejelok juõn iairro ear kalmenlokjen kake. Jerry ej kamelele: “Iar jelã bwe ñan aõ juõn bõr eo emõn, Iar aikwij jerbale ejja nan in kakabilek ko wõt ilo Bible ñan bõktok tõbrak ilo family ko jet. Ak ejjabto Iar lo bwe I ar aikwij jerbali kin elap meletlet im jelãlokjen.” Ledik eo nejin lio ear beleke ear lemnak kin e einwõt juõn eo ear kõmman an wõr kõtairro jinen im elap an jumae. Jerry ear aikwij jelãlokjen ñan an lo bwe lemnak in ear jelet men eo ledik eo ear ba im kõmmane. Ewi wãwen an kar jerbale wãwen eo? Jerry ej uak: “Lana im Ña kimro ar errã ilo ien eo bwe, Lana en bõke im kejbãrok wãwen kauwe eo an jemen im jinen ak ña Ij ejaake juõn kõtan eo emõn ibben ledik eo nejiõ im nejin lio ibba. Tokelik, kilen in ear bõktok tokjen ko remõn.”

¹⁵ Ñe jej jelmae wãwen ko rebin ilo mweo, jej aikwij jelãlokjen ñan bukõt unin an ro uan family eo konono im jerbal ilo wãwen eo rej kõmmane. Jej bareinwõt aikwij meletlet ñan jerbale nan in kaiñi ko an Anij ilo jimwe. Ñan wanjoñok, Jesus ear alikar an jelãlokjen kin unin an kõrã eo eñtan jen juõn torlok in bõtõktõk im menin ear kamakit e, im ear kamadmõde kõrã eo ilo meletlet im yokwe. (Livitikõs 15:25-​27; Mark 5:​30-​34) Meletlet im jelãlokjen rej kadkad ko kadkadin Ri Tel eo ad. (Jabõn Kennan Ko 8:​12) Jej mõnõnõ elañe jej jerbal ilo wãwen eo enaj kar jerbale.

‘Bukot Mokta Ailiñ in Anij’

16. Ta eo ej aikwij bed ilo jikin eo iolaplap in mour ko ad, im ewi wãwen an kar Jesus kwalok menin ikijen joñok eo an?

¹⁶ Jesus ear kalikar kin ta eo ej aikwij bed ijo iolaplap in mour ko an ro rej bõk jerbal in tel eo an. E ar ba: “A komin bukot mokta ailiñ in Anij, im kwojarjar eo An.” (Matu 6:​33) Im ikijen joñok eo an, ear kwalok ñan kij wãwen kõmmane menin. Ilo jemlokin 40-ran in ien jitlok eo, kalmenlokjen, im jar elikin an baptais, Jesus ear jelmae juõn kabo. Satan Devil eo ear lelok ñan e jerbal in iroij ion “ailiñ in lõl otemjej.” Kalmenlokjen kin mour eo an Jesus elañe ear bok men eo Devil eo ear lelok! Bõtab, Christ ear kalimjek wõt ion an kõmanman ankilan Jemen. E ar kile bareinwõt, bwe juõn mour eo einwõt in ilo lal eo an Satan enaj kar kadu. E ar mõkaj im kajekdon menin lelok eo an Devil eo, im ba: “Bwe ar je, ‘Kwon kabuñ ñõn Iroij am Anij, im kwon jerbal ñõn E wõt.’” Ejjabto elikin, Jesus “ej jino An kwalok im ba, ‘Komin ukwelok ibemi; bwe ailiñ in lõñ ebak.’” (Matu 4:​2, 8-​10, 17) Bwen ran in mour ko an ion lal, Christ kar juõn full-time ri keañ kin Ailiñ in Anij.

