Kadkad Ko Jej Aikwij Jibadõki

“Kwon [jibadõk am] wãnik im kwojarjar im tõmak im yokwe im kijenmij im inemmõn.”​​—1 TIM. 6:​11.

1. Armij ro rej kajerbal aolepen mour eo air ñan jibadõk ta?

KAIN jibadbad rot ko armij ro rej jibadõki ilo ran kein? Einwõt an Bible eo kwalok, bwe elõñ armij rej jibadõk mejenkajjik ko ejelok tokjeir. Jet armij rej jolok elap ien ñan jibadõk “men ko ejjelok tokjeir,” kinke rej tõmak bwe mweiuk ko remaroñ bõktok mõnõnõ. (Ken. 12:​11) Jet rej “kebaktok ro rej lore nana,” im rej kõmman bwe ikkure im menin kamõnõnõ ko ren men ko moktata ilo mour eo air. (Sam 119:150) Meñe armij ro rej kate wõt im jibadõk men kein ilo kanniek, ilo mol rej “kõñ kõto.”​​—Ekk. 1:14.

2. (a) Ta ãjinkij eo Anij ear rejañ jet Ri Christian ro bwe ren jibadõke? (b) Ta mejenkajjik eo Jehovah ej lelok ñan enañin aolep Ri Christian ro rej jibadõke rainin?

² Ilo oktan men in, ri jilek Paul ear kwalok juõn lemnak ejimwe me Ri Christian ro remaroñ jibadõke, ke ear je: “Ij kõtõbarlok ñõn kakõle, ñõn mejenkajik eo an kij eutiej an Anij ilo Kraist Jisõs.” (Pil. 3:​14) Bible eo ej kwalok bwe oran in 144,000 ri kabit ro, ekoba Paul, rej bõk ãjinkij eo ñan mour ilañ. Renaj iroij ibben Jesus Christ ñe ej jerbal einwõt Iroij iumin Juõn Thousand Yiõ ko ion aolepen lal. Ej juõn mejenkajjik eaibujuij me Anij ear kir rein bwe ren jibadõke! Bõtab, enañin aolep Ri Christian ro remol rainin rej jibadõk bar juõn mejenkajjik. Ilo yokwe, Jehovah ej lelok ñan ir men eo Adam im Eve rar luji, mour indio ilo paradise ion lal.​​—Rev. 7:​4, 9; 21:​1-4.

3. Ewi wãwen jemaroñ kwalok ad kamolol kin joij eo an Anij?

³ Armij ro rejjab wãppen rejjab maroñ wiaik mour indio ikijen air kate ir ñan kõmman men ko rejimwe. (Ais. 64:6) Wãwen eo wõt jemaroñ bõk mour indio ej ilo ad tõmak ilo menin letok eo jen Anij ñan bõk lomor ikijen Jesus Christ. Ta eo jemaroñ kõmmane ñan kwalok ad kamolol kin joij eo an Anij? Juõn wãwen ej bwe jen bokake kien in: “Ak kwe, armij in Anij, kwon ellok jen aoleb men kein. Kwon kate yuk bwe kwon [jibadõk am] wãnik im kwojarjar im tõmak im yokwe im kijenmij im inemmõn.” (1 Tim. 6:​11) Ñe jej lemnak kin kadkad kein, men in emaroñ jibañ kij kajjojo bwe jen beek ilo buruõd ñan jibadõk ‘elõñlok wõt.’​​—1 Tes. 4:1.

Jibadõk “Wãnik”

4. Etke jemaroñ liki bwe jibadõk “wãnik” eaorõk, im ta buñten nee ko juõn armij ej aikwij kõmmani ilo jinoin?

⁴ Ilo letter ko ruo an ñan Timothy, ri jilek Paul ear kwalok kadkad ko me armij ro rej aikwij jibadõki, im kajjojo ien, ear kwalok kin “wãnik” mokta jen kadkad ko jet. (1 Tim. 6:​11; 2 Tim. 2:​22) Bareinwõt, ilo eon ko jet ilo Bible eo elõñ alen ej rejañ kij bwe jen jibadõk wãnik. (Ken. 15:9; 21:21; Ais. 51:1) Juõn wãwen ñan jino ej ilo ad “jela . . . [kin] Anij [eo] emol, im Jisõs Kraist, eo [ear] jilkintok.” (Jon 17:3) Ñe juõn armij ej jibadõk wãnik enaj kamakit e bwe en​​—ukwelok jen bwid ko an mokta im “oktõk” ñan kõmanman ankilan Anij.​​—Jerb. 3:​19.

5. Ta eo jej aikwij kõmmane ñan debij juõn kõtan emõn ibben Anij?

⁵ Elõñ million armij ro me rej jibadõk wãnik rar wujleplok air mour ñan Jehovah im kalikare ilo air baptais ilo den. Elañe kwoj juõn Ri Christian emwij am baptais kiõ, kwonañin lemnak ke bwe wãwen mour eo am en kalikar bwe kwoj jibadõk wõt wãnik? Juõn wãwen kwoj kõmman men in ej ilo am kile jen Bible eo ta eo “emõn im nana” ñe kwoj aikwij kõmman bebe ko kin mour. (Read Dri Hibru 5:​14.) Ñan wanjoñok, elañe kwoj juõn Ri Christian me ebwe am ritto ñan am mare, emwij ke am jek ilo buruõm bwe kwon jab kaddek juõn kõtan ebak ibben juõn eo ejañin juõn Ri Christian emwij an baptais ñan am mareike? Aet, kwonaj eindein elañe kwoj jibadõk wãnik.​​—1 Kor. 7:​39.

6. Ñan lukkun jibadõk wãnik ej kitibuj ta?

⁶ Jutak einwõt juõn ri wãnik eoktak jen ad kowãnik kij make ak “wãnik jen joñan emõn.” (Ekk. 7:​16) Jesus ear kakkõl bwe jen jab kowãnik kij make ilõñin armij ro jet. (Mat. 6:1) Ñan lukkun jibadõk wãnik ej kitibuj buruõd​​—ekoba kajimwe lemnak ko, unin kõmman ko ad, im kõnan ko rebwid. Elañe jej wõnmanlok im kõmmane men in, jejamin kõmman bwid ko relap. (Read Jabõn Kennan Ko 4:​23; keidi Jemes 1:​14, 15.) Bareinwõt, Jehovah enaj kajerammõn kij im jibañ kij jibadõk kadkad ko jet kadkadin Christian.

Jibadõk “Kwojarjar”

7. Ta in kabuñ ilo “kwojarjar”?

⁷ Kabuñ ilo kwojarjar ej kitibuj ad lukkun kijejeto im tiljek wõt. Juõn dictionary in Bible eo ej kwalok bwe nan in Greek eo kar ukõte “kwojarjar” ej kalikar “juõn lemnak emõn ñan jab kõtlok bwe jabdewõt men en kamõjnoik ak kadiklok ad mijak Anij.” Ri Israel ro ekkã air kar likjap in kabuñ ilo kwojarjar, im ear alikar kin jab bokake ko air elikin an Anij kanemkwoj ir jen Egypt.

8. (a) Jerawiwi eo an Adam ear bõkmantak ta kajitõk eo? (b) Ewi wãwen uak eo ñan “men eo ettino” ear alikar?

⁸ Iumin elõñ thousand yiõ ko elikin an kar armij eo ewãppen Adam jerawiwi, juõn kajitõk kar jañin uake ej eñin, “Ewõr ke jabdewõt armij me enaj maroñ kabuñ ilo juõn wãwen ewãppen im kwojarjar?” Iumin elõñ buki yiõ ko, ejelok juõn armij ejerawiwi ear maroñ kabuñ ilo kwojarjar im wãppen. Ak ilo ien eo ejejjet Anij ear karõke, Jehovah ear kwalok uak eo ñan “men eo etino.” Ear bõk mour eo an Nejin jen lañ im likiti ilo lojen Mary bwe en lotak einwõt juõn armij ewãppen. Ilo aolepen mour eo an ion lal im ekoba ien eo ear mij ilo juõn wãwen ekajookok, Jesus ear kwalok ta melelen an lukkun kijejeto im tiljek ñan Anij eo emol. Jar ko an rar kalikar joñan an kautiej Anij eo an ilañ. (Mat. 11:25; Jon 12:​27, 28) Kin men in, Jehovah ear kakõrmole Paul bwe en konono kin “kwojarjar” ke ear kamelele kin mour eo emõn an Jesus.​​—Read 1 Timote 3:​16.

9. Ewi wãwen jemaroñ jibadõk kwojarjar?

⁹ Ilo mour eo ad ejjab wãppen, jejjab maroñ kwalok kwojarjar eo ewãppen. Ak jemaroñ jibadõke. Ñan kõmman men in jej aikwij lukkun lor joñok eo an Christ. (1 Pit. 2:​21) Inem, jejamin einwõt ro rejelã mõn me rar ‘lor wõt mantin kwojarjar, ak rej kejekdron kajur eo an.’ (2 Tim. 3:5) Ej melelen bwe kabuñ ilo kwojarjar ej jelet ballid im baotokid. Ñan wanjoñok, jekdon elañe jej kãlet juõn nuknuk jej kõnake ñe jej mare ak kõnake ñe jej kaikujkuj, ballid im baotokid rej aikwij kautiej “Anij.” (1 Tim. 2:​9, 10) Aet, jibadõk kwojarjar ej kitibuj ad jerbale kien ko rewãnik an Anij ilo mour eo ad ran otemjej.

Jibadõk “Tõmak”

10. Ta eo jej aikwij kõmmane ñan kakajur tõmak eo ad?

¹⁰ Read Dri Rom 10:17. Ñan bõk im debij juõn tõmak ekajur, juõn Ri Christian ej aikwij kalmenlokjen kin mol ko raorõk jej loi ilo Nan eo an Anij. “Dri korijer e tiljek im meletlet” ear letok elõñ book ko remõn. Juõn book elap tokjen kin men in ej Jelãlokjen Eo Ej Tellok ñan Mour Indio, kinke book in ej jibañ kij ñan kalaplok ad jelã kin Christ im kajeoñe e. (Mat. 24:​45-​47) Kumi in ri karejar eo ej bareinwõt karõk kwelok ko, assembly im convention ko, im elõñ iair rej kamelele kin katak ko an Jesus. Kwoj lo ke jabdewõt wãwen ko kwomaroñ kortokjen karõk kein ke kwoj ‘kalaplok am kejbãrok men kein’ me Anij ej lewõj ñan yuk?​​—Hib. 2:1.

11. Ta jerbal eo an jar im bokake ilo ad jibadõk tõmak?

¹¹ Jar ej bar juõn menin jibañ ñan kalek tõmak eo ekajur. Juõn ien ri kalor ro an Jesus rar eowor ibben: “Kwon kalaplok am tõmak.” Ilo ettã buru jemaroñ akwelap ibben Anij kin ejja men eo wõt. (Luk 17:5) Ñan kalaplok tõmak eo ad, jej aikwij jar kin jibañ jen jitõb kwojarjar eo an Anij; tõmak ej mõttan “leen Jitõb.” (Gal. 5:​22) Bareinwõt, bokake kien ko an Anij ej kakajur tõmak eo ad. Ñan wanjoñok, jemaroñ kate kij ñan kalaplok ijo kunad ilo jerbal in kwalok nan. Men in enaj kalaplok mõnõnõ eo ad. Im ñe jej kalmenlokjen kin aolep jerammõn ko rej itok jen ad “bukot mokta ailiñ in Anij, im kwojarjar eo An,” tõmak eo ad enaj laplok.​​—Mat. 6:​33.

Jibadõk “Yokwe”

12, 13. (a) Ta kien eo ekãl an Jesus? (b) Ilo wãwen et ko raorõk jej aikwij jerbale yokwe eo an Christ?

¹² Read 1 Timote 5:​1, 2. Paul ear letok nan in kakabilek eo ekeie kin ewi wãwen Ri Christian ro remaroñ kwalok yokwe ñan don. Kabuñ eo ad ñan Anij ej aikwij koba ad bokake kien eo ekãl an Jesus bwe jen “yokwe dron” einwõt ear yokwe kij. (Jon 13:​34) Ri jilek John ear kalikar: “A jabrewõt eo, elañe eor mweiuk ko an lõl iben, im ej lo an jein im jãtin aikwij, im ej kili buruen jen e, ekijkan yokwe Anij en ber ilo e?” (1 Jon 3:​17) Kwomaroñ ke lemnak kin ien ko kwar kwalok kain yokwe rot in ekeie?

¹³ Bar juõn wãwen jej jibadõk yokwe ej ilo ad jeorlok bwid, im jab ellotane ro jeid im jatid. (Read 1 Jon 4:​20.) Jen men in, jekõnan lor nan in kakabilek eo: “Im komin joij ñõn dron, en emõn buruemi, jolok nana jen dron, einwõt Anij ilo Kraist E ar jolok ami nana.” (Ep. 4:​32) Ewõr ke juõn ilo congregation eo me kwomaroñ jerbale nan in kakabilek in ñan e? Kwonaj ke jeorlok an bwid?

Jibadõk “Kijenmij”

14. Ta eo jemaroñ katak jen congregation eo an Philadelphia?

¹⁴ Ebidodolok ad kate kij ñan jibadõk juõn mejenkajjik me ej kitibuj juõn ien ekadu jen ad jibadõk juõn eo ebin ak etto kõtõbare. Alikar, ñan jibadõk mejenkajjik eo ñan bõk mour indio jej aikwij kijenmij. “Bwe kw’ar drebij nan in kijenmij eo Aõ, inem I naj bareinwõt drebij yuk jen auõ in kabo eo e naj itok ion aolepen lõl,” im Iroij Jesus Christ ear jiroñ congregation in Philadelphia. (Rev. 3:​10) Emol, Jesus ear katakin ir kin aikwij eo ñan kijenmij​​—juõn kadkad ñan jibañ kij bwe jen jab ebwer ñe jej jelmae melejoñ im kabo ko. Ri Christian ro ilo congregation eo an Philadelphia ilo ebeben eo kein kajuõn rar juõn joñok ekanuij emõn kin kwalok kijenmij iumin elõñ melejoñ ko kin tõmak. Inem, Jesus ear kallimur ñan ir bwe enaj wõnmanlok im jibañ ir ilo melejoñ ko rej itok.​​—Luk 16:10.

15. Ta eo Jesus ear katakin kin kijenmij?

¹⁵ Jesus ear jelã bwe ri kalor ro an renaj kar jelmae kijirãt jen ro nukiir rejjab tõmak im ri lalin, inem elõñlok jen ruo alen ear rejañ ir ilo wãwen in: “Eo ej kijenmij ñõn jemlokõn naj lomoren e.” (Mat. 10:22; 24:​13) Ilo ien eo, Jesus ear kwalok wãwen eo ri kalor ro an remaroñ bõk kajur eo ñan kijenmij. Ilo juõn wanjoñok, ear keidi bũdej eo edekãke einwõt armij ro me “rej bõk nan [eo an Anij] kin lõñliñ” ak rar buñ jen tõmak ke rar jelmae melejoñ ko. Bõtab, ear keidi ri kalor ro an retiljek einwõt bũdej emõn kinke rar “drebije” nan in Anij ilo burueir im “kijenmij ilo air jebar leen.”​​—Luk 8:​13, 15.

16. Ta menin letok eo ear jibañ elõñ million armij ro ñan kijenmij?

¹⁶ Kwonañin lo ke key eo ñan kijenmij? Jej aikwij “drebije” nan in Anij, im jerbale ilo buruõd im lemnak eo ad. Kinke Bible eo etan New World Translation of the Holy Scriptures (Ukok in Lal eo Ekãl kin Jeje ko Rekwojarjar)​​—juõn ukok in Bible eo ejejjet im jimwe, im ebidodo melele​​—kar ukõte ilo elõñ kajin ko, men in ear kamaroñ elõñlok armij ro ñan readi. Ñe jej kalmenlokjen kin jet eon ko jen Nan eo an Anij ran otemjej enaj jibañ kij ñan bõk kajur eo jej aikwiji ñan jebar leen ilo “kijenmij.”​​—Sam 1:​1, 2.

Jibadõk “Inemmõn” im Ainemõn

17. (a) Etke “inemmõn” eaorõk? (b) Ewi wãwen an kar Jesus kwalok bwe ear inemõn?

¹⁷ Ejelok juõn emõnõnõ ñe juõn armij ej naruõn kin juõn men ear jab kõmmane ak ba. Ekkã an armij ro kwalok air illu ñe armij ro rej kinaaklok ir kin men ko rar jab kõmmani. Elaplok an emõn bwe jen kwalok “inemmõn”! (Read Jabõn Kennan Ko 15:1.) Kwoj aikwij lukkun kajur ñan kwalok inemõn ñe kwoj jelmae juõn nan in kinaak ejjab mol. Jesus Christ ear likit joñok eo ewãppen kin men in. “Ke ar konono nae E, e ar jab bar konono nae; ke E ar iñtan E ar jab kalelñoñ, a E ar mõke likit E ñõn Eo ej ekajet jime.” (1 Pit. 2:​23) Jejjab maroñ kõtmene bwe jenaj joñan wõt Jesus ilo ad kõmmane men in, ak jemaroñ ke kakõmõnmõnlok wãwen ad kwalok inemõn joñan wõt ad maroñ?

18. (a) Ta tokjen eo inemõn ej kõtõbrake? (b) Kadkad et eo juõn jej aikwij jibadõke?

¹⁸ Ilo ad kajeoñe Jesus, jej aikwij “pojõk ien otemjej” ñan jojomare tõmak eo ad, im kõmmane “kin inimõn im mijõk.” (1 Pit. 3:​15) Aet, ad kwalok inemõn emaroñ bõprae akwel ko, ikõtad im armij ro jej wõnmaik ir ilo jerbal in kwalok nan im ri tõmak ro mõttad. (2 Tim. 2:​24, 25) Inemõn ej jibañ kij ñan bõk ainemõn. Eñin unin, Paul, ilo letter eo an kein karuo ñan Timothy, ear kobaiki “ainemõn” einwõt juõn ian kadkad ko jej aikwij jibadõke. (2 Tim. 2:​22; keidi 1 Timote 6:​11) Aet, “ainemõn” ej bar juõn kadkad me Jeje ko ilo Bible rej rejañ kij bwe jen jibadõke.​​—Sam 34:14; Hib. 12:14.

19. Elikin ad etale kadkad ko jiljilimjuõn kadkadin Christian, ta eo kwoj beek ilo buruõm bwe kwonaj kõmmane, im etke?

¹⁹ Emwij ad katak kin jiljilimjuõn kadkad ko kadkadin Christian jej aikwij jibadõki​​—wãnik, kwojarjar, tõmak, yokwe, kijenmij, inemõn, im ainemõn. Ej juõn jerammõn elap ilo congregation otemjej ñe ro jeid im jatid rej kalaplok air kwaloki kadkad kein raorõk! Men in enaj kautiej Jehovah im kõtlok e bwe en jek nalõmed ñan nebar eo an.

Lemnak ko ñan Kalmenlokjen Kaki

• Jibadõk wãnik im kwojarjar ej kitibuj ta?

• Ta eo enaj jibañ kij ñan jibadõk tõmak im kijenmij?

• Ewi wãwen yokwe en kar jelet wãwen ad jerbal ibben don?

• Etke jej aikwij jibadõk inemõn im ainemõn?

[Pija eo ilo peij 12]

Jesus ear kakkõl kij ñan jab kowãnik kij make ñan kabwilõñ armij

[Pija eo ilo peij 13]

Jemaroñ jibadõk tõmak ilo ad kalmenlokjen kin mol ko jen Nan eo an Anij

[Pija eo ilo peij 15]

Jemaroñ jibadõk yokwe im inemõn