Kobaik Kabuñ Eo Ekwojarjar Ibben Kijenmij Eo Am
“Ilo ami tõmak . . . kijenmij, ilo ami kijenmij, wãnik.”—2 PITER 1:5, 6.
1, 2. (a) Ikijen juõn ajiri kain eddek rot eo ej kõtõmene kake? (b) Ewi joñan aorõkin rittolok ilo jitõb?
EDDEK IM RITTOLOK ej juõn men eaorõk ibben juõn ajiri, ak ewõr juõn kõnan elaplok jen ad baj rittolok wõt ilo kanniek. Jej aikwij rittolok ilo lemnak im eñjake bareinwõt. Tokelik, ajiri eo enaj wutik wãwen ko einwõt juõn ajiri im rittolok einwõt juõn emaan ak kõrã. Ri jilek Paul ear jitõñlok ñan men in ke ear je: “Ke I ar ajiri, I ar konono einwõt ajiri, I ar jela einwõt ajiri, I ar lemnok einwõt ajiri: a kiõ bwe I ridto emwij aõ wutik men ko an ajiri.”—1 Dri Korint 13:11.
2 Nan ko an Paul rej kalikar juõn ennan eaorõk kin rittolok ilo jitõb. Ri Christian ro rej aikwij rittolok jen niñniñ ro ilo jitõb ñan ro re “ritto ilo air maroñ ñan melele.” (1 Corinthians 14:20, NW) Rej aikwij kate wõt ir im tõbarlok “ñõn joñõn ridtõn an Kraist obrõk.” Inem rejamin einwõt “ajiri, im jibliklik einwõt no ko, im makõtkit kin jabrewõt kõto in katak.”—Dri Epesõs 4:13, 14.
3, 4. (a) Ta eo jej aikwij kõmmane ñan rittolok ilo jitõb? (b) Ta kadkad ko rekwojarjar jej aikwij kwaloki, im ewi joñan aorõkiir?
3 Ewi wãwen ad maroñ rittolok ilo jitõb? Meñe rittolok ilo kanniek ej baj walok wõt ilo wãwen ko remõn, jej aikwij kate wõt kij ñan rittolok ilo jitõb. Ej ijjino ñe jej bõk jelãlokjen eo ejejjet jen Nan in Anij im jerbal ekkar ñan ta eo jej katak kake. (Dri Hibru 5:14; 2 Piter 1:3) Jeltokin, ej kamaroñ kij ñan kwalok kadkad ko kadkadin Anij. Einlok wõt rittolok ilo kanniek im wãwen ko rej ekkeijaklok ñan e, kadkad ko kadkadin Anij rej eddeklok ilo ejja ien eo wõt. Ri jilek Peter ear je: “Kin men in komin kate kom, im ilo ami tõmak komin kõke emõn, im ilo ami emõn, jelalokjen; im ilo ami jelalokjen, jadõr; im ilo ami jadõr, kijenmij; im ilo ami kijenmij, wãnik; im ilo ami wãnik, joij ñõn dron; im ilo ami joij yokwe.”—2 Piter 1:5-7.
4 Kadkad ko Peter ear kilajraki rej aorõk, im jejjab maroñ kajettokjen jabdewõt iair. Ear koba: “Bwe elañe men kein rej ami im lõñlok; rej kõmõn bwe komin jab jowõn ak jowa ñõn jela ar Iroij Jisõs Kraist.” (2 Piter 1:8) Jen etale kiõ aikwij eo ñan kobaiklok kabuñ eo ekwojarjar ibben kijenmij eo ad.
Aikwij eo ñan Kijenmij
5. Etke jej aikwij kijenmij?
5 Peter im Paul jimor rar kobaik kabuñ eo ekwojarjar ibben kijenmij. (1 Timote 6:11) Ad kijenmij wõt ej melelen elaplok jen ad baj bin wõt ilo kajur iumin melejoñ im beran wõt. Ej kitibuj meanwõd, beran, im tiljek, jab luji kejatdikdik eo ñe jej jelmae melejoñ, men in kabañbañ, men in kabo, ak matõrtõr ko. Kinke jej mour ilo “kwojarjar ilo Kraist Jisõs,” jej kõtmene bwe jenaj bõk matõrtõr. (2 Timote 3:12) Jej aikwij kijenmij elañe jekõnan kalikar yokwe eo ad ñan Jehovah im kaddeklok kadkad ko jej aikwiji ñan bõk lomor. (Dri Rom 5:3-5; 2 Timote 4:7, 8; Jemes 1:3, 4, 12) Elañe ejelok kijenmij, jejjab maroñ bõk mour indio.—Dri Rom 2:6, 7; Dri Hibru 10:36.
6. Kijenmij ñan jemlokin ej melelen ad kõmman ta?
6 Meñe ilo jinoin wãwen mour eo ad ear jimwe wõt, men eo elaptata ej bwe jen kijenmij. Jesus ear ba: “Eo e naj kijinmij ñõn jemlokin, e in e naj mour.” (Matthew 24:13) Aet, jej aikwij kijenmij ñan jemlokin, jekdon elañe ej melelen kijenmij mae ien jej mij ak mae ien jemlokin jukjuk im bed in enana. Jekdon ta ien eo jej aikwij tiljek wõt ñan Anij. Bõtab, elañe jejjab kakobaik kabuñ eo ekwojarjar ibben kijenmij eo ad, jejjab maroñ kabuñburuen Jehovah, im jeban bõk mour indio. Ak ta melelen kabuñ eo ekwojarjar?
Ta Melelen Kabuñ eo Ekwojarjar
7. Ta in kabuñ eo ekwojarjar, im ta eo ej kamakit kij bwe jen kõmmane?
7 Kabuñ eo ekwojarjar ej wãwen am make kautiej, kabuñ, im jerbal ñan Jehovah Anij kin am tiljek ñan wãwen iroij eo an ijoko otemjej ilañ im ion lal. Ñan am kabuñ ilo kwojarjar ñan Jehovah, kwoj aikwij bõk jelãlokjen eo ejejjet kin e im wãwen ko an. Jej lukkun kõnan jelã kajjen Anij, im kebak e. Men in enaj kamakit kij bwe en wõr juõn kõtan ebak ñan e, im enaj alikar ilo jerbal im wãwen mour eo ad. En wõr juõn kõnan ibbed ñan lukkun kajeoñe Jehovah joñan wõt ad maroñ—anõk wãwen ko an im kalikar kadkad ko kadkadin. (Dri Epesõs 5:1) Emol, kabuñ eo ekwojarjar ej kamakit kij ñan kabuñburuen Anij ilo men otemjej jej kõmmani.—1 Dri Korint 10:31.
8. Ewi wãwen kabuñ eo ekwojarjar im kabuñ ñan juõn wõt Anij rej jerbal ibben don?
8 Ñan jerbale kabuñ eo ekwojarjar im mol, jej aikwij kabuñ ñan Jehovah wõt, jab kõtlok jabdewõt men ñan kaboub buruõd. Einwõt Ri Kõmanman eo ad, ej tellokin bõk kabuñ eo ad ñan e wõt. (Duteronomi 4:24; Aiseia 42:8) Mekarta, Jehovah ejjab iun kij ñan kabuñ ñan e. Ej yokwe eo ad ñan Anij, eo ej bedbed ion jelãlokjen eo ejejjet, bwe jen emmakit ñan karreoik mour eo ad im wujleplok kij ñan e im mour ekkar ñan bebe eo ad.
Ejaake juõn Kõtan Ebak Ibben Anij
9, 10. Ewi wãwen ad maroñ ejaak im debij juõn kõtan ebak ñan Anij?
9 Elikin ad kalikar wujleplok eo ad ñan Anij ilo baptais, jej aikwij wõnmanlok im ejaake juõn kõtan ebaklok ñan e. Inem kõnan eo ad ñan kõmmane men in im jerbal ñan Jehovah ilo tiljek ej kamakit kij ñan wõnmanlok im katak kin Nan eo an im kalmenlokjen kake. Ñe jej kõtlok bwe jitõbõn Anij en jerbal ilo lolãtãt eo ad im buruõd, yokwe eo ad ñan Jehovah enaj mũlallok wõt. Kõtan eo ad ibben ej men eo eaorõktata ilo mour eo ad. Jej watõk bwe Jehovah ej Jerad eo emõntata im jekõnan kabuñburuen ien otemjej. (1 Jon 5:3) Lañliñ eo ad kin ad bed ilo juõn kõtan emõn ibben Anij ej laplok wõt, im jej kamolol bwe ear katakin kij im kajimwe kij ñe jej aikwiji.—Duteronomi 8:5.
10 Elañe jejjab keini in kamaat ad maroñ in kakajurlok kõtan eo ad eaorõk ibben Jehovah, emaroñ jakolok. Elañe men in enaj walok, ejelok ruõn Anij kin men in, kinke “E jab etolok jen kij otemjej.” (Jerbal 17:27) Elap ad mõnõnõ bwe Jehovah ejjab kõmman bwe ial eo ñan kebake ejjab bin! (1 Jon 5:14, 15) Emol, jej aikwij kate wõt ñan debij juõn kõtan ebak ibben Jehovah. Bõtab, ej jibañ kij ñan kebak e ilo an letok elõñ men in jibañ ko jej aikwiji ñan ejaak im kabuñ wõt ilo kwojarjar. (Jemes 4:8) Ewi wãwen ad maroñ kajerbal aolepen men in letok kein rej yokwe?
Kajurlok Wõt ilo Jitõb
11. Ta jet ian wãwen ko jemaroñ kwalok kabuñ eo ad ekwojarjar?
11 Yokwe eo ad emũlal ñan Anij enaj kamakit kij bwe jen kwalok juõn joñan kabuñ eo ekwojarjar, ekkar ñan nan in kakabilek eo an Paul: “Kwon kate yuk bwe Anij en lo kwo mõn, dri jerbal e jamin jok im ejimwewõt an katakin kin nan in mol.” (2 Timote 2:15) Ñan kõmman men in jej aikwij lor juõn lajrak emõn ñan keini in katak Bible, bed ilo kwelok ko, im bõk kunad ilo jerbal in kwalok nan. Bareinwõt jemaroñ bed ebak ñan Jehovah ilo ad ‘jab jokwor ad jar.’ (1 Dri Tessalonika 5:17) Nan kein ewõr meleleir ñan kabuñ eo ad ekwojarjar. Kajekdon jabdewõt ian men kein emaroñ bõktok nañinmij eo ilo jitõb im kõmman bwe kabo ko an Satan ren kabo kij.—1 Piter 5:8.
12. Ewi wãwen ad maroñ lo tõbrak in kijenmij ilo melejoñ ko?
12 Kajurlok wõt ilo jitõb im jab jakkeini emaroñ jibañ kij bwe jen anjo ion elõñ melejoñ ko rej buñõt kij. Melejoñ ko remaroñ itok jen jikin ko relukkun melejoñe kij. Jab itoklimo, jumae, im matõrtõr remaroñ binlok ñan ad kijenmij kaki ñe rej waloktok jen ro uan family ko rej ebake kij, ro nukid, ak ro ri turud. Ijjibed ko ebin loi ñan kabwer kij jen ad tiljek wõt ñan kien ko an Christian remaroñ waloktok jen jikin jerbal ko ad ak ilo school. Ebwer, nañinmij, im buromõj remaroñ kamõjnoik kij ilo kanniek im kõmman bwe en binlok ad kijenmij kake melejoñ in tõmak ko. Ak jemaroñ anjo ion aolep melejoñ ko elañe jej kate wõt kij im “kõmõn wãnik im kabuñ rokwojarjar, ke [jej] kõtõmene im lipjerjer an ran in Iroij itok.” (2 Piter 3:11, 12) Im jemaroñ lañliñ wõt ilo ad kõmman men in, im liki bwe Anij enaj kajerammõn kij.—Jabõn Kennan 10:22.
13. Ta eo jej aikwij kõmmane elañe jekõnan wõnmanlok im jerbale kabuñ eo ekwojarjar?
13 Meñe Satan ej kõjjeroroik ro rej kabuñ ilo kwojarjar, jejjab aikwij mijak. Etke? Kinke “Anij e jela kijkan an kõtlok ro remõn jen men in kabo.” (2 Piter 2:9) Ñan kijenmij iumin melejoñ ko im ko, jej aikwij “karmijete jerawiwi im mõm ko an lõl, im . . . mour im jadõr im jimewõt, im kwojarjar ilo lõl in.” (Titus 2:12) Einwõt Ri Christian ro, jej aikwij kejbãrok kij bwe jabdewõt men in kamõjnoik kij ikijen mõm in kanniek ko im jerbal ko ren jab kabañ kabuñ eo ad ekwojarjar im kokkure. Kiõ jen etale jet ian men in kabañbañ kein.
Ekkõl Wõt kin Men ko Rej Kabañ Kabuñ eo Ekwojarjar
14. Ta eo jej aikwij kememej kake elañe jej lorak ilo aujid in arõk mweiuk?
14 Arõk mweiuk ej juõn aujid ñan elõñ. Jemaroñ mone kij bareinwõt, im “lemnok [bwe] tõmak ej ken koorlok dala.” Inem, emaroñ kaberan kij kajerbal liki eo an ri tõmak ro mõttad ilo jõkkar. (1 Timote 6:5) Bareinwõt jemaroñ bwid im beek bwe ej emõn wõt ñan jibede juõn Ri Christian emweie im muriik ibben meñe kwoj jelã kwojamin kamaat muri eo am ibben. (Sam 37:21) Ak ej kabuñ eo ekwojarjar, jab korlok mweiuk ko, “eor an kalimur kin mour in, kab mour eo e naj itok.” (1 Timote 4:8) Kinke ‘jaad jab bõktok jabdewõt men ilo lal im jab maroñ bõklok jabdewõt men jen e,’ jej aikwij kalaplok kõnan eo ad ñan mour ilo juõn wãwen “ekwojarjar im jokõne” wõt im kõtlok bwe en wõr “mõña im nuknuk ko ibbed, im jokane kaki.’—1 Timote 6:6-11.
15. Ta eo jemaroñ kõmmane elañe bukõt men in kamõnõnõ ko ej kautameik kabuñ eo ad ekwojarjar?
15 Jibadõk men in kamõnõnõ ko remaroñ kaboub kij jen kabuñ eo ekwojarjar. Jej aikwij ke kõmman oktak ko ilo mõkaj kin men in? Emol, ewõr tokjen jen ad kamineneik enbwiniir im ikkure. Ak, ãjinkij rot kein jidik wõt tokjeir ñe jen keidi ibben mour indio. (1 Jon 2:25) Ran kein, elõñ armij “rej yokwe men in kabuñburueir elap jen air yokwe Anij, ro rej kõmõnmõn wãwen mwilir, a ilo burueir rej karmijete emõn,” im jej aikwij ilok jen armij rot rein. (2 Timote 3:4, 5) Ro rej kaorõk kabuñ eo ekwojarjar rej “mõke kamweiukiuk ir kin foundesõn emõn mae ien ej itok, bwe ren bõk mour eo emol.”—1 Timote 6:19.
16. Ta mõm ko renana rej kautameik jet armij jen air mour ekkar ñan kien ko rewãnik an Anij, im ewi wãwen ad maroñ anjo ion mõm kein?
16 Den in kadõk im uno ko rejõkkar, mour etton, im mõm ko renana remaroñ kokkure kabuñ eo ad ekwojarjar. Bo ilo manit kein emaroñ kautameik kij jen ad mour ekkar ñan kien ko rewãnik an Anij. (1 Dri Korint 6:9, 10; 2 Dri Korint 7:1) Paul bareinwõt ear aikwij kijenmij ilo melejoñ eo kin enbwin eo ejerawiwi. (Dri Rom 7:21-25) Jej aikwij lukkun kate kij ñan karreoik kij jen kõnan ko rejjab emõn. Ñan wanjoñok, jej aikwij beek ilo buruõd bwe jen erreo ilo mour. Paul ej jiroñ kij: “Komin kajeeklok ra ko rami rej bed ion lõl; lũñ etton, kijoñ, im mõm enana, im arõk mweiuk eo kabuñ ñõn ekjõp.” (Dri Kolosse 3:5) Ñan kajeeklok mõttan enbwinid kin manit ko renana jej aikwij beek in joloki. Jar jen buruõd ñan bõk jibañ jen Anij enaj kamaroñ kij ñan jõjõik kõnan ko renana im jibadõk men ko rewãnik im kabuñ eo ekwojarjar meñe jej bed ibwiljin jukjuk im bed in enana.
17. En ewi wãwen ad lemnak kin kaje im kauwe?
17 Buromõj im ebwer emaroñ kamõjnoik kijenmij eo ad im lukkun jelet kabuñ eo ad ekwojarjar ilo juõn wãwen enana. Elõñ ri karejar ro an Jehovah rar buromõj im ebwer. (Bwinbwin 11:11-15; Ezra 4:4; Jonah 4:3, NW) Elaptata buromõj im ebwer emaroñ lukkun jelet kij elañe ej koba ibben ellotan kin ad lõkatip ak kin ad bõk kaje ak kauwe. Bõtab, kaje im kajimwe, rej kamol bwe ewõr an Anij itoklimo im yokwe. (Dri Hibru 12:5-7, 10, 11) Kaje en jab melelen baj kauwe wõt ak ej melelen katakin kij ñan bed ilo ial eo ewãnik. Elañe jej ettã buru, jenaj kamolol im bõk nan in kakabilek eo, im kile bwe “nan in kowe ko im katak rej ial im mour.” (Jabõn Kennan 6:23) Men in emaroñ jibañ kij wõnmanlok wõt ilo jitõb im jibadõk kabuñ eo ekwojarjar.
18. Ta eddo eo ad ñe ewõr abañ ko ikõtad make im juõn armij?
18 Bwid in melele im lõkatip remaroñ aitwerõke kabuñ eo ad ekwojarjar. Remaroñ kabwer ak kamakit jet armij bwe ren kamakelok iair jen ri tõmak ro mõttair. (Jabõn Kennan 18:1) Ak emõn bwe jen kememej bwe wõnmanlok wõt im lotane armij ak kijirãte armij emaroñ jelet kõtan eo ad ibben Jehovah. (Livitikõs 19:18) Emol, “eo e jab yokwe jein im jatin eo e ar lo e, ej ban yokwe Anij eo e ar jab loe.” (1 Jon 4:20) Ilo Katak eo an ion Tol eo, Jesus ear kalikar aikwij eo ñan kaiur im kajimwe abañ ko ikõtan don. Ear jiroñ ri roñjake ro an: “Inem elañe kwoj katok men in jortak eo am ion lokatok eo, im ijo kwoj kememej bwe kwar kalõkatip jeõm im jatim, kwon likit men in jortak eo am na iman lokatok eo, im ilok: kwon kainemõn jeõm im jatin mokta, inem kwon etal im katok.” (Matthew 5:23, 24, NW) Kajitõk kin jolok bwid emaroñ kamadmõd kinej in nan ko rekkañ ak kõmman ko renana. Juõn kõtan emwij an rup emaroñ kamadmõde im juõn kõtan emõn im ainemõn emaroñ jeblak elañe jej kajitõk kin jeorlok bwid im kalikar bwe jaad likjap in jerbal ilo jimwe. Bareinwõt Jesus ear letok kakabilek ko jet kin kilen kamadmõde abañ ko. (Matu 18:15-17) Jej lukkun mõnõnõ ñe jej lo tõbrak kin ad kate kij ñan kajimwe abañ ko!—Dri Rom 12:18; Dri Epesõs 4:26, 27.
Lor Joñok eo an Jesus
19. Etke elap an aorõk ñan ad anõk joñok eo an Jesus?
19 Melejoñ ko remaroñ kabol kij, ak rejjab aikwij kamade kij jen ad ettõr ilo iaikwij eo ñan bõk mour indio. Kememej bwe Jehovah emaroñ kanemkwoj kij jen melejoñ eo. Ñe jej “jolok men otemjej rerro” im “etõr ilo iaikwij eo emwij likit e imar,” jej aikwij “jerlok ñõn Jisõs, Dri tel im Dri kowãppen tõmak eo ar.” (Dri Hibru 12:1-3) Lukkun etale ilo tibdikin kin joñok eo an Jesus im kate kij ñan anõke ilo nan im jerbal enaj jibañ kij ñan kalaplok kabuñ eo ekwojarjar im kwalok e ñan juõn joñan elaplok.
20. Ta jinekjej ko renaj waloktok ñe jej jibadõk kadkad kein kijenmij im kabuñ eo ekwojarjar?
20 Kijenmij im kabuñ eo ekwojarjar rej jerbal ibben don ñan jibañ kij ñan kabin kejatdikdik eo ad ñan bõk lomor. Ilo ad kwalok kadkad kein raorõk, jemaroñ tiljek wõt ilo jerbal eo ad ekwojarjar ñan Anij. Meñe jej bed ilo melejoñ, jenaj lo mõnõnõ ñe jej lo yokwe im jerammõn eo an Jehovah kinke jej kijenmij im jerbale kabuñ eo ekwojarjar. (Jemes 5:11) Bareinwõt, Jesus make ear kallimuri kij: “Ilo ami kijenmij kom naj jibarek ami mour.”—Luk 21:19.
Ewi Wãwen Am Naj Uak?
• Etke kijenmij ej juõn men eaorõk?
• Ta in kabuñ eo ekwojarjar, im ewi wãwen kalikare?
• Ewi wãwen ad maroñ ejaak im debij juõn kõtan ebak ñan Anij?
• Ta jet ian men ko rej kabañ kabuñ eo ad ekwojarjar, im ewi wãwen ad maroñ kejbãrok kij jeni?
[Pija ko ilo peij 18, 19]
Kabuñ eo ekwojarjar ej alikar ilo elõñ wãwen ko
[Pija ko ilo peij 20]
Ekkõl wõt kin men ko renaj kabañ kabuñ eo am ekwojarjar