17. Ewi wãwen ad maroñ kwalok bwe tokjen ko an Ailiñ eo rej men ko moktata ilo mour ko ad?

¹⁷ Jej aikwij kajeoñe Ri Tel eo ad im jab kõtlok bwe lal in an Satan en anelok kij ñan ad kõmman bwe jikin jerbal ko elap wõnãn jerbal ie en mejenkajjik eo ad elap ilo mour. (Mark 1:​17-​21) Emenin bwebwe ñan ad oktak im lorak ilo juõn aujid an lal in ilo jibadbad ko an lal in im kõtlok bwe tokjen ko an Ailiñ eo ren oktak im kein karuo! Jesus ear kabbeik kij kin jerbal in kwalok nan eo an Ailiñ eo im jerbal in kõmman ri kalor eo. (Matu 24:14; 28:19, 20) Aet, emaroñ wõr juõn ad family ak eddo ko jet ñan kejbãroki, ak jejjab mõnõnõ ke in kajerbal joten ko im ran ko tu jemlokin week eo (Saturday, Sunday) ko ñan jerbale eddo in Christian eo ad ñan kwalok nan im katakin? Im emenin kakajur bwe ilo yiõ in jerbal eo 2001, ear wõr 780,000 rar maroñ jerbal einwõt full-time ri kwalok nan, ak pioneer!

18. Ta eo ej jibañ kij lo lañliñ ilo jerbal in kwalok nan eo?

¹⁸ Bwebwenato in Gospel ko rej pijaiki Jesus einwõt juõn emaan in jerbal bareinwõt juõn armij ewõr an eñjake in yokwe. Ke ear lo aikwij eo ilo jitõb an armij ro ibelakin, ear buromõj kin ir im ear lelok jibañ ñan ir. (Mark 6:​31-​34) Jerbal in kwalok nan eo ad ej oktak im kalañliñ ñe jej bõk kunad ie kin ad yokwe ro jet im juõn kõnan ñan jibañ ir. Ak ewi wãwen ad maroñ bõk juõn kõnan eo einwõt in? “Ke Iar jodikdik wõt,” juõn likao dikdik etan Jayson ej ba, “Ear jab lukkun wõr aõ itoklimo ilo jerbal in kwalok nan eo.” Ta eo ear jibañ e ejaake yokwe eo ñan jerbal in? Jayson ej uak: “Ilo family eo aõ, jibboñin ran in Saturday otemjej kim kin kwalok nan jen em ñan em. Menin ear emõn ñan iõ kinke elak laplok aõ etal em kwalok nan, elaplok aõ lo emõn eo ej kõtõbrake im elaplok aõ lañliñ kake.” Kij bareinwõt jej aikwij ekkeini ad niknik in bõk kunad ilo jerbal in kwalok nan eo.

19. Ta eo ej aikwij bebe eo ad ikijen jerbal in tel eo an Christ?

¹⁹ Emol ej menin kaemololo im ãjin kij ñan bõk jerbal in tel eo an Christ. Ñe jej bõke, jodikdik ej oktak im juõn ien ñan kõmman wõnmanlok ilo jelãlokjen im meletlet. Mour in family eo ej oktak im juõn unjen ainemõn im mõnõnõ, im jerbal in kwalok nan ej oktak im juõn jerbal eo ej bõktok lañliñ im juburu. Inem emol, bwe jen beek ñan kalikar ilo mour eo ad ran otemjej im ilo bebe ko jej kõmmani bwe jerbal in tel eo an Christ ej lukkun juõn men eo emol ñan kij. (Dri Kolosse 3:​23, 24) Meñe Jesus Christ, ej Ri Tel eo ad ilo bar juõn wãwen​—congregation eo an Christian. Katak in tok juõn naj konono kin wãwen ad maroñ bõk tokjen jen karõk in.

[Kamelele ko itulal]

Kwoj Kememej Ke?

• Lore Ri Tel eo ad Anij ear kãlete ewi wãwen an menin wõr tokjen ñan kij?

• Ewi wãwen an jodikdik ro maroñ kwalok bwe rej kõnan lore jerbal in tel eo an Jesus?

• Ta eo jerbal in tel eo an Christ ej jelete ilo mour in family eo an ro rej lelok ir ñane?

• Ewi wãwen an jerbal in kwalok nan eo ad maroñ kwalok bwe jerbal in tel eo an Christ ej juõn men eo emol ñan kij?

[Pija ko ilo peij 9]

Jodikdik ej juõn ien emõn ñan bõk jelãlokjen eo kin Anij im Ri Tel eo ad emwij kãlete

[Pija eo ilo peij 10]

Kõttã ñan jerbal in tel eo an Christ ej kalaplok mõnõnõ eo an family eo

[Pija ko ilo peij 12]

Jesus ear bukõt mokta Ailiñ eo. Kwoj ke?