Wãwen An Manit ko Rejjab Mol Jelet Mour ko an Armij
KWOJ jelmaik juõn armij ñe kwoj jeblak ñan mweo imõm. Ej itak addi-lep in neem ilo juõn dekã. Juõn kain bao ej jañ ilo boñ. Kwoj ettõnak kin ejja ettõnak eo wõt elõñ alen. Ñan elõñ armij aolep men kein relamwan, im ejelok jorrãn. Ak ñan jet armij ro Iturilik in Africa, rar watõk men kein einwõt kakõlle ko, ennan ko jen jitõb ro ijoko jejjab maroñ loi kin mejed. Jerammõn ak jerata ko juõn iair ej itok wõt, ekkar ñan ta kakõlle eo im melelen.
Emol, tõmak eo ilo men ko ejelok bedbed ie, ej bed ijoko ilikin ailiñ in Africa bareinwõt. Meñe elõñ yiõ ko rar mour ilo juõn jukjuk im bed eo ejjab tõmak ilo Anij, ewõr juõn joñan ekabwilõñlõñ kin oran Ri China im ro rar jokwe ilo jikin ko rar naetan Soviet Union eo mokta rej tõmak wõt ilo men ko ejelok bedbed ie. Ilo ailiñ in America im ailiñ ko rejjab mõttan communist ilo Europe, elõñ armij rej etale horoscope ak atartar ion makitkit ko an iju ko ñan tel mour ko air, mijak kin 13 ran in Friday, im kejbãrok ir jen kuuj ko rekilmej. Jet armij ro jen Itueañ in lal in rej watõk meram ko itueañ ilañ ak aurora borealis einwõt juõn kakõllan tarinae im nañinmij. Ilo India, nañinmij in AIDS ej jededlok jen ro ri kattõr truck ko kinke rej tõmak bwe rej aikwij belele ñan kaemololoik enbwiniir ilo ran ko rebwil. Ilo Japan, ro rej kũbũj roñ ko rej tõmak bwe ej juõn kakõllan enana elañe juõn kõrã ej deloñ ilo roñ eo mokta jen air kamwijlok air kõmman men eo. Tõmak ilo men ko ejelok bedbed ie ear alikar ilo ikkure ko ak sport. Juõn ri ikkure volleyball ear ba bwe unin an kar wini ikkure ko kinke ear takinkin kin takin ko rekilmej im jab ko remouj. Lajrak in kain tõmak rot in ejelok jemlokin.
Ak ta kin kwe? Ewõr ke juõn lelñoñ ittino, im ejelok bedbed in? Juõn tõmak, ak jimettan in juõn tõmak, ak manit kin juõn men ejelok bedbed ie ej jelet yuk” ke? Uak eo am emaroñ kalikar elañe tõmak in kin men ko ejelok bedbed ie en jelet mour eo am, kinke eñin wãwen an juõn ekkatak kamelele kin ta melelen “superstition” ak tõmak kin men ko ejelok bedbed ie.
Juõn armij eo ej kõtlok bwe manit ko rejjab mol ak superstition en jelet bebe ko an im makitkit ko an ej kõtlok bwe juõn men ejjab melele kake ej tel mour eo an. Men in ej juõn men emeletlet ke? Emõn ke ad kõttãik kij ñan juõn men ejjab alikar im nana? Superstition ak manit ko rejjab mol ej ke juõn men ejelok jorrãn im kauwatata ie